ರಪಕ್ಕ ಸುದ್ದಿ Flash News

ನಾಟೆಕಲ್‌ಡ್ ಆಕ್ಸಿಡೆಂಟ್; ಪೆಟ್ಟಾದಿತ್ತಿನಾರ್‌ಲ ತೀರ್ ಪೋಯೆರ್

ಉಳ್ಳಾಲ: ಮಂಜನಾಡಿ ನಾಟೆಕಲ್ ಕೈತಲ್ ಕೋಡೆ ನಡತಿನ ಆಕ್ಸಿಡೆಂಟ್‌ಡ್ ತೋಕೂರುದ ಶ್ರೀ ನಿಧಿ ತೀರ್ ಪೋದಿತ್ತ್‌ದ್ ಸಂಬಂಧಿಕೆ ಒರಿಯಗ್ ಮಸ್ತ್ ಪೆಟ್ಟಾದಿತ್ತ್ಂಡ್. ಇತ್ತೆ ಆರ್‌ಲ ಚಿಕಿತ್ಸೆ ಫಲಿಸಂದೆ ತೀರ್ ಪೋಯಿನ ಘಟನೆ ನಡತ್ಂಡ್.

ಯತೀಶ್ ದೇವಾಡಿಗ ತೀರ್ ಪೋಯಿನಾರ್ ಪಂದ್ ಗುರ್ತಿಸಾದೆರ್. ಮುಡಿಪುಡ್ ಇತ್ತಿನ ಸಂಬಂಧಿಕೆರೆನ ಇಲ್ಲ್ ಒಕ್ಕೆಲ್‌ಗ್ ಪೋದು ಪಿರ ಬರ್ಪುನ ಪೊರ್ತುಡು ಬೈಕ್ ನಾಟೆಕಲ್ ಗ್ರೀನ್ ಗ್ರೌಂಡ್ ಕೈತಲ್ ಇತ್ತಿನ ಡಿವೈಡರ್‌ಗ್ ಗುದ್ದ್‌ದ್ಂಡ್.

ಕುಡ್ಲ ದಕ್ಷಿಣ ಸಂಚಾರಿ ಠಾಣಾ ಪೊಲೀಸೆರ್ ಕೇಸ್ ದಾಖಲ್ ಮಲ್ತ್‌ದೆರ್. ಯತೀಶ್ ದೇವಾಡಿಗ ಪೋಷಕೆರೆಗ್ ಒರಿಯೇ ಮಗೆ .

ಮುಂಡ್ಕೂರು ದುರ್ಗಾಪರಮೇಶ್ವರಿ ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರಾದ್ ಮುಲ್ಲಡ್ಕ ಕೋರಿಬೆಟ್ಟುಗುತ್ತು ಸುರೇಂದ್ರ ಎಸ್ ಶೆಟ್ಟಿ ಆಯ್ಕೆ

ಮುಂಡ್ಕೂರು: ಇತಿಹಾಸ ಪುಗರ್ತೆದ ಮುಂಡ್ಕೂರು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರಾದ್ ಮುಂಡ್ಕೂರು ಮುಲ್ಲಡ್ಕ ಕೋರಿಬೆಟ್ಟುಗುತ್ತು ಸುರೇಂದ್ರ ಎಸ್ ಶೆಟ್ಟಿ (ಬಾಬಣ್ಣ) ಮೇರ್ ಆಯ್ಕೆ ಆತೆರ್.

ವ್ಯವಸ್ಥಾಪನಾ ಸಮಿತಿದ ಸದಸ್ಯೆರಾದ್ ರಾಮದಾಸ ಜೆ. ಆಚಾರ್ಯ (ಪ್ರಧಾನ ಅರ್ಚಕೆರ್), ಸುಜಾತಾ ಸುಭೋದ ಶೆಟ್ಟಿ ಸಚ್ಚರ ಪರಾರಿ, ಜಗದೀಶ್ ಎಸ್ ಶೆಟ್ಟಿ ಕುದುರೊಟ್ಟು ನಡಿಗುತ್ತು ಸಚ್ಚೇರಿಪೇಟೆ, ಶೇಖರ ಎಸ್ ಶೆಟ್ಟಿ ಮಾಣಿಬೆಟ್ಟು-ಪುನ್ಕೆದಡಿ, ಕೃಷ್ಣ ಪೂಜಾರಿ ಬಂಡ್ರೊಟ್ಟು ಮುಂಡ್ಕೂರು, ನಳಿನಾಕ್ಷಿ ರಾಜು ಸೇರಿಗಾರ ಕಡಪುಕರಿಯ, ಅಕ್ಷತಾ ವಿಶ್ವಿತ್ ಶೆಟ್ಟಿ ಸಂಕಲಕರಿಯ, ಸುರೇಶ್ ಸಾಲ್ಯಾನ್ ಅಲಂಗಾರ್ ಆಯ್ಕೆ ಆತೆರ್. ಆಯ್ಕೆ ಆಯಿನಕ್ಲೆಗ್ ಊರು ಪರವೂರುದ ಗ್ರಾಮಸ್ಥೆರ್ ಅಭಿನಂದನೆ ಮಲ್ದೆರ್.

ಬಂಟ್ವಾಳ: 4.65 ಲಕ್ಷ ರೂ. ಕಳೆಯೊಂಡಿನ ಆಟೋ ಡ್ರೈವರ್

ಬಂಟ್ವಾಳ: ಎಚ್ಚದ ಲಾಭ ಮಲ್ಪುನ ಉದ್ದೇಶಡ್ ಆಟೋ ಡ್ರೈವರ್ ಒರಿ ಆಪ್ ಗಲಸ್‌ದ್ ಬೇತೆ ಬೇತೆ ಅಕೌಂಟ್‌ಡ್ ಕಾಸ್‌ ಪಾಡ್ದ್ 4.65 ಲಕ್ಷ ರೂ. ಕಳೆಯೊನಿನ ಘಟನೆ ಸರಪಾಡಿ ಗ್ರಾಮಡ್ ನಡತ್ಂಡ್.

ಆಟೋ ಡ್ರೈವರ್ ಹರೀಶ್ ಕುಮಾರ್ ಕಾಸ್ ಕಳೆಯೊನಿನಾರ್. ಅರೆನ ಮೊಬೈಲ್‌ಗ್ ಕರಿನ ಡಿ.20 ಗ್ ಮೇಸೆಜ್ ಒಂಜಿ ಬತ್ತಿತ್ತ್‌ದ್ ಅವೆತ್ತಲೆಕ್ಕನೆ ಆರ್ ನಮ್‌ಜೀನಿಯಸ್ ಎ1 ಆಪ್ ಡೌನ್‌ಲೋಡ್ ಮಲ್ತ್‌ದಿತ್ತೆರ್. ಬೊಕ್ಕ ಅವೆತ್ತ ಮುಕೇನ ಕಾಸ್ ಹೂಡಿಕೆ ಮಲ್ತ್‌ದ್ ಲಾಭ ಪಡೆಯೊನುನ ಉದ್ದೇಶಡ್ ಬೇತೆಯಕುಲು ವಾಟ್ಸ್‌ಆಪ್‌ಡ್ ಸೂಚಿಸಾಯಿಲೆಕ್ಕ ಬೇತೆ ಬೇತೆ ಖಾತೆಲೆಗ್ ಹಂತ ಹಂತವಾದ್ ಒಟ್ಟು 5,85,200 ರೂ. ಕಾಸ್‌ನ್ ವರ್ಗಾವಣೆ ಮಲ್ತ್‌ದಿತ್ತೆರ್.

ಅವೆಟ್ಟ್ ಹರೀಶ್ ಮೇರೆಗ್ 1,20,175 ರೂ. ಕಾಸ್ ಪಿರ ತಿಕ್ಕ್‌ದ್ಂಡ್. ಬಾಕಿ ಒರಿನ 4,65,025 ರೂ. ಕಾಸ್‌ನ್ ಕಳೆಯೊಂದೆರ್. ಬಂಟ್ವಾಳ ಪೊಲೀಸ್ ಠಾಣೆಡ್ ಈ ಕೇಸ್ ದಾಖಲ್ ಆತ್ಂಡ್.

ಯುಪಿಎಸ್‌ಸಿ ಪರೀಕ್ಷೆಡ್ 93ನೇ ರ್‍ಯಾಂಕ್ ಪಡೆಯಿನ ಮಾಡೆಲ್ ಐಶ್ವರ್ಯಾ ಶಿಯೋರನ್

ದಿಲ್ಲಿ: ಮಾಡೆಲಿಂಗ್ ಜಗತ್ತ್‌ಡ್ ಪುದರ್ ಪಡೆಯಿನ ಐಶ್ವರ್ಯಾ ಶಿಯೋರನ್ ಯುಪಿಎಸ್‌ಸಿ ಪರೀಕ್ಷೆಡ್ 93ನೇ ರ್‍ಯಾಂಕ್ ಪಡೆಯಿನ ಮುಕೇನ ಪೊಸ ಬಾಷ್ಯಾ ಬರೆತೆರ್.

ಫ್ಯಾಷನ್, ಮಾಡೆಲಿಂಗ್ ಬೊಕ್ಕ ನಟನೆದ ಜಗತ್ತ್‌ಡ್ ಇಪ್ಪುನ ಜನಕುಲು ಶಿಕ್ಷಣ ಬೊಕ್ಕ ಬೂಕುದ ನಂಟ್ ಆತೆಕ್ಕಾತೆ ಪನ್ಪಿನ ಪಾತೆರ ಉಂಡು. ಆಂಡ ಐಶ್ವರ್ಯಾ ಶಿಯೋರನ್ ಟಾಪ್ ಮಾಡೆಲ್ ಆಯಿನೆಡ್ದ್ ಬೊಕ್ಕ ಯುಪಿಎಸ್‌ಸಿ ರಿಸಲ್ಟ್‌ಡ್ 93ನೇ ರ್‍ಯಾಂಕ್ ಪಡೆತೆರ್. ಮೆರೆನ್ ಇತ್ತೆ ಜನಕುಲು “ಬ್ಯೂಟಿ ವಿಥ್ ಬ್ರೈನ್” ಪಂದ್ ಲೆಪ್ಪುವೆರ್.

ಕುಡ್ಲ: ಅಕಲ್ ತತ್ತ್‌ದ್ ಡಿವೈಡರ್‌ಗ್ ಗುದ್ದಿನ ಕಾರ್ ತೀರ್ ಪೋಯಿನ ಬಿಜೆಪಿ ಲೀಡರ್‌ನ ಪುಲ್ಲಿ

ಕುಡ್ಲ: ಕಾರ್ ಒಂಜಿ ಅಕಲ್ ತತ್ತ್‌ದ್ ಡಿವೈಡರ್‌ಗ್ ಗುದ್ದ್‌ದ್ ಜವನ್ಯೆ ಜಾಗೆಡೇ ತೀರ್ ಪೋಯಿನ ಘಟನೆ ನಂತೂರ್‌ಡ್ ಸುಕ್ರಾರ ನಡುರಾತ್ರೆ ನಡತ್ಂಡ್.

ಬಿಜೆಪಿ ಹಿರಿಯ ನಾಯಕಿ ಲಲಿತಾ ಸುಂದರ್ ಮೆರೆನ ಪುಲ್ಲಿ ಶಮಿತ್ ಶೆಟ್ಟಿ(29) ಯಾನೆ ಬಂಟಿ ಪಂದ್ ಗುರ್ತಿಸಾದೆರ್. ಆಕ್ಸಿಡೆಂಟ್‌ಡ್ ಮಸ್ತ್ ಪೆಟ್ಟಾದಿತ್ತಿನ ಶಮಿತ್ ಜಾಗೆಡ್ ತೀರ್ ಪೋತೆರ್.

ಶಮಿತ್ ಶೆಟ್ಟಿ ಮೆರೆನ ದೋಸ್ತಿನ ಇಲ್ಲಡ್ ದೈವದ ಕೋಲಡ್ ಪಾಲ್ ಪಡೆದ್ ಅವೆರ್ದ್ ಬೊಕ್ಕ ತೊಕ್ಕೊಟ್ಟುಡ್ ಇತ್ತಿನ ತನ್ನ ಇಲ್ಲಗ್ ಪಿರ ಬರ್ಪುನ ಪೊರ್ತುಡು ಈ ಘಟನೆ ನಡತ್ಂಡ್. ಕದ್ರಿ ಸಂಚಾರಿ ಪೊಲೀಸ್ ಠಾಣೆಡ್ ಈ ಕೇಸ್ ದಾಖಲ್ ಆತ್ಂಡ್.