ಕುಡ್ಲದ ಸುದ್ದಿ | Mangalore News

ಕದ್ರಿ,ಕುದ್ರೋಳಿ, ಮಂಗಳಾದೇವಿ ದೇವಲ್ಯ ಬಾಂಬ್ ದ ಟಾರ್ಗೆಟ್ ಆದಿತ್ತ್ಂಡ್!!

ಕುಕ್ಕರ್ ಬಾಂಬ್ ಬ್ಲಾಸ್ಟ್ ಆರೋಪಿ ಶಾರೀಕ್ ತುಳುನಾಡ್‌ದ ಮೂಜಿ ಮಲ್ಲ ದೇವಲ್ಯಗ್ ಬಾಂಬ್ ದೀಪಿನ ಟಾರ್ಗೆಟ್ ಆದಿತ್ತ್ಂಡ್ ಪಂದ್ ತನಿಖೆ ಮಲ್ಪುನ ಪೊರ್ತುಡು ಪೊಲೀಸೆರೆಗ್ ಮಾಹಿತಿ ತಿಕ್ಕ್‌ದ್ಂಡ್.

ಆರೋಪಿನ ಮೊಬೈಲ್‌ಡ್ ಇತ್ತಿನ ಶಿವ ದೇವೆರ್ನ ಡೀಪಿ ದ ಗುಟ್ಟುನು ಬೆರಿ ಪತ್ ನಗ ಈ ಮಾಹಿತಿ ತಿಕ್ಕ್‌ದ್ಂಡ್. ಕುಡ್ಲದ ಮಂಗಳಾದೇವಿ ದೇವಲ್ಯ, ಕದ್ರಿದ ಮಂಜುನಾಥಸ್ವಾಮಿ ದೇವಲ್ಯ ಬೊಕ್ಕ ಕುದ್ರೋಳಿ ಗೋಕರ್ಣ ದೇವಲ್ಯ ಟಾರ್ಗೆಟ್ ಆದಿತ್ತ್ಂಡ್. ಲಕ್ಷ ದೀಪೋಚ್ಚಯದ ಪೊರ್ತುಡು ಬ್ಲಾಸ್ಟ್ ಮಲ್ತ್‌ದ್ ನೆತ್ತೆರ್‌ ದ ಓಕುಲಿ ಜಪುಡಾವೊಡು ಪಂದ್ ಪ್ಲಾನ್ ಮಲ್ದಿತ್ತೆ ಪಂದ್ ತೆರಿದ್ ಬೈದ್ಂಡ್.

ನ.25: ರಾಜಶ್ರೀ ಟಿ. ರೈ ಪೆರ್ಲ ಬರೆತಿನ “ರಡ್ಡ್ ಕವುಲೆ” ಬೂಕು ಬುಡುಗಡೆ ಲೇಸ್

ತುಳು ಕನ್ನಡ ಬರವುಗಾರ್ತಿ, ಸಂಶೋಧಕಿ ರಾಜಶ್ರೀ ಟಿ. ರೈ ಪೆರ್ಲ ಮೇರ್ ಮೊಡೆತಿನ “ರಡ್ಡ್ ಕವುಲೆ” ಬೂಕು ಬುಡುಗಡೆ ಕಜ್ಜೊ ನ. 25 ತಾರೀಕ್ ಸುಕ್ರಾರ ಮಧ್ಯಾಹ್ನ 2 ಗಂಟೆಗ್ ಟೈಮ್ಸ್ ಆಫ್ ಕುಡ್ಲ ತುಳು ಪತ್ರಿಕಾ ಚಾವಡಿಡ್ ನಡಪರೆ ಉಂಡು.

ಟೈಮ್ಸ್ ಆಫ್ ಕುಡ್ಲ ತುಳು ಪತ್ರಿಕೆದ ಮಾನಾದಿಗೆದ ಸಂಪೊಲಿಗೆದಾರ್ ಮುಲ್ಕಿ ಕರುಣಾಕರ ಶೆಟ್ಟಿ ಬೂಕು ಬುಡುಗಡೆ ಮಲ್ಪರೆ ಉಲ್ಲೆರ್. ಕುಡ್ಲ ವಿಶ್ವವಿದ್ಯಾನಿಲಯದ ಒತ್ತು ಪ್ರಾಧ್ಯಾಪಕೆರ್ ಡಾ| ಧನಂಜಯ ಕುಂಬ್ಳೆ ಮಾನಾದಿಗೆದ ಬಿನ್ನೆರ್ ಆದ್ ಪಾಲ್ ಪಡೆಯರೆ ಉಲ್ಲೆರ್. ಚಾವಡಿದ ಮಿತ್ತರ್ಮೆಡ್ ರಾಜಶ್ರೀ ಟಿ. ರೈ ಪೆರ್ಲ ಓಲಗ ಆಯರೆ ಉಲ್ಲೆರ್. ಅಂಚನೆ ಮಲ್ಲ ಬಿನ್ನೆರಾದ್ ಟೈಮ್ಸ್ ಆಫ್ ಕುಡ್ಲದ ಪ್ರಬಂಧಕೆರ್ ಭುವನ ದಿನೇಶ್ ಕುಂಪಲ, ಮುಖ್ಯ ಪ್ರಬಂಧಕೆರ್ ಪವನ್ ರಾಜ್, ಸಹ ಸಂಪಾದಕೆರ್ ಯಶೋಧರ ಕೋಟ್ಯಾನ್ ಲೇಸ್‌ಡ್ ಪಾಲ್ ಪಡೆಯರೆ ಉಲ್ಲೆರ್.

ಸನ್ನಿಧಿ ಟಿ. ರೈ ಪೆರ್ಲ ಬೂಕುದ ಪೊಲಬುನ್ ಮಲ್ಪರೆ ಉಲ್ಲೆರ್. ಅಂಚನೆ ದೀಕ್ಷಿತಾ ಕುರ್ನಾಡ್ ಕಜ್ಜೊ ಸುದಾರ್ಪಯರೆ ಉಲ್ಲೆರ್.

ಬಹರೈನ್ : ಅಮ್ಮ ಕಲಾವಿದರು ಬಹರೈನ್’ ಸಂಘಟನೆ ಮುತಾಲಿಕೆಡ್ “ಸಂಗೀತ ಗಾನ ಸಂಭ್ರಮ”

ಬಹರೈನ್: ಪುಗರ್ತೆದ ಕಲಾವಿದೆರೆನ ಒಟ್ಟುಗು ಮೋಹನ್ ದಾಸ್ ರೈ ಎರುಮ್ಬು ಮೆರೆನ ಸಕಾರಡ್ “ಅಮ್ಮ ಕಲಾವಿದರು ಬಹರೈನ್” ಮುತಾಲಿಕೆಡ್ “ಸಂಗೀತ ಗಾನ ಸಂಭ್ರಮ” ಲೇಸ್ ನ.18 ಗ್ ಸುಕ್ರಾರ ಬಹರೈನ್‌ದ ಇಂಡಿಯನ್ ಕ್ಲಬ್ಬಿದ ಕ್ರೀಡಾಂಗಣಡ್ ನಡತ್ಂಡ್.

ಪುಗರ್ತೆದ ಗಾಯಕೆರ್ ಪುತ್ತೂರು ಜಗದೀಶ್ ಆಚಾರ್ಯ, ಗಾಯಕಿ ಸಮನ್ವಿ ರೈ ಪುತ್ತೂರು, ಗಾಯಕಿ ದಿವ್ಯನಿಧಿ ರೈ ,ಕೊಳಲು ವಾದಕೆರ್ ದಿವ್ಯ ಧನುಷ್ ರೈ ಒಟ್ಟುಗು ಗಿಟಾರ್ ವಾದಕೆರ್ ಶರತ್ ಹಳೆಯಂಗಡಿ, ಡ್ರಮ್ ವಾದಕೆರ್ ವಾಮನ್ ಬೈಲೂರ್ , ಕೀ ಬೋರ್ಡ್ ವಾದಕೆರ್ ಶಿಜಿಮೊನ್ ,ತಬಲಾ ವಾದಕೆರ್ ಸುರೇಶ್ ಬಾಬು ಅಂಚನೆ ರೆಡ್ ಎಫ್ .ಎಂ ದ ರೇಡಿಯೋ ನಿರೂಪಕೆರ್ ಆರ್ .ಜೆ . ಪ್ರಸನ್ನ ಮೊಕ್ಲೆನ ಒಟ್ಟುಗು ಸುಮಾರ್ 4 ಘಂಟೆದ ಕಾಲ ಸಂಗೀತ ಗಾನ ಸಂಭ್ರಮ ಲೇಸ್ ನಡತ್ಂಡ್.

ಈ ಪೊರ್ತುಡು ಪುಗರ್ತೆದ ಗಾಯಕೆರ್ ಜಗದೀಶ್ ಆಚಾರ್ಯ ಪುತ್ತೂರ್ ಮೆರೆಗ್ “ಸ್ವರ ಸಾಮ್ರಾಟ್” ಬಿರ್ದ್ ಕೊರ್ದು ಮಾನಾದಿಗೆ ಮಲ್ತೆರ್. ಅಂಚನೆ ಬೇತೆ ಕಲಾವಿದೆರೆಗ್ಲಾ ಮಾನಾದಿಗೆ ಮಲ್ತೆರ್.

ಕುಕ್ಕರ್ ಬಾಂಬ್ ಪುಡಾದಿನ ಆರೋಪಿ ಶಾರೀಕ್‌ಗ್ ವೆಂಟಿಲೇಟರ್ ಘಟಕಡ್ ನಡತೊಂದು ಇಪ್ಪುನ ಚಿಕಿತ್ಸೆ

ಕುಡ್ಲ: ಕಂಕನಾಡಿ ನಗರ ಪೊಲೀಸ್ ಠಾಣೆ ಕೈತಲ್ ಸನಿವಾರ ರಿಕ್ಷಾಡ್ ಕುಕ್ಕರ್ ಬಾಂಬ್ ಪುಡಾದಿನ ಘಟನೆಡ್ ಪೆಟ್ಟಾದ್ ಆಸ್ಪತ್ರೆಡ್ ಚಿಕಿತ್ಸೆ ಪಡೆಯೊಂದು ಇಪ್ಪುನ ಆರೋಪಿ ಶಾರೀಕ್‌ನ್ ವೆಂಟಿಲೇಟರ್ ಘಟಕಡ್ ದಾಖಲ್ ಮಲ್ತ್‌ದ್ ಚಿಕಿತ್ಸೆ ಕೊರೊಂದುಲ್ಲೆರ್.

ಶಾರೀಕ್‌ನ ದೇಹ ಶೇ. 45 % ದಾತು ಪೊತ್ತ್‌ದ್ ಪೊತ್ಂಡ್. ಅಂಚಾದ್ ವೆಂಟಿಲೇಟರ್‌ಗ್ ವರ್ಗಾವಣೆ ಮಲ್ತ್‌ದೆರ್.

ಮುಡಿಪು: ನ.27 ಕ್ಕ್ ಎಸ್.ಕೆ. ಗೋಲ್ಡ್ ಸ್ಮಿತ್ ಇಂಡಸ್ಟ್ರಿಯಲ್ ಕೋ-ಅಪರೇಟಿವ್ ಸೊಸೈಟಿ ಸಂಸ್ಥೆದ 15 ನೇ ಶಾಖೆ ಉದಿಪನ

ಎಸ್.ಕೆ. ಗೋಲ್ಡ್ ಸ್ಮಿತ್ ಇಂಡಸ್ಟ್ರಿಯಲ್ ಕೋ-ಅಪರೇಟಿವ್ ಸೊಸೈಟಿ ಸಂಸ್ಥೆದ 15 ನೇ ಶಾಖೆ ನ.27 ತಾರೀಕ್ ಐತಾರ ಕಾಂಡೆ 11 ಗಂಟೆಗ್ ಮುಡಿಪುದ ವಿಶ್ವಕರ್ಮ ಸಮುದಾಯ ಭವನದ 1 ನೇ ಮಾಳಿಗೆಡ್ ಉದಿಪನ ಆಯರೆ ಉಂಡು.

ಪರಮಪೂಜ್ಯ ಜಗದ್ಗುರು ಅನಂತಶ್ರೀ ವಿಭೂಷಿತ ಕಾಳಹಸ್ತೇಂದ್ರ ಸರಸ್ವತೀ ಮಹಾಸ್ವಾಮಿ ಬೊಕ್ಕ ಪರಮಪೂಜ್ಯ ಜಗದ್ಗುರು ಅನಂತಶ್ರೀ ವಿಭೂಷಿತ ಶಿವಸುಜ್ಞಾನ ತೀರ್ಥ ಮಹಾಸ್ವಾಮೀಜಿ ಲೇಸ್‌ನ್ ತುಡರ್ ಅರ್ಲಾದ್ ಆಶೀರ್ವಚನ ಮಲ್ಪರೆ ಉಲ್ಲೆರ್. ಅಂಚನೆ ಮಂಗಳೂರು ವಿಧಾನಸಭಾ ಕ್ಷೇತ್ರದ ಶಾಸಕೆರ್ ಯು.ಟಿ. ಖಾದರ್ ಲೇಸ್ ಉದಿಪನ ಮಲ್ಪರೆ ಉಲ್ಲೆರ್. ಅಂಚನೆ ಮಾಮಲ್ಲ ಬಿನ್ನೆರ್ ಲೇಸ್‌ಡ್ ಪಾಲ್ ಪಡೆಯರೆ ಉಲ್ಲೆರ್.

ಶ್ರೀ ಮಹಾದೇವಿ ಭಜನಾ ಮಂದಿರ (ರಿ.) ಅಳಪೆಡ್ 62 ನೇ ವರ್ಷದ ಏಕಾಹ ಭಜನೋಚ್ಚಯ

ಕುಡ್ಲದ ಶ್ರೀ ಮಹಾದೇವಿ ಭಜನಾ ಮಂದಿರ (ರಿ.) ಅಳಪೆಡ್ ಡಿಸೆಂಬರ್ 10 ತಾರೀಕ್ ಸನಿವಾರ 62 ನೇ ವರ್ಷದ ಏಕಾಹ ಭಜನೋಚ್ಚಯ ನಡಪರೆ ಉಂಡು.

ಸೂರ್ಯೋದಯಗ್ ಕಾಂಡೆ 6.43 ಕ್ಕ್ ಸುರು ಆದ್ ಮನದಾನಿ ಸೂರ್ಯೋದಯಗ್ 6.43 ಗಂಟೆ ಮುಟ್ಟ ನಡಪರೆ ಉಂಡು. ಅಂಚಾದ್ ಬರ್ಪಿನ ಭಕ್ತೆರ್ ಈ ಏಕಾಹ ಭಜನೋಚ್ಚಯನ್ ಪೊರ್ಲು ಮಲ್ತ್‌ದ್, ಗಂಧಪ್ರಸಾದ ದೆತೊಂದು ಶ್ರೀ ಮಹಾದೇವಿ ಕೃಪೆಗ್ ಪಾತ್ರರಾವೊಡು ಪಂದ್ ದೇವಲ್ಯದ ಆಡಳಿತ ಮಂಡಳಿ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೊಲೆಡ್ ತೆರಿಪಾದೆರ್.