Tue. Nov 17th, 2026

ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ವರಮಹಾಲಕ್ಷಿಪೂಜೆಗ್ ತಾವರೆ ಪೂ ಕೊಯ್ಯೆರೆ ಪೋದು ಕೆದುಟ್ಟು ಮುರ್ಕುದು ತೀರ್ ಪೋಯಿನ ಅಮ್ಮೆ-ಮಗೆ

ಬೆಂಗ್ಲೂರ್: ವರಮಹಾಲಕ್ಷ್ಮೀ ಪರ್ಬಗ್ ಪಂದ್ ತಾವರೆ ಪೂ ಕೊಯ್ಯೆರೆ ಪೋದು ಅಮ್ಮೆ-ಮಗೆ ಕೆದುಟ್ಟು ಮುರ್ಕುದು ತೀರ್ ಪೋಯಿನ ಘಟನೆ‌ ಬೆಂಗ್ಲೂರ್ ಗ್ರಾಮಾಂತರ ಜಿಲ್ಲೆದ ದೊಡ್ಡಬಳ್ಳಾಪುರ ತಾಲೂಕ್ ದ ಭೂಚನಹಳ್ಳಿದ ಕೆದುಟ್ಟು ನಡತ್ಂಡ್.

ದೊಡ್ಡಬಳ್ಳಾಪುರದ ಶಾಂತಿನಗರದ ನಿವಾಸಿಲಾಯಿನ ಪುಟ್ಟರಾಜು (42), ಮಗೆ ಕೇಶವ (14) ತೀರ್ ಪೋತೆರ್ ಪಂದ್ ತೆರಿದ್ ಬೈದ್ಂಡ್.

ಇಸಯ ತೆರಿದ್ ಪೊಲೀಸೆರ್ ಬೊಕ್ಕ ಅಗ್ನಿಶಾಮಕ ದಳತ್ತ ಸಿಬ್ಬಂದಿಲು ಜಾಗೆಗ್ ಬತ್ತ್ ದ್, ಅಮ್ಮೆ-ಮಗನ ಪುನನ್ ನಾಡ್ದೆರ್ ಪಂದ್ ತೆರಿದ್ ಬೈದ್ಂಡ್.

ನವಜ್ಯೋತಿ ಮಹಿಳಾ ಮಂಡಲದ ಪೊಸ ಅಧ್ಯಕ್ಷೆರ್ ಕುಶಲಾ ಶೇಖರ್

ಪಂಜ ಕೊಯಿಕುಡೆ ಗ್ರಾಮದ ನವಜ್ಯೋತಿ ಮಹಿಳಾ ಮಂಡಲದ ಪೊಸ ಅಧ್ಯಕ್ಷೆರಾದ್ ಕುಶಲಾ ಶೇಖರ್ ಆಯ್ಕೆ ಆತೆರ್.

ಇಂಚೊಗು ನಡತಿನ ಸಭೆಟ್ಟ್ 2023-24 ನೇ ವರ್ಷೊಗು ಪೊಸ ಪದುಕೆರ್ ಅಂಚೆನೆ ಸಮಿತಿ ಸದಸ್ಯೆರೆನ ಆಯ್ಕೆ ನಡತ್ಂಡ್.

ಗೌರವಾಧ್ಯಕ್ಷೆರಾದ್ ಅಮಿತಾ ದೇವಾಡಿಗ, ಉಪಾಧ್ಯಕ್ಷೆರಾದ್ ಪ್ರಿಯಾ ಪ್ರಕಾಶ್ ಉಲ್ಯ, ಪ್ರಧಾನ ಕಾರ್ಯದರ್ಶಿಯಾದ್ ಶೋಭಾ ಪೂಜಾರಿ, ಜತೆ ಕಾರ್ಯದರ್ಶಿಯಾದ್ ಯಶೋಧ ದೇವಾಡಿಗ, ಕೋಶಾಧಿಕಾರಿಯಾದ್ ಮಮತಾ ದೇವಾಡಿಗ, ಭಜನಾ ಸಂಘಟಕೆರಾದ್ ಉಷಾ ದೇವಾಡಿಗ, ಸಾಂಸ್ಕೃತಿಕ ಕಾರ್ಯದರ್ಶಿಯಾದ್ ಸುಜಾತ ರುಕ್ಮಯ,ಕ್ರೀಡಾ ಕಾರ್ಯದರ್ಶಿಯಾದ್ ಭವ್ಯ ಸುವರ್ಣ ಆಯ್ಕೆ ಆತೆರ್.

ಕಾರ್ಯಕಾರಿ ಸಮಿತಿಗ್ ನಿಶ್ಚಿತಾ ದೇವಾಡಿಗ, ತಾರಾ ಶೆಟ್ಟಿ, ಶೈಲಾ ಎನ್. ಶೆಟ್ಟಿ, ಗುಲಾಬಿ ಶೆಟ್ಟಿ, ಸರಿತಾ ಶೆಟ್ಟಿ, ಮೋಹಿನಿ ಶೆಟ್ಟಿ,ಶೈಲಜಾ ದೇವಾಡಿಗ, ಸುಮಿತ್ರಾ ದೇವಾಡಿಗ,ದೀಪಾ ಅಮೀನ್ ಉಷಾ ಎಸ್. ಶೆಟ್ಟಿ, ರೇವತಿ ಸುರೇಶ್, ವೇದಾವತಿ ಉಲ್ಯ,ರೇಶ್ಮಾ ಶೆಟ್ಟಿ, ಜಯಲಕ್ಷ್ಮಿ ಕುಲಾಲ್, ಉಷಾ ಶೆಟ್ಟಿ ಉಲ್ಯ ಆಯ್ಕೆ ಆತೆರ್.

ಆ.27: ಮುಲ್ಕಿಡ್ ತುಳು ಭಾಷೆದ ಸುರುತ್ತ ಸಂಶೋಧನಾ ಅಧ್ಯಯನದ ಬೂಕು ಬುಡುಗಡೆ

ಕುಡ್ಲ: ತುಳು ಭಾಷೆಡ್ ಸಂಶೋಧನಾ ಅಧ್ಯಯನನ್ ಪ್ರಕಟ ಮಲ್ತಿನ ಸುರುತ್ತ ಜನ ಪನ್ಪುನ ಪುಗರ್ತೆಗ್ ನಿವೃತ್ತ ಇಂಗ್ಲಿಷ್ ಪ್ರಾಧ್ಯಾಪಕೆರ್, ಡಾ. ವಿ.ಕೆ.ಯಾದವ್ ಪಾತ್ರರಾತೆರ್.

ಮೂಲತಃ ಸಸಿಹಿತ್ಲುದಾರ್ ಆದಿಪ್ಪುನ ಡಾ.ವಿ.ಕೆ.ಯಾದವ್ ಮೇರ್ ಆಂಧ್ರ ಪ್ರದೇಶದ ಕುಪ್ಪಂದ ದ್ರಾವಿಡ ವಿಶ್ವವಿದ್ಯಾಲಯರ್ದ್ ‘ಮೊಗವೀರೆರ್ನ ಸಾಂಸ್ಕೃತಿಕ ಬದ್ಕ್ ಬೊಕ್ಕ ಆರ್ಥಿಕ ಚಿಂತನೆ’ ಪನ್ಪುನ ಬಗೆಟ್ಟ್ ಅಲ್ತ ವಿವಿದ ತುಳು ಅಧ್ಯಯನ ವಿಭಾಗದ ಮುಖ್ಯಸ್ಥೆರ್ ಡಾ.ಜಿ.ಎಸ್.ಶಿವಕುಮಾರ್ ಮೆರೆನ ಮಾರ್ಗದರ್ಶನಡ್ ಪಿಎಚ್.ಡಿ ಪದವಿ ಮಲ್ದೆರ್.

ಬೂಕುದ ರೂಪಡ್ ಕನತಿನ ಮೆರೆನ ಪ್ರಬಂಧನ್ ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನದ ಸಂಸ್ಥಾಪಕೆರ್ ಡಾ.ಎಂ. ಮೋಹನ್ ಆಳ್ವ ಆಗಸ್ಟ್ 27 ಕ್ಕ್ ಮುಲ್ಕಿಬಪ್ಪನಾಡುದ ಸಭಾಂಗಣಡ್ ಬುಡುಗಡೆ ಮಲ್ಪರೆ ಉಲ್ಲೆರ್.

ರಡ್ಡ್ ವರ್ಷದ ಪಿರವು ಸಂಗೀತಾ ಪನ್ಪುನಾರ್ ತುಳುಟ್ಟ್ ಪಿಎಚ್. ಡಿ ಮಲ್ದೆರ್. ಆಂಡ ಅವು ಪ್ರಕಟ ಆದಿಜ್ಜಂಡ್. ತುಳುಟ್ಟ್ ಪ್ರಕಟ ಆಯಿನ ಸುರುತ್ತ ಪಿಎಚ್.ಡಿ ಪ್ರಬಂಧ ಎನ್ನವು ಪಂದ್ ವಿ.ಕೆ. ಯಾದವ್ ಪಂತೆರ್.

ತುಳು ಭಾಷೆ ಬೊಕ್ಕ ಸಾಹಿತ್ಯಡ್ ಸಂಶೋಧನೆ ಮಲ್ತಿನಕ್ಲೆಗ್ ಉಂದು ಸಹಾಯ ಮಲ್ಪುಂಡು. ದ್ರಾವಿಡ ವಿಶ್ವವಿದ್ಯಾಲಯ ಮಾತ್ರ ಬೇತೆ ಬೇತೆ ದ್ರಾವಿಡ ಭಾಷೆದೊಟ್ಟಿಗೆ ತುಳು ಭಾಷೆಡ್ ಪಿಎಚ್.ಡಿ ಮಲ್ಪರೆ ಅವಕಾಶ ಕೊರ್ಪುಂಡು. ಮೊಗವೀರ ಸಮುದಾಯಡ್ ಮಾತ್ರ ಇಪ್ಪುನ ತುಳು ಭಾಷೆದ ಕೆಲವು ವಿಭಿನ್ನ ವ್ಯಂಜನಲು ಬೊಕ್ಕ ಉಚ್ಚಾರಣೆಲೆನ್ ಲ ಸಂಶೋಧನಾ ಅಧ್ಯಯನಡ್ ದಾಖಲ್ ಮಲ್ದೆರ್. ತುಳು ಭಾಷೆ ಬೊಕ್ಕ ಸಾಹಿತ್ಯದ ಇತಿಹಾಸಡ್ ಉಂದು ಮಹತ್ವದ ಬುಲೆಚ್ಚಿಲ್ ಆತ್ಂಡ್. ಇಸೇಸವಾದ್ ತುಳು ಭಾಷೆಗ್ ಸಾಂವಿಧಾನಿಕ ಮಾನ್ಯತೆ ತಿಕ್ಕಂದಿನ ಕಾರಣ ಅಧ್ಯಯನ ಬೊಕ್ಕ ಸಾಹಿತ್ಯದ ಕೊರತೆನ್ ಉಲ್ಲೇಖ ಮಲ್ತ್ ದ್ ಬೂಕು ಪ್ರಕಟಣೆ ಮಲ್ದ್ಂಡ್.

ಆ.27: ಪದವಿನಂಗಡಿಡ್ ಕೀರ್ತಿಶೇಷ ಪುರುಷೋತ್ತಮ ಕೊಟ್ಟಾರಿ ನೆಂಪು ಲೇಸ್

ಕುಡ್ಲ: ಕೀರ್ತಿಶೇಷ ಲೋಲಮ್ಮ ಪಚ್ಚನಾಡಿ ಸೇವಾ ಪ್ರತಿಷ್ಠಾನ (ರಿ.) ಬೊಕ್ಕ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿ (ರಿ.) ಪದವಿನಂಗಡಿ ನೆತ್ತ ಒಟ್ಟುಸೇರಿಗೆಡ್ ಕೀರ್ತಿಶೇಷ ಪುರುಷೋತ್ತಮ ಕೊಟ್ಟಾರಿ ಸಂಸ್ಮರಣೆ, ಸನ್ಮಾನ ಲೇಸ್ ಆ.27 ಬಯ್ಯಗ್ 4 ಗಂಟೆಗ್ ಪದವಿನಂಗಡಿ ದೇವಿನಗರ ಬೆನಕ ಚಾವಡಿಡ್ ನಡಪರೆ ಉಂಡು.

ಬಯ್ಯಗ್ ನಡಪುನ ಸಭಾ ಲೇಸ್ ದ ಗುರ್ಕಾರ್ಮೆನ್ ಧಾರ್ಮಿಕ ಮುಂದಾಳು ಸುದರ್ಶನ್ ಬೆದ್ರ ಒಯಿಸೊನ್ವೆರ್. ‌ಮಲ್ಲ ಬಿನ್ನೆರಾದ್ ಕುಡ್ಲ ಶಾಸಕೆರ್ ಡಾ.ವೈ ಭರತ್ ಶೆಟ್ಟಿ ಬರಿಯೆರೆ ಉಲ್ಲೆರ್. ‌ಕುಡ್ಲ ಮ.ನ.ಪಾ ಮಹಾಪೌರೆರ್ ಜಯಾನಂದ ಅಂಚನ್ ಸಂಮಾನ ಮಲ್ಪರೆ ಉಲ್ಲೆರ್. ಹಿರಿಯ ಸಾಹಿತಿ, ನಾಟಕಕರ್ತೆರ್ ಡಾ.ಸಂಜೀವ ದಂಡಕೇರಿ ತುಡರ್ ಅರ್ಲಾಯೆರೆ ಉಲ್ಲೆರ್. ‌ಕುಡ್ಲ ನ್ಯಾಯವಾದಿ ರವಿಪ್ರಸನ್ನ ಸಂಸ್ಮರಣ ಭಾಷಣ ಮಲ್ಪರೆ ಉಲ್ಲೆರ್. ಬಿನ್ನೆರಾದ್ ಕುಡ್ಲ ಮ.ನ.ಪಾ ಸದಸ್ಯೆರ್ ಸಂಗೀತಾ, ಕುಡ್ಲ ಮಂಗಳ ಕ್ಯಾಶ್ಯೂ ಫ್ಯಾಕ್ಟರಿದ ಧಣಿ ವಾಸುದೇವ ಕಾಮತ್, ವಾಗ್ಮಿ, ನಾಟಕಕಾರೆ ಲಕ್ಷ್ಮಣ್ ಕುಮಾರ್ ಮಲ್ಲೂರ್, ಮರೋಳಿ ದೊಡ್ಡಮನೆ, ಅಮೀನ್ ಕುಟುಂಬಸ್ಥೆರೆನ ಟ್ರಸ್ಟ್ ಅಧ್ಯಕ್ಷೆರ್ ಗೋಪಾಲಕೃಷ್ಣ ಅಮೀನ್, ಕೊಂಚಾಡಿ ಶ್ರೀ ರಾಮಾಶ್ರಮ ಹಿರಿಯ ಪ್ರಾ.ಶಾಲೆದ ಪ್ರಧಾನ ಕಾರ್ಯದರ್ಶಿ ಉಮೇಶ್ ದಂಡಕೇರಿ, ಪದವಿನಂಗಡಿ ಗುರುನಗರ ಬ್ರಹ್ಮಶ್ರೀ ನಾರಾಯಣ ಗುರುಸ್ವಾಮಿ ಸೇವಾ ಸಂಘ(ರಿ.) ದ ಕಮಲಾಕ್ಷ ಬಂಗೇರ ಪಾಲ್ ಪಡೆಯೆರೆ ಉಲ್ಲೆರ್.

ಅಂಚೆನೆ ಜೋಕುಲೆರ್ದ್ ಜಾಂಬವತಿ ಕಲ್ಯಾಣ ಯಕ್ಷಗಾನ, ಅಂಚೆನೆ ಪುಗರ್ತೆದ ಕಲಾವಿದೆರೆರ್ದ್ ಡಾ.ದಿನಕರ ಎಸ್ ಪಚ್ಚನಾಡಿ ಮೆರೆನ ನಿರ್ದೇಶನದ ಸುಧನ್ವ ಮೋಕ್ಷ ಯಕ್ಷಗಾನ ನಡಪರೆ ಉಂಡು ಪಂದ್ ಕೀರ್ತಿಶೇಷ ಲೋಲಮ್ಮ ಪಚ್ಚನಾಡಿ ಸೇವಾ ಪ್ರತಿಷ್ಠಾನ (ರಿ.) ದ ಅಧ್ಯಕ್ಷೆರ್ ರಾಮ ಅಮೀನ್ ಪಚ್ಚನಾಡಿ ಲೆಪ್ಪೋಲೆಡ್ ತೆರಿಪಾದೆರ್.

ಬಂಟರ ಸಂಘ ಬೊಂಬೈ ವಸಾಯಿ-ಡಹಾಣು ಪ್ರಾದೇಶಿಕ ಸಮಿತಿದ 13ನೇ ವಾರ್ಷಿಕ ಸ್ನೇಹ ಸಮ್ಮಿಲನ, ಪ್ರಶಸ್ತಿ ಪ್ರದಾನ, ಸನ್ಮಾನ, ಗೌರವಾರ್ಪಣೆ

ಬೊಂಬೈ: ಬಂಟರ ಸಂಘ ಬೊಂಬೈದ ವಸಾಯಿ-ಡಹಾಣು ಪ್ರಾದೇಶಿಕ ಸಮಿತಿದ 13ನೇ ವಾರ್ಷಿಕ ಸ್ನೇಹ ಸಮ್ಮಿಲನ ಲೇಸ್ ಆ. 20 ಕ್ಕ್ ಫಾಲ್ಗರ್ ದ ಧೇಖಲೆ ಫೆರ್ನ್ ಶೆಲ್ಟರ್ ರಿಸಾರ್ಟ್ ಡ್ ದಿ.ಕರ್ನಿರೆ ಶ್ರೀಧರ ಶೆಟ್ಟಿ ಚಾವಡಿಡ್ ನಡತ್ಂಡ್.

ಈ ಲೇಸ್ ದ ಗುರ್ಕಾರ್ಮೆನ್ ಒಯಿಸೊನ್ನ ಬಂಟರ ಸಂಘದ ಅಧ್ಯಕ್ಷೆರ್ ಚಂದ್ರಹಾಸ. ಕೆ. ಶೆಟ್ಟಿ, ಮಲ್ಲ ಬಿನ್ನೆರ್ ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ಟಿ, ವಸಾಯಿ-ಡಹಾಣು ಪ್ರಾದೇಶಿಕ ಸಮಿತಿದ ಕಾರ್ಯಧ್ಯಕ್ಷೆರ್ ಹರೀಶ್ ಪಾಂಡು ಶೆಟ್ಟಿ ಬೊಕ್ಕ ಚಾವಡಿಡ್ ಇತ್ತಿನ ಮಾತ ಬಿನ್ನೆರ್ ತುಡರ್ ಅರ್ಲಾದ್, ಪಿಂಗಾರ ಅರಳಾದ್ ಉದಿಪನ ಮಲ್ತೆರ್.

ಪುಗರ್ತೆದ ಉದ್ಯಮಿ, ಕೊಡುಗೈ ದಾನಿ, ಸಂಘದ ಪಶ್ಚಿಮ ವಲಯ ಪ್ರಾದೇಶಿಕ ಸಮಿತಿದ ಸಮನ್ವಯಕೆರ್ ಶಶಿಧರ. ಕೆ. ಶೆಟ್ಟಿ ಇನ್ನಂಜೆ, ಮೆರೆಗ್ “ಉತ್ತಮ ಸಂಘಟಕ” ಬಿರುದು ಪ್ರಧಾನ ಮಲ್ತ್ ದ್ ಪರಿವಾರ ಸಮೇತ ಸನ್ಮಾನ ಮಲ್ತೆರ್.
ಸನ್ಮಾನಿತೆರ್ ಶಶಿಧರ.ಕೆ. ಶೆಟ್ಟಿ ಇನ್ನಂಜೆ ಮೇರ್ ಪಾತೆರ್ದ್, ಇನಿ ಎಂಕ್ ಪ್ರಶಸ್ತಿ ಪ್ರದಾನ ಮಲ್ತ್ ದ್, ಸನ್ಮಾನ ಮಲ್ತಿನೆಕ್ಕ್ ವಸಾಯಿ-ಡಹಾಣು ಪ್ರಾದೇಶಿಕ ಸಮಿತಿದ ಕಾರ್ಯಧ್ಯಕ್ಷೆರ್ ಹರೀಶ್ ಪಾಂಡು ಶೆಟ್ಟಿ ಬೊಕ್ಕ ಅರೆನ ಕೂಟಗ್ ಆಭಾರಿ ಆತೆ. ಐಕಳ ಹರೀಶ್ ಶೆಟ್ಟಿ ಮೇರ್ ಅಧ್ಯಕ್ಷೆರಾದಿಪ್ಪುನಗ ಮೇರ್, ಕರ್ನಿರೆ ವಿಶ್ವನಾಥ ಶೆಟ್ಟಿ ಬೊಕ್ಕ ಕರ್ನಿರೆ ಶ್ರೀಧರ ಶೆಟ್ಟಿ ಮೇರೆರ್ದ್ ಸಮಿತಿ ಸುರು ಆಯಿನೇರ್ದಿಂಚ ಸಮಿತಿಡ್ ಕೆಲಸ ಮಲ್ಪುನ ಅವಕಾಶ ತಿಕ್ ದ್ಂಡ್. ಎನ್ನ ಸಮಾಜ ಸೇವೆದ ಪ್ರತಿಯೊಂಜಿ ಕೆಲಸಗ್ ವಸಾಯಿ-ಡಹಾಣು ಪರಿಸರದ ತುಳು ಕನ್ನಡಿಗೆರ್ ಎನ್ನೊಟ್ಟಿಗೆ ಕೈಜೋಡಿಸಾದೆರ್ ಪಂದ್ ಪಂಡೆರ್.

ಬೊಂಬೈ ಬಂಟರ ಸಂಘದ ಮಾಜಿ ಅಧ್ಯಕ್ಷೆರ್ ಪದ್ಮನಾಭ ಎಸ್. ಪಯ್ಯಡೆ ಮೆರೆನ್ ಈ ಪೊರ್ತುಡು ಚಾವಡಿದ ಮಾತ ಬಿನ್ನೆರ್ ಸನ್ಮಾನ ಮಲ್ತೆರ್. ಬೊಕ್ಕ ಮೇರ್ ಪಾತೆರ್ದ್, ಬೊಂಬೈ ಬಂಟರ ಸಂಘಗ್ 96 ವರ್ಷದ ಇತಿಹಾಸ ಉಂಡು. ಆನಿರ್ದ್ ಇನಿಮುಟ್ಟ ಯಶಸ್ಸಿಗಾದ್ ಬೆನೊಂದು ಇಪ್ಪುನ ಒಂಜಿ ಸಾಮಾಜಿಕ ಸಂಘಟನೆ ಪಂಡ ಬಂಟರ ಸಂಘ ಬೊಂಬೈ ಪಂದ್ ಪನಿಯೆರೆ ಅಭಿಮಾನ ಆಪುಂಡು. ಜಾತೀಯ ಸಂಘಟನೆಲೆಡ್ ಬಂಟರ ಸಂಘ ಬೊಂಬೈ ಸುರುತ್ತ ತಾನಡ್ ಉಂಡು. ಸಂಘ ಸಮಾಜ ಬಾಂಧವೆರೆಗ್ ಬೇತೆ ಬೇತೆ ಸೌಲಭ್ಯನ್ ಕೊರ್ಪುಂಡು. ಅಂಚಿನ ಗೌಜಿದ ಲೇಸ್ ನ್ ನಡಪಾಯಿನ ವಸಾಯಿ-ಡಹಾಣು ಪ್ರಾದೇಶಿಕ ಸಮಿತಿದ ಬೇಲೆ ಮೆಚ್ಚೊಡಾಯಿನವು ಪಂದ್ ಪಂಡೆರ್.

ವಸಾಯಿ ಡಹಾಣು ಪ್ರಾದೇಶಿಕ ಸಮಿತಿದ ಮಾಜಿ ಕಾರ್ಯಧ್ಯಕ್ಷೆರ್ ಜಯಂತ್ ಆರ್ ಪಕ್ಕಳ ಬೊಕ್ಕ ರೂಪಾ ಪಕ್ಕಳ ದಂಪತಿಲೆಗ್ ಸನ್ಮಾನ ಮಲ್ತೆರ್. ಸಮಾಜ ಸೇವಕೆ, ಪ್ಯಾರಮೌಂಟ್ ಹೆಲ್ತ್ ಸರ್ವಿಸ್ ದ ಆನಂದ ಶೆಟ್ಟಿ, ನಿಖಿತಾ ಶೆಟ್ಟಿ ದಂಪತಿಲು, ಮಗೆ ನಿವಾಸ್ ಶೆಟ್ಟಿ ಮೆರೆಗ್ ಸನ್ಮಾನ ಮಲ್ತೆರ್. ಬೊಕ್ಕ ಮೇರ್ ಪಾತೆರ್ದ್, ಸರಕಾರದ ಬೇತೆ ಬೇತೆ ಯೋಜನೆಲೆನ ಬಗೆಟ್ಟ್ ವಿವರವಾದ್ ತೆರಿಪಾದ್, ಮುಖ್ಯವಾದ್ ಎಚ್ಚದ ಯೋಜನೆಲು ಬಿಪಿಎಲ್ ಕಾರ್ಡ್ ಇತ್ತಿನಕ್ಲೆಗ್ ಮಸ್ತ್ ಪ್ರಯೋಜನ ಆತ್ಂಡ್. ಅಂಚೆನೆ ಆರೆಗ್ ಸನ್ಮಾನ ಮಲ್ತಿನೆಕ್ಕ್ ಕೃತಜ್ಞತೆ ಸಂದಾಯೆರ್.

ಸಮಿತಿದ ಉತ್ತಮ ಕಾರ್ಯಕರ್ತೆ ನವೀನ್ ಶೆಟ್ಟಿ ಪಳ್ಳಿ ದಂಪತಿಲೆಗ್ ಬೊಕ್ಕ ಜೋಕುಲೆನ್ ಚಾವಡಿದ ಬಿನ್ನೆರ್ ಸನ್ಮಾನ ಮಲ್ತೆರ್. ಮಾತ ಸನ್ಮಾನಿತೆರೆನ ಸನ್ಮಾನ ಪತ್ರನ್ ಪ್ರವೀಣ್ ಶೆಟ್ಟಿ ಕಣಂಜಾರ್ ಬೊಕ್ಕ ವಿಜಯ ಪಿ ಶೆಟ್ಟಿ ಕುತ್ತೆತ್ತೂರು ಓದಿಯೆರ್.

ವಿಜಯ ಶೆಟ್ಟಿ ಮೂಡುಬೆಳ್ಳೆ ಪ್ರಾರ್ತನೆ ಮಲ್ತೆರ್. ಪ್ರಾದೇಶಿಕ ಸಮಿತಿದ ಕಾರ್ಯಾಧ್ಯಕ್ಷೆರ್ ಹರೀಶ್ ಪಾಂಡು ಶೆಟ್ಟಿ ಮೇರ್ ಎದ್ಕೊನಿಯೆರ್.

ಕಾರ್ಯದರ್ಶಿ ಜಗನಾಥ್ ಡಿ ಶೆಟ್ಟಿ ಪಳ್ಳಿ ಮೇರ್ ಸಮಿತಿದ ಕಾರ್ಯಚಟುವಟಿಕೆಲೆನ ಬಗೆಟ್ಟ್ ಪೊಲಬು ಕೊರಿಯೆರ್. ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆರ್ ಉಷಾ ಶ್ರೀಧರ ಶೆಟ್ಟಿ ಮೇರ್ ಮಹಿಳಾ ವಿಭಾಗದ ಸೇವಾ ಕಜ್ಜೊಲೆನ ಬಗೆಟ್ಟ್ ಪೊಲಬು ಕೊರಿಯೆರ್.

ಮಲ್ಲ ಬಿನ್ನೆರಾದ್ ಸಿಲ್ವಸಾ ಮುನ್ಸಿ ಪಾಲಿಟಿ ಮೇಯರ್ ರಜನಿ ಗೋವಿಂದ ಶೆಟ್ಟಿ, ಆರ್ಗನಿಕ್ ಇಂಡಸ್ಟ್ರಿಸ್ ದ ಡೈರೆಕ್ಟರ್ ತೋನ್ಸೆ ಆನಂದ ಶೆಟ್ಟಿ, ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಉಪಾಧ್ಯಕ್ಷೆರ್ ಕರ್ನಿರೆ ವಿಶ್ವನಾಥ ಶೆಟ್ಟಿ, ಶಶಿ ಕ್ಯಾಟರಿಂಗ್ ಸರ್ವಿಸ್ ದ ಡೈರೆಕ್ಟರ್ ಶಶಿಧರ ಶೆಟ್ಟಿ ಬರೋಡ, ಬೊರಿವಲಿ ಎಜುಕೇಶನ್ ಸಮಿತಿ ಬಂಟ್ಸ್ ಸಂಘ ಬೊಂಬೈದ ಕಾರ್ಯಾಧ್ಯಕ್ಷೆರ್ ಡಾ. ಪಿ. ವಿ. ಶೆಟ್ಟಿ, ಮಾತೃ ಭೂಮಿ ಕ್ರೆಡಿಟ್ ಕೋ ಆಪರೇಟಿವ್ ಸೊಸೈಟಿ ದ ಕಾರ್ಯಾಧ್ಯಕ್ಷೆರ್ ಉಳ್ತೂರು ಮೋಹನ್ ದಾಸ್ ಶೆಟ್ಟಿ, ಮಾತ್ರಭೂಮಿ ಕ್ರೆಡಿಟ್ ಕೋ ಆ ಪರೇಟಿವ್ ಸೊಸೈಟಿ ದ ಕಾರ್ಯದರ್ಶಿ ಪ್ರವೀಣ್ ಭೋಜ ಶೆಟ್ಟಿ, ಹಿಟಚ್ ಎಲೆಕ್ಟ್ರಿಫಿಕೇಶನ್ ದ ಡೈರೆಕ್ಟರ್ ರವಿಕಾಂತ್ ಶೆಟ್ಟಿ ಅಂಕಳೇಶ್ವರ್, ಮಾತಾಶ್ರೀ ಹಾಸ್ಪಿಟ್ಯಾಲಿಟಿ ಸರ್ವಿಸಸ್ ದ ಡೈರೆಕ್ಟರ್ ಅಜಿತ್ ಶೆಟ್ಟಿ ಅಂಕಲೇಶ್ವರ್, ಮಹಿಳಾ ವಿಭಾಗ ಬಂಟರ ಸಂಘ ಬೊಂಬೈದ ಮಾಜಿ ಕಾರ್ಯಾಧ್ಯಕ್ಷೆರ್ ಆಶಾ ಮನೋಹರ್ ಹೆಗ್ಡೆ, ಬಂಟರ ಸಂಘದ ಉಪಾಧ್ಯಕ್ಷೆರ್ ರತ್ನಾಕರ ಶೆಟ್ಟಿ ಮುಂಡ್ಕೂರು, ಪ್ರಧಾನ ಕಾರ್ಯದರ್ಶಿ ಡಾ. ಆರ್. ಕೆ. ಶೆಟ್ಟಿ, ಗೌರವ ಕೋಶಾಧಿಕಾರಿ ಸಿಎ ಹರೀಶ್ ಡಿ. ಶೆಟ್ಟಿ, ಜತೆ ಕಾರ್ಯದರ್ಶಿ ಇಂದ್ರಾಳಿ ದಿವಾಕರ ಶೆಟ್ಟಿ, ಜತೆ ಕೋಶಾಧಿಕಾರಿ ಮುಂಡಪ್ಪ ಎಸ್. ಪಯ್ಯಡೆ, ಪಶ್ಚಿಮ ವಲಯ ಪ್ರಾದೇಶಿಕ ಸಮಿತಿದ ಸಮನ್ವಯಕಾರೆರ್ ಶಶಿಧರ ಕೆ. ಶೆಟ್ಟಿ, ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆರ್ ಉಮಾ ಕೃಷ್ಣ ಶೆಟ್ಟಿ, ಯುವ ವಿಭಾಗದ ಕಾರ್ಯಾಧ್ಯಕ್ಷೆರ್ ಸಾಗರ್ ಡಿ. ಶೆಟ್ಟಿ ಸನ್ಮಾನಿತೆರ್ ಬೊಂಬೈ ಬಂಟರ ಸಂಘದ ಮಾಜಿ ಅಧ್ಯಕ್ಷೆರ್ ಪದ್ಮನಾಭ. ಎಸ್. ಪಯ್ಯಡೆ, ವಸಯಿ ಡಹಾಣು ಪ್ರಾದೇಶಿಕ ಸಮಿತಿದ ಮಾಜಿ ಕಾರ್ಯಾಧ್ಯಕ್ಷೆರ್ ಜಯಂತ್ ಆರ್ ಪಕ್ಕಳ, ಸಮಾಜ ಸೇವಕೆರ್ ಆನಂದ ಶೆಟ್ಟಿ, ಪ್ಯಾರಮೌಂಟ್ ಹೆಲ್ತ್ ಸರ್ವಿಸ್ ಬೊಕ್ಕ ಸಮಿತಿದ ಕಾರ್ಯಕರ್ತೆ ನವೀನ್ ಶೆಟ್ಟಿ ಪಳ್ಳಿ, ಪ್ರಾದೇಶಿಕ ಸಮಿತಿ, ಸಲಹಾ ಸಮಿತಿದ ಕಾರ್ಯಾಧ್ಯಕ್ಷೆರ್ ಗುರ್ಮೆ ಹರೀಶ್ ಶೆಟ್ಟಿ, ಸಂಚಾಲಕೆರ್ ರಘುರಾಮ ರೈ, ಉಪ ಕಾರ್ಯಾಧ್ಯಕ್ಷೆರ್ ಪ್ರವೀಣ್ ಶೆಟ್ಟಿ ಕಣಂಜಾರ್, ಮಂಜುನಾಥ ಎನ್ ಶೆಟ್ಟಿ ಕೊಡ್ಲಾಡಿ, ಕಾರ್ಯದರ್ಶಿ ಜಗನಾಥ್ ಡಿ ಶೆಟ್ಟಿ ಪಳ್ಳಿ, ಕೋಶಾಧಿಕಾರಿ ವಿಜಯ ಎಮ್ ಶೆಟ್ಟಿ, ಜತೆ ಕಾರ್ಯದರ್ಶಿ ನಾರಾಯಣ ಶೆಟ್ಟಿ, ಜತೆ ಕೋಶಾಧಿಕಾರಿ ರತೀಶ್ ಶೆಟ್ಟಿ ವಸಾಯಿ, ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆರ್ ಉಷಾ ಶ್ರೀಧರ್ ಶೆಟ್ಟಿ, ಯುವ ವಿಭಾಗದ ಕಾರ್ಯಾಧ್ಯಕ್ಷೆರ್ ಪ್ರಖ್ಯಾತ್ ಶೆಟ್ಟಿ, ಕಾರ್ಯಕ್ರಮ ಸಮಿತಿದ ಕಾರ್ಯಾಧ್ಯಕ್ಷೆರ್ ಸುಪ್ರೀತ್ ಶೆಟ್ಟಿ ನೀರೆ, ಶಿಕ್ಷಣ ಬೊಕ್ಕ ಸಮಾಜ ಕಲ್ಯಾಣ ಸಮಿತಿದ ಕಾರ್ಯಾಧ್ಯಕ್ಷೆರ್ ಜಯಾ ಅಶೋಕ್ ಶೆಟ್ಟಿ, ಸದಸ್ಯತನ ನೋಂದಣಿದ ಕಾರ್ಯಾಧ್ಯಕ್ಷೆರ್ ನವೀನ್ ಶೆಟ್ಟಿ ಪಳ್ಳಿ, ಕ್ರೀಡಾ ಸಮಿತಿದ ಕಾರ್ಯಾಧ್ಯಕ್ಷೆರ್ ಅರುಣ್ ಶೆಟ್ಟಿ, ವಿವಾಹ ನೋಂದಣಿ ಸಮಿತಿದ ಕಾರ್ಯಾಧ್ಯಕ್ಷೆರ್ ತಾರನಾಥ ಶೆಟ್ಟಿ, ಕೇಟರಿಂಗ್ ಸಮಿತಿದ ಕಾರ್ಯಾಧ್ಯಕ್ಷೆರ್ ದಯಾನಂದ ಬಿ ಶೆಟ್ಟಿ, ಅರೊಗ್ಯ ಸಮಿತಿದ ಕಾರ್ಯಾಧ್ಯಕ್ಷೆರ್ ಸಾಯಿನಾಥ್ ಶೆಟ್ಟಿ, ಮಾಹಿತಿ ತಂತ್ರಜ್ಞಾನ ಸಮಿತಿದ ಕಾರ್ಯಾಧ್ಯಕ್ಷೆರ್ ಆಶಿಶ್ ಶೆಟ್ಟಿ, ಸಾಂಸ್ಕೃತಿಕ ಸಮಿತಿದ ಕಾರ್ಯಾಧ್ಯಕ್ಷೆರ್ ವಿಜಯ ಪಿ ಶೆಟ್ಟಿ ಕುತ್ತೆತ್ತೂರು ಪಾಲ್ ಪಡೆದಿತ್ತೆರ್.

ಬೊಂಬೈ ಬಂಟರ ಸಂಘ ಯುವ ವಿಭಾಗ ಆಯೋಜನೆ ಮಲ್ತಿನ ಆಕಾಂಕ್ಷ ಲೇಸ್ ಡ್ ಪ್ರಾದೇಶಿಕ ಸಮಿತಿದ ಯುವ ವಿಭಾಗದ ಸದಸ್ಯೆರ್ ಪಾಲ್ ಪಡೆದ್, ಸಂಸ್ಥೆಗ್ ಸುಮಾರ್ ಪ್ರಶಸ್ತಿನ್ ಕನತಿನ ಮನಿಷಾ ವಸಂತ್ ಶೆಟ್ಟಿ, ಪ್ರಥ್ವಿರಾಜ್ ಶ್ರೀಧರ್ ಶೆಟ್ಟಿ ಮೊಕ್ಲೆನ ಎದುರುಡ್ ಮೊಕ್ಲೆನ ಅಮ್ಮ ಉಷಾ ಶ್ರೀಧರ ಶೆಟ್ಟಿ, ಶ್ವೇತಾ ಜಗನಾಥ್ ಶೆಟ್ಟಿ ಬೊಕ್ಕ ಶ್ರಾವ್ಯ ಸತೀಶ್ ಶೆಟ್ಟಿ ಮೊಕ್ಲೆಗ್ ಮಾನಾದಿಗೆ ಮಲ್ತೆರ್.

ಬಂಟರ ಸಂಘ ಬೊಂಬೈ ನೆತ್ತ ಮುಖವಾಣಿ, ಬಂಟರವಾಣಿ ಆಯೋಜನೆ ಮಲ್ತಿನ ಚಿಣ್ಣರ ಚಿಲಿಪಿಲಿ ಲೇಸ್ ಡ್ ಪಾಲ್ ಪಡೆದ್ ಸಂಸ್ಥೆಗ್ ಪ್ರಶಸ್ತಿ ಕನತಿನ ಅವಿಷ್ ವಿಜಯ್ ಶೆಟ್ಟಿ, ಸಾನ್ವಿ ಸಂತೋಷ್ ಶೆಟ್ಟಿ, ಆರವ್ ರವೀಂದ್ರ ಶೆಟ್ಟಿ, ಅನಿಶ್ ಸತೀಶ್ ಶೆಟ್ಟಿ ಅಂಷ್ ರಮೇಶ್ ಶೆಟ್ಟಿ, ಶಿಕ್ಷಣ ಕ್ಷೇತ್ರಡ್ ಸಾಧನೆ ಮಲ್ತಿನ ಸಮಿತಿದ ಸದಸ್ಯೆರೆನ ಜೋಕುಲೆನ್ ಕರ್ನಿರೆ ಶ್ರೀಧರ್ ಶೆಟ್ಟಿ ಮೆರೆನ ನೆಂಪುಗಾದ್ ಮೆರೆನ ಬೊಡೆದಿ ಉಷಾ ಶ್ರೀಧರ್ ಶೆಟ್ಟಿ ಗೌರವಿಸಾಯೆರ್. C. A. ಡ್ ಎಡ್ಡೆ ಮಾರ್ಕ್ಸ್ ದೊಟ್ಟಿಗೆ ಪಾಸ್ ಆಯಿನ ಸಾಯಿರಾಜ್ ಬಾಲಕೃಷ್ಣ ಶೆಟ್ಟಿ ಬೊಕ್ಕ IT ಶಿಕ್ಷಣಡ್ ಎಡ್ಡೆ ಮಾರ್ಕ್ಸ್ ಪಡೆಯಿನ ಕಲ್ಪಾರ್ಥಿ ಸಾಥ್ವಿಕ್ ಪ್ರಕಾಶ್ ಶೆಟ್ಟಿಗ್ ಮಾನಾದಿಗೆ ಮಲ್ತೆರ್. ಶೈಕ್ಷಣಿಕ ಕ್ಷೇತ್ರಡ್ ಸಾಧನೆ ಮಲ್ತಿನಕ್ಲೆಗ್ ಡಾ. ಪಿ. ವಿ. ಶೆಟ್ಟಿ ಮೇರ್ ತನ್ನ ವೈಯಕ್ತಿಕ ಪ್ರೋತ್ಸಾಹ ಧನನ್ ಕೊರ್ದು ಗೌರವಿಸಾಯೆರ್. ಅತ್ತಂದೆ ಮಾತ ಪ್ರಾದೇಶಿಕ ಸಮಿತಿದ ಬೊಕ್ಕ ಉಪಸಮಿತಿಲೆನ ಪ್ರಮುಖೆರೆನ್ ಗೌರವಿಸಾಯೆರ್.

ಪ್ರಾದೇಶಿಕ ಸಮಿತಿದ ಜೋಕುಲೆರ್ದ್ ಬೊಕ್ಕ ಹಿರಿಯೆರ್ದ್ ಬೇತೆ ಬೇತೆ ನೃತ್ಯ, ಸಾಂಸ್ಕೃತಿಕ ಲೇಸ್ ನಡತ್ಂಡ್. ಸಾಂಸ್ಕೃತಿಕ ಲೇಸ್ ನ್ ವಿ.ಜೆ. ಮಧುರಾಜ್ ಸುಧಾರಿಕೆ ಮಲ್ತೆರ್. ಸಭಾ ಲೇಸ್ ನ್ ಪ್ರವೀಣ್ ಶೆಟ್ಟಿ ಕಣಂಜಾರ್ ಬೊಕ್ಕ ವಿಜಯ ಪಿ ಶೆಟ್ಟಿ ಕುತ್ತೆತ್ತೂರು ಸುಧಾರಿಕೆ ಮಲ್ತೆರ್.

ಹರಿದ್ವಾರಡ್ ಬೊಲ್ತೆರ್ ದ ಜವನ್ಯೆರೆರ್ದ್ ಚಂದ್ರಯಾನದ ಸಂಭ್ರಮಾಚರಣೆ

ಬೊಲ್ತೆರ್: ಬೊಳ್ಳಿ ಪ್ರವಾಸೋದ್ಯಮ ಮುತಾಲಿಕೆಡ್ ಕೇದಾರನಾಥ, ಬದ್ರಿನಾಥ, ಹರಿದ್ವಾರ ಗ್ ಪ್ರವಾಸ ಪೋಯಿನ ಬೊಲ್ತೆರ್ ದ ಜವನ್ಯೆರ್ ಬಾಹ್ಯಾಕಾಶ ವಿಜ್ಞಾನ ಸಂಸ್ಥೆ ಇಸ್ರೋ ಚಂದ್ರಯಾನ-3 ಯಶಸ್ವಿ ಆಯಿನ ಕುಷಿಟ್ಟ್ ಹರಿದ್ವಾರಡ್ ಗಂಗಾರತಿದ ಶುಭ ವೇಳ್ಯೆಡ್ ವಿಜಯೋತ್ಸವ ಆಚರಣೆ ಮಲ್ತೆರ್ .

ಇನಿ ಸೌಜನ್ಯಗ್ ನ್ಯಾಯ ಕೊರ್ಪಾವರೆ ಬಪ್ಪನಾಡ್ ಡ್ ಪ್ರಾರ್ಥನೆ, ಮುಲ್ಕಿಡ್ ಮಲ್ಲ ಪ್ರತಿಭಟನೆ

ಮುಲ್ಕಿ: ಮುಲ್ಕಿ ತಾಲ್ಲೂಕು ಸೌಜನ್ಯ ಹೋರಾಟ ಸಮಿತಿದ ನಿರೆಲ್ ಡ್ ಆ. 24 ಗುರುವಾರ ಮಧ್ಯಾಹ್ನ 3.30 ಗಂಟೆಗ್ ಸೌಜನ್ಯ ಪ್ರಕರಣದ ತನಿಖೆಗಾದ್ ಮುಲ್ಕಿಡ್ ಮಲ್ಲ ಮಟ್ಟ್ ದ ಪ್ರತಿಭಟನೆ ನಡಪರೆ ಉಂಡು.

ಸೌಜನ್ಯ ಪರ ಹೋರಾಟ ಸಂಘಟನೆ ಮಲ್ತಿನ ಮಹೇಶ್ ಶೆಟ್ಟಿ ತಿಮರೋಡಿ ಬೊಕ್ಕ ಪ್ರಮೋದ್ ಮುತಾಲಿಕ್ ಪಾಲ್ ಪಡೆವೆರ್.

ಮುಲ್ಕಿ ಸೀಮೆದ ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ಮಧ್ಯಾಹ್ನ 3.30 ಗು ಸೌಜನ್ಯ ಕೇಸ್ ದ ಆರೋಪಿಲೆಗ್ ಸೂಕ್ತ ಶಿಕ್ಷೆ ಕೊರ್ಪುನಂಚ ವಿಶೇಷ ಪ್ರಾರ್ಥನೆ ಮಲ್ಪರೆ ಉಂಡು ಪಂದ್ ಸಾಮಾಜಿಕ ಕಾರ್ಯಕರ್ತೆರ್ ನವೀನ್ ಪುತ್ರನ್ ತೆರಿಪಾದೆರ್.

ಸೌಜನ್ಯ ನ ಇಲ್ಲದಕ್ಲೆಗ್ ನ್ಯಾಯ ತಿಕ್ಕೊಡಾಂಡ ಸಂಘಟನಾತ್ಮಕ ಹೋರಾಟ ಅಗತ್ಯ ಪಂದ್ ಪಂಡಿನ
ಮುಲ್ಕಿ ನಗರ ಪಂಚಾಯತ್ ಸದಸ್ಯೆರ್ ಹರ್ಷರಾಜ ಶೆಟ್ಟಿ, ಪ್ರತಿಭಟನೆ ಡ್ ಒವ್ವೆ ಸಂಘ-ಸಂಸ್ಥೆ, ದೇವಸ್ಥಾನದ ಬೊಕ್ಕ ವೈಯಕ್ತಿಕ ತೇಜೋವಧೆಗೆ ಅವಕಾಶ ಇಜ್ಜಿ. ಬಾಲೆ ಸೌಜನ್ಯಗ್ ನ್ಯಾಯ ತಿಕ್ಕರೆ ಒಗ್ಗಟ್ಟಾದ್ ಸಮಿತಿ ಮಲ್ಪುಗ ಪಂಡೆರ್.
ಈ ಹೋರಾಟಗ್ ಮಸ್ತ್ ಸಂಘಟನೆದಕುಲು ಬೆರಿಬಲ ಕೊರ್ತೆರ್. ಭಾರಿ ಸಂಖ್ಯೆಡ್ ಜನ ಸೇರುನ ನಿರೀಕ್ಷೆ ಉಂಡು ಪಂದ್ ತೆರಿದ್ ಬೈದ್ಂಡ್.

ಆ.27 : ಚಿಣ್ಣರ ಬಿಂಬ ಭಯಂಧರ್ ಶಿಬಿರ, ಸಾಂಸ್ಕೃತಿಕ ಪ್ರತಿಭಾ ಪಂತೊ

ಬೊಂಬೈ : ಚಿಣ್ಣರ ಬಿಂಬ ನೆತ್ತ ಮುತಾಲಿಕೆಡ್ ಭಯಂಧರ್  ಶಿಬಿರ ಬೊಕ್ಕ ಸಾಂಸ್ಕೃತಿಕ ಪ್ರತಿಭಾ ಸ್ಪರ್ಧೆ ಆ.27 ದಾನಿ ಸೈಂಟ್  ಆಗ್ನೇಸ್ ಹೈಸ್ಕೂಲ್ ಡ್ ನಡಪರೆ ಉಂಡು.

ಲೇಸ್‌ದ ಉದಿಪನನ್ ರೈ ಸುಮತಿ ಎಜುಕೇಶನ್ ಟ್ರಸ್ಟ್, ಸೈಂಟ್ ಆಗ್ನೇಸ್ ಇಂಗ್ಲಿಷ್ ಹೈಸ್ಕೂಲ್ ಬೊಕ್ಕ ಕೆ.ಎಸ್ ಮೆಹತ ಸ್ಕೂಲ್& ಜೂನಿಯರ್ ಕಾಲೇಜ್‌ದ ಚೇರ್‌ಮನ್ ಡಾ.ಅರುಣೋದಯ್ ಎಸ್. ರೈ ಬಿಳಿಯೂರುಗುತ್ತು ಮೇರ್ ನಡಪಾಯೆರೆ ಉಲ್ಲೆರ್. ಲೇಸ್‌ದ ಗುರ್ಕಾರ್ಮೆನ್ ಭಯಂಧರ್ ಎಕ್ಸ್ ಕಾರ್ಪೊರೇಟರ್ ಅರವಿಂದ್ ಎ ಶೆಟ್ಟಿ ವಹಿಸೊನಿಯೆರೆ ಉಲ್ಲೆರ್.

ಮಲ್ಲ ಬಿನ್ನೆರಾದ್ ಬೊಂಬೈ ಬಂಟ್ಸ್ ಸಂಘದ ಪನವುದ ಒತ್ತು ಪಾಲವೆರ್ ರಮೇಶ್ ಎಮ್ ಶೆಟ್ಟಿ ಸಿದ್ದಕಟ್ಟೆ, ಎಮ್.ಬಿ.ಆರ್ ಗ್ಲೋಬಲ್ ಸರ್ವೀಸ್, ಮೈಡ್ ಸ್ಪೇಸ್ ಮಲಾಡ್ ಫೌಂಡರ್ ವಿಜಯ್ ಬಾಲಕೃಷ್ಣ ರಾವ್, ಭಯಂದರ್ ಕರ್ನಾಟಕ ಮಹಾ ಮಂಡಲದ  ಫೌಂಡರ್ ಚಂದ್ರಶೇಖರ್ ವಿ ಶೆಟ್ಟಿ, ಅರುಣ್ ಕಾಮರ್ಸ್ ಕ್ಲಾಸಸ್  ಭಯಂದರ್ ಈಸ್ಟ್ ನೆತ್ತ ಸ್ಥಾಪಕೆರ್ ಅರುಣ್ ಟಿ ಪಕ್ಕಳ, ಮಾಟುಂಗ ಲಯನ್ಸ್ ಇಂಗ್ಲೀಷ್ ಸ್ಕೂಲ್‌ದ ರಿ. ಪ್ರಿನಿಪಾಲ್ ಸುಮತಿ ಎಸ್ ಶೆಟ್ಟಿ, ಅಯ್ಯಪ್ಪ ಭಕ್ತವೃಂದದ ಶಿರಡಿ ನಗರ ನೆತ್ತ ಗುರ್ಕಾರೆ ಸತೀಶ್ ಜೆ ಪೂಜಾರಿ ಪಾಲ್ ಪಡೆಯೆರೆ ಉಲ್ಲೆರ್.

ಮುಂಬೈ ನಗರದ ಮನೆ ಮಾತ್ ಆದ್ ಜೋಕ್ಲೆನ ಬದ್ಕ್ ಗ್ ದಾರಿದೀಪ ಆವೊಂದು ಇಪ್ಪುನ ಚಿಣ್ಣರಬಿಂಬದ ಶಿಬಿರ ಡ್ ಒಂಜಿ ಆಯಿನ ಭಯಂದರ್ ಶಿಬಿರದ ಚಿಣ್ಣೆರೆಗ್ ಪ್ರತಿಭಾನ್ವೇಷಣೆ ಲೇಸ್ ಆಯೋಜನೆ ಮಲ್ತ್ ದ್ ಈ ಲೇಸ್ ಗ್ ಎಚ್ಚಿನ ಸಂಖ್ಯೆಡ್ ತುಳು, ಕನ್ನಡಿಗೆ ಪಾಲ್ ಪಡೆದ್ ಚಿಣ್ಣರೆನ್ ಪ್ರೋತ್ಸಾಹ ಮಲ್ಪೆರೆ ಚಿಣ್ಣರ ಬಿಂಬದ ರೂವಾರಿ ಪ್ರಕಾಶ್ ಭಂಡಾರಿ ಬೊಕ್ಕ ಪದಾಧಿಕಾರಿಲು ಬಿನ್ನಾಪು ಮಲ್ತ್ ದೆರ್. .

ಬೊಕ್ಕ ಭಾಷಣ, ಭಾವಗೀತೆ, ಜನಪದ ಗೀತೆ, ಮೊನೋ ಆಕ್ಟ್, ದೇಶಭಕ್ತಿ ಗೀತೆ ಇಂಚನೆ ಕೆಲವು ಸಾಂಸ್ಕೃತಿಕ ಕಾರ್ಯಕ್ರಮ ನಡಪರೆ ಉಂಡು.

ಕಟ್ಟೊಂದಿತ್ತಿನ ರೈಲ್ವೇ ಸಂಕ ಬೂರ್ದು 17 ಜನ ತೀರ್ ಪೋಯೆರ್!

ಹೊಸದಿಲ್ಲಿ: ಬೇಲೆ ಆವೊಂದು ಇಪ್ಪುನ ರೈಲ್ವೇ ಸಂಕ ಬೂರ್ದು 17 ಜನ ತೀರ್ ಪೋಯಿನ ಘಟನೆ ಮಿಝೋರಾಂದ ಸಾಯಿರಾಂಗ್ ಪ್ರದೇಶಡ್ ಬುಧಾರ ನಡತ್ಂಡ್.

ಸಂಕ ಮಗ್ ರ್ನಗ ಸುಮಾರ್ 35 ರ್ದ್ 40 ಕಾರ್ಮಿಕೆರ್ ಇತ್ತೆರ್ ಪಂದ್ ಅಧಿಕಾರಿಲು ತೆರಿಪಾದೆರ್. ನೆಟ್ಟ್ ತಿಕ್ಕೊನಕ್ಲೆನ್ ಬಚಾವ್ ಮಲ್ಪುನ ಪ್ರಯತ್ನ ಮಲ್ತೊಂದು ಉಲ್ಲೆರ್ ಪಂದ್ ತೆರಿದ್ ಬೈದ್ಂಡ್.

ಈ ಘಟನೆದ ಬಗೆಟ್ಟ್ ಸಂತಾಪ ತೆರಿಪಾಯಿನ ಪ್ರಧಾನಿ ನರೇಂದ್ರ ಮೋದಿ, ನೆಟ್ಟ್ ತೀರ್ ಪೋಯಿನಕ್ಲೆಗ್ ತಲಾ 2 ಲಕ್ಷ ರೂ. ಬೊಕ್ಕ ಪೆಟ್ಟಾಯಿನಕ್ಲೆನ್ ತಲಾ 50, ಸಾರ ರೂ. ಪರಿಹಾರನ್ ಘೋಷಣೆ ಮಲ್ದೆರ್ ಪಂದ್ ತೆರಿದ್ ಬೈದ್ಂಡ್.

ಸುಬ್ರಹ್ಮಣ್ಯಡ್ ಧರ್ಮಾರ್ಥ ಫೂಟ್ ಪಲ್ಸ್ ತೆರಪಿ ಶಿಬಿರ ಉದಿಪನ

ಡಾ. ರವಿ ಕಕ್ಕೆಪದವು ಸಮಾಜ ಸೇವಾ ಟ್ರಸ್ಟ್ ಸುಬ್ರಹ್ಮಣ್ಯ ಬೊಕ್ಕ ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ನೆತ್ತ ಒಟ್ಟುಸೇರಿಗೆಡ್ ಇನಿ ಬೊಲ್ಪುಗು ಪಂಚಾಯತ್ ದ ಚಾವಡಿಡ್ ಧರ್ಮೊಗು ಫೂಟ್ ಪಲ್ಸ್ ತೆರಪಿ ಶಿಬಿರ ಉದಿಪನ ಆಂಡ್.

ಶಿಬಿರದ ಉದಿಪನ ಮಲ್ತಿನ ವಿಶ್ರಾಂತ ಪ್ರಾಧ್ಯಾಪಕೆರ್ ಡಾ.ಎಸ್ ಎನ್ ಉಡುಪ ಮೇರ್ ಪಾತೆರ್ದ್, ದುಂಬುದ ಕಾಲರ್ದಿಂಚಲ ವೈದ್ಯೆರೆನ್ ಡೋಂಗಿ ಮಲ್ಪುನ ಸ್ಥಿತಿ ಬತ್ತ್ ದ್ ಇತ್ಂಡ್. ಆಂಡ ನಮ ವೈದ್ಯೆರೆನ್ ಡೋಂಗಿ ಮಲ್ಪುನ ಸರಿ ಅತ್ತ್, ಶ್ರದ್ಧೆರ್ದ್ ವೈದ್ಯೆರ್ದ್ ದೆತೊನ್ನ ಮರ್ದ್, ಅವು ವಿಷ್ಣುಪಾದಗ್ ಅತ್ತಂಡ ಅಮೃತಗ್ ಸಮಾನ ಪಂದ್ ಪಂಡೆರ್. ಅತ್ತಂದೆ ಇನಿ ಬೇತೆ ಬೇತೆ ಪೊಸತ್ ದ ವೈದ್ಯ ಪದ್ಧತಿರ್ದ್ ಒವ್ವೇ ಸೀಕ್ ನ್ ಸುಲಭವಾದ್ ಗುಣ ಮಲ್ಪರೆ ಸಾಧ್ಯ ಉಂಡು ಪಂದ್ ಪಂಡೆರ್.

ಈ ಲೇಸ್ ದ ಗುರ್ಕಾರ್ಮೆನ್ ರವಿ ಕಕ್ಕೆಪದವು ಸಮಾಜ ಸೇವಾ ಟ್ರಸ್ಟ್ ದ ಸಂಸ್ಥಾಪಕೆರ್ ಡಾ.ರವಿ ಕಕ್ಕೆಪದವು ಒಯಿಸ್ ದಿತ್ತೆರ್. ಪುತ್ತೂರ್ ದ ನೆಮ್ಮದಿ ವೆಲ್ನೆಸ್ ಸೆಂಟರ್ ದ ಮಾಲಕೆರ್ ಪ್ರಭಾಕರ ಸಾಲ್ಯಾನ್ ಮೇರ್ ಧರ್ಮಾರ್ಥ ಫೂಟ್ ಪಲ್ಸ್ ತೆರಪಿದ ಬಗೆಟ್ಟ್ ಪೊಲಬು ಕೊರಿಯೆರ್.

ಚಾವಡಿಡ್ ಕುಕ್ಕೆ ಸುಬ್ರಹ್ಮಣ್ಯ ಲಯನ್ಸ್ ಕ್ಲಬ್ ಅಧ್ಯಕ್ಷೆರ್ ರಾಮಚಂದ್ರ ಪಲಂಗಾಯ, ರೋಟರಿ ಕ್ಲಬ್ ಅಧ್ಯಕ್ಷೆರ್ ರೋ. ಪ್ರಶಾಂತ್ ಕೋಡಿಬೈಲ್, ಕುಕ್ಕೆ ಶ್ರೀ ಆಟೋ ಚಾಲಕ ಮಾಲಕ ಸಂಘದ ಅಧ್ಯಕ್ಷೆರ್ ವಿವೇಕ ದೇವರಗದ್ದೆ, ಬಿಎಂಎಸ್ ಆಟೋ ಚಾಲಕ ಮಾಲಕ ಸಂಘದ ಅಧ್ಯಕ್ಷೆರ್ ದಿನೇಶ್, ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ಕಾರ್ಯದರ್ಶಿ ಮೋನಪ್ಪ ಇತ್ತೆರ್. ಸುಬ್ರಹ್ಮಣ್ಯ ಸೀನಿಯರ್ ಚೇಂಬರ್ ಲೀಜನ್ ಅಧ್ಯಕ್ಷೆರ್ ವಿಶ್ವನಾಥ ನಡುತೋಟ ಈ ಲೇಸ್ ನ್ ಸುಧಾರಿಕೆ ಮಲ್ತೆರ್. ಗ್ರಾಮ ಪಂಚಾಯತ್ ಕಾರ್ಯದರ್ಶಿ ಮೋನಪ್ಪ ಎದ್ಕೊನಿಯೆರ್. ಗ್ರಾಮ ಪಂಚಾಯತ್ ಸದಸ್ಯೆ ಭಾರತಿ ದಿನೇಶ್ ಸೊಲ್ಮೆ ಸಂದಾಯೆರ್.