ಒಡಿಪು: ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಮುತಾಲಿಕೆಡ್ ಅ.28 ಬೊಕ್ಕ 29 ಕ್ಕ್ ವಿಶ್ವ ಬಂಟರ ಸಮ್ಮೇಳನ-2023 ಕ್ರೀಡಾ ಸಂಗಮ ಬೊಕ್ಕ ಸಾಂಸ್ಕೃತಿಕ ಸಂಭ್ರಮ ಒಡಿಪುಡ್ ನಡಪರೆ ಉಂಡು ಪಂದ್ ಒಕ್ಕೂಟದ ಗುರ್ಕಾರೆ ಐಕಳ ಹರೀಶ್ ಶೆಟ್ಟಿ ಮೇರ್ ಪತ್ರಿಕಾಗೋಷ್ಠಿಡ್ ಪಂಡೆರ್.
ಅ.28 ಕ್ಕ್ ಬೊಲ್ಪುಗು ಪೇಂಟೆದ ಬೋರ್ಡ್ ಹೈಸ್ಕೂಲ್ ಡ್ ಮೆರವಣಿಗೆಗ್ ಚಾಲನೆ ತಿಕ್ಕುಂಡು. ಬೊಕ್ಕ ಕೆಎಂ ಮಾರ್ಗದ ಮುಖೇನ ಡಯಾನ ವೃತ್ತ, ಜೋಡುಕಟ್ಟೆ, ಭುಜಂಗ ಪಾರ್ಕ್ ಮಾರ್ಗವಾದ್ ಅಜ್ಜರಕಾಡು ಮೈದಾನಗ್ ಬರ್ಪುಂಡು.
62 ರ್ದ್ ಎಚ್ಚ ಬಂಟರ ಸಂಘಲೆನ 7 ಸಾರರ್ದ್ ಎಚ್ಚ ಜನ ಮೆರವಣಿಗೆಡ್ ಪಾಲ್ ಪಡೆಯೆರೆ ಉಲ್ಲೆರ್. ಬೊಕ್ಕ ಒಡಿಪು ಅಜ್ಜರಕಾಡು ಮೈದಾನಡ್ ಮಾತ ಬಂಟರ ಕೂಟಲೆರ್ದ್ ಆಕರ್ಷಕ ಪಥ ಸಂಚಲನ ನಡಪರೆ ಉಂಡು. ಮುಖ್ಯಮಂತ್ರಿ ಸಿದ್ದರಾಮಯ್ಯ ಮೇರ್ ಅಜ್ಜರಕಾಡು ಕ್ರೀಡಾಂಗಣಡ್ ನಡಪುನ ವಿಶ್ವ ಬಂಟರ ಸಮ್ಮೇಳನ-ಕ್ರೀಡೋತ್ಸವನ್ ಉದಿಪನ ಮಲ್ಪುವೆರ್.
ಬ್ಯಾಡ್ಮಿಂಟನ್ ಏಷ್ಯನ್ ಗೇಮ್ಸ್ ಗೆಂದಿನ ಚಿರಾಗ್ ಶೆಟ್ಟಿ, ಅಂಡರ್ 19 ವರ್ಲ್ಡ್ ಜೂನಿಯರ್ ಶಿಪ್ ಗೆಂದಿನ ಆಯುಷ್ ಶೆಟ್ಟಿ ಕಾರ್ಲ ಬೊಕ್ಕ ಬೇತೆ ಬೇತೆ ಮಠತ್ತ ಸ್ವಾಮಿಲು, ಬೇತೆ ಬೇತೆ ಕ್ಷೇತ್ರದ ಗಣ್ಯೆರ್, ಅಧಿಕಾರಿಲು ಪಾಲ್ ಪಡೆಯೆರೆ ಉಲ್ಲೆರ್.
ಕ್ರೀಡೋತ್ಸವಡ್ ಜಾಗತಿಕ ಬಂಟರ ಸಂಘದ ಬೇತೆ ಬೇತೆ ಕೂಟಲು ಪಾಲ್ ಪಡೆಯೆರೆ ಉಂಡು. ಬೊಕ್ಕ ಆಂಜೋವ್ ಲೆನ ವಾಲಿಬಾಲ್, ಬಲ್ಲ್ ಒಯಿಪುನ, ಪೊಂಜೋವ್ ಲೆನ ತ್ರೋಬಾಲ್, ಬಲ್ಲ್ ಒಯಿಪುನ ಪಂತೊ ನಡಪರೆ ಉಂಡು. ಅಂಚೆನೆ ಮಾತ ಪ್ರಾಯದಕ್ಲೆಗ್ಲಾ ಆ್ಯತ್ಲೆಟಿಕ್ ನಡಪರೆ ಉಂಡು. ಮಧ್ಯಾಹ್ನರ್ದ್ ರಾತ್ರೆ ಮುಟ್ಟ ಪ್ರೊ ಕಬಡ್ಡಿ ಮಾದರಿಡ್ 8 ಕೂಟಲೆನ ಕಬಡ್ಡಿ ಪಂತೊ ನಡಪರೆ ಉಂಡು.
ಅಂಚೆನೆ ಬ್ಯಾಡ್ಮಿಂಟನ್ ಕ್ರೀಡಾಪಟು ಚಿರಾಗ್ ಶೆಟ್ಟಿ, ಆಯುಷ್ ಶೆಟ್ಟಿ ಕಾರ್ಲ, ಬೇತೆ ಬೇತೆ ಕ್ಷೇತ್ರದ ಸಾಧಕೆರ್ ಡಾ|ಎ ಸದಾನಂದ ಶೆಟ್ಟಿ ಕುಡ್ಲ, ಡಾ| ಎಂಎನ್ ರಾಜೇಂದ್ರ ಕುಮಾರ್, ಕೆ ಪ್ರಕಾಶ್ ಶೆಟ್ಟಿ, ಚಂದ್ರಹಾಸ ಕೆ ಶೆಟ್ಟಿ, ಪ್ರವೀಣ್ ಶೆಟ್ಟಿ ವಕ್ವಾಡಿ, ಸತೀಶ್ ಶೆಟ್ಟಿ ಪಟ್ಲ, ಸಂತೋಷ್ ಶೆಟ್ಟಿ ಪುಣೆ, ವಿಶು ಶೆಟ್ಟಿ ಅಂಬಲಪಾಡಿ ಮೊಕ್ಲೆಗ್ ಸನ್ಮಾನ ನಡಪರೆ ಉಂಡು.
ಈ ಲೇಸ್ ಗ್ ಪಿಕ್ಚರ್ ದಕುಲು ಸುನಿಲ್ ಶೆಟ್ಟಿ, ರಕ್ಷಿತ್ ಶೆಟ್ಟಿ, ಐಶ್ವರ್ಯ ರೈ , ಶಿಲ್ಪಾ ಶೆಟ್ಟಿ, ರಿಷಬ್ ಶೆಟ್ಟಿ, ಗುರುಕಿರಣ್ ಶೆಟ್ಟಿ, ಶ್ರೀನಿಧಿ ಶೆಟ್ಟಿ, ಶಿವಧ್ವಜ್ ಶೆಟ್ಟಿ, ಅನುಷ್ಕಾ ಶೆಟ್ಟಿ, ಪೂಜಾ ಹೆಗ್ಡೆ, ರಾಜ್ ಬಿ ಶೆಟ್ಟಿ, ರೂಪೇಶ್ ಶೆಟ್ಟಿ, ಯಶ್ ಪಾಲ್ ಪಡೆಯೆರೆ ಉಲ್ಲೆರ್.
ಅ.29 ಕ್ಕ್ ಅಮ್ಮಣಿ ರಾಮಣ್ಣ ಶೆಟ್ಟಿ ಮೈದಾನಡ್ ಸಾಂಸ್ಕೃತಿಕ ಲೇಸ್ ದ ಉದಿಪನ ನಡಪರೆ ಉಂಡು. ನೆನ್ ಗೃಹ ಸಚಿವೆರ್ ಡಾ|ಜಿ ಪರಮೇಶ್ವರ್ ಮಲ್ಪರೆ ಉಲ್ಲೆರ್. ಈ ಪೊರ್ತುಡು ಕೇಂದ್ರ ಸಚಿವೆರ್ ನಿತಿನ್ ಗಡ್ಕರಿ, ಶೋಭಾ ಕರಂದ್ಲಾಜೆ ಪಾಲ್ ಪಡೆಯೆರೆ ಉಲ್ಲೆರ್. ಅತ್ತಂದೆ 30 ಕೂಟದಕ್ಲೆರ್ದ್ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು.
ಪತ್ರಿಕಾಗೋಷ್ಠಿಡ್ ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಉಪಾಧ್ಯಕ್ಷೆರ್ ಕರ್ನಿರೆ ವಿಶ್ವನಾಥ ಶೆಟ್ಟಿ, ಜತೆ ಕಾರ್ಯದರ್ಶಿ ಚಂದ್ರಹಾಸ ಡಿ ಶೆಟ್ಟಿ, ಕ್ರೀಡಾಕೂಟ ಸಂಚಾಲಕೆರ್ ಗಿರೀಶ್ ಶೆಟ್ಟಿ ತೆಳ್ಳಾರು, ಪ್ರಮುಖೆರ್ ನಾಗೇಶ್ ಹೆಗ್ಡೆ, ಪುರುಷೋತ್ತಮ ಪಿ ಶೆಟ್ಟಿ, ಮನೋಹರ ಶೆಟ್ಟಿ ತೋನ್ಸೆ, ಅಶೋಕ್ ಪಕ್ಕಳ, ಉಳ್ತೂರು ಮೋಹನ್ ದಾಸ್ ಶೆಟ್ಟಿ, ಕಾರ್ನೂರು ಮೋಹನ್ ರೈ, ಡಾ. ರೋಶನ್ ಕುಮಾರ್ ಶೆಟ್ಟಿ ಇತ್ತೆರ್.
