ತುಳು ಸುದ್ದಿ

ಕರಕರಿ ಫ್ರೆಂಡ್ಸ್ ಸೇವಾ ಯೋಜನೆಗ್ 50 ಸಾರ ರೂ. ಕೊರಿನ ಶಾಸಕೆರ್ ಸುನಿಲ್ ಕುಮಾರ್

ಕರಕರಿ ಫ್ರೆಂಡ್ಸ್ ಸೇವಾ ಬಳಗ (ರಿ.) ದ ಮುತಾಲಿಕೆಡ್ ಡ್ ನಡತೊಂದು ಇಪ್ಪುನ ಅಂಬುಲೆನ್ಸ್ ಸೇವಾ ಯೋಜನೆಗ್ ಕಾರ್ಲ ಕ್ಷೇತ್ರದ ಪುಗರ್ತೆದ ಶಾಸಕೆರ್ ವಿ ಸುನಿಲ್ ಕುಮಾರ್ ಮೇರ್ ವಿಕಾಸ ಸೇವಾ ಸಂಸ್ಥೆದ ಮುಖೇನ ಕರಕರಿ ಫ್ರೆಂಡ್ಸ್ ಸೇವಾ ಯೋಜನೆಗ್ 50 ಸಾರ ರೂ.ದ ಚೆಕ್ ನ್ ಕೊರಿಯೆರ್.

ಈ ಪೊರ್ತುಡು ಕರಕರಿ ಫ್ರೆಂಡ್ಸ್ ಸೇವಾ ಸಂಸ್ಥೆದ ಅಧ್ಯಕ್ಷೆರ್ ಸದಾನಂದ್ ಸಾಲಿಯಾನ್ ಜಾರ್ಕಳ, ಉಪಾಧ್ಯಕ್ಷೆರ್ ಚಂದ್ರಿಕಾ ರಾವ್ ಬೈಲೂರು, ಶ್ರೀನಿವಾಸ್ ಪೂಜಾರಿ ಎರ್ಲಪಾಡಿ, ಶಶಿಕಾಂತ್ ಪೂಜಾರಿ ಹೆರ್ಮುಂಡೆ, ಸಂತೋಷ್ ಪೂಜಾರಿ ಅಜೆಕಾರು, ಸಚಿನ್ ಪೂಜಾರಿ ಗುಂಡುಪಾದೆ ಕಣಂಜಾರು, ಹರಿಪ್ರಸಾದ್ ಪೂಜಾರಿ ಪಳ್ಳಿ, ಅಜಿತಾ ಕೌಡೂರು ರಾಜೇಶ್ವರಿ ನವೀನ್, ಪರಿಮಳ ಹರಿಪ್ರಸಾದ್ ಪಳ್ಳಿ ಇತ್ತೆರ್.

ಕೆಲವೇ ತಿಂಗೊಲ್ಡ್ ಶುಕ್ರಯಾನ-1 ರಾಕೆಟ್ ಉಡಾವಣೆ

ಬೆಂಗಳೂರು : ಚಂದ್ರಯಾನ, ಸೂರ್ಯಯಾನದ ಯಶಸ್ವಿರ್ದ್ ಬೊಕ್ಕ ಇಸ್ರೋ ನನ ಕೆಲವೇ ತಿಂಗೊಲ್ಡ್ ಶುಕ್ರಯಾನ-1 ರಾಕೆಟ್ ಉಡಾವಣೆ ಮಲ್ಪರೆ ತಯಾರಾತ್ಂಡ್.

ಶುಕ್ರ ಗ್ರಹದ ಮೇಲ್ಮೈ, ಅಯಿತ್ತ ವಾತಾವರಣ ಬೊಕ್ಕ ಭೂವೈಜ್ಞಾನಿಕ ಸಂಯೋಜನೆ ಶುಕ್ರಯಾನ-1 ತ್ತ ಮುಖ್ಯ ಉದ್ದೇಶ ಆತ್ಂಡ್.

ಶತಕೋಟಿ ವರ್ಷೊದ ಪಿರವು ಭೂಮಿ ಶುಕ್ರನಲೆಕ್ಕನೇ ಇತ್ತ್ಂಡ್. ಅಂಚಾಂಡ ಶುಕ್ರ ಗ್ರಹದ ಭವಿಷ್ಯ ದಾದ ಪನ್ಪಿನೆನ್ ತೆರಿವೊನಿಯೆರೆ ಈ ಪ್ರಯೋಗ ಮಲ್ಪರೆ ಉಂಡು ಪಂದ್ ಇಸ್ರೊ ತೆರಿಪಾದ್ಂಡ್.

ಭಾರತೀಯ ರಿಸರ್ವ್ ಬ್ಯಾಂಕ್ ಡ್ 450 ಬೇಲೆ

ಭಾರತೀಯ ರಿಸರ್ವ್ ಬ್ಯಾಂಕ್ ಡ್ ಖಾಲಿ ಇಪ್ಪುನ 450 ಬೇಲೆಗ್ ಅಭ್ಯರ್ಥಿಲು ಅರ್ಜಿ ಪಾಡೊಲಿ.

20-30 ವರ್ಷದ ಅಭ್ಯರ್ಥಿಲು ಒವ್ವೇ ಯುಜಿ ಪದವಿ ಆಯಿನಕುಲು ಈ ಬೇಲೆಗ್ ಅರ್ಜಿ ಸಂದಾವೊಲಿ. ತಿಂಗೊಲ್ದ ಸಂಬಳ 20700 ರ್ದ್ 55700 ಮುಟ್ಟ ಉಂಡು. ಅರ್ಜಿ ಸಂದಾಯೆರೆ ಅ.4 ಅಕೇರಿದ ದಿನ ಆತ್ಂಡ್. ಅಭ್ಯರ್ಥಿಲು ಆನ್ ಲೈನ್ ಮುಖೇನ ಅರ್ಜಿ ಸಂದಾವೊಲಿ.

ತುಳುವೆರೆ ಆಯನೊ ಕೂಟದ ಮುತಾಲಿಕೆಡ್ ತುಳುವೇಶ್ವರ ದೇವಲ್ಯದ ಅಭಿವೃದ್ಧಿಗ್ ಸಂಕಲ್ಪ: ಶಮಿನಾ ಆಳ್ವ

ಕುಡ್ಲ : ಒಡಿಪು ಜಿಲ್ಲೆ ಬಸ್ರೂರುದ ಗೋಲಿದ ಮರತ್ತ ಅಡಿಟ್ಟ್ ಇಪ್ಪುನ ಶ್ರೀ ತುಳುವೇಶ್ವರ ದೇವಲ್ಯದ ಅಭಿವೃದ್ಧಿಗ್ ತುಳುವೆರೆ ಆಯನೊ ಕೂಟ ಕುಡ್ಲ ಸಂಕಲ್ಪ ಮಲ್ದ್ಂಡ್ ಪಂದ್ ಕೂಟದ ಅಧ್ಯಕ್ಷೆರ್ ಶಮಿನಾ ಆಳ್ವ ಪಂಡೆರ್.

ಬುಧಾರ ಪತ್ರಿಕಾಗೋಷ್ಠಿಡ್ ಪಾತೆರ್ನ ಮೇರ್ ಗೋಲಿದ ಮರತ್ತ ತಿರ್ತ್ ಇಪ್ಪುನ ದೇವಲ್ಯದ ಬೇರ್ ದ ಉಲಯಿ ಶಿವಲಿಂಗ ಉಂಡು. ಆಂಡ ಅವುಲು ಏಪಲ ಪೂಜೆ ಆವೊಂದು ಉಂಡು.ಅಯಿತ್ತ ಅಭಿವೃದ್ಧಿ ಅತ್ತಾಂದೆ ಬಸ್ರೂರುದ ಕೂಟದ ಸಮ್ಮೇಳನ ಮಲ್ಪುನ ಯೋಜನೆಲ ಉಂಡು ಪಂದ್ ಪಂಡೆರ್.

ಉಂದುವೇ ಸೆ. 30 ಗು ಮಧ್ಯಾಹ್ನ 3.30 ಕ್ಕ್ ಕೂಟದ ಪಟ್ಟ ಏರುನ (ಪದಗ್ರಹಣ) ಲೇಸ್ ನಡಪರೆ ಉಂಡು. 2 ಗಂಟೆಗ್ ಜೋಕ್ಲೆನ ಮಿನದನ ಲೇಸ್ ಉಂಡು. ಬಯ್ಯಗ್ 4 ಗಂಟೆರ್ದ್ ನಡಪುನ ಲೇಸ್ ಡ್ ವಿಧಾನ ಸಭಾಧ್ಯಕ್ಷೆರ್ ಯು.ಟಿ.ಖಾದರ್‌, ಕಟೀಲ್ ಶ್ರೀ ಕ್ಷೇತ್ರದ ಹರಿನಾರಾಯಣ ಅಸ್ರಣ್ಣೆರ್, ಸಂಸದೆರ್ ನಳಿನ್ ಕುಮಾರ್ ಕಟೀಲ್‌, ಕಾಂಗ್ರೆಸ್‌ ಮುಖಂಡೆರ್ ರಮಾನಾಥ ರೈ ಮಲ್ಲ ಬಿನ್ನೆರಾದ್ ಪಾಲ್ ಪಡೆಯೆರೆ ಉಲ್ಲೆರ್.

ಬಯ್ಯಡ್ ತುಳುತ್ತ “ಸಿರಿ ದೇವಿ ಮಾತ್ಮೆ” ಬೂಕು ಬುಡುಗಡೆ, ಯಕ್ಷಗಾನ ಪ್ರದರ್ಶನ ನಡಪರೆ ಉಂಡು ಪಂದ್ ಮೇರ್ ತೆರಿಪಾಯೆರ್. ಕೂಟದ ಉಪಾಧ್ಯಕ್ಷೆರ್ ಗೋಪಾಡ್ಕರ್‌, ಆಶಾ ಶೆಟ್ಟಿ ಅತ್ತಾವರ, ಸಂಚಾಲಕೆರ್ ಸರಪಾಡಿ ಅಶೋಕ್ ಶೆಟ್ಟಿ, ಕಾರ್ಯದರ್ಶಿ ರಾಜೇಶ ಹೆಗ್ಡೆ ಪೊಳಲಿ ಇತ್ತೆರ್.

ರೇಡಿಯೊ ಮಣಿಪಾಲ್ ಡ್ ಇನಿ ಸೌಜನ್ಯ ಕಟಪಾಡಿ ಮೆರೆನ ಕತೆ ಕೇನ್ಲೆ

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 ಡ್ ಕನ್ನಡ ಸಾಹಿತ್ಯ ಪರಿಷತ್ ಒಡಿಪು ಜಿಲ್ಲೆ ಬೊಕ್ಕ ತಾಲೂಕ್ ಘಟಕದ ಒಟ್ಟುಸೇರಿಗೆಡ್ ಕಥೆ ಕೇಳೋಣ ಸರಣಿ ಲೇಸ್ ದ 74ನೇ ಸಂಚಿಕೆ ಸೆ.30 ಸನಿಯಾರ ಬಯ್ಯಗ್ 4.30ಕ್ಕ್ ಪ್ರಸಾರ ಆಪುಂಡು.

ಈ ಸಂಚಿಕೆಡ್ ಸ್ವರಚಿತ ಕಥೆನ್ ಸೌಜನ್ಯ ಆರ್ ಕಟಪಾಡಿ (ವಿದ್ಯಾರ್ಥಿನಿ) ಓದಿಯೆರೆ ಉಲ್ಲೆರ್. ಅ.1 ಕ್ಕ್ ಮಧ್ಯಾಹ್ನ 12.30 ಕ್ಕ್ ಕುಡೊರ ಪ್ರಸಾರ ಆಪುಂಡು.

ರೇಡಿಯೊಡ್ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಈ ಲೇಸ್ ನ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.