ಜೋಕುಲೆ ಚಾವಡಿ | Children’s Corner

ದೈವ ನಡೆ : ಈಶ್ವರಗೋಳಿದ ಸತ್ಯೋಲು

ನಾಲ್ ಗಂಗೆದ ತನು ಮಧ್ಯಡ್ ಬದುಕುಗೊಂಜಿ ಕಥೆ,ಕಥೆಕ್ಕೊಂಜಿ ಪುದರ್ ,ಪುದರ್ ಗೊಂಜಿ ಪುರಪು ಕಟ್ಟೊಂದು ಬಯಿದಿನ ಬೆರ್ಮೆರೆ ಸೃಷ್ಟಿದ ತುಳುನಾಡ್ ದ ಸಂಪುಲ್ಲ ಜಾಗೆ ಮಂಗಳೂರು ಸೀಮೆಡ್ ಬನ್ನಗ ಪಡ್ಡಾಯಿದ ಕಡಲ ಬರೀಟ್ ಸೆರೆಕುಲೆ ಸ್ವರ ಕೇನೊಂದ್ ನೆಲೆಯಾತಿನ ಚಿತ್ರಾಪುರ ಉಲ್ಲಾಲ್ದಿಗ್ ತರೆನ್ ತಗ್ಗಾದ್ ದುಂಬುತ್ತ ಪಜ್ಜೆ ದೀನಗ ಇಡ್ಯಾ ಮಹಾಲಿಂಗೇಶ್ವರ ಗ್ರಾಮ ದೇವೆರಾದ್ ನೆಲೆಯಾದ್ ಪೊಸೊಡಿದ ಊರೊಡೊಂಜಿ ಈಶ್ವರಗೋಳಿದ ಮಣ್ಣ್‌ದ ಪುರಾಪು ಬುಡ್ಡಾನಗ ತೋಜುನ ಮಾಮಲ್ಲ ಸತ್ಯ ಅಲೇರ ಪಂಜುರ್ಲಿ.ಈಶ್ವರ ಗೋಳಿದ ಮಣ್ಣ್ ಪನ್ನಾಗ ಕಲೆತ್ತ ಜಾಗ್ ಇಸತ್ತ ಮಣ್ಣ್ ,ಕಾಲ ಕಪುಲೆ ಚೆನ್ನ ಮಂಗಲೆ ಕೊಡ್ದು ಅಗಪುನ ಜಾಗಂದ್ ಪನ್ಪಾಯಿನ ಪುಗಾರ್ತೆದ ಮಣ್ಣ್‌‌ದ ಅಲೇರ ಪಂಜುರ್ಲಿನ ಪುರಾಪುನು ತೂಪುನಾಂಡ..
ಪೊಸೊಡಿದ ಊರುಡು ಹತ್ವಾರ್‌ಲ ಚಾವಡಿದ ಮಣ್ಣ್ ಡ್ ನೆಲೆಯಾತಿನ ಜುಮಾದಿ , ಜುಮಾದಿಬಂಟ ಬೊಕ್ಕ ಪಂಜುರ್ಲಿನ ನಡೆಟ್ ಮುಗೇರ ಕೂಡುಕಟ್ಟುಗೊಂಜಿ ಸಾಯದ ದೈವವಾದ್ ಕಾಲಡ್ ಪಂಜುರ್ಲಿನ್ ಮೂಜಿ ಕಣ್ಣ ಫಲಟ್ ಹತ್ವಾರ್ ಲ ಚಾವಡಿರ್ದ್ ಪೆರಿಯೆರ್ನ ಬೆರಿ ಪತ್ತೊಂದು ಈಶ್ವರಗೋಳಿದ ಮಣ್ಣ್ ಗ್ ಬತ್ತ್‌ದ್ ನುಗುರು ಪೊಯ್ಯಡ್ ಮುಗುರು ಮಲ್ಲಿಗೆದ ಜಾತಿ ಸಂಪಗೆಡ್ ನೀತಿ ಕೇದಗೆಡ್ ಚರ್ಮುಲ್ಲ ಬಜ್ಜಯಿ-ದಂಡುಲ್ಲ ಬೊಂಡಡ್ ಉದಯ ಬೆಂದಿನ ಜಯವುಲ್ಲ ಬೆರ್ಮೆರೆನ ನಡೆಟ್ ನೆಲೆಯಾಯೆರ್ .

ಅಂಚ ಒರಿ ಉಳ್ಳಾಯನ್ ಭೇಟಿ ಮಲ್ತೊಂದು, ಕಲೊಟ್ಟು ಕುಂಜಲಿಗೆದ ಕಟ್ಟುಡ್ ಪುಟ್ಟಿನ ಮೂವೆರ್ ಮುಗೇರ್ಲೆನ ಧರ್ಮನ್ ದುಂಬು ದೀವೊಂದು, ಪೆರಿಯೆರೆನ ಕಾಲೊಡು ಪೊರ್ತು ಕರಿಯೊಂದು ,ಕಾಲ ಮಗುರೊಂದು ಬನ್ನಗ, ಉಜ್ಜೋಡಿದ ಪುಗಾರ್ತೆದ ಮಣ್ಣುಗ್ ಅಪ್ಪೆ ಮಹಾಕಾಳಿನ ನೇಮ ತೂಯರೆ ಪೋಯಿನ ರಾಜು ಮುಗೇರ ಪನ್ಪಿನಾರ್ ಬೊಕ್ಕ ಖಂಡೇವುದ ಬೊಗ್ರ ಪೂಜಾರ್ಲು ಅಪ್ಪೆನ ಗಂಧ ಪುರ್ಸಾದ ದೆತೊನ್ನಗ ಉಡಲ್ಡೊಂಜಿ ಭಕ್ತಿಡ್ ಅಪ್ಪೆ ಎಂಕ್ಲೆನ ಪೊಸೊಡಿದ ಊರುಡ್ ಇಪ್ಪೊಡು ಪಂದು ಮನ ಬಯಕುನಗ ಅರ್ನ ಬೆರಿ ಪತೊಂದು ಈಶ್ವರಗೋಳಿದ ಮಣ್ಣುಗ್ ಬತ್ತು ಬಲತ ಉಂಗುಷ್ಟ ಧೀದು ಅಲೇರ ಪಂಜುರ್ಲಿ ಬೊಕ್ಕ ಮೂವೆರ್ ಮುಗ್ಗೆರ್ಲೆನ ಅಧಿಕಾರಡ್ ಅಪ್ಪೆಗೊಂಜಿ ನೆಲೆಕೊರ್ಧು ಮಿಥ್ ಮೆಗಿಮ ಲೋಕಡ್ ಅಪ್ಪೆ ಕದಂಬ ವನಟ್ ಎಂಚ ಸಿರಿ ಪೊನ್ನೆದ ಮರಟ್ ಅಜಿಪ ಮರಂಗೆದ ಮುಂಡುಡು ಮುಪ್ಪ ಪುಂಡಿದ ತೊಟ್ಟಿಲ್ ಕಟ್ಟುದ್ ಬಾಲೆ ಮಾನಾವೆರ ಅಂಚೆನೆ ಈಶ್ವರಗೋಳಿದ ಮಣ್ಣುಡು ,ಬಲತ್ತ ಸಿರಿ-ಮಿರೆ ಕೊರ್ದು ನಂಬಿನಕ್ಲೆಗ್ ಮಾಯದಪ್ಪೆ ಆದ್ ಕಾತೊಂದು ಬೈದೆರ್ . ಅಂಚೆನೆ ಚೌಕಾರ ಕಟ್ಟ್‌ದ ಮಂತ್ರ-ತಂತ್ರಗ್ ತಡೆಕೊರ್ದ್ ಉಂತಿನ ಮಂತ್ರ ಗುಳಿಗನ ಶಕ್ತಿನು ದುಂಬು ದೀವೊಂದು ಅಂಚೆನೆ ಸಾರ್ಲ ಪಟ್ಟದ ಕೊರಗ ತನಿಯನ ಪಾಲೆದ ಗೊಂಪಾರು ಕಾಯೆರ್ದ ಕೋಲು ಕೈಟ್ ಪತೊಂದು ನಂಬೊಂದು ಬತ್ತಿನ ಭಕ್ತೆರೆಗು ಗೇನದ ತುಡರ್ ಆದು ಕಾಪುನ ಮಾಮಲ್ಲ ಸತ್ಯ ಈಶ್ವರಗೋಲಿದ ಒಲಿ ಮಡಲ ಕೊಡಿಅಡಿಟು ಕಾಲೊರ್ದು ಕಾಲ ಏಳಿಗೆದ ಸಾದಿನ್ ತೋಜಾದ್, ಆಯ ತತ್ತ್ಂಡಲ ಮಲ್ಲೆತ್ತ್ ,ನ್ಯಾಯ ತಪ್ಪಂದೆ ಕಡೆ ಓಟಡ್ ಉರಿ ಉಷ್ಣದ ಪೊರ್ತುಡು ಧರ್ಮದ ರಾಶಿನ್ ಕೊರ್ದು ,ನಾಲಾಯಿಡ್ ಬೂರಿನ ವಾಕ್ಯೊನು ಮಣ್ಣು ಪತ್ತರೆ ಬುಡಂದೆ ಪಂಡಿ ಪಾತೆರನ್ ಪಲಿಪಾದ್ ಧರ್ಮ ನಲಿಪಾದ್ ಸತ್ಯ ಮೆರೆಪಾದಿನ ಮಾಯಗಾರೆ ಅಲೇರ ಪಂಜುರ್ಲಿ ಈಶ್ವರಗೋಳಿದ ಮಣ್ಣ್ ಡ್ ಪರಪುನಂಚಿನ ಸೊತ್ತುನು ಕಂತ್ ಬುಡ್ಪುನ ಕಾಲೊಡು, ನಂಜಿದ ನೀರ್ ನ್ ಪೊಗ್ಗರೆ ಬುಡಂದಿನ ಸತ್ಯ ಪನ್ಪಾದ್ ಏರಾಯೆ-ವುದಲ್ ಪತ್ತಾಯರೆ ಬತ್ತೆನ, ಪುಂಡುಗೊಂಜಿ ಕುಚ್ಚೆ ದಕ್ಕಿನಾಯನ್..ಅರೆತಿನಾಯನ್ ಪರ್ಪಾದ್, ಸೊರ್ಕಿನಾಯನ್ ಸಿರ್ಕಾದ್ ಏರಿ ಬಾಲ್ ಭಂಡಾರ ಜಾವೊಡಾಂಡ‌ ಪತ್ತೆರನ ಪಂಡಿ ಪಾತೆರನ್ ಪಲಿಪಾದಿನ ಸತ್ಯ‌.ಅಂಚ ಪರಿಯೆರ್ನ ಕಾಲೋಡು ಈಶ್ವರಗೋಳಿದ‌ ಜಾಗದ ವಿಚಾರಡ್ ಅಟ್ಟದ ಬಿತ್ತ್ ಭೂಮಿಗ್ ಬೂರೊಡಾಂಡ ಪಿಲಿಯಾದ್ ತೋಜಿನ ಮಾಯಗಾರೆ ಅಲೆರ ಪಂಜುರ್ಲಿ ಪನ್ಪಾದು.ಒಂಜಿ ಕಾಲೋಡು ಬರ್ಕೆದ ಬಾಮದ ಪೂಜಾರ್ಲು ಅಲೆರಾ ಪಂಜುರ್ಲಿಗ್ ಎಣ್ಣೆ ಬೂಳ್ಯ ಕೊರರೆ ಲೆಪ್ಪುಲೆ ಪನ್ನಗ ಕೋಲ ಕಟ್ಟುನಾರೆಗ್ ದೈವ ವಸಯ ಆದ್ ರಾಜ್ಯದ ಕೊಡಿಯಡಿಟ್ ಮಲಕ ಪಾಡೊಂದು ಬರೊಂದು ಇತ್ತಿನ ಕಾಲ ಇತುಂಡ್ಗೆ.ಅಂಚ ಈಶ್ವರಗೋಳಿದ ಮಣ್ಣುಡು ಪರಿಯೆರ್ನ ಕಾಲೋರ್ದಿಂಚಿ ಸಂಪಿಗೆ ದುಗ್ಗ ನಲಿಕೆ ಅಯಿರ್ದ್ ಬೊಕ್ಕ ಮುಟ್ಟಿಕಲ್ಲ್ ಲೋಕು ಬಂಗೇರ ಮೇರ್ ಈಶ್ವರಗೋಳಿದ ದೈವೊಲೆನ ಚಾಕರಿ ಮಲ್ತ್, ಇತ್ತೆ ಆರ್ನ ಜೋಕುಲು ಅಜಾಲ್ ಪದ್ಧತಿದ ಕ್ರಮೊನು ಬಾರಿ ಪೊರ್ಲುಡು ದುಂಬತ್ತ ಕೊನವೊಂದು ತುಳುನಾಡುಗು ಉದರ್ಮೆ ಆತೆರ್ ಪೆರಿಯಾಕುಲು ಕಾಲೋಡು ಈಶ್ವರಗೋಳಿಡು ಸತ್ಯೊಲೆನ್ ಕಾಟ್ ಕಲ್ಲ್ ಡ್ ನಂಬುಂಡಲ ಎರ್ತೆಡ್ ಇತ್ತಿನವೆನ್ ಜಪ್ಪೆಲ್ ಡ್ ಉಂತಾದ್,ಬರ್ಪಿನಾಯಗ್-ಪೋಪಿನಾಯಗ್ ಉಡಲ ಭಕ್ತಿಡ್ ಬರ್ಪಿನಾಯಗು ಗೇನ ಕೊರ್ದು,ಮುಂಡಗೊಂಜಿ ಗಂಧ ಪಾರ್ದ್ , ಬಡವುದ ಬೆಪ್ಪುದ ಬಂಜಿಗು ನುಪ್ಪು ಕೊರ್ದು ಬಾಜೆಲ್ದ ಆಜಿದಿ ದೊಂಡೆಗು ನೀರು ಕೊರ್ದು ಅರ್ಲುನ ತುಡರ್ಗು ಮಣ್ಣ ತಿಬಿಲಗ್ ಎಣ್ಣೆನು ಮೈತೊಂದು ಗಿಂಡೆದ ನೀರ್ ಗ್ ಅನ್ನ‌, ನೈಕ್ ತತ್ತರ ಬರಂದಿಲಕ ಭಕ್ತಿ ಪನ್ಪಿನವೆನ್ ಈಶ್ವರಗೋಳಿದ ಮಣ್ಣ್ ಡ್ ಪುಟ್ಟಾದ್ ಸತ್ಯನ್ ಒರಿಪಾದ್,ಧರ್ಮದ ಕಲಸೋನು ಕೊರ್ದು, ಈ ಮಣ್ಣುಡ್ ದೀದು ತಂತ್ರ-ಮಂತ್ರನ್ ತಟ್ಟ್ ಪಾರಾದ್, ಮರಿ ತುಚ್ಚಿಂಡಲ ಈಶ್ವರಗೋಳಿದ ಮಣ್ಣುನು ಪೂಜೊಂದು ಪೋವಡ್ ಅವು ಮರ್ದಾದ್ ಪಲಿಪಡ್ ಪನ್ಪಾದ್ ಪೆರಿಯೆರೆನ ಕಾಲೊಡು ಈಶ್ವರಗೋಳಿದ ಮಣ್ಣ್ಡ್ ನೆಲೆಯಾತಿನ ಅಡ್ಡ ಪಲಾಯಿಡ್ ಮಾಜುನ ಮಾಮಲ್ಲ ಮಾಯಾಗಾರೆ ಅಲೆರ ಪಂಜುರ್ಲಿ ಧರ್ಮದ ಮಣ್ಣುಡ್ ಸತ್ಯೊದ ನಡೆ ಭಕ್ತಿದ ನಿನೆ ಇಪ್ಪುನಗ ತುಳುನಾಡ ತುಡರ್ ಇಂಚೆನೆ ಅರ್ಲೊಂದ್ ಇಪ್ಪಡು.ಪತ್ತ್ ಗಲ್ಲೆಡ್ ಸಾರ ಇರೆ ಬುಡಿನ ಪರ ಮರತ ಮುದೆಲ್ ಇತ್ತುಂಡ ಪೊಸ ಬೂರು ತರೆ ದೆರ್ತ್ ಪಸೆರುನ ಈ ಕಾಲಡ್ ಎನ್ನ ಪೆರಿಯರೆಗ್ ಅಡ್ಡ ಬೂರುವೆ

– ಬರವು ನಿತೇಶ್ ಕುಳಾಯಿ