ಸುಬ್ರಹ್ಮಣ್ಯ: ದೇವೆರ್ನ ದರ್ಶನದ ಪೊರ್ತುಡು ಕಲ್ವೆರ್ ಪೊಂಜೊವ್ನ 1.4 ಲಕ್ಷ ಬಿಲೆತ್ತ ಬಂಗಾರ್ದ ಕರಿಮಣಿ ಸರ ಕಂಡಿನ ಘಟನೆ ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನಡ್ ನಡತ್ಂಡ್. ಕಡಬ ತಾಲೂಕ್ದ ಇಚ್ಲಂಪಾಡಿ ಬರೆಮೇಲು ನಿವಾಸಿ ಭಾರತಿ ಎಮ್ ಡಿ ಅಕ್ಟೋಬರ್ 22 ಮಧ್ಯಾಹ್ನ ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನಗ್ ಭೇಟಿ ಕೊರ್ದ್ ಇತ್ತೆರ್. ದೇವೆರೆ ದರ್ಶನ ಮಲ್ತ್ ಆರತಿ ದೆತೊನಗ ಕರಿಮಣಿ ಸರ ಕಾಣೆ ಆತ್ಂಡ್. ನೆತ್ತ ಬಗೆಟ್ ಸುಬ್ರಹ್ಮಣ್ಯ ದೇವಸ್ಥಾನಡ್ ಕೇಸ್ ದಾಖಲಾತ್ಂಡ್.
ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ ಬಿ.ಸಿ.ಟ್ರಸ್ಟ್, ಜನಜಾಗೃತಿ ವೇದಿಕೆದ ಮುತಾಲಿಕೆಡ್ ಅಜ್ಜಾವರಡ್ ನಡಪುನ 1753 ನೇ ಮದ್ಯವರ್ಜನ ಶಿಬಿರದ ಲೆಪ್ಪೋಲೆ ಬುಡುಗಡೆನ್ ಧರ್ಮಸ್ಥಳಡ್ ಡಾ.ಡಿ.ವೀರೇಂದ್ರ ಹೆಗ್ಗಡೆರ್ ಇನಿ ಬಿಡುಗಡೆ ಮಲ್ತೆರ್.
ಸುಳ್ಯಡ್ ನಡತ್ತಿನ ಗಾಂಧಿಸ್ಮೃತಿ ಬೊಕ್ಕ ಜನಜಾಗೃತಿ ಸಮಾವೇಶದ ಯಶಸ್ವಿಯಾದ್ ನಿರ್ವಹಣೆ ಮಲ್ತಿನ ಜನಜಾಗೃತಿ ವೇದಿಕೆದ ಅಧ್ಯಕ್ಷರೆನ್ ಬೊಕ್ಕ ಪದಾಧಿಕಾರಿಲೆಗ್ ಹೆಗ್ಗಡೆರ್ ಅಭಿನಂದನೆ ಸಲ್ಲಿಸಾಯೆರ್.
ಈ ಪೊರ್ತುಡು ಅಖಿಲ ಕರ್ನಾಟಕ ಜನಜಾಗೃತಿ ನಿಕಟಪೂರ್ವ ಜಿಲ್ಲಾಧ್ಯಕ್ಷೆರ್ ಎನ್. ಎ. ರಾಮಚಂದ್ರ, ತಾಲೂಕು ಅಧ್ಯಕ್ಷೆರ್ ಲೋಕನಾಥ್ ಅಮೆಚೂರು, ತಾಲೂಕು ನಿಕಟಪೂರ್ವಾಧ್ಯಕ್ಷೆರ್ ಮಹೇಶ್ ಕುಮಾರ್ ಮೇನಾಲ, ಪ್ರಗತಿಬಂಧು ಸ್ವಸಹಾಯ ಸಂಘದ ತಾಲೂಕು ಅಧ್ಯಕ್ಷೆರ್ ಸುರೇಶ್ ಕಣೆಮರಡ್ಕ, ಪೂರ್ವಾಧ್ಯಕ್ಷೆರ್ ಬೂಡು ರಾಧಾಕೃಷ್ಣ ರೈ, ಮದ್ಯವರ್ಜನ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಶಿವಪ್ರಕಾಶ್ ಅಡ್ಪಂಗಾಯ, ತಾಲೂಕು ಯೋಜನಾಧಿಕಾರಿ ನಾಗೇಶ್ ಪಿ, ವಲಯ ಮೇಲ್ವಿಚಾರಕಿ ವಿಶಾಲ ಕೆ, ಮದ್ಯವರ್ಜನ ಸಮಿತಿದ ಉಪಾಧ್ಯಕ್ಷೆರ್ ಶಶ್ಮಿ ಭಟ್ ಇತ್ತೆರ್.
ಒಡಿಪು: ಒಡಿಪು ತಾಲೂಕ್ದ ಚೆರ್ಕಾಡಿ ಗ್ರಾಮದ ಶ್ರೀ ದುರ್ಗಾಪರಮೇಶ್ವರಿ ಭಜನಾ ಮಂಡಳಿ ಕನ್ನಾರು ನೆತ್ತ ಸ್ಥಾಪಕೆರಾಯಿನ, ಸುಮಾರ್ 50 ವರ್ಷರ್ದ್ ಭಜನಾ ಸೇವೆ ಮಲ್ತೊಂದು ಬರೊಂದು ಇಪ್ಪುನ, ಬೊಕ್ಕ ಒಡಿಪು ತಾಲೂಕು ಭಜನಾ ಪರಿಷತ್ ನೆತ್ತ ಅಧ್ಯಕ್ಷೆರಾದ್ ಬೇತೆ ಬೇತೆ ಕಡೆಟ್ ಭಜನಾ ಸೇವೆನ್ ಮಲ್ತೊಂದು ಇಪ್ಪುನ ‘ಬಾಲಕೃಷ್ಣ ಎಮ್ ಶೆಟ್ಟಿ ನೂಜಿನ ಬೈಲು’ ಮೇರೆಗ್ ಒಡಿಪು ತಾಲೂಕ್ದ ಭಜನಾ ಸಾಧಕ ಪ್ರಶಸ್ತಿ ಪ್ರದಾನ ಮಲ್ತೆರ್.
ಶ್ರೀ ಕ್ಷೇತ್ರ ಧರ್ಮಸ್ಥಳಡ್ ನಡತ್ತಿನ 25 ನೇ ವರ್ಷದ ಭಜನಾ ಕಮ್ಮಟಡ್ ಡಾ|. ಡಿ. ವೀರೇಂದ್ರ ಹೆಗ್ಗಡೆರ್ ಬೊಕ್ಕ ಮಾಣಿಲ ಕ್ಷೇತ್ರದ ಮೋಹನದಾಸ ಸ್ವಾಮೀಜಿ ಒಡಿಪು ತಾಲೂಕು ಭಜನಾ ಸಾಧಕ ಪ್ರಶಸ್ತಿನ್ ಕೊರ್ದ್ ಮಾನಾದಿಗೆ ಮಲ್ತೆರ್.
ಬೆಳ್ತಂಗಡಿ: ದೇಯಿ ಬೈದೆತಿ ಕೋಟಿ ಚೆನ್ನಯ ಮೂಲಸ್ಥಾನ ಶ್ರೀ ಕ್ಷೇತ್ರ ಗೆಜ್ಜೆಗಿರಿ ನೆತ್ತ ಕ್ಷೇತ್ರಾಡಳಿತ ಸಮಿತಿದ ಮಹಾಸಭೆ ಗೆಜ್ಜೆಗಿರಿಟ್ ನಡತ್ಂಡ್. ಮಹಾ ಸಭೆತ ಗುರ್ಕಾರ್ಮೆನ್ ವಹಿಸ್ದ್ ಪಾತೆರ್ನ ಕ್ಷೇತ್ರಾಡಳಿತ ಸಮಿತಿದ ಗುರ್ಕಾರ್ಲು ಪೀತಾಂಬರ ಹೇರಾಜೆ ದೇಶ ವಿದೇಶಡ್ ಇಪ್ಪುನ ದೇಯಿ ಬೈದೆತಿ ಕೋಟಿ ಚೆನ್ನಯ ಮೂಲಸ್ಥಾನದ ಭಕ್ತಾದಿಲು ಸೇರ್ದ್ ನಿರ್ಮಾಣ ಮಲ್ತಿನ ಶ್ರೀ ಕ್ಷೇತ್ರ ಇನಿ ವಿಶ್ವಾದ್ಯಂತ ಭಕ್ತರೆನ್ ಆಕರ್ಷಣೆ ಮಲ್ಪುನ ಪುಣ್ಯ ಕ್ಷೇತ್ರ ಆತ್ಂಡ್.
ಶ್ರೀ ಕ್ಷೇತ್ರನ್ ನನಾತ್ ಅಭಿವೃದ್ಧಿ ಮಲ್ಪುನ ಬಗ್ಗೆ ಸಭೆಟ್ ತೆರಿಪಾಯೆರ್. ಕ್ಷೇತ್ರಾಡಳಿತ ಸಮಿತಿದ ಪ್ರಧಾನ ಕಾರ್ಯದರ್ಶಿ ಉಲ್ಲಾಸ್ ಕೋಟ್ಯಾನ್ ವಾರ್ಷಿಕ ವರದಿನ್ ಮಂಡನೆ ಮಲ್ತೆರ್. ಕೋಶಾಧಿಕಾರಿ ದೀಪಕ್ ಕೋಟ್ಯಾನ್ ಲೆಕ್ಕಪತ್ರ ಮಂಡನೆ ಮಲ್ತೆರ್. ಗೌರವಾಧ್ಯಕ್ಷೆರ್ ರಾಜಶೇಖರ ಕೋಟ್ಯಾನ್ ಶ್ರೀ ಕ್ಷೇತ್ರಗ್ ಬರ್ಪುನ ಯಾತ್ರಿಲೆಗ್ ಮೂಲಭೂತ ಸೌಕರ್ಯನ್ ಅಭಿವೃದ್ಧಿ ಮಲ್ಪುನ ಬಗ್ಗೆ ಚರ್ಚೆ ಮಲ್ತೆರ್.
ಆಡಳಿತ ಸಮಿತಿದ ಕಾರ್ಯಕಾರಿ ಸದಸ್ಯೆರ್ ಗೆಜ್ಜೆಗಿರಿ ಮೇಳದ ಸಂಚಾಲಕೆರ್ ನವೀನ್ ಸುವರ್ಣ ಸಜಿಪ ಶ್ರೀ ಕ್ಷೇತ್ರದ ಗೆಜ್ಜೆಗಿರಿ ಮೇಳ ಯಶಸ್ವಿ ದಾಖಲೆ ಪ್ರದರ್ಶನ ಆಯಿನ ಬಗ್ಗೆ ಮೇಳದ ವರದಿನ್ ಒಪ್ಪಿಸಾಯೆರ್. ಉಪಾಧ್ಯಕ್ಷೆರ್ ರವಿಪೂಜಾರಿ ಚಿಲಿಂಬಿ ಕ್ಷೇತ್ರಾಡಳಿತ ಸಮಿತಿ ಆರ್ಯುವೇದ, ಗಿಡಮೂಲಿಕೆದ ಉತ್ಪನ್ನದ ತಯಾರಿ, ಮಾರಾಟ, ಬೊಕ್ಕ ಸ್ವಾವಲಂಬಿ ಉದ್ಯೋಗಗ್ ಪ್ರೋತ್ಸಾಹ ಕೊರ್ಪುನ ಬಗ್ಗೆ ಕಾರ್ಯ ಸೂಚಿನ್ ತೆರಿಪಾಯೆರ್.
ಈ ಸಭೆಟ್ ಚಿತ್ತರಂಜನ್ ಕಂಕನಾಡಿ, ಮುಂಬೈ ಬಿಲ್ಲವ ಅಸೋಸಿಯೇಶನ್ ಅಧ್ಯಕ್ಷೆರ್ ಹರೀಶ್ ಜಿ ಅಮೀನ್, ಕ್ಷೇತ್ರದ ಗೌರವಾಧ್ಯಕ್ಷೆರ್ ಜಯಂತ ನಡುಬೈಲ್ ಇತ್ತೆರ್. ಮುಂಬೈ ಭಾರತ್ ಬ್ಯಾಂಕ್ ನಿರ್ದೇಶಕೆರಾದ್ ಆಯ್ಕೆಯಾಯಿನ ಕ್ಷೇತ್ರಾಡಳಿತ ಸಮಿತಿದ ಉಪಾಧ್ಯಕ್ಷೆರ್ ನಿತ್ಯಾನಂದ ಕೋಟ್ಯಾನ್, ದಯಾನಂದ ಪೂಜಾರಿ ಮೊಕ್ಲೆಗ್ ಈ ಪೊರ್ತುಡ್ ಮಾನಾದಿಗೆ ಮಲ್ತೆರ್.
ಪುತ್ತೂರು: ಸಂಪುಟ ನರಸಿಂಹ ಸ್ವಾಮೀ ಶ್ರೀ ಸುಬ್ರಹ್ಮಣ್ಯ ಮಠಡ್ ದಶಮಿದ ಲೆಕ್ಕಡ್ ದೇವೆರೆಗ್ ವಿಶೇಷ ಪೂಜೆ, ಮಹಾಭಿಷೇಕ ಅ 24 ದಾನಿ ನಡತ್ಂಡ್. ಮಠದ ಡಾ | ವಿದ್ಯಾಪ್ರಸನ್ನ ತೀರ್ಥ ಶ್ರೀಪಾದರಿಂದ ವಿಜಯ ದಶಮಿ ಪ್ರಯುಕ್ತ ನರಸಿಂಹ ದೇವೆರೆಗ್ ಮಹಾಭಿಷೇಕ ಮಲ್ತೆರ್. ಮಧ್ಯಾಹ್ನ ಮಹಾಪೂಜೆ, ನಾವನ್ನ ಸಮರ್ಪಣೆ ಬೊಕ್ಕ ಪಲ್ಲ ಪೂಜೆ ನಡತ್ಂಡ್.
ಪುತ್ತೂರು: ವಿಜಯದಶಮಿದ ಪ್ರಯುಕ್ತ ರಾಷ್ಟ್ರೀಯ ಸ್ವಯಂ ಸೇವಕ ಸಂಘರ್ದ್ ಪುತ್ತೂರು ಪೇಂಟೆರ್ದ್ ಗಣವೇಷಧಾರಿ ಸ್ವಯಂಸೇವಕರೆರ್ದ್ ಪಥ ಸಂಚಲನ ನಡತ್ಂಡ್. ಈ ಪೊರ್ತುಡ್ ಮಸ್ತ್ ಆರ್.ಎಸ್.ಎಸ್ ಸ್ವಯಂಸೇವಕೆರ್ ಪಥಸಂಚಲನಡ್ ಪಾಲ್ ಪಡೆಯೆರ್.
ಮುಂಡಾಲ ಯುವ ವೇದಿಕೆ (ರಿ.) ಪಡ್ಡೆದ್ರ ಮೊಕಲೆನ ಕೂಟೊಡು ಉಂದೇ ಬರ್ಪಿ ಅಕ್ಟೋಬರ್ 29 ದಾನಿ ಐತಾರ ಮದ್ಯಾಹ್ನ 1 ಗಂಟೆರ್ದ್ “ಪದಿನಾಜಿ ಕಟ್ಲೆ” ಪನ್ಪಿನ ದೈವೊಲೆನ ಪಜ್ಜೆದ ಪೊಲಬು ಪಸೆರ್ನ ತುಳಿಪು ಕೂಟ ಪಡ್ಡೆದ್ರದ ಸುಜಾತಾ ಅಡಿಟೋರಿಯಂಡ್ ನಡಪರೆ ಉಂಡು.
ಈ ಲೇಸ್ ಡ್ ತುಳು ಜಾನಪದ ವಿದ್ವಾಂಸೆರ್ ಕೆ.ಕೆ ಪೇಜಾವರ ಮೇರ್ ಗೇನದ ನುಡಿ ಕೊರಿಯರೆ ಉಲ್ಲೆರ್. ಅಂಚೆನೆ ಕಟ್ಟ್ ಕಟ್ಲೆದ ಮದಿಪುನು ಶ್ರೀ ರತ್ನಾಕರ ಮಧ್ಯಸ್ಥೆರ್ ಕೊರಿಯರೆ ಉಲ್ಲೆರ್. ದೈವೊಲೆನ ಬಗೆಟ್ ಮಾಯಿತಿ ಬೊಕ್ಕ ವಿಚಾರ ವಿಮರ್ಶೆ ಈ ಲೇಸ್ ಡ್ ನಡಪುಂಡು.
ಬೆಂಗಳೂರು: ನ. 25 ಬೊಕ್ಕ 26 ದಾನಿ ಬೆಂಗಳೂರ್ದ ಕಂಬುಲ ನಡಪೆರೆ ಉಂಡು. ಕಂಬುಲಡ್ 125 ಜೋಡಿರ್ದ್ 130 ಜೋಡಿ ಎರುಕುಲ್ ಪಾಲ್ ಪಡೆಯೆರೆ ಉಲ್ಲೆರ್.
ಬೆಂಗಳೂರು ಕಂಬುಲ ಕರೆ ಸುಮಾರ್ 151 ಮೀ. ಉದ್ದ ಇತ್ತ್ದ್, ಬಾರಿ ಮಲ್ಲ ಕಂಬುಲ ಕರೆ ಉಂದು ಆತ್ಂಡ್. ಇಡೆ ಮುಟ್ಟ ಕಂಬುಲ ನಡತೊಂದು ಇತ್ತಿನ ಆತ್ ಟ್ರ್ಯಾಕ್ದ ಪೈಕಿ ಪುತ್ತೂರು ಕಂಬುಲದ ಟ್ರ್ಯಾಕ್ 149 ಮೀಟರ್ ಉದ್ದ ಉಂಡು, ಬಾರಿ ಮಲ್ಲ ಟ್ರ್ಯಾಕ್ ಆದ್ ಇತ್ತ್ಂಡ್. ಆಂಡ ಇತ್ತೆ ಬೆಂಗಳೂರು ಕಂಬುಲ ಕರೆ 151 ಮೀ. ಉದ್ದ ಇಪ್ಪುನೆದಾತ್ರ ದಾಖಲೆ ಬರೆಯೆರೆ ಪಿದರ್ರ್ದ್ಂಡ್.
ಕಾರ್ಲ: ನಮ ಪಾತೆರುನ ತುಳು ಭಾಷೆ ಬೇತೆ ಬೇತೆ ಆಂಡಲ ತುಳು ಭಾಷೆದ ಲಿಪಿ ಒಂಜೆ ಅವೆತ ಬರವಣಿಗೆ ಒಂಜೆ, ಜೈ ತುಳುನಾಡ್ ಸಂಘಟನೆದ ಉಚಿತ ಕಲಿಕೆದ ಉದ್ದೇಶ ತುಳು ಭಾಷೆದ ಒಟ್ಟಿಗೆ ತುಳು ಲಿಪಿನ್ ಬುಲೆಪಾವುನ. ಈ ಅವಕಾಶನ್ ಮಾತೆರ್ಲ ಗಲಸೊಂದು, ತುಳು ಅಭ್ಯಾಸ ಎಡ್ಡೆ ಕಾರ್ಯ ಪಂದ್ ಸಿನಿಮಾ ನಟ, ರಂಗಭೂಮಿ ಕಲಾವಿದೆರ್ ಪ್ರಸನ್ನ ಶೆಟ್ಟಿ ಬೈಲೂರು ಪಂಡೆರ್.
ಮಂಜುನಾಥ ಪೈ ಸ್ಮಾರಕ ಸರಕಾರಿ ಪ್ರಥಮ ದರ್ಜೆ ಕಾಲೇಜು ಕಾರ್ಲ ಐ.ಕ್ಯೂ.ಎ. ಸಿ, ಲಲಿತಕಲಾ ಸಂಘ ಬೊಕ್ಕ ಸಾಹಿತ್ಯ ಸಂಘ ಮೊಕ್ಲೆನ ಒಟ್ಟು ಸೇರಿಗೆಡ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಆಶ್ರಯಡ್ ಜೈ ತುಲುನಾಡ್ ( ರಿ.) ಸಹಯೋಗಡ್ “ಬಲೇ ತುಲು ಲಿಪಿ ಕಲ್ಪುಗ” ಕಾರ್ಯಾಗಾರ ಉದಿಪನ ಮಲ್ತ್ ಪಾತೆರಿಯೆರ್. “ಬಲೆ ತುಳು ಲಿಪಿ ಕಲ್ಪುಗ ” ಪನ್ಪುನ ಶಿಕ್ಷಣ ಕ್ರಾಂತಿ, ತುಳು ಭಾಷೆಡ್ ಬದ್ಕ್ ಕಟ್ಟುನ ಕೆಲಸ ಆವೊಡು, ರಾಜ್ಯದ 2ನೇ ಆಡಳಿತ ಭಾಷೆ ಆವೋಡು, ನಮ ಮಾತ ಭಾಷೆನ್ ಗೌರವ ಮಲ್ಪುವ, ತುಳುನಾಡ್ದ ಸಂದಿ, ಪಾರ್ದನದ ಮಹತ್ವವನ್ ನಮ ತುಳುನಾಡ್ದಕುಲ್ ತೆರಿಯೊನೊಡು ಪಂದ್ ಜೈ ತುಳುನಾಡ್ ಸಂಘಟನೆದ ಗುರ್ಕಾರ್ಲು ವಿಶು. ಶ್ರೀಕೇರ ಪಂಡೆರ್.
ಯುನೆಸ್ಕೋ 2010 ಟ್ 2050ದ ಸಮಯಗ್ ನಾಶ ಆಪುನ ಮಾತ ಭಾಷೆದ ಪಟ್ಟಿನ್ ಬಿಡುಗಡೆ ಮಲ್ತ್ಂಡ್, ಆ ಪಟ್ಟಿಡ್ ತುಳುಭಾಷೆ ಕೂಡ ಉಂಡು ಪನ್ಪುನ ನಮಕ್ಕ್ ಬೇಜಾರದ ವಿಷಯ, ತುಳುಭಾಷೆನ್ ಬುಲೆಪಾವುನ ನಿಟ್ಟ್ಡ್ ಜೈ ತುಳುನಾಡ್ ಸಂಘಟನೆ ಪುಟ್ಟುದುಂಡ್, ಜೈ ತುಳುನಾಡ್ (ರಿ) ಬುಲೆದ್ ಬತ್ತಿನ ರೀತಿ ಜೈ ತುಳುನಾಡ್ ಸಂಘಟನೆದ ಕಾರ್ಯವೈಖರಿದ ಬಗೆಕ್ ಜೈ ತುಳುನಾಡ್ ಸಂಘಟನೆದ ಸಂಘಟನಾ ಕಾರ್ಯದರ್ಶಿ ಸುಮಂತ್ ಹೆಬ್ರಿ ಮಾಹಿತಿ ಕೊರಿಯೆರ್. ಮಂಜುನಾಥ ಪೈ ಸ್ಮಾರಕ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜು ಕಾರ್ಲದ ಪ್ರಾಂಶುಪಾಲೆರ್ ಡಾ. ಕಿರಣ್ ಎಂ ಗುರ್ಕಾರ್ಮೆನ್ ವಹಿಸ್ದ್ ಇತ್ತೆರ್.ಮಂಜುನಾಥ ಪೈ ಸ್ಮಾರಕ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜು ಕಾರ್ಲ ಸ್ನಾತಕೋತ್ತರ ಪದವಿ ವಿಭಾಗದ ಸಂಚಾಲಕೆರ್ ಡಾ. ವಿದ್ಯಾಧರ್ ಹೆಗ್ಡೆ ತುಳು ಲಿಪಿ ಕಲಿಕೆನ್ ಮಾತ ಕಲ್ಪಾರ್ಥಿಲು ಉಪಯೋಗ ಮಲ್ತೊನೊಡು. ತುಳು ಭಾಷೆಗ್ ನಮ ಗೌರವ ಕೊರೊಡ್ ಪಂದ್ ಪಂಡೆರ್.
ಮಂಜುನಾಥ ಪೈ ಸ್ಮಾರಕ ಸರಕಾರಿ ಪ್ರಥಮ ದರ್ಜೆ ಕಾಲೇಜು ಕಾರ್ಲ ಲಲಿತಕಲಾ ಸಂಘದ ಸಂಚಾಲಕೆರ್ ಪ್ರೊ. ಮೈತ್ರಿ ಬಿ ಎದ್ಕೊಂದ್, ಜೈ ತುಲುನಾಡ್(ರಿ.)ನ ಕು. ಅಕ್ಷತಾ ಪ್ರಸ್ತವನೆ ಮಲ್ತೆರ್, ಸಾಹಿತ್ಯ ಸಂಘದ ಸಂಚಾಲಕೆರ್ ಡಾ. ಸುದರ್ಶನ್ ಸೊಲ್ಮೆ ಸಂದಾಯ ಮಲ್ತ್ ಅಜಿತ್ ಸಾಲ್ಯಾನ್ ಲೇಸ್ದ ಸುಧಾರಿಕೆ ಮಲ್ತೆರ್.
ಈ ಲೇಸ್ಡ್ ಕಾಲೇಜ್ದ ಐ.ಕ್ಯೂ.ಎ.ಸಿ ಸಂಚಾಲಕಿ ಪ್ರೊ. ಸುಷ್ಮಾ ರಾವ್ ಕೆ., ಪ್ರಾಧ್ಯಾಪಕೆರ್ ಡಾ. ಗಣೇಶ್ ಎಸ್., ಡಾ. ಜಯಭಾರತಿ, ಡಾ.ಅವಿನಾಶ್, ಪ್ರೊ. ಪ್ರಸನ್ನ ಕುಮಾರ್ ಬೊಕ್ಕ ಶ್ರೀ ರಾಮ ಮೂರ್ತಿ, ತುಳುನಾಡ್ ಸಂಘಟನೆದ ಸಹ ಸಂಘಟನಾ ಕಾರ್ಯದರ್ಶಿ ಶೇಖರ್ ಶ್ರೀಗಂಗೆ, ತುಳು ಲಿಪಿ ಶಿಕ್ಷಕೆರ್ ಪ್ರಶಾಂತ್ ಪೂಜಾರಿ ನಂದಳಿಕೆ ಬೊಕ್ಕ ದೀಕ್ಷಾ, ಪವಿತ್ರ ಕೋಟ್ಯಾನ್, ಜೈ ತುಳುನಾಡ್ ಸಂಘಟನೆದ ಪದಾಧಿಕಾರಿಲು, ಕಾಲೇಜ್ದ ಪರ ಕಲ್ಪಾರ್ಥಿ ಕಿರಣ್ ತುಳುವೆ ಇತ್ತೆರ್.
ಕುಡ್ಲ: 10 ದಿನ ನಡತಿನ ಕುಡ್ಲ ದಸರಾ ಅ.24 ಅಂಗಾರೆದಾನಿ ಕುದ್ರೋಳಿ ದೇವಲ್ಯರ್ದ್ ಮೆರವಣಿಗೆ ಮುಖೇನ ಪಿದಾಡ್ ದ್ ಇನಿ ಕಾಂಡೆ ಮುಗಿತಲ ಆಂಡ್.
ನವದುರ್ಗೆಯೆರೆನ ಮೆರವಣಿಗೆದ ಬೊಕ್ಕ ಗಣಪತಿ ಬೊಕ್ಕ ಶಾರದೆಗ್ ಪೂಜೆ ಸಂದಾಯೆರ್.
ನವದುರ್ಗೆಯೆರ್, ಗಣಪತಿ, ಆದಿಶಕ್ತಿ, ಶಾರದಾದೇವಿ, ಬ್ರಹ್ಮಶ್ರೀ ನಾರಾಯಣ ಗುರುಲೆನ ಮೂರ್ತಿ, ಮಣ್ಣಗುಡ್ಡೆ, ನಾರಾಯಣಗುರು ವೃತ್ತ, ಲಾಲ್ಬಾಗ್, ಬಲ್ಲಾಳ್ಬಾಗ್, ಪಿವಿಎಸ್ ವೃತ್ತ, ಕೆಎಸ್ ರಾವ್ ರಸ್ತೆ, ಹಂಪನಕಟ್ಟೆ, ಗಣಪತಿ ಹೈಸ್ಕೂಲ್ ರಸ್ತೆ, ಕಾರ್ ಸ್ಟ್ರೀಟ್ ಮುಖೇನ ಮೆರವಣಿಗೆ ಪೊಂಡ್.
ದಸರಾ ಉಚ್ಚಯದ ಶೋಭಾಯಾತ್ರೆಡ್ 70 ರ್ದ್ ಎಚ್ಚ ಟ್ಯಾಬ್ಲೊ, ಏಸಭೂಷಣಲು ಇತ್ತ್ಂಡ್.
