ಮಣಿಪಾಲ: ರೇಡಿಯೊ ಮಣಿಪಾಲಡ್ ಬನ್ನಂಜೆ ಬತ್ತೆರ್ ರೇಡಿಯೊ ಮಣಿಪಾಲ್ 90.4 Mhz ಡ್ ಬನ್ನಂಜೆ ಬತ್ತೆರ್ ತುಳು ಸರಣಿ ಲೇಸ್ ದ ಸಂಚಿಕೆ ನ.16 ಕ್ಕ್ ಗುರುವಾರ ಬಯ್ಯಗ್ 5 ಗಂಟೆಗ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಜಾನಪದ ವಿದ್ವಾಂಸೆರ್ ಬನ್ನಂಜೆ ಬಾಬು ಅಮೀನ್ ಪಾಲ್ ಪಡೆಯೆರೆ ಉಲ್ಲೆರ್. ನ.17 ಕ್ಕ್ ಮಧ್ಯಾಹ್ನ 1 ಗಂಟೆಗ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದೆರ್.
ಅಂಬಲಪಾಡಿ ಮಹಾಕಾಳಿ ಮಾರ್ಗ, ಶ್ರೀ ವಿಠೋಬ ಭಜನಾ ಮಂದಿರ ಪರಿಸರದ ನಿವಾಸಿ, ಅಂಬಲಪಾಡಿ ಶ್ರೀ ಮಹಾಕಾಳಿ ಜನರಲ್ ಸ್ಟೋರ್ ದ ಸಂಸ್ಥಾಪಕೆರ್ ಜಗನ್ನಾಥ ಪೂಜಾರಿ (78 ವರ್ಷ) ಮೇರ್ ಹುಷಾರ್ ದಾಂತೆ ಒಡಿಪುದ ಖಾಸಗಿ ಆಸ್ಪತ್ರೆಡ್ (ನ.15) ತೀರ್ ಪೋಯೆರ್.
ಮೇರ್ ಅಂಬಲಪಾಡಿ ಬಿಲ್ಲವ ಸೇವಾ ಸಂಘದ ಹಿರಿಯ ಸದಸ್ಯೆರಾತೆರ್. ಮೆರೆಗ್ ಬೊಡೆದಿ, 2 ಆಣ್ ಜೋಕುಲು ಬೊಕ್ಕ 2 ಪೊಣ್ಣು ಜೋಕುಲು ಉಲ್ಲೆರ್.
ಎಡ್ಡೆ ಉಡಲ್ ದ ದಾನಿಲೆನ ಸಕಾಯರ್ದ್ ಯುವಶಕ್ತಿ ಸೇವಾಪಥ ಯೋಜನೆಡ್ ಒಟ್ಟು ಮಲ್ತಿನ 3,01,560 ರೂ.ನ್ ಬಡಪತ್ತ್ ದ ಕುಟುಂಬಲೆಗ್ ಪಟ್ಟುನ ಬೇಲೆ ಇಂಚೊಗು ನಡತ್ಂಡ್.
ನೆಟ್ಟ್ ಸಂಗ್ರಹ ಆಯಿನ 3,01,560 ರೂ. ಡ್ ಮಹಾಯೋಜನೆಯಾದ್ ಪೂರ್ಣಿಮಾ ಬಂಟ್ವಾಳ ಮೆರೆಗ್ 30 ಸಾರ ರೂ. ಪೂಜಾಶ್ರೀ ಕರಾಯಗ್ 45 ಸಾರ ರೂ. ರಾಜೀವ ಕಲ್ಲಡ್ಕಗ್ 30 ಸಾರ ರೂ. ಈಶ್ವರ ಕಲ್ಲಡ್ಕಗ್ 30 ಸಾರ ರೂ. ನಿರೀಕ್ಷ ಅಮ್ಮುಂಜೆಗ್ 45 ಸಾರ ರೂ. ಹರಿಪ್ರಸಾದ್ ಬಾಳೆಪುಣಿಗ್ 30 ಸಾರ ರೂ. ವಿಜಯ್ ಉಲ್ಲಾಳಬೈಲ್ ಗ್ 30 ಸಾರ ರೂ. ಬೊಕ್ಕ ತುರ್ತು ಯೋಜನೆಯಾದ್ ಗೌರವ್ ಕೆ ಪುತ್ತೂರ್ ಮೆರೆಗ್ 10 ಸಾರ ರೂ. ಸುಧಾಕರ ಧರ್ಮಸ್ಥಳಗ್ 10 ಸಾರ ರೂ. ಆಕಾಶ್ ಗೌಡಗ್ 10 ಸಾರ ರೂ. ನ್ ಬೊಕ್ಕ ಕಾರ್ಯಕರ್ತೆರ್ನ ಕ್ಷೇಮನಿಧಿ 31560 ರೂ. ಪನವುದ ಸಕಾಯನ್ ಮಲ್ತೆರ್.
ಬೊಂಬೈ: ಅಂಧೇರಿ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ವೃಶ್ಚಿಕ ಸಂಕ್ರಾಂತಿ ನ.17 ಸುಕ್ರಾರ ನಡಪರೆ ಉಂಡು.
ಈ ಲೇಸ್ ದ ಲೆಕ್ಕೊಡು ಬೊಲ್ಪುಗು ಉಷಾ ಪೂಜೆ, ಕೀರ್ತನೆ ಸೇವೆ, ಮಧ್ಯಾಹ್ನ ಉರ್ಲಿ ನೈವೇದ್ಯ ಸೇವೆ, ಶ್ರೀ ದೇವಿಗ್ ಮಹಾಮಂಗಳಾರತಿ, ಬೊಕ್ಕ ಪ್ರಸಾದ ಪಟ್ಟ್ ದ್, ನುಪ್ಪು ಪ್ರಸಾದ ಸೇವೆ ನಡಪರೆ ಉಂಡು. ಬಯ್ಯಗ್ ಕೀರ್ತನೆ ಸೇವೆ, ರಂಗಪೂಜೆ, ಮಹಾಮಂಗಳಾರತಿ ಬೊಕ್ಕ ತೀರ್ಥ ಪ್ರಸಾದ ಪಟ್ಟರೆ ಉಂಡು.
ಈ ಮಾತ ಪೂಜೆದ ಸೇವೆಡ್ ಮಾತೆರ್ಲಾ ಪಾಲ್ ಪಡೆದ್, ಗಂಧ ಪ್ರಸಾದ ದೆತೊಂದು ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ದೇವಲ್ಯದ ಟ್ರಸ್ಟಿ ಶ್ರೀಕಾಂತ್ ಎ.ಎಸ್ ಲೆಪ್ಪೋಲೆಡ್ ತೆರಿಪಾದೆರ್.
ಬೆಟ್ಟಂಪಾಡಿ: ಶ್ರೀ ಮಂಜುನಾಥೇಶ್ವರ ಭಜನಾ ಮಂದಿರಡ್ ಉಚಿತ ಯಕ್ಷಗಾನ ತರಬೇತಿ ತರಗತಿ ಸುರು ಆಂಡ್. ಯಕ್ಷಗಾನ ಗುರು ಶಶಿಕಿರಣ್ ಕಾವು ತುಡರ್‌ ಅರ್ಲಾದ್‌ ಉದಿಪನ ಮಲ್ತ್ ಶುಭ ಹಾರೈಸಾಯೆರ್.
ವೇದಿಕೆಡ್ ಶಿವಾಜಿ ಗೆಳೆಯರ ಬಳಗದ ಗುರ್ಕಾರ್ಲು ರಾಧಕೃಷ್ಣ ನಾಯಕ್, ಕಾರ್ಯದರ್ಶಿ ಭಾಸ್ಕರ್ ಎಂ.ಎಸ್, ಮಂಜುನಾಥೇಶ್ವರ ಭಜನಾ ಮಂಡಳಿ ಗೌರವಾಧ್ಯಕ್ಷೆರ್ ನಾರಾಯಣ ಬೆಟ್ಟಂಪಾಡಿ, ಭಜನಾ ಮಂಡಳಿದ ಗುರ್ಕಾರ್ಲು ಅವಿನ್ ಬೆಟ್ಟಂಪಾಡಿ, ಸನತ್ ಬರಮೇಲು ಇತ್ತೆರ್.
ಬೆಳಂದೂರು: ಅಂತರ್ ಕಾಲೇಜು ತುಳು ಐಸಿರೊ 2023 ತುಳು ವೈವಿಧ್ಯ ಪಂತೊದ ಮೋನೆಗ್ ಅರದಲ ವಿಭಾಗಡ್ ಬೆಳಂದೂರು ಸರಕಾರಿ ಪ್ರಥಮ ದರ್ಜೆ ಕಾಲೇಜ್‌ದ ದೇವಿ ಪ್ರಸಾದ್ ಬೊಕ್ಕ ಸಚಿನ್ ಪಿ. ಸುರುತ ಇನಾಮು ಪಡೆಯೊಂದೆರ್.
ಮೋನೆಗ್ ಅರದಲ ವಿಭಾಗಡ್ ಯಕ್ಷಗಾನದ ಹಾಸ್ಯ ಮುಖವರ್ಣಿಕೆ ಪನ್ಪುನ ವಿಷಯ ಕೊರ್ದು ಇತ್ತೆರ್. ದೇವಿ ಪ್ರಸಾದ್ ಬೊಕ್ಕ ಸಚಿನ್ ಪಿ. ಮೊಕ್ಲೆಗ್ ಕಾಲೇಜ್‌ದ ಸಾಂಸ್ಕೃತಿಕ ಸಂಚಾಲಕಿ ದೀಪ್ತಿ ಎ.ಸಿ. ಮಾರ್ಗದರ್ಶನ ಕೊರ್ದಿತ್ತೆರ್.
ಕುಡ್ಲದ ರಥಬೀದಿಡ್‌ ಇಪ್ಪುನ ಡಾ| ಪಿ. ದಯಾನಂದ ಪೈ – ಪಿ ಸತೀಶ ಪೈ ಸರಕಾರಿ ಪ್ರಥಮ ದರ್ಜೆ ಕಾಲೇಜ್‌ಡ್ ಸ್ಪರ್ಧೆ ನಡತ್ತ್‌ಂಡ್, ಬೆಳಂದೂರು ಸರಕಾರಿ ಕಾಲೇಜ್‌ದ ವಿದ್ಯಾರ್ಥಿಲು ಪಾಲ್ ಪಡೆದಿತ್ತೆರ್.
ಪುತ್ತೂರು: ಪುತ್ತಿಲ ಪರಿವಾರ ಧಾರ್ಮಿಕ ಸೇವಾ ಸಮಿತಿರ್ದ್ ಲೋಕ ಕಲ್ಯಾಣಾರ್ಥಕವಾದ್ ಕೆಮ್ಮಾಯಿ ಶ್ರೀ ಮಹಾವಿಷ್ಣು ದೇವೆರೆಗ್ ತುಳಸಿ ಅರ್ಚನೆ ಬೊಕ್ಕ ಸಾರ್ವಜನಿಕ ದುರ್ಗಾಪೂಜೆ ಡಿ.1ರಂದು ನಡಪೆರೆ ಉಂಡು, ಅವೆತ್ತ ಲೆಪ್ಪೋಲೆ ಬುಡುಗಡೆ ಪತ್ರನ್ ಆಮಂತ್ರಣ ದೇವಸ್ಥಾನದ ವಠಾರಡ್‌ ಬುಡುಗಡೆ ಮಲ್ತೆರ್.
ಈ ಪೊರ್ತುಡು ಅರ್ಚಕೆರ್‌, ಪುತ್ತಿಲ ಪರಿವಾರದ ಸದಸ್ಯೆರ್ ಇತ್ತೆರ್.
ಕರ್ನಾಟಕ ಸಮಾಜ, ಸೂರತ್ ನೆತ್ತ ಮುತಾಲಿಕೆಡ್ ನ.26 ದಾನಿ ಕರ್ನಾಟಕ ರಾಜ್ಯೋತ್ಸವ ಜೀವನ ಭಾರತಿ ಸಭಾಂಗಣಡ್ ನಡಪೆರೆ ಉಂಡು.
ಲೇಸ್ ದ ಉದಿಪನನ್ ಹಿರಿಯ ಉದ್ಯಮಿ ಬೊಕ್ಕ ಸಮಾಜ ಸೇವಕೆರ್ ಸೂರತ್ ದ ರಾಧಾಕೃಷ್ಣ ಶೆಟ್ಟಿ ಮಲ್ಪೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಐಐಟಿ ಸೂರತ್ ಖೋಲ್ವಾಡ್ ಕಾಮ್ರೇಜ್ ದ ನಿರ್ದೇಶಕೆರ್ ಪ್ರೊ.ಜೆ. ಎಸ್ ಭಟ್ ಪಾಲ್ ಪಡೆಯೆರೆ ಉಲ್ಲೆರ್.
ಈ ಪೊರ್ತುಡು ಸಾಂಸ್ಕೃತಿಕ ಕಾರ್ಯಕ್ರಮ ಬೊಕ್ಕ ಮುಂಬಯಿ ಘಾಟ್ಕೋಪರ್ ಶ್ರೀ ಗೀತಾಂಬಿಕ ಯಕ್ಷಗಾನ ಮಂಡಳಿ ಮೊಕ್ಲೆರ್ದ್ ಗದಾಯುದ್ದ ಯಕ್ಷಗಾನ ನಡಪರೆ ಉಂಡು.
ಈ ಲೇಸ್ ಗ್ ಎಚ್ಚಿನ ಸಂಖ್ಯೆಡ್ ಜನಕುಲು ಪಾಲ್ ಪಡೆಯೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಹಳೆಯಂಗಡಿ ಬಿಲ್ಲವ ಸಮಾಜ ಸೇವಾ ಸಂಘ (ರಿ.) ಬೊಕ್ಕ ಕಟ್ಟೋಣ ಸಮಿತಿದ ಒಟ್ಟುಸೇರಿಗೆಡ್ ಪೊಸತಾದ್ ನಿರ್ಮಾಣ ಆಯಿನ ಬಿಲ್ಲವ ಭವನದ ಉದಿಪನ ಲೇಸ್ ನ.26 ಐತಾರ ಬೊಲ್ಪುಗು ನಡಪರೆ ಉಂಡು.
ಅಂಚೆನೆ ಪೊಸ ಬಿಲ್ಲವ ಭವನದ ಉದಿಪನ ಲೇಸ್ ದ ಲೆಕ್ಕೊಡು ಸಾಂಸ್ಕೃತಿಕ ಲೇಸ್ ಅವ್ವೇ ದಿನ ಬಯ್ಯಗ್ ಪೊಸ ಚಾವಡಿಡ್ ಸಂಘದ ಬೊಕ್ಕ ಯುವವಾಹಿನಿ ಘಟಕದ ಸದಸ್ಯೆರೆರ್ದ್ ಬೇತೆ ಬೇತೆ ವಿನೋದಾವಳಿ ಬೊಕ್ಕ ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆದ ಪುಗರ್ತೆದ ಕಲಾವಿದೆರೆನ ಒಟ್ಟುಸೇರಿಗೆಡ್ ನಾಟಕ ಪ್ರದರ್ಶನ ನಡಪರೆ ಉಂಡು ಪಂದ್ ಹಳೆಯಂಗಡಿ ಬಿಲ್ಲವ ಸಮಾಜ ಸೇವಾ ಸಂಘ (ರಿ.), ಕಟ್ಟೋಣ ಸಮಿತಿ, ಬೊಂಬೈ ಸಮಿತಿ, ದುಬೈ ಬೊಕ್ಕ ಮಸ್ಕತ್ ಸಮಿತಿ, ಯುವವಾಹಿನಿ (ರಿ.) ಹಳೆಯಂಗಡಿ ಘಟಕ ಲೆಪ್ಪೋಲೆಡ್ ತೆರಿಪಾದೆರ್.
ದೇಶ ಆರ್ಥಿಕತೆ ಬೊಕ್ಕ ಅಭಿವೃದ್ಧಿ ಆಯೆರೆ ಸಹಕಾರಿ ಕೇತ್ರ ಒಂಜಿ ಶಕ್ತಿ ಆತ್ಂಡ್. ಸಹಕಾರಿ ವ್ಯವಸ್ಥೆಡ್ ಸುಮಾರ್ ಬದಲಾವಣೆನ್ ಪ್ರಧಾನಮಂತ್ರಿ ಮೋದಿ ಮೇರ್ ಕನತ್ ದ್ ಬ್ಯಾಂಕಿಂಗ್ ಕೇತ್ರದಂಚಿ ಯುವ ಜನಾಂಗ ಬರ್ಪುಲೆಕ್ಕ ಮಲ್ತ್ ದೆರ್‌. ನೆರ್ದ್ ಸಹಕಾರಿ ಕೇತ್ರ ಇತ್ತೆ ಮಲ್ ಶಕ್ತಿಯಾದ್ ಬುಲೆಯೆರೆ ಸಹಕಾರಿ ಆತ್ಂಡ್ ಪಂದ್ ಒಡಿಪು ಶಾಸಕೆರ್ ಯಶಪಾಲ್ ಸುವರ್ಣ 70 ನೇ ಅಖಿಲ ಭಾರತ ಸಹಕಾರಿ ಸಪ್ತಾಹನ್ ಉದಿಪನ ಮಲ್ತ್ ದ್ ಪಾತೆರಿಯೆರ್.
ಕರ್ನಾಟಕ ರಾಜ್ಯ ಸಹಕಾರ ಮಹಾಮಂಡಲ ನಿ. ಬೆಂಗ್ಲೂರು, ಒಡಿಪು ಜಿಲ್ಲಾ ಸಹಕಾರಿ ಯೂನಿಯನ್ ನಿ., ಒಡಿಪು ಎಲ್ ಐ ಸಿ ಎಂಪ್ಲಾಯಿಸ್ ಕೋ- ಆಪರೇಟಿವ್ ಬ್ಯಾಂಕ್ ನಿ, ಟೀಚರ್ ಕೋ-ಆಪರೇಟಿವ್ ಬ್ಯಾಂಕ್ ನಿ, ಸಹಕಾರ ಇಲಾಖೆ ಒಡಿಪು ಜಿಲ್ಲೆದ ಒಟ್ಟುಸೇರಿಗೆಡ್ ಅಖಿಲ ಭಾರತ ಸಹಕಾರಿ ಸಪ್ತಾಹ ಲೇಸ್ ನ.14-21 ಮುಟ್ಟ ನಡಪರೆ ಉಂಡು.
ನೆತ್ತ ಉದಿಪನ ಲೇಸ್ ಅಂಗಾರೆ ಒಡಿಪು ಲಿಕೋ ಬ್ಯಾಂಕ್ ಸಭಾಂಗಣಡ್ ನಡತ್ಂಡ್. ಈ ಲೇಸ್ ದ ಗುರ್ಕಾರ್ಮೆನ್ ಒಯಿಸೊನ್ನ ಒಡಿಪು ಜಿಲ್ಲಾ ಸಹಕಾರಿ ಯೂನಿಯನ್ ಗುರ್ಕಾರೆ ಜಯಕರ್ ಶೆಟ್ಟಿ ಪಾತೆರ್ದ್, ಸಹಕಾರಿ ಕ್ಷೇತ್ರಡ್ ಮಾನ್ಯ ಕೇಂದ್ರ ಸಹಕಾರಿ ಸಚಿವೆರ್ ಅಮಿತ್ ಶಾ ಸುಮಾರ್ ಬದಲಾವಣೆನ್ ಕನತ್ ದ್ ಸಹಕಾರ ಕ್ಷೇತ್ರ ಅಭಿವುದ್ಧಿ ಆಯೆರೆ ಸಕಾಯ ಆಯೆರ್. ಶೇ.42 % ಯುವ ಜನತೆ ಸಹಕಾರಿ ಬ್ಯಾಂಕಿಂಗ್ ನ್ ಇಷ್ಟ ಪಟ್ಟ್ ದ್ ಬೇತೆ ಬೇತೆ ಕ್ಷೇತ್ರಡ್ ಉಲ್ಲೆರ್. ಶಿಕ್ಷಣ ಕ್ಷೇತ್ರಡ್ ಇಪ್ಪುನ ನನ ಸಹಕಾರಿ ಬ್ಯಾಂಕಿಂಗ್ ಕ್ಷೇತ್ರಗ್ ವಿಧಾನಸಭೆಟ್ಟ್ 1 ನೇ ತಾನ ಕೊರ್ಪುಲೆಕ್ಕ ಸರಕಾರಗ್ ಬಿನ್ನಾಪು ಮಲ್ತೆರ್.
ಲೇಸ್ ಡ್ ಸಹಕಾರಿ ಬ್ಯಾಕಿಂಗ್ ಕ್ಷೇತ್ರಡ್ ಪ್ರಶಸ್ತಿ ಗೆಂದಿನ ಬ್ಯಾಂಕ್ ಗುರ್ಕಾರೆನ್ ಮುಖ್ಯ ಕಾರ್ಯನಿರ್ವಹಣಾಧಿಕಾರಿಮಾನಾದಿಗೆ ಮಲ್ತೆರ್. ಉಪನ್ಯಾಸಕೆರ್ ಸಂತೋಷ ಶೆಟ್ಟಿ ಬೆದ್ರ ದಿಕ್ಸೂಚಿ ಭಾಷಣ ಮಲ್ತೆರ್.
ಮಲ್ಲ ಬಿನ್ನೆರಾದ್ ಎಲ್ ಐ ಸಿ ಎಂಪ್ಲಾಯಿಸ್ ಕೋ- ಆಪರೇಟಿವ್ ಬ್ಯಾಂಕ್ ದ ಗುರ್ಕಾರೆ ಕೆ ಕೃಷ್ಣ, ಟೀಚರ್ ಕೋ-ಆಪರೇಟಿವ್ ಬ್ಯಾಂಕ್ ದ ಗುರ್ಕಾರೆ ಸಂತೋಷ ಕುಮಾರ್ ಶೆಟ್ಟಿ, ಸಹಕಾರ ಸಂಘದ ಸಹಾಯಕ ನಿಬಂಧಕೆರ್ ಅರುಣ್ ಕುಮಾರ್ ಕುಂದಾಪುರ, ಮುಖ್ಯ ಕಾರ್ಯ ನಿರ್ವಹಣಾಧಿಕಾರಿ ಹಾಲಪ್ಪ ಕೋಡಿಹಳ್ಳಿ, ಅಶೋಕ್ ಕುಮಾರ್ ಬಲ್ಲಾಳ, ವಿಶ್ವನಾಥ ಶೆಟ್ಟಿ, ದಯಾನಂದ, ಅಲೆವೂರು ಹರೀಶ್ ಕಿಣಿ, ಚಂದ್ರಹಾಸ್ ಶೆಟ್ಟಿ, ಶಂಕರ ಪೂಜಾರಿ, ಶಶಿಕಲಾ, ಮಂಜುನಾಥ, ಬೊಕ್ಕ ನಿರ್ದೇಶಕೆರ್ ಮಂಡಳಿ ಸದಸ್ಯೆರ್, ನೂದೆರ್ದ್ ಎಚ್ಚ ಸಹಕಾರಿಲು ಪಾಲ್ ಪಡೆದಿತ್ತೆರ್. ಒಡಿಪು ಜಿಲ್ಲಾ ಸಹಕಾರಿ ಯೂನಿಯನ್ ನಿರ್ದೇಶಕೆರ್ ಶ್ರೀಧರ್ ಎದ್ಕೊನಿಯೆರ್. ಸುಧಾಕರ್ ಶೆಟ್ಟಿ ಲೇಸ್ ದ ಸುಧಾರಿಕೆ ಮಲ್ತೆರ್. ಶಶಿಕಲಾ ಸೊಲ್ಮೆ ಸಂದಾಯೆರ್.
