ಬೆಂಗ್ಲೂರ್: ಏಪ್ರಿಲ್ 15 ರ್ದ್ ರಾಜ್ಯದ ಕೆಲವು ಜಿಲ್ಲೆಡ್ ತೆಡಿಲ್ ಮೆಂಚ್ ದ ಬರ್ಸ ಬರ್ಪಿನ ಅಂದಾಜಿ ಉಂಡು ಪಂದ್ ಹವಾಮಾನ ಇಲಾಖೆ ಸೂಚನೆ ಕೊರ್ತುಂಡು.
ಒಡಿಪು, ಉತ್ತರ ಕನ್ನಡ, ದಕ್ಷಿಣ ಕನ್ನಡ ಜಿಲ್ಲೆ, ಚಿಕ್ಕಮಗಳೂರು, ಶಿವಮೊಗ್ಗ, ಚಿತ್ರದುರ್ಗ, ಬಳ್ಳಾರಿ, ಕೊಡಗು, ಹಾಸನ, ಧಾರವಾಡ, ಗದಗ, ಹಾವೇರಿ, ಕಲಬುರ್ಗಿ, ಬೀದರ್ ಜಿಲ್ಲೆಡ್ ಬರ್ಸ ಬರ್ಪುಂಡು ಪಂದ್ ಹವಾಮಾನ ಇಲಾಖೆ ತೆರಿಪಾದ್ಂಡ್.
ಅಮೆರಿಕದ ಕೆಂಚುಕಿ ನಗರದ ಯೂಯಿಸ್ವಿಲ್ಲೆಡ್ ನಡತಿನ ಗುಂಡುದ ದಾಳಿಗ್ ನಾಲ್ ಜನ ತೀರ್ ಪೋಯೆರ್.
ನೆಟ್ಟ್ ಆಜಿ ಜನಕ್ಕ್ ಮಸ್ತ್ ಪೆಟ್ಟಾತ್ಂಡ್. ಮೊಕ್ಲೆನ್ ಆಸ್ಪತ್ರೆಗ್ ದಾಖಲ್ ಮಲ್ದ್ಂಡ್ ಪಂದ್ ಪೊಲೀಸೆರ್ ತೆರಿಪಾದೆರ್. ನೆಟ್ಟ್ ಒರಿ ಪೊಲೀಸ್ ಅಧಿಕಾರಿಲ ಉಲ್ಲೆರ್ ಪಂದ್ ತೆರಿದ್ ಬೈದ್ಂಡ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಮತದಾನ ಜಾಗೃತಿ ಲೇಸ್ ಎ.11 ಕ್ಕ್ ಅಂಗಾರೆ ಬಯ್ಯಗ್ 6 ಗಂಟೆಗ್ ಪ್ರಸಾರ ಆಂಡ್.
ಈ ಲೇಸ್ ಡ್ ಸ್ವೀಪ್ ದ ರಾಷ್ಟ್ರಮಟ್ಟದ ತರಬೇತುದಾರೆರ್, ಕುಂದಾಪುರದ ತೋಟಗಾರಿಕಾ ಇಲಾಖೆದ ಪೆರಿಯ ಸಹಾಯಕ ನಿರ್ದೇಶಕೆರ್ ಶಾಂತಾ ಎಂ ಪಾಲ್ ಪಡೆಯೆರ್. ನನ ಎ.12 ಕ್ಕ್ ಮಧ್ಯಾಹ್ನ 2 ಗಂಟೆಗ್ ಕುಡೂರ ಪ್ರಸಾರ ಆಪುಂಡು.
ಕರ್ನಾಟಕ ಮೂಲದ ಗಣಿತ ಶಾಸ್ತ್ರಜ್ಞೆರ್ ಕಲ್ಯಂಪುಡಿ ರಾಧಾಕೃಷ್ಣ ರಾವ್ ಮೆರೆಗ್ 2023 ನೇ ಸಾಲ್ ದ ಸಂಖ್ಯಾಶಾಸ್ತ್ರ ಅಂತಾರಾಷ್ಟ್ರೀಯ ಪ್ರಶಸ್ತಿ ತಿಕ್ ದ್ಂಡ್.
ಉಂದು ಈ ಕ್ಷೇತ್ರಡ್ ನೊಬೆಲ್ ಪ್ರಶಸ್ತಿಗ್ ಸಮಾನ ಆತ್ಂಡ್. 75 ವರ್ಷೊದ ಪಿರವು ಸಂಖ್ಯಾಶಾಸ್ತ್ರೀಯ ಚಿಂತನೆಡ್ ಕ್ರಾಂತಿ ಮಲ್ತಿನ ನೆಂಪುದ ಕಜ್ಜೊಗ್ 102 ವರ್ಷದ CR ರಾವ್ ಗ್ ಈ ಪ್ರಶಸ್ತಿ ತಿಕುಂಡು. ಕೆನಡಾದ ಒಟ್ಟಾವಡ್ ಜುಲೈಡ್ ಪ್ರಶಸ್ತಿ ಪ್ರಧಾನ ಮಲ್ಪೆರೆ ಉಂಡು. ಈ ಪ್ರಶಸ್ತಿಡ್ 80 ಸಾರ ಡಾಲರ್ ನಗದ್ ಉಂಡು.
ಬೊಂಬೈ: ಪಶ್ಚಿಮ ವಲಯಡ್ ಇಪ್ಪುನ ತೀಯಾ ಬಾಂಧವೆರ್, ತೀಯಾ ಬಳಗ ಬೊಂಬೈದ ಮುತಾಲಿಕೆಡ್ ಎ.9 ಕ್ಕ್ ಶ್ರೀ ಅದಮಾರ್ ಮಠ, ಅಂಧೇರಿ ಪಶ್ಚಿಮಡ್ ಶ್ರೀ ಸತ್ಯನಾರಾಯಣ ಮಹಾಪೂಜೆ ನಡತ್ಂಡ್.
ಈ ಪೂಜೆದ ವಿಧಿ ವಿಧಾನನ್ ರಾಜೇಶ್ ಭಟ್ ಮಲ್ತೆರ್. ಬೊಂಬೈದ ಸುಮಾರ್ ಕಡೆರ್ದ್ ಸಮಾಜ ಬಾಂಧವೆರ್ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್, ಪ್ರಸಾದ ದೆತೊಂಡೆರ್. ಈ ಪೂಜೆದ ವಿಧಿ ವಿಧಾನಡ್ ಜೋಗೇಶ್ವರಿದ ಶರತ್ ಕೋಟ್ಯಾನ್ ಬೊಕ್ಕ ಸರಿತಾ ದಂಪತಿಲು ಪಾಲ್ ಪಡೆದಿತ್ತೆರ್.
ಈ ಪೊರ್ತುಡು ಬಿಲ್ಲವರ ಅಸೋಷಿಯೇಶನ್ ಜೋಗೇಶ್ವರಿ ಸಮಿತಿದ ಕಾರ್ಯಾಧ್ಯಕ್ಷೆರ್ ನಾರಾಯಣ ಪೂಜಾರಿ, ತೀಯಾ ಸಮಾಜದ ಗಣ್ಯ ವ್ಯಕ್ತಿಲು ಚಂದ್ರಶೇಖರ ಬೆಳ್ಚಡ, ತಿಮ್ಮಪ್ಪ ಬಂಗೇರ, ಸುಧಾಕರ್ ಉಚ್ಚಿಲ್, ಈಶ್ವರ ಎಂ. ಐಲ್, ರಮೇಶ್ ಉಳ್ಳಾಲ್, ಐಲ್ ಬಾಬು, ಪದ್ಮನಾಭ ಸುವರ್ಣ, ಬಾಬು ಕೋಟ್ಯಾನ್, ರಾಮಚಂದ್ರ ಕೋಟ್ಯಾನ್, ನ್ಯಾ. ಸದಾಶಿವ ಬಿ.ಕೆ. ಸುಂದರ ಪಾಲನ್, ಸುರೇಶ್ ಬಂಗೆರ, ಪ್ರಕಾಶ್ ಸುವರ್ಣ, ವಿಶ್ವಥ್ ಬದ್ದೂರ್, ಗಣೇಶ್ ಉಚ್ಚಿಲ್, ಕುಂನ್ಹಪ್ಪ ಬಾದೇಮಾರ್ (ಬಾಬಾ), ರಶ್ಮಿ ಗೋಪಾಲ್ ಸಾಲ್ಯಾನ್, ಲಲತಾ ಕೆಬಿ., ನಿತ್ಯೋದಯ ಉಳ್ಳಾಲ್, ಚಂದ್ರಹಾಸ್ ಕೋಟ್ಯಾನ್, ಚಂದ್ರಶೇಖರ ಸಾಲ್ಯಾನ್, ಪುರಂದರ ಸಾಲ್ಯಾನ್, ಗೋಪಿನಾಥ ಕಾಸ್ರೋಡು, ಸೀತಾ ಸಾಲ್ಯಾನ್, ಚಂದ್ರಾ ವಸಂತ್, ಚಂದ್ರಾ ಸುವರ್ಣ, ದಿವ್ಯ ಆರ್ ಕೋಟ್ಯಾನ್, ವಾಸುದೇವ ಪಾಲನ್, ಅಶೋಕ ಸುವರ್ಣ, ಮೋಹನ್ ಸುವರ್ಣ ಇತ್ತೆರ್.
ಈ ಲೇಸ್ ಡ್ ನವ ದಂಪತಿಲೆಗ್ ಮಾನಾದಿಗೆ ಮಲ್ತೆರ್. ಪದ್ಮನಾಭ ಸುವರ್ಣ ಲೇಸ್ ಸುಧಾರಿಕೆ ಮಲ್ತೆರ್.
ಕರ್ನಾಟಕ ಬಿಜೆಪಿದ ಪೆರಿಯ ನಾಯಕೆ, 40% ಕಮಿಷನ್ ಆರೋಪಡ್ ಸಚಿವ ತಾನ ಕಳೆವೊನ್ನ ಕೆ.ಎಸ್. ಈಶ್ವರಪ್ಪ ಮೇರ್ ರಾಜಕೀಯಗ್ ನಿವೃತ್ತಿ ಘೋಷಣೆ ಮಲ್ದೆರ್.
ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷೆರ್ ಜೆ.ಪಿ.ನಡ್ಡಾ ಮೆರೆಗ್ ಪತ್ರ ಬರೆಯಿನ ಮೇರ್, ಸ್ವ-ಇಚ್ಛೆರ್ದೆ ಚುನಾವಣಾ ರಾಜಕೀಯರ್ದ್ ನಿವೃತ್ತಿ ಅಪೆ ಪಂದ್ ತೆರಿಪಾಯೆರ್.
ಪೆರಿಯ ಸ್ವಾತಂತ್ರ್ಯ ಹೋರಾಟಗಾರೆ ತಿಳವಳ್ಳಿ ಶೆಟ್ರು ಸಿದ್ದರಾಮಪ್ಪ ಇನಿ ದೇವೆರೆ ಪಾದೊ ಸೇರಿಯೆರ್.
ದಾವಣಗೆರೆತ್ತ ಎಸ್ ಎಸ್ ಬಡಾವಣೆಡ್ ವಾಸ ಇತ್ತಿನ ಮೆರೆಗ್ 7 ಜನ ಪೊಣ್ಣು ಜೋಕುಲು, 2 ಜನ ಆಣ್ ಜೋಕುಲು ಉಲ್ಲೆರ್. ಮೆರೆನ ಅಕೇರಿದ ಕ್ರಿಯೆ ಹಿಂದೂ ಸಾರ್ವಜನಿಕ ರುದ್ರಭೂಮಿಡ್ ನಡಪರೆ ಉಂಡು.
ಜಪಾನ್: 37ನೇ ಅಂತರಾಷ್ಟ್ರೀಯ ಸಾಂಸ್ಕೃತಿಕ ಸೌರಭ ಲೇಸ್ ಎ.7 ತಾರೀಕ್‌ಗ್ ಜಪಾನ್‌ದ ಟೋಕಿಯೋ ಕೈತಲ್‌ದ ನರಿಟಾ ಪೇಂಟೆದ ಕ್ರೇನ್ ಬಾಂಕ್ವೆಟ್ ಚಾವಡಿಡ್ ಭಾರೀ ಗೌಜಿಡ್ ನಡತ್ಂಡ್. ಈ ಲೇಸ್‌ಡ್ ಮಿಸೆಸ್ ಇಂಡಿಯಾ ಕರ್ನಾಟಕ ರನ್ನರ್ 2022 ಕಿರೀಟ ಗೆಂದಿನ ಸಮಾಜಸೇವಕಿ, ಸಿನಿಮಾ ನಿರ್ಮಾಪಕಿ ಪ್ರಭಾ ಸುವರ್ಣ ಮೇರ್ “ಚೇರಿ ಬ್ಲೋಸಮ್ ಅವಾರ್ಡ್ 2023” ನ್ ಪಡೆತ್ತೆರ್.
ವಿಜಾಪುರದ ಡಾ. ನಾಗೂರ್ ಎಜುಕೇಶನ್ ಟ್ರಸ್ಟ್‌ದ ಮ್ಯಾನೇಂಗ್ ಟ್ರಸ್ಟೀ ಅಂಚನೆ ಇಂಢಿಯಾ ಮಾಸ್ಟರ್ ಅಥ್ಲೆಟಿಕ್ಸ್ ಫೆಡೆರೇಷನ್‌ದ ಅಧ್ಯಕ್ಷೆರ್ ಆಯಿನ ಡಾ. ಕೆ. ಬಿ. ನಾಗೂರ್ ಜ್ಯೋತಿ ತುಡರ್ ಅರ್ಲಾದ್ ಲೇಸ್‌ನ್ ಉದಿಪನ ಮಲ್ತೆರ್.
ಅಯಿರ್ದ್ ಬೊಕ್ಕ ಪಾತೆರಿನ ಆರ್, ಸಾಂಸ್ಕೃತಿಕ ಪರಪೋಕು ಇಪ್ಪುನ ಸಮುದಾಯ ಎಡ್ಡೆ ರೀತಿದ ಸಂಸ್ಕೃತಿನ್ ರೂಪಿಸಾವುನೆಟ್ಟ್ ಯಶಸ್ವಿ ಆತ್ಂಡ್ ಪಂದ್ ಪಂಡೆರ್. ಶಿವಗಂಗಾ ಕ್ಷೇತ್ರ ಮೇಲಣ ಗವಿಮಠದ ಡಾ. ಮಲಯ ಶಾಂತಮುನಿ ಶಿವಾಚಾರ್ಯ ಸ್ವಾಮೀಜಿ ಪಾತೆರ್ದ್, ನಮ್ಮ ಕಲೆ ಬೊಕ್ಕ ಸಂಸ್ಕೃತಿಲು ಸಮಾಜಗ್ ಬೊಲ್ದು ಕೊರ್ಪಿನ ತುಡರ್ ಇತ್ತ್‌ಲೆಕ್ಕ. ಅವೆನ್ ಕಡಲ್‌ರ್ದ್ ಅಂಚಿಗ್‌ಲ ಪಸರಿಸಾವುನವು ಸಾಹಸದ ನೇಲೆ. ಅಂಚಿನ ಬೇಲೆ ಮಲ್ಪುನಕ್ಲೆಗ್ ದೇವೆರ್ ನಾನಾತ್ ಶಕ್ತಿನ್ ಕೊರಡ್ ಪಂದ್ ಆಶೀರ್ವಚನ ಕೊರಿಯೆರ್.
ಐ.ಸಿ.ಎಫ್.ಸಿ(ಐ) ಅಧ್ಯಕ್ಷೆರ್ ಕೆ.ಪಿ. ಮಂಜುನಾಥ್ ಸಾಗರ್ ಮೇರ್ ಪಾತೆರ್ದ್, ಭಾರತೀಯ ಅಂತರಾಷ್ಟ್ರೀಯ ಸಾಂಸ್ಕೃತಿಕ ಸೌರಭ ಪರಿಷತ್, ಹೃದವಾಹಿನಿ-ಕರ್ನಾಟಕ ಬೊಕ್ಕ ಮಂಜುನಾಥ್ ಎಜುಕೇಶನ್ ಟ್ರಸ್ಟ್ ಸುಮಾರ್ 20 ವರ್ಷರ್ದ್ ರಾಜ್ಯ, ರಾಷ್ಟ್ರ ಬೊಕ್ಕ ಅಂತರಾಷ್ಟ್ರೀಯ ಮಟ್ಟಡ್ ಮಸ್ತ್ ಸಾಂಸ್ಕೃತಿಕ ಲೇಸ್‌ನ್ ಅಟ್ಟನೆ ಮಲ್ತೊಂದು ಬೈದ್ಂಡ್. ನಮ ಪಿದಯ್ ದೇಶಡ್ ವಿಶ್ವ ಕನ್ನಡ ಸಮ್ಮೇಳನ ಬೊಕ್ಕ ಅಂತರಾಷ್ಟ್ರೀಯ ಸಾಂಸ್ಕೃತಿಕ ಸೌರಭ ಲೇಸ್‌ನ್ ನಿರಂತರವಾದ್ ಮಲ್ತೊಂದು ಬರೊಂದುಲ್ಲ. 2004 ಲೆರ್ದ್ 40 ದೇಶಲೆಡ್ 53 ಜೆಡ್ದ್ ಎಚ್ಚ ಸೌರಭ ಬೊಕ್ಕ ಸಮ್ಮೇಳನಲೆನ್ ಎಡ್ಡೆ ರೀತಿಡ್ ಅಟ್ಟನೆ ಮಲ್ತಿನ ಪುಗರ್ತೆ ನಮ್ಮ ಸಂಸ್ಥೆಗ್ ಉಂಡು ಪಂದ್ ಪಂಡೆರ್.
ಲೇಸ್‌ದ ಗುರ್ಕಾರ್ಮೆನ್ ವಹಿಸೊನಿನ ಮೈಸೂರು ನಿವೃತ್ತ ಜಿಲ್ಲಾಧಿಕಾರಿ ಡಾ.ಡಿ. ಎಸ್ ವಿಶ್ವನಾಥ್ ಮೇರ್ ಎಡ್ಡೆಪ್ಪುದ ಪಾತೆರನ್ ಪಾತೆರಿಯೆರ್. ಸಾರ್ವಜನಿಕ ಗ್ರಂಥಾಲಯ ಇಲಾಖೆದ ನಿರ್ದೇಶಕೆರ್ ಆಯಿನ ಡಾ| ಸತೀಶ್ ಕುಮಾರ್ ಹೊಸಮನಿ ಮೇರ್ ಪಾತೆರ್ದ್, ಕರ್ನಾಟಕ ಡಿಜಿಟಲ್ ಗ್ರಂಥಾಲಯಡ್ ವಿಶ್ವ ಮಟ್ಟಡೇ ಎಚ್ಚದ ಸದಸ್ಯೆರ್ ಇತ್ತ್‌ದ್ ಪೊಸ ದಾಖಲೆ ಮಲ್ತ್‌ದ್ಂಡ್. ಜಪಾನ್‌ದ ಜನಕುಲುಲ ಅಕ್ಲೆನ ಪುದರ್‌ನ್ ನೋಂದಣಿ ಮಲ್ತ್‌ದ್ ಧರ್ಮಾರ್ಥವಾದ್ ಸೇವೆನ್ ಪಡೆಯೊನ್ಲೆ ಪಂದ್ ಬಿನ್ನಾಪು ಮಲ್ತೆರ್.
ಟೋಕಿಯೋ ಅನಿವಾಸಿ ಉದ್ಯಮಿ ರವಿ ರಾಮಕೃಷ್ಣ ಪಾತೆರ್ದ್, ಜಪಾನಿಯೆರ್ ಶಿಸ್ತು ಬೊಕ್ಕ ಬಂಗ ಬರ್ಪಿನಕುಲು. ಇಂಚಾದ್ ಈ ದೇಶ ಜಗತ್ತ್‌ಡೇ ಪುಗರ್ತೆ ಪಡೆತ್ಂಡ್ ಪಂದ್ ಪಂಡೆರ್. ಲೇಸ್‌ಡ್ ಮಲ್ಲ ಬಿನ್ನೆರಾದ್ ಜಪಾನ್ ನ್ಯಾಶನಲ್ ಇನ್ಸಿಟ್ಯೂಟ್‌ದ ಸಂಶೋಧನಾ ವಿಜ್ಞಾನಿ ಮನು ಮಳ್ಳಹಳ್ಳಿ, ಮೈಸೂರ್‌ದ ನಿವೃತ್ತ ಪ್ರೊ. ಆರ್. ಎನ್. ಜಗದೀಶ್, ಸ್ವಾಮಿ ಎಂಟರ್ಪ್ರೈಸಸ್ ಎಂ.ಡಿ. ಗೋ.ನಾ. ಸ್ವಾಮಿ, ಬೆಂಗ್ಲೂರ್‌ದ ಮೈಕ್ರಾನ್ ಎಲೆಕ್ಟ್ರೀಕಲ್ಸ್ ಡೈರೆಕ್ಟರ್(ಪ್ರೊಜೆಕ್ಟ್)ಡಾ. ವಿ. ನಾಗರಾಜು ಇತ್ತೆರ್.
ಬೇತೆ ಬೇತೆ ಕ್ಷೇತ್ರದ ಸಾಧಕೆರ್ ಆಯಿನ ಶಂಕ್ರೆ ಗೌಡ ಮೈಸೂರು, ಡಾ| ವಿ. ನಾಗರಾಜು ಬೆಂಗ್ಲೂರ್, ಡಾ| ಸತೀಶ್ ಕುಮಾರ್ ಹೊಸಮನಿ, ಪ್ರಭಾ ಸುವರ್ಣ ಬೊಂಬಾಯಿ ಬೊಕ್ಕ ಕೃಷ್ಣ ಬಿ. ಶೆಟ್ಟಿ ಬೊಂಬಾಯಿ ಮೊಕುಲೆಗ್ “ಚೇರಿ ಬ್ಲೋಸಮ್ ಅವಾರ್ಡ್ 2023” ನ್ ಕೊರಿಯೆರ್.
ಹುಬ್ಬಳ್ಳಿದ ನೃತ್ಯಾಂಜಲಿ ನೃತ್ಯ ಕಲಾ ಕೇಂದ್ರದ ಕಲಾವಿದೆರ್ ಆಯಿನ ವಿದುಷಿ ಸಿರಿ ಕಿಣಿ, ವಿದುಷಿ ಡಾ| ಮೇಘನಾ ಬೊಕ್ಕ ದಿಶಾ ನಾಯಕ್ ನೃತ್ಯ ಪ್ರದರ್ಶನ ಮಲ್ತೆರ್. ಡಾ| ಆಶೋಕ್ ನರೋಡೆ ಅಧ್ಯಕ್ಷತೆಡ್ ಕವಿಗೋಷ್ಠಿ ನಡತ್ಂಡ್. ಕವಿ ಆಯಿನ ಎಂ.ಪಿ. ವರ್ಷ ಮೈಸೂರು, ಗೋವಿಂದ ರಾವ್ ಮೂರ್ತಿ ಬೊಕ್ಕ ಪ್ರಭಾ ಸುವರ್ಣ ಅಕುಲೇ ರಚನೆ ಮಲ್ತಿನ ಕಬಿತೆನ್ ಪಂಡೆರ್.
ಪ್ರಭಾ ಸುವರ್ಣ ಮೆರೆನ “ಹೂವು ಚೆಲುವೆಲ್ಲ ನಂದೆಂದಿತು” ಪದ್ಯಗ್ ನಲ್ತ್‌ದ್ ಮಾತೆರ್‍ನಾಲ ಮೆಚ್ಚುಗೆಗ್ ಪಾತ್ರರಾಯೆರ್. ಗೋ.ನಾ. ಸ್ವಾಮಿ, ಶಿವು ಪಾಂಡೇಶ್ವರ ಬೊಕ್ಕ ಮನು ಕುಡ್ಲ ಜಾನಪದ ಪದನ್ ಪಂಡೆರ್.
ದುಬೈ: ಯುಎಇದ ಮತ ರಾಜ್ಯಡ್ ಇಪ್ಪುನ ನಮ್ಮ ಬಿಲ್ಲವ ಸಮಾಜದ ಬಾಂಧವೆರ್ ಎಪ್ರಿಲ್ 22 ಕ್ಕ್ ದುಬೈಡ್ ನಡಪರೆ ಇಪ್ಪುನ “ದುಬೈ ಬಿಲ್ಲವ ಉಚ್ಚಯ” ಡ್ ಪಾಲ್ ಪಡೆದ್, ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಬಿಲ್ಲಾವಸ್ ಫ್ಯಾಮಿಲಿ ದುಬೈದ ಅಧ್ಯಕ್ಷೆರ್ ಪ್ರಭಾಕರ ಸುವರ್ಣ ಮೇರ್ ಪತ್ರಿಕಾಗೋಷ್ಠಿಡ್ ಬಿನ್ನಾಪು ಮಲ್ತೆರ್.
ಅಂಚೆನೆ ಈ ಲೇಸ್ ಗ್ ಬಿಲ್ಲವಾಸ್ ಫ್ಯಾಮಿಲಿ ದುಬೈದ 25 ನೇ ವರ್ಷೊದ ಬೊಳ್ಳಿ ಪರ್ಬಗ್ ರೇಣುಕಾ ಮಠತ್ತ ಸೋಲೂರು ಶ್ರೀ ವಿಖ್ಯಾತನಂದ ಸ್ವಾಮೀಜಿ ಮೇರ್ ಬತ್ತ್ ದ್, ನಮನ್ ಉದ್ದೇಶಿಸಾದ್ ಆರ್ಶಿವಚನ ಕೊರಿಯೆರ್ ಉಲ್ಲೆರ್. ಬೊಕ್ಕ ಎಪ್ರಿಲ್ 22 ಕ್ಕ್ ಬೊಲ್ಪುರ್ದ್ ಬಯ್ಯ ಮುಟ್ಟ ಬೇತೆ ಬೇತೆ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು ಪಂದ್ ಪಂಡೆರ್.
ಎಪ್ರಿಲ್ 22 ಕ್ಕ್ ಶೇಖ್ ಝಯೆದ್ ಮಾರ್ಗದ ಕ್ರೌನ್ ಪ್ಲಾಜಾ (Crown Plaza Sheikh Zayed Road Dubai) ಡ್ ನಡಪುನ, ಬಿಲ್ಲವಾಸ್ ಫ್ಯಾಮಿಲಿ ದುಬೈದ 25 ನೇ ವರ್ಷೊದ “ದುಬೈ ಬಿಲ್ಲವ ಉಚ್ಚಯ”ದ ಅಂಗವಾದ್, ಎಪ್ರಿಲ್ 7 ಕ್ಕ್ ಊದ್ ಮೇತದ ಬಿರಿಯಾನಿ 2020 ರೆಸ್ಟೋರೆಂಟ್ ಡ್ ನಡತಿನ ಪತ್ರಿಕಾಗೋಷ್ಠಿಡ್, ಬಿಲ್ಲವಾಸ್ ಫ್ಯಾಮಿಲಿ ದುಬೈದ ಕಾರ್ಯದರ್ಶಿ ದೀಪಕ್ ಎಸ್.ಪಿ. ಪಾತೆರ್ದ್, ಬೊಲ್ಪುರ್ದ್ ಬಯ್ಯ ಮುಟ್ಟ ನಡಪರೆ ಇಪ್ಪುನ ಬಿಲ್ಲವಾಸ್ ಫ್ಯಾಮಿಲಿ ದುಬೈದ ಸ್ನೇಹ ಸಮ್ಮಿಲನಡ್ ಸಾಂಸ್ಕೃತಿಕ ಲೇಸ್ ದ ಅಂಗವಾದ್ ವಿದ್ವಾನ್ ಸುರೇಶ್ ಅತ್ತಾವರ್ ಮೆರೆನ ನಿರ್ದೇಶನಡ್ “ಬಿರುವ ಬೊಲ್ಲಿಲು” ಪನ್ಪುನ ತುಳು ನೃತ್ಯ ರೂಪಕ, ಬಿರುವೆರ್ ಕುಡ್ಲ ದುಬೈ ಕೂಟದಕ್ಲೆರ್ದ್ “ಬಿರ್ದ್ ದ ಪಿಲಿಕುಲು” (ಪಿಲಿನಲಿಕೆ) ಬೊಕ್ಕ ತೆಲಿಕೆದ ತೆನಾಲಿ ಸುನೀಲ್ ನೆಲ್ಲಿಗುಡ್ಡೆ ಮೆರೆನ ಮುತಾಲಿಕೆಡ್, ಊರುದ ಪುಗರ್ತೆದ ಕಲಾವಿದೆರೆನ ಕೂಡುವಿಕೆರ್ದ್ ” ಗಮ್ಜಲ್ ಕಾಮಿಡಿ” ಪನ್ಪುನ ಹಾಸ್ಯ ಲೇಸ್ ನಡಪರೆ ಉಂಡು. ಈ ಲೇಸ್ ಡ್ ಕುಡ್ಲ ಕುಸಲ್ ರವಿರಾಮ ರಾಮಕುಂಜ, ಕಾಮಿಡಿ ಕಿಲಾಡಿಲು ಖ್ಯಾತಿದ ಪಿಂಕಿ ರಾಣಿ, ಕುಸಾಲ್ದ ಗುರಿಕಾರೆ ಸುಜಿತ್ ಕೋಟ್ಯಾನ್, ಹರೀಶ್ ಬಂಗೇರ, ಸಂಗೀತ ನಿರ್ದೇಶಕೆರ್ ಶುಭಕರ ಬೆಳಪು ಊರುರ್ದ್ ಬತ್ತ್ ದ್ ನಮನ್ ಮತ ಮನರಂಜಿಸಾಯೆರೆ ಉಲ್ಲೆರ್ ಪಂದ್ ಪಂಡೆರ್.
ಈ ಪೊರ್ತುಡು ಪತ್ರಿಕಾಗೋಷ್ಠಿಡ್ ಬಿಲ್ಲವಾಸ್ ಫ್ಯಾಮಿಲಿ ದುಬೈದ ನಿಕಟ ಪೂರ್ವ ಅಧ್ಯಕ್ಷೆರ್ ಸತೀಶ್ ಪೂಜಾರಿ, ಉಪಾಧ್ಯಕ್ಷೆರ್ ಆನಂದ ಬೈಲೂರು, ಇತ್ತೆದ ಉಪಾಧ್ಯಕ್ಷೆರ್ ಸತೀಶ್ ಉಳ್ಳಲ್, ಪ್ರಕಾಶ್ ಪೂಜಾರಿ, ಕೋಶಾಧಿಕಾರಿ ಪ್ರಭಾಕರ ಪೂಜಾರಿ, ಸಾಂಸ್ಕೃತಿಕ ಕಾರ್ಯದರ್ಶಿ ರವಿ ಕೋಟ್ಯಾನ್ ಇತ್ತೆರ್.
ವರದಿ: ವಿಜಯಕುಮಾರ್ ಶೆಟ್ಟಿ ಗಾಣದಮೂಲೆ ಮಜಿಬೈಲ್ (ದುಬೈ)
April 22nd: ” Dubai Billava festival” at Dubai
Dubai: Prabhakar Suvarna president of Billawa Family Dubai has announced in a press meet that ” Dubai Billava festival” will be organised at Dubai on April 22 nd.
The day will be filled with cultural programme, dance and drama .
This is the 25 th annual Billawa Family program to be organised at Dubai and a dance drama ” Biruva Bollulli ” will be played. Another play ” Gamjal Comedy” with artists from the home town entertaing the audience .
Former president of Billawa Family Dubai Satish Poojary, Anand Bailoor, Satish Ullal and others were present.
ಉಜಿರೆ: ಶ್ರೀ ಆದಿನಾಗಬ್ರಹ್ಮ ಮೊಗೇರ್ಕಳ ದೈವೊಲ್ಯದ ಸ್ವಾಮಿ ಕೊರಗಜ್ಜನ ಸಾನಿಧ್ಯಡ್ ಎರ್ನೋಡಿ ನೇಮ ಎ.14-20 ಮುಟ್ಟ ನಡಪರೆ ಉಂಡು.
ಈ ಲೇಸ್ ಕೊರಗಪ್ಪ ಪಂಡಿತ್ ಶಂಭೂರ್ ಮೆರೆನ ಪೌರೋಹಿತ್ಯಡ್, ಶ್ರೀ ಗಡಿ ಮೊಗೇರ ದೈವೊಲಾಯಿನ ಶ್ರೀ ಮುದ್ದ-ಕಳಲ, ದೇವಿ ತನ್ನಿಮಾನಿಗ, ಧರ್ಮದೈವ ಅಣ್ಣಪ್ಪ ಸ್ವಾಮಿ, ಸ್ವಾಮಿ ಕೊರಗಜ್ಜ ಬೊಕ್ಕ ಎರ್ನೋಡಿ ಗುಳಿಗ ದೈವೊದ ನೇಮ ನಡಪರೆ ಉಂಡು.
ಬೊಕ್ಕ ಗಣಪತಿ ಮುಚ್ಚಿನ್ನಾಯ ಮಾಗಣೆ ತಂತ್ರಿಲೆನ ಪೌರೋಹಿತ್ಯಡ್ ಸಾರ್ವಜನಿಕ ಶ್ರೀ ಸತ್ಯನಾರಾಯಣ ಪೂಜೆ ಬೊಕ್ಕ ನಾಗದೇವೆರೆನ ಪೂಜೆ ವೈದಿಕ, ಧಾರ್ಮಿಕ ವಿಧಿ ವಿಧಾನದೊಟ್ಟಿಗೆ ನಡಪರೆ ಉಂಡು.
ಎ.14 ಸುಕ್ರಾರ ಬೊಲ್ಪುಗು ಗಣಹೋಮ, ಕೈಲ್ ಕಡ್ಪೆರೆ, ಮಧ್ಯಾಹ್ನ ಪೂಜೆ, ಪ್ರಸಾದ ಕೊರಿಯೆರೆ ಉಂಡು. ರಾತ್ರೆ ಶ್ರೀ ಸರಸ್ವತಿ ಭಜನಾ ಮಂಡಳಿ ಎರ್ನೋಡಿ, ಓಂಕಾರೇಶ್ವರ ಭಜನಾ ಮಂಡಳಿ ಪಜಿರಡ್ಕ ಮೊಕ್ಲೆರ್ದ್ ಭಜನೆ, ಬೊಕ್ಕ ಮಹಾಪೂಜೆ, ಪ್ರಸಾದ ಕೊರಿಯೆರೆ ಉಂಡು.
ಎ.15 ಸನಿಯಾರ ಬೊಲ್ಪುಗು ಬೊಕ್ಕ ಮಧ್ಯಾಹ್ನ ಪೂಜೆ, ರಾತ್ರೆ ಶ್ರೀ ಭಕ್ತ ವತ್ಸಲ ನಲಿಕೆ ಭಜನೆ ಕೂಟ ಸತ್ಯನಪಲಿಕೆ, ಕಲ್ಮಂಜ ಮೊಕ್ಲೆರ್ದ್ ಭಜನೆ ಸೇವೆ, ಬೊಕ್ಕ ಮಹಾಪೂಜೆ, ಪ್ರಸಾದ ಕೊರಿಯೆರೆ ಉಂಡು.
ಎ.16 ಐತಾರ ಬೊಲ್ಪುಗು ಬೊಕ್ಕ ಮಧ್ಯಾಹ್ನ ಪೂಜೆ, ರಾತ್ರೆ ಶ್ರೀ ಉಮಾಮಹೇಶ್ವರ ಭಜನಾ ಮಂಡಳಿ, ಕಿರಿಯಾಡಿ, ಉಜಿರೆ ಮೊಕ್ಲೆರ್ದ್ ಭಜನೆ ಸೇವೆ ಬೊಕ್ಕ ಮಹಾಪೂಜೆ, ಪ್ರಸಾದ ಕೊರಿಯೆರೆ ಉಂಡು.
ಎ.17 ಸೋಮಾರ ಬೊಲ್ಪುಗು ಬೊಕ್ಕ ಮಧ್ಯಾಹ್ನ ಶ್ರೀ ಸಿದ್ಧಿವಿನಾಯಕ ಭಜನಾ ಮಂಡಳಿ ವಿನಾಯಕನಗರ ಉಜಿರೆ ಮೊಕ್ಲೆರ್ದ್ ಭಜನೆ ಸೇವೆ, ರಾತ್ರೆ ಮಹಾಪೂಜೆ ಪ್ರಸಾದ ಕೊರಿಯೆರೆ ಉಂಡು.
ಎ.18 ಅಂಗಾರೆ ಬೊಲ್ಪುಗು ಬೊಕ್ಕ ಮಧ್ಯಾಹ್ನ ಪೂಜೆ, ರಾತ್ರೆ ಶ್ರೀ ಸರಸ್ವತಿ ಭಜನಾ ಮಂಡಳಿ, ವಿವೇಕಾನಂದ ಹಳೆಪೇಟೆ-ಲಾಯಿಲ ಮೊಕ್ಲೆರ್ದ್ ಭಜನೆ ಸೇವೆ, ರಾತ್ರೆ ಮಹಾಪೂಜೆ, ಪ್ರಸಾದ ಕೊರಿಯೆರೆ ಉಂಡು.
ಎ.19 ಬುಧಾರ ಬೊಲ್ಪುಗು ಬೊಕ್ಕ ಮಧ್ಯಾಹ್ನ ಪೂಜೆ, ರಾತ್ರೆ ಭಗವಾನ್ ಶಿರಡಿಸಾಯಿ ಶ್ರೀ ಸತ್ಯಸಾಯಿ ಸೇವಾಕ್ಷೇತ್ರ ಹಳೇಕೋಟೆ ಬೊಲ್ತೇರ್ ಮೊಕ್ಲೆರ್ದ್ ಭಜನೆ ಸೇವೆ ಬೊಕ್ಕ ಮಹಾಪೂಜೆ, ಪ್ರಸಾದ ಕೊರಿಯೆರೆ ಉಂಡು.
ಎ.20 ಗುರುವಾರ ಬೊಲ್ಪುಗು ಗಣಹೋಮ, ನಾಗದೇವೆರೆನ ಪೂಜೆ, ತಂಬಿಲ ಸೇವೆ, ಸಾರ್ವಜನಿಕ ಶ್ರೀ ಸತ್ಯನಾರಾಯಣ ಪೂಜೆ, ಮಧ್ಯಾಹ್ನ ಮಹಾಪೂಜೆ, ಪಲ್ಲಪೂಜೆ, ಪ್ರಸಾದ ಕೊರಿಯೆರೆ ಉಂಡು ಬೊಕ್ಕ ಸಾರ್ವಜನಿಕ ಅನ್ನಸಂತರ್ಪಣೆ ನಡಪರೆ ಉಂಡು. ಬಯ್ಯಗ್ ಶ್ರೀ ಧರ್ಮದೈವ ಅಣ್ಣಪ್ಪ (ಸ್ವಾಮಿ) ಪಂಜುರ್ಲಿ ನೇಮ, ರಾತ್ರೆ ಮಹಾಪೂಜೆ, ಪ್ರಸಾದ ಕೊರಿಯೆರೆ ಉಂಡು. ಬೊಕ್ಕ ದೈವೊಲೆನ ಭಂಡಾರ ದೆಪ್ಪೆರೆ ಉಂಡು. ಅವೆರ್ದ್ ಬೊಕ್ಕ ಸಾರ್ವಜನಿಕ ಅನ್ನಸಂತರ್ಪಣೆ ನಡಪರೆ ಉಂಡು. ಬೊಕ್ಕ ಗಡಿ ಮೊಗೇರ ದೈವೊಲಾಯಿನ ಶ್ರೀ ಮುದ್ದಕಳಲ ನೇಮ, ತನ್ನಿಮಾನಿಗ ನೇಮ, ಸ್ವಾಮಿ ಕೊರಗಜ್ಜ ದೈವೊದ ನೇಮ, ಬೊಕ್ಕ ಎರ್ನೋಡಿ ಗುಳಿಗೆ ದೈವೊದ ನೇಮ ನಡಪರೆ ಉಂಡು.
ಎ.21 ಸುಕ್ರಾರ ಬೊಲ್ಪುಗು ಶುದ್ಧಿಕರಣ, ಸಾರ್ವಜನಿಕ ಪ್ರಾರ್ತನೆ, ಮಹಾಪೂಜೆ, ಪ್ರಸಾದ ಕೊರಿಯೆರೆ ಉಂಡು.
ಎ.22 ಸನಿಯಾರ ಬೊಲ್ಪುಗು ಪೂಜೆ, ಮಧ್ಯಾಹ್ನ ಕುರಿತಂಬಿಲ ಸೇವೆ ಬೊಕ್ಕ ಸಾರ್ವಜನಿಕ ಕೊರಗಜ್ಜನ ಅಗೇಲ್ ಸೇವೆ ನಡಪರೆ ಉಂಡು.
ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಪ್ರಸಾದ ದೆತೊಂದು ಶ್ರೀ ದೈವ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಶ್ರೀ ಮೊಗೇರ ಸಮಾಜ ಸೇವಾ ಸಮಿತಿ, ಮೊಗೇರ ಯುವಕ ಮಂಡಲ, ಮೊಗೇರ ಯುವತಿ ಮಂಡಲ, ಮೊಗೇರ ಯುವ ವೇದಿಕೆ, ಶ್ರೀ ಸರಸ್ವತಿ ಭಜನಾ ಮಂಡಳಿ ಎರ್ನೋಡಿ ಉಜಿರೆದ ಅಧ್ಯಕ್ಷೆರ್, ಸರ್ವಸದಸ್ಯೆರ್ ಬೊಕ್ಕ ಶ್ರೀ ಆದಿನಾಗಬ್ರಹ್ಮ ಮೊಗೇರ್ಕಳ ದೈವೊಲ್ಯ, ಶ್ರೀ ಆದಿನಾಗಬ್ರಹ್ಮ ಮೊಗೇರ್ಕಳ ಸೇವಾ ಟ್ರಸ್ಟ್ (ರಿ.) ಎರ್ನೋಡಿ ಉಜಿರೆದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
