ಮಂಜೇಶ್ವರ: ಕನ್ನಡ ಬೊಕ್ಕ ತುಳು ಚಿತ್ರರಂಗದ ಪುಗರ್ತೆದ ಪೋಷಕೆರ್ ಬೊಕ್ಕ ಹಾಸ್ಯ ನಟೆ ಪ್ರಕಾಶ್ ಕೆ. ತೂಮಿನಾಡು ಮೆರೆನ ಅಮ್ಮ ಗಿರಿಜಾ ಮೇರ್ ಹುಷಾರ್ ದಾಂತೆ ತೀರ್ ಪೋಯೆರ್.
ಮೆರೆನ ಅಕೇರಿದ ಕ್ರಿಯೆ ಅಂಗಾರೆ ಬೊಲ್ಪುಗು (ಇನಿ) ತೂಮಿನಾಡು ಇಲ್ಲಲ್ ನಡಪರೆ ಉಂಡು ಪಂದ್ ಕುಟುಂಬ ಸದಸ್ಯೆರ್ ತೆರಿಪಾದೆರ್.
ಬೊಂಬೈ: ಪಿದಯಿ ಊರುದ ಕನ್ನಡಿಗೆರೆನ ಪುಗರ್ತೆದ ಬೊಕ್ಕ ಸಾಂಸ್ಕೃತಿಕ ರಾಯಭಾರಿಯಾದ್ ಜನಸೇವೆಡ್ ಇಪ್ಪುನ ಕರಿನ ಮೂಜಿ ದಶಕರ್ದ್ ಭಾರತೀಯ ಸಂಸ್ಕಾರ ಸಂಸ್ಕೃತಿ ಇಸೇಸವಾದ್ ಕರುನಾಡ ಕಲೆನ್ ಒರಿಪಾವುನ ಅವೆತೊ ಸಂಗೀತ ನೃತ್ಯ ಕಲಾವಿದೆರೆಗ್ ಸಕಾಲಡ್ ಸಹಾಯಹಸ್ತ ಕೊರ್ದು ಸ್ವಂದಿಸಾವುನ ಕಲಾ ಸೌರಭ ಸಂಸ್ಥೆ ಇತ್ತೆ ಶಿರ್ಡಿ ಶ್ರೀ ಸಾಯಿಬಾಬಾನ ಸಾನಿಧ್ಯಡ್ ವೈವಿಧ್ಯಮಯ ಬಹುಭಾಷಾ ಸಾಂಸ್ಕೃತಿಕ ಲೇಸ್ ನ್ ಪ್ರದರ್ಶನ ಮಲ್ಪುನ ರೀತಿ ನೀತಿ ತೂದು ಮನಸ್ ದಿಂಜಿಂಡ್ ಪಂದ್ ಸಾಯಿ ಪ್ಯಾಲೆಸ್ ಹೋಟೆಲ್ ಸಮೂಹದ ಆಡಳಿತ ನಿರ್ದೇಶಕೆರ್ ಉದಯ ಶೆಟ್ಟಿ ತೆರಿಪಾದೆರ್.
ಮೇರ್ ಶಿರ್ಡಿ ಸಾಯಿ ನಗರ ಶ್ರೀ ಸಾಯಿಬಾಬಾ ಸಂಸ್ಥಾನಮ್ ಮುತಾಲಿಕೆದ ಸಾಯಿ ಸಭಾಂಗಣಡ್ ಕರಿನ ಸುಕ್ರಾರ (ಫೆ.16) ನಡತಿನ ಕಲಾ ಸೌರಭದ 31ನೇ ವರ್ಷದ ಸಾಂಸ್ಕೃತಿಕ ಸಂಗೀತ ಉಚ್ಚಯದ ಸರಣಿ ಲೇಸ್ ನ್ ತುಡರ್ ಅರ್ಲಾದ್ ಉದಿಪನ ಮಲ್ತ್ ದ್ ಪಾತೆರಿಯೆರ್.
ಶಿರ್ಡಿ ಸಂಸ್ಥಾನಮ್ ಸಾಂಸ್ಕೃತಿಕ ವಿಭಾಗದ ಅಧಿಕಾರಿ ಎಸ್ ಜಾಧವ್ ಎಡ್ಡೆಪ್ಪು ಬಯಕಿಯೆರ್.
ಪುಷ್ಪಾಂಜಲಿ ನೃತ್ಯ ಅಕಾಡೆಮಿದ ನಿರ್ದೇಶಕೆರ್ ಗುರು ವಿದ್ವಾನ್ ಕೋಲಾರ ರಮೇಶ್, ಶಿರ್ಡಿ ಸಾಯಿ ಪ್ಯಾಲೆಸ್ ಹೋಟೆಲ್ ದ ಆಡಳಿತಾಧಿಕಾರಿ ಶಶಿ ಶೆಟ್ಟಿ, ಸುರೇಶ್ ಕೋಟ್ಯಾನ್, ಪುಣೆದ ಉದ್ಯಮಿ ಜಗದೀಶ್ ಪೂಜಾರಿ, ಕಲಾ ಸೌರಭ ಭಜನಾ ಕೂಟದ ಮುಖ್ಯಸ್ಥೆ ಸುಶೀಲ ಎಸ್ ದೇವಾಡಿಗ, ಸಂಗೀತ ನಿರ್ದೇಶಕೆರ್ ಶೇಖರ್ ಸಸಿಹಿತ್ಲು, ಗಾಯಕೆರ್ ಪ್ರಮೋದ್ ಕಾಂಬ್ಳಿ ಚಾವಡಿಡ್ ಇತ್ತೆರ್.
ಸಂಗೀತ ನಿರ್ದೇಶಕೆರ್ ಕಲಾ ಸೌರಭ ಕೂಟದ ನಿರ್ದೇಶಕೆರ್ ಪದ್ಮನಾಭ್ ಸಸಿಹಿತ್ಲು ಕಲಾ ನಿರ್ದೇಶಕೆರೆನ್ ಪರಿಚಯಿಸಾದ್ ಪ್ರಸ್ತಾವನೆ ಮಲ್ತೆರ್.
ಕಲಾ ಸೌರಭದ ಬೊಂಬೈ ಬೊಕ್ಕ ಬೆಂಗ್ಲೂರುದ 70ರ್ದ್ ಎಚ್ಚ ಕಲಾವಿದೆರ್ ಸುರುತ್ತ ದಿನ ಶ್ರೀ ಸಾಯಿ ನಗರ, ಶ್ರೀ ಶನಿ ಸಿಂಗ್ನಪೂರ್ ಎತ್ತ್ ದ್ ಶ್ರೀ ಶನಿ ದೇವೆರೆನ ಪೂಜೆ ನಡಪಾದ್ ಪ್ರಾರ್ತನೆ ರೂಪವಾದ್ ಮಹಿಳಾ ಕೂಟದಕ್ಲೆರ್ದ್ ಭಜನಾ ಲೇಸ್ ನಡತ್ಂಡ್. ಸುರುಕು ಸುಶೀಲ ದೇವಾಡಿಗ, ಗೀತ ದೇವಾಡಿಗ ಬೊಕ್ಕ ಸಮೂಹ ಶ್ರೀ ಸಾಯಿ ಸ್ತುತಿ ಭಜನಾವಳಿ ನಡತ್ಂಡ್.
ಗುರು ವೈಶಾಲಿ ಜೋಶಿ ಮೇರ್ ಕಥಕ್ ಶೈಲಿಡ್ ಗಣೇಶ್ ವಂದನ ಬೊಕ್ಕ ವಿದೂಷಿ ಆಶಾ ನಂಬಿಯಾರ್ ನಿರ್ದೇಶನಡ್ ವೈಷ್ಣವಿ ಕಲಾ ಕ್ಷೇತ್ರ ಬೊಂಬೈ ಕೂಟ ಭಕ್ತಿ ಪ್ರಧಾನ ಗೀತೆದ ಒಡಿಸ್ಸಿ ನೃತ್ಯ ಬೊಕ್ಕ ಕಲಾ ಸೌರಭದ ಸಂಗೀತ ಕಲಾವಿದೆರ್ ಬಹುಭಾಷೆದ ಸಾಯಿ ಸ್ತುತಿ ಭಕ್ತಿ ರಸಮಂಜರಿ ನಡತ್ಂಡ್.
ಸಂಗೀತ ವರ್ಗಡ್ ನಿರ್ದೇಶಕೆರ್ ಶೇಖರ್ ಸಸಿಹಿತ್ಲು, ಚಂದು ಪಂಚಾಲ್, ದಿನೇಶ್ ಕಂಡೇಕರ್ ಬೊಕ್ಕ ಚಾರುಕೆಶ್ ಬಂಗೇರ ಪಾಲ್ ಪಡೆದಿತ್ತೆರ್.
ಗಾಯನಡ್ ಪ್ರಮೋದ್ ಕಾಂಬ್ಳಿ, ಸದಾಶಿವ್ ಪೂಜಾರಿ, ವಿದ್ಯಾ ಅಲಂಕಾರ್, ಶ್ರದ್ಧಾ ದೇಸಾಯಿ, ಬೇಬಿ ಸಮೃದ್ಧಿ ಪೂಜಾರಿ, ಸುಮಧುರ ಗೀತೆದೊಟ್ಟಿಗೆ ಶ್ರೀ ಸಾಯಿ ಸ್ತುತಿನ್ ಪಂಡೆರ್.
ರಡ್ಡನೇದಾದ್ ನಾಟ್ಯಾಂಕಿತ ಕಲಾ ಮಂದಿರದ ನಿರ್ದೇಶಕಿ ಕು. ಅಂಕಿತ ನಾಯಕ್ ಬೊಕ್ಕ ಕು.ಸಪ್ನಾ ತಾಪ ಬಳಗ ಯಕ್ಷಕುಣಿತ ಬೊಕ್ಕ ಭಸ್ಮಾಸುರ ಮೋಹಿನಿ ಯಕ್ಷ ನೃತ್ಯರೂಪಕ, ಅಕೇರಿಗ್ ಪುಷ್ಪಾಂಜಲಿ ನೃತ್ಯ ಕಲಾ ಅಕಾಡಮಿ ಬೆಂಗ್ಲೂರು ಕಲಾವಿದೆರ್ ಅಂತರಾಷ್ಟ್ರೀಯ ಪುಗರ್ತೆದ ನೃತ್ಯಗುರು ವಿದ್ವಾನ್ ಕೋಲಾರ ರಮೇಶ್ ನಿರ್ದೇಶನಡ್ ಕುವೆಂಪು ಮಹಾ ಕಾವ್ಯ ಆಧಾರದ ಸಂಪೂರ್ಣ ರಾಮಾಯಣ ದರ್ಶನಂ ನೃತ್ಯ ರೂಪಕ ನಡತ್ಂಡ್.
ಸಂಗೀತ ಉಚ್ಚಯದ ಒಟ್ಟು ಲೇಸ್ ನ್ ಬಹುಭಾಷಾ ನಟಿ ಸಂಘಟಕಿ ಚಂದ್ರಾವತಿ ವಸಂತ್ ಹಿಂದಿ ಮರಾಠಿ ಭಾಷೆಡ್ ಸುಧಾರಿಕೆ ಮಲ್ತೆರ್. ಸರಸ್ವತಿ ಬಿಲ್ಲವ, ಸರೋಜ ನಾಯಕ್, ಸವಿತಾ ಪೂಜಾರಿ, ಸಚಿನ್, ಪೃಥ್ವಿರಾಜ್ ಮುಂಡ್ಕೂರು ಸಹಕಾರ ಮಲ್ತೆರ್. ಗುರು ವೈಶಾಲಿ ಜೋಶಿ ಸೊಲ್ಮೆ ಸಂದಾಯೆರ್. ಸಾಯಿ ನಾಮಸ್ತುತಿದೊಟ್ಟಿಗೆ ಲೇಸ್ ಮುಗಿತಲ ಆಂಡ್.
ಬ್ರಹ್ಮಾವರ ಬಿಲ್ಲವ ಸಮಾಜ ಸೇವಾ ಸಂಘ (ರಿ.) ದ ಮುತಾಲಿಕೆಡ್ ಬ್ರಹ್ಮಶ್ರೀ ನಾರಾಯಣಗುರು ಮಂದಿರದ ಉದಿಪನ ಬೊಕ್ಕ ಗುರುಕ್ಲೆನ ಮೂರ್ತಿ ಪ್ರತಿಷ್ಠೆ ಮಾ.3 ಐತಾರ ಬ್ರಹ್ಮಾವರ ನಾರಾಯಣಗುರು ಸಭಾಭವನಡ್ ನಡಪರೆ ಉಂಡು.
ಸೋಲೂರು ಮಠ ಆರ್ಯ ಈಡಿಗ ಸಮಾಜದ ಪೀಠಾಧಿಪತಿ ಶ್ರೀ ವಿಖ್ಯಾತನಂದ ಸ್ವಾಮೀಜಿ ಆಶೀರ್ವಚನ ಕೊರಿಯೆರೆ ಉಲ್ಲೆರ್. ಪ್ರಾಥಮಿಕ ಬೊಕ್ಕ ಪ್ರೌಢ ಶಿಕ್ಷಣ ಸಚಿವೆರ್ ಲೇಸ್ ದ ಮಧು ಬಂಗಾರಪ್ಪ ಲೇಸ್ ಉದಿಪನ ಮಲ್ಪುವೆರ್. ಬ್ರಹ್ಮಾವರ ಬಿಲ್ಲವ ಸಮಾಜ ಸೇವಾ ಸಂಘ (ರಿ.) ದ ಗುರ್ಕಾರೆ ಬಿ.ಎನ್ ಶಂಕರ ಪೂಜಾರಿ ಲೇಸ್ ದ ಗುರ್ಕಾರ್ಮೆನ್ ಒಯಿಸೊನ್ವೆರ್.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ಬ್ರಹ್ಮಾವರ ಬಿಲ್ಲವ ಸಮಾಜ ಸೇವಾ ಸಂಘ (ರಿ.) ದ ಗುರ್ಕಾರೆ, ಪದುಕೆರ್, ಸರ್ವಸದಸ್ಯೆರ್ ಬೊಕ್ಕ ಮಹಿಳಾ ಘಟಕ, ಯುವ ವೇದಿಕೆ ಲೆಪ್ಪೋಲೆಡ್ ತೆರಿಪಾದೆರ್.
ಜೆಸಿಐ ಕೊಕ್ಕಡ ಕಪಿಲ ಘಟಕದ ಮುತಾಲಿಕೆಡ್ ದಿವ್ಯಜ್ಯೋತಿ ಆಂಗ್ಲ ಮಾಧ್ಯಮ ಶಾಲೆ ಕಾಯರ್ತ್ತಡ್ಕದ ವಿದ್ಯಾರ್ಥಿಲೆಗ್ “ಗೆಲುವಿಗೆ ಇನ್ನೊಂದೇ ಮೆಟ್ಟಿಲು” ಪನ್ಪುನ ಶೀರ್ಷಿಕೆಡ್ “ಪರೀಕ್ಷೆ ಬರೆಪುನೆ ಎಂಚ?” ಪನ್ಪುನ ತರಬೇತಿ ಲೇಸ್ ನಡತ್ಂಡ್.
ಈ ತರಬೇತಿ ಲೇಸ್ ನ್ ಸಂಪನ್ಮೂಲ ವ್ಯಕ್ತಿ ಜೆಸಿಐ ವಲಯ ತರಬೇತಿದಾರೆ ಜೆಸಿಐ Sen ಪ್ರದೀಪ್ ಬಾಕಿಲ ಮೇರ್ ನಡಪಾದ್ ಕೊರಿಯೆರ್.
ಈ ತರಬೇತಿ ಲೇಸ್ ದ ಚಾವಡಿಡ್ ಗುರ್ಕಾರೆ ಜೆ ಸಿ ಎಚ್ ಜಿ ಎಫ್ ಸಂತೋಷ್ ಜೈನ್, ಕಾರ್ಯದರ್ಶಿ ಅಕ್ಷತ್ ರೈ, ಮಲ್ಲ ಬಿನ್ನೆರಾಯಿನ ಸಿಸ್ಟರ್ ದಿವ್ಯ ಮರಿಯಾ, ಮುಖ್ಯೋಪಾಧ್ಯಾಯೆರ್ ಕಾಯರ್ತ್ತಡ್ಕ ಲೇಸ್ ದ ನಿರ್ದೇಶಕೆರ್ ಜೆ ಸಿ ಪಿ ಟಿ ಸಬಾಸ್ಟಿನ್ ಇತ್ತೆರ್.
ಈ ಪೊರ್ತುಡು ಪೂರ್ವ ಗುರ್ಕಾರೆ ಜೆ ಸಿ ಜೆ ಎಫ್ ಎಂ ಕೆ ಶ್ರೀಧರ್ ರಾವ್, ಕೋಶಾಧಿಕಾರಿ ವಿದ್ಯೇಂದ್ರ, ಪ್ರಿಯಾ ಜೆ ಅಮೀನ್, ಶಾಲೆದ ಶಿಕ್ಷಕ ವೃಂದ, ಆಡಳಿತ ಮಂಡಳಿ ಸದಸ್ಯೆರ್ ಬೊಕ್ಕ ಲೇಸ್ ದ ಕೇಂದ್ರ ಬಿಂದುಲಾಯಿನ ವಿದ್ಯಾರ್ಥಿ ಮಿತ್ರೆರ್ ಪಾಲ್ ಪಡೆದಿತ್ತೆರ್.
ವಿದ್ಯಾರ್ಥಿಲೆಗ್ ತೀಪೆತಿಂಡಿನ್ ಜೆಸಿ ಜಾನ್ಸನ್ ಪಟ್ಟಿಯೆರ್. ಜೆಸಿ ವಾಣಿ ಜೆಸಿ ಶ್ರವಣ್ ಓದಿಯೆರ್. ಜೆಸಿ ಎಚ್ ಜಿ ಎಫ್ ಸಂತೋಷ್ ಜೈನ್ ಎದ್ಕೊನಿಯೆರ್. ಜೆ ಸಿ ಪಿಟಿ ಸಬಾಸ್ಟಿನ್ ಸೊಲ್ಮೆ ಸಂದಾಯೆರ್.
ಹಳೆಯಂಗಡಿ ಬಿಲ್ಲವ ಸಮಾಜ ಸೇವಾ ಸಂಘ (ರಿ) ನೆತ್ತ 2024 ನೇ ವರ್ಷೊಗು ಅಧ್ಯಕ್ಷೆರಾದ್ ದ.ಕ.ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪಡೆದಿನ ಸಮಾಜಸೇವಕೆ ಚಂದ್ರಶೇಖರ ನಾನಿಲ್ ಕುಡೊರ ಆಯ್ಕೆ ಆಯೆರ್.
ಸಂಘದ ಚಾವಡಿಡ್ ಫೆ.25 ಐತಾರ ನಡತಿನ ಸಭೆಟ್ಟ್ ಪೊಸ ಅಧ್ಯಕ್ಷೆರ್ ಬೊಕ್ಕ ಪದುಕೆರ್ನ ಆಯ್ಕೆ ನಡತ್ಂಡ್.
ಚಂದ್ರಶೇಖರ ನಾನಿಲ್ ಮೇರ್ ಸಂಘದ ಕರಿನ ವರ್ಷದ ಅಧ್ಯಕ್ಷೆರಾದಿತ್ತ್ ದ್ ಪ್ರತಿಷ್ಠಿತ ಬಿಲ್ಲವ ಭವನ ಉದಿಪನಗ್ ಕಾರಣರಾತೆರ್.
ಹಳೆಯಂಗಡಿ ಲಯನ್ಸ್ ಕ್ಲಬ್ ದ ಸ್ಥಾಪಕಾಧ್ಯಕ್ಷೆರಾದ್, ಹಳೆಯಂಗಡಿ ಪಂಚಾಯತ್ ದ ಮಾಜಿ ಅಧ್ಯಕ್ಷೆರಾದ್, ಗುರು ಚಾರಿಟೇಬಲ್ ಟ್ರಸ್ಟ್‌ ದ ಮಾಜಿ ಅಧ್ಯಕ್ಷೆರಾದ್, ಪಾವಂಜೆ ಶ್ರೀ ಮಹಾಲಿಂಗೇಶ್ವರ ಜೀರ್ಣೋದ್ಧಾರ ಸಮಿತಿದ ಪ್ರಧಾನ ಕಾರ್ಯದರ್ಶಿಯಾದ್ ಧಾರ್ಮಿಕ ಬೊಕ್ಕ ಸಾಮಾಜಿಕ ಸೇವೆ ಮಲ್ತ್ ದ್ ಪುಗರ್ತೆನ್ ಪಡೆದೆರ್.
ಬೊಂಬೈ ಕುಲಾಲ ಸಂಘದ ಯುವ ಕ್ರೀಡೋತ್ಸವ ಲೇಸ್ ಫೆ.25 ಐತಾರ ಪನ್ವಲ್ ದ ಕರ್ನಾಳ ಸ್ಪೋರ್ಟ್ಸ್ ಅಕಾಡೆಮಿ ಮೈದಾನಡ್ ನಡಪರೆ ಉಂಡು.
ಈ ಲೇಸ್ ದ ಉದಿಪನ ಬೊಲ್ಪುಗು ಆದ್ ಬಯ್ಯಗ್ ಸಮಾರೋಪ ಸಮಾರಂಭ, ಇನಾಮು ಪಟ್ಟುನ ಲೇಸ್ ಭಾರೀ ಗೌಜಿಡ್ ನಡಪರೆ ಉಂಡು.
ಅಂಚೆನೆ ಬೊಲ್ಪುಗು ಚಹಾ ತಿಂಡಿ, ಮಧ್ಯಾಹ್ನ ವನಸ್ ದ ವ್ಯವಸ್ಥೆ ಬೊಕ್ಕ ಬಯ್ಯಗ್ ಚಹಾ ತಿಂಡಿದ ವ್ಯವಸ್ಥೆ ಉಂಡು.
ಈ ಲೇಸ್ ಗ್ ಮಾತೆರ್ಲಾ ಕುಟುಂಬ ಸಮೇತೆರಾದ್ ಪಾಲ್ ಪಡೆವೊಡು ಪಂದ್ ನವಿ ಬೊಂಬೈ ಸ್ಥಳೀಯ ಸಮಿತಿದ ಕಾರ್ಯದರ್ಶಿ ಎಲ್ ಆರ್ ಮೂಲ್ಯ ಲೆಪ್ಪೋಲೆಡ್ ತೆರಿಪಾದೆರ್.
ಮೀರಾರೋಡ್: ಮೀರಾರೋಡ್ ಪಲಿಮಾರು ಮಠತ್ತ ಶ್ರೀ ಬಾಲಾಜಿ ಸನ್ನಿಧಿಡ್ ವಾರ್ಷಿಕ ವರ್ಧಂತಿ ಉಚ್ಚಯ ಫೆ.24 ಸನಿಯಾರ ಗೌಜಿಡ್ ನಡಪರೆ ಉಂಡು.
ಬೊಲ್ಪುಗು ಬೇತೆ ಬೇತೆ ಧಾರ್ಮಿಕ ಲೇಸ್ ದೊಟ್ಟಿಗೆ ಉಚ್ಚಯ ಸುರು ಆಪುಂಡು. ಮಧ್ಯಾಹ್ನ ಮಹಾಪೂಜೆ, ಬಯ್ಯಗ್ ಸಾಮೂಹಿಕ ಶ್ರೀ ಸತ್ಯನಾರಾಯಣ ದೇವೆರೆನ ಪೂಜೆ, ಬಾಲಾಜಿ ಸನ್ನಿಧಿರ್ದ್ ಪಿದಾಡ್ ದ್ ಮೀರಾ ಭಾಯಂದರ್ ದ ರಾಜ್ಯ ಮಾರ್ಗವಾದ್ ಬ್ರಹ್ಮ ಮಂದಿರ- ಬಾಲಾಜಿ ಸನ್ನಿಧಿದ ಮುಟ್ಟ ತೇರ್ ಉಚ್ಚಯ, ಬಲಿ ಉಚ್ಚಯ, ತೊಟ್ಟಿಲ್ ಪೂಜೆ, ರಂಗ ಪೂಜೆ, ಮಹಾಪೂಜೆ ನಡಪರೆ ಉಂಡು.
ಈ ಬಗೆಟ್ಟ್ ಬಾಲಾಜಿ ಸನ್ನಿಧಿಡ್ ಆಡಳಿತ ಮಂಡಳಿ ಬೊಕ್ಕ ಬಾಲಾಜಿ ಪ್ರತಿಷ್ಠಾನ ಸಮಿತಿದ ಮುತಾಲಿಕೆಡ್ ಸಮಾಲೋಚನಾ ಸಭೆ ಫೆ.17 ನಡತ್ಂಡ್.
ಪ್ರತಿಷ್ಠಾನ ಸಮಿತಿದ ಗುರ್ಕಾರೆ ಸಚ್ಚಿದಾನಂದ ಶೆಟ್ಟಿ ಮುನ್ನಲಾಯಿಗುತ್ತು ಮೀರಾಭಯಂದರ್ ಈ ಸಭೆತ್ತ ಗುರ್ಕಾರ್ಮೆನ್ ಒಯಿಸೊಂದು ಪಾತೆರ್ದ್, ಹಿಂದೂ ಧರ್ಮದ ಸಾಂಘಿಕ ಶಕ್ತಿದಂಚ ಇಪ್ಪುನ ಬಾಲಾಜಿ ಸನ್ನಿಧಿದ ವರ್ಧಂತಿ ಉಚ್ಚಯನ್ ಭಾರೀ ಗೌಜಿಡ್ ಯಶಸ್ವಿ ಮಲ್ಪುನಲ್ಪ ಕೈತಲ್ದ ಮಾತ ಸಂಘ-ಸಂಸ್ಥೆಲು ಬೊಕ್ಕ ನಮ ಮತ ದುಂಬು ಬತ್ತ್ ದ್ ಶ್ರೀ ದೇವೆರೆನ ಉತ್ಸವದ ಕೆಲಸ ಕಾರ್ಯಡ್ ಪಾಲ್ ಪಡೆವೊಡು, ಭಜನಾ ಸಮಿತಿಲು ಆಯಾ ಸಮಿತಿದ ಉಡುಗೆ-ತೊಡುಗೆ, ಭಕ್ತೆರ್ ಸಂಸ್ಕೃತಿನ್ ತೂಪಾವುನ ಉಡುಗೆ ತೊಡುಗೆನ್ ಪಾಡೊಡು ಪಂದ್ ಬಿನ್ನಾಪು ಮಲ್ತೆರ್.
ಬಾಲಾಜಿ ಸನ್ನಿಧಿದ ಪ್ರಬಂಧಕೆರ್ ವಾಸುದೇವ ಉಪಾಧ್ಯಾಯೆರ್ ಪಾತೆರ್ದ್, ಪಲಿಮಾರು ಮಠತ್ತ ಸ್ವಾಮೀಜಿ ಶ್ರೀ ವಿದ್ಯಾಧೀಶ ಮೆರೆನ ಅಪೇಕ್ಷೆ ಬೊಕ್ಕ ಪ್ರೇರಣೆರ್ದ್ ನಡಪರೆ ಇಪ್ಪುನ ಶ್ರೀ ಶ್ರೀನಿವಾಸ ದೇವೆರೆನ ವರ್ಧಂತಿ ಉಚ್ಚಯಗ್ ಮಾತೆರೆನ ಸಹಕಾರ ಇಪ್ಪಡ್ ಪಂದ್ ಬಿನ್ನಾಪು ಮಲ್ತೆರ್.
ಚಾವಡಿಡ್ ಸುರೇಶ್ ಶೆಟ್ಟಿ ಗಂಧರ್ವ, ಪ್ರತಿಷ್ಠಾನ ಸಮಿತಿದ ಮಹಿಳಾ ಗುರ್ಕಾರ್ದಿ ಸುಮತಿ ಆರ್. ಶೆಟ್ಟಿ ಪಾಲ್ ಪಡೆದಿತ್ತೆರ್.
ಮೀರಾ ಭಯಂದರ್ ದ ಸುಮಾರ್ ಸಂಘ-ಸಂಸ್ಥೆದ ಪ್ರತಿನಿಧಿಲು, ಸಮಿತಿದ ಪದುಕೆರ್ ಈ ಸಭೆಟ್ಟ್ ಪಾಲ್ ಪಡೆದಿತ್ತೆರ್. ಈ ಲೇಸ್ ನ್ ಮಾನಾದಿಗೆದ ಪ್ರಧಾನ ಕಾರ್ಯದರ್ಶಿ ಚಂದ್ರಶೇಖರ್ ವಿ. ಶೆಟ್ಟಿ ಸುಧಾರಿಕೆ ಮಲ್ತ್ ದ್ ಸೊಲ್ಮೆ ಸಂದಾಯೆರ್.
ಬೆಂಗ್ಲೂರು ಗಾನಗಂಗೋತ್ರಿ ಕಲಾ ಸಂಘ (ನೊಂ) ದ 15ನೇ ವರ್ಷದ ಲೆಕ್ಕೊಡು ರಾಜಾ ಸತ್ಯವ್ರತ, ಶನಿಪ್ರಭಾವ ನಾಟಕ ಫೆ.24 ಸನಿಯಾರ ಬೆಂಗ್ಲೂರು ರವೀಂದ್ರ ಕಲಾಕ್ಷೇತ್ರಡ್ ನಡಪರೆ ಉಂಡು.
ಈ ಲೇಸ್ ಡ್ ಗಾನಗಂಗೋತ್ರಿ ಕಲಾ ಸಂಘದ ಗುರ್ಕಾರೆ ಬಿ.ಎಂ ಕೃಷ್ಣ, ಮಾನಾದಿಗೆದ ಗುರ್ಕಾರೆ ಎಂ.ಮುನಿರಾಜು, ಒತ್ತು ಗುರ್ಕಾರೆ ಎಂ ಮಾರಪ್ಪ, ಕಾರ್ಯದರ್ಶಿ ಎಸ್ ಟಿ ದಾಸಪ್ಪ, ಶ್ರೀ ಶನಿದೇವೆರ್ ಟಿ. ರಾಮಾಂಜಿನಿ, ರಾಜ ಸತ್ಯವ್ರತ ಸಿಎಂ ವೆಂಕಟೇಶ್, ಮಾಜಿ ಸಚಿವೆರ್ ಸದಾನಂದ ಗೌಡ, ಶಾಸಕೆರ್ ಭೈರತಿ ಸುರೇಶ್, ಹೆಬ್ಬಾಳ ಶ್ರೀ ಶನೇಶ್ಚರಸ್ವಾಮಿ ದೇವಲ್ಯದ ಪ್ರಧಾನ ಅರ್ಚಕೆರ್ ಆರ್. ಮಹೇಶ್ ಕುಮಾರ್ ಬೊಕ್ಕ ಪದುಕೆರ್, ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಮೀರಾ ಭಾಯಂದರ್ ಬಂಟ್ಸ್ ಫೋರಂದ ವಾರ್ಷಿಕ ಕ್ರೀಡಾಕೂಟ-2024 ಮಾ.3 ಐತಾರ ಶಾಂತಿ ನಗರ ಸೆಕ್ಟರ್ 10 ಮೈದಾನಡ್ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಕುಟುಂಬ ಸಮೇತೆರಾದ್ ಪಾಲ್ ಪಡೆವೊಡು ಪಂದ್ ಮೀರಾ ಭಾಯಂದರ್ ಬಂಟ್ಸ್ ಫೋರಂದ ಗುರ್ಕಾರೆ ಉದಯ ಎಂ ಶೆಟ್ಟಿ ಮಲಾರ್ ಬೂಡು ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ: ಜಪ್ಪಿನಮೊಗೆರ್ ಕಂರ್ಬೆಟ್ಟು ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ಸುರುತ್ತ ಪ್ರತಿಷ್ಠಾ ವರ್ಧಂತಿ ಉಚ್ಚಯ ಬೊಕ್ಕ ಸಾರ್ವಜನಿಕ ಶ್ರೀ ದುರ್ಗಾಹೋಮ ಫೆ.24 ಸನಿಯಾರ ನಡಪರೆ ಉಂಡು.
ಈ ಲೇಸ್ ವಿಠಲದಾಸ ತಂತ್ರಿಲು ದೇರೆಬೈಲ್ ಮೆರೆನ ಪೌರೋಹಿತ್ಯಡ್ ನಡಪುಂಡು.
ಆನಿ ಬೊಲ್ಪುಗು ಗಣಹೋಮ, ದೇವೆರೆನ ಪ್ರಾರ್ತನೆ, ನವ ಕಲಶಾಭಿಷೇಕ ಪೂಜೆ, ಸಾರ್ವಜನಿಕ ಶ್ರೀ ದುರ್ಗಾಹೋಮ, ಮಧ್ಯಾಹ್ನ ಮಹಾಪೂಜೆ, ಸಾರ್ವಜನಿಕ ಅನ್ನ ಪ್ರಸಾದ ಸೇವೆ, ಭಜನೆ, ಧಾರ್ಮಿಕ ಸಭಾ ಲೇಸ್, ರಾತ್ರೆ ದೇವೆರೆಗ್ ಮಹಾಪೂಜೆ, ಸಾರ್ವಜನಿಕ ಅನ್ನ ಪ್ರಸಾದ ಸೇವೆ ಬೊಕ್ಕ ಶ್ರೀ ದೇವಿ ಮಹಾತ್ಮೆ ತುಳು ಹರಿಕಥೆ ನಡಪರೆ ಉಂಡು.
ಫೆ.25 ಐತಾರ ರಾತ್ರೆ ಕಲ್ಲುರ್ಟಿ ದೈವ, ಸ್ವಾಮಿ ಕೊರಗಜ್ಜ ದೈವೊಲೆನ ಸಾರ್ವಜನಿಕ ಪರಕೆದ ಅಗೆಲ್ ಸೇವೆ ನಡಪರೆ ಉಂಡು.
ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್, ಪ್ರಸಾದ ದೆತೊಂದು ಶ್ರೀ ದುರ್ಗಾಪರಮೇಶ್ವರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಧರ್ಮದರ್ಶಿಲು ಮನೋಜ್ ಪೂಜಾರಿ, ಗುರ್ಕಾರೆ ನಾಗರಾಜ್ ಬಿ.ವಿ ಕುಡ್ತಡ್ಕ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
