ತುಳು ಸುದ್ದಿ

ಡಿ.1: ಬೈಂದೂರುಡು ಪಾವಂಜೆ ಮೇಳದ ಆಟ

ಬೈಂದೂರು: ಶ್ರೀ ಜ್ಞಾನಶಕ್ತಿ ಸುಬ್ರಹ್ಮಣ್ಯಸ್ವಾಮಿ ಕೃಪಾಪೋಷಿತ ಯಕ್ಷಗಾನ ಕೂಟದಕ್ಲೆರ್ದ್ ಶ್ರೀನಿವಾಸ ಕಲ್ಯಾಣೋತ್ಸವ ಆಟ ನೇತ್ರಾವತಿ ಬೊಕ್ಕ ದಿವಾಕರ ಶೆಟ್ಟಿ ನೆಲ್ಯಾಡಿ ಸ್ವಗೃಹದ ವಠಾರಡ್ ಡಿ.1 ಸುಕ್ರಾರ ಬಯ್ಯಗ್ 7 ಗಂಟೆಗ್ ನಡಪರೆ ಉಂಡು.

ದಿವಾಕರ ಶೆಟ್ಟಿ ನೆಲ್ಯಾಡಿ ಮೇರ್ ಪಾತೆರ್ದ್, ಯಕ್ಷಗಾನನ್ ಪ್ರೋತ್ಸಾಹ ಮಲ್ಪುನ ಉದ್ದೇಶರ್ದ್ ಪ್ರತಿ ವರ್ಷಲ ಒಂಜೊಂಜಿ ಯಕ್ಷಗಾನನ್ ಆಯೋಜನೆ ಮಲ್ತೊಂದು ಬೈದ. ಅಂಚೆನೆ ಈ ವರ್ಷಲ ಸ್ವಗೃಹಡ್ ಬಯ್ಯಗ್ ನಡಪುನ ಸತ್ಯನಾರಾಯಣ ಪೂಜೆ ರಾತ್ರೆ ನಡಪುನ ನುಪ್ಪು ಪ್ರಸಾದ ಸೇವೆ ಬೊಕ್ಕ ಯಕ್ಷಗಾನ ಬಯಲಾಟಗ್ ಮಾತೆರ್ಲಾ ಬರೊಡು ಪಂದ್ ಪಂಡೆರ್.

ಈ ಪೊರ್ತುಡು ಕುಟುಂಬಸ್ಥೆರ್, ಆಟದ ಅಭಿಮಾನಿಲು, ಊರುದ ಗ್ರಾಮಸ್ಥೆರ್ ಪಾಲ್ ಪಡೆಯೆರೆ ಉಲ್ಲೆರ್.

ರೇಡಿಯೊ ಮಣಿಪಾಲಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಜೆಸಿಐ ಕಲ್ಯಾಣಪುರದ ಒಟ್ಟುಸೇರಿಗೆಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್ ದ 35ನೇ ಸಂಚಿಕೆ ನ.28 ಕ್ಕ್ ಅಂಗಾರೆ ಬಯ್ಯಗ್ 5.30ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಶಿಕ್ಷಕೆರ್, ಬರವುಗಾರೆ ನರೇಂದ್ರ ಕುಮಾರ್ ಕೋಟ ಪಾಲ್ ಪಡೆಯೆರೆ ಉಲ್ಲೆರ್. ನ.29 ಕ್ಕ್ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಬೈಲೂರು: ಬಸ್ ಕ್ಕ್ ಬೈಕ್ ಗುದ್ದುದು ಜಾಗೆಡೇ ತೀರ್ ಪೋಯಿನ ಜನ

ಕಾರ್ಲ: ಬಸ್ ಕ್ಕ್ ಬೈಕ್ ಗುದ್ದುದು ಒರಿ ಜಾಗೆಡೇ ತೀರ್ ಪೋಯಿನ ಘಟನೆ ನ.27 ಕ್ಕ್ ಬೈಲೂರುಡು ನಡತ್ಂಡ್.

ಈ ಘಟನೆಡ್ ತೀರ್ ಪೋಯಿನಾರ್ ನಾಗರಾಜ್‌ ಪಂದ್ ತೆರಿದ್ ಬೈದ್ಂಡ್. ನೆಟ್ಟ್ ಕುಡೊರಿ ಸಹ ಸವಾರೆ ಮಂಜು ಮೆರೆಗ್ ಮಸ್ತ್ ಪೆಟ್ಟಾದ್ ಮೆರೆನ ಸ್ಥಿತಿ ಗಂಭೀರ ಆತ್ಂಡ್. ಮೆರೆನ್ ಕೈತಲ್ ದಕುಲು ಆ್ಯಂಬುಲೆನ್ಸ್ ಮುಖೇನ ಮಣಿಪಾಲ ಕೆಎಂಸಿ ಆಸ್ಪತ್ರೆಗ್ ಲೆತೊಂದು ಪೋತೆರ್. ಮೇರ್ ಪಳ್ಳಿದ ಕೋಕಾಯಿಕಲ್‌ ಮದ್ಮಲ್‌ ಪಾದೆಡ್ ವಾಸ ಇತ್ತಿನ ತಮಿಳುನಾಡ್ ಮೂಲದಾರ್ ಪಂದ್ ತೆರಿದ್ ಬೈದ್ಂಡ್. ಈ ಘಟನೆದ ಜಾಗೆಗ್ ಕಾರ್ಲ ನಗರ ಪೊಲೀಸೆರ್ ಭೇಟಿ ಕೊರ್ದು ಪರಿಶೀಲನೆ ನಡಪಾದೆರ್. ಎಚ್ಚರ ಪೊಲಬು ನನ ತೆರಿದ್ ಬರೊಡಾತೆ.

ಡಿ.1-3: ಕಟೀಲ್ ಕಾಲೇಜ್ ಡ್ “ಭ್ರಮರ-ಇಂಚರ” ನುಡಿ ಪರ್ಬ ಲೇಸ್

ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯ 6 ಶಿಕ್ಷಣ ಸಂಸ್ಥೆಲೆನ್ ನಡಪಾವೊಂದು ಉಂಡು. ನರ್ಸರಿರ್ದ್ ಸಂಸ್ಕೃತ ಸ್ನಾತಕೋತ್ತರ ಪದವಿ ಮುಟ್ಟ ರಡ್ಡರೆ ಸಾರ ಕಲ್ಪಾರ್ಥಿಲೆಗ್ ಶಿಕ್ಷಣ ಕೊರೊಂದು ಉಂಡು. ಅಂಚೆನೆ ಕರಿನ ರಡ್ಡ್ ವರ್ಷೊದಿಂಚ ಕಲ್ಪಾರ್ಥಿಲೆನ್ ದುಂಬು ದೀವೊಂದು ಭ್ರಮರ- ಇಂಚರ ಪುದರ್ ಡ್ ನುಡಿಪರ್ಬನ್ ಆಯೋಜನೆ ಮಲ್ತೊಂದು ಉಂಡು. ಈ ವರ್ಷದ ಲೇಸ್ ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯ ಸಮೂಹ ವಿದ್ಯಾ ಸಂಸ್ಥೆಲೆನ ಒಟ್ಟುಸೇರಿಗೆಡ್ ಡಿ.1-3 ಮುಟ್ಟ ಕಟೀಲ್ ಪದವಿಪೂರ್ವ ಕಾಲೇಜ್ ದ ಶ್ರೀವಿದ್ಯಾ ಸಭಾಭವನಡ್ ನಡಪರೆ ಉಂಡು.

ಈ ಲೇಸ್ ಡ್ ನಾಡ್ ದ ವಿದ್ವಾಂಸೆರ್, ಸಾಧಕೆರ್ ಪಾಲ್ ಪಡೆದ್ ಪಾತೆರಿಯೆರೆ ಉಲ್ಲೆರ್. ನಿಕುಲು ಮಾತೆರ್ಲಾ ಬತ್ತ್ ದ್, ಈ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು, ಅಂಚೆನೆ ಈ ವಿದ್ಯಾದೇಗುಲದ ಉನ್ನತಿಗ್ ಸಹಕಾರ ಮಲ್ಪೊಡು, ಬೊಕ್ಕ ಕಲ್ಪಾರ್ಥಿಲೆಗ್ ಪ್ರೋತ್ಸಾಹ ಕೊರೊಡು ಪಂದ್ ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯದ ಅನುವಂಶಿಕ ಮೊಕ್ತೇಸರೆರ್ ಕೆ. ವಾಸುದೇವ ಅಸ್ರಣ್ಣ, ಆಡಳಿತ ಸಮಿತಿದ ಗುರ್ಕಾರೆ ಸನತ್ ಕುಮಾರ್ ಶೆಟ್ಟಿ ಕೊಡೆತ್ತೂರುಗುತ್ತು ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ಒಡಿಪು ಘಟಕದ ಗುರ್ಕಾರೆಯಾದ್ ಜಯಕರ ಶೆಟ್ಟಿ ಇಂದ್ರಾಳಿ ಆಯ್ಕೆ

ಒಡಿಪು: ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ (ರಿ.) ಕುಡ್ಲದ ಸ್ಥಾಪಕಾಧ್ಯಕ್ಷೆರ್ ಪಟ್ಲ ಸತೀಶ್ ಶೆಟ್ಟಿ, ಒಡಿಪುದ ಪುರುಷೋತ್ತಮ ಶೆಟ್ಟಿ, ಕರ್ನಾಟಕ ಯಕ್ಷಗಾನ ಅಕಾಡೆಮಿದ ಮಾಜಿ ಗುರ್ಕಾರೆ ಪ್ರೊ. ಎಂ.ಎಲ್. ಸಾಮಗ, ಟಿ. ಶಂಭು ಶೆಟ್ಟಿ, ಸುಧಾಕರ ಆಚಾರ್ಯ ಮೊಕ್ಲೆನ ಮುತಾಲಿಕೆಡ್ ನ.25 ಕ್ಕ್ ಒಡಿಪುದ ಶ್ರೀ ಭಗವಾನ್ ನಿತ್ಯಾನಂದ ಸ್ವಾಮಿ ಮಂದಿರ ಮಠಟ್ಟ್ ನಡತಿನ ಸಮಾಲೋಚನ ಸಭೆಟ್ಟ್ ಟ್ರಸ್ಟ್‌ ದ 40ನೇ ಪೊಸ ಒಡಿಪು ಘಟಕದ ಗುರ್ಕಾರೆಯಾದ್ ಸಹಕಾರಿ ರತ್ನ, ಜಯಕರ ಶೆಟ್ಟಿ ಇಂದ್ರಾಳಿ ಮೇರ್ ಆಯ್ಕೆ ಆಯೆರ್.

ಮೇರ್ ಹಿರಿಯ ಯಕ್ಷಗಾನ ಸಂಸ್ಥೆ, ಯಕ್ಷಗಾನ ಕಲಾಕ್ಷೇತ್ರ ಗುಂಡಿಬೈಲು, ಒಡಿಪುದ ಮಾನಾದಿಗೆದ ಗುರ್ಕಾರೆಯಾದ್ ಬೊಕ್ಕ ಸುಮಾರಾತ್ ಪುಗರ್ತೆದ ಸಂಘ ಸಂಸ್ಥೆಲೆಡ್ ಸೇವೆ ಸಂದಾದೆರ್.

ಒಡಿಪು ಘಟಕದ ಮಾನಾದಿಗೆದ ಗುರ್ಕಾರೆಯಾದ್ ಉಜ್ವಲ್ ಡೆವಲಪರ್ಸ್ ದ ಪುರುಷೋತ್ತಮ ಶೆಟ್ಟಿ, ಶ್ರೀ ಶಿರ್ಡಿ ಸಾಯಿಬಾಬಾ ಮಂದಿರದ ಧರ್ಮದರ್ಶಿ ಕೆ. ದಿವಾಕರ ಶೆಟ್ಟಿ ತೋಟದ ಮನೆ, ಒತ್ತು ಗುರ್ಕಾರೆಯಾದ್ ಡಾ. ಸುನೀಲ್ ಮುಂಡ್ಕೂರು, ಅಜಯ ಪಿ. ಶೆಟ್ಟಿ, ಆನಂದ ಮಡಿವಾಳ, ಸಚಿನ್ ಶೆಟ್ಟಿ, ಡಾ. ಸಾಯಿ ಗಣೇಶ್, ಕಾರ್ಯದರ್ಶಿಯಾದ್ ಡಾ. ಹರೀಶ್ ಜೋಷಿ ವಿಟ್ಲ, ಜತೆ ಕಾರ್ಯದರ್ಶಿಯಾದ್ ರತನ್ ರಾಜ್ ರೈ ಮಣಿಪಾಲ, ಮಹೇಂದ್ರ ಆಚಾರ್ಯ ಹೆರಂಜೆ, ಸತ್ರಾಜಿತ ಭಾರ್ಗವ್, ಕಾರ್ತಿಕ್ ಎಸ್. ರಾವ್, ಹರ್ಷಿತ್ ಜೋಷಿ ಮಣಿಪಾಲ, ಚಿರಾಗ್ ಹೆಗ್ಡೆ ಬೈಲೂರು, ಖಜಾಂಚಿಯಾದ್ ಮನೋಹರ ಶೆಟ್ಟಿ ತೋನ್ಸೆ ಮೊಕುಲು ಆಯ್ಕೆ ಆಯೆರ್.

ಮಾನಾದಿಗೆದ ಮಾರ್ಗದರ್ಶಕೆರಾದ್ ಟಿ. ಶಂಭು ಶೆಟ್ಟಿ, ಎಂ.ಎಲ್. ಸಾಮಗ, ಭುವನಪ್ರಸಾದ್ ಹೆಗ್ಡೆ, ವಿಷ್ಣುಮೂರ್ತಿ ಆಚಾರ್ಯ, ಪವನ್ ಕಿರಣಕೆರೆ, ವಿಶ್ವನಾಥ ಶೆಣೈ, ತಲ್ಲೂರು ಶಿವರಾಮ ಶೆಟ್ಟಿ, ಮನೋಹರ ಶೆಟ್ಟಿ ಕಾಪು, ಮಟ್ಟಾರು ರತ್ನಾಕರ ಹೆಗ್ಡೆ, ಎಂ. ಶಶೀಂದ್ರ ರಾವ್, ಎರ್ಮಾಳ್ ಶಶಿಧರ ಶೆಟ್ಟಿ, ಪಳ್ಳಿ ಕಿಶನ್ ಹೆಗ್ಡೆ, ಪಿ. ನಟರಾಜ ಹೆಗ್ಡೆ, ಉದಯ ಕುಮಾರ್ ಶೆಟ್ಟಿ ಕಿದಿಯೂರು, ಮಹೇಶ್ ಠಾಕೂರ್, ಇಂದ್ರಾಳಿ ರತ್ನಾಕರ ಶೆಟ್ಟಿಗಾರ್, ನಾಗೇಶ್ ಹೆಗ್ಡೆ, ವೇಣೂಧರ ಶೆಟ್ಟಿ, ಉದಯಕುಮಾರ್ ಶೆಟ್ಟಿ ಎಸ್.ವಿ. ಮಣಿಪಾಲ, ಎಂ. ಡಿ. ಗಣೇಶ್, ರಾಧಾಕೃಷ್ಣ ಮಲ್ಪೆ, ಸಂತೋಷ್ ಕುಮಾರ್ ಶೆಟ್ಟಿ ತೆಂಕರಬೈಲು, ನಾಗರಾಜ ಐತಾಳ್, ಈಶ್ವರ ಶೆಟ್ಟಿ ಚಿಟ್ಪಾಡಿ, ಮೋಹನ ಶೆಟ್ಟಿ ನಿಡಂಬೂರು, ಉದಯ ಕುಮಾರ್ ಶೆಟ್ಟಿ, ಉಮೇಶ್ ಆನಂದ ರಾವ್, ಎಂ.ಎಸ್. ವಿಷ್ಣು ಭಟ್, ಪಾಡಿಗಾರು ಲಕ್ಷ್ಮೀನಾರಾಯಣ ಉಪಾಧ್ಯ, ಸತೀಶ್ ಕುಮಾರ್ ಶೆಟ್ಟಿ ಕೆಮ್ಮಣ್ಣು, ಸುಧಾಕರ ಆಚಾರ್ಯ ಒಡಿಪು, ವಸುಧರ್, ಗುರುರಾಜ್ ಕೋಟ್ಯಾನ್, ಕಿಶೋರ್ ಸಿ ಉದ್ಯಾವರ, ರತ್ನಾಕರ ಕಲ್ಯಾಣಿ, ಜಯಕರ ಆಚಾರ್ಯ ಬೈಲೂರು, ತ್ರಿಲೋಚನ ಶಾಸ್ತ್ರಿ ಆಯ್ಕೆ ಆಯೆರ್.

ಈ ಪೊರ್ತುಡು ಒಡಿಪು ಟ್ರಸ್ಟ್‌ ದ ಮಹಿಳಾ ಘಟಕದ ಸುರುಕ್ಕು ಚಿಂತನೆನ್ ನಡಪಾಯೆರ್. ಸಭೆಟ್ಟ್ ಕಲಾವಿಮರ್ಶಕಿ ಪ್ರತಿಭಾ ಎಂ.ಎಲ್. ಸಾಮಗ, ಪೂರ್ಣಿಮಾ ಸುರೇಶ್ ನಾಯಕ್, ಅಮಿತಾ ಸುಧಾಕರ ಆಚಾರ್ಯ, ತಾರಾ ಆಚಾರ್ಯ, ಪದ್ಮಲತಾ ವಿಷ್ಣು, ಸುಮಿತ್ರ ಕೆರೆಮಠ, ಅಮಿತಾ ಕ್ರಮಧಾರಿ, ಪ್ರಭಾವತಿ ವಿಶ್ವನಾಥ್, ಅಮಿತಾ ಗಿರೀಶ್, ವಿದ್ಯಾಸರಸ್ವತಿ, ಸರೋಜಾ ಶೆಣೈ, ಸರೋಜಾ ಯಶವಂತ್, ಶ್ವೇತಾ ಶೆಟ್ಟಿ ಪಾಲ್ ಪಡೆದಿತ್ತೆರ್. ಅಂಚೆನೆ ಬೇತೆ ಬೇತೆ ಕ್ಷೇತ್ರದ ಸಮಾಜದ ಗಣ್ಯೆರೆನ್, ಯಕ್ಷಗಾನ ಅಭಿಮಾನಿಲೆನ್, ಪದುಕೆರೆನ್ ಸೇರ್ಸಾವೊಂದು ದುಂಬಾರಿಪುನ ಧ್ಯೇಯ ಈ ಟ್ರಸ್ಟ್ ಗ್ ಉಂಡು.