ಕುಡ್ಲದ ಸುದ್ದಿ | Mangalore News

ತಿಗಲೇ ಬೇನೆಡ್ ತೀರ್ ಪೋಯಿನ 6 ನೇ ಕ್ಲಾಸ್‌ದ ಆಣ್

ಹುಬ್ಬಳ್ಳಿ: ಆಜಿನೇ ಕ್ಲಾಸ್‌ದ ಆಣ್ ಬಾಲೆ ಶಾಲೆಡ್ ತಿರ್ತ್ ಬೂರ್ದು ತಿಗಲೆ ಬೇನೆರ್ದ್ ತೀರ್ ಪೋಯಿನ ಘಟನೆ ಧಾರವಾಡ ಜಿಲ್ಲೆದ ಕಲಘಟಗಿ ಪಟ್ಟಣದ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಡ್ ನಡತ್ಂಡ್.

6ನೇ ಕ್ಲಾಸ್‌ಡ್ ಕಲ್ತೊಂದಿತ್ತಿನ ಮಕ್ತುಮ್ ಮಹ್ಮದ್ ರಫಿ ಮನಿಯಾರ್ (13) ತೀರ್ ಪೋಯಿನ ಆಣ್. ಈ ಆಣ್ ಕೆಲ ವರ್ಷರ್ದ್ ತಿಗಲೆ ಬೇನೆದ ಸೀಕ್‌ಡ್ ಇತ್ತೆರ್.

ತೀರ್ಥಹಳ್ಳಿ: ದಕ್ ದ್ ಪೋದಿತ್ತಿನ ಒಂಜರೆ ಲಕ್ಷ ರೂ. ಬಿಲೆತ್ತ ಕರಿಯಮಣಿ ಸರನ್ ಕೊರ್ದು ಪ್ರಾಮಾಣಿಕತೆ ಮೆರೆಯಿನ ಗ್ರಾ.ಪಂ ಸದಸ್ಯೆರ್

ತೀರ್ಥಹಳ್ಳಿ: ಪೊಂಜೊವು ಒರ್ತಿ ಕಳೆಯೊಂದಿನ ಒಂಜರೆ ಲಕ್ಷ ರೂಪಾಯಿ ಬಿಲೆತ್ತ ಬಂಗಾರ್‌ದ ಕರಿಯಮಣಿ ಸರನ್ ವಾಪಸ್ ಕೊರ್ದು ಗ್ರಾಪಂ ಸದಸ್ಯೆರ್ ಒರಿ ಪ್ರಾಮಾಣಿಕತೆ ಮೆರೆಯಿನ ಘಟನೆ ತೀರ್ಥಹಳ್ಳಿಡ್ ನಡತ್ಂಡ್.

ಮುಲ್ಪದ ಹೊದಲ ಅರಳಾಪುರ ಗ್ರಾಮ ಪಂಚಾಯಿತಿ ಸದಸ್ಯೆರ್ ತುಪ್ಪದ ಮನೆ ವಿನಾಯಕ ಮೇರ್ ತನ್ಕ್ ತಿಕ್ ದಿನ ಕರಿಯಮಣಿ ಸರನ್ ವಾರಸ್ದಾರೆರೆಗ್ ವಾಪಸ್ ಕೊರ್ದು ಮಾನವೀಯತೆ ತೋಜಾದೆರ್. ಕುರುವಳ್ಳಿದ ಆಶಾ ಕಾರ್ಯಕರ್ತೆ ಶಶಿಕಲಾ ಮೆರೆನ ಕರಿಯಮಣಿ ದಕ್ ಡ್ ಪೋದಿತ್ತ್ಂಡ್. ಅವು ವಿನಾಯಕ್ ಮೆರೆಗ್ ತಾಲೂಕ್‌ದ ಜಯಚಾಮರಾಜೇಂದ್ರ ಆಸ್ಪತ್ರೆ ಕೈತಲ್ ತಿಕ್ಕ್‌ದಿತ್ತ್ಂಡ್. ಆರ್ ಫೇಸ್‌ಬುಕ್, ವಾಟ್ಸಾಪ್ ಕೂಪೆಡ್ ಮಾಹಿತಿ ಪಟ್ಟೊಂದಿತ್ತೆರ್.

ಕುಡ್ಲ: ಜೋಕ್ಲೆನ್ ಕಂಡುನ ಸಂಸಯೊಡು ಒರಿಯಗ್ ಪೆಟ್ಟ್ ಪಾಡಿನ ಜನಕುಲು

ಕುಡ್ಲ: ಕುಡ್ಲಡ್ ಜೋಕ್ಲೆನ್ ಕಂಡೊಂದಿತ್ತಿನ ಆರೋಪದ ನಿಲೆಟ್ ಜನ ಒರಿಯನ್ ಸಾರ್ವಜನಿಕೆರ್ ಪತ್ತಿನ ಘಟನೆ ನಡತ್ಂಡ್.

ವೆನ್ಲಾಕ್ ಆಸ್ಪತ್ರೆದ ಕೈತಲ್ ಅಪ್ಪೆನೊಟ್ಟುಗು ಉಂತಿನ ಬಾಲೆನ್ ಆರೋಪಿ ಒಯ್ತೊಂದಿತ್ತ್‌ದ್, ಅಪ್ಪೆ ಕಲ್ಕಿನೆನ್ ತೂದು ಜಾಗೆಗ್ ಸಾರ್ವಜನಿಕೆರ್ ಬೈದೆರ್. ಆರೋಪಿನ್ ಅಲ್ಪನೆ ಪತ್ತ್‌ದ್ ವಿಚಾರಣೆ ಮಲ್ತ್‌ದ್, ಹಲ್ಲೆ ನಡಪಾದಿತ್ತ್‌ದ್, ಹಲ್ಲೆ ಮಲ್ಪುನ ವಿಡಿಯೋ ವೈರಲ್ ಆತ್ಂಡ್.

ಮಾಜಿ ಸಿಎಂ ಸಿದ್ದರಾಮಯ್ಯ ಆಸ್ಪತ್ರೆಗ್

ಮಾಜಿ ಸಿಎಂ ಸಿದ್ದರಾಮಯ್ಯ ಆಸ್ಪತ್ರೆಗ್ ದಾಖಲ್ ಆತೆರ್ ಪನ್ಪಿನ ಮಾಹಿತಿ ತೆರಿದ್ ಬೈದ್ಂಡ್.

ಆರೋಗ್ಯಡ್ ಏರ್‌ಪೇರ್ ತೋಜಿನೆಡ್ದಾವರ ಬೆಂಗ್ಲೂರ್‌ದ ಮಣಿಪಾಲ ಆಸ್ಪತ್ರೆಗ್ ದಾಖಲ್ ಆತೆರ್. ಈ ಬಗೆಟ್ ಎಚ್ಚದ ಮಾಹಿತಿ ನನ ತಿಕ್ಕೊಡಾತೆ.

ಫುಟ್ಬಾಲ್ ಲೆಜೆಂಡ್ ಡೀಗೊ ಮರಡೋನಾನ ಬಂಗಾರ್‌ದ ಮೂರ್ತಿ ಇನಿ ಕುಡ್ಲಗ್

ಕುಡ್ಲ: ಫುಟ್ಬಾಲ್ ದಂತಕತೆ ಡೀಗೋ ಮರಡೋನ ಮೆರೆನ “ಹ್ಯಾಂಡ್ ಆಫ್ ಗಾಡ್” ಬಂಗಾರ್‌ದ ಮೂರ್ತಿನ್ ಬೋಚೆ (ಡಾ| ಬೋಬಿ ಚೆಮನ್ನೂರ್) ಮೆರೆನ ಮುತಾಲಿಕೆಡ್ ಕತಾರ್‌ಗ್ ಕೊನಯರೆ ಉಂಡು. ಅಂಚಾದ್ ಈ ಬಂಗಾರ್‌ದ ಮೂರ್ತಿ ಡಿ.1 ಕ್ಕ್ ಬಯ್ಯ 6 ಗಂಟೆಗ್ ಕುಡ್ಲದ ನೆಹರೂ ಮೈದಾನಗ್ ಬರಿಯರೆ ಉಂಡು.

ತಿರುವನಂತಪುರಂಡ್ ಕೇರಳ ಲೋಕೋಪಯೋಗಿ ಅಂಚನೆ ಪ್ರವಾಸ ಇಲಾಖೆದ ಸಚಿವೆರ್ ಪಿ.ಎ. ಮಹಮ್ಮದ್ ಇಲ್ಯಾಸ್ ಮೇರ್ ಯಾತ್ರೆಗ್ ಚಾಲನೆ ಕೊರ್ತೆರ್. ಡಿ. 2 ಕ್ಕ್ ಸೈಂಟ್ ಅಲೋಶಿಯಸ್ ಕಾಲೇಜ್‌ಗ್ ಯಾತ್ರೆ ಪೋಯರೆ ಇತ್ತ್‌ದ್, ಆಯಿಬೊಕ್ಕ ಮಣಿಪಾಲ, ಭಟ್ಕಳ ಮುಕೇನ ಗೋವಾಗ್ ಪೋಯರೆ ಉಂಡು.

ಈ ಲೇಸ್‌ಡ್ ಪಾಲ್ ಪಡೆತಿನಕ್ಲೆಗ್ ಲಕ್ಕಿ ಡ್ರಾ ಮುಕೇನ ಕತಾರ್‌ಗ್ ಪ್ರಯಾಣ ಮಲ್ಪುನ ಇಮಾನದ ಟಿಕೆಟ್ ಬೊಕ್ಕ ವಿಶ್ವಕಪ್ ಪಂತೊ ತೂಪಿನ ಪಾಸ್ ಪಡೆಯುನ ಅವಕಾಶ ಉಂಡು ಪಂದ್ ದ.ಕ.ಜಿಲ್ಲಾ ಫುಟ್‌ಬಾಲ್ ಸಂಸ್ಥೆದ ಅಧ್ಯಕ್ಷೆರ್ ಡಿ.ಎಂ ಅಸ್ಲಾಂ ತೆರಿಪಾದೆರ್.

ಡಿ. 4: ಹೊಯ್ಗೆ ಬಜಾರ್ ಶ್ರೀ ಅಶ್ವಥ ಕಟ್ಟೆ ಅಯ್ಯಪ್ಪ ಸ್ವಾಮಿ ಭಕ್ತ ವೃಂದ ಮುತಾಲಿಕೆಡ್ ಅಯ್ಯಪ್ಪ ಸಹಸ್ರ ದೀಪೋಚ್ಚಯ,ಅಪ್ಪದ ಸೇವೆ, ಕೆಂಡ ಸೇವೆ, ಮಹಾಪೂಜೆ, ಬಯಲಾಟ

ಕುಡ್ಲದ ಹೊಯ್ಗೆ ಬಜಾರ್ ಶ್ರೀ ಅಶ್ವಥ ಕಟ್ಟೆ ಅಯ್ಯಪ್ಪ ಸ್ವಾಮಿ ಭಕ್ತ ವೃಂದ ಮೊಕಲೆನ 18 ನೇ ವರ್ಷದ ಶಬರಿಮಲೆ ಯಾತ್ರೆದ ಸಲುವಾದ್ ಡಿ.4 ತಾರೀಕ್ ಐತಾರ ದಾನಿ ಅಯ್ಯಪ್ಪ ಸಹಸ್ರ ದೀಪೋಚ್ಚಯ ಅಪ್ಪ ಸೇವೆ, ಕೆಂಡ ಸೇವೆ, ಮಹಾಪೂಜೆ ಅಂಚನೆ ಯಕ್ಷಗಾನ ಬಯಲಾಟ ನಡಪರೆ ಉಂಡು.

ಪೂಜ್ಯ ಗುರುಕುಲು ಜಯ ಪ್ರಕಾಶ್ ಶಾಂತಿ ಅಂಚನೆ ಸಂಜೀವ ಗುರುಸ್ವಾಮಿ ಮೊಕುಲೆನ ಆಶೀರ್ವಾದದೊಟ್ಟುಗು ನಿತಿನ್ ಗುರುಸ್ವಾಮಿ ಮೆರೆನ ಮುತಾಲಿಕೆಡ್ ಈ ಲೇಸ್ ನಡಪರೆ ಉಂಡು. ಈ ಲೇಸ್‌ಗ್ ಮಾತ ಭಕ್ತೆರ್ ಬತ್ತ್‌ದ್ ಶ್ರೀ ಅಯ್ಯಪ್ಪ ಸ್ವಾಮಿ ದೇವೆರೆನ ಪ್ರಸಾದ ದೆತೊಂದು ಸ್ವಾಮಿನ ಕೃಪೆಗ್ ಪಾತ್ರರಾವೊಡು ಪಂದ್ ಅಶ್ವಥಕಟ್ಟೆ ಅಯ್ಯಪ್ಪ ಭಕ್ತವೃಂದ ಹೊಯ್ಗೆ ಬಜಾರ್‌ದ ವಿನೋದ್ ಗುರುಸ್ವಾಮಿ ಲೆಪ್ಪೋಲೆಡ್ ತೆರಿಪಾದೆರ್.

ಉದ್ಯಾವರ: ಡಿ.8 – ಡಿ. 10 ಮುಟ್ಟ ಬೊಳ್ಜೆ ಶ್ರೀ ಬ್ರಹ್ಮಬೈದರ್ಕಳ ಗರಡಿಡ್ ವಾರ್ಷಿಕ ನೇಮೋಚ್ಚಯ

ಉದ್ಯಾವರದ ಬೊಳ್ಜೆ ಶ್ರೀ ಬ್ರಹ್ಮಬೈದರ್ಕಳ ಗರಡಿ ಕ್ಷೇತ್ರಡ್ ಡಿ.8 – ಡಿ. 10 ಮುಟ್ಟ ವಾರ್ಷಿಕ ನೇಮೋಚ್ಚಯ ನಡಪರೆ ಉಂಡು.

ಡಿ.8 ತಾರೀಕ್ ಗುರುವಾರ ಕಾಂಡೆ 6 ಗಂಟೆಗ್ ತೋರಣ ಪ್ರತಿಷ್ಠೆ, 6.15 ಕ್ಕ್ ನುಪ್ಪು ಸೇವೆದ ಹಸಿರುವಾಣಿ ಗರಡಿ ಬರಿಯರೆ, 6.30 ಗ್ ನವಕ ಪ್ರಧಾನ ಹೋಮ ನಡಪರೆ ಉಂಡು. ಡಿ.9 ಗ್ ಸುಕ್ರಾರ ಮಧ್ಯಾಹ್ನ 12.05 ಗಂಟೆಗ್ ಮಹಾಪೂಜೆ, 12.15 ಗ್ ಪಲ್ಲಪೂಜೆ ಆದ್, ಬಯ್ಯ 2.30 ಗಂಟೆಗ್ ಶ್ರೀ ಬೈದರ್ಕಳ ನೇಮ ನಡಪರೆ ಉಂಡು. ಡಿ.10 ಸನಿವಾರ ಮಧ್ಯಾಹ್ನ 2.30 ಗಂಟೆಗ್ ಮಾಯಂದಾಲ್ ನೇಮ, ಬಯ್ಯ 6.30 ಗಂಟೆಗ್ ವ್ಯಾಘ್ರ ಚಾಮುಂಡಿ ಕೋಲ ನಡಪರೆ ಉಂಡು.

ಈ ಲೇಸ್‌ಗ್ ಮಾತ ಭಕ್ತೆರ್ ಬತ್ತ್‌ದ್ ಸಿರಿಮುಡಿ ಗಂಧ-ಪ್ರಸಾದನ್ ದೆತೊಂದು, ಶ್ರೀ ಬ್ರಹ್ಮಬೈದರ್ಕಳ ಅಂಚನೆ ಕ್ಷೇತ್ರದ ಮಹಾಶಕ್ತಿಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಶ್ರೀ ಬ್ರಹ್ಮಬೈದರ್ಕಳ ಗರಡಿ ಸೇವಾ ಸಮಿತಿ (ರಿ.) ದ ಅಧ್ಯಕ್ಷೆರ್ ಬೊಕ್ಕ ಸರ್ವ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.