ಊರ್ದ ಸುದ್ದಿ Regional News

ರಾಜಶ್ರೀ ರೈ ಮೆರೆಗ್ ನಾರಾಯಣ ಗುರು ಸಂಶೋಧನಾ ಪ್ರಶಸ್ತಿ

ಕೊಣಾಜೆ: ಕುಡ್ಲ ವಿಶ್ವವಿದ್ಯಾನಿಲಯದ ಬ್ರಹ್ಮಶ್ರೀ ನಾರಾಯಣಗುರು ಅಧ್ಯಯನ ಪೀಠದ 2022 ತ್ತ ನಾರಾಯಣಗುರು ಸಂಶೋಧನಾ ಪ್ರಶಸ್ತಿಗ್ ಯುವ ಲೇಖಕಿ, ಕಾಸ್ರೋಡು ಕಾಟುಕುಕ್ಕೆ ಪೆರ್ಲದ ರಾಜಶ್ರೀ ಟಿ. ರೈ ಪೆರ್ಲ ಮೆರೆನ ನಾರಾಯಣಗುರುಕ್ಲೆನ ಬಗೆಟ್ ಬರೆಯಿನ ಸಂಶೋಧನಾ ಕೃತಿ ಆಯ್ಕೆಯಾತ್ಂಡ್.

ಸಂಶೋಧನಾ ಪ್ರಶಸ್ತಿಡ್ 10 ಸಾರ ರೂಪಾಯಿ ಪನವುದ ಗೌರವ ತಿಕ್ಕರೆ ಇತ್ತ್‌ದ್, ಪುರಸ್ಕೃತ ಕೃತಿ ವಿಶ್ವವಿದ್ಯಾನಿಲಯದ ಪ್ರಸಾರಾಂಗದ ಮುಕೇನ ಮುದ್ರಣ ಆದ್ ಪ್ರಶಸ್ತಿ ಪ್ರದಾನ ಸಮಾರಂಭಡ್ ಬುಡುಗಡೆ ಆಯರೆ ಉಂಡು ಪಂದ್ ವಿವಿ ಪ್ರಕಟನೆಡ್ ತೆರಿಪಾದೆರ್.

ಉಳ್ಳಾಲ: ತೆಡಿಲ್ ಹಾಕ್‌ದ್ ಅಂಗಡಿ ಭಸ್ಮ

ಉಳ್ಳಾಲ: ಭಾರೀ ತೆಡಿಲ್ ಬರ್ಸಗ್ ಅಂಗಡಿಯೊಂಜಿ ಪೂರ್ತಿ ಆದ್ ಭಸ್ಮ ಆದ್ ಲಕ್ಷಾಂತರ ರೂಪಾಯಿ ನಷ್ಟ ಆಯಿನ ಘಟನೆ ಉಳ್ಳಾಲದ ರಾಣಿಪುರಡ್ ನಡತ್ಂಡ್.

ಕಟ್ವಾನೊಡು ಇತ್ತಿನ ಇಲ್ಲಗ್‌ಲ ತೂ ಪತ್ತ್‌ದಿತ್ತ್‌ದ್ ಜಾಗೆಗ್ ಕೂಡ್ಲೆ ಅಗ್ನಿಶಾಮಕ ಸಿಬ್ಬಂದಿಲು ಬತ್ತ್‌ದ್ ತೂ ತೆಕ್ಕಾದೆರ್.

ಮುನ್ನೂರು ಗ್ರಾಮದ ರಾಣಿಪುರ ಚರ್ಚ್ ಎದುರ್‌ದ ಪೀಟರ್ ಆಪ್ರೋಸ್ ಪನ್ಪಿನರೆನ ದಿನಸಿ ಅಂಗಡಿಗ್ ತೆಡಿಲ್ ಹಾಕ್‌ದ್ಂಡ್. ಇನಿ ಪುಲ್ಯ ಕಾಂಡೆ ಈ ಘಟನೆ ನಡತ್ಂಡ್. ಸಾದಿಡ್ ಪೋಪಿನ ಜನ ಒರಿ ಅಂಗಡಿಗ್ ತೂ ಬೂರ್ದಿನೆನ್ ತೂದು ಅಂಗಡಿದ ಮಾಲಿಕೆರೆಗ್ ವಿಷಯನ್ ತೆರಿಪಾದೆರ್.

ಜಾಗೆಗ್ ಮುನ್ನೂರು ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ವಿಲ್ಫ್ರೆಡ್ ಡಿ ಸೋಜ, ಮಾಜಿ ಉಪಾಧ್ಯಕ್ಷೆರ್ ನವೀನ್ ಡಿ ಸೋಜಾ, ಕಂದಾಯ ನಿರೀಕ್ಷಕೆರ್, ಗ್ರಾಮಲೆಕ್ಕಾಧಿಕಾರಿಲು, ಪಂಚಾಯತ್ ಅಭಿವೃದ್ಧಿ ಅಧಿಕಾರಿ ಭೇಟಿ ಕೊರ್ದ್ ಪರಿಶೀಲನೆ ಮಲ್ತ್‌ದೆರ್.

ಬದ್ ಕ್ ದ ಪರಿಪೂರ್ಣತೆಗ್ ನೃತ್ಯಕಲೆ ಪೂರಕ : ಅನ್ನಪೂರ್ಣ ರಿತೇಶ್

ವಿದ್ಯೆ ನಮನ್ ಬಾಹ್ಯವಾದ್ ರೂಪಿಸಾದ್ ಬದ್‌ಕ್‌ ಕೊರ್ಪುಂಡು. ಕಲೆ ನಮ್ಮ ಉಲಯಿದ ಮನಸ್ಸ್‌ನ್ ಅರ್ಲಾವುಂಡು. ಶಿಕ್ಷಣ ಬೊಕ್ಕ್ ನೃತ್ಯಕಲೆರ್ದ್ ಉಂದು ಸಾಧ್ಯ ಆಪುಂಡು. ಜೀವನದ ಪರಿಪೂರ್ಣತೆಗಾದ್ ನೃತ್ಯಕಲೆ ಪೂರಕ ಆವು ಪಂದ್ ಕಿನ್ನಿಗೋಳಿದ ಶಿವಪ್ರಣಾಮ್ ನೃತ್ಯ ಸಂಸ್ಥೆದ ನಿರ್ದೇಶಕೆರ್ ಅನ್ನಪೂರ್ಣ ರಿತೇಶ್ ಪಂಡೆರ್.

ಮೇರ್ ಶಿಮಂತೂರ್‌ದ ಶ್ರೀ ಶಾರದಾ ಸೆಂಟ್ರಲ್ ಸ್ಕೂಲ್‌ಡ್ ನಡತಿನ ಶೈಕ್ಷಣಿಕ ವರ್ಷದ ಧರ್ಮಾರ್ಥ ನೃತ್ಯ ತರಗತಿನ್ ಉದಿಪನ ಮಲ್ತ್‌ದ್ ಪಾತೆರಿಯೆರ್.

ಶ್ರೀ ಶಾರದಾ ಸೊಸೈಟಿದ ಅಧ್ಯಕ್ಷೆರ್, ಧರ್ಮದರ್ಶಿ ಡಾ. ಹರಿಕೃಷ್ಣ ಪುನರೂರು ಲೇಸ್‌ದ ಗುರ್ಕಾಮೆ ವಹಿಸೊಂದು ನೃತ್ಯಕಲೆ ಪನ್ಪಿನವು ನಮ್ಮ ಉಡಲ್‌ದ ಭಾಷೆ. ಈ ಕಲೆಟ್ ಮಾತ ಶಿಕ್ಷಣ ಉಂಡು ಪಂದ್ ಪಂಡೆರ್.

ಈ ಲೇಸ್‌ಡ್ ಶ್ರೀ ಶಾರದಾ ಸೊಸೈಟಿದ ಕೋಶಾಧಿಕಾರಿ ಭುವನಾಭಿರಾಮ ಉಡುಪ, ಶಾಲಾ ಸಂಚಾಲಕೆರ್ ದೇವಪ್ರಸಾದ್ ಪುನರೂರು, ನೃತ್ಯ ಗುರು ಸುಧಾಕರ್ ಸುರತ್ಕಲ್ ಇತ್ತೆರ್. ಪ್ರಾಂಶುಪಾಲೆರ್ ಜಿತೇಂದ್ರ ವಿ ರಾವ್ ಎದ್ಕೊನಿಯೆರ್. ಸಹ ಶಿಕ್ಷಕಿ ಹೇಮಲತಾ ಲೇಸ್ ಸಾಧಾರಿಕೆ ಮಲ್ತೆರ್. ದೀಪಿಕಾ ಬತ್ತಿನ ಬಿನ್ನೆರೆಗ್ ಸೊಲ್ಮೆ ಸಂದೈತ ಮಲ್ತೆರ್.

ಶ್ರೀ ಕ್ಷೇತ್ರ ಕಟೀಲ್ ಡ್ ಬುಡುಗಡೆ ಆಂಡ್ ಮಾತೃ ಸ್ವರೂಪಿಣಿ ತುಳು ಭಕ್ತಿ ಸುಗಿಪು

ತುಳುನಾಡ್‌ದ ಬರವುದ ಬಿರ್ಸೆದಿ, ಅವು ಏತೊ ಬರವುದ ಗೊಂಚಿಲ್‌ಡ್ ಜನ ಮಂದೆನ್ ಗೆಂದ್‌ದ್ ತನ್ನ ಬರವುಗೇ ಬೊಟ್ಟ ದೀದ್ ದೇವೆರೆ ಪಾದ ಸೇರ್ದಿನ ಶ್ವೇತಾ ಕಜೆ ಮೆರೆನ ಕಡೆತ್ತ ಬರವು ದಯಾ ಕ್ರಿಯೇಷನ್‌ದ ಮುಖೇನ ಮಾತೃ ಸ್ವರೂಪಿಣಿ ಪನ್ಪಿನ ದುರ್ಗಾಪರಮೇಶ್ವರೀ ಅಪ್ಪೆನ ತುಳು ಭಕ್ತಿಸುಗಿಪು ಜುಲೈ 7 ಸುಕ್ರಾರ ಬಯ್ಯಗ್ 6 ಗಂಟೆಗ್ ಶ್ರೀ ಕ್ಷೇತ್ರ ಕಟೀಲ್ ಡ್ ಗಣ್ಯೆರೆನ ಉಪಸ್ಥಿತಿಡ್ ಬಿಡುಗಡೆ ಆಂಡ್.

ಈ ಭಕ್ತಿ ಸುಗಿಪುನ್ ಶ್ರೀ ಲಕ್ಷ್ಮೀ ನಾರಾಯಣ ಅಸ್ರಣ್ಣೆರ್ ಬುಡುಗಡೆ ಮಲ್ತ್‌ದ್ ಆಶೀರ್ವಾದ ಮಲ್ತೆರ್. ಮಲ್ಲ ಬಿನ್ನೆರಾದ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ನಿಕಟ ಪೂರ್ವ ಅಧ್ಯಕ್ಷೆರ್ ದಯಾನಂದ ಜಿ ಕತ್ತಲ್‌ಸಾರ್ ಪಾಲ್ ಪಡೆದಿತ್ತೆರ್. ಈ ಪೊರ್ತುಡು ದಯಾನಂದ ಅಮೀನ್ ಬಾಯಾರ್, ಗಾಯಕಿ ಪ್ರಸಿದ್ಧ ರಾವ್ ಧರ್ಮಸ್ಥಳ, ಕಿಶೋರ್ ಬೆಳ್ತಂಗಡಿ, ಗಣೇಶ್ ಬೊಂಡಾಲ, ರಮಾನಂದ ಪೂಜಾರಿ ಕಟೀಲ್, ಗಣೇಶ್ ಪೆರ್ಮುದೆ ಇತ್ತೆರ್.

ಪ್ರಸಿದಾ ರಾವ್ ಧರ್ಮಸ್ಥಳ ಗಾಯನ, ಅಭಿನಯಡ್, ಕಿಶೋರ್ ಬೊಲ್ತೇರ್ ಛಾಯಾಗ್ರಹಣ ಬೊಕ್ಕ ಸಂಕಲನಡ್, ದಯಾನಂದ ಅಮೀನ್ ಬಾಯಾರು ಸಮಗ್ರ ನಿರ್ವಹಣೆಡ್ ಈ ತುಳು ಭಕ್ತಿಸುಗಿಪು ದಯಾ ಕ್ರಿಯೇಷನ್ ಯೂಟ್ಯೂಬ್ ಚಾನೆಲ್ ಡ್ ಬುಡುಗಡೆ ಆತ್ಂಡ್.