ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಬಿಜೆಪಿದ ಸುರುತ್ತ ಪಟ್ಟಿಡ್ 8 ಪೊಂಜೋವ್ ನಕ್ಲೆಗ್ ಟಿಕೆಟ್

ಬೆಂಗ್ಲೂರ್: ಕರ್ನಾಟಕ ವಿಧಾನಸಭಾ ವೋಟುಗು ಬಿಜೆಪಿ ಅಂಗಾರೆ ರಾತ್ರೆ (ಏ.11) ಸುರುತ್ತ ಅಭ್ಯರ್ಥಿಲೆನ ಪಟ್ಟಿ ಪ್ರಕಟ ಮಲ್ದ್ಂಡ್. ಒಟ್ಟು 189 ಅಭ್ಯರ್ಥಿಲೆನೆಟ್ಟ್ 8 ಪೊಂಜೋವ್ ನಕ್ಲೆಗ್ ಟಿಕೆಟ್‌ ಘೋಷಣೆ ಮಲ್ದ್ಂಡ್.

ಘೋಷಣೆ ಆಯಿನ ಅಭ್ಯರ್ಥಿಲೆನ ಪಟ್ಟಿಡ್ ಮೂಜಿ ಹಾಲಿ ಶಾಸಕಿಯೆರ್ ಬಿಜೆಪಿ ಟಿಕೆಟ್‌ ಪಡೆಪುನೆಟ್ಟ್ ಯಶಸ್ವಿ ಆತೆರ್. ಶಶಿಕಲಾ ಜೊಲ್ಲೆ, ಪೂರ್ಣಿಮಾ ಶ್ರೀನಿವಾಸ್‌ ಬೊಕ್ಕ ರೂಪಾಲಿ ಸಂತೋಷ್‌ ನಾಯ್ಕ್‌ ಹಾಲಿ ಶಾಸಕೆರ್. ಈ ಸರ್ತಿ ವೋಟುಡು 52 ಪೊಸ ಮೋನೆಗ್ ಬಿಜೆಪಿ ಟಿಕೆಟ್‌ ಘೋಷಣೆ ಮಲ್ದ್ಂಡ್.

ಎರೆಗ್ ಒಲ್ಪ ಬಿಜೆಪಿ ಟಿಕೆಟ್?

1. ನಿಪ್ಪಾಣಿ- ಶಶಿಕಲಾ ಜೊಲ್ಲೆ
2.ಹಿರಿಯೂರು- ಪೂರ್ಣಿಮಾ ಶ್ರೀನಿವಾಸ್
3.ಸವದತ್ತಿ- ರತ್ನಾ ವಿಶ್ವನಾಥ್‌ ಮಾಮನಿ
4.ಕಾರವಾರ- ರೂಪಾಲಿ ನಾಯ್ಕ್
5.ಸಂಡೂರು- ಶಿಲ್ಪಾ ರಾಘವೇಂದ್ರ
6.ನಾಗಮಂಗಲ- ಸುಧಾ ಶಿವರಾಮೇಗೌಡ
7.ಪುತ್ತೂರ್- ಆಶಾ ತಿಮ್ಮಪ್ಪ ಗೌಡ
8.ಸುಳ್ಯ- ಭಾಗೀರಥಿ ಮುರುಳ್ಯ

ವಿಶ್ವಕರ್ಮ ಕಮ್ಮಾರ ಗುಡಿ ಕೈಗಾರಿಕಾ ಸಂಘದ ಜಿಲ್ಲಾ ಸಮಿತಿ ರಚನಾ ಸಭೆ, ಉದಿಪನ ಲೇಸ್

ವಿಶ್ವಕರ್ಮ ಕಮ್ಮಾರ ಗುಡಿ ಕೈಗಾರಿಕಾ ಸಂಘದ ಜಿಲ್ಲಾ ಸಮಿತಿ ರಚನಾ ಸಭೆ ಬೊಕ್ಕ ಉದಿಪನ ಲೇಸ್ ಸುಳ್ಯ ಶ್ರೀ ರಾಮ ಭಜನಾ ಮಂದಿರದ ಸಭಾಭವನಡ್ ಕೋಡೆ (ಎ.9) ಕ್ಕ್ ನಡತ್ಂಡ್.

ಈ ಲೇಸ್ ಮೋಹನ ಆಚಾರ್ಯ ಕೆದಿಕ್ಕಾನ ಮೆರೆನ ಪ್ರಾರ್ತನೆದೊಟ್ಟಿಗೆ ಸುರು ಆಂಡ್. ಸಂಘದ ಪೊಸ ಸಮಿತಿನ್ ಹರೀಶ್ ಬೂಡುಪನ್ನೆ, ವಕೀಲೆರ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್.

ಈ ಪೊರ್ತುಡು ಚಾವಡಿಡ್ ಜಿಲ್ಲಾ ಅಧ್ಯಕ್ಷೆರ್ ಸತೀಶ್ ಆಚಾರ್ಯ ಚೊಕ್ಕಾಡಿ, ತಾಲೂಕ್ ಅಧ್ಯಕ್ಷೆರ್ ವಾಸುದೇವ ಆಚಾರ್ಯ ಮರ್ಕಂಜ, ಕಾನೂನು ಸಲಹೆಗಾರೆರ್ ಹರೀಶ್ ಬೂಡುಪನ್ನೆ, ಸಂಘದ ತಾಲೂಕ್ ಕಾರ್ಯದರ್ಶಿ ಜನಾರ್ದನ ಆಚಾರ್ಯ ಪಂಜ, ಕರ್ನಾಟಕ ರಾಜ್ಯ ರೈತಸಂಘ ಹಸಿರು ಸೇನೆ ಸುಳ್ಯ ತಾಲೂಕ್ ಅಧ್ಯಕ್ಷೆರ್ ಸತ್ಯ ಶಾಂತಿ ತ್ಯಾಗ ಮೂರ್ತಿ ಕುಕ್ಕಂದೂರು ಇತ್ತೆರ್.

ಕಾನೂನು ಸಲಹೆ ಕೊರ್ನ ಹರೀಶ್ ಬೂಡುಪನ್ನೆ ಮೇರ್ ಸಂಘದ ಸದಸ್ಯೆರೆನ ಕೆಲವು ಪ್ರಶ್ನೆಲೆಗ್ ಕಾನೂನು ರೀತಿದ ತಿಳುವಳಿಕೆ ಪೊಲಬುನ್ ಕೊರಿಯೆರ್. ಬೊಕ್ಕ ಜಿಲ್ಲಾ ಸಮಿತಿಡ್ ಅಧ್ಯಕ್ಷೆರಾದ್ ಸತೀಶ್ ಆಚಾರ್ಯ ಚೊಕ್ಕಾಡಿ, ಉಪಾಧ್ಯಕ್ಷೆರಾದ್ ರಮೇಶ್ ಆಚಾರ್ಯ ಕಡೆಶಿವಾಲಯ, ಕೇಶವ ಆಚಾರ್ಯ ಕಾವಲು ಕಟ್ಟೆ, ಸಂಚಾಲಕೆರಾದ್ ರಜನೀಶ್ ಆಚಾರ್ಯ ಬಂಟ್ವಾಳ, ಪ್ರಧಾನ ಕಾರ್ಯದರ್ಶಿಯಾದ್ ಚಂದ್ರಶೇಖರ ಆಚಾರ್ಯ ತೊಡಿಕಾನ, ಜತೆ ಕಾರ್ಯದರ್ಶಿಯಾದ್ ಜನಾರ್ದನ ಆಚಾರ್ಯ ಪಂಜ, ಕೋಶಾಧಿಕಾರಿಯಾದ್ ರೋಹಿತ್ ಆಚಾರ್ಯ ಚೀಮುಲ್ಲು, ಸಂಘಟನಾ ಕಾರ್ಯದರ್ಶಿಯಾದ್ ಭವಾನಿಶಂಕರ ಆಚಾರ್ಯ ಅಡ್ಡನಪಾರೆ, ಸದಸ್ಯೆರಾದ್ ರವಿ ಆಚಾರ್ಯ ಸಿದ್ಧಕಟ್ಟೆ, ಸುಂದರ ಆಚಾರ್ಯ ಬೊಲ್ತೇರ್, ಪ್ರಸನ್ನ ಆಚಾರ್ಯ ಪುತ್ತೂರ್, ಜಗನ್ನಾಥ ಆಚಾರ್ಯ ಪುತ್ತೂರ್, ಜಗದೀಶ ಆಚಾರ್ಯ ಕಡಬ, ಹರೀಶ್ ಆಚಾರ್ಯ ಬೆದ್ರ, ಸೀತಾರಾಮ ಆಚಾರ್ಯ ಮುಡಿಪು, ಉದಯ ಆಚಾರ್ಯ ಅರೆಕಲ್ಲು, ಆಯ್ಕೆ ಆಯೆರ್.

ಲೇಸ್ ದ ರೂಪುರೇಷೆನ್ ಕರ್ನಾಟಕ ರಾಜ್ಯ ರೈತಸಂಘ ಹಸಿರು ಸೇನೆ ಸುಳ್ಯ ತಾಲೂಕ್ ಅಧ್ಯಕ್ಷೆರ್ ಸತ್ಯ ಶಾಂತಿ ತ್ಯಾಗ ಮೂರ್ತಿ ಕುಕ್ಕಂದೂರು ಮಲ್ತೆರ್. ಕಮಲಾಕ್ಷ ಆಚಾರ್ಯ ಗೂನಡ್ಕ ಲೇಸ್ ದ ಸುಧಾರಿಕೆ ಮಲ್ತೆರ್. ಪ್ರಧಾನ ಕಾರ್ಯದರ್ಶಿ ಚಂದ್ರಶೇಖರ ಆಚಾರ್ಯ ತೊಡಿಕಾನ ಸೊಲ್ಮೆ ಸಂದಾಯೆರ್. ಈ ಲೇಸ್ ಡ್ ದಕ್ಷಿಣ ಕನ್ನಡ ಜಿಲ್ಲೆ ಬೊಕ್ಕ ಮಡಿಕೇರಿ ತಾಲೂಕ್ ದ ವಿಶ್ವಕರ್ಮ ಸಮಾಜದ ಕಮ್ಮಾರ ಬೇಲೆ ಮಲ್ತೊಂದು ಇಪ್ಪುನ ಸದಸ್ಯೆರ್ ಹಾಜರ್ ಇತ್ತ್ ದ್, ಸಲಹೆ ಸೂಚನೆಲೆನ್ ಕೊರ್ದು, ಪೊಲಬು ಪಡೆಯೆರ್.

ಮ್ಯಾನ್ಮಾರ್ ಸೇನೆದ ಮಿತ್ತ್ ದಾಳಿ: 100 ಜನ ತೀರ್ ಪೋಯೆರ್

ಮ್ಯಾನ್ಮಾರ್ ಸೇನೆದ ಜನತ್ತ ಮಿತ್ತ್ ದಾಳಿ ನಡತ್ಂಡ್.

ಈ ದಾಳಿಡ್ ಸುಮಾರ್ 20 ನಿಮಿಷ ಮುಟ್ಟ ಇನಾಮರ್ದ್ ಗುಂಡು ರಾಪಾದೆರ್. ಸುಮಾರ್ ಜನಕ್ಕ್ ಪೆಟ್ಟಾತ್ಂಡ್. ವಿಶ್ವಸಂಸ್ಥೆ ಈ ದಾಳಿನ್ ಖಂಡಿಸಾದ್ಂಡ್. ಸೈನ್ಯ ಬಂಡುಕೋರೆರೆನ ಭದ್ರಕೋಟೆ ಪಂದ್ ಪರಿಗಣಿಸಾಯಿನ ಪಜಿಗಿ ಪ್ರದೇಶಡ್ ದಾಳಿ ಮಲ್ದ್ಂಡ್ ಪಂದ್ ವರದಿ ಆತ್ಂಡ್.

ಬಿಹಾರಡ್ 4.3ಬಿರ್ಸ್ ದ ಭೂಕಂಪ

ಬಿಹಾರದ ಅರಾರಿಯಾ ಪ್ರದೇಶಡ್ ಇನಿ ಬೊಲ್ಪುಗು 4.3 ಬಿರ್ಸ್ ದ ಭೂಕಂಪ ಆತ್ಂಡ್.

ಭೂಮಿದ ಮೇಲ್ ರ್ದ್ 10 ಕಿ.ಮೀ ಅಡಿಟ್ಟ್ ಭೂಕಂಪ ಆತ್ಂಡ್ ಪಂದ್ ಅಧಿಕಾರಿಲು ತೆರಿಪಾದೆರ್. ಈ ಭೂಕಂಪರ್ದ್ ಒವ್ವೇ ತೊಂದರೆ ಆತಿಜಿ ಪಂದ್ ತೆರಿದ್ ಬೈದ್ಂಡ್.

ಬೊಂಬೈದ ಸ್ವಾಮಿ ನಿತ್ಯಾನಂದ ಮಂದಿರಡ್ 68 ನೇ ವಾರ್ಷಿಕ ಮಹಾಪೂಜೆ

ಶ್ರೀ ಸಸಿಹಿತ್ಲು ಭಗವತೀ ತೀಯಾ ಸಂಘ (ರಿ.) ಬೊಂಬೈದ ಮುತಾಲಿಕೆಡ್ ಸಸಿಹಿತ್ಲು ಶ್ರೀ ಭಗವತೀ ದೇವಲ್ಯಡ್ ಪ್ರತಿ ವರ್ಷ ನಡಪುನ ನಡಾವಳಿ ಉಚ್ಚಯದ ಅಂಗವಾದ್ 68 ನೇ ವಾರ್ಷಿಕ ಮಹಾಪೂಜೆ ಎ.22 ಕ್ಕ್ ಸನಿಯಾರ ಬೊಂಬೈದ ಸ್ವಾಮಿ ನಿತ್ಯಾನಂದ ಮಂದಿರಡ್ ನಡಪರೆ ಉಂಡು.

ಬೊಲ್ಪುಗು ಗಣಹೋಮ, ಬಯ್ಯಗ್ ಕಲಶ ಪ್ರತಿಷ್ಠೆ, ಅಲಂಕಾರ ಪೂಜೆ, ಅರಸಿನ ಕುಂಕುಮ, ಸ್ವಾಮಿ ನಿತ್ಯಾನಂದ ಶ್ರೀ ಕೃಷ್ಣ ಭಜನಾ ಮಂಡಳಿ ಭಾಂಡುಪ್ ಮೊಕ್ಲೆರ್ದ್ ಭಜನೆ ಲೇಸ್ ನಡಪರೆ ಉಂಡು. ರಾತ್ರೆ ಧಾರ್ಮಿಕ ಸಭಾ ಲೇಸ್, ಬಲಿ ಉಚ್ಚಯ, ಮಹಾಮಂಗಳಾರತಿ ಆದ್ ತೀರ್ಥ ಪ್ರಸಾದ ಕೊರಿಯೆರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ತೀರ್ಥ ಪ್ರಸಾದ ದೆತೊಂದು, ಶ್ರೀ ಭಗವತೀ ಅಮ್ಮನ ಕೃಪೆಗ್ ಪಾತ್ರರಾವೊಡು ಪಂದ್ ಬೊಂಬೈ ಶ್ರೀ ಸಸಿಹಿತ್ಲು ಭಗವತೀ ತೀಯಾ ಸಂಘದ ಪದಾಧಿಕಾರಿಲು, ಮಹಿಳಾ ವಿಭಾಗ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಖಾಸಗಿ ಕಂಪೆನಿಲೆಗ್ ಕೃಷಿ ಮಲ್ಪರೆ ಅನುಮತಿ ಕೊರ್ನ‌ ಕೇಂದ್ರ ಸರ್ಕಾರ

ತೋಟಗಾರಿಕೆ ಬುಲೆಕ್ಲೆನ್ ಬುಲೆಪಾಯೆರೆ ಕ್ಲಸ್ಟರ್ ಫಾರ್ಮಿಂಗ್ ವ್ಯವಸ್ಥೆಗ್ ಕೇಂದ್ರ ಸರ್ಕಾರ ಅನುಮತಿ ಕೊರ್ತುಂಡು.

ಇಡೀ ದೇಶಡ್ 5 ಖಾಸಗಿ ಕಂಪೆನಿಲೆಗ್ ಸುಮಾರ್ 50 ಸಾರ ಹೆಕ್ಟೇರ್ ಡ್ ಕೃಷಿ ಮಲ್ಪೆರೆ ಅನುಮತಿ ಕೊರ್ತುಂಡು. ನೆತ್ತೊಟ್ಟಿಗೆ ಕಂಪೆನಿಲು ಸರ್ಕಾರ ಕೊರ್ಪುನ ಸಬ್ಸಿಡಿ ಸೇರ್ದ್ 750 ಕೋಟಿ ರೂ. ನ್ ಕ್ಲಸ್ಟರ್ ಫಾರ್ಮಿಂಗ್ ಡ್ ಹೂಡಿಕೆ ಮಲ್ಪುಂಡು.

ಪಾಕಿಸ್ತಾನಡ್ ಬಾಂಬ್ ಪುಡಾದ್ ನಾಲ್ ಜನ ತೀರ್ ಪೋಯೆರ್

ಪಾಕಿಸ್ತಾನದ ಕ್ವೆಟ್ಟಾಡ್ ಬಾಂಬ್ ಪುಡಾದ್ ನಾಲ್ ಜನ ತೀರ್ ಪೋಯಿನ ಘಟನೆ ನಡತ್ಂಡ್.

ನೆಟ್ಟ್ 15 ಜನಕ್ಕ್ ಮಸ್ತ್ ಪೆಟ್ಟಾತ್ಂಡ್. ಸುಮಾರ್ ಗಾಡಿಲು ಕರೆಂಚ್ ದ್ ಪೊತ್ಂಡ್. ಪೊಲೀಸೆರೆನ್ ಟಾರ್ಗೆಟ್ ಮಲ್ತ್ ದ್ ಈ ಬಾಂಬ್ ಪುಡಾತ್ ದೆರ್ ಪಂದ್ ತೆರಿದ್ ಬೈದ್ಂಡ್. ಬೈಕ್ ಡ್ 4-5 ಕೆಜಿ ಬಾಂಬ್ ದೀದ್ ರಿಮೋಟ್ ಕಂಟ್ರೋಲ್ ಡ್ ಪುಡಾತ್ ದೆರ್ ಪಂದ್ ತನಿಖೆಡ್ ಗೊತ್ತಾತ್ಂಡ್‌. ಅತ್ತಂದೆ ಐತಾರ ಬಯ್ಯಗ್ ನಡತಿನ ದಾಳಿಡ್ ರಡ್ಡ್ ಪೊಲೀಸೆರ್ ತೀರ್ ಪೋತೆರ್ ಪಂದ್ ತೆರಿದ್ ಬೈದ್ಂಡ್.