ಸಶಸ್ತ್ರ ಸೀಮಾ ಬಲದ SSB ಕ್ರೀಡಾ ಕೂಟಡ್ ಖಾಲಿ ಇಪ್ಪುನ 272 ಕಾನ್ ಸ್ಟೆಬಲ್ ಬೇಲೆಗ್ ಅರ್ಜಿ ಸಂದಾವೊಲಿ.
10ನೇ ಕ್ಲಾಸ್ ದ ವಿದ್ಯಾರ್ಹತೆದೊಟ್ಟಿಗೆ 18-23 ವರ್ಷದೊಲಯಿದ ಅಭ್ಯರ್ಥಿಲು ಅರ್ಜಿ ಸಂದಾವೊಲಿ. ಅರ್ಜಿ ಪಕ್ರಿಯೆ ಅ.21 ಕ್ಕ್ ಸುರು ಆತ್ಂಡ್. ನ.20 ಕ್ಕ್ ಅರ್ಜಿ ಸಂದಾಯೆರೆ ಅಕೇರಿದ ದಿನ ಆತ್ಂಡ್. ಅರ್ಹ ಅಭ್ಯರ್ಥಿಲು ಅಧಿಕೃತ ವೆಬ್‌ಸೈಟ್‌ ssbrectt.gov.in ಗ್ ಭೇಟಿ ಕೊರ್ದು ಆನ್ ಲೈನ್ ಡ್ ಅರ್ಜಿ ಸಂದಾವೊಲಿ.
ಕಾರ್ಲ: ನಮ ಪಾತೆರುನ ತುಳು ಭಾಷೆ ಬೇತೆ ಬೇತೆ ಆಂಡಲ ತುಳು ಭಾಷೆದ ಲಿಪಿ ಒಂಜೆ ಅವೆತ ಬರವಣಿಗೆ ಒಂಜೆ, ಜೈ ತುಳುನಾಡ್ ಸಂಘಟನೆದ ಉಚಿತ ಕಲಿಕೆದ ಉದ್ದೇಶ ತುಳು ಭಾಷೆದ ಒಟ್ಟಿಗೆ ತುಳು ಲಿಪಿನ್ ಬುಲೆಪಾವುನ. ಈ ಅವಕಾಶನ್ ಮಾತೆರ್ಲ ಗಲಸೊಂದು, ತುಳು ಅಭ್ಯಾಸ ಎಡ್ಡೆ ಕಾರ್ಯ ಪಂದ್ ಸಿನಿಮಾ ನಟ, ರಂಗಭೂಮಿ ಕಲಾವಿದೆರ್ ಪ್ರಸನ್ನ ಶೆಟ್ಟಿ ಬೈಲೂರು ಪಂಡೆರ್.
ಮಂಜುನಾಥ ಪೈ ಸ್ಮಾರಕ ಸರಕಾರಿ ಪ್ರಥಮ ದರ್ಜೆ ಕಾಲೇಜು ಕಾರ್ಲ ಐ.ಕ್ಯೂ.ಎ. ಸಿ, ಲಲಿತಕಲಾ ಸಂಘ ಬೊಕ್ಕ ಸಾಹಿತ್ಯ ಸಂಘ ಮೊಕ್ಲೆನ ಒಟ್ಟು ಸೇರಿಗೆಡ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಆಶ್ರಯಡ್ ಜೈ ತುಲುನಾಡ್ ( ರಿ.) ಸಹಯೋಗಡ್ “ಬಲೇ ತುಲು ಲಿಪಿ ಕಲ್ಪುಗ” ಕಾರ್ಯಾಗಾರ ಉದಿಪನ ಮಲ್ತ್ ಪಾತೆರಿಯೆರ್. “ಬಲೆ ತುಳು ಲಿಪಿ ಕಲ್ಪುಗ ” ಪನ್ಪುನ ಶಿಕ್ಷಣ ಕ್ರಾಂತಿ, ತುಳು ಭಾಷೆಡ್ ಬದ್ಕ್ ಕಟ್ಟುನ ಕೆಲಸ ಆವೊಡು, ರಾಜ್ಯದ 2ನೇ ಆಡಳಿತ ಭಾಷೆ ಆವೋಡು, ನಮ ಮಾತ ಭಾಷೆನ್ ಗೌರವ ಮಲ್ಪುವ, ತುಳುನಾಡ್‌ದ ಸಂದಿ, ಪಾರ್ದನದ ಮಹತ್ವವನ್‌ ನಮ ತುಳುನಾಡ್‌ದಕುಲ್ ತೆರಿಯೊನೊಡು ಪಂದ್ ಜೈ ತುಳುನಾಡ್ ಸಂಘಟನೆದ ಗುರ್ಕಾರ್ಲು ವಿಶು. ಶ್ರೀಕೇರ ಪಂಡೆರ್.
ಯುನೆಸ್ಕೋ 2010 ಟ್ 2050ದ ಸಮಯಗ್ ನಾಶ ಆಪುನ ಮಾತ ಭಾಷೆದ ಪಟ್ಟಿನ್ ಬಿಡುಗಡೆ ಮಲ್ತ್‌ಂಡ್, ಆ ಪಟ್ಟಿಡ್ ತುಳುಭಾಷೆ ಕೂಡ ಉಂಡು ಪನ್ಪುನ ನಮಕ್ಕ್ ಬೇಜಾರದ ವಿಷಯ, ತುಳುಭಾಷೆನ್ ಬುಲೆಪಾವುನ ನಿಟ್ಟ್‌ಡ್ ಜೈ ತುಳುನಾಡ್ ಸಂಘಟನೆ ಪುಟ್ಟುದುಂಡ್, ಜೈ ತುಳುನಾಡ್ (ರಿ) ಬುಲೆದ್‌ ಬತ್ತಿನ ರೀತಿ ಜೈ ತುಳುನಾಡ್ ಸಂಘಟನೆದ ಕಾರ್ಯವೈಖರಿದ ಬಗೆಕ್ ಜೈ ತುಳುನಾಡ್ ಸಂಘಟನೆದ ಸಂಘಟನಾ ಕಾರ್ಯದರ್ಶಿ ಸುಮಂತ್ ಹೆಬ್ರಿ ಮಾಹಿತಿ ಕೊರಿಯೆರ್. ಮಂಜುನಾಥ ಪೈ ಸ್ಮಾರಕ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜು ಕಾರ್ಲದ ಪ್ರಾಂಶುಪಾಲೆರ್ ಡಾ. ಕಿರಣ್ ಎಂ ಗುರ್ಕಾರ್ಮೆನ್‌ ವಹಿಸ್‌ದ್‌ ಇತ್ತೆರ್.ಮಂಜುನಾಥ ಪೈ ಸ್ಮಾರಕ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜು ಕಾರ್ಲ ಸ್ನಾತಕೋತ್ತರ ಪದವಿ ವಿಭಾಗದ ಸಂಚಾಲಕೆರ್ ಡಾ. ವಿದ್ಯಾಧರ್ ಹೆಗ್ಡೆ ತುಳು ಲಿಪಿ ಕಲಿಕೆನ್ ಮಾತ ಕಲ್ಪಾರ್ಥಿಲು ಉಪಯೋಗ ಮಲ್ತೊನೊಡು. ತುಳು ಭಾಷೆಗ್‌ ನಮ ಗೌರವ ಕೊರೊಡ್‌ ಪಂದ್ ಪಂಡೆರ್.
ಮಂಜುನಾಥ ಪೈ ಸ್ಮಾರಕ ಸರಕಾರಿ ಪ್ರಥಮ ದರ್ಜೆ ಕಾಲೇಜು ಕಾರ್ಲ ಲಲಿತಕಲಾ ಸಂಘದ ಸಂಚಾಲಕೆರ್ ಪ್ರೊ. ಮೈತ್ರಿ ಬಿ ಎದ್ಕೊಂದ್, ಜೈ ತುಲುನಾಡ್(ರಿ.)ನ ಕು. ಅಕ್ಷತಾ ಪ್ರಸ್ತವನೆ ಮಲ್ತೆರ್, ಸಾಹಿತ್ಯ ಸಂಘದ ಸಂಚಾಲಕೆರ್ ಡಾ. ಸುದರ್ಶನ್ ಸೊಲ್ಮೆ ಸಂದಾಯ ಮಲ್ತ್ ಅಜಿತ್ ಸಾಲ್ಯಾನ್ ಲೇಸ್‌ದ ಸುಧಾರಿಕೆ ಮಲ್ತೆರ್.
ಈ ಲೇಸ್‌ಡ್ ಕಾಲೇಜ್‌ದ ಐ.ಕ್ಯೂ.ಎ.ಸಿ ಸಂಚಾಲಕಿ ಪ್ರೊ. ಸುಷ್ಮಾ ರಾವ್ ಕೆ., ಪ್ರಾಧ್ಯಾಪಕೆರ್ ಡಾ. ಗಣೇಶ್ ಎಸ್., ಡಾ. ಜಯಭಾರತಿ, ಡಾ.ಅವಿನಾಶ್, ಪ್ರೊ. ಪ್ರಸನ್ನ ಕುಮಾರ್ ಬೊಕ್ಕ ಶ್ರೀ ರಾಮ ಮೂರ್ತಿ, ತುಳುನಾಡ್ ಸಂಘಟನೆದ ಸಹ ಸಂಘಟನಾ ಕಾರ್ಯದರ್ಶಿ ಶೇಖರ್ ಶ್ರೀಗಂಗೆ, ತುಳು ಲಿಪಿ ಶಿಕ್ಷಕೆರ್ ಪ್ರಶಾಂತ್ ಪೂಜಾರಿ ನಂದಳಿಕೆ ಬೊಕ್ಕ ದೀಕ್ಷಾ, ಪವಿತ್ರ ಕೋಟ್ಯಾನ್, ಜೈ ತುಳುನಾಡ್ ಸಂಘಟನೆದ ಪದಾಧಿಕಾರಿಲು, ಕಾಲೇಜ್‌ದ ಪರ ಕಲ್ಪಾರ್ಥಿ ಕಿರಣ್ ತುಳುವೆ ಇತ್ತೆರ್.
ಬೆಂಗ್ಲೂರು: ಪಿಲಿ ಉಗುರು ಪಾಡಿನ ಆರೋಪದ ಮಿತ್ತ್ ಬಿಗ್ ಬಾಸ್ ಇಲ್ಲಲ್ ಇತ್ತಿನ ವರ್ತೂರು ಸಂತೋಷ್ ಮೆರೆನ್ ಅರಣ್ಯಾಧಿಕಾರಿಲು ಅರೆಸ್ಟ್ ಮಲ್ತಿನ ಬೊಕ್ಕ ನಟೆ ದರ್ಶನ್, ವಿನಯ್ ಗುರೂಜಿದ ಮಿತ್ತ್ ಸರ್ವ ಸಂಘಟನೆ ಒಕ್ಕೂಟದ ಗುರ್ಕಾರೆ ಶಿವಕುಮಾರ್ ಅರಣ್ಯಾಧಿಕಾರಿಲೆಗ್ ದೂರು ಕೊರ್ತೆರ್.
ದರ್ಶನ್ ಬಂಗಾರದ ಚೈನ್ ಪಾಡ್ದೆರ್. ಅಯಿಟ್ಟ್ ಪಿಲಿತ್ತ ಉಗುರು ಉಂಡು. ಉಂದು ಕಾನೂನು ಉಲ್ಲಂಘನೆ ಆತ್ಂಡ್. ಅಂಚೆನೆ ವಿನಯ್ ಗುರೂಜಿ ಪಿಲಿತ್ತ ಚರ್ಮದ ಮಿತ್ತ್ ಕುಲ್ಲುದೆರ್. ಪಿಲಿತ್ತ ಉಗುರು ಇತ್ತಿನ ಕಾರಣಗ್ ವರ್ತೂರು ಸಂತೋಷ ಮೆರೆನ್ ಅರೆಸ್ಟ್ ಮಲ್ದರ್. ಅವ್ವೇ ರೀತಿ ನಟೆ ದರ್ಶನ್, ವಿನಯ್ ಗುರೂಜಿನ್ ಲೆತ್ತ್ ದ್ ವಿಚಾರಣೆ ಮಲ್ಪಿ ಪಂದ್ ದೂರು ಕೊರ್ತೆರ್.
ಕುಡ್ಲ: 10 ದಿನ ನಡತಿನ ಕುಡ್ಲ ದಸರಾ ಅ.24 ಅಂಗಾರೆದಾನಿ ಕುದ್ರೋಳಿ ದೇವಲ್ಯರ್ದ್ ಮೆರವಣಿಗೆ ಮುಖೇನ ಪಿದಾಡ್ ದ್ ಇನಿ ಕಾಂಡೆ ಮುಗಿತಲ ಆಂಡ್.
ನವದುರ್ಗೆಯೆರೆನ ಮೆರವಣಿಗೆದ ಬೊಕ್ಕ ಗಣಪತಿ ಬೊಕ್ಕ ಶಾರದೆಗ್ ಪೂಜೆ ಸಂದಾಯೆರ್.
ನವದುರ್ಗೆಯೆರ್, ಗಣಪತಿ, ಆದಿಶಕ್ತಿ, ಶಾರದಾದೇವಿ, ಬ್ರಹ್ಮಶ್ರೀ ನಾರಾಯಣ ಗುರುಲೆನ ಮೂರ್ತಿ, ಮಣ್ಣಗುಡ್ಡೆ, ನಾರಾಯಣಗುರು ವೃತ್ತ, ಲಾಲ್‌ಬಾಗ್‌, ಬಲ್ಲಾಳ್‌ಬಾಗ್‌, ಪಿವಿಎಸ್‌ ವೃತ್ತ, ಕೆಎಸ್‌ ರಾವ್ ರಸ್ತೆ, ಹಂಪನಕಟ್ಟೆ, ಗಣಪತಿ ಹೈಸ್ಕೂಲ್‌ ರಸ್ತೆ, ಕಾರ್‌ ಸ್ಟ್ರೀಟ್‌ ಮುಖೇನ ಮೆರವಣಿಗೆ ಪೊಂಡ್.
ದಸರಾ ಉಚ್ಚಯದ ಶೋಭಾಯಾತ್ರೆಡ್ 70 ರ್ದ್ ಎಚ್ಚ ಟ್ಯಾಬ್ಲೊ, ಏಸಭೂಷಣಲು ಇತ್ತ್ಂಡ್.
ಚುಕ್ಕು(ಸಪೋಟಾ)ಮಾತೆರೆಗ್ಲ ಇಷ್ಟದ ಪರ್ಂದ್. ಚುಕ್ಕು ತಿನ್ಪುನೆರ್ದ್ ಆರೋಗ್ಯಗ್ ಸುಮಾರ್ ಪ್ರಯೋಜನ ಉಂಡು.
ಚುಕ್ಕುಡ್ ಕೆಲವು ಖನಿಜಾಂಶ, ಕ್ಯಾಲ್ಸಿಯಂ, ತಾಮ್ರ ಬೊಕ್ಕ ಕಬ್ಬಿಣಾಂಶ ಇಪ್ಪುರ್ನೆದಾವೆರ ಎಲು ಗಟ್ಟಿ ಆಪುಂಡು.
ಉಂದು ಉರಿ ಪಡಿಕೆನ್ ಕಮ್ಮಿ ಮಲ್ಪುಂಡು. ಗ್ಯಾಸ್ಟ್ರಿಕ್ ಬೊಕ್ಕ ಬಂಜಿಬೇನೆ ಸಮಸ್ಯೆ ಕಮ್ಮಿ ಮಲ್ಪುಂಡು ಅತ್ತಂದೆ ದೇಹದ ಶಕ್ತಿನ್ ಜಾಸ್ತಿ ಮಲ್ಪುಂಡು. ಚರ್ಮದ ಆರೋಗ್ಯ ಎಚ್ಚಾಪುಂಡು ಬೊಕ್ಕ ಎಚ್ಚ ಕಾಲ ಸೀಕ್ ಬರಂದಿಲೆಕ್ಕ ಮಲ್ಪುಂಡು. ಉಂದು ವೈರಸ್, ಬ್ಯಾಕ್ಟೀರಿಯಾರ್ದ್ ರಕ್ಷಣೆ ಕೊರ್ಪುಂಡು.
ಬೊಂಬೈ: ಬೊಂಬೈ ಕನ್ನಡ ಕಲಾ ಕೇಂದ್ರದ ಮುತಾಲಿಕೆಡ್, ಮೈಸೂರು ಅಸೋಸಿಯೇಷನ್ ಬೊಕ್ಕ ಕರ್ಣಾಟಕ ಬ್ಯಾಂಕ್ ದ ಒಟ್ಟುಸೇರಿಗೆಡ್ ನಾಟಕೋತ್ಸವ ಅ.28 ಸನಿಯಾರ ಮಾಟುಂಗಾ ಮೈಸೂರು ಅಸೋಸಿಯೇಶನ್ ಡ್ ನಡಪರೆ ಉಂಡು.
ಬೊಲ್ಪುಗು ಬೊಂಬೈ ಕಲಾಸ್ಪಂದನ ಮೊಕ್ಲೆರ್ದ್ ಸೋತು ಗೆದ್ದವಳು ಕನ್ನಡ ನಾಟಕ ಬೊಕ್ಕ ವಾಸುದೇವ ಮಾರ್ನಾಡು ಬೊಕ್ಕ ಕೂಟದಕ್ಲೆರ್ದ್ ಭೀಷ್ಮ ವಿಜಯ ತಾಳಮದ್ದಳೆ, ಮಧ್ಯಾಹ್ನ ಬೊಂಬೈ ಕನ್ನಡಿಗ ಕಲಾವಿದೆರೆನ ಪರಿಷತ್ ಮೊಕ್ಲೆರ್ದ್ ಬಸುರಾದಳಲ್ಲೋ ನನ್ನ ಹುಡುಗಿ ನಾಟಕ, ಬಯ್ಯಗ್ ಬೊಂಬೈ ಕನ್ನಡ ಕಲಾಕೇಂದ್ರ ಮೊಕ್ಲೆರ್ದ್ ಬಿಸಿಲು ಬೆಳದಿಂಗಳು ನಾಟಕ, ಜ್ಯೋತಿ ಅನಂತ್ ಭಟ್ ಬೊಕ್ಕ ಕೂಟದಕ್ಲೆರ್ದ್ ಭಕ್ತಿ ಬೊಕ್ಕ ಭಾವಗೀತೆಲು, ಸಹನಾ ಸ್ಕೂಲ್ ಆಫ್ ಪರ್ಫಾರ್ಮಿಂಗ್ ಆರ್ಟ್ಸ್ ಮೊಕ್ಲೆರ್ದ್ ನೃತ್ಯ ವೈವಿಧ್ಯ ನಡಪರೆ ಉಂಡು.
ಮುಲ್ಕಿ: ಬೊಂಬೈ ಬೊಕ್ಕ ಶಿಮಂತೂರು ಪರಿಸರದ ಸುಮಾರ್ ತುಳು ಬಾಂಧವೆರೆಗೆ ತುಳು ಲಿಪಿ ಕಲ್ಪಾವುನ ಮುಖೇನ ಶಿಮಂತೂರು ಮಜಲಗುತ್ತು (ತಕ್ಕಣಪಾದೆ) ಸುರೇಖಾ ನವೀನ್ ಶೆಟ್ಟಿ ತುಳು ಲಿಪಿತ್ತ ಅಪರೂಪದ ಸಾಧಕಿ ಆತೆರ್.
ಬೊಂಬೈಡ್ ವಿರಾರ್ ನಾಲಸೋಪಾರ್ ತುಳು ಫೌಂಡೇಶನ್ ದ ಗುರ್ಕಾರೆ ಶಶಿಧರ್ ಕೆ ಶೆಟ್ಟಿ ಇನ್ನಂಜೆ ಮುತಾಲಿಕೆದ ಸಂಘದ ತುಳುವೆರೆಗ್ ಆನ್ ಲೈನ್ ಮುಖೇನ ತುಳು ಲಿಪಿನ್ ಧರ್ಮೊಗು ಕಲ್ಪಾದ್ ತುಳುನಾಡ್ ದ ಸಂಸ್ಕೃತಿ ಒರಿಪಾವುನ ಬೇಲೆ ಮಲ್ದೆರ್.
ಬೊಂಬೈದ ವಿರಾರ್ ಡ್ ಪುತ್ತಿಗೆ ಮಠಾಧೀಶೆರ್ ಶ್ರೀ ಸುಗುಣೇಂದ್ರ ತೀರ್ಥ ಸ್ವಾಮೀಜಿಲೆನ ಆಶೀರ್ವಚನದೊಟ್ಟಿಗೆ ನಡತಿನ “ಕೋಟಿ ಗೀತಾ ಲೇಖನ ಯಜ್ಞ ದೀಕ್ಷೆ” ಲೇಸ್ ಡ್ ಶ್ರೀಮದ್ಭಗವದ್ಗೀತೆದ ಶ್ಲೋಕನ್ ತುಳು ಲಿಪಿಟ್ಟ್ ಬರೆದ್ ಸ್ವಾಮೀಜಿಗ್ ಕೊರಿಯೆರ್.
ಲೇಸ್ ಡ್ ಸಾಧಕೆರೆನ ನೆಲೆಟ್ಟ್ ಸುರೇಖಾ ನವೀನ್ ಶೆಟ್ಟಿ ಮೆರೆಗ್ ಸ್ವಾಮೀಜಿ ಮಾನಾದಿಗೆ ಮಲ್ತೆರ್. ಬೊಕ್ಕ ಜೈ ತುಳುನಾಡು ಸಂಘಟನೆದ ಸಹಕಾರರ್ದ್ 108 ಯಜ್ಞಾರ್ಥಿಲೆಗ್ ತುಳು ಲಿಪಿಟ್ಟ್ ಬರೆಯೆರೆ ಪ್ರೇರೇಪಣೆ ಕೊರಿಯೆರ್.
ಈ ಪೊರ್ತುಡು ಉದ್ಯಮಿ ವಿರಾರ್ ಶಂಕರ್ ಶೆಟ್ಟಿ, ಹರೀಶ್ ಶೆಟ್ಟಿ ಗುರ್ಮೆ, ದಿನೇಶ್ ಶೆಟ್ಟಿ, ಪ್ರದೀಪ್ ಶೆಟ್ಟಿ ವಿರಾರ್, ನವೀನ್ ಶೆಟ್ಟಿ ಪಳ್ಳಿ ವಿರಾರ್, ಶಶಿಕಲಾ ಮೆಂಡನ್, ರವಿಶೆಟ್ಟಿ ಕಿಲ್ಪಾಡಿ ಪಾಲ್ ಪಡೆದಿತ್ತೆರ್.
ಮುಲ್ಕಿದ ಶಿಮಂತೂರು ಆದಿ ಜನಾರ್ಧನ ದೇವಲ್ಯದ ಆಡಳಿತ ಮೊಕ್ತೇಸರೆರ್ ಚಂದ್ರಹಾಸ ಶೆಟ್ಟಿ ಮಾಧ್ಯಮದೊಟ್ಟಿಗೆ ಪಾತೆರ್ದ್, ಸುರೇಖಾ ನವೀನ್ ಶೆಟ್ಟಿ ಅಪ್ರತಿಮ ತುಳು ಲಿಪಿತ್ತ ಸಾಧಕಿ ಆತೆರ್. ನನದ ದಿನಟ್ಟ್ ಮೆರೆನ ಸಾಧನೆ ಏಪಲ ದುಂಬರಿಯಡ್ ಪಂದ್ ಪಂಡೆರ್.
ಎಸ್ ಬಿಐಡ್ ಖಾಲಿ ಇಪ್ಪುನ 2 ಸಾರ ಪ್ರೊಬೇಷನರಿ ಆಫೀಸರ್ (ಪಿಒ) ಬೇಲೆದ ಪರೀಕ್ಷೆಗ್ ಹಾಲ್ ಟಿಕೆಟ್ ಬುಡುಗಡೆ ಆತ್ಂಡ್.
ಈ ಹಾಲ್ ಟಿಕೆಟ್ ನ್ https://ibpsonline.ibps.in/ ವೆಬ್ ಸೈಟ್ ಡ್ ನೊಂದಣಿ ಸಂಖ್ಯೆ ಬೊಕ್ಕ ಪಾಸ್ ವರ್ಡ್ ನ್ ಪಾಡ್ದ್ ಡೌನ್‌ಲೋಡ್ ಮಲ್ಪೊಲಿ. ನೆತ್ತ ಪೂರ್ವಭಾವಿ ಲಿಖಿತ ಪರೀಕ್ಷೆಲು ನ.1-6 ಮುಟ್ಟ ನಡಪರೆ ಉಂಡು. ಡಿಸೆಂಬರ್ ಅತ್ತಂಡ ಜನವರಿಡ್ ಮುಖ್ಯ ಪರೀಕ್ಷೆ ಬೊಕ್ಕ ಫೆಬ್ರವರಿಡ್ ಸಂದರ್ಶನ ನಡಪರೆ ಉಂಡು.
ಒಡಿಪುಡು ಅ.28 ,29 ದಾನಿ ನಡಪುನ “ವಿಶ್ವ ಬಂಟರ ಸಮ್ಮೇಳನ”ದ ಲೆಪ್ಪೋಲೆ ಬುಡುಗಡೆ ಲೇಸ್ ಬೆಳ್ತಂಗಡಿ ಬಂಟರ ಯಾನೆ ನಾಡವರ ಸಂಘಡ್ ನಡತ್‌ಂಡ್. ಜಾಗತಿಕ ಬಂಟರ ಸಂಘಗಳ ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ಟಿ ಮೆರೆನ ಮುತಾಲಿಕೆಡ್ ವಿಶ್ವ ಬಂಟರ ಸಮ್ಮೇಳನದ ಪ್ರಯುಕ್ತ ಅ.28 ದಾನಿ ಒಡಿಪುದ ಅಜ್ಜರಕಾಡು ಮೈದಾನಡ್ ನಳಿನ ಭೋಜ ಶೆಟ್ಟಿ ಚಾವಡಿಡ್ “ವಿಶ್ವ ಬಂಟರ ಕ್ರೀಡಾಕೂಟ” ನಡಪೆರೆ ಉಂಡು.
ಅ.29 ದಾನಿ ಒಡಿಪುದ ಶ್ರೀಮತಿ ಅಮ್ಮಣ್ಣಿ ರಾಮಣ್ಣ ಶೆಟ್ಟಿ ಸಭಾಭವನದ ವಠಾರಡ್ ಶ್ರೀ ಕನ್ಯಾನ ಸದಾಶಿವ ಶೆಟ್ಟಿ ವೇದಿಕೆಡ್ “ವಿಶ್ವ ಬಂಟರ ಸಾಂಸ್ಕೃತಿಕ ವೈಭವ” ನಡಪೆರೆ ಉಂಡು. ಈ ಕಾರ್ಯಕ್ರಮಡ್‌ ಬೋಲ್ತೆರ್‌ ತಾಲೂಕುದ ಬೇತೆ ಬೇತೆ ವಲಯ ಸಂಘದ ಅಧ್ಯಕ್ಷೆರ್, ಮಹಿಳಾ ವಿಭಾಗ ಯುವ ವಿಭಾಗ ಪದಾಧಿಕಾರಿಲು ಬೊಕ್ಕ ಕಾರ್ಯಕಾರಿ ಸಮಿತಿ ಸದಸ್ಯೆರ್‌ ಪಾಲ್ ಪಡೆದಿತ್ತೆರ್.
ಶಿರ್ಲಾಲು: ಶಿರ್ಲಾಲು-ನಲ್ಲಾರು-ಕರಂಬಾರು ಗ್ರಾಮದ ಬೆರ್ಮೆರ್ ಬೈದೆರ್ಲೆ ಗರಡಿದ 2023-24ನೇ ಸಾಲ್‌ದ ಬ್ರಹ್ಮ ಬೈದೆರ್ಕಳ ಜಾತ್ರಾ ಮಹೋತ್ಸವದ ಪೊಸ ಸಮಿತಿನ್ ಗರಡಿ ವಠಾರಡ್ ನಡತ್ತಿನ ಪೂರ್ವಭಾವಿ ಸಭೆಟ್ ಆಯ್ಕೆ ಮಲ್ತೆರ್. ಸಮಿತಿದ ಪೊಸ ಗುರ್ಕಾರೆ ಆದ್ ಶಿವಾನಂದ ಮಜಲಪಲ್ಕೆ, ಕಾರ್ಯದರ್ಶಿಯಾದ್ ಜ್ಞಾನೇಶ್ ಕಟ್ಟ, ಕೋಶಾಧಿಕಾರಿಯಾದ್ ಯತೀಶ್ ಕರಂಬಾರು ಆಯ್ಕೆಯಾಯೆರ್.
