ಪುತ್ತೂರ್ದ ಸುದ್ದಿ | Puttur News

ಸುಬ್ರಹ್ಮಣ್ಯ :ರೋಡ್ ಮಧ್ಯಡ್ ವ್ಯಾಪಾರ ಗಾಡಿದ ಸವಾರೆರ್ನ ಪರದಾಟ!!

ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನದ ರಥಬೀದಿ ರೋಡ್ ಡ್ ದಿನಾಲ ಭಕ್ತೆರ್ ಬೊಕ್ಕ ಭಕ್ತೆರ್ ಬರ್ಪುನ ಗಾಡಿಲು ಜಾಸ್ತಿ ಇಪ್ಪುಂಡು.

ಈ ನಡುಟು ಗಾಡಿಲೆದ ಪಾರ್ಕಿಂಗ್ ಜಾಗಗ್ ಪೋಪುನ ಭಾಗಡ್ ಭಕ್ತೆರ್ ನಡತೊಂದು ಬರ್ಪುನ ಸಾದಿಡ್ ವ್ಯಾಪಾರ ಸುರು ಆತ್ಂಡ್. ಉಂದು ಅತ್ತಂದೆ ರೋಡ್ ದ ನಡುಟು ನೂಕೊಂದು ಬರ್ಪುನ ಗಾಡಿನ್ ದಿಯೊಂದು ಬ್ಯಾರ ಮಲ್ಪುನ ತೋಜಿದ್ ಬರೊದುಂಡ್.

ನೆತ್ತ ಬಗ್ಗೆ ಅಧಿಕಾರಿಲು ಗಮನಗ್ ದೆತೊಂದು ಪಂದ್ ಗಾಡಿದ ಸವಾರೆರ್ ಮಾಧ್ಯಮಗ್ ಮಾಹಿತಿ ಕೊರ್ತೆರ್.

ಕಡಬ: ಪೋವೊಂದಿತ್ತಿನ ಟಾಟಾ ಸುಮೋ, ಅಂಗಡಿದ ಮಿತ್ತ್ ಬೂರ್ನ ಮಲ್ಲ ಮರ- ರಡ್ಡ್‌ ಜನಕ್ಕ್ ಗಾಯ

 ಕಡಬ: ಪೊವೊಂದಿತ್ತಿನ ಟಾಟಾ ಸುಮೋ ಬೊಕ್ಕ ಅಂಗಡಿದ ಮಿತ್ತ್ ಮಲ್ಲ ಗಾತ್ರದ ಮರ ಬೂರ್ನ ಪರಿಣಾಮ ರಡ್ಡ್‌ ಜನಕ್ಕ್‌ ಗಾಯ ಆಯಿನ ಘಟನೆ ಉಬಾರ್- ಸುಬ್ರಹ್ಮಣ್ಯ ರಾಜ್ಯ ಹೆದ್ದಾರಿದ ಕೈಕಂಬ ಜಂಕ್ಷನ್‌ಡ್ ಸೋಮವಾರ ನಡತ್‌ಂಡ್.

ಸುಬ್ರಹ್ಮಣ್ಯರ್ದ್ ನೆಟ್ಟಣೆದಂಚಿ ಪೊವೊಂದು ಇತ್ತಿನ ಟಾಟಾ ಸುಮೋ ಬೊಕ್ಕ ಕೈಕಂಬ ಜಂಕ್ಷನ್‌ಡ್‌ ಇತ್ತಿನ ಗೂಡಂಗಡಿದ ಮಿತ್ತ್ ಮಲ್ಲ ಗಾತ್ರದ ಮರ ಬೂರ್ದುಂಡು. ಘಟನೆಡ್ ಗಾಡಿದ ಡ್ರೈವರ್ ಬಿಳಿನೆಲೆ ನಿವಾಸಿ ಶೇಖರ್ ಬೊಕ್ಕ ನನೊರಿಯಗ್‌ ಗಾಯ ಆತ್‌ಂಡ್. ಗಾಯಾಳುಲೆನ್ ಆಸ್ಪತ್ರೆಗ್‌ ಲೆತೊಂದು ಪೋತೆರ್ ಪಂದ್‌ ತೆರಿದ್‌ ಬೈದ್‌ಂಡ್.

ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನಡ್ “ಷಣ್ಮುಖ ನಮಸ್ಕಾರ” ಸಾಮೂಹಿಕ ಯೋಗ

ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನಡ್ ಎಸ್.ಪಿ.ವೈ.ಎಸ್.ಎಸ್ ಯೋಗ ಮುತಾಲಿಕೆಡ್ ಜ.7 ಐತಾರ ಸಾಮೂಹಿಕ ಯೋಗ ಷಣ್ಮುಖ ನಮಸ್ಕಾರ ಕಾರ್ಯಕ್ರಮ ನಡತ್ಂಡ್.

ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್
ಮೋಹನ್ ರಾಮ್ ಎಸ್ ಸುಳ್ಳಿ, ಅನುಗ್ರಹ ಎಜುಕೇಶನ್ ಸುಬ್ರಹ್ಮಣ್ಯ ಟ್ರಸ್ಟ್ ದ ಯೋಗೀಶ್ ಆಚಾರ್ಯ, ಎಸ್.ಪಿ.ವೈ.ಎಸ್.ಎಸ್ ತಾಲೂಕು ಸಂಚಾಲಕೆರ್ ನಯನ ಬಂಟ್ವಾಳ,ಯೋಗ ಶಿಕ್ಷಕೆರ್ ಆನಂದ ಕುಂಟಿನಿ ಉಬಾರ್, ತುಡರ್ ಅರ್ಲಾದ್ ಲೇಸ್ ದ ಉದಿಪನ ಮಲ್ತೆರ್.

ಮೈತ್ರಿ, ಯೋಗ ಶಿಕ್ಷಕೆರ್, ವಿಟ್ಲ ಶಾಖೆ ಮೇರ್ ಸಾಮೂಹಿಕ ಯೋಗ ಷಣ್ಮುಖ ನಮಸ್ಕಾರದ ಮಹತ್ವನ್ ತೆರಿಪಾಯೆರ್.

ಪ್ರಾಂತ, ವಲಯ, ಜಿಲ್ಲಾ, ತಾಲೂಕು, ನಗರ ಪ್ರಮುಖೆರ್ ಈ ಪೊರ್ತುಡು ಇತ್ತೆರ್. ಲೇಸ್ ದ ಸಂಚಾಲಕೆರ್ ಪ್ರಭಾಕರ, ಯೋಗ ಶಿಕ್ಷಕೆರ್ ಸುಬ್ರಮಣ್ಯ ಶಾಖೆ ಸೊಲ್ಮೆ ಸಂದಾಯ ಮಲ್ತೆರ್.

ಸೇವಾಸಂಸ್ಥೆ ಯುವಶಕ್ತಿ ಸೇವಾಪಥ ಮೂಜನೇ ವರ್ಷಗ್ ಪಾದಾರ್ಪಣೆ

ಅಶಕ್ತರೆಗ್ ನಿರೆಲ್ ಕೊರ್ಪಿನ ಮರತಲೆಕ ಕರಿನ ರಡ್ಡ್ ವರ್ಷರ್ದ್ 45 ಲಕ್ಷರ್ದ್ ಎಚ್ಚ ಸೇವೆದ ಪಣವುನು ಸಮಾಜಗ್ ಅರ್ಪಣೆ ಮಲ್ತ್ ದೆರ್.

ಧಾರ್ಮಿಕ ಕ್ಷೇತ್ರದ ಸೇವಾನಿಧಿ ಯೋಜನೆ, ತುರ್ತು ಅಪಘಾತ, ನಿಧಿ,ಕಾರ್ಯಕರ್ತರೆಗ್ ಕ್ಷೇಮನಿಧಿ, ಬೊಕ್ಕ ಮಹಾಯೋಜ‌ನೆದ ಮುಖೆನ ಸಮಾಜ‍ದ ಕಟ್ಟಕಡೆತ ವ್ಯಕ್ತಿಗ್ ಮುಟ್ಟಾವುನ ಪ್ರಯತ್ನ ಮಲ್ತೊಂದು ಉಂಡು.

ಕ್ಯಾನ್ಸರ್ ಪೀಡಿತರೆಗಾದ್ ಕೇಶದಾನ ಯೋಜನೆ ಯಶಸ್ವೀಯಾದ್ ಮುನ್ನಡೆಯೊಂದು ಉಂಡು.

ಸೇವಾಪಥ ಸುರು ಆಯಿನ ಭೂಕೈಲಾಸ ಕಾರಿಂಜ ,ಕದ್ರಿ ಕ್ಷೇತ್ರ,ಶ್ರೀ ಕಡೇಶಿವಾಲಯ ದೇಗುಲಡ್ ವಿಶೇಷ ಪೂಜೆದ ಮುಖೆನ ಪ್ರಾರ್ಥನೆ ಸಲ್ಲಿಸಾಯೆರ್.

ಸುಮಾರ್ 23 ಕೇಂದ್ರಡ್ ಸೇವಾಭಿಯಾನ ನಡತೊಂದು ಇತ್ತ್ ದ್ ವೃದ್ದಾಶ್ರಮ/ಜೋಕ್ಲೆನ ಆಶ್ರಮಗ್ ಆಹಾರ ಪೂರೈಕೆ,ಅಯ್ಯಪ್ಪಾ ವೃತಾಧಾರಿಲೆಗ್ ಫಲಾಹಾರ/ಭೋಜನ,ಸಿಗ್ನಲ್ ಡ್ ಇಪ್ಪುನ ಪೋಲೀಸೆರೆಗ್,ರೈಲ್ವೇ ಸಿಬ್ಬಂದಿಲೆಗ್,ಭದ್ರತಾ ಸಿಬ್ಬಂದಿಲೆಗ್,ಆಸ್ಪತ್ರೆದ ಸಿಬ್ಬಂದಿಲೆಗ್,ನಟ್ಟುನಕ್ಲೆಗ್ ಕಾರ್ಮಿಕ ವರ್ಗದಕ್ಲೆಗ್ ತಿನಸ್, ಕೊರ್ಪುನ ಮುಖೆನ ವಿಶೇಷವಾದ್ ಆಚರಣೆ ಮಲ್ತೆರ್.

ಕುಡ್ಲ,ಪುತ್ತೂರು,ಬೆಂಗಳೂರು,ಮಡಿಕೇರಿ,ಬೆದ್ರ,ಬಂಟ್ವಾಳದ ಸುತ್ತ ಮುತ್ತ 26 ಕೇಂದ್ರಡ್ ಸೇವಾಭಿಯಾನ ಯಶಸ್ವಿಯಾದ್ ನಡತ್ಂಡ್.

ರಡ್ಡನೇ ವರ್ಷದ ವಾರ್ಷಿಕ ಸಂಭ್ರಮ ಫೆಬ್ರವರಿಡ್
ನಡಪೆರೆ ಉಂಡು. ಅಂಚೆನೆ ನನಾತ್ ಸೇವಾ ಚಟುವಟಿಕೆಲೆಗ್ ಆ ವಾರ್ಷಿಕ ಉಚ್ಚಯ ಸಾಕ್ಷಿ ಆವೆರೆ ಉಂಡು

ಪುತ್ತಿಲ ಪರಿವಾರದ ವತಿರ್ದ್ ಶ್ರೀನಿವಾಸ ಕಲ್ಯಾಣೋತ್ಸವ, ಸಂತ ಸಮ್ಮೇಳನದ ಅಟ್ಟಣೆದ ಸಭೆ

ಪುತ್ತೂರು: ಪುತ್ತಿಲ ಪರಿವಾರದ ವತಿರ್ದ್ ಡಿ.24 ಬೊಕ್ಕ 25 ತಾನಿ ಪುತ್ತೂರು ಮಹಾಲಿಂಗೇಶ್ವರ ದೇವಸ್ಥಾನದ ಕಂಡಡ್ ಲೋಕಕಲ್ಯಾಣರ್ಥವಾದ್ ಶ್ರೀನಿವಾಸ ಕಲ್ಯಾಣೋತ್ಸವ ಬೊಕ್ಕ ಬೃಹತ್ ಸಂತ ಸಮ್ಮೇಳನ ನಡಪುನ ಬಗೆಟ್ಟ್‌ ಅಟ್ಟಣೆದ ಸಭೆ ಮುಕ್ರಂಪಾಡಿದ ಸುಭದ್ರ ಕಲ್ಯಾಣಮಂಟಪಡ್ ನಡತ್‌ಂಡ್.‌

ಸಭೆಟ್ಟ್‌ ಪಾತೆರ್ನ ಹಿಂದೂ ಮುಖಂಡೆರ್ ಅರುಣ್ ಕುಮಾರ್ ಪಾತೆರ್ದ್, ಡಿ.24 ತಾನಿ ಬಯ್ಯಗ್ ಬೊಳುವಾರ್‌ರ್ದ್ ತಿರುಪತಿರ್ದ್‌ ಬರ್ಪುನ ದೇವೆರ್ನ ವೈಭವದ ಮೆರವಣಿಗೆ, ಬೊಕ್ಕ ರಾತ್ರೆ ಪೂಜೆ, ಸಾಂಸ್ಕೃತಿಕ ಕಾರ್ಯಕ್ರಮ, ಮನದಾನಿ ಕಾಂಡೆ ವಿಶೇಷ ಉದಯಾಸ್ತಮಾನ ಪೂಜೆ , ರಾಮಕೃಷ್ಣ ಕಾಟುಕುಕ್ಕೆ ಮೊಕ್ಲೆರ್ದ್ ಭಜನೋತ್ಸವ ಬಯ್ಯಗ್ ಬೃಹತ್ ಸಂತ ಸಮ್ಮೇಳನ‌, ಸಭೆರ್ದ್‌ ಬೊಕ್ಕ ಶ್ರೀನಿವಾಸ ಕಲ್ಯಾಣೋತ್ಸವ ನಡಪರೆ ಉಂಡು.

ರಡ್ಡ್‌ ದಿನತ್ತ ಕಾರ್ಯಕ್ರಮಡ್‌ ಬೇತೆ ಬೇತೆ ಜಿಲ್ಲೆದ ಬೇತೆ ಬೇತೆ ಭಾಗರ್ದ್ ಅಂದಾಜಿ 1 ಲಕ್ಷರ್ದ್‌ ಎಚ್ಚ ಜನ ಸೇರುನ ನಿರೀಕ್ಷೆ ಉಂಡು, ರಡ್ಡ್‌ ದಿನಲ ಅನ್ನದಾನ ನಡಪೆರೆ ಉಂಡು ಪಂದ್‌ ಪಂಡೆರ್. ಪೂರ್ವಭಾವಿ ಸಭೆಟ್ ಬೇತೆ ಬೇತೆ ಸಮಿತಿದ ರಚನೆ ನಡತ್‌ಂಡ್. ಪುತ್ತಿಲ ಪರಿವಾರದ ಗುರ್ಕಾರ್ಲು ಪ್ರಸನ್ನ ಮಾರ್ತ, ಶ್ರೀನಿವಾಸ ಕಲ್ಯಾಣೋತ್ಸವದ ಗುರ್ಕಾರ್ಲು ಶಶಾಂಕ್ ಕೊಟೇಚಾ, ಪ್ರಧಾನ ಕಾರ್ಯದರ್ಶಿ ಮನೀಶ್ ಕುಲಾಲ್, ಮಹಿಳಾ ಘಟಕದ ಗುರ್ಕಾರ್ದಿ ಮಲ್ಲಿಕಾ ಪ್ರಸಾದ್, ಗಣೇಶ್ ಭಟ್ ಮಕರಂದ ಇತ್ತೆರ್.

ಪುತ್ತಿಲ ಪರಿವಾರದ ಕಾರ್ಯದರ್ಶಿ ರವಿಕುಮಾರ್ ರೈ ಕೆದಂಬಾಡಿ ಮಠ ಸಭೆ ಸುಧಾರಿಕೆ ಮಲ್ತೆರ್.

ದೇವೆರೆ ಪಾದ ಸೇರಿಯೆರ್ ಕುಮಾರಪರ್ವತ ಗಿರಿಗದ್ದೆದ ಮಹಾಲಿಂಗ ಭಟ್ರ್

ಸುಬ್ರಹ್ಮಣ್ಯ: ಚಾರಣಪ್ರಿಯೆರ್ ಪಂದ್ ಪುದರ್ ಪಡೆನ ಗಿರಿಗದ್ದೆ ಮಹಾಲಿಂಗ ಭಟ್ ಹುಷಾರ್ ದಾಂತೆ ಇನಿ ಕುಡ್ಲದ ಆಸ್ಪತ್ರೆಡ್ ತೀರ್ ಪೋಯೆರ್. ಕುಮಾರಪರ್ವತ ಚಾರಣಿಗೆರೆಗ್ ಗಿರಿಗದ್ದೆದ ಇಲ್ಲಲ್ ವಿಶ್ರಾಂತಿ, ಕಾಫಿ, ವನಸ್, ತಿಂಡಿ, ಚಹಾ ವ್ಯವಸ್ಥೆ ಮಲ್ತೊಂದು ಇತ್ತಿನ ಮಹಾಲಿಂಗ ಭಟ್ ವಾರದ ಪಿರ ಹಾರ್ಟ್ ಅಟ್ಯಾಕ್ ಆದ್ ಕುಡ್ಲದ ಅತ್ತಾವರ ಕೆಎಂಸಿ ಆಸ್ಪತ್ರೆಡ್ ಚಿಕಿತ್ಸೆ ಪಡೆದ್ ಹುಷಾರ್ ಆದಿತ್ತೆರ್.

ಕುಡ್ಲಡ್ ಇಪ್ಪುನ ಮಗಲ್ ನ ಇಲ್ಲಲ್ ವಿಶ್ರಾಂತಿಡ್ ಇತ್ತಿನ ಅರೆಗ್ ಪಿರ ತಿಗಲೆ ಬೇನೆ ಸುರು ಆದ್ ದೇವೆರೆ ಪಾದ ಸೆರಿಯೆರ್. ಮೇರೆಗ್ ಒರಿ ಮಗೆ, ಮೂಜಿ ಜನ ಪೊಂಜೊಕುಲು ಉಲ್ಲೆರ್. ಕುಮಾರಪರ್ವತ ಸಾದಿದ ಗಿರಿಗದ್ದೆಡ್ ಇಲ್ಲ್ ಇತ್ತಿನ ಮೇರ್ ಮಹಾಲಿಂಗ ಭಟ್ ಗಿರಿಗದ್ದೆ ಭಟ್ರ್ ಪಂದೆ ಪುದರ್ ಪಡೆದಿತ್ತೆರ್. ಕುಮಾರಪರ್ವತ ಚಾರಣಿಗೆರೆಗ್ ಉಪಚಾರ, ಮಾರ್ಗದರ್ಶನ, ಆಹಾರ ತಯಾರ್ ಮಲ್ತ್ ಕೊರ್ಪುನ, ಆಶ್ರಯ ಕೊರ್ಪುನ ಮುಖೆನ ಚಿರಪರಿಚಿತೆರಾದಿತ್ತೆರ್. ಕುಮಾರಪರ್ವತ ಚಾರಣಗ್ ಪೋಪಿನ ಎಚ್ಚಿನಕುಲು ಮೇರೆನ್ ಸಂಪರ್ಕ ಮಲ್ತ್ ದೆ ಬರೊಂದು ಇತ್ತೆರ್.

ಕುಮಾರಧಾರಡ್ ಕುಕ್ಕೆ ಸುಬ್ರಹ್ಮಣ್ಯನ ಅವಭೃತ ಉಚ್ಚಯ

ಸುಬ್ರಹ್ಮಣ್ಯ: ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವೆರ್ನ ಚಂಪಾಷಷ್ಠಿ ಜಾತ್ರಾ ಮಹೋತ್ಸವದ ಪ್ರಯುಕ್ತ ಮಾರ್ಗಶಿರ ಶುದ್ಧ ಸಪ್ತಮಿದ ದಿನವಾಯಿನ ಅಂಗಾರೆ ಕಾಂಡೆ ಕುಮಾರಾಧಾರಾತುದೆಟ್ಟ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವೆರ್ನ ನೌಕಾವಿಹಾರ ಬೊಕ್ಕ ಅವಭೃತ ಉಚ್ಚಯ ಸಂಪನ್ನ ಆಂಡ್.

ದೇವಲ್ಯದ ಪ್ರಧಾನ ಅರ್ಚಕೆರ್ ವೇದಮೂರ್ತಿ ಸೀತಾರಾಮ ಎಡಪಡಿತ್ತಾಯ ಅವಭೃತ ಉಚ್ಚಯದ ಧಾರ್ಮಿಕ ವಿಧಿವಿಧಾನ ನಡಪಾದ್ ಕೊರಿಯೆರ್. ಅರ್ಚಕೆರ್ ವೇದಮೂರ್ತಿ ರಾಜೇಶ್ ನಡ್ಯಂತಿಲ್ಲಾಯೆರ್ ಬೊಕ್ಕ ವೇದಮೂರ್ತಿ ಸತ್ಯನಾರಾಯಣ ನೂರಿತ್ತಾಯೆರ್ ಉತ್ಸವದ ವೈದಿಕ ವಿಧಿ ವಿಧಾನಡ್ ಸಹಕರಿಸಾಯೆರ್. ಭಕ್ತೆರ್ ಶ್ರೀ ದೇವೆರ್ನ ಅವಭೃತ ಸ್ನಾನಡ್ ಪಾಲ್ ಪಡೆದ್ ಪುಣ್ಯ ಸ್ನಾನ ಮಲ್ತೆರ್. ಕಾಂಡೆ ದೇವಸ್ಥಾನದ ದ್ವಾದಶಿ ಮಂಟಪಡ್ ಓಕುಳಿ ಪೂಜೆ ಬೊಕ್ಕ ಓಕುಳಿ ಚೆಲ್ಲಾಟ ನೆರವೇರಿಸಾಯೆರ್. ಬೊಕ್ಕ ದೇವೆರೆಗ್ ಓಕುಳಿ ಸಮರ್ಪಣೆಯಾದ್ ಭಕ್ತಾದಿಲೆಗ್ ಓಕುಳಿ ಪ್ರೋಕ್ಷಣೆ ಬೊಕ್ಕ ಓಕುಳಿ ಚೆಲ್ಲಾಟ ನಡತ್ಂಡ್.

ಕುಮಾರಧಾರೆದ ಮತ್ಸ್ಯತೀರ್ಥದ ಶ್ರೀ ದೇವೆರ್ನ ಜಳಕದ ಗುಂಡಿರ್ದ್ ದೇವೆರ್ನ ಅವಭೃತೋತ್ಸವ ನಡತ್ಂಡ್. ಕ್ಷೇತ್ರ ಪುರೋಹಿತೆರ್ ಮದುಸೂಧನ ಕಲ್ಲೂರಾಯ ನೇತೃತ್ವಡ್ ಪುರೋಹಿತೆರ್ ಮಂತ್ರಘೋಷ ನಡಪಾದ್ ಕೊರಿಯೆರ್. ಈ ಪೊರ್ತುಡು ಶ್ರೀ ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿದ ಗುರ್ಕಾರ್ಲು ಮೋಹನರಾಂ ಸುಳ್ಳಿ, ಕಾರ್ಯ ನಿರ್ವಹಣಾಧಿಕಾರಿ ಡಾ|ನಿಂಗಯ್ಯ, ವ್ಯವಸ್ಥಾಪನಾ ಸಮಿತಿ ಸದಸ್ಯೆರ್ ವನಜಾ.ವಿ.ಭಟ್, ಪ್ರಸನ್ನ ದರ್ಬೆ, ಪಿಜಿಎಸ್‌ಎನ್ ಪ್ರಸಾದ್, ಶ್ರೀವತ್ಸ ಬೆಂಗಳೂರು, ಶೋಭಾ ಗಿರಿಧರ್, ಮನೋಹರ ರೈ, ಲೋಕೇಶ್ ಮುಂಡುಕಜೆ,ಬ್ರಹ್ಮರಥ ದಾನಿಲೆಡ್ ಒರಿ ಆಯಿನ ಉದ್ಯಮಿ ಅಜಿತ್ ಶೆಟ್ಟಿ, ಮಾಸ್ಟರ್ ಪ್ಲಾನ್ ಮೇಲುಸ್ತುವಾರಿ ಸಮಿತಿ ಸದಸ್ಯೆರ್ ಪವನ್ ಎಂ.ಡಿ ದೇವಲ್ಯದ ಸಿಬ್ಬಂದಿಲು, ಭಕ್ತೆರ್ ಇತ್ತೆರ್. ಶ್ರೀ ಕುಕ್ಕೆ ಸುಬ್ರಹ್ಮಣ್ಯ ದೇವೆರ್ನ ನೌಕಾವಿಹಾರ ಬೊಕ್ಕ ಅವಭೃತೋತ್ಸವದ ಪೊರ್ತುಡು ಕ್ಷೇತ್ರದ ಆನೆ ಯಶಸ್ವಿ ಮಾತೆರ್ನ ಒಟ್ಟಿಗೆ ನೀರಾಟ ಗೊಬ್ಬುದು ಕುಷಿ ಪಡೆಯೆರ್. ಡಿ.24 ತಾನಿ ಮಾರ್ಗಶಿರ ಶುದ್ಧ ದ್ವಾದಶಿದಾನಿ ಕೊಪ್ಪರಿಗೆ ಜಪ್ಪುನ ಒಟ್ಟಿಗೆ ವಾರ್ಷಿಕ ಚಂಪಾಷಷ್ಠಿ ಜಾತ್ರೆ ಮುಕ್ತಾಯ ಆವೆರೆ ಉಂಡು.

ಕುಕ್ಕೆ ಸುಬ್ರಹ್ಮಣ್ಯ ದೇವಲ್ಯದ ಅನ್ನದಾನಗ್ ಒಂಜಿ ಕೋಟಿ ರೂ. ಕೊರ್ನ ಭಕ್ತೆ !

ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಾಲಯದ ಅನ್ನದಾನಗ್ ತೆಲಂಗಾಣದ ಸಚಿವೆರ್ ಶ್ರೀನಿವಾಸ ರೆಡ್ಡಿ ಪನ್ಪುನಾರ್ ಒಂಜಿ ಕೋಟಿ ರೂ. ಪನವುನು ಅನ್ನದಾನಗ್ ಕೊರ್ದು ಪರಕೆ ಸಂದಾಯೆರ್. ತನ್ನ ಮಗಲ್ ನ ಮದಿಮೆಗಾದ್ ಮಲ್ತಿನ ಪ್ರಾರ್ಥನೆ ಫಲಿಸಾಯಿನ ಕಾರಣ ಈ ಸೇವೆ ಸಂದೈತ ಮಲ್ದೆರ್.

ಸಚಿವೆರ್ ಶ್ರೀನಿವಾಸ ರೆಡ್ಡಿ ಕುಟುಂಬ ಸಮೇತ ಶ್ರೀ ಕ್ಷೇತ್ರಗ್ ಬತ್ತ್ ದ್ ಅಪಾರ ಭಕ್ತಿ ತೊಜಪಾದೆರ್. ಈ ಪೊರ್ತುಡು ಅರೆನ ಒಟ್ಟಿಗೆ ಮಗಲ್, ಮರ್ಮಯೆ, ಅಣ್ಣೆ, ಬೊಕ್ಕ ತಿರುಪತಿದ ಪ್ರೊಫೆಸರ್ ಗಣಪತಿ ಭಟ್ ಇತ್ತೆರ್.

ವ್ಯವಸ್ಥಾಪನಾ ಸಮಿತಿದ ಗುರ್ಕಾರ್ಲು ಮೋಹನ್ ರಾಂ ಸುಳ್ಳಿ, ಕಾರ್ಯನಿರ್ವಹಣಾಧಿಕಾರಿ ಡಾl ನಿಂಗಯ್ಯ, ವ್ಯವಸ್ಥಾಪನಾ ಸಮಿತಿದ ಸದಸ್ಯೆರ್ ಪಿ.ಜಿ.ಎಸ್.ಎನ್ ಪ್ರಸಾದ್, ಪ್ರಸನ್ನ ದರ್ಬೆ, ಶ್ರೀವತ್ಸ, ಲೋಕೇಶ್ ಮುಂಡಕಜೆ, ಶೋಭಾ ಗಿರಿಧರ್, ವನಜಾ ಭಟ್ ಮಾತ ಒಟ್ಟಿಗೆ ಇತ್ತ್ ದ್ ಚೆಕ್ ಹಸ್ತಾಂತರ ಮಲ್ತೆರ್.