ಊರ್ದ ಸುದ್ದಿ Regional News

ವೈದ್ಯೆರ್ನ ನಿರ್ಲಕ್ಷ್ಯ; ಬಾಣಂತಿ ತೀರ್ ಪೋಯೆರ್!

ಕುಡ್ಲ: ವೈದ್ಯೆರ್ನ ನಿರ್ಲಕ್ಷ್ಯರ್ದ್ ಬಂಜಿನ ಪೊಂಜೊವ್ ತೀರ್‌ಪೋಯಿನ ಘಟನೆ ಕುಡ್ಲದ ಖಾಸಗಿ ಆಸ್ಪತ್ರೆಡ್ ನಡತ್‌ಂಡ್.

ಬೊಲ್ತೆರ್‌ದ ವೇಣೂರು ನಿವಾಸದ ಪ್ರದೀಪ್ ಅರೆನ ಬೊಡೆದಿ ಶಿಲ್ಪಾ ತೀರ್‌ಪೊಯಿನಾರ್. ರಡ್ಡನೆ ಡೆಲಿವೆರಿಗ್ ಆಪರೇಷನ್ ಮಲ್ತ್ ದ್ ಬಾಲೆನ್ ಪಿದೈ ದೆತ್‌ದೆರ್. ಬಾಲೆ ಸುರಕ್ಷಿತವಾದ್ ಉಂಡು. ಅಪ್ಪೆ ಒಂಜಿ ತಿಂಗೊಲು ಕೋಮಾಡ್ ಇತ್ತ್ ದ್ ಸೋಮವಾರ ತೀರ್‌ಪೋಯೆರ್ ಪಂದ್ ತೆರಿದ್ ಬೈದ್ಂಡ್.

ಶಿಲ್ಪಾ ಒಂಜಿ ತಿಂಗೊಲು ಪಿರಾಕ್ ಇಲ್ಲದಕ್ಲೆನ ಒಟ್ಟಿಗೆ ಟೆಸ್ಟ್ ಗ್ ಪಂದ್ ಆಸ್ಪತ್ರೆಗ್ ಪೋದಿತ್ತೆರ್. ಆಸ್ಪತ್ರೆಡ್ ಕೂಡ್ಲೆ ಅಡ್ಮಿಟ್ ಆವರೆ ಪಂಡೆರ್. ಅಂಚನೆ ಅಡ್ಮಿಟ್ ಆದ್ ಆಪರೇಷನ್ ಮಲ್ಪುನ ಅಗತ್ಯ ಉಂಡ್ ಪಂದ್ ಆಪರೇಷನ್ ಮಲ್ತ್ ಬಾಲೆ ಪಿದೈ ದೆತ್‌ದ್ ಇತ್ತೆರ್. ಆಂಡ ಶಿಲ್ಪಾ ಅರೆಗ್ ರಕ್ತಸ್ರಾವ ಜಾಸ್ತಿ ಆದ್ ಗರ್ಭಕೋಶಡ್ ತೊಂದರೆ ಉಂಡ್ ಪಂದ್ ವೈದ್ಯೆರ್ ಗರ್ಭಕೋಶ ದೆತ್ತ್ ದೆರ್. ಕೋಮಾಡ್ ಇತ್ತಿನ ಶಿಲ್ಪಾ ಸೋಮವಾರ ತೀರ್ ಪೋಯೆರ್.

ಈ ವಿಷಯ ತೆರಿನ ಇಲ್ಲದಕುಲ್ ವೈದ್ಯೆರ್ನ ನಿರ್ಲಕ್ಷ್ಯ ಖಂಡನೆ ಮಲ್ತ್ ದ್ ವಿಶ್ವಕರ್ಮ ಬಾಂಧವೆರ್ ಬೊಕ್ಕ ಸಂಘಟನೆದ ಪ್ರಮುಖೆರ್ ಆಸ್ಪತ್ರೆದ ಎದುರು ಪ್ರತಿಭಟನೆ ಮಲ್ತೆರ್. ವೈದ್ಯೆರ್ನ ನಿರ್ಲಕ್ಷ್ಯ ಗ್ ಅಮಾಯೆಕೆರ್ ಬಲಿ ಆವೊದುಲ್ಲೆರ್, ನೆತ್ತ ಬಗ್ಗೆ ಸೂಕ್ತ ಕ್ರಮ ದೆತೊನಂಚ ಆಗ್ರಹ ಮಲ್ತೆರ್.

ತುಲುವೆರೆ ಕಲ ‘ಸಬಿ ಸವಾಲ್’ ಪಂತೊ

ಕುಡ್ಲ: ತುಲುವೆರೆ ಕಲ , ಕುಡ್ಲ ಸಂಘಟನೆ ಅಟ್ಟಣೆ ಮಲ್ತಿನ ತುಳುನಾಡ್ ದ ನಾಡು ನುಡಿ ನೆತ್ತ ಲೆಕ್ಕಡ್ ‘ಸಬಿ ಸವಾಲ್’ ರಸಪ್ರಶ್ನೆ ಪಂತೊಡು ರೇಣುಕಾ ಕಣಿಯೂರು ಸುರುತ ಬಹುಮಾನ ಪಡೆತೆರ್.
ಭಾಸ್ಕರ್ ಎ ವರ್ಕಾಡಿ ದ್ವಿತೀಯ, ಕೆ. ಶಶಿಕಲಾ ಭಾಸ್ಕರ್ ದೈಲಾ ಬಾಕ್ರಬೈಲ್ ತೃತೀಯ ಸ್ಥಾನನ್ ಪಡೆತೆರ್.

ಮಿತ್ತೂರು ವಿಶ್ವನಾಥ ಕುಲಾಲ್, ಪೂರ್ಣಿಮಾ ಕಿರಣ್ ಮಂಜೇಶ್ವರ, ರಕ್ಷಿತ್ ಬಿ. ಕರ್ಕೇರ ಪದವಿನಂಗಡಿ, ಅನುರಾಧಾ ರಾಜೀವ್ ಸುರತ್ಕಲ್, ಆರ್.ಕೆ ನಿರಂಜನ್, ಶ್ವೇತಾ ಅಮೈ, ದಿವ್ಯಾ ಅಂಚನ್ ಪಕ್ಷಿಕೆರೆ, ಅಶೋಕ ಎನ್ ಕಡೇಶಿವಾಲಯ, ಸತೀಶ್ ಸಾಲಿಯಾನ್ ನೆಲ್ಲಿಕುಂಜೆ, ಹರಿಣಿ ಎಂ ಶೆಟ್ಟಿ ಕಾಪು, ಪ್ರಫುಲ್ಲ ದಿನೇಶ್ ಶೆಟ್ಟಿ ಡೊಂಬಿವಿಲಿ, ನಿರ್ಮಲಾ ಶೇಸಪ್ಪ ಖಂಡಿಗೆ ಮೊಕುಲ್ ತೀರ್ಪುಗಾರೆರ್ನ ಮೆಚ್ಚುಗೆ ಪಡೆಯೆರ್.

ತಂಡದ ಅಧ್ಯಕ್ಷೆರ್ ಗೀತಾ ಲಕ್ಷ್ಮೀಶ್ ಪಂತೊ ಸಂಯೋಜನೆ ಮಲ್ತೆರ್.

ಗಬ್ಬರ್ ಸಿಂಗ್ ತುಳು ಪಿಕ್ಚರ್ ಸೆನ್ಸಾರ್ ಗ್: ಡಿಸೆಂಬರ್ ಡ್ ರಿಲೀಸ್

ಕುಡ್ಲ: “ಗಬ್ಬರ್ ಸಿಂಗ್” ತುಳು ಪಿಕ್ಚರ್ ದ ಶೂಟಿಂಗ್ ಮುಗಿದ್ಂಡ್. ಪಿಕ್ಚರ್ ನ್ ಸೆನ್ಸಾರ್ ಗ್ ಕಡಪಾದ ಪಂದ್ ನಿರ್ಮಾಪಕೆರ್ ಸತೀಶ್ ಪೂಜಾರಿ ಬಾರ್ಕೂರು ತೆರಿಪಾದೆರ್.

ಮುತ್ತು ಗೋಪಾಲ್ ಫಿಲ್ಮ್ಸ್ ಬಾರ್ಕೂರು ಲಾಂಛನಡ್ ಸತೀಶ್ ಪೂಜಾರಿ ಬಾರ್ಕೂರು ನಿರ್ಮಾಣಡ್ ತಯಾರಾಯಿನ ಗಬ್ಬರ್ ಸಿಂಗ್ ಪಿಕ್ಚರ್ ಗ್ ಸುರತ್ಕಲ್, ಚಿತ್ರಾಪುರ, ಬೈಕಂಪಾಡಿ ಪ್ರದೇಶಡ್ ಪಿಕ್ಚರ್ ಗ್ ಮೂಜಿ ಹಂತಡ್ ಶೂಟಿಂಗ್ ಆತ್ಂಡ್. ನಾಯಕೆ ನಟೆಯಾದ್ ಶರಣ್ ಶೆಟ್ಟಿ ನಾಯಕಿಯಾದ್ ವೆನ್ಸಿಟಾ ಅಭಿನಯ ಮಲ್ದೆರ್. ಸಮಾಜಡ್ ಅಶಾಂತಿ ಸೃಷ್ಟಿ ಆನಗ ಕುಡ ಶಾಂತಿ ನೆಲೆಸುಲೆಕ್ಕ ಮಲ್ಪುನ ಖಡಕ್ ಅಧಿಕಾರಿ ಪಾತ್ರಡ್ ಶರಣ್ ಶೆಟ್ಟಿ ಅಭಿನಯ ಮಲ್ದೆರ್.‌

ನಿರ್ಮಾಪಕೆರ್ ಸತೀಶ್ ಪೂಜಾರಿ ಬಾರ್ಕೂರು

“ಗಬ್ಬರ್ ಸಿಂಗ್” ಆ್ಯಕ್ಷನ್ ಥ್ರಿಲ್ಲರ್ ಫ್ಯಾಮಿಲಿ ಆಧಾರಿತ ಫಿಲ್ಮ್ ಆತ್ಂಡ್. ಡಿಸೆಂಬರ್ ಡ್ ತುಳುವೆರೆನ ಎದುರು ಪ್ರದರ್ಶನ ಆಪಿನ ಅಂದಾಜಿ ಉಂಡು. ಪಿಕ್ಚರ್ ಗ್ ಕತೆ, ಚಿತ್ರಕತೆ, ನಿರ್ದೇಶನದ ಜವಾಬ್ದಾರಿನ್ ಪ್ರದೀಪ್ ಬೈಕಾಡಿ ಒಯಿಸೊಂದೆರ್. ಮಧು ಸುರತ್ಕಲ್ ಸಂಭಾಷಣೆ ರಚನೆ ಮಲ್ದೆರ್. ಮುಖ್ಯ ಪಾತ್ರಡ್ ನವೀನ್ ಡಿ ಪಡೀಲ್, ಅರವಿಂದ ಬೋಳಾರ್, ಭೋಜರಾಜ ವಾಮಂಜೂರು, ಪ್ರಸನ್ನ ಶೆಟ್ಟಿ ಬೈಲೂರು, ಉಮೇಶ್ ಮಿಜಾರ್, ರವಿ ರಾಮಕುಂಜ, ಗಿರೀಶ್ ಎಂ. ಶೆಟ್ಟಿ ಕಟೀಲ್, ಪ್ರಜ್ವಲ್ ಪ್ರಕಾಶ್, ಉದಯ ಆಳ್ವ ಇಡ್ಯಾ, ಶಶಿ ಬೆಳ್ಳಾಯರು, ಚಂದ್ರಹಾಸ ಶೆಟ್ಟಿ ಮಾಣಿ, ಸಂಪತ್ ಲೋಬೋ, ಆಶಾ ಶೆಟ್ಟಿ ಶಿಬರೂರು, ಭವ್ಯಾ ಶೆಟ್ಟಿ, ಲಹರಿ ಶೆಟ್ಟಿ ಪಡ್ರೆ, ವೀಣಾ ಶೆಟ್ಟಿ, ಶಿಲ್ಪಾ ಶೆಟ್ಟಿ, ಸಂತೋಷ್ ಉಲ್ಲೆರ್.

ಛಾಯಾಗ್ರಹಣ: ರವಿ ಸುವರ್ಣ, ಸಂಕಲನ: ಪ್ರಜ್ವಲ್ ಸುವರ್ಣ, ಸಂಗೀತ: ಡೊಲ್ವಿನ್ ಕೊಳಲಗಿರಿ. ಸಾಹಸ: ಅಲ್ಟಿಮೆಟ್ ಶಿವ್ ನೃತ್ಯ: ಅವಿನಾಶ್ ಬಂಗೇರ, ಶುಭಕಿರಣ್ ಮಾಣಿ, ಕಲೆ: ವೆಂಕಟೇಶ್, ಮೇಕಪ್ ಪ್ರದೀಪ್, ವಸ್ತ್ರಾಲಂಕಾರ : ಶರತ್ ಬರ್ಕೆ, ಸಹ ನಿರ್ದೇಶನ: ಪುಷ್ಪರಾಜ ರೈ, ಜಯರಾಜ್, ಸಹಾಯ: ಭಾಗ್ಯರಾಜ್ ಬೊಕ್ಕ ಶಶಿರಾಜ್ ಕಾವೂರು, ಪ್ರಶಾಂತ್ ಸಿ.ಕೆ, ಅರುಣ್ ಲೀವಿಸ್, ಉಮೇಶ್ ಮಿಜಾರ್ ಗೀತಾ ಸಾಹಿತ್ಯ ಕೊರ್ತೆರ್.

ಡಿಸೆಂಬರ್ ಡ್ ರೀಲಿಸ್
ಗಬ್ಬರ್ ಸಿಂಗ್ ತುಳು ಪಿಕ್ಚರ್ ಡ್ ವಿಭಿನ್ನ ಕತೆ ಉಂಡು. ಪ್ರೇಕ್ಷಕೆರೆಗ್ ಇಷ್ಟ ಆಪುನ ರೀತಿಡ್ ಕತೆನ್ ಬರೆತೆರ್. ಎಡ್ಡೆ ಕತೆ, ಹಾಸ್ಯದೊಟ್ಟಿಗೆ ಈ ಪಿಕ್ಚರ್ ಡಿಸೆಂಬರ್ ಡ್ ರಿಲೀಸ್ ಆಪುಂಡು ಪಂದ್ ನಿರ್ಮಾಪಕೆರ್ ಬಾರ್ಕೂರು ಸತೀಶ್ ಪೂಜಾರಿ ತೆರಿಪಾದೆರ್.