ಇಂಟಲಿಜೆನ್ಸ್ ಬ್ಯೂರೋಡ್ ಖಾಲಿ ಇಪ್ಪುನ 677 ಬೇಲೆಗ್ ಅರ್ಜಿ ಸಂದಾವುನ ಪ್ರಕ್ರಿಯೆ ಸುರು ಆತ್ಂಡ್.
ಅಪ್ಲಿಕೇಶನ್ ಗಡು NOV 13 ಆತ್ಂಡ್. 315 MTS ಪೋಸ್ಟ್ ಗ್ SSLC ಪಾಸಾದಿಪ್ಪೊಡು, 362 ಭದ್ರತಾ ಸಹಾಯಕ/ ಮೋಟಾರು ಟ್ರಾನ್ಸ್ ಪೋರ್ಟ್ ಪೋಸ್ಟ್ ಗ್ ಹೆಚ್ಚುವರಿಯಾದ್ ಡ್ರೈವಿಂಗ್ ಪರವಾನಗಿ ಅಗತ್ಯ ಉಂಡು. 2 ಹಂತದ ಲಿಖಿತ ಪರೀಕ್ಷೆದ ಆಧಾರದ ಮಿತ್ತ್ ಆಯ್ಕೆ ನಡಪರೆ ಉಂಡು. ಎಚ್ವದ ಪೊಲಬುಗಾದ್ https:www.mha.gov.in/en ಗ್ ಸಂಪರ್ಕ ಮಲ್ಪೊಲಿ.
ಧರ್ಮಸ್ಥಳ :ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆದ ವತಿರ್ದ್ ಹಾಸನ, ಮಂಡ್ಯ, ಮೈಸೂರು, ರಾಮನಗರ ಬೊಕ್ಕ ಚಾಮರಾಜನಗರ ಜಿಲ್ಲೆದ 404 ಶಾಲೆಗ್ ಒಟ್ಟು ರೂ. 2.50 ಕೋಟಿ ಬಿಲೆತ್ತ 3472 ಜೊತೆ ಡೆಸ್ಕ್-ಬೆಂಚಿಲೆನ್ ಪಟ್ಟುನ ಲೇಸ್ ಬೊಕ್ಕ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ವಿಜೇತೆರೆಗ್ ಅಭಿನಂದನೆ ಮಲ್ಪುನ ಕಾರ್ಯಕ್ರಮ ನ.4 ದಾನಿ ಶ್ರೀ ಕ್ಷೇತ್ರ ಧರ್ಮಸ್ಥಳ ಪ್ರವಚನ ಮಂಟಪಡ್‌ ನಡತ್‌ಂಡ್.
ಡೆಸ್ಕ್ ಬೆಂಚಿ ಪಟ್ಟುನ ಕಾರ್ಯಕ್ರಮಕ್ಕ್ ಡಾ| ಡಿ. ವೀರೇಂದ್ರ ಹೆಗ್ಗಡೆ ಬೊಕ್ಕ ಡಾ| ಹೇಮಾವತಿ ವೀ. ಹೆಗ್ಗಡೆರ್ ಚಾಲನೆ ಕೊರಿಯೆರ್. ಈ ಪೊರ್ತುಡು ಕಾರ್ಯನಿರ್ವಾಹಕ ನಿರ್ದೇಶಕೆರ್ ಡಾ| ಎಲ್.ಹೆಚ್. ಮಂಜುನಾಥ್, ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಅನಿಲ್ ಕುಮಾರ್ ಎಸ್.ಎಸ್., ಪ್ರಾದೇಶಿಕ ಹಣಕಾಸು ನಿರ್ದೇಶಕೆರ್ ಶಾಂತರಾಮ್ ಆರ್.ಪೈ., ಸಮುದಾಯ ಅಭಿವೃದ್ಧಿ ವಿಭಾಗದ ಪ್ರಾದೇಶಿಕ ನಿರ್ದೇಶಕೆರ್ ಆನಂದ ಸುವರ್ಣ, ಉಜಿರೆ ಲಕ್ಷ್ಮೀ ಇಂಡಸ್ಟ್ರೀಸ್ ಧಣಿ ಮೋಹನ್ ಕುಮಾರ್, ಚಿನ್ಮಯಿ ಇಂಡಸ್ಟ್ರೀಸ್ ಧನಿ ಸುಂದರ ಗೌಡ ಇಚ್ಚಿಲ, ಸಮುದಾಯ ಅಭಿವೃದ್ಧಿ ವಿಭಾಗದ ತಾಂತ್ರಿಕ ಯೋಜನಾಧಿಕಾರಿ ಪುಷ್ಪರಾಜ್, ಸಮುದಾಯ ಅಭಿವೃದ್ಧಿ ವಿಭಾಗದ ಯೋಜನಾಧಿಕಾರಿ ಬೊಕ್ಕ ಸಮುದಾಯ ಅಭಿವೃದ್ಧಿ ವಿಭಾಗದ ಪ್ರಬಂಧಕೆರ್ ಬೊಕ್ಕ ಮೇಲ್ವಿಚಾರಕೆರ್ ಶೇಖರ್ ವೈ, ಎಸ್‌ಡಿಎಂ ನ್ಯಾಚುರೋಪತಿ ಕಾಲೇಜ್‌ದ ಪ್ರಾಂಶುಪಾಲೆರ್ ಡಾ. ಪ್ರಶಾಂತ್ ಶೆಟ್ಟಿ ಇತ್ತೆರ್. ಯೋಜನಾಧಿಕಾರಿ ಜಯಾನಂದ ಬತ್ತಿ ಬಿನ್ನೆರೆನ್ ಎದ್ಕೊಂದು, ಲೇಸ್‌ದ ಸುದಾರಿಕೆ ಮಲ್ತೆರ್.
ರಾಷ್ಟ್ರ ರಾಜಧಾನಿ ಪೊಸದೆಲ್ಲಿಡ್ ಪುಗೆ ದಿಂಜಿದ್ ಗಾಳಿದ ಗುಣಮಟ್ಟ ಮಸ್ತ್ ಹಾಳ್ ಆತಿನೆರ್ದಾವರ ದೆಲ್ಲಿದ ಮಾತಾ ಪ್ರಾಥಮಿಕ ಶಾಲೆಡ್ ನವೆಂಬರ್ 10 ಮುಟ್ಟ ರಜೆ ಕೊರ್ದು ದೆಲ್ಲಿ ಸರಕಾರ ಆದೇಶ ಕೊರ್ತುಂಡು.
6 ರ್ದ್ 12ನೇ ಕ್ಲಾಸ್ ಮುಟ್ಟ ಆನ್ ಲೈನ್ ಕ್ಲಾಸ್ ಮಲ್ಪುನ ಆಯ್ಕೆನ್ಲಾ ಕೊರ್ಪ ಪನ್ದ್ ಆಪ್ ಸರಕಾರದ ಸಚಿವೆರ್ ಆತಿಶಿ ಸಾಮಾಜಿಕ ಜಾಲತಾಣೊಡು ಪಟ್ಟೊಂಡೆರ್. ಶುಕ್ರವಾರೊರ್ದು ದೆಲ್ಲಿದ ಗಾಳಿದ ಗುಣಮಟ್ಟ ಮಸ್ತ್ ಕನಿಷ್ಟ ಮಟ್ಟೊಗು ಜತ್ತ್ ದ್ಂಡ್.
ನಿಟ್ಟೆ ಪರಿಗಣಿತ ವಿಶ್ವವಿದ್ಯಾಲಯದ ಅಂಗಸಂಸ್ಥೆ ನಿಟ್ಟೆ ಮಹಾಲಿಂಗ ಅಡ್ಯಂತಾಯ ಸ್ಮಾರಕ ತಾಂತ್ರಿಕ ಶಿಕ್ಷಣ ಸಂಸ್ಥೆದ ಗ್ರಂಥಪಾಲಕೆರ್ ಪ್ರೀತಮ್ ಶೆಟ್ಟಿ ಕೆ.ವಿ ಮೆರೆನ ಕರ್ನಾಟಕದ ತಾಂತ್ರಿಕ ಕಾಲೇಜ್ ದ ಶೈಕ್ಷಣಿಕ ಸಮುದಾಯಡ್ ವಿಟಿಯು ಒಕ್ಕೂಟದ ಉಪಯುಕ್ತತೆ ಬೊಕ್ಕ ಪರಿಣಾಮ ಪನ್ಪುನ ಇಸಯದ ಬಗೆಟ್ಟ್ ಮಂಡಿಸಾಯಿನ ಸಂಶೋಧನಾ ಮಹಾಪ್ರಬಂಧಗ್ ಬೆಳಗಾವಿದ ವಿಶ್ವೇಶ್ವರಯ್ಯ ತಾಂತ್ರಿಕ ವಿಶ್ವವಿದ್ಯಾಲಯ ಪಿಎಚ್.ಡಿ ಕೊರ್ತುಂಡು.
ಈ ಸಂಸ್ಥೆದ ಸ್ಥಾಪಕ ಗ್ರಂಥ ಪಾಲಕೆರಾದಿತ್ತಿನ ಯಾಜಿ ಡಾ.ಹೆಚ್ ದಿವಾಕರ ಭಟ್ ಮೆರೆನ ಮಾರ್ಗದರ್ಶನಡ್ ಈ ಪ್ರಬಂಧನ್ ಮಂಡಿಸಾಯಿನ ಮೇರ್ ಬೆದ್ರ ಆಳ್ವಾಸ್ ಶಿಕ್ಷಣ ಸಂಸ್ಥೆಡ್16 ವರ್ಷ ಗ್ರಂಥಪಾಲಕೆರಾದ್ ಸೇವೆ ಸಂದಾದೆರ್. ಮೇರ್ ಒಡಿಪು ದೆಂದೂರ್ ಕಟ್ಟೆ ಕೌಸ್ತುಭ ನಿಲಯದ ಟಿ. ವಿಠಲ್ ಶೆಟ್ಟಿ ಬೊಕ್ಕ ಸುಮಾ ವಿ ಶೆಟ್ಟಿ ದಂಪತಿಲೆನ ಮಗೆ.
ಭಾರತದ ಪೆರ್ಮೆದ ಬಾಹ್ಯಾಕಾಶ ವಿಜ್ಞಾನ ಸಂಸ್ಥೆ ಇಸ್ರೋದ ಸಾಧನೆದ ಪೊಲಬು ಕೊರ್ಪಿನ “ಸ್ಪೇಸ್ ಆನ್ ವೀಲ್” ಮೊಬೈಲ್ ಬಸ್ ನ.7 ರ್ದ್ 9 ಮುಟ್ಟ ದ.ಕ ಜಿಲ್ಲೆಡ್ ಸಂಚಾರ ಮಲ್ಪುಂಡು. ನ. 9 ಗು ಸುಳ್ಯಗ್ ಬತ್ತ್‌ದ್ ಸುಳ್ಯದ ಜೂನಿಯರ್ ಕಾಲೇಜಿದ (ಸರಕಾರಿ ಪದವಿ ಪೂರ್ವ ಕಾಲೇಜು) ಮೈದಾನೊಡು ಕಾಂಡೆ 9.30 ರ್ದ್ ಬಯ್ಯಡ್ 4 ಗಂಟೆ ಮುಟ್ಟ ಜೋಕುಲೆಗ್ ಅಂಚೆನೇ ಸಾರ್ವಜನಿಕೆರೆಗ್ ವೀಕ್ಷಣೆಗ್ ತಿಕ್ಕುಂಡು.
ಜಿಲ್ಲೆದ ವಿಜ್ಞಾನ ಪ್ರತಿಷ್ಠಾನ ಬೊಕ್ಕ ಕರ್ನಾಟಕ ರಾಜ್ಯ ವೈಜ್ಞಾನಿಕ ಸಂಶೋಧನಾ ಪರಿಷತ್ತ್‌ದ ಜಿಲ್ಲಾ ಘಟಕೊದ ಕಡೆರ್ದ್ ಹೂಸ್ಕೂಲ್ ದ ಜೋಕುಲೆಡ ವೈಜ್ಞಾನಿಕ ಬೊಕ್ಕ ಬಾಹ್ಯಾಕಾಶ ವಿಷಯೊಲೆಡ್ ಆಸಕ್ತಿ ಪುಟ್ಟಾಯೆರ ಈ ಕಾರ್ಯಕ್ರಮೊದ ಅಟ್ಟನೆ ಮಲ್ತಿತ್ತ್‌ದ್, ಉಂದೆಟ್ ಚಂದ್ರಯಾನ-1, ಮಂಗಳಯಾನ, ರಾಕೆಟ್ ಉಡ್ಡಯನ ಕೇಂದ್ರ, ಸಂವಹನ ಉಪಗ್ರಹ, ಆರ್ಯಭಟ, ಭಾಸ್ಕರ ಇಂಚಿನ ದುಂಬುದ ಉಪಗ್ರಹೊಲೆನ ಮಾಡೆಲ್‌, ಅಂಚೆನೇ ನನ ದುಂಬದ ಬಾಹ್ಯಾಕಾಶ ಯೋಜನೆ ಗಗನ್ ಯಾನ್ 2024 ಸೇರ್ದ್ ನನಲಾತ್ ಬಾಹ್ಯಾಕಾಶ ಯೋಜನೆಲೆನ ಮಾಡೆಲ್‌ಲು ತೂಯೆರ ತಿಕ್ಕುವ.
ತಾಲೂಕ್‌ದ ಮಾತಾ ಪ್ರೌಢಶಾಲೆದ ಜೋಕುಲು ಅಂಚೆನೆ ಸಾರ್ವಜನಿಕೆರ್ ಉಂದೆತ್ತ ಪ್ರಯೋಜನ ಪಡೆಯೊಡು ಪಂದ್ ಕರ್ನಾಟಕ ರಾಜ್ಯ ವೈಜ್ಞಾನಿಕ ಸಂಶೋಧನಾ ಪರಿಷತ್ತ್‌ದ ಜಿಲ್ಲಾ ಘಟಕೊದ ಉಪಾಧ್ಯಕ್ಷೆರ್ ಡಾ. ಅನುರಾಧಾ ಕುರುಂಜಿ ಮೇರ್ ತೆರಿಪಾದೆರ್.
ಶತಾಯುಷಿ ವಿದ್ವಾನ್ ಅಂಗಡಿ ಮಾರು ಕೃಷ್ಣ ಭಟ್ರ್ ನನ ನೆಂಪು ಮಾತ್ರ
ಕಿನ್ನಿಗೋಳಿ : ಪೇಜಾವರ ಮಠ ಶ್ರೀ ವಿಶ್ವಪ್ರಸನ್ನತೀರ್ಥ ಸ್ವಾಮೀಜಿನ ತೀರ್ಥರೂಪೆರ್, ಹಿರಿಯ ಸಂಸ್ಕೃತ ಬೊಕ್ಕ ತುಳು ಭಾಷಾ ವಿದ್ವಾಂಸೆರ್, ಶತಾಯುಷಿ ಅಂಗಡಿಮಾರು ಕೃಷ್ಣ ಭಟ್ಟೆರ್ (105)ಐತಾರ ರಾತ್ರೆ ದೇವೆರೆ ಪಾದೊ ಸೇರಿಯೆರ್.
ತುಳು ಭಾಷೆದ ಸೌರ ಪಂಚಾಂಗನ್ ಮಸ್ತ್ ಶದ್ಧೆರ್ದ್ ಸುಮಾರ್ ವರ್ಷೊದಿಂಚ ರಚನೆ ಮಲ್ತ್ ದ್ ಪ್ರಕಟ ಮಲ್ತೊಂದು ಇತ್ತೆರ್. ಸಂಪ್ರದಾಯ ಸದಾಚಾರ ನಿಷ್ಠೆರ್ ಅಪಾರ ದೈವಭಕ್ತೆರ್ ಆಯಿನ ಮೆರೆಗ್ ಕುಡ್ಲ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿದೊಟ್ಟಿಗೆ ಸುಮಾರ್ ಮಠಾಧೀಶೆರೆನ ಸಂಘ ಸಂಸ್ಥೆರ್ದ್ ಗೌರವ ಪುರಸ್ಕಾರಲು ತಿಕ್ ದ್ಂಡ್. ಮೆರೆಗ್ 7 ಜನ ಪೊಣ್ಣು ಜೋಕುಲು ಬೊಕ್ಕ 5 ಜನ ಆಣ್ ಜೋಕುಲು ಉಲ್ಲೆರ್.
ಸುಬ್ರಹ್ಮಣ್ಯ: ಜೀವನಡ್ ಸ್ಪಷ್ಟವಾಯಿನ ಗುರಿ ದೀಯೊಂದು ಅವೆನ್ ಸಾಧನೆ ಮಲ್ಪೆರೆ ಸತತ ಪ್ರಯತ್ನ ಮಲ್ಪೊಡು. ಅಪಗ ನಮ್ಮ ಗುರಿನ್ ಮುಟ್ಟೆರೆ ಸಾಧ್ಯ ಆಪುಂಡು ಪಂದ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿ ಮಾಜಿ ಅಧ್ಯಕ್ಷೆರ್ ನಿತ್ಯಾನಂದ ಮುಂಡೋಡಿ ಪಂಡೆರ್.
ಕೆಎಸ್ಎಸ್ ಕಾಲೇಜು ಸಭಾಂಗಣಡ್ ನಡತ್ತಿನ ಕುಕ್ಕೆ ಶ್ರೀ ಸುಬ್ರಹ್ಮಣ್ಯೇಶ್ವರ ಮಹಾವಿದ್ಯಾಲಯ ಸುಬ್ರಹ್ಮಣ್ಯ ಬೊಕ್ಕ ಮಂಗಳೂರು ವಿಶ್ವವಿದ್ಯಾನಿಲಯದ ದೈಹಿಕ ಶಿಕ್ಷಣ ವಿಭಾಗ ಸಹಯೋಗದೊಟ್ಟಿಗೆ ವಿಶ್ವವಿದ್ಯಾನಿಲಯದ ಅಂತರ್ ಕಾಲೇಜ್ ದ ಆಂಜೋಕ್ಲೆನ ಬೊಕ್ಕ ಪೊಂಜೋಕ್ಲೆನ ಕ್ರಾಸ್ ಕಂಟ್ರಿ (ಗುಡ್ಡಗಾಡು ಓಟ) ಚಾಂಪಿಯನ್ ಶಿಪ್‌ ದ ಮುಗಿತಲದ ಲೇಸ್ ಡ್ ಪಾತೆರಿಯೆರ್. ಕೆಎಸ್ಎಸ್ ಕಾಲೇಜ್ ದ ಪ್ರಾಂಶುಪಾಲೆರ್ ಡಾ.ದಿನೇಶ್ ಪಿ.ಟಿ. ಗುರ್ಕಾರ್ಮೆನ್ ವಹಿಸ್ ದ್ ಇತ್ತೆರ್.
ಸುಬ್ರಹ್ಮಣ್ಯ ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿ ಸದಸ್ಯೆರಾಯಿನ ಶ್ರೀವತ್ಸಾ, ಶೋಭಾ ಗಿರಿಧರ್ ರಾಷ್ಟ್ರೀಯ ಕ್ರೀಡಾಪಟು ರೋಹಿತ್ ಎಂ., ಕುಡ್ಲ ವಿಶ್ವವಿದ್ಯಾನಿಲಯದ ದೈಹಿಕ ಶಿಕ್ಷಣ ವಿಭಾಗದ ಸಹನಿರ್ದೇಶಕೆರ್ ಹರಿಪ್ರಸಾದ್, ಕಾಲೇಜ್ ದ ದೈಹಿಕ ಶಿಕ್ಷಣ ನಿರ್ದೇಶಕೆರ್ ಡಾ.ದಿನೇಶ್ ಕೆ., ಶಿಕ್ಷಕ ರಕ್ಷಕ ಸಂಘದ ಸದಸ್ಯರಾಯಿನ ಸಾಯಿ ಗೀತಾ, ಸತೀಶ್ ಕೂಜುಗೋಡು, ಪೂರ್ವಪ್ರಾಂಶುಪಾಲೆರ್ ಕೆ.ಆರ್.ಶೆಟ್ಟಿಗಾರ್, ಉದಯಕುಮಾರ್ ಈ ಪೊರ್ತುಡು ಇತ್ತೆರ್. ಉಪನ್ಯಾಸಕಿ ಲತಾ ಬಿ.ಟಿ. ಬಿತ್ತಿ ಬಿನ್ನೆರೆನ್ ಎದ್ಕೊಂದು, ಕಾಲೇಜ್ ದ ದೈಹಿಕ ಶಿಕ್ಷಣ ನಿರ್ದೇಶಕೆರ್ ದಿನೇಶ್ ಪ್ರಸ್ತಾವಿಕವಾದ್ ಪಾತೆರಿಯೆರ್. ರಾಜ್ಯಶಾಸ್ತ್ರ ವಿಭಾಗದ ಉಪನ್ಯಾಸಕೆರ್ ಮಂಜೇಶ್ ಬಿ.ಜಿ. ಸೊಲ್ಮೆ ಸಂದಾಯ ಮಲ್ತೆರ್.
ಕ್ರಾಸ್ ಕಂಟ್ರಿ ರೇಸ್ ಗ್ ಚಾಲನೆ: ಕಾಂಡೆ ಸುಬ್ರಹ್ಮಣ್ಯ-ಮಂಜೇಶ್ವರ ರಾಜ್ಯ ಹೆದ್ದಾರಿದ ಏನೆಕಲ್ಲು ಕೈತಲ್ ಬಾಲಾಡಿ ಪನ್ಪುನಲ್ಪ ರೇಸ್ ಗ್ ಚಾಲನೆ ಕೊರಿಯೆರ್. ಪೊಂಜೊಕ್ಲೆನ ವಿಭಾಗದ ಸ್ಪರ್ಧೆಗ್ ಸುಬ್ರಹ್ಮಣ್ಯ ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿ ಸದಸ್ಯೆರ್ ಶ್ರೀವತ್ಸಾ ಬೊಕ್ಕ ಆಂಜೊಕ್ಲೆನ ವಿಭಾಗದ ಸ್ಪರ್ಧೆಗ್ ರಾಷ್ಟ್ರೀಯ ಅಥ್ಲೀಟ್ ರೋಹಿತ್ ಎಂ. ಚಾಲನೆ ಕೊರಿಯೆರ್.
ಗೆಂದಿನಕ್ಲೆನ ಪಟ್ಟಿ; ಆಂಜೊಕ್ಲೆನ ವಿಭಾಗ ಬೆದ್ರ ಆಳ್ವಾಸ್ ಕಾಲೇಜು ಸುರುತ ಇನಾಮು, ವಾಮದಪದವು ಸರಕಾರಿ ಪ್ರಥಮ ದರ್ಜೆ ಕಾಲೇಜು ರಡ್ಡನೇ ಇನಾಮು. ಪೊಂಜೊಕ್ಲೆನ ವಿಭಾಗ ಬೆದ್ರ ಆಳ್ವಾಸ್ ಕಾಲೇಜ್ ಸುರುತ ಇನಾಮು, ವಾಮದಪದವು ಸರಕಾರಿ ಪ್ರಥಮ ದರ್ಜೆ ಕಾಲೇಜ್ ರಡ್ಡನೇ ಇನಾಮು ಪಡೆಯೊಂದೆರ್.
ಸುಳ್ಯ: ಬೆಂಗಳೂರುಡು ಬೇಲೆಡ್ ಇತ್ತಿನ ಸುಳ್ಯ ತಾಲೂಕುದ ಪಂಜದ ಜವನೆ ಒರಿ ಪಾಂಡಿಚೇರಿಡ್ ಕಡಲ್ ದ ಪಾಲ್ ಆಯಿನ ಘಟನೆ ವರದಿ ಆತ್ಂಡ್.
ಪಂಜದ ಕೂತ್ಕುಂಜ ಗ್ರಾಮದ ಚಿದ್ಗಲ್ಲು ಗೋಪಾಲ್ ಮೊಕ್ಲೆನ ಮಗೆ ಬಿಪಿನ್ ನೀರ್ ಪಾಲ್ ಆಯಿನ ಜವನೆ. ಬಿಪಿನ್ ಶನಿವಾರ ದೋಸ್ತಿಲೆನ ಒಟ್ಟಿಗೆ ಪಾಂಡಿಚೇರಿಗ್ ಪೋದು ಅಲ್ಪ ಕಡಲ್ ಗ್ ಪೋನಗ ಕಡಲ್ ದ ಪಾಲ್ ಆತೆರ್. ಮೇರೆಗ್ ಪೊಪ್ಪ, ಅಮ್ಮ ಅಕ್ಕನಕುಲು ಉಲ್ಲೆರ್.
ಮಿಜಾರ್ ತುಳುನಾಡ ಪೊರ್ಲು ಚಾರಿಟೆಬಲ್ ಟ್ರಸ್ಟ್ (ರಿ.) ದ 33ನೇ ತುರ್ತು ಸೇವಾ ಯೋಜನೆನ್ ಒಂಜಿ ಸರ್ಕಾರಿ ಶಾಲೆಗ್ ಕೊರಿಯೆರ್.
ಕುಡ್ಲ ತಾಲೂಕ್ ದ ಬಡಗ ಎಡಪದವು ಸರಕಾರಿ ಕಿರಿಯ ಪ್ರಾಥಮಿಕ ಶಾಲೆ ತಿಪ್ಲಬೆಟ್ಟುದ ಕಟ್ವಾನದ ಗೋಡೆದ ಸುಣ್ಣ ಬಣ್ಣ ಪೋದಿತ್ತ್ಂಡ್. ಅಂಚಾದ್ ಗೋಡೆಗ್ ಸುಣ್ಣ ಬಣ್ಣ ಪಾಡ್ದ್ ಪೊರ್ಲು ಮಲ್ಪೊಡು ಪಂದ್ ಶಾಲೆದ ಮುಖ್ಯ ಶಿಕ್ಷಕೆರ್ ಬಿನ್ನಾಪು ಮಲ್ತ್ ದ್ ಇತ್ತೆರ್. ಮೆರೆನ ಬಿನ್ನಾಪುನು ಮಾನ್ಯ ಮಲ್ತಿನ ಅಕುಲು ಸರ್ಕಾರಿ ಶಾಲೆನ್ ಒರಿಪಾವುನ ದಿಟ್ಟಿಡ್ ಶಾಲೆದ ಗೋಡೆದ ಸುಣ್ಣ ಬಣ್ಣ ಕೊರ್ದು ಪೊರ್ಲು ಮಲ್ತ್ ಕೊರಿಯೆರ್.
ಈ ಪೊರ್ತುಡು ಊರುದ ಮುಖ್ಯಸ್ಥೆರ್ ಸುದರ್ಶನ್ ಪೂಂಜ, ಬಡಗ ಎಡಪದವು ಪಂಚಾಯತ್ ದ ಮಾಜಿ ಗುರ್ಕಾರೆ ಹರೀಶ್ ಕೆವಿ, ಒತ್ತು ಗುರ್ಕಾರೆ ಚಂದ್ರಹಾಸ್ ಉರ್ಕಿ, ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ದ ಸಲಹೆಗಾರೆ ತಾರನಾಥ ಸಪಲಿಗ ಮಿಜಾರ್ ಬೊಕ್ಕ ಕಾರ್ಯದರ್ಶಿ ದಯಾನಂದ ಮಿಜಾರ್, ಕೇಶವ ಮೇಸ್ತ್ರಿ, ಆದಿ ದ್ರಾವಿಡ ಸಂಘ ಮಿಜಾರ್ ದ ಗುರ್ಕಾರೆ ರಾಜೇಶ್ ಲತ್ರಟ ಬೊಕ್ಕ ಸದಸ್ಯೆರ್, ಶಾಲೆದ ಮುಖ್ಯ ಅಧ್ಯಾಪಕೆರ್ ವೀಣಾ ರೇಗೋ, ಶಾಲಾ ಶಿಕ್ಷಕಿ ಚಂದ್ರಿಕಾ, ಶಾಲೆದ ಜೋಕುಲು, ಜೋಕುಲೆನ ಪೋಷಕೆರ್, ಟ್ರಸ್ಟ್ ದ ಪದುಕೆರ್ ಪಾಲ್ ಪಡೆದಿತ್ತೆರ್.
ಬೆಳ್ತಂಗಡಿ: ಸಹಕಾರ ಕ್ಷೇತ್ರಡ್ ಸಾಧನೆ ಬೊಕ್ಕ ಸಮಾಜಮುಖಿ ಚಟುವಟಿಕೆನ್ ಗುರುತಿಸಾದ್ ಶ್ರೀ ಗುರುದೇವ ವಿವಿಧೋದೇಶ ಸಹಕಾರ ಸಂಘಗ್ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿನ್ ದ.ಕ ಜಿಲ್ಲಾ ಕನ್ನಡ ರಾಜ್ಯೋತ್ಸವ ಕಾರ್ಯಕ್ರಮಡ್‌ ಸಂಘದ ಅಧ್ಯಕ್ಷೆರ್ನ ಪರವಾದ್ ಉಪಾಧ್ಯಕ್ಷೆರ್ ಭಗೀರಥ ಜಿ ಮೇರೆಗ್ ಜಿಲ್ಲಾ ಉಸ್ತುವಾರಿ ಸಚಿವೆರ್, ಆರೋಗ್ಯ ಸಚಿವೆರ್ ಆಯಿನ ದಿನೇಶ್ ಗುಂಡೂರಾವ್ ಪ್ರದಾನ ಮಲ್ತೆರ್.
ಈ ಪೊರ್ತುಡು ವಿಧಾನಪರಿಷತ್ ಸದಸ್ಯೆರ್ ಕೆ. ಹರೀಶ್ ಕುಮಾರ್, ಶಾಸಕೆರ್ ವೇದವ್ಯಾಸ್ ಕಾಮತ್, ಮೇಯರ್ ಸುಧೀರ್ ಶೆಟ್ಟಿ, ಜಿಲ್ಲಾಧಿಕಾರಿ ಮುಲೈ ಮುಹಿಲನ್, ಸಂಘದ ನಿರ್ದೇಶಕೆರ್ ಸಂಜೀವ ಪೂಜಾರಿ, ಜಗದೀಶ್ಚಂದ್ರ ಡಿ.ಕೆ, ಧರಣೇಂದ್ರ ಕುಮಾರ್, ವಿಶೇಷಾಧಿಕಾರಿ ಮೋನಪ್ಪ ಪೂಜಾರಿ, ಮುಖ್ಯಕಾರ್ಯನಿರ್ವಹಣಾಧಿಕಾರಿ ಅಶ್ವತ್ಥ್ ಕುಮಾರ್, ಶಾಖಾ ವ್ಯವಸ್ಥಾಪಕೆರ್‌ ಬೊಕ್ಕ ಸಿಬ್ಬಂದಿ ವರ್ಗದಕುಲು ಇತ್ತೆರ್.
