ಸುಳ್ಯ: ಸುಳ್ಯದ ನಾವೂರು ಮಾರ್ಗದ ಗಾಂಧಿನಗರದ ಕಾರಣಿಕ ಕ್ಷೇತ್ರ ಶ್ರೀ ಕಲ್ಕುಡ ದೈವೊಲ್ಯಡ್ ಪ್ರತಿ ವರ್ಷದಂಚೆನೆ ಫೆ.4 ಕ್ಕ್ ಬೊಲ್ಪುಗು ಶ್ರೀ ಕಲ್ಕುಡ, ಕಲ್ಲುರ್ಟಿ, ಗುಳಿಗ ದೈವೊಲೆನ ನೇಮೋಚ್ಚಯ ನಡಪರೆ ಉಂಡು.
ಈ ನೇಮೋಚ್ಚಯ ಬೊಲ್ಪುಗು ಸುರು ಆದ್ ಮಧ್ಯಾಹ್ನ ಮುಟ್ಟ ಇಪ್ಪುಂಡು.
ಈ ಲೇಸ್ ದ ಅಟ್ಟಣೆಗಾದ್ ಜ.27 ಕ್ಕ್ ಬೊಲ್ಪುಗು ಕೈಲ್ ಕಡ್ಪುನ ಲೇಸ್ ನಡತ್ಂಡ್. ಈ ಪೊರ್ತುಡು ದೈವೊಲ್ಯದ ಆಡಳಿತ ಧರ್ಮದರ್ಶಿಲು ಪಿ.ಕೆ.ಉಮೇಶ್ ಬೊಕ್ಕ ಮಂಡಳಿದ ಸದಸ್ಯೆರ್ ಹರೀಶ್ ಬೂಡುಪನ್ನೆ, ದೈವೊಲ್ಯದ ಪೂಜಾರಿ ತಿಮ್ಮಪ್ಪ ಗೌಡ ನಾವೂರು, ಮೋನಪ್ಪ ಪೂಜಾರಿ ಇತ್ತೆರ್.
ಭಾರತದ ಯೂನಿಫೈಡ್ ಪೇಮೆಂಟ್ಸ್ ಇಂಟರ್ ಫೇಸ್ (UPI) ಸೇವೆ ಇತ್ತೆ ಫ್ರಾನ್ಸ್ ಡ್ ಲ ತಿಕ್ಕುಂಡು.
ಪ್ಯಾರಿಸ್ ಪೇಂಟೆಡ್ UPI ಸೇವೆಗ್ ಚಾಲನೆ ಕೊರ್ತುಂಡು. ಭಾರತೀಯ ಪ್ರವಾಸಿಗೆರ್ UPI ಮುಕೇನ ಐಫೆಲ್ ಟವರ್ ಗ್ ಟಿಕೆಟ್ ದೆತೊನೊಲಿ.
ಭಾರತದ UPI ನ್ ಫ್ರಾನ್ಸ್ ಡ್ ಸುರು ಮಲ್ಪೆರೆ ಉಂಡು ಪಂದ್ ಪ್ರಧಾನಿ ಮೋದಿ ನೆರ್ದ್ ದುಂಬು ಘೋಷಣೆ ಮಲ್ತ್ ದಿತ್ತೆರ್. ಇತ್ತೆದ ಬುಲೆವಣಿಗೆಡ್ ಭಾರತದ UPI ಕಾರ್ಯನಿರ್ವಹಿಸಾವುನ ಸುರುತ್ತ ಯುರೋಪಿಯನ್ ರಾಷ್ಟ್ರ ಫ್ರಾನ್ಸ್ ಆತ್ಂಡ್.
ಬಂಟ್ವಾಳ: ನಾಗನ ವಳಚ್ಚಿಲ್ ಶ್ರೀ ದುರ್ಗಾಪರಮೇಶ್ವರೀ ಸೇವಾ ಸಮಿತಿದ 51ನೇ ವರ್ಷೊದ ಯಕ್ಷಗಾನೋಚ್ಚಯ “ಶ್ರೀ ದೇವಿ ಲಲಿತಾಂಬಿಕೆ” ಫೆ.17 ಸನಿಯಾರ ನಡಪರೆ ಉಂಡು.
ಈ ಯಕ್ಷಗಾನ ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ಪ್ರಸಾದಿತ ದಶಾವತಾರ ಯಕ್ಷಗಾನ ಮೇಳದಕ್ಲೆರ್ದ್ ನಡಪರೆ ಉಂಡು. ಆನಿ ಬಯ್ಯಗ್ ಮೇಳದ ದೇವೆರೆನ ಮಹಾಪೂಜೆ ಆದ್ ರಾತ್ರೆ ಸಾರ್ವಜನಿಕ ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.
ಮಣಿಪಾಲ: ಸಮುದಾಯ ಬಾನುಲಿ ರೇಡಿಯೊ ಮಣಿಪಾಲ್ ಡ್ ಸಂಗೀತ ಶಿಕ್ಷಕೆರ್ ಕಾವ್ಯಶ್ರೀ ಸೀತಾರಾಮ ಆಚಾರ್ಯ ಕೊಡವೂರು ನಡಪಾದ್ ಕೊರ್ಪುನ ‘ಕಾವ್ಯಗಾನ -ಸಂಗೀತ ಪಾಠ’ ಲೇಸ್ ದ 45ನೇ ಸಂಚಿಕೆ ಫೆ.2 ಸುಕ್ರಾರ ಬಯ್ಯಗ್ 5.30 ಕ್ಕ್ ಪ್ರಸಾರ ಆಂಡ್.
ಈ ಲೇಸ್ ಡ್ ಕಲ್ಪಾರ್ಥಿಯಾದ್ ಮಾಸ್ಟರ್ ಪನ್ನಗಶಯನ ಪಾಲ್ ಪಡೆತೆರ್. ಈ ಲೇಸ್ ಫೆ.3 ಸನಿಯಾರ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು.
ಈ ಲೇಸ್ ನ್ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಧರ್ಮಸ್ಥಳ: ದೇವೆರ್ನ ಪೂಜೆ, ಆರಾಧನೆ, ಅಭಿಷೇಕರ್ದ್ ಪಾಪದ ಕ್ಷಯವಾದ್ ಪುಣ್ಯ ಸಂಚಯ ಆಪುಂಡು ಪಂದ್ ಪೂಜ್ಯ ದಿವ್ಯಸಾಗರ ಮುನಿಮಹಾರಾಜೆರ್ ಪಂಡೆರ್.
ಆರ್ ಶುಕ್ರವಾರ ಧರ್ಮಸ್ಥಳದ ರತ್ನಗಿರಿಟ್ಟ್ ಭಗವಾನ್ ಬಾಹುಬಲಿ ಸ್ವಾಮಿ ಮೂರ್ತಿಗ್ ಪಾದಾಭಿಷೇಕದ ಪೊರ್ತುಡು ಮಂಗಲ ಪ್ರವಚನ ಕೊರಿಯೆರ್.
ಶ್ರದ್ಧಾ-ಭಕ್ತಿರ್ದ್ ದೇವೆರ್ನ ಪೂಜೆ,ಅಭಿಷೇಕ ಮಲ್ಪುನೆರ್ದ್ ಮಾತ ಸಂಕಟ ನಿವಾರಣೆಯಾದ್ ಜೀವನ ಪಾವನ ಆಪುಂಡು. ಆತ್ಮಕಲ್ಯಾಣ ಆಪುಂಡು ಸುಖ-ಶಾಂತಿ ತಿಕ್ಕುಂಡು ಪಂದ್ ಪಂಡೆರ್.
ದಿನಾಲ ವೃತ-ನಿಯಮದ ಪಾಲನೆದೊಟ್ಟಿಗೆ ದೇವೆರ್ನ ಪೂಜೆ, ಜೈನ ಮುನಿಕ್ಲೆಗ್ ಆಹಾರದಾನ ಮಲ್ತ್ಂಡ ಆತ್ಮಕಲ್ಯಾಣ ಆಪುಂಡು ಪಂದ್ ಪೂಜ್ಯ ಆದಿಸಾಗರ ಮುನಿಮಹಾರಾಜೆರ್ ಪಂಡೆರ್.
ಕಾರ್ಲದ ಜೈನಮಠದ ಪೂಜ್ಯ ಲಲಿತಕೀರ್ತಿ ಭಟ್ಟಾರಕ ಸ್ವಾಮೀಜಿ ಆಶೀರ್ವಚನ ಕೊರಿಯೆರ್.
ಪೂಜ್ಯ ನಿರ್ದೋಷ ಸಾಗರ ಮುನಿಮಹಾರಾಜೆರ್ ಮತ್ತುಕ್ಷುಲ್ಲಕ ನಿರ್ವಾಣಸಾಗರ ಮಹಾರಾಜೆರ್ ಈ ಪೊರ್ತುಡು ಇತ್ತೆರ್.
ಧರ್ಮಸ್ಥಳದ ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಗಡೆ, ಹೇಮಾವತಿ ವೀ. ಹೆಗ್ಗಡೆ, ಡಿ. ಸುರೇಂದ್ರಕುಮಾರ್, ಡಿ. ಹರ್ಷೇಂದ್ರಕುಮಾರ್ ಬೊಕ್ಕ ಸುಪ್ರಿಯಾ ಹರ್ಷೇಂದ್ರಕುಮಾರ್ ಪಾದಾಭಿಷೇಕಡ್ ಪಾಲ್ ಪಡೆದಿತ್ತೆರ್.
ಭವ್ಯಅಗ್ರೋದಕ ಮೆರವಣಿಗೆದ ಬೊಕ್ಕ ರತ್ನಗಿರಿಟ್ಟ್ 216 ಕಲಶರ್ದ್ ಜಲಾಭಿಷೇಕ ಬೊಕ್ಕ ಬೊಂಡದ ನೀರ್, ಗಂಧ, ಚಂದನ, ಅಷ್ಟಗಂಧ ಮಂಗಳದ್ರವ್ಯರ್ದ್ ಪಾದಾಭಿಷೇಕ ನಡತ್ಂಡ್.
ಕುಡ್ಲ: ಪಶ್ಚಿಮ ವಲಯ ಡಿಐಜಿಪಿ ಅಮಿತ್ ಸಿಂಗ್ ಅರೆಗ್ ಮೈಸೂರ್‌ಗ್ ವರ್ಗಾವಣೆ ಆದಿತ್ತ್‌ದ್, ಈ ಜಾಗೆಗ್ ದಕ್ಷಿಣ ವಲಯದ ಡಿಐಜಿಪಿ ಆದಿತ್ತಿನ ಡಾ.ಎಂ.ಬಿ.ಬೋರಲಿಂಗಯ್ಯ ಮೇರ್ ಪಶ್ಚಿಮ ವಲಯದ ಪೊಸ ಡಿಐಜಿಪಿ ಆದ್ ಬತ್ತ್‌ದೆರ್.
ಮಂಡ್ಯ ಜಿಲ್ಲೆ ಮದ್ದೂರು ತಾಲೂಕ್‌ದ ಮಲ್ಲನಾಯಕನಹಳ್ಳಿದ ಡಾ.ಎಂ.ಬಿ. ಬೋರಲಿಂಗಯ್ಯ 2008 ಬ್ಯಾಚ್‌ದ ಐಪಿಎಸ್ ಅಧಿಕಾರಿ. ಮೈಸೂರು ವೈದ್ಯಕೀಯ ಕಾಲೇಜಿಡ್ ಎಂಬಿಬಿಎಸ್ ಪದವಿ ಪಡೆದಿತ್ತ್‌ದ್, ಐಪಿಎಸ್‌ಗ್ ಆಯ್ಕೆಯಾಯಿ ಬೊಕ್ಕ ಕಲಬುರಗಿದ ಪೊಲೀಸ್ ತರಬೇತಿ ಶಾಲೆಡ್ ಫೌಂಡೇಶನ್ ತರಬೇತಿ ಪಡೆದ್ ತಿಪಟೂರ್‌ಡ್, ಸಹಾಯಕ ಎಸ್ಪಿಯಾದ್ ಸೇವೆ ಸಂದಾದೆರ್.
ಅವೆರ್ದ್ ಬೊಕ್ಕ ದಾವಣಗೆರೆ, ಒಡಿಪುಡ್ ಎಸ್ಪಿಯಾದ್, ಬೆಂಗಳೂರ್‌ಡ್ ಡಿಸಿಪಿಯಾದ್ ರಾಜ್ಯ ಗುಪ್ತಚರ ಬೊಕ್ಕ ರೈಲ್ವೆ ಪೊಲೀಸ್ ಎಸ್ಪಿಯಾದ್ ಸೇವೆ ಸಂದಾದೆರ್. ಡಿಐಜಿಪಿಯಾದ್ ಬಡ್ತಿ ಪಡೆಯಿ ಬೊಕ್ಕ ಬೆಳಗಾವಿ ನಗರ ಪೊಲೀಸ್ ಕಮಿಷನರ್ ಆದ್, ಮೈಸೂರು ದಕ್ಷಿಣ ವಲಯದ ಡಿಐಜಿಪಿಯಾದ್ ಸೇವೆ ಸಂದಾದೆರ್.
ರಾಂಚಿ: ಜಾರ್ಖಂಡ್‌ದ 12ನೇ ಮುಖ್ಯಮಂತ್ರಿಯಾದ್ ಜಾರ್ಖಂಡ್ ಮುಕ್ತಿ ಮೋರ್ಚಾ ಪಕ್ಷದ ನಾಯಕೆರ್ ಚಂಪೈ ಸೊರೆನ್ ಮೇರ್ ಇನಿ ಪ್ರಮಾಣವಚನ ಸ್ವೀಕಾರ ಮಲ್ತ್‌ದೆರ್.
ರಾಂಚಿದ ರಾಜಭವನದ ದರ್ಬಾರ್ ಹಾಲ್‌ಡ್ ಈ ಕಾರ್ಯಕ್ರಮ ನಡತ್‌ದಿತ್ತ್‌ದ್. ಜಾರ್ಖಂಡ್ ರಾಜ್ಯಪಾಲೆರ್ ಸಿಪಿ ರಾಧಾಕೃಷ್ಣನ್ ಮೇರ್ ಚಂಪೈ ಸೊರೆನ್ ಮೆರೆಗ್ ಪ್ರಮಾಣ ವಚನ ಬೋಧಿಸಾದೆರ್.
ಕೇರಳ: ಪ್ರವಾಸಿಗೆರ್ ಅಕ್ಲೆಗ್ ಗೊತ್ತಿಜಂದಿನ ಜಾಗೆಡ್ ಒವ್ವೇ ಸಾಹಸಗ್ ಪೋಯರೆ ಬಲ್ಲಿ ಪಂದ್ ಪ್ರವಾಸೋದ್ಯಮ ಇಲಾಖೆದಕುಲು ಫಲಕ ಪಾಡ್ದ್ ಎಚ್ಚರ್ಗೆ ಕೊರೊದುಂಡು. ಅವೆನ್ ಮೀರ್ದ್‌ಲ ಎಚ್ಚಿನ ಜನಕುಲು ಅಕ್ಲೆನ ಸಾಹಸಗ್ ಕೈ ಪಾಡ್ದ್ ಜೂವ ಕಳೆಯೊಂದುಲ್ಲೆರ್.
ಇಂಚಿನ ಒಂಜಿ ಘಟನೆ ಕೇರಳದ ಮುತ್ತುಂಗ ಅರಣ್ಯ ವ್ಯಾಪ್ತಿಡ್ ನಡತ್ತ್‌ದಿತ್ತ್‌ದ್, ಮಾರ್ಗದ ಬರಿಟ್ಟ್ ಆನೆ ಒಂಜಿ ಉಂತುದಿತ್ತ್‌ದ್ ಅವೆತ್ತ ದುಂಬು ಸೆಲ್ಫಿ ವಿಡಿಯೋ ದೆಪ್ಪರೆ ಕಾರ್‌ರ್ದ್ ರಡ್ಡ್ ಜನ ಜತ್ತ್‌ದೆರ್. ಆ ಪೊರ್ತುಡು ಆನೆ ರಡ್ಡ್ ಜನನ್‌ಲ ಗಿಡ್ತೊಂದು ಬೈದ್ಂಡ್. ಅಪಗನೆ ಕಾರ್‌ದ ಡ್ರೈವರ್ ಕಾರ್‌ದ ಬಿರ್ಸ್‌ನ್ ಎಚ್ಚ ಮಲ್ತ್‌ದ್ ಅಕ್ಲೆನ ರಕ್ಷಣೆ ಮಲ್ತ್‌ದೆರ್.
ಗರ್ಭಕಂಠದ ಕ್ಯಾನ್ಸರ್‌ಡ್ ನರಲೊಂದು ಇತ್ತಿನ ಬಾಲಿವುಡ್ ನಟಿ ಬೊಕ್ಕ ಮಾಡೆಲ್ ಪೂನಂ ಪಾಂಡೆ(೩೨) ಕೋಡೆ ರಾತ್ರೆ ತೀರ್ ಪೋಯೆರ್ ಪಂದ್ ಅರೆನ ತಂಡ ಅಧಿಕೃತ ಹೇಳಿಕೆಡ್ ತೆರಿಪಾದೆರ್.
ಆರ್ ತಾನ್ ಪುಟ್ಟಿನ ಊರು ಕಾನ್ಪುರಡ್ ಕಡೆತ್ತ ಉಸುಲ್ ಪೋತ್ಂಡ್. ನಮ್ಮ ಮೋಕೆದ ಪೂನಂನ್ ನಮ ಕಳೆಯೊಂದ ಪಂದ್ ಟ್ವೀಟ್ ಮಲ್ತ್‌ದೆರ್.
ಫೆ.22-ಮಾ.1 ಮುಟ್ಟ ವೇಣೂರ್‌ದ ಬಾಹುಬಲಿ ಸ್ವಾಮಿಗ್ ನಡಪುನ ಮಹಾಮಸ್ತಕಾಭಿಷೇಕಗ್ ಮೈಸೂರ್‌ದ ರಾಜವಂಶದ ಯುದುವೀರ್ ಕೃಷ್ಣದತ್ತ ಚಾಮರಾಜ ಒಡೆಯೆರ್ ಮೆರೆನ್ ಅಳದಂಗಡಿ ಅರಸೆರ್ ಲೆಪ್ಪು ಕೊರ್ತೆರ್. ಮೈಸೂರ್ ಅರಮನೆಗ್ ಪೋದು ಯದುವೀರ್ ಬೊಕ್ಕ ಅರೆನ ಕುಟುಮದಕ್ಲೆನ್ ಲೇಸ್‌ಗ್ ಲೆಪ್ಪು ಕೊರ್ತೆರ್.
ಅಳದಂಗಡಿ ಅರಸೆರ್ ಡಾ. ಪದ್ಮಪ್ರಸಾದ್ ಅಜಿಲೆರ್, ಅರೆನ ಬೊಡೆದಿ ಮಧುರಾ ಪದ್ಮಪ್ರಸಾದ್ ಅಜಿಲೆರ್, ಸಹೋದರೆ ಶಿವಪ್ರಸಾದ್ ಅಜಿಲೆರ್, ಅರೆನ ಬೊಡೆದಿ ರೇಖಾ ಶಿವಪ್ರಸಾದ್ ಅಜಿಲೆರ್, ಮುಲ್ಕಿ ಸೀಮೆದ ಅರಸೆರ್ ದುಗ್ಗಣ್ಣ ಸಾವಂತೆರ್ ಮೈಸೂರ್ ಅರಮನೆಡ್ ಲೆಪ್ಪೋಲೆ ಕೊರ್ತೆರ್. ಈ ಪೊರ್ತುಡು ಯದುವೀರ್ ಮೆರೆನ್ ವಿಶೇಷವಾದ್ ಮಾನಾದಿಗೆ ಮಲ್ತೆರ್.
