ತುಳು ಕಬಿತೆ | Tulu Poetry

ತುಳುನಾಡ್ದ ಅಂಕ ಆಯನ, ಆಟ ತಂಬಿಲ, ನೇಮ ನಡರಿಗ್ ತಡೆಯಾಂಡ್ ರಾತ್ರೆದ ಕರ್ಫ್ಯೂ

ಕುಡ್ಲ : ತುಳುನಾಡ್ ಪನ್ಪಿನವು ರಾಜ್ಯದ ವಿಶೇಷ ಭೂ ಭಾಗ ಆಂಡಲ ಮುಲ್ತ ಆಚಾರ, ವಿಚಾರ, ಸಂಸ್ಕೃತಿ, ನೇಮ, ನಡರಿ ಪೂರ ವಿಶೇಷವಾದುಂಡು. ಆಂಡ ರಾಜ್ಯ ಸರ್ಕಾರ ಕೊರೊನಾ ತಡೆಪರೆ ಬೋಡಾದ್ ರಾತ್ರೆ ಕರ್ಫ್ಯೂ ಜಾರಿ ಮಲ್ತ್‌ದ್ ಆಟ, ನೇಮ, ತಂಬಿಲ ನಡಪಂದಿಲೆಕ್ಕ ಮಲ್ತ್‌ದ್ ತುಳುನಾಡ್ದ ಸಂಸ್ಕೃತಿಗ್ ಪೆಟ್ಟ್ ಕೊರೊಂದುಂಡು ಪಂಡ್‌ದ್ ತುಳುವೆರ್ ಬೇಜಾರ್ ಮಲ್ತೊಂದುಲ್ಲೆರ್.
ತುಳುನಾಡ್‌ಡ್ ದೈವಾರಾಧನೆ, ಯಕ್ಷಗಾನ, ನಾಗಾರಾಧನೆ ಪನ್ಪಿನವು ಮಾಮಲ್ಲ ಸಂಸ್ಕೃತಿ. ಸಾಮಾನ್ಯವಾದ್ ಪರಕೆದ ಆಟ, ದೈವೊಲೆನ ಕೆಲಸ ಎಚ್ಚಿನವು ರಾತ್ರೆದ ಪೊರ್ತುಡೇ ಆಪಿನಿ. ದೇವಸ್ಥಾನೊಲೆಡ್ ಜಾತ್ರೆ, ರಾತ್ರೆ ತೇರ್ ಇಂಚ ಮಾತ ವಿಧಾನೊಲು ನಡಪುನುಲ ರಾತ್ರೆಡೆ. ಆಂಡ ಜಾತ್ರೆ, ಅಂಕಾಯನ, ನೇಮದ ಈ ಪೊರ್ತುಡು ರಾತ್ರೆ ಕರ್ಫ್ಯೂ ಜಾರಿ ಇತ್ತಿನೆರ್ದಾವರ ಅವೆಕ್ಕ್ ಪೂರ ತಡೆ ಬೈದ್ಂಡ್. ಸರ್ಕಾರದ ಅಧಿಕಾರಿಲು ಬೆಂಗೂರುಡು ಕುಲ್ದು ತುಳುನಾಡ್ದ ಸಂಸ್ಕೃತಿನ್ ತೆರಿಯಂದೆ ಇಡೀ ರಾಜ್ಯೊಗು ಆಪಿನ ಕಾನೂನುನು ತುಳುನಾಡ್‌ಗ್‌ಲ ಜಾರಿ ಮಲ್ದಿನೆರ್ದಾವರ , ಯಕ್ಷಗಾನ, ದೈವಾರಾಧನೆನ್ ನಂಬುದು ಜೀವನ ಮಲ್ಪುನಕ್ಲೆನ ಬದಕ್‌ದ ಪಡಿಕ್ಕ್ ಮಲ್ಲ ಪೆಟ್ಟ್ ಕೊರ್ತುಂಡು ಪಂಡ್‌ದ್ ಜನೊಕ್ಲು ಪನೊಂದುಲ್ಲೆರ್.
ಕೋವಿಡ್ ಸೀಕ್‌ದ ಮಿತ್ತ್ ಯುದ್ಧ ಗೆಂದೊಡಾಯಿನವು ಸತ್ಯ. ಅಂಚಾದ್ ರಾಜ್ಯ ಸರ್ಕಾರದ ಮಂತ್ರಿಲು, ಅಧಿಕಾರಿಲು ಕಾನೂನು ಜಾರಿ ಮಲ್ಪುನ ತಪ್ಪತ್ತ್. ಆಂಡ ಆಯಾ ಜಾಗೆದ ಪ್ರಾದೇಶಿಕ ನಿಲೆಟ್ಟ್ ಆಯಾ ಜಾಗೆಗ್ ಅನುಕೂಲ ಆಪಿನ ಕಾನೂನು ಜಾರಿ ಮಲ್ಪೊಡು ಪನೊಂದುಲ್ಲೆರ್ ತೆರಿದಿನಕುಲು. ಆಂಡ ರಾಜಬೂಡು ಬೆಂಗ್ಲೂರುಡು ಕುಲ್ದು ಮಲ್ದಿನ ಕಾನೂನುನು ಮೂಲ ಒಂತೆ ಬದಲ್ ಮಲ್ತ್‌ದ್ ಕೋವಿಡ್ ನಿಯಮೊದ ಲೆಕ್ಕನೇ ದೈವೊಲೆನ ತಂಬಿಲ, ನೇಮ, ಕೋಲ ಇಂಚಿನ ಮಾತ ಆರಾಧನಾ ಪದ್ಧತಿಗ್ ಅವಕಾಶ ಮಲ್ತ್‌ದ್ ಕೊರೊಡಿತ್ತ್ಂಡ್ ಪಂಡ್‌ದ್ ಜನ ಪನೊಂದುಲ್ಲೆರ್.ದೈವಾರಾಧನೆ, ಯಕ್ಷಗಾನ, ನಾಗಾರಾಧನೆ ಇಂಚಿನ ಮಾತ ಆಚರಣೆಲೆನ್ ನಂಬುದು ಏತೋ ಜನ ತುಳುವೆರ್ ಜೀವನ ಕರಿತೊಂದುಲ್ಲೆರ್. ಯಕ್ಷಗಾನ ಕಲಾವಿದೆರ್, ದೈವ ನರ್ತಕೆರ್, ದೈವದ ಚಾಕಿರಿದಕುಲು, ಪೂ, ಫಲವಸ್ತು , ಕೋರಿ, ಮೀನ್‌ದ ಬೇರದಕುಲು ಇಂಚ ಮಾತ ಮಸ್ತ್ ಜನೊಕ್ಕಲು ಜೀವನ ಕರಿತೊಂದುಲ್ಲೆರ್. ಆಂಡ ಅಯಿಕ್ ಕರಿನ ವರ್ಸನೆ ಅಡ್ಡಕಾರ್ ಬೂರ್‍ದಿತ್ತ್ಂಡ್. ಈ ವರ್ಸಾಂಡಲ ಒಂತೆ ಸಂಪಾದನೆ ಮಲ್ತ್‌ದ್ ಮರಿಯಲ ಕರಿನ ಮುಟ್ಟ ಬೊಡೆದಿ ಜೋಕ್ಲೆನೊಟ್ಟುಗು ನೆಮ್ಮದಿಡ್ ಒಂಜಿ ಪುಂಡಿ ನುಪ್ಪು, ಗಂಜಿ ತೆಲಿ ಪರೊಲಿ ಪನ್ಪಿನ ವಿಶ್ವಾಸೊಡು ಇತ್ತೆರ್. ಆಂಡ ಇತ್ತೆದ ರಾತ್ರೆ ಕರ್ಫ್ಯೂ ಅಯಿಕ್ಕ್‌ಲ ಕಲ್ಲ್ ಪಾಡ್ಂಡ್.ನಮ್ಮ ಸರ್ಕಾರ ಬೊಕ್ಕ ಅಧಿಕಾರಿಲು ತುಳುನಾಡ್ದ ಸಂಸ್ಕೃತಿಗ್, ಜನೊಕ್ಲೆನ ಭಾವನೆಗ್ ಬಿಲೆ ಕೊರೊಂದು ಇಜ್ಜೆರಾ ಪಂಡ್‌ದ್ ಸಂಸಯ ಆವೊಂದುಂಡು. ಕಲಾವಿದೆರ್, ದೈವ ನರ್ತಕೆರ್, ದೈವ ಚಾಕಿರಿದಕಲ್ನ ಸಮಸ್ಯೆಲೆನ್ ಅಧಿಕಾರಿಲು ಕೇನೊಂದಿಜ್ಜೆರ್ ಪನ್ಪಿನ ಬೇಜಾರ್‌ಲ ಉಂಡು. ಅವ್ವತ್ತಾಂದೆ ತುಳುವೆರೆನ ಕಷ್ಟೊಗು ಸ್ಪಂದಿಸಾವಂದಿನ ನಮ್ಮನೇ ತುಳುನಾಡ್ದ್ ಜನ ಪ್ರತಿನಿಧಿಕುಲು ಬೋಡಾ, ನಮಕ್ಕ್ ಬೇತೆನೇ ತುಳು ರಾಜ್ಯ ದಾಯೆ ಆವರೆ ಬಲ್ಲಿ ಪಂಡ್‌ದ್ ಕೇನುನು ಹಕ್ಕ್‌ನ್ ಅಕುಲೇ ನೆಂಪು ಪುಟ್ಟಾವೊಂದುಲ್ಲೆರಾ ಪನ್ಪಿನ ಪಾತೆರ ಜನೊಕ್ಲ್ಲೆರ್ದ್ ಕೇಂಡ್‌ದ್ ಬರೊಂದುಂಡು.