ಊರ್ದ ಸುದ್ದಿ Regional News

ವೇಣೂರು: ಎಸ್.ಡಿ.ಯಂ. ಐ.ಟಿ.ಐ.ಡ್ ರಾಷ್ಟ್ರೀಯ ಸೇವಾ ಯೋಜನೆ ದಿನಾಚರಣೆ‌

ವೇಣೂರು: ಕಲ್ಪಾರ್ಥಿಲೆಡ ನಾಯಕತ್ವ ಬರಿಯೆರೆ ಬೊಕ್ಕ ತನ್ನ ಪ್ರತಿಭೆನ್‌ ಅನಾವರಣ ಮಲ್ಪೆರೆ, ಸಮಾಜಡ್‌ ಎಡ್ಡೆ ಸ್ಥಾನಗ್‌ ಪೋವರೆ ಬೋಡಾಯಿನ ಆತ್ಮವಿಶ್ವಾಸನ್ ಎನ್.ಎಸ್.ಎಸ್. ಕೊರ್ಪುಂಡು ಪಂದ್ ಜೀ ಕನ್ನಡ ವಾಹಿನಿದ ಕಾಮಿಡಿ ಕಿಲಾಡಿ ಖ್ಯಾತಿದ ಅನೀಷ್ ಪೂಜಾರಿ ವೇಣೂರು ಎಸ್.ಡಿ.ಯಂ. ಐ.ಟಿ.ಐ.ಡ್ ರಾಷ್ಟ್ರೀಯ ಸೇವಾ ಯೋಜನೆ ದಿನಾಚರಣೆ ಕಾರ್ಯಕ್ರಮನ್‌ ಉದಿಪನ ಮಲ್ತ್ ಎನ್.ಎಸ್.ಎಸ್. ಅನುಭವನ್‌ ಪಟ್ಟೊಂಡೆರ್.

ಬಿನ್ನೆರಾದ್‌ ಪಾಲ್‌ ಪಡೆಯಿನ ಸಂಸ್ಥೆದ ಹಳೆ ವಿದ್ಯಾರ್ಥಿ ಮನ್ಸೂರ್, ಸೌದಿ ಅರೇಬಿಯಾಡ್‌ ನಡತ್ತಿನ ರಾಷ್ಟ್ರ ಮಟ್ಟದ ಭಾಷಣ ಸ್ಪರ್ಧೆಡ್‌ ಸುರುತ ಇನಾಮು ಪಡೆನ ಮೆರ್‌ ಎನ್.ಎಸ್.ಎಸ್ ಶಿಬಿರಡ್‌ ಅಪಾರ ಅನುಭವನ್‌ ಕಲ್ಪಾರ್ಥಿಲೆನ ಒಟ್ಟಿಗೆ ಪಟ್ಟೊಂದೆರ್. ಕಾರ್ಯಕ್ರಮದ ಗುರ್ಕಾರ್ಮೆನ್ ಕಾಲೇಜ್‌ದ ಪ್ರಾಚಾರ್ಯ ವಿಶ್ವೇಶ್ವರ ಪ್ರಸಾದ್ ವಹಿಸ್‌ದ್‌ ಇತ್ತೆರ್, ಮಲ್ಲ ಬಿನ್ನೆರಾದ್ ಸಂಸ್ಥೆದ ಹಿತೈಷಿ ಜೀವಾವಿಮಾ ನಿಗಮದ ಪ್ರತಿನಿಧಿ ಜಗನಾಥ್ ಎಚ್., ಎನ್.ಎಸ್.ಎಸ್. ಕಾರ್ಯಕ್ರಮದ ಅಧಿಕಾರಿ ಪದ್ಮಪ್ರಸಾದ್ ಬಸ್ತಿ ಇತ್ತೆರ್.

ಶಿಕ್ಷಕರ ದಿನಾಚರಣೆದ ನೃತ್ಯ ಸ್ಪರ್ಧೆ: ಉಜಿರೆ ಎಸ್.ಡಿ.ಎಂ. ಪ.ಪೂ.ಕಾಲೇಜ್‌ದ ಉಪನ್ಯಾಸಕೆರ್ನ ತಂಡ ಸುರುತ ಇನಾಮು

ಉಜಿರೆ: ಕುಡ್ಲಡ್ ದ.ಕ. ಪದವಿ ಪೂರ್ವ ಕಾಲೇಜುದ ಪ್ರಾಂಶುಪಾಲರ ಸಂಘ, ವಿಷಯವಾರು ಉಪನ್ಯಾಸಕರ ಸಂಘ, ದೈಹಿಕ ಶಿಕ್ಷಣ ಉಪನ್ಯಾಸಕರ ಸಂಘ ಬೊಕ್ಕ ಸಂತ ಅಲೋಶಿಯಸ್ ಕಾಲೇಜ್, ಕುಡ್ಲ ನೆತ್ತ ಮುತಾಲಿಕೆಡ್ ಪದವಿ ಪೂರ್ವ ಕಾಲೇಜು, ಶಿಕ್ಷಕರ ದಿನಾಚರಣೆದ ಪೊರ್ತುಡು ನೃತ್ಯ ಸ್ಪರ್ಧೆಡ್ ಉಜಿರೆದ ಎಸ್.ಡಿ.ಎಂ. ಪದವಿ ಪೂರ್ವ ಕಾಲೇಜ್‌ದ ಉಪನ್ಯಾಸಕರ ತಂಡ ಸುರುತ ಇನಾಮು ಪಡೆಯೊಂದೆರ್.

ಇನಾಮು ಪಡೆಯೊನ್ನ ತಂಡಗ್ ಪ್ರಶಸ್ತಿನ್ ವಿಧಾನ ಪರಿಷತ್ ಶಾಸಕೆರ್ ಎಸ್.ಎಲ್. ಭೋಜೇಗೌಡ ಪ್ರಶಸ್ತಿ ಕೊರ್ದು ಮಾನಾದಿಗೆ ಮಲ್ತೆರ್.ಪದವಿ ಪೂರ್ವ ಶಿಕ್ಷಣ ಇಲಾಖೆಯ ಉಪನಿರ್ದೇಶಕೆರ್ ಜಯಣ್ಣ ಸಿ.ಡಿ., ದ.ಕ. ಜಿಲ್ಲಾ ಪ್ರಾಂಶುಪಾಲರ ಸಂಘದ ಗುರ್ಕಾರ್ಲು ಕೆ. ಎನ್ ಗಂಗಾಧರ್ ಆಳ್ವ, ಕಾರ್ಯದರ್ಶಿ ಯೂಸೂಫ್ ವಿಟ್ಲ, ಉಪಾಧ್ಯಕ್ಷೆರ್ ವಿಠಲ್, ಪದಾಧಿಕಾರಿಲು ಈ ಪೊರ್ತುಡು ಇತ್ತೆರ್.

ಕಾಶಿಬೆಟ್ಟು: ಲಾರಿ ಬೊಕ್ಕ ತರಕಾರಿ ಗಾಡಿಗ್ ಡಿಕ್ಕಿ

ಬೆಳ್ತಂಗಡಿ: ಸೆ.29 ದಾನಿ ಬೊಲ್ಪುಗು ಬೋಲ್ತೆರ್ದ್ ಉಜಿರೆಗ್‌ ಪೋವೊಂದುಇತ್ತಿನ ತರಕಾರಿ ಗಾಡಿ ಬೊಕ್ಕ ಉಜಿರೆ ಕಡೆರ್ದ್‌ ಬೋಲ್ತೆರ್‌ಗ್‌ ಬರೊಂದು ಇತ್ತಿನ ಲಾರಿದ ನಡುಟು ಕಾಶಿಬೆಟ್ಟು ಕ್ರಾಸ್‌ಡ್‌ ಆಕ್ಸಿಡೆಂಟ್‌ ಆಯಿನ ಘಟನೆ ವರದಿ ಆತ್‌ಂಡ್‌.

ತರಕಾರಿ ಗಾಡಿದ ಎದುರುದ ಭಾಗ ನಕ್ಕೆ ಆತ್ಂಡ್. ಡ್ರೈವರ್‌ಗ್‌ ಎಲ್ಯ ಎಲ್ಯ ಗಾಯ ಆದ್‌, ಆಸ್ಪತ್ರೆಗ್‌ ದಾಖಲ್‌ ಮಲ್ತ್‌ದೆರ್. ಜಾಗೆಗ್ ಬೋಲ್ತೆರ್ ಸಂಚಾರಿ ಪೊಲೀಸೆರ್ ಭೇಟಿ ಕೊರ್ದು ಪರಿಶೀಲನೆ ಮಲ್ತ್‌ದೆರ್.

ಬೆಳಾಲು ಅನಂತೋಡಿ ಶ್ರೀ ಅನಂತ ಪದ್ಮನಾಭ ದೇವಸ್ಥಾನಡ್ ಅನಂತ ಚತುರ್ಥಿ, ಕೊರಲ್ ಪರ್ಬ

ಬೆಳಾಲು: ಅನಂತೋಡಿ ಶ್ರೀ ಅನಂತ ಪದ್ಮನಾಭ ದೇವಸ್ಥಾನಡ್ ಸೆ.28 ದಾನಿ ಶ್ರೀ ಅನಂತ ಪದ್ಮನಾಭ ದೇವಸ್ಥಾನದ ಆನುವಂಶಿಕ ಮೊತ್ತೇಸರ ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ| ಡಿ. ವೀರೇಂದ್ರ ಹೆಗ್ಗಡೆರ್ನ ಆಶೀರ್ವಾದದೊಟ್ಟಿಗೆ ಅಂಚನೆ ದೇವಸ್ಥಾನದ ಗೌರವ ಮಾರ್ಗದರ್ಶಕೆರ್ ಯು.ಶರತ್ ಕೃಷ್ಣ ಪಡ್ವೆಟ್ನಾಯ ಮಾರ್ಗದರ್ಶನಡ್ ಅನಂತ ಚತುರ್ದಶಿ ಪೂಜೆ (ನೋಂಪು), ಕೊರಲ್ ಪರ್ಬ, ರಾತ್ರೆ ರಂಗ ಪೂಜೆ ನಡತ್‌ಂಡ್.‌

ದೇವಸ್ಥಾನದ ಆಡಳಿತ ಮೊಕ್ತೇಸರೆರ್ ಜೀವಂದರ ಕುಮಾರ್ ಜೈನ್ ಬೆಳಾಲು ಗುತ್ತು, ಆಶ್ರಣ್ಣ ಗಿರೀಶ್ ಬಾರಿತ್ತಾಯ, ವ್ಯವಸ್ಥಾಪನಾ ಸಮಿತಿ ಗುರ್ಕಾರ್ಲು ನೋಟರಿ ವಕೀಲ ಶ್ರೀನಿವಾಸ ಗೌಡ, ಪ್ರಧಾನ ಕಾರ್ಯದರ್ಶಿ ದುರ್ಗಾಪ್ರಸಾದ್ ಕೆರ್ಮುಣ್ಣಾಯ, ಸಮಿತಿದ ಸದಸ್ಯೆರ್, ಪ್ರಧಾನ ಅರ್ಚಕೆರ್ ಅನಂತರಾಮ ಶಬರಾಯ ಬೊಕ್ಕ ಬಳಗ ಪದಿನಾಲ್ ಬೈಲುವಾರು ಸಮಿತಿದ ಪ್ರಧಾನ ಸಂಚಾಲಕೆರ್‌, ಅನಂತಪದ್ಮನಾದ ಮಹಿಳಾ ಸೇವಾ ಸಮಿತಿದ ಪದಾಧಿಕಾರಿಲು, ಸದಸ್ಯೆರ್, ಸಿಬ್ಬಂದಿ ವರ್ಗ, ಶ್ರೀ ಅನಂತೆಶ್ವರ ಭಜನಾ ಮಂಡಳಿ, ಶ್ರೀ ಅನಂತಪದ್ಮನಾಭ ಮಹಿಳಾ ಭಜನಾ ತಂಡದ ಗುರ್ಕಾರ್ಲು, ಪದಾಧಿಕಾರಿಲು, ಭಕ್ತೆರ್‌ ಈ ಪೊರ್ತುಡು ಪಾಲ್‌ ಪಡೆದಿತ್ತೆರ್.‌

ತಾಲೂಕು ಮಟ್ಟದ ದಸರಾ ಕ್ರೀಡಾಕೂಟಡ್ ಬಂದಾರು ಗ್ರಾಮ ತಂಡ ಸುರುತ ಇನಾಮು

ಬಂದಾರು: ಸೆ 28 ದಾನಿ ಉಜಿರೆ ರತ್ನವರ್ಮ ಕ್ರೀಡಾಂಗಣಡ್‌ ನಡತ್ತಿನ ತಾಲೂಕು ಮಟ್ಟದ ದಸರಾ ಕ್ರೀಡಾಕೂಟಡ್ ಆಂಜೊಕ್ಲೆನ ತ್ರೋಬಾಲ್ ಪಂದ್ಯಾಟಡ್ ಬಂದಾರು ಗ್ರಾಮ ತಂಡ ಸುರುತ ಇನಾಮು ಪಡೆದ್ ಜಿಲ್ಲಾ ಮಟ್ಟಗ್ ಆಯ್ಕೆ ಆತ್ಂಡ್.

ಬೋಲ್ತೆರ್ ಡ್ ಬಂಗಾರ್ ಕಂಡಿನ ಆರೋಪಿ ಮೈಸೂರ್‌ಡ್‌ ಅರೆಸ್ಟ್‌

ಬೋಲ್ತೆರ್: ಉಜಿರೆಡ್‌ ಒಂಜಿ ಇಲ್ಲಲ್‌ ಬಂಗಾರ್ ಕಂಡಿನ ಕೇಸ್ ದ ಆರೋಪಿನ್ ಪೊಲೀಸೆರ್‌ ಅರೆಸ್ಟ್‌ ಮಲ್ತ್‌ದೆರ್. ಉಮೇಶ್ (ಉಮೇಶ ಬಳೆಗಾರ) ಅರೆಸ್ಟ್‌ ಆಯಿನ ಆರೋಪಿ.
ಬೆಳ್ತಂಗಡಿ ಪೊಲೀಸ್‌ ಠಾಣಾ ವ್ಯಾಪ್ತಿದ ಉಜಿರೆ ಪರಿಸರಡ್‌ ನಡತ್ತಿನ ಪ್ರಕರಣಡ್ ಬೋಲ್ತೆರ್‌ ಸ್ಟೇಷನ್‌ಡ್‌ ಕಲಂ; 454,380 ಐಪಿಸಿ ಕೇಸ್‌ ದಾಖಲ್‌ ಮಲ್ತ್‌ ತನಿಖೆ ಮಲ್ತೊಂದು ಇತ್ತೆರ್. ಬೋಲ್ತೆರ್‌ದ ಪೊಲೀಸೆರ್ ಆರೋಪಿನ್ ಮೈಸೂರುಡ್‌ ಅರೆಸ್ಟ್‌ ಮಲ್ತ್‌ದೆರ್. ಆರೋಪಿ ಕಂಡ್‌ದ್‌ ಮಾರ್ದ್‌ ಇತ್ತಿನ ಅಂದಾಜಿ ರೂ 4,68,800/- ಬಿಲೆತ್ತ ಬಂಗಾರ್‌ನ ವಶಕ್‌ ಪಡೆಯೊಂದೆರ್.