ಕಾರ್ಲದ ಸುದ್ದಿ Karkala News

ಬಡಪತ್ತ್ ದಕ್ಲೆಗ್ ಬೊಲ್ಪಾಯಿನಾರ್ ವಸಂತ್ ಸಪಲ್ಯ ಕುಂಜಾರು

ಜೀವನ ಮೂಜಚ್ಚರದ ಪದಟ್ ಸಾರ ಅರ್ಥ ಉಂಡು. ಬೇನೆ ಬೆಸರ್ ನಿಂಗೊಂದು ಮಿತ್ತ್ ಬತ್ತ್‌ನಕ್‌ಲ್ ತುಳುವ ಮಣ್ಣ್ ಡ್ ಪೊಸ ದೇಕಿ ಕನೈದೆರ್. ಸಮಾಜಗಾದ್ ಬದ್ಕೊಂದು ಸಮಾಜದ ಜನಕ್ಲೆಗ್ ಬೆರಿತಾಂಗ್ ಕೊರ್ಪಿನ ಬೇಲೆನ್ ಸುಮಾರ್ ಜನ ಮಲ್ತೊಂದುಲ್ಲೆರ್.

ಬೊಂಬೈದ ಊರುಡು ಬೆನ್ನಿ ಬೆನೊಂದು ಬಡಪತ್ತ್‌ದಾಯನ ಬೇನೆಗ್ ಪುಗೆಲಾದ್ ಬೆನ್ಪುನಾರೆನ ಪುಟ್ಟು ಬಲಪುದ ಕಥೆ ಉಂದು. ಅವ್ವೇರ್ ಕೇಂಡ ಆರೆನ ಪುದರ್ ವಸಂತ್ ಸಪಲ್ಯ ಕುಂಜಾರು.

ಗಂಗಯ್ಯ ಸಪಲ್ಯ ಬೊಕ್ಕ ಗಿರಿಜ ಸಪಲ್ಯ ಮೊಕ್ಲೆನ ಸಂಸಾರೊದ ಅರ್ಥೊಗು ಮೂಜನೇ ಮಗೆಯಾದ್ ಪುಟ್ಟಿನ ವಸಂತ್ ಸಪಲ್ಯೆರ್, ತನ್ನ ಪುಟ್ಟ್‌ನ ಊರು ಪುತ್ತೂರುಡು ಬರವು ಸರವು ಕಲ್ತ್‌ದ್ ಮಾಯೊಕೊದ ನಗರ, ಮರಾಠಿಲೆನ ಊರು, ದಂಡ್‌ದ ರಾಜ್ಯ ಬೊಂಬಾಯಿಡ್ ಬೆನರೆ ಪಿದಾಡುವೆರ್.

ಆನಿದ ಕಾಲೊಡು ತುಲುವೆರ್ ಸಾರ ಕನ ಪತೊಂದು ಬೊಂಬಾಯಿದ ಹೋಟೆಲ್‌ಡ್ ಬೆನೊಂದಿತ್ತೆರ್. ಕಾಲ ಮಗ್‌ರೊಂದು ಪೋಯಿಲೆಕನೇ, ಕ್ಯಾಂಟೀನ್ ಮಲ್ತ್ ದ್, ಕ್ಯಾಟರಿಂಗ್ ಧನಿಯಾದ್ ನೆಗಪುವರ್.

2004ನೇ ಇಸವಿಡ್ ತನ್ನ ಅಪ್ಪೆನ ನೆಂಪುಗಾದ್ ಗಿರಿಜಾ ಆಗ್ರೋ ಇಂಡಸ್ಟ್ರೀಸ್ ಪನ್ಪಿನ ಸಂಸ್ಥೆನ್ ಕಟ್ಟುವೆರ್, ಎಲ್ಲ ಪ್ರಾಯೊರ್ದಿಂಚ ಬಡಪತ್ತ್ ನ್ ತೆರಿಯೊಂದಿನಾರ್, ಬೆನ್ನಿ ಸಾಗೊಲಿದ ಪೊಲಬು ಪತ್ತೊಂದು ಬೊಂಬಾಯಿದೂರುಗು ಕಾರ್ ದೀಂಡಲಾ ಸಮಾಜದ ಎಡ್ಡೆಪುಗಾದ್ ಬೆನ್ನಿನಾರ್, ಬೊಂಬಾಯಿಡೇ ಬೆನೊಂದು ಕುಟುಂಬ ಇಜ್ಜಂದಿ ಮಂದೆಲೆಗ್ ಬೊಕ್ಕ ಅನಾಥೆರಾಯಿನ ಜೋಕುಲೆನ ಸಹಾಯಾರ್ಥವಾದ್ ಗಿರಿಜಾ ವೆಲ್ಫೇರ್ ಆಸೋಸಿಯೇಷನ್ ಪನ್ಪಿನ ಸಂಸ್ಥೆನ್ ಖಾರ್ಘರ್ ಬೊಕ್ಕ ನವಮುಂಬೈಡ್ ಸ್ಥಾಪನೆ ಮಲ್ಪುವೆರ್.

ತಾನ್ ಬೆಂದಿನ ಪಣವುನು ಒಟ್ಟು ಮಲ್ತೊಂದು ಬಂಗೊದ ದಿನಕ್ಲೆಡ್‌ಲಾ ದಿಕ್ಕ್ ದೆಸೆ ಇಜ್ಜಂದಿನ ಪಾಪದಕ್ಲೆಗ್, ಪರಬೆರೆಗೆ, ಜೋಕುಲೆಗ್ ದೇವೆರಾದ್ ತೋಜಿನಾರ್. 150 ಡ್ದ್ ಜಾಸ್ತಿ ಜನೊಕ್ಲೆಗ್ ವನಸ್, ಉಂತರೆ ಜಾಗೆ ಕೊರ್ದ್, ಜೋಕ್ಲೆಗ್ ಬರವು ಕೊರ್ದ್, ಪಾಪದಾಯನ ಕನನೀರ್ ಒಚ್ಚುನ ಬೇಲೆ ಮಲ್ತೊಂದುಲ್ಲೆರ್. ಮೆರೆಗ್ ಟೈಮ್ಸ್ ಆಫ್ ಕುಡ್ಲ ಪತ್ರಿಕೆರ್ದ್ ಉಡಲ್ ದಿಂಜಿನ ಎಡ್ಡೆಪ್ಪುಲು.