ತುಳು ಸುದ್ದಿ

ಜುಲೈ ರಡ್ಡನೆ ವಾರಡ್ ಪದವಿ ವೇಳಾಪಟ್ಟಿ ಪ್ರಕಟ: ಉನ್ನತ ಶಿಕ್ಷಣ ಇಲಾಖೆ

ಬೆಂಗ್ಳೂರು, ಜುಲೈ 5: : ಕೋವಿಡ್ ಕಾರಣರ್ದ್ ದುಂಬು ಪಾರ್ದಿನ ಪದವಿ ಸೆಮಿಸ್ಟರ್ ಪರೀಕ್ಷೆನ್ ಆಯಿನಾತ್ ಬೆಗೋಡೆ ನಡಪಾವ ಪಂದ್ ರಾಜ್ಯ ಉನ್ನತ ಶಿಕ್ಷಣ ಇಲಾಖೆ ಮಾಹಿತಿ ಕೊರ್ತುಂಡು..

ರಾಜ್ಯೋಡು ಮಾತಾ ವಿಶ್ವವಿದ್ಯಾಲಯದ ಪದವಿ ಬೊಕ್ಕ ಸ್ನಾತಕೋತ್ತರ ಪದವಿ ಪರೀಕ್ಷೆಲು ಏಪ್ರಿಲ್ ಬೊಕ್ಕ ಮೇ ತಿಂಗೊಲ್ ಡು ನಡಪೊಡಿತ್ತ್oಡ್ . ಆ ಪೊರ್ತುಡು ರಾಜ್ಯೋಡು ಲಾಕ್ಡೌನ್ ಘೋಷಣೆಯಾಯಿನ ಕಾರಣ ಪರೀಕ್ಷೆಯನ್ ದುಂಬು ಪಾರ್ದ್ದಿತ್ತೆರ್ . ಐರ್ದ್ ಬೊಕ್ಕ ಮಾತಾ ವಿಶ್ವವಿದ್ಯಾನಿಲಯಲು ಆನ್ಲೈನ್ ಮುಖೇನ ದುಂಬುದ ಸೆಮಿಸ್ಟರ್ದ ತರಗತಿಲೆನ್ ಸುರು ಮಲ್ದುಂಡು . ಈ ಕಾರಣರ್ದ್ ಬಾಕಿ ಒರಿನ ಸೆಮಿಸ್ಟರ್ ಪರೀಕ್ಷೆಲು ನಡಾಪುಂಡ ಇಜ್ಜಾ ಪನ್ಪಿನ ಗೊಂದಲ ಜೋಕ್ಲೆಗ್ ಆದ್ ಇತ್ತುಂಡು ತರಗತಿ ನಡತೊಂದು ಇತ್ತುಂಡಲ , ಪರೀಕ್ಷೆ ಮಲ್ಪರೆ ಬಲ್ಲಿ ಪನ್ಪಿನ ಸೊರ ವಿದ್ಯಾರ್ಥಿ ವಲಯರ್ದ್ ಕೇಂದ್ ಬತ್ತ್oಡ್ .

ಇತ್ತೇ ಮಾತಾ ಗೊಂದಲಗ್ಲಾ ರಾಜ್ಯ ಉನ್ನತ ಶಿಕ್ಷಣ ಸಚಿವಾಲಯ ಕಡೆತ ಚುಕ್ಕಿ ದೀತೆರ್. ಆಯಿನಾತ್ ಬೆಗೋಡೆ ಪರೀಕ್ಷೆ ನಡಪಾವ ಪಂದ್ ಪಂಡೆರ್. ರಡ್ಡನೆ ವಾರಡ್ ಪರೀಕ್ಷಾ ವೇಳಾಪಟ್ಟಿ ಪ್ರಕಟ ಮಲ್ಪುವ . ಒವ್ವೆ ಕಾರಣಗ್ಲಾ ಪರೀಕ್ಷೆ ರದ್ದು ಮಲ್ಪುಜ ಪಂದ್ ಉನ್ನತ ಶಿಕ್ಷಣ ಇಲಾಖೆದ ಮೂಲ ತೆರಿಪಾದುಂಡು .

ತುಳು ಭಾಷೆ ಕೇರಳದ ಅಧಿಕೃತ ಭಾಷೆಯಾವಡ್ : ಜೈ ತುಲುನಾಡ್ (ರಿ ) ಕಾಸ್ರೋಡು ಎಗ್ಗೆರ್ದ್ ಮಂಜೇಶ್ವರ ಶಾಸಕೆರೆಗ್ ಮನವಿ

ಕಾಸ್ರೊಡು, ಜುಲೈ 5: ತುಳು ಭಾಷೆಗ್ ಕೇರಳ ರಾಜ್ಯದ ಅಧಿಕೃತ ಭಾಷಾ ಸ್ಥಾನಮಾನ ಕೊರ್ಪಾವೊಡೊಂದು ಜೈ ತುಲುನಾಡ್ (ರಿ) ಸಂಘಟನೆದ ಕಾಸ್ರೋಡ್ (ಕಾಸರಗೋಡ್) ಎಗ್ಗೆರ್ದ್ ಮಂಜೇಶ್ವರದ ಶಾಸಕೆರಾಯಿನ ಎ.ಕೆ.ಎಮ್ ಅಶ್ರಫ್ ಮೆರೆಗ್ ದಾಖಲೆ ಸಮೇತ ಬಿನ್ನಂತೋಲೆದ ಮುಖೇನ ಬಿನ್ನೈತೊಂಡೆರ್.

ಈ ಪೊರ್ತುಡು ಜೈ ತುಲುನಾಡ್ ಕಾಸ್ರೋಡು ಎಗ್ಗೆದ ಗುರ್ಕಾರೆರ್ ಹರಿಕಾಂತ್ ಕಾಸರಗೋಡ್, ಕಾರ್ಯಂತೆರ್ ಕಾರ್ತಿಕ್ ಪೆರ್ಲ ಕೋಶಾಧಿಕಾರಿ ಪ್ರಶಾಂತ್ ರೈ ಬಂದಡ್ಕ, ಮುಖ್ಯ ಸಂಚಾಲಕೆರ್ ಪ್ರವೀಶ್ ಕುಲಾಲ್ ಬೊಕ್ಕ ಪದುಕೆರಾಯಿನ ದೇವಿಪ್ರಸಾದ್ ರೈ ಪಾಲ್ ಪಡೆಯೆರ್. ಮನವಿ ಸ್ವೀಕರಿತ್‌ದ್ ಈ ವಿಷಯೊನು ಸದನೊಡು ಮಂಡನೆ ಮಲ್ಪವೆಂದ್ ಶಾಸಕೆರ್ ಅಶ್ರಫ್ ಪಂಡೆರ್.

ಶ್ರೀ ಬ್ರಹ್ಮ ಬೈದರ್ಕಳ ಗರಡಿ ಹೆಜಮಾಡಿದ ಗರಡಿ ಅರ್ಚಕೆರೆಗ್ ಕಿಟ್‌ ಪಟ್ಟುನ ಲೇಸ್

ಹೆಜಮಾಡಿ, ಜುಲೈ 5: ಶ್ರೀ ಬ್ರಹ್ಮ ಬೈದರ್ಕಳ ಗರಡಿ ಹೆಜಮಾಡಿಡ್ ತಾರೀಖ್ 04.07.2021 ಕ್ಕ್ ಹೆಜಮಾಡಿ ಕೈತಲ್ ದ ಸುಮಾರರ್ 11 ಗರಡಿದ ಅರ್ಚಕೆರೆಗ್ ಶ್ರೀ ರಮೇಶ್ ಪಿ ಸಾಲ್ಯಾನ್‌ ಮೆರ್ನ ವತಿರ್ದ್ ತೆನಸ್ ದ ಕಿಟ್‌ ಕೊರಿಯೆರ್ . ಈ ಲೇಸ್ ದ ಗುರ್ಕಾರ್ಮೆನ್ ಹೆಜಮಾಡಿ ಬಿಲ್ಲವರ ಸಂಘದ ಗುರ್ಕಾರ್ಲಾಯಿನ ‍ಶ್ರೀ ಲೋಕೇಶ್‌ ಅಮೀನ್‌ ವಹಿಸ್ ದಿತ್ತೆರ್ .

ಮಲ್ಲ ಬಿನ್ನೆರ್ ಆದ್ ಕೊಡುಗೈ ದಾನಿ ಶ್ರೀ ರಮೇಶ್ ಪಿ ಸಾಲ್ಯಾನ್‌, ಮುಲ್ಕಿ ನಗರ ಪಂಚಾಯತ್‌ ನ ಸದಸ್ಯೆರಾಯಿನ ‍ಶ್ರೀ ಯೋಗೀಶ್‌ ಕೋಟ್ಯಾನ್‌, ಉದ್ಯಮಿ ಶ್ರೀ ಹರೀಂದ್ರ ಸುವರ್ಣ, ಹೆಜಮಾಡಿ ಗರಡಿದ ಅರ್ಚಕೆರಾಯಿನ ‍ಶ್ರೀ ಗುರುರಾಜ ಪೂಜಾರಿ, ಹೆಜಮಾಡಿ ಬಿಲ್ಲವರ ಸಂಘದ ಕಾರ್ಯದರ್ಶಿ ಶ್ರೀಮತಿ ಸುನೀತ ಕರ್ಕೇರ, ಕೋಶಾಧಿಕಾರಿ ಪ್ರಭೋದ್‌ ಚಂದ್ರ ಹೆಜಮಾಡಿ, ರಮೇಶ್‌ ಪಿ ಸಾಲ್ಯಾನ್‌ ರವರ ಧರ್ಮಪತ್ನಿ ದೇವಿಕಾ ಪಾಲ್ ಪಡೆದಿತ್ತೆರ್.

ಪ್ರಭೋದ್‌ ಚಂದ್ರ ಹೆಜಮಾಡಿ ಎದುಕೊಂಡೆರ್, ಸುಧೀರ್‌ ಕರ್ಕೇರ ಸೊಲ್ಮೆ ಸಂದೈತ ಮಲ್ತೆರ್, ಮನೋಹರ್‌ ಹೆಜ್ಮಾಡಿ ಲೇಸ್ ನಡಪಾದ್ ಕೊರಿಯೆರ್.

ಬಂಟ್ವಾಳದ ತುಡರ್ ಸೇವಾ ಟ್ರಸ್ಟ್‌ರ್ಡ್ ಬಡವೆರ್ನ ಚಿಕಿತ್ಸೆಗ್ ಪಣವು ಪಟ್ಟುನ ಲೇಸ್

ಮುಲ್ಕಿ, : ತುಡರ್ ಸೇವಾ ಟ್ರಸ್ಟ್ (ರಿ) ಬಂಟ್ವಾಳ ಮೊಕ್ಲೆನ ಸೇವಾ ಯೋಜನೆದ 37, 38, 39 ಬೊಕ್ಕ 40 ನೇ ಫಲಾನುಭವಿಲೆಗ್ ಪಣವುದ ಸಹಾಯ ಪಟ್ಟುನ ಲೇಸ್’ ಜೂ.28 ಸೋಮಾರ ಬಂಟ್ವಾಳದ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನೊಡು ನಡತ್‌ಂಡ್.

ಕುಡ್ಲ ಬಿಜೈ ಕೈತಲ್ದ ರೋಡ್ ಕಾಂಪೌಂಡ್ ನಿವಾಸಿ ಮ್ಯಾಕ್ಸಿಮ್ ಡಿಸೋಜ ಬೆರಿಕೋಲುದ ಕ್ಯಾನ್ಸರ್ ಚಿಕಿತ್ಸೆಗ್ ಟ್ರಸ್ಟ್ದ 37 ಯೋಜನೆಡ್ 10,000 ರೂಪಾಯಿದ ಚೆಕ್‌ನ್ ಟ್ರಸ್ಟ್‌ದ ಸದಸ್ಯೆರ್ ಕೊರಿಯೆರ್.

ಬಂಟ್ವಾಳ ಬೆಂಜನಪದವು ನಿವಾಸಿ ಸಂತೋಷ್ ಬೊಕ್ಕ ಜ್ಯೋತಿ ದಂಪತಿಲೆನ ಮಗಲ್ ಮೇಧಾ ಪನ್ಪಿನ ಬಾಲೆದ ಹೃದಯ ಚಿಕಿತ್ಸೆಗ್ 15,000 ರೂ. ದ ಚೆಕನ್ ಸದಸ್ಯೆರ್. 39 ನೇ ಸೇವಾ ಯೋಜನೆಡ್ ಬಂಟ್ವಾಳ ತಾಲೂಕು ತುಂಬೆ ಗ್ರಾಮದ ಕೊಚ್ಚಿಗುಡ್ಡೆ ಮುಲ್ಪ ಕಿರಣ್ ಮೆರ್ನ ಕಿಡ್ನಿ ವೈಫಲ್ಯದ ಚಿಕಿತ್ಸೆಗ್ 15,000ದ ಪನವುದ ಚೆಕ್‌ನ್ ಟ್ರಸ್ಟ್‌ದ ಸದಸ್ಯೆರ್
40ನೇ ಸೇವಾ ಯೋಜನೆದ ಸಕಾಯೋನು ತಾಲೂಕು ವಾಮದಪದವು ಅಜ್ಜಿಬೆಟ್ಟು ಮುಲ್ಪದ ತಿಲೇಶ್ ಮೆರೆಗ್ ಅಪಘಾತೊಡು ಆಯಿನ ಕಣ್ಣ್ ದ ಮಲ್ಲ ಗಾಯದ ಚಿಕಿತ್ಸೆಗ್ 10,000 ರೂ. ಪಣವುದ ಚೆಕ್‌ನ್ ಕೊರಿಯರ್.

ಮುಲ್ಕಿ ರೋಟರಿ ಕ್ಲಬ್ ಗ್ ಪೊಸ ಗುರ್ಕಾರ್ಲಾದ್ ಶಿವರಾಮ ಜಿ. ಅಮೀನ್ ಆಯ್ಕೆ

ಮುಲ್ಕಿ, ಜುಲೈ 5: ಮುಲ್ಕಿ: ರೋಟರಿ ಕ್ಲಬ್‌ 2021-22ನೇ ವರ್ಸದ ಬೊಳ್ಳಿ ಪರ್ಬದ ವರ್ಷದ ಗುರ್ಕಾರ್ಲು ಆದ್ ಮುಲ್ಕಿ ಪ್ರಮೋದ್ ಇಲೆಕ್ಟ್ರಾನಿಕ್ಸ್ ಬೊಕ್ಕ ಫರ್ನಿಚರ್‌ದ ಧಣಿ ಶಿವರಾಮ ಜೆ. ಅಮೀನ್ ಆಯ್ಕೆ ಆತೆರ್.

ಕಾರ್ಯಂತೆರಾದ್ ರವಿಚಂದ್ರ, ಪಣವುದ ಪಾಲವೆರಾದ್ ರಮೆಂಡ್ ರೆಬೆಲ್ಲೊ,ದಂಡಪಾಣಿಯಾದ್ ಭುಜಂಗ ಕವತ್ತಾರ್, ಸಂಘ ಸೇವಾ ನಿರ್ದೇಶಕರಾದ್ ಜಿನರಾಜ್ ಸಾಲ್ಯಾನ್, ಸಮುದಾಯ ಸೇವಾ ನಿರ್ದೇಶಕರಾದ್ ಎಮ್. ನಾರಾಯಣ, ವೃತ್ತಿ ಸೇವಾ ನಿರ್ದೇಶಕೆರಾದ್ ಅಬ್ಬಾಸ್ ಅಲಿ, ಅಂತಾರಾಷ್ಟ್ರೀಯ ಸೇವಾ ನಿರ್ದೇಶಕೆರಾದ್
ಜೊವಿನ್ – ಪ್ರಕಾಶ್ ಡಿಸೋಜ, ಯುವ ಸೇವಾ ನಿರ್ದೇಶಕರಾದ್ ಲಿಯಾಖತ್ ಆಲಿ, ಅಂತಾರಾಷ್ಟ್ರೀಯ ದತ್ತಿ ನಿಧಿ ಸಭಾಪತಿ ಆದ್ ರಾಜಾ ಪತ್ರಾವೊ ಅಂಚೆನೇ ಸಂಸ್ಥೆದ ಪತ್ರಿಕೆ “ಮೂಲಿಕಾ’ ಉಂದೆತ್ತ ಸಂಪೊಲಿಗೆದಾರ್ ಆದ್ ಯಶವಂತ್ ಎನ್. ಸಾಲ್ಯಾನ್, ನಿಕಟಪೂರ್ವ ಅಧ್ಯಕ್ಷೆರ್ ಅಶೋಕ್ ಕುಮಾರ್ ಶೆಟ್ಟಿ ಆಯ್ಕೆ ಆತೆರ್.

ಇನಿರ್ದ್ ಶಾಪಿಂಗ್ ಮಾಲ್ ಸುರು ಮಲ್ಪರೆ ಅನುಮತಿ : ದ.ಕ. ಜಿಲ್ಲಾಧಿಕಾರಿ ರಾಜೇಂದ್ರ

ಕುಡ್ಲ , ಜು.5: ರಾಜ್ಯಡ್ 3ನೇ ಹಂತದ ಅನ್‌ಲಾಕ್ ಘೋಷಣೆಯಾತ್oಡ್ , ಜು.5ರ್ದ್ ಜು.19ರ ಮುಟ ಕುಡ್ಲಡ್ ಕೆಲವು ಚಟುವಟಿಕೆಗ್ ಪೂರ್ಣ ವಿನಾಯಿತಿ ಕೊರ್ತೆರ್ . ವಾರಾಂತ್ಯ ಕರ್ಫ್ಯೂ ಮುಗಿದುಂಡು . ಆಂಡ ರಾತ್ರಿ 9 ಗಂಟೆರ್ದ್ ಕಾಂಡೆ 5 ಗಂಟೆ ಮುಟ ರಾತ್ರಿ ಕರ್ಫ್ಯೂ ದುoಬರಿಯರೆ ಉಂಡು ಪಂದ್ ದ.ಕ. ಜಿಲ್ಲಾಧಿಕಾರಿ ಡಾ.ಕೆ.ವಿ.ರಾಜೇಂದ್ರ ಪಂಡೆರ್ .

ಸರಕಾರಿ, ಖಾಸಗಿ ಬಸ್‌ಗ್ ಶೇ.100 ದಾತ್ ಪ್ರಯಾಣ ಮಲ್ಪರೆ ಅವಕಾಲ್ ಉಂಡು . ದೇವಸ್ಥಾನ, ಮಸೀದಿ, ಚರ್ಚ್‌ ಕಾಲಿ ಪ್ರಾರ್ಥನೆ, ದರ್ಶನಗ್ ಮಾತ್ರ ಅವಕಾಶ ಕೊರ್ತೆರ್ . ಆಂಡ ಒವ್ವೆ ಸೇವಾ ಚಟುವಟಿಕೆಗ್ ಅನುಮತಿ ಇಜ್ಜಿ . ರಾಜ್ಯ ಸರಕಾರದ ಪರಿಷ್ಕೃತ ಮಾರ್ಗಸೂಚಿನ್ ಯಥಾವತ್ತಾದ್ ಪಾಲಿಸಸಾವೊಡು ಪಂದ್ ದ.ಕ. ಜಿಲ್ಲಾಧಿಕಾರಿ ಡಾ.ಕೆ.ವಿ.ರಾಜೇಂದ್ರ ಪಂತೆರ್.

ಇನಿರ್ದ್ ಕೋವಿಡ್ ನಿಯಮ ಪಾಲನೆ ದೊಟ್ಟುಗು ಮಸೀದಿಡ್ ನಮಾಜ್ ಮಲ್ಪರೆ ಅವಕಾಶ : ಒಡಿಪು ಡಿಸಿ

ಒಡಿಪು ,ಜುಲೈ 5 ರಾಜ್ಯ ಸರಕಾರದ ಆದೇಶದ ಪ್ರಕಾರ ಕೋವಿಡ್ ನಿಯಮದ ಪಾಲನೆದೊಟ್ಟುಗು ಒಡಿಪು ಜಿಲ್ಲೆದ ಮಸೀದಿಗಡ್ ಜು.5ರ್ದ್ ನಮಾಝ್ ಮಲ್ಪರೆ ಅವಕಾಶ ಕೊರ್ತೆರ್ ಪಂದ್ ಒಡಿಪು ಜಿಲ್ಲಾಧಿಕಾರಿ ಜಿ. ಜಗದೀಶ್ ಪಂಡೆರ್ .

ಕಡ್ಡಾಯವಾದ್ ಮಾಸ್ಕ್ ಪಾರ್ದ್ , ಸುರಕ್ಷಿತ ಅಂತರ ಕಾತೊಂದು ಅಂಚನೇ ಮಸೀದಿದ ಕಟ್ಟಡದ ಸಾಮರ್ಥ್ಯಗ್ ಅನುಗುಣವಾದ್ ಸಾಮೂಹಿಕ ನಮಾಝ್ ಮಲ್ಪೊಲಿ ಪಂದ್ ಪಂಡೆರ್.