ಪುತ್ತೂರ್ದ ಸುದ್ದಿ | Puttur News

ಪೆರ್ನೆ-ಕಡಂಬು: ಬೀಡಿ ಉದ್ಯಮಿನ ಇಲ್ಲಗ್ ಆದಾಯ ತೆರಿಗೆ ಅಧಿಕಾರಿಲೆನ ದಾಳಿ

 ಪುತ್ತೂರು(ಪೆರ್ನೆ): ಮಾಣಿ- ಉಬಾರ್ ಹೈವೇದ ಪೆರ್ನೆ ಕಡಂಬು ನಿವಾಸಿ ಅನಿತಾ ಬೀಡಿ ಉದ್ಯಮಿ ಇಸ್ಮಾಯಿಲ್‌ ಹಾಜಿ ಅರೆನ ಇಲ್ಲಗ್ ಇನಿ ಬೊಲ್ಪುಗು ಆದಾಯ ತೆರಿಗೆ ಅಧಿಕಾರಿಲು ದಾಳಿ ಮಲ್ತ್‌ದೆರ್.
ಇಸ್ಮಾಯಿಲ್‌ ಹಾಜಿ ಮೆರೆನ ಜೋಕುಲಾಯಿನ ಮಹಮ್ಮದ್‌ ಆಲಿ, ಯೂಸೂಫ್‌, ಮುಸ್ತಫಾ ಬೊಕ್ಕ ಝಕಾರಿಯಾ ಬೀಡಿ ಉದ್ಯಮ ಅತ್ತಂದೆ ದಿನಸಿ ಅಂಗಡಿ ಬೊಕ್ಕ ಬೇಕರಿ ಅಂಗಡಿನ್‌ ನಡಪಾವೊಂದು ಉಲ್ಲೆರ್. ಮಸ್ತ್‌ ಗಾಡಿಡ್‌ ಬತ್ತಿನ ಆದಾಯ ತೆರಿಗೆ ಅಧಿಕಾರಿಲು ಇಲ್ಲಲ್ ದಾಖಲೆಗಾದ್ ತಪಾಸಣೆ ಮಲ್ತೊಂದು ಉಲ್ಲೆರ್ ಪಂದ್‌ ತೆರಿದ್‌ ❌ಬೈದುಂಡ್. ಬೈದ್ಂಡ್.

“ಬೆಂಗಳೂರು ಕಂಬುಲ ನಮ್ಮ ಕಂಬುಲ”: ಎಲ್ಲೆ (ಅ.11) ಕರೆ ಪೂಜೆ

ಕರಾವಳಿ ಭಾಗದ ಸಾಂಸ್ಕೃತಿಕ ಕ್ರೀಡೆಯಾದಿಪ್ಪುನ ಕಂಬುಲ ನವೆಂಬರ್ 25 ಬೊಕ್ಕ 26 ದಾನಿ ಬೆಂಗಳೂರುದ ಅರಮನೆ ಮೈದಾನಡ್ ಪುತ್ತೂರು ಶಾಸಕೆರ್‌ ಬೊಕ್ಕ ಉಬಾರ್ ವಿಜಯ ವಿಕ್ರಮ ಜೋಡುಕೆರೆ ಕಂಬಳ ಸಮಿತಿದ ಗುರ್ಕಾರ್ಲು ಅಶೋಕ್ ಕುಮಾರ್ ರೈ ನೇತೃತ್ವಡ್ ನಡಪರೆ ಉಂಡು.‌

ಕಂಬುಲ ತೂವೆರೆ ಲಕ್ಷಾಂತರ ಜನ ಬರ್ಪುನ ನಿರೀಕ್ಷೆ ಉಂಡು. 145 ಮೀ. ಉದ್ದದ ಕಂಬುಲದ ಕರೆ ನಿರ್ಮಾಣ ಮಲ್ಪೆರೆ ಉಲ್ಲೆರ್.‌ ಈ ಹಿನ್ನೆಲೆಡ್ ಎಲ್ಲೆ (ಅ.11) ದಾನಿ ಬೊಲ್ಪುಗು ಕರೆ ಪೂಜೆ ಕಾರ್ಯಕ್ರಮ ನಡಪರೆ ಉಂಡು.

ಪುತ್ತೂರು: ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊನ್ನ ಕಾಲೇಜ್ ಕಲ್ಪಾರ್ಥಿ

ಪುತ್ತೂರು: ಕಾಲೇಜ್ ಕಲ್ಪಾರ್ಥಿ ಒರಿ ಬಲ್ಲ್ ಗೆತೊಂದು ಆತ್ಮಹತ್ಯೆ ಮಲ್ತೊಂದಿನ ಘಟನೆ ಪುತ್ತೂರುಡು ನಡತ್‌ದ್ಂಡ್.
ತೀರ್ದಿನಾಯೆ ಕುರಿಯ ಪಡ್ಪು ನಿವಾಸಿ, ಫಿಲೋಮಿನಾ ಕಾಲೇಜಿದ ಸೆಕೆಂಡ್ ಪಿಯು ಕಲ್ಪಾರ್ಥಿ ವೀಕ್ಷಿತ್(17) ಪಂದ್ ತೆರಿದ್‌ಬೈದ್ಂಡ್. ವೀಕ್ಷಿತ್ ಬಲ್ಲ್ ಪಾಡೊಂದು ಜೀವ ಕಲೆವೊನೆರ ನೆವನ ದಾದ ಪಂದ್ ತೆರಿದ್‌ಬೈದಿಜಿ. ಸಂಪ್ಯ ಪೊಲೀಸೆರ್‌ ಜಾಗೆಗ್‌ ಬತ್ತ್‌ದ್‌ ಪರಿಶೀಲನೆ ಮಲ್ತ್‌ದೆರ್.

ಅ.22: ಪುತ್ತೂರುಡು ‘ಪಿಲಿಗೊಬ್ಬು-2023’ ಬೊಕ್ಕ ‘ಫುಡ್ ಫೆಸ್ಟಿವಲ್

ಪುತ್ತೂರು: ವಿಜಯ ಸಾಮ್ರಾಟ್(ರಿ) ಪುತ್ತೂರು ನೆತ್ತ ಮುತಾಲಿಕೆಡ್ ಪುತ್ತೂರುಡು ಸುರುತ ಸರ್ತಿ ನಡಪುನ ‘ಪಿಲಿಗೊಬ್ಬು-2023’ ಬೊಕ್ಕ ‘ಫುಡ್ ಫೆಸ್ಟಿವಲ್’ ಕಾರ್ಯಕ್ರಮ ಅ.22ದಾನಿ ಮಹತೋಭಾರ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನದ ದೇವರಮಾರು ಕಂಡಡ್‌ ನಡಪರೆ ಉಂಡು.
ಈ ಪಿಲಿಗೊಬ್ಬು ಕಾರ್ಯಕ್ರಮಡ್ ಆಹ್ವಾನಿತ 10 ತಂಡಲೆಗ್‌ ಮಾತ್ರ ಪಾಲ್‌ ಪಡೆಯೆರೆ ಅವಕಾಶ. 15 ಪಿಲಿಕ್ಲೆಗ್ ಮಾತ್ರ ಒಂಜಿ ತಂಡಡ್‌ ಅವಕಾಶವಿದ್ದು, ಪ್ರತಿ ತಂಡಗ್ 23 ನಿಮಿಷಗಳ ಅವಕಾಶ ಕೊರ್ಪೆರ್. ಈ ಕಾರ್ಯಕ್ರಮಡ್ ಸ್ಯಾಂಡಲ್‌ವುಡ್ ಬೊಕ್ಕ ಕೋಸ್ಟಲ್‌ವುಡ್‌ ನಟ ನಟಿಯೆರ್‌ ಪಾಲ್‌ ಪಡೆಯೆರೆ ಉಲ್ಲೆರ್. ಇನಾಮುಲು ಸುರುತ ಇನಾಮು -3,00,000/-ರೂ. ರಡ್ಡನೇ ಇನಾಮು -2,00,000/-ರೂ. ಮೂಜನೇ ಇನಾಮು -1,00,000/-ರೂ. ಅಂಚೆನೆ 10,000/-ರೂ. ಐನ್ ವೈಯಕ್ತಿಕ ಇನಾಮು ಉಂಡು.

ಅ.8: ಸುಬ್ರಹ್ಮಣ್ಯಗ್‌ ಮಾಜಿ ಪ್ರಧಾನಿ ಹೆಚ್.ಡಿ. ದೇವೇ ಗೌಡ ಭೇಟಿ

ಮಾಜಿ ಪ್ರಧಾನಿ ಹೆಚ್.ಡಿ. ದೇವೇ ಗೌಡ ಅ.8 ದಾನಿ ಸುಬ್ರಹ್ಮಣ್ಯ ದೇವಸ್ಥಾನಕ್ಕೆ ಭೇಟಿ ಕೊರಿಯೆರೆ ಉಲ್ಲೆರ್. ಎಲ್ಲೆ ಬಯ್ಯಗ್ ಕುಕ್ಕೆ ಸುಬ್ರಹ್ಮಣ್ಯಡ್ ಪೂಜೆ ಸಲ್ಲಿಸಾದ್, ಸುಬ್ರಹ್ಮಣ್ಯಡ್ ವಾಸ್ತವ್ಯ ಉಲ್ಲೆರ್ ಅ. 9 ದಾನಿ ಕಾಂಡೆ ಸುಬ್ರಹ್ಮಣ್ಯ ದೇವಸ್ಥಾನಡ್ ಪೂಜೆ ಸಲ್ಲಿಸಾದ್ ಬೊಕ್ಕ ತನ್ನ ಊರುಗು ಪೋವೆರೆ ಉಲ್ಲೆರ್‌ ಪಂದ್‌ ತೆರಿದ್‌ ಬೈದುಂಡ್.

ಪುತ್ತೂರು : ಶ್ರೀ ಶಾರದಾ ಭಜನಾ ಮಂದಿರಡ್ 89ನೇ ವರ್ಷದ ‘ಶಾರದೋತ್ಸವ ʼ

ಪುತ್ತೂರು ಶ್ರೀ ಶಾರದಾ ಭಜನಾ ಮಂದಿರಡ್ 89ನೇ ವರ್ಷದ ನವರಾತ್ರಿ ಉತ್ಸವ ಅ.15 ರಿಂದ 24 ಮುಟ್ಟ ಬೇತೆ ಬೇತೆ ಧಾರ್ಮಿಕ ಕಾರ್ಯಕ್ರಮ ಬೊಕ್ಕ ಸಾಂಸ್ಕೃತಿಕ ಕಾರ್ಯಕ್ರಮದೊಟ್ಟಿಗೆ ನಡಪೆರೆ ಉಂಡು. ಅ.15 ದಾನಿ ನವರಾತ್ರಿ ಪೂಜೆ ಶುರು ಆದ್, ಅ.20 ದಾನಿ ಶ್ರೀ ಶಾರದಾ ದೇವಿನ ಪ್ರತಿಷ್ಠೆ, ಅ.24 ದಾನಿ ಶ್ರೀ ಶಾರದಾ ಮೂರ್ತಿನ ವಿಸರ್ಜನೆ ನಡಪೆರೆ ಉಂಡು.
ಅ.24 ದಾನಿ ಶ್ರೀ ಶಾರದಾ ದೇವಿಯ ಭವ್ಯ ಶೋಭಾಯಾತ್ರೆ ನಡಪೆರೆ ಉಂಡು. ಕಾರ್ಯಕ್ರಮನ್ ಸಂಸದೆರ್ ನಳಿನ್ ಕುಮಾರ್ ಕಟೀಲ್ ಉದಿಪನ ಮಲ್ಪೆರೆ ಉಲ್ಲೆರ್. ಶೋಭಾಯಾತ್ರೆದ ಸಂಚಾಲಕೆರಾಯಿನ ಸೀತಾರಾಮ ರೈ ಕೆದಂಬಾಡಿಗುತ್ತು ನೇತೃತ್ವಡ್ ಬೊಳ್ವಾರು ಸರ್ಕಲ್‌ರ್ದ್ ವೇದಘೋಷ, ಚೆಂಡೆಮೇಳ, ವಾದ್ಯವೃಂದ, ಕುಣಿತ ಭಜನೆದೊಟ್ಟಿಗೆ ಶ್ರೀ ದೇವಿನ ಭವ್ಯ ಶೋಭಾಯಾತ್ರೆ ನಡಪೆರೆ ಉಂಡು. ಮೆರವಣಿಗೆಡ್‌ ಪಾಲ್‌ಪಡೆನ ಸ್ತಬ್ದ ಚಿತ್ರಗ್ ಬಹುಮಾನ ಈ ಸರ್ತಿ ಶ್ರೀ ಶಾರದಾ ದೇವಿಯ ಭವ್ಯ ಶೋಭಾಯಾತ್ರೆಡ್ ಶಿಸ್ತುಬದ್ಧವಾದ್ ಪ್ರದರ್ಶನ ಮಲ್ಪುನ ಸ್ತಬ್ದ ಚಿತ್ರಗ್ (ಟ್ಯಾಬ್ಲೋ) ಬಹುಮಾನ ಉಂಡು. ಸುರುತ ಇನಾಮು 1 ಲಕ್ಷ ರೂ. ರಡ್ಡನೇ ಇನಾಮು 50 ಸಾವಿರ ರೂ. ಜಿಲ್ಲೆದ ಬೇತೆ ಬೇತೆ ಭಾಗರ್ದ್ ಪಾಲ್ ಪಡೆಯುನ ತಂಡಲೆಗ ಮುಕ್ತ ಅವಕಾಶ ಉಂಡು ಪಂದ್‌ ಶೋಭಾಯಾತ್ರೆ ಸಂಚಾಲಕೆರ್ ಸೀತಾರಾಮ ರೈ ಕೆದಂಬಾಡಿಗುತ್ತು ತೆರಿಪಾದೆರ್.

ವಿವೇಕಾನಂದ ಇಂಜಿನಿಯರಿಂಗ್ ಕಾಲೇಜ್‌ದ ಎಂ.ಸಿ.ಎ ವಿಭಾಗಗ್ 100% ಫಲಿತಾಂಶ‌

ಪುತ್ತೂರು : ಬೆಳಗಾವಿದ ವಿಶ್ವೇಶ್ವರಯ್ಯ ತಾಂತ್ರಿಕ ವಿಶ್ವವಿದ್ಯಾನಿಲಯದ ಸ್ನಾತಕೋತ್ತರ ಎಂ.ಸಿ.ಎ ವಿಭಾಗದ ಕಲಾರ್ಥಿಲೆನ ಫಲಿತಾಂಶ ಪ್ರಕಟ ಆದ್, ಪುತ್ತೂರುದ ವಿವೇಕಾನಂದ ಕಾಲೇಜ್ ಆಫ್ ಇಂಜಿನಿಯರಿಂಗ್ ಎಂಡ್ ಟೆಕ್ನಾಲಜಿಯ ಎಂ.ಸಿ.ಎ ವಿಭಾಗದ ಕಲ್ಪಾರ್ಥಿಲು 100% ಫಲಿತಾಂಶದೊಟ್ಟಿಗೆ ಎಡ್ಡೆ ಸಾಧನೆ ಮಲ್ತ್‌ದೆರ್.‌
ಕರಿನ ಸೆಪ್ಟೆಂಬರ್ ತಿಂಗೊಲುಡು ನಡತ್ತಿನ ಪರೀಕ್ಷೆಡ್ ಕಾಲೇಜ್‌ರ್ದ್ ಒಟ್ಟು 51 ಕಲ್ಪಾರ್ಥಿಲು ಹಾಜರಾದ್ 48 ಕಲ್ಪಾರ್ಥಿಲು ವಿಶಿಷ್ಟ ಶ್ರೇಣಿಡ್ ಬೊಕ್ಕ 3 ಕಲ್ಪಾರ್ಥಿಲು ಸುರುತ ಶ್ರೇಣಿಡ್ ತೇರ್ಗಡೆ ಆತೆರ್.‌ ಅರ್ಹ ಕಲ್ಪಾರ್ಥಿಲು ಕ್ಯಾಂಪಸ್ ಸೆಲೆಕ್ಷನ್‌ದ ಮುಖೇನ ಬೇತೆ ಬೇತೆ ಕಂಪೆನಿಲೆಗ್ ಆಯ್ಕೆಯಾತೆರ್.

ಪುತ್ತೂರು : ಪಡೀಲ್ ಹೋಟೆಲ್‌ಡ್‌ ತೂ…!!

ಪುತ್ತೂರು : ಹೋಟೇಲ್‌ ಒಂಜೆಟ್ಟ್‌ ತೂ ಪೊತ್ತಿನ ಘಟನೆ ಪಡೀಲ್ ಕೈತಲ್‌ ನಡತ್‌ಂಡ್. ಪಡೀಲ್‌ದ ಹೋಟೆಲ್‌ಡ್ ಗ್ಯಾಸ್ ಸಿಲಿಂಡರ್‌ಗ್‌ ತೂ ಪತ್ತಿನ ಪರಿಣಾಮಡ್‌ ಈ ಅವಘಡ ಆತ್‌ಂಡ್. ಘಟನೆ ನಡತ್ತಿನ ಜಾಗೆಗ್‌ ಅಗ್ನಿಶಾಮಕದಕುಲ್‌ ಬತ್ತ್‌ದ್‌ ತೂ ತೆಕ್ಕಾದೆರ್‌ ಪಂದ್‌ ತೆರಿದ್‌ ಬೈದುಂಡ್.

ಶೌರ್ಯ ಜಾಗರಣ ರಥಯಾತ್ರೆಗ್ ಸಂಪಾಜೆಡ್ ಸ್ವಾಗತ‌

ವಿಶ್ವ ಹಿಂದೂ ಪರಿಷತ್ 60ನೇ ವರ್ಷಗ್ ಪಾದಾರ್ಪಣೆ ಮಲ್ತಿನ ಲೆಕ್ಕಡ್ ಬಜರಂಗದಳದ ನೇತೃತ್ವಡ್ ದೇಶಾದ್ಯಂತ ಶೌರ್ಯ ಜಾಗರಣ ರಥಯಾತ್ರೆ ನಡತೊಂದು ಉಂಡು.

ಚಿತ್ರದುರ್ಗರ್ದ್‌ ಪಿದಡಿನ ಶೌರ್ಯ ಜಾಗರಣ ರಥಯಾತ್ರೆಗ್ ವಿಶ್ವ ಹಿಂದೂ ಪರಿಷತ್ ಬಜರಂಗದಳ ಸುಳ್ಯ ಪ್ರಖಂಡ ಬೊಕ್ಕ ಕಡಬ ಪ್ರಖಂಡ ವತಿರ್ದ್ ಸಂಪಾಜೆಡ್ ಸ್ವಾಗತ ಮಲ್ತೆರ್.‌

ಸಂಪಾಜೆ ಪೆಟ್ರೋಲ್ ಪಂಪ್‌ದ ಕೈತಲ್ ಮಾಜಿ ಸಚಿವೆರ್ ಎಸ್. ಅಂಗಾರೆರ್‌ ತಾರಾಯಿ ಹಾಕುನ ಮುಕೇನ ರಥಯಾತ್ರೆಗ್ ಸ್ವಾಗತ ಮಲ್ತೆರ್. ಬೊಕ್ಕ ಅಲ್ಪರ್ದ್ ಸಂಪಾಜೆ ಚೆಕ್‌ ಪೋಸ್ಟ್ ಮುಟ್ಟ ಪಾದಯಾತ್ರೆದ ಮುಕೇನ ವಿಶ್ವ ಹಿಂದೂ ಪರಿಷತ್ ಬೊಕ್ಕ ಬಜರಂಗದಳದ ಕಾರ್ಯಕರ್ತೆರ್‌ ಪೋಯೆರ್.

ಈ ಪೊರ್ತುಡು ಸುಳ್ಯ ತಾಲೂಕು ಬಜರಂಗದಳದ ಸಂಚಾಲಕೆರ್ ಹರಿಪ್ರಸಾದ್ ಎಲಿಮಲೆ, ಕಡಬ ತಾಲೂಕು ಬಜರಂಗದಳದ ಸಂಚಾಲಕೆರ್ ರಾಜೇಶ್ ಉದನೆ, ಕಾರ್ಯದರ್ಶಿಲಾಯಿನ ನವೀನ್ ಎಲಿಮಲೆ, ಜಯಂತ ಕಲ್ಲುಗುಡ್ಡೆ, ಸುಳ್ಯ ಪ್ರಖಂಡ ಗುರ್ಕಾರ್ಲು ಸೋಮಶೇಖರ ಪೈಕ, ಕಡಬ ಪ್ರಖಂಡ ಗುರ್ಕಾರ್ಲು ರಾಧಾಕೃಷ್ಣ ಕೋಲ್ಪೆ, ಸುಳ್ಯ ಬಿಜೆಪಿ ಮಂಡಲ ಸಮಿತಿದ ಗುರ್ಕಾರ್ಲು ಹರೀಶ್ ಕಂಜಿಪಿಲಿ, ಪ್ರಧಾನ ಕಾರ್ಯದರ್ಶಿ ಸುಬೋದ್ ಶೆಟ್ಟಿ ಮೇನಾಲ, ಅರಂತೋಡು ತೊಡಿಕಾನ ಪ್ರಾ.ಕೃ.ಪ.ಸ.ಸಂಘದ ಗುರ್ಕಾರ್ಲು ಸಂತೋಷ್ ಕುತ್ತಮೊಟ್ಟೆ, ವಿಶ್ವ ಹಿಂದೂ ಪರಿಷತ್ ಬೊಕ್ಕ ಬಜರಂಗದಳದ ಕಾರ್ಯಕರ್ತೆರ್‌ ಇತ್ತೆರ್.

ಮಾಣಿ: ಇಂಚರ ರೈತ ಉತ್ಪಾದಕರ ಕಂಪನಿದ ಸುರುತ ವಾರ್ಷಿಕ ಮಹಾಸಭೆ

ಮಾಣಿ: ಇಂಚರ ರೈತ ಉತ್ಪಾದಕರ ಕಂಪನಿ ನಿಯಮಿತ ನೆತ್ತ 2022-23ನೇ ಸಾಲ್‌ದ ಸುರುತ ವಾರ್ಷಿಕ ಮಹಾಸಭೆ ಮಾಣಿ ಕುಲಾಲ ಸಂಘಡ್‌ ನಡತ್‌ಂಡ್.‌ ಸಭೆತ ಗುರ್ಕಾರ್ಮೆನ್ ಪ್ರಕಾಶ್‌ ಕೆ.ಎಸ್‌ ವಹಿಸ್‌ದ್‌ ಇತ್ತೆರ್.

ವೇದಿಕೆಡ್ ನಿರ್ದೇಶಕೆರಾಯಿನ ಕೆ.ಎನ್‌ ಗಂಗಾಧರ ಆಳ್ವ, ವಸಂತಿ ಸಂಜೀವ ಪೂಜಾರಿ, ಜನಾರ್ಧನ ನಾಯ್ಕ, ಪೆರಾಜೆ, ಉಮೇಶ್‌ ಪಿ, ರೋಹಿತಾಶ್ವ, ರಮಣಿ ಲೋಬೋ, ಜನಾರ್ಧನ ನಲಿಕೆ, ರೂಪೇಶ್‌ ರೈ ಇತ್ತೆರ್.‌ 2022-23ನೇ ವರ್ಷದ ಆಡಳಿತ ಮಂಡಳಿದ ವರದಿ ಬೊಕ್ಕ ಲೆಕ್ಕ ಪರಿಶೋಧನಾ ವರದಿನ್ ಪಿ. ಗೌತಮ್‌ ಶೆಣೈ CEO ವಾಚನ ಮಲ್ತೆರ್. ರಾಮಕೃಷ್ಣ ಆಳ್ವ (CBBO)ನಬಾರ್ಡ್‌ದ ಬಗ್ಗೆ ಮಾಹಿತಿ ಕೊರಿಯೆರ್.‌