ತುಳು ಸುದ್ದಿ

ಕಷ್ಟದ ಪೊರ್ತುಡು ರೋಟರಿ ಕ್ಲಬ್ ಸೇವೆ ಅನನ್ಯ : ಜಿಲ್ಲಾಧಿಕಾರಿ ಡಾ. ರಾಜೇಂದ್ರ

ಕುಡ್ಲ , ಜುಲೈ 4:: ಕೋವಿಡ್‌ದ ಸಂದಿಗ್ಧ ಪರಿಸ್ಥಿತಿಡ್ ರೋಟರಿ ಕ್ಲಬ್‌ದಂಚಿನ ಸಮಾಜ ಸೇವಾ ಸಂಸ್ಥೆಲು ಮಲ್ತೊಂದು ಉಪ್ಪುನ ಸೇವಾಕಾರ್ಯ ಅನನ್ಯವಾಯಿನವು ಪಂದ್ ದ.ಕ. ಜಿಲ್ಲಾಧಿಕಾರಿ ಡಾ.ಕೆ.ವಿ. ರಾಜೇಂದ್ರ ಪಂಡೆರ್ .

ವಿಶೇಷ ಜೋಕುಲು ‘ಸಾನಿಧ್ಯ’ ಶಾಲೆಗ್ ಬರಿಯರೆ ಅನುಕೂಲ ಆಪಿಲಕ ರೋಟರಿ ಕ್ಲಬ್ ಕುಡ್ಲ ಮೆಟ್ರೋ ಬೊಕ್ಕ ಅಮೆರಿಕದ ರೋಟರಿ ಕ್ಲಬ್ ಜೊತೆಯಾದ್ ಸೇರ್ದ್ ಶಾಲಾ ಬಸ್‌ನ್ ದಾನವಾದ್ ಕೊರ್ತಿನವು ಶ್ಲಾಘನೀಯ. ವಿಶೇಷ ಜೋಕ್ಲೆನ ಸುಪ್ತ ಪ್ರತಿಭೆನ್ ಪ್ರಚೋದಿಸಾದ್ ತರಬೇತಿ ಕೊರ್ದು , ಅಕ್ಲೆನ್ ಮುಖ್ಯವಾಹಿನಿಗ್ ಕನಿಯರೇ ಪ್ರಯತ್ನ ಬರೊಂದು ಉಪ್ಪುನ ಸಾನಿಧ್ಯದ ಆಡಳಿತ ವರ್ಗ, ಶಿಕ್ಷಕ ವೃಂದ ಉತ್ತಮ ಸೇವಾಕಾರ್ಯ ಮಳ್ತೊಂದುಲ್ಲೆರ್ ಪಂದ್ ಜಿಲ್ಲಾಧಿಕಾರಿ ಪಂಡೆರ್.

ಭಾರತೀಯ ಜನತಾ ಪಾರ್ಟಿ ಬಂಟ್ವಾಳ ಮಹಿಳಾ ಮೋರ್ಚಾ ವತಿರ್ದ್ ನೇಜಿ ನಡ್ಪಿನ ಲೇಸ್

ಕಲ್ಲಡ್ಕ ಜುಲೈ 4: ಭಾರತೀಯ ಜನತಾ ಪಾರ್ಟಿ ಬಂಟ್ವಾಳ ಮಹಿಳಾ ಮೋರ್ಚಾ ವತಿರ್ದ್ ಈ ದಿನ ಭತ್ತದ ಕೃಷಿಕ್ ಉತ್ತೇಜನ ಕೊರ್ಪಿನ ಸಲುವಾದ್ ಗೋಳ್ತಮಜಲು ಗ್ರಾಮದ ನೆಟ್ಲ ಪಿಲಿಂಜ ಸುರೇಶ್ ಮೆರ್ನ ಕಂಡೊಡು ಅಂಚನೇ ವೀರಕಂಭ ಗ್ರಾಮದ ಮೈರ ಕೂಸಮ್ಮ ವಾಸಪ್ಪ ಗೌಡ ಮೆರ್ನ ಕಂಡೊಡು ನೇಜಿ ನಟ್ಟಿ ಮಲ್ತೆರ್.

ಈ ಲೇಸ್ ಡ್ ಜಿಲ್ಲಾ ಮಹಿಳಾ ಮೋರ್ಚಾದ ಗುರ್ಕಾರ್ಲಾಯಿನ ಧನಲಕ್ಷ್ಮಿ ಗಟ್ಟಿ ಬೊಕ್ಕ ಜಿಲ್ಲಾ ಉಪಾಧ್ಯಕ್ಷೆ ಬೊಕ್ಕ ಬಂಟ್ವಾಳ ಮೋರ್ಚಾದ ಪ್ರಭಾರಿ ಆಶಾ.ಡಿ.ಸಿಲ್ವಾ, ಜಿಲ್ಲಾ ಸದಸ್ಯೆ ರೂಪ ಶೆಟ್ಟಿ ಬೊಕ್ಕ ಮಾಜಿ ಶಾಸಕೆರಾಯಿನ ಪದ್ಮನಾಭ ಕೊಟ್ಟಾರಿ, ನಿಕಟಪೂರ್ವ ಜಿಲ್ಲಾ ಪಂಚಾಯತ್ ಸದಸ್ಯೆರಾಯಿನ ಕಮಲಾಕ್ಷಿ ಪೂಜಾರಿ, ನಿಕಟಪೂರ್ವ ತಾಲೂಕು ಪಂಚಾಯತ್ ಸದಸ್ಯೆ ಗೀತಾ ಚಂದ್ರಶೇಖರ, ಬಂಟ್ವಾಳ ಮಹಿಳಾ ಮೋರ್ಚಾದ ಪ್ರಧಾನ ಕಾರ್ಯದರ್ಶಿಲಾಯಿನ ಲಕಿತ ಆರ್ ಶೆಟ್ಟಿ ಬೊಕ್ಕ ಸೀಮಾ ಮಾಧವ, ಬಾಳ್ತಿಲ ಪಂಚಾಯತ್ ಗುರ್ಕಾರ್ಲಾಯಿನ ಹಿರಣ್ಮಯಿ, ವೀರಕಂಭ ಪಂಚಾಯತ್ ಗುರ್ಕಾರ್ಲಾಯಿನ ದಿನೇಶ್, ಮೋರ್ಚಾದ ಪದಾಧಿಕಾರಿಲು , ಸದಸ್ಯೆರ್ , ಪಂಚಾಯತ್ ಸದಸ್ಯೆರ್ ಬೊಕ್ಕ ಬಿಜೆಪಿ ಕಾರ್ಯಂತೆರ್ ಪಾಲ್ ಪಡೆದಿತ್ತೆರ್.

ಅನ್ ಲಾಕ್ 3.0 : ದೇವಸ್ಥಾನ,ಬಾರ್, ಮಾಲ್ ಓಪನ್ : ರಾಜ್ಯಡ್ ವೀಕೆಂಡ್ ಕರ್ಫ್ಯೂ ಅಂತ್ಯ

ಬೆಂಗ್ಳೂರು, ಜುಲೈ 4 : ಕೊರೋನಾ ಪ್ರಕರಣಲು ಕಡಿಮೆಯಾವೊಂದು ಉಪ್ಪುನ ನೆಲೆಟ್ಟ್ ಸರ್ಕಾರ ರಾಜ್ಯಡ್ ಅನ್ ಲಾಕ್ 3.0 ಮಾರ್ಗಸೂಚಿ ಪ್ರಕಟ ಮಲ್ದೆರ್ .

ಐತ ಪ್ರಕಾರ ದೇವಾಲಯ, ಬಾರ್, ಮಾಲ್ ನ್ ಸುರು ಮಲ್ಪರೆ ಅವಕಾಶ ಕೊರ್ತೆರ್ . ಸುದ್ದಿಗಾರೆರ್ನ ಒಟ್ಟುಗು ಪಾತೆರಿನ ಮುಖ್ಯಮಂತ್ರಿ ಬಿ,ಎಸ್. ಯಡಿಯೂರಪ್ಪ ಜುಲೈ 5ರ್ದ್ 19 ಮುಟ ಈ ಮಾರ್ಗಸೂಚಿ ಅನ್ವಯ ಆಯರೇ ಉಂಡು . ರಾತ್ರಿ 9 ಗಂಟೆರ್ದ್ ಕಾಂಡೆ 5 ಗಂಟೆರ್ದ್ ನೈಟ್ ಕರ್ಫ್ಯೂ ಜಾರಿಡ್ ಉಂಡು ಪಂದ್ ಪಂಡೆರ್.

ಆತೆ ಸರ್ಕಾರಿ, ಖಾಸಗಿ ಕಚೇರಿಡ್ ಕೈಗಾರಿಕೆಡ್ ಶೇ ನೂದೇತ್ತಾತ್ ಉದ್ಯೋಗಿಲೆಗ್ ಅವಕಾಶಉಂಡು ಮೆಟ್ರೋ, ಬಸ್ ಟ್ ಶೇ .ನೂದೇತ್ತತ್ ಪ್ರಯಾಣಿಕೆರೆಗ್ ಅವಕಾಶ ಉಂಡು .

ಕುಡ್ಲಡ್ ಕ್ರಿಕೆಟ್ ಸ್ಟೇಡಿಯಂ ನಿರ್ಮಾಣ ಆಯೆರೆ ಉಂಡು : ಅಭಯಚಂದ್ರ ಜೈನ್

ಕುಡ್ಲ , ಜು.3: ಪದ್ಮಶ್ರೀ ಪುರಸ್ಕೃತ ದಿ. ಮಿಲ್ಕಾ ಸಿಂಗ್ ಕ್ರೀಡಾಪಟುಲೆಗ್ ಸ್ಫೂರ್ತಿದ ಚಿಲುಮೆಯಾತುಂಡು , ಮೆರೆಗ್ ಮರಣೋತ್ತರ ಭಾರತ ರತ್ನ ಕೊರೊಡು ಪಂದ್ ಮಾಜಿ ಕ್ರೀಡಾ ಸಚಿವ ಅಭಯಚಂದ್ರ ಜೈನ್ ಆಗ್ರಹ ಮಲ್ತೆರ್ .

ದ.ಕ. ಜಿಲ್ಲಾ ಕಾಂಗ್ರೆಸ್ ವತಿರ್ದ್ ಮಿಲ್ಕಾ ಸಿಂಗ್ ಭಾವಚಿತ್ರಗ್ ಮಾಲಾರ್ಪಣೆ ಮಲ್ತ್ ಸಂತಾಪ ಸೂಚನೆದ ಬೊಕ್ಕ ಸುದ್ದಿ ಗಾರೆರ್ನೋಟ್ಟಿಗೆ ಪಾತೆರಿಯೆರ್.

ಟೋಕಿಯೋಡ್ ಒಲಿಂಪಿಕ್ಸ್ ನಡತೊಂದು ಉಂಡು , ಅಲ್ಪ ಭಾರತೀಯ ಕ್ರೀಡಾಪಟುಲು ದಾಖಲೆ ನಿರ್ಮಾಣ ಮಲ್ಪುವ ಪನ್ಪಿನ ಆಶಯಡ್ ಭಾರತದ ‘ಫ್ಲೈಯಿಂಗ್ ಸಿಖ್’ ಖ್ಯಾತಿದ ಮಿಲ್ಕಾ ಸಿಂಗ್‌ನಕ್ಲೆನ್ ನೆಂಪು ಮಲ್ಪುನ ಬೇಲೆನ್ ಕಾಂಗ್ರೆಸ್ ವತಿರ್ದ್ ಮಲ್ಪುವ ಪಂದ್ ಪಂಡೆರ್.

ಕ್ರೀಡಾ ಸಚಿವೆರಾಯಿನ ಪೊರ್ತುಡು ಎಮ್ಮೆಕೆರೆಡ್ ಅಂತಾರಾಷ್ಟ್ರೀಯ ಮಟ್ಟದ ಈಜುಕೊಳ ನಿರ್ಮಾಣಗ್ ಐನ್ ಕೋಟಿ ರೂಪಾಯಿದ ಅನುದಾನದೊಟ್ಟುಗು ಶಿಲಾನ್ಯಾಸ ನಡಪರೇ ಉಂಡು ಪಂದ್ ಪಂಡೆರ್.