ರಾಷ್ಟ್ರಪ್ರಶಸ್ತಿ ವಿಜೇತ ಪುರಸ್ಕೃತ ತಂಡ ಶಾಂಭವಿ ಕಲಾವಿದೆರ್ ಸಾಣೂರು ಕಾರ್ಲ ಮೊಕ್ಲೆನ ಈ ವರ್ಷದ ನೂತನ ಕಲಾ ಕಾಣಿಕೆ “ಅಪ್ಪೆ ಶಾರದೆ” ತುಳು ಸಾಮಾಜಿಕ ಹಾಸ್ಯಮಯ ನಾಟಕ ನೆತ್ತ ಶುಭಮುಹೂರ್ತ ಸಮಾರಂಭ ಅ.20 ದಾನಿ ಬೆದ್ರದ ಸಮಾಜ ಮಂದಿರಡ್‌ ನಡಪೆರೆ ಉಂಡು. ಅಂಚನೆ ಅವ್ವೇ ದಿನ 7.30 ಕ್ಕ್ ಸಾಂಸ್ಕೃತಿಕ ಕಾರ್ಯಕ್ರಮ ಬೊಕ್ಕ ತುಳು ಸಾಮಾಜಿಕ ಹಾಸ್ಯಮಯ ನಾಟಕ ನಡಪೆರೆ ಉಂಡು ಪಂದ್ ಪ್ರಕಟನೆಡ್‌ ತೆರಿಪಾದೆರ್.
ಶಿವಧ್ವಜ್ ಶೆಟ್ಟಿ ಕಥೆ, ಚಿತ್ರಕಥೆ, ನಿರ್ದೇಶನದ ಕೊರಮ್ಮ ತುಳು ಪಿಕ್ಚರ್ ಇನಿ (ಅ.18) ಬಯ್ಯಗ್ ಮೈಸೂರ್ ದಸರಾ ಫಿಲ್ಮ್ ಫೆಸ್ಟಿವಲ್ ಡ್ ಪ್ರದರ್ಶನ ಆಪುಂಡು.
ಈ ಪಿಕ್ಚರ್ ಗ್ ಈಶ್ವರಿದಾಸ್ ಶೆಟ್ಟಿ, ರಾಜೇಶ್ವರಿ ರೈ ನಿರ್ಮಾಪಕೆರಾತೆರ್. ಕ್ಯಾಮರ ಮ್ಯಾನ್ ಸುರೇಶ್ ಬೈರಸಂದ್ರ, ಸಂಗೀತ ಶಿನೋಯ್ ವಿ ಜೋಸೆಫ್, ಸಂಕಲನ ಗಣೇಶ್ ನೀರ್ಚಾಲ್, ಸಂಭಾಷಣೆ ಶ್ರೀನಿಧಿ ಡಿ.ಎಸ್, ಅನುವಾದ ಬೊಕ್ಕ ಸಾಹಿತ್ಯ ಕೆ. ಮಹೇಂದ್ರನಾಥ್ ಸಾಲೆತ್ತೂರ್, ಕಲೆ ಸಂತೋಷ್ ಪೂಜಾರಿ ವೇಣೂರ್, ಸಹ ನಿರ್ದೇಶನ ಹರ್ಸಿವ್ ಭಗೀರ, ಪ್ರಸಾದನ ಕುಮಾರ್ ನೊಣವಿನಕೆರೆ, ನಿರ್ಮಾಣ, ನಿರ್ವಹಣೆ ವೀರೇಶ್ ಎಸ್ ಎ, ಕಲೆ ಪರಿಕಾರಲು ಸುಧಾಕರ ಶೆಟ್ಟಿ, ಪ್ರಚಾರ ವಿನ್ಯಾಸ ಯಶ್ವಿನ್ ಕೆ. ಶೆಟ್ಟಿಗಾರ್ ಮಲ್ದೆರ್.
ಬೊಲ್ತೇರ್ ವೀರಕೇಸರಿ ಸಂಘಟನೆದ ಮುತಾಲಿಕೆಡ್ ಅಪ್ಪೆ ಮಗೆ ರಡ್ಡೇ ಜನ ಇಪ್ಪುನ ಹರೀಶ್ ಪನ್ಪುನಾರೆನ ಕುಟುಂಬಗ್ 175ನೇ ಯೋಜನೆ, 7ನೇ ಆಸರೆ ಮುಖೇನ ಇಲ್ಲದ ಭೂಮಿ ಪೂಜೆ ಅ.15 ಐತಾರ ಶಿರ್ತಾಡಿ ವಿದ್ಯಾನಗರ ಮಕ್ಕಿಡ್ ನಡತ್ಂಡ್.
ಈ ಪೊರ್ತುಡು ವಿಧಾನ ಸಭೆ ಸದಸ್ಯೆರ್ ಪ್ರತಾಪ್ ಸಿಂಹ ನಾಯಕ್, ಭಾರತೀಯ ಜನತಾ ಪಕ್ಷ ಬೊಲ್ತೇರ್ ಮಂಡಲದ ಗುರ್ಕಾರೆ ಜಯಂತ್ ಕೋಟ್ಯಾನ್, ಭಾರತೀಯ ಭೂ ಸೇನೆದ ಮಾಜಿ ಸೈನಿಕೆರ್ ವೆಂಕಟ್ರಮಣ ಶರ್ಮಾ ಗುರುವಾಯನಕೆರೆ, ಶ್ರೀ ದುರ್ಗಾ ಪರಮೇಶ್ವರಿ ಅಮ್ಮನ ಕ್ಷೇತ್ರ ನೆಲ್ಲಿಂಗೇರಿ ಪೆರಾಡಿದ ಶಶಿಕಲಾ, ಅಧ್ಯಾ ಫೌಂಡೇಶನ್ ಪಡ್ಡೆದ್ರ ಸ್ಥಾಪಕಧ್ಯಕ್ಷೆರ್ ರಾಕೇಶ್ ಅಜಿಲ, ಕನ್ಯಾಡಿ ಸಮಾಜ ಸೇವಕೆರ್ ಪ್ರಭಾಕರ್ ಸಿ.ಜಿ, ಕುಡ್ಲ ಹಿಂದೂ ಜಾಗರಣೆ ವೇದಿಕೆದ ಜಿಲ್ಲಾ ಕಾರ್ಯಕಾರಿಣಿ ಪ್ರಮುಖೆರ್ ಗಣೇಶ್ ಕುಲಾಲ್ ಕೆದಿಲ, ಮಧುಗಿರಿ ತುಮಕೂರು ಜಿಲ್ಲೆದ ಲೆಕ್ಕ ಪರಿಶೋಧಕೆರ್, ತೆರಿಗೆ ಸಲಹೆಗಾರೆರ್ ಕೃಷ್ಣ ಮೂರ್ತಿ, ಆಮಂತ್ರಣ ಪರಿವಾರ ಸ್ಥಾಪಕಧ್ಯಕ್ಷೆರ್ ವಿಜಯ್ ಕುಮಾರ್ ಜೈನ್, ಭಗವತಿ ಗ್ರೂಪ್ ಪಡ್ಡೆದ್ರದ ಯುವರಾಜ್ ಕುಲಾಲ್, ಉಜಿರೆ ಶಾರದಾ ಶೋರೂಂದ ಹುಕಾರಾಂ, ವೀರ ಕೇಸರಿ ಬೊಲ್ತೇರ್ ದ ಸಂಚಾಲಕೆರ್ ಸತೀಶ್ ಶೆಟ್ಟಿ, ಸಂಘಟಕೆರ್ ಪದ್ಮನಾಭ ಪೂಜಾರಿ ಬೊಕ್ಕ ಸದಸ್ಯೆರ್ ಪಾಲ್ ಪಡೆದಿತ್ತೆರ್.
ಹಳೆಯಂಗಡಿ ಶ್ರೀ ವಿದ್ಯಾವಿನಾಯಕ ಯುವಕ ಮಂಡಲ (ರಿ.)ದ ಸುವರ್ಣ ಮಹೋತ್ಸವದ ಲೆಕ್ಕೊಡು ಮುಕ್ತ ರಂಗೋಲಿ ಪಂತೊ-2023 ಪಾವಂಜೆ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದೇವಲ್ಯಡ್ ನಡತ್ಂಡ್.
ಈ ಲೇಸ್ ಪಾವಂಜೆ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದೇವಲ್ಯ, ಹಳೆಯಂಗಡಿ ಶ್ರೀ ಗಣೇಶೋತ್ಸವ ಸೇವಾ ಟ್ರಸ್ಟ್ (ರಿ.), ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸೇವಾ ಸಮಿತಿ, ಶ್ರೀ ವಿದ್ಯಾ ವಿನಾಯಕ ರಜತ ಸೇವಾ ಟ್ರಸ್ಟ್ (ರಿ), ಯುವತಿ ಬೊಕ್ಕ ಮಹಿಳಾ ಮಂಡಲ (ರಿ.) ದ ಒಟ್ಟುಸೇರಿಗೆಡ್ ನಡತ್ಂಡ್. ಈ ಪಂತೊಡು ಜಿಲ್ಲೆದ ಬೇತೆ ಬೇತೆ ಕಡೆರ್ದ್ 32 ಸ್ಪರ್ಧಿಲು ಪಾಲ್ ಪಡೆದಿತ್ತೆರ್.
ಈ ಪಂತೊಡು ಗೆಂದಿನಕ್ಲೆಗ್ ನಗದು ಇನಾಮು, ಕಾಯಂ ಫಲಕ ಬೊಕ್ಕ ಪ್ರಮಾಣ ಪತ್ರ ಕೊರಿಯೆರ್. ನೆತ್ತ ಸುರುತ್ತ ಇನಾಮು ಕು.ಶ್ರಾವ್ಯ ಬೆದ್ರ, ರಡ್ಡನೇ ಇನಾಮು ಧನಲಕ್ಷ್ಮಿ, ಎನ್.ಎಂ.ಪಿ.ಟಿ. ಕಾಲನಿ ಪಣಂಬೂರು, ಮೂಜಿನೇ ಇನಾಮು ವಿದ್ಯಾ ವಿಶ್ವೇಷ್ ಮಣಿಪಾಲ ಬೊಕ್ಕ ನಾಲ್ ನೇ ಇನಾಮುನ್ ಕು.ಸಂಜನಾ ಡಿ.ಕೋಟ್ಯಾನ್ ಕಾರ್ನಾಡು ಮುಲ್ಕಿ ಮೊಕುಲು ಪಡೆತೆರ್.
ತೀರ್ಪುಗಾರೆರಾದ್ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತೆರ್ ಸೂರ್ಯ ಪುರೋಹಿತ್ ಕಾರ್ಲ, ತಾರಾ ಧನರಾಜ್ ಸುರತ್ಕಲ್ ಬೊಕ್ಕ ಹರಿಪ್ರಸಾದ್ ಶರ್ಮ ಕಾಸ್ರೋಡು ಸಹಕಾರ ಕೊರಿಯೆರ್.
ಮುಗಿತಲದ ಲೇಸ್ ಡ್ ಪಾವಂಜೆ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಗುರ್ಕಾರೆ ಬಿ.ಸೂರ್ಯ ಕುಮಾರ್, ಜೀರ್ಣೋದ್ದಾರ ಬೊಕ್ಕ ಬ್ರಹ್ಮಕಲಶ ಉಚ್ಚಯ ಸಮಿತಿದ ಗುರ್ಕಾರೆ ರಘು ಕೆ. ದೇವಾಡಿಗ, ಪ್ರಧಾನ ಕಾರ್ಯದರ್ಶಿ ಚಂದ್ರಶೇಖರ್ ನಾನಿಲ್, ಯುವಕ ಮಂಡಲದ ಗುರ್ಕಾರೆ ನಾಗೇಶ್ ಟಿ.ಜಿ., ಸಲಹಾ ಸಮಿತಿದ ಗುರ್ಕಾರೆ ಮೋಹನ್ ಬಂಗೇರ ಬೊಕ್ಕ ಸುವರ್ಣ ಮಹೋತ್ಸವ ಸಮಿತಿದ ಕಾರ್ಯಾಧ್ಯಕ್ಷೆರ್ ಸುಧಾಕರ ಆರ್. ಅಮೀನ್ ಚಾವಡಿಡ್ ಇತ್ತೆರ್.
ಗೆಂದಿನಕ್ಲೆಗ್ ಇನಾಮು ಬೊಕ್ಕ ಪಾಲ್ ಪಡೆಯಿನ ಮಾತ ಸ್ಪರ್ಧಾಳುಲೆಗ್ ಪ್ರಮಾಣ ಪತ್ರನ್ ನ.10 ಕ್ಕ್ ಬಯ್ಯಗ್ 5 ಗಂಟೆಗ್ ನಡಪುನ ಯುವಕ ಮಂಡಲದ ಸುವರ್ಣ ಮಹೋತ್ಸವ ಲೇಸ್ ಡ್ ಕೊರಿಯೆರೆ ಉಂಡು.
ಯುವಕ ಮಂಡಲದ ಗುರ್ಕಾರೆ ನಾಗೇಶ್ ಟಿ. ಜಿ. ಎದ್ಕೊನಿಯೆರ್. ಸುವರ್ಣ ಮಹೋತ್ಸವ ಸಮಿತಿದ ಕಾರ್ಯಾಧ್ಯಕ್ಷೆರ್ ಸುಧಾಕರ ಆರ್. ಅಮೀನ್ ಸೊಲ್ಮೆ ಸಂದಾಯೆರ್. ಸುವರ್ಣ ಮಹೋತ್ಸವ ಸಮಿತಿದ ಪ್ರಧಾನ ಕಾರ್ಯದರ್ಶಿ ರಾಮದಾಸ್ ಪಾವಂಜೆ ಲೇಸ್ ದ ಸುಧಾರಿಕೆ ಮಲ್ತೆರ್.
ವಿಟ್ಲ : ಶ್ರೀ ಭಗವತೀ ಸನ್ನಿಧಿಡ್ ನವರಾತ್ರಿ ವಿಶೇಷ ಪೂಜೆ ಅ.15 ರ್ದ್ ಅ.23 ಮುಟ್ಟ ನಡಪೆರೆ ಉಂಡು. ಅ.20 ದಾನಿ ರಾತ್ರೆ ದುರ್ಗಾಪೂಜೆ ನಡಪೆರೆ ಉಂಡು. ಈ ಪುಣ್ಯ ಕಾರ್ಯಡ್‌ ಮಾತ ಭಕ್ತೆರ್‌ ಎಚ್ಚಿನ ಸಂಖ್ಯೆಡ್‌ ಪಾಲ್ ಪಡೆದ್ ದೇವೆರ್ನ ಗಂಧ ಪ್ರಸಾದನ್‌ ಸ್ವೀಕಾರ ಮಲ್ತ್‌, ಶ್ರೀ ದೇವಿನ ಅನುಗ್ರಹಗ್‌ ಪಾತ್ರರಾವೊಡು ಪಂದ್ ಆಡಳಿತ ಮಂಡಳಿದಕುಲ್‌ ಲೆಪ್ಪೋಲೆಡ್ ತೆರಿಪಾದೆರ್.
ಮಣಿಪಾಲ: ಪರ್ಕಳ ರಾಷ್ಟ್ರೀಯ ಹೆದ್ದಾರಿದ ಡಿವೈಡರ್‌ದ ಕೈತಲ್ ನಡತ್ತ್‌ನ ಆಕ್ಸಿಡೆಂಟ್‌ಡ್ ಬೈಕ್ ಸವಾರೆ ಒರಿ ಜಾಗಡೆ ತೀರ್‌ಪೋಯಿನ ಘಟನೆ ವರದಿ ಆತ್‌ಂಡ್. ಹಿರಿಯಡ್ಕದ ನಿವಾಸಿ ಅಕ್ಷಯ ಭಟ್ (26) ತೀರ್‌ಪೋಯಿನ ಜವನೆ. ಇಂದ್ರಾಳಿದ ದೇವಸ್ಥಾನಡ್ ನವರಾತ್ರಿದ ಸಾರ್ವಜನಿಕ ಅನ್ನಸಂತರ್ಪಣೆ ಅಡಿಗೆ ಕೆಲಸ ಮಲ್ಪೆರೆ ಇಲ್ಲರ್ದ್‌ ಬನ್ನಗ ಈ ಘಟನೆ ನಡತ್ಂಡ್. ಮಣಿಪಾಲ ಪೊಲೀಸ್ ಠಾಣೆದ ಪೊಲೀಸೆರ್‌ ಜಾಗೆಗ್‌ ಬತ್ತ್‌ದ್‌ ಪರಿಶೀಲನೆ ಮಲ್ತ್‌ದೆರ್.
ಬೋಲ್ತೆರ್: ಮುಗ್ಗ ಗುತ್ತು ಕುಟುಂಬಸ್ಥರ ಟ್ರಸ್ಟ್ ಬೋಲ್ತೆರ್ ನೆತ್ತ ಮಹಾಸಭೆ ಇಂಚಿಪಗ್ ಮುಗ್ಗ ಗುತ್ತು ಇಲ್ಲಲ್ ನಡತ್ಂಡ್.
ಆಡಳಿತ ಮೊಕ್ತೇಸರೆರಾದ್ ಮಾಜಿ ಶಾಸಕೆರ್ ಕೆ.ವಸಂತ ಬಂಗೇರ, ಅಧ್ಯಕ್ಷೆರಾದ್ ವಿಧಾನ ಪರಿಷತ್ ಶಾಸಕೆರ್ ಕೆ.ಹರೀಶ್ ಕುಮಾರ್, ಕಾರ್ಯದರ್ಶಿಯಾದ್ ನೋಟರಿ ವಕೀಲ ಭಗೀರಥ ಜಿ., ಉಪಾಧ್ಯಕ್ಷೆರಾದ್ ಜಗನ್ನಾಥ ಬಂಗೇರ ನಿರ್ಮಾಲು, ಜೊತೆ ಕಾರ್ಯದರ್ಶಿ ಸೋಮನಾಥ ಬಂಗೇರ ವರ್ಪಾಳೆ, ಕೋಶಾಧಿಕಾರಿ ಶೇಖರ ಬಂಗೇರ ಹೇರಾಜೆ ಆಯ್ಕೆ ಆಯೆರ್. ಟ್ರಸ್ಟ್ ಸದಸ್ಯೆರಾದ್ ಪದ್ಮನಾಭ ಪಾದೆ, ನವೀನ್ ಚಂದ್ರ ಕುವೆತ್ಯಾರು, ಚಂದ್ರಶೇಖರ್ ವಕೀಲೆರ್, ದಿನೇಶ್ ಪೆದಮಲೆ, ತುಕಾರಾಮ ಬಂಗೇರ ಎಂ., ಗಿರಿಜಾ ಕೊಂಗುಜೆ, ಲಲಿತ ಕುರ್ತೋಡಿ, ಜಾನಕಿ, ಹೇಮಾ ದಾಮೋದರ ಮೊಕ್ಲೆನ್‌ ನೇಮಕ ಮಲ್ತೆರ್.
ಬೋಲ್ತೆರ್: ಭಾರತೀಯ ಜನತಾ ಪಕ್ಷ ಬೋಲ್ತೆರ್ ಮಂಡಲದ ವತಿರ್ದ್ ಕರ್ನಾಟಕ ಸರಕಾರದ ಜನ ವಿರೋಧಿ ಆಡಳಿತದ ವಿರುದ್ಧ ಅ.18 ದಾನಿ ಮಿನಿ ವಿಧಾನ ಸೌಧದ ಎದುರು ಬೃಹತ್ ಪ್ರತಿಭಟನೆ ನಡಪಾದ್ ರಾಜ್ಯದ ಕಾಂಗ್ರೆಸ್ ನೇತೃತ್ವದ ಸರಕಾರ ಭಾರಿ ಭ್ರಷ್ಟಚಾರ ಮಲ್ತೊಂದು ಉಂಡು, ಸಚಿವೆರ್ನ ಆಪ್ತ ಗುತ್ತಿಗೆದಾರೆರ್ನ ಇಲ್ಲಲ್ 42 ಕೋಟಿ ಒವ್ವೇ ದಾಖಲೆ ಇಜ್ಜಂದೆ ಪತ್ತೆ ಆತ್‌ಂಡ್. ಉಂದು ಸರಕಾರ ಕಮಿಷನ್ ರೂಪಡ್ ದೆತೊಂದು ಇಪ್ಪುನ ಪನವು, ಈ ಬಗ್ಗೆ ಸೂಕ್ತ ತನಿಖೆ ಮಲ್ತ್‌ದ್ ಸರಕಾರದ ವಿರುದ್ದ ಕ್ರಮ ದೆತೊನೊಡು ಪಂದ್ ಬೋಲ್ತೆರ್ ತಹಶೀಲ್ದಾರ್ ಮೂಲಕ ರಾಜ್ಯಪಾಲೆರೆಗ್ ಮನವಿ ಕೊರಿಯೆರ್.
ಈ ಪೊರ್ತುಡು ವಿಧಾನ ಪರಿಷತ್ ಶಾಸಕೆರ್ ಪ್ರತಾಪಸಿಂಹ ನಾಯಕ್ ಬೊಕ್ಕ ಬಿಜೆಪಿ ಜಿಲ್ಲಾ ಮುಖಂಡೆರ್ ಹರಿಕೃಷ್ಣ ಬಂಟ್ವಾಳ, ಮಂಡಲ ಅಧ್ಯಕ್ಷೆರ್ ಜಯಂತ ಕೋಟ್ಯಾನ್, ಮಂಡಲದ ಪ್ರಧಾನ ಕಾರ್ಯದರ್ಶಿ ಶ್ರೀನಿವಾಸ ರಾವ್ ಧರ್ಮಸ್ಥಳ, ಗಣೇಶ್ ಗೌಡ ನಾವೂರು, ಪಕ್ಷದ ಪ್ರಮುಖೆರ್ ಗ್ರಾ.ಪಂ ಅಧ್ಯಕ್ಷೆರ್, ಸದಸ್ಯೆರ್, ಕಾರ್ಯಕರ್ತೆರ್‌ ಇತ್ತೆರ್.
ಬಾನಂಗಡಿ: ಕಲ್ಲಮುಂಡ್ಕೂರು ಸಾರ್ವಜನಿಕ ಶ್ರೀ ಶಾರದೋತ್ಸವ ಸೇವಾ ಸಮಿತಿದ ಸುರುತ್ತ ವರ್ಷೊದ ಮಾರ್ನೆಮಿ ಉಚ್ಚಯ ಅ.16-18 ಮುಟ್ಟ ನಡಪುಂಡು.
ಈ ಉಚ್ಚಯ ಮಾಲ್ದಬೆಟ್ಟು ಜಯಪ್ರಕಾಶ್ ಪಡಿವಾಳ್ ಮೆರೆನ ಮುತಾಲಿಕೆಡ್, ದೈಲಬೆಟ್ಟು ಶ್ರೀಧರ ಭಟ್ ಮೆರೆನ ಪೌರೋಹಿತ್ಯಡ್ ಗೌಜಿಡ್ ನಡತೊಂದು ಉಂಡು.
ಅ.16 ಸೋಮಾರ ಶ್ರೀ ಶಾರದ ದೇವಿನ ಮೂರ್ತಿನ್ ಕುದ್ರಿಪದವುರ್ದ್ ಮೆರವಣಿಗೆಡ್ ಕನತ್ ದ್ ಬೊಲ್ಪುಗು ಗಣಹೋಮ, ಶ್ರೀ ಶಾರದ ದೇವಿನ ಪ್ರತಿಷ್ಠಾಪನೆ, ಭಜನೆ, ಮಧ್ಯಾಹ್ನ ಮಹಾಪೂಜೆ, ಬಯ್ಯಗ್ ಡ್ಯಾನ್ಸಿಂಗ್ ಸ್ಟಾರ್ಸ್ ಕಲ್ಲಮುಂಡ್ಕೂರು ಮೊಕ್ಲೆರ್ದ್ ಸಾಂಸ್ಕೃತಿಕ ಲೇಸ್ ನಡತ್ಂಡ್.
ಅ.17 ಅಂಗಾರೆ ಬೊಲ್ಪುಗು ಭಜನೆ, ಮಧ್ಯಾಹ್ನ ಮಹಾಪೂಜೆ, ಬಯ್ಯಗ್ ಸಾಂಸ್ಕೃತಿಕ ಲೇಸ್, ರಾತ್ರೆ ನುಪ್ಪು ಪ್ರಸಾದ ಸೇವೆ ಆದ್, ದಿನಕರ ಭಂಡಾರಿ ಕಣಂಜಾರ್ ರಚನೆ ಮಲ್ತಿನ ಉಂದು ಎಂಚಿನ? ತುಳು ನಾಟಕ ನಡತ್ಂಡ್.
ಅಂಚೆನೆ ಇನಿ (ಅ.18) ಬಯ್ಯಗ್ ನಡಪುನ ಶ್ರೀ ಶಾರದಾ ದೇವಿನ ಶೋಭಾಯಾತ್ರೆಡ್ ಭಕ್ತಾದಿಲು ಪಾಲ್ ಪಡೆದ್, ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಕಲ್ಲಮುಂಡ್ಕೂರು ಸಾರ್ವಜನಿಕ ಶ್ರೀ ಶಾರದೋತ್ಸವ ಸಮಿತಿದ ಗುರ್ಕಾರೆ, ಸದಸ್ಯೆರ್ ಬೊಕ್ಕ ಊರುದ ಪತ್ತ್ ಸಮಸ್ತೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ: ರಾಜ್ಯಡ್ ಪಡಿತರ ಚೀಟಿ ತಿದ್ದುಪಡಿಗ್ ಕೊರ್ನ ಗಡುವ್‌ನ್ ವಿಸ್ತರಣೆ ಮಲ್ತ್‌ದೆರ್. ದ.ಕ. ಜಿಲ್ಲೆಡ್ ಈ ಅವಧಿ ಅ.19ರ್ದ್ ಅ.21 ಮುಟ್ಟ ಉಂಡು ಪಂದ್ ಜಿಲ್ಲಾ ಆಹಾರ ಬೊಕ್ಕ ನಾಗರಿಕ ಸರಬರಾಜು ಇಲಾಖೆದ ಅಧಿಕಾರಿಲು ಮಾಹಿತಿ ಕೊರ್ತೆರ್. ಸರ್ವರ್ ಸಮಸ್ಯೆ ಇತ್ತಿನ ಕೆಲವು ಜಿಲ್ಲೆಡ್ ಈ ತಿದ್ದುಪಡಿ ವಿಸ್ತರಣೆಗ್ ಅವಕಾಶ ಕೊರ್ತೆರ್. ತಿದ್ದುಪಡಿ ಪೊರ್ತುಡು ತೀರ್‌ಪೋಯಿನಕ್ಲೆನ ಪುದರ್‌ ದೆಪ್ಪೆರೆ ಬೊಕ್ಕ ಮದಿಮೆ ಆದ್ ಬತ್ತಿನಕ್ಲೆನ ಪುದರ್‌ ಸೇರ್ಪಾವೆರೆ ಅವಕಾಶ ಉಂಡು. ಸೂಕ್ತ ದಾಖಲೆದೊಟ್ಟಿಗೆ ವಿಳಾಸ ಸೇರಿನಂಚ ಈ ತಿದ್ದುಪಡಿನ್‌ ಮಲ್ಪೊಲಿ. ಆಂಡ ಪೊಸ ಪಡಿತರ ಚೀಟಿಗ್ ಸದ್ಯ ರಾಜ್ಯರ್ದ್ ಅವಕಾಶ ತಿಕ್ಕಿಜಿ ಪಂದ್ ಅಧಿಕಾರಿಲು ತೆರಿಪಾದೆರ್.
