ಫ್ಲ್ಯಾಶ್ ನ್ಯೂಸ್ / ರಪಕ್ಕ ಸುದ್ದಿ | Flash News

ಬೆಹರಿನ್ ರ್ದ್ ಕುಡ್ಲಗ್ ಬತ್ತ್ಂಡ್ ಆಕ್ಸಿಜನ್

ಕುಡ್ಲ: ಬೆಹರಿನ್ ರ್ದ್ ಭಾರತೊಗು 60 ಮೆಟ್ರಿಕ್ ಟನ್ ಆಕ್ಸಿಜನ್ ದಿಂಜಾವೊಂದು ಭಾರತದ ನೌಕಾ ಪಡೆತ “ಐಎನ್‌ಎಸ್ ತಲ್ವಾರ್’ ಹಡಗು ಕುಡ್ಲದ ಪಣಂಬೂರು ಬಂದರ್‌ಗೆ ಇನಿ ಪತೊಂದು ಬೈದ್‌ಂಡ್.

ದೇಶದ ಕೊರೊನಾ ರೋಗಿಲೆಗ್ ಆಮ್ಲಜನಕದ ತಿಕ್ಕಂದಿನೆರ್ದಾವರ ಭಾರತದ ನೌಕಾ ಪಡೆ ಆಪರೇಶನ್ ಸಮುದ್ರ ಸೇತು-2 ಸುರು ಮಲ್ಪೆಂಡ್, ಅಯಿತ್ತ ಪ್ರಕಾರ ಭಾರತೀಯ ನೌಕಾ ಪಡೆ ಬೇತೆ ಬೇತೆ ದೇಶೂಲೆರ್ದ್ ಏಳ್ ಹಡಗುಲೆಡ್ ಆಕ್ಸಿಜನ್ ಬೊಕ್ಕ ತುರ್ತು ವೈದ್ಯಕೀಯ ವಸ್ತುಲೆನ್
ದಿಂಜಾವೊಂದು ಭಾರತೊಗು ಬತ್ತ್ಂಡ್. ಬೆಹರಿನ್‌ದ ಮನಾಮಾ ಬಂದರ್‌ಡ್್ರ ಐಎನ್‌ಎಸ್ ತಲ್ವಾರ್ ಪಿದಾಡ್ದ್ ಅಯಿಟ್ ರಡ್ಡ ಕ್ರಯೋಜನಿಕ್ ಐಸೋ ಕಂಟೈನರ್‌ಡ್ 60 ಮೆಟ್ರಿಕ್ ಟನ್ ಉಂಡು. ಅಂಚೆನೆ ಕೊರೊನಾ ಚಿಕಿತ್ಸೆಗ್ ಬೋಡಾಪಿನ ವೈದ್ಯಕೀಯ ಉಪಕರಣಲು ಪೂರ ಈ
ಶಿಪ್‌ಡ್ ಉಂಡು. ಕರ್ನಾಟಕ ಸರ್ಕಾರದ ಬೇಡಿಕನ್ ತೂದು ಕೇಂದ್ರ ಸರ್ಕಾರದ ಬಿನ್ನೈತದ ಮಿತ್ತ್ ಬೆಹರಿನ್ ದೇಶದಕುಲು ಕರ್ನಾಟಕದ ಕೊರೋನಾ ರೋಗಿಲೆನ ಜೀವ ಒರಿಪಾವರೆ ಬೊಡಾದ್ ಆಕ್ಸಿಜನ್ ಕಡಪುಡುದೆರ್.

ಪ್ರಕಾಶ್ ಪಡುಕೋಣೆಗ್ ಕೋವಿಡ್ ಪಾಸಿಟಿವ್

ಬೆಂಗ್ಳುರು, ಮೇ 04: ಬಾಲಿವುಡ್ ಸ್ಟಾರ್ ದೀಪಿಕಾ ಪಡುಕೋಣೆ ಮೆರೆನ ಅಮ್ಮೆರ್, ಮಾಜಿ ಬ್ಯಾಡ್ಮಿಂಟನ್ ಪ್ಲೇಯರ್ ಪ್ರಕಾಶ್ ಪಡುಕೋಣೆ ಮೇರ್ ಕೋವಿಡ್ ಪಾಸಿಟಿವ್ ಬತ್ತ್ದ್ ಆಸ್ಪತ್ರೆ ಸೇರ್ದ್ ಇತ್ತೆ ಹುಷಾರ್ ಆವೊಂದುಲ್ಲೆರ್. ಸುಮಾರ್ ೧೦ ದಿನ ಪಿರವುಡು ಪ್ರಕಾಶ್ ಪಡುಕೋಣೆ, ಅರೆ lನ ಬುಡದಿ, ಅಂಚನೆ ರಡ್ಡನೆ ಮಗಲೆಗ್ ಕೋವಿಡ್ ಲಕ್ಷಣ ಇತ್ತಿನೆರ್ದಾವರ ಪರೀಕ್ಷೆ ಮಲ್ಪಾನಗ ಪಾಸಿಟಿವ್ ಬತ್ತ್ಂಡ್. ಅಪಗನೇ ಅಕುಲು ಇಲ್ಲಡ್ ಐಸೊಲೇಟ್ ಆದ್ ಚಿಕಿತ್ಸೆ ದೆತೊನೊಂದು ಇತ್ತೆರ್.ಆಂಡ ಪ್ರಕಾಶ್ ಪಡುಕೋಣೆ ಮೆರೆಗ್ ಜ್ವರ ಕಮ್ಮಿ ಆವಂದಿನೆಕ್ಕ್ ಕರಿನ ಶನಿಯಾರ ಆಸ್ಪತ್ರೆ ಸೇರ್ಯೆರ್ ಪಂಡ್‌ದ್ ಪ್ರಕಾಶ್ ಮೆರೆನ ಸ್ನೇಹಿತೆರ್, ಪ್ರಕಾಶ್ ಪಡುಕೋಣೆ ಬ್ಯಾಡ್ಮಿಂಟನ್ ಅಕಾಡೆಮಿದ ನಿರ್ದೇಶಕಿ ವಿಮಲ್ ಕುಮಾರ್ ಪಿಟಿಐಗ್ ತೆರಿಪಾದೆರ್.

ಇತ್ತೆ ಆರ್ ಹುಷಾರ್ ಉಲ್ಲೆರ್ , ಅರೆನ ಬುಡೆದಿ ಬೊಕ್ಕ ಮಗಲ್ ಇಲ್ಲಡ್ ಹುಷಾರುಲ್ಲೆರ್, ಪ್ರಕಾಶ್ ಸರ್ ೨-೩ ದಿನೊಟ್ಟು ಬುಡುಗಡೆ ಆವರೆ ಉಲ್ಲೆರ್ ಪಂಡ್‌ದ್ ಆರ್ ಪಂಡೆರ್ , ಪ್ರಕಾಶ್ ಪಡುಕೋಣೆ ಮೆರ್ನ ಮಗಲ್ ದೀಪಿಕಾ ಪಡುಕೋಣೆ ಇಂಚೋಡು ಇನ್‌ಸ್ಟಗ್ರಾಮ್‌ಡ್, ಕೋವಿಡ್ ಜಾಸ್ತಿ ಆವೊಂದಿಟ್ಟಿನ ಪೊರ್ತುಡು ನಮ ಮಾತೆರ್ಲ ಮಾನಸಿಕವಾದ್ ಗಟ್ಟಿ ಉಪ್ಪೊಡು ಪನ್ಪಿನ ವಿಚಾರೊಡು ತೆರಿಪಾದ್ ಇತ್ತೆರ್ , ಪ್ರಕಾಶ್ ಪಡುಕೋಣೆ ೧೯೮೩ ನೇ ಇಸ್ವಿಡ್ ಬ್ಯಾಡ್ಮಿಂಟನ್ ಫೆರ್ಲ್ಡ್ ಚಾಂಪಿಯನ್‌ಶಿಪ್‌ಡ್ ಭಾರತೊಗು ಸುರುತ್ತಾ ಪದಕ (ಕಂಚಿ) ಕನದಿನಾರ್‌, ೧೯೭೦-೮೦ ಡ್‌ ಭಾರತದ ಕ್ರೀಡೆಡ್ ರೋಲ್ ಮೋಡೆಲ್ ಆದ್ ಮಿಂಚ್‌ದೆರ್.

ಒಡಿಪುದ ಐಟಿ ಉದ್ಯೋಗಿ ಕೋವಿಡ್ ಸೋಂಕುಗು ಬಲಿ

ಒಡಿಪು, ಮೇ 04: ಲಾಕ್ ಡೌನ್ ಕಾರಣ ಬೆಂಗಳೂರುರ್ದ್ ಒಡಿಪು ಗು ಬತ್ತಿನ ಐಟಿ ಉದ್ಯೋಗಿಯೊರಿ ಕೋವಿಡ್ ಸೋಂಕುಗು ಬಲಿಯಾಯಿನ ಘಟನೆ ಒಡಿಪುದ ಖಾಸಗಿ ಆಸ್ಪತ್ರೆಡ್ ನಡತುದುಂಡು .ಮರ್ದ್ ಫಲಕಾರಿಯಾವoದೆ ತೀರ್ ಪೋಯಿನ ದುರ್ದೈವಿ ಅಂಬಾಗಿಲು ಪುತ್ತೂರುದ ಅನಂತ ಆಚಾರ್ (38) ಪಂದ್ ತೆರಿದ್ ಬೈದುಂಡು.

ಕರಿನ ಒಂಜಿ ತಿಂಗೊಲುರ್ದು ಇಲ್ಲಡೆ ಬೇಲೆ ಮಲ್ತೊಂದು ಇತ್ತಿನ ಆನಂತ್ ಕೆಲವು ದಿನರ್ದ್ ಹುಷಾರ್ ಇಜ್ಜಂದೆ ಆಸ್ಪತ್ರೆಡ್ ಇತ್ತೆರ್,ಸೋಮವಾರ ಮಧ್ಯಾಹ್ನ ಮರ್ದ್ ಫಲಕಾರಿಯಾವಂದೇ ತೀರ್ ಪೋತೆರ್.ಪುತ್ತೂರುದ ಪಿ, ಶ್ರೀಕಾಂತ ಆಚಾರ್ಯೆರ್ನ ಮಗೆ ಆಯಿನ ಮೇರ್ , ಪತ್ನಿ, ಅಂಚನೇ ರಡ್ಡ್ ಪೊಣ್ಣು ಜೋಕ್ಲೆನ್ ಪಡೆಯೊಂದೆರ್.

ನಿಟ್ಟೂರು ಪ್ರೌಢಶಾಲೆದ ಹಳೆವಿದ್ಯಾರ್ಥಿಯಾಯಿನ ಮೆರ್ನ ನಿಧನಗ್ ನಿಟ್ಟೂರು ಎಜುಕೇಶನಲ್ ಸೊಸೈಟಿದ ಗುರ್ಕಾರ್ಲು , ಶಾಸಕೆರಾಯಿನ ಕೆ. ರಘುಪತಿ ಭಟ್‌, ಕಾರ್ಯದರ್ಶಿ ಮುರಲಿ ಕಡೆಕಾರ್, ಮುಖ್ಯ ಶಿಕ್ಷಕಿ ಅನಸೂಯಾ, ಹಳೆವಿದ್ಯಾರ್ಥಿ ಸಂಘದ ಗುರ್ಕಾರ್ಲಾಯಿನ ಯೋಗಿಶ್ ಚಂದ್ರಾಧರ್‌ ಬೊಕ್ಕ ಶಾಲೆದ ಇಡೀ ಸಮೂಹ ಕಣ್ಣ ನೀರ ಪನಿತರ್ಪಣ ಮಲ್ತೆರ್.