ರಪಕ್ಕ ಸುದ್ದಿ Flash News

ತಾಲೂಕು ಕೇಂದ್ರವಾಯಿನ ಹೆಬ್ರಿಗ್ ಕೋವಿಡ್‌ ಚಿಕಿತ್ಸಾ ಕೇಂದ್ರದ ತೀರಾ ಅಗತ್ಯ

ಹೆಬ್ರಿ, ಎಪ್ರಿಲ್ 28: ದಿನರ್ದ್ ದಿನ ಜಾಸ್ತಿ ಆವೊಂದು ಉಪ್ಪುನ ಕೊರೊನಾ ನೆಲೆಟ್ಟ್ ತಾಲೂಕು ಕೇಂದ್ರವಾಯಿನ ಹೆಬ್ರಿಗ್ ಇತ್ತೇ ಕೋವಿಡ್‌ ಚಿಕಿತ್ಸಾ ಕೇಂದ್ರ ತೀರಾ ಅಗತ್ಯ ಉಂಡು .

ಹೆಬ್ರಿ ಸಮುದಾಯ ಆರೋಗ್ಯ ಕೇಂದ್ರಡ್ ಇತ್ತೇ ಆಕ್ಸಿಜನ್‌ದೊಟ್ಟುಗು 18 ಬೆಡ್‌ದ ವ್ಯವಸ್ಥೆ ಉಂಡು ಕೋವಿಡ್‌ ಚಿಕಿತ್ಸೆಗ್ ಬಳಕೆ ಮಲ್ತುಂಡ ಈ ಭಾಗದ ಜನಕ್ಲೆಗ್ ಅನುಕೂಲ ಆಪುಂಡು . ಸರಕಾರ ಬೊಕ್ಕ ಇಲಾಖೆ ಈ ಬಗ್ಗೆ ಗೇನ ಕೊರ್ದು ಅಗತ್ಯ ಸೌಲಭ್ಯಲೆನ್ ಪೂರೈಕೆ ಮಲ್ತುಂಡ ಹೆಬ್ರಿ ತಾಲೂಕುದ ಗ್ರಾಮೀಣ ಪರಿಸರದಕ್ಲೆಗ್ ಅನುಕೂಲ ಆಪುಂಡು ಪನ್ಪಿನವು ಸಾರ್ವಜನಿಕೆರ್ನ ಅಭಿಪ್ರಾಯ. ಈ ಬಗ್ಗೆ ರಡ್ಡ್ ದಿನತ ಪಿರವು ನಡತಿನ ದಿನ ತಾಲೂಕು ಪಂಚಾಯತ್‌ ಸಾಮಾನ್ಯ ಸಭೆಟ್ ಲಾ ಕೂಡ ಚರ್ಚೆ ನಡತ್ದಿತ್ತುಂಡು .

ಪುತ್ತೂರು ಪಡುಮಲೆದ ನಾಗ ಬೆರ್ಮೆರ ಗುಡಿ, ನಾಗ ಸನ್ನಿಧಿ, ರಕ್ತೇಶ್ವರಿ, ತೀರ್ಥಬಾವಿ ಬೊಕ್ಕ ದೇಯಿ ಬೈದೆತಿ ಸಾನ್ನಿಧ್ಯ ಪ್ರತಿಷ್ಠೆ ಬೊಕ್ಕ ಬ್ರಹ್ಮಕಲಶೋತ್ಸವ

ಪುತ್ತೂರು, ಎಪ್ರಿಲ್ 28: : ಪುತ್ತೂರ್ದ ಪಡುವನ್ನೂರುದ ಪಡುಮಲೆಡ್ ಉಪ್ಪುನ ನಾಗ ಬೆರ್ಮೆರ ಗುಡಿ, ನಾಗ ಸನ್ನಿಧಿ, ರಕ್ತೇಶ್ವರಿ, ತೀರ್ಥಬಾವಿ ಬೊಕ್ಕ ದೇಯಿ ಬೈದೆತಿ ಸಾನ್ನಿಧ್ಯ (ಸಮಾಧಿ)ದ ಪ್ರತಿಷ್ಠೆ ಬೊಕ್ಕ ಬ್ರಹ್ಮಕಲಶೋತ್ಸವ ಶನಿವಾರ ಬ್ರಾಹ್ಮಿ ಮುಹೂರ್ತಡ್ ಸರಳವಾದ್ ನಡತುಂಡು .

ಕ್ಷೇತ್ರದ ತಂತ್ರಿ ಕುಂಟಾರು ರವೀಶ ತಂತ್ರಿಲೆನ ಮಾರ್ಗದರ್ಶನಡ್ ಶನಿವಾರ ಪುಲ್ಯ ಕಾಂಡೆ 3 ಗಂಟೆಗ್ ಅಲ್ಪ ಪ್ರಾಸಾದ ಶುದ್ಧಿ, ಪ್ರಾಸಾದ ಪ್ರತಿಷ್ಠೆ, 3.58 ರ್ದ್ 4.21ರ ಮೀನ ಸುಮುಹೂರ್ತಡ್ ಪ್ರತಿಷ್ಠೆ ಜೀವಕಲಶಾಭಿಷೇಕ, ಮಹಾಪೂಜೆ, ಗಣಪತಿ ಹವನ, ಬ್ರಹ್ಮಕಲಶಾಭಿಷೇಕ, ಮಹಾಪೂಜೆ, ಮಂತ್ರಾಕ್ಷತೆ ಸೇರಿನಂಚ ಪೂಜಾವಿಧಿವಿಧಾನ ನಡತುಂಡು .

ಈ ಮುಖೇನ ಪಡುಮಲೆ ಸಾನ್ನಿಧ್ಯಡ್ 550 ವರ್ಷರ್ದ್ ಉಂತುದಿತ್ತಿನ ಪೂಜಾ ವಿಧಿವಿಧಾನಲೆಗ್ ಶನಿವಾರ ಕೋವಿಡ್ ಮಾರ್ಗಸೂಚಿನ್ ಪಾಲಿಸಾವೊಂದು ಅಂಚನೇ ಸೀಮಿತ ಭಕ್ತೆರ್ನ ಸಮ್ಮುಖಡ್ ಚಾಲನೆ ತಿಕ್ಕ್oಡ್ .