ಕರ್ನಾಟಕ ರಾಜ್ಯಡ್ ಸುದ್ದಿಲು | Karnataka News

ಚಾಮರಾಜನಗರ ದುರಂತ, ಬೆಡ್ ಬ್ಲಾಕಿಂಗ್ ದಂಧೆದ ಅಧಿಕಾರಿಲೆನ್ ಅಮಾನತು ಮಲ್ಪುಲೆ, ಆರೋಗ್ಯ ಸಚಿವೆರ್ ರಾಜೀನಾಮೆ ಕೊರ್ಲೆ : ಅಭಯಚಂದ್ರ ಜೈನ್ ಒತ್ತಾಯ

ಮೂಲ್ಕಿ: ಚಾಮರಾಜ ನಗರದ ಆಕ್ಸಿಜನ್ ಹಗರಣ ಬೊಕ್ಕ ಬೆಂಗಳೂರುದ ಬೆಡ್ ಬ್ಲಾಕಿಂಗ್ ಹಗರಣದ ಅಧಿಕಾರಿಲೆನ್ ,ಅಂಚೆನೇ ರಡ್ಡ್ ಜಿಲ್ಲೆದ ಜಿಲ್ಲಾಧಿಕಾರಿಲೆನ್ ಅಮಾನತು ಮಲ್ಪೊಡು. ಉಂದೆಕ್ಕ್ ಹೊಣೆಗಾರೆರಾಯಿನ ಆರೋಗ್ಯ ಸಚಿವೆರ್ ರಾಜೀನಾಮೆ ಕೊರೊಡು ಪಂಡ್ ದ್ ಮಾಜಿ ಸಚಿವೆರ್ ಕೆ.ಅಭಯಚಂದ್ರ ಜೈನ್ ಒತ್ತಾಯ ಮಲ್ದೆರ್.

ಆರ್ ಹಳೆಯಂಗಡಿದ ಮೂಲ್ಕಿ ಬ್ಲಾಕ್ ಕಾಂಗ್ರೆಸ್‌ ಕಚೇರಿಡ್ ಬುಧಾರ ನಡತಿನ ಸುದ್ದಿಗೋಷ್ಠಿಡ್ ಪಾತೆರಿಯೆರ್.ರಾಜ್ಯದ ಆಡಳಿತ ಮಲ್ಪುನ ಬಿಜೆಪಿ ಸರ್ಕಾರೊಗು ತನ್ನ ಅಧಿಕಾರಿಲೆನ್ ಹತೋಟಿಗಡ್ ದೀವೊನರೆ ಸಾಧ್ಯ ಆವೊಂದಿಜ್ಜಿ. ಈತ್ ಮಾತಾ ಆಂಡಲಾ ಕೇಂದ್ರ ಸರ್ಕಾರ ಮೌನ ಆತ್ಂಡ್. ಆಡಳಿತ ಮಲ್ಪುನ ಬಿಜೆಪಿದ ಇರುವೆರ್ ಶಾಸಕೆರ್, ಒರಿ ಸಂಸದೆರೇ ಈ ಹಗರಣ ನಾಡ್ ಪತ್ ದಿನ ತೂವನಗ ಸರ್ಕಾರದ ಇಚ್ಚಾಶಕ್ತಿದ ಕೊರತೆ ತೋಜುಂಡು ಪಂಡೆರ್.
ರಾಜಕೀಯೊನು ಸಮಾಜ ಸೇವೆಗ್ ಮೀಸಲು ದೀಲೆ. ಜನೊಕ್ಲೆನ ಸಂಕಷ್ಟ ತೆರಿಲೆ ಪಂಡ್ ದ್ ತೆರಿಪಾಯಿನ ಆರ್, ಕೊರೊನಾ ರೋಗಿಲೆಗ್ ಧರ್ಮಸ್ಥಳದ ಯೋಜನೆದ ಸಹಾಯೊನು ಪುಗರಿಯೆರ್ .

ವೆಂಟಿಲೇಟರ್ ಎಚ್ಚ ಮಲ್ಪುಲೆ : ಮಿಥುನ್ ರೈ
ಕುಡ್ಲದ ಜಿಲ್ಲಾ ವೆನ್‌ಲಾಕ್‌ ಆಸ್ಪತ್ರೆಡ್ ಇತ್ತೆ ಉಪ್ಪುನ ವೆಂಟಿಲೇಟರ್ ವ್ಯವಸ್ಥೆ ದಾಲಾ ಯಾವುಜಿ. ಅವೆನ್ 100 ಕ್ಕ್ ಏರ್ಸಾಲೆ. ದುಂಬಗ್ ಬರ್ಪಿನ ಅಪಾಯೊನು ತೆರಿದ್ ಇತ್ತೆನೇ ಜಾಗೃತೆ ದೆತೊನ್ಲೆ . ಆಕ್ಸಿಜನ್ ಸಮಸ್ಯೆ ಜಿಲ್ಲೆಗ್ ಲ ಬರ್ಪಿನ ಸಾಧ್ಯತೆ ಉಂಡು. ಜಿಲ್ಲೆದ ಎಲ್ಲಾ ೭ ಸಚಿವೆರ್, ಸಂಸದೆರ್ ಎಚ್ಚರ ಆದ್ ಜನೊಕ್ಲೆನ ರಕ್ಷಣೆಗ್ ದುಂಬಾವೊಡು. ಅಯಿಕ್ ಬೋಡಾದ್ ಪಕ್ಷ ಬೇಧ ದೀವಂದೆ ಕೆಲಸ ಮಲ್ಪುಗ ಪಂಡ್ ದ್ ಕಾಂಗ್ರೆಸ್ ಯುವ ನಾಯಕೆರ್ ಮಿಥುನ್ ರೈ ಪಂಡೆರ್.
ಕೆಪಿಸಿಸಿ ಜಿಲ್ಲಾ ವಕ್ತಾರೆರ್ ಎಚ್.ವಸಂತ ಬೆರ್ನಾಡ್, ಮೂಲ್ಕಿ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ಧನಂಜಯ ಮಟ್ಟು, ಯುವ ಕಾಂಗ್ರೆಸ್ ಅಧ್ಯಕ್ಷೆರ್ ಅಶೋಕ್ ಪೂಜಾರ್, ಮಹಿಳಾ ಕಾಂಗ್ರೆಸ್ ಅಧ್ಯಕ್ಷೆ ಪದ್ಮಾವತಿ ಶೆಟ್ಟಿ, ಇಂಟಕ್‌ ಅಧ್ಯಕ್ಷೆರ್ ಮೋಹನ್ ಕೋಟ್ಯಾನ್ ಶಿಮಂತೂರು ಸುದ್ದಿಗೋಷ್ಠಿಡ್ ಇತ್ತೆರ್‌.