Tue. Nov 17th, 2026

ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ಬಿಜೆಪಿ ನಾಯಕೆರೆನ ಪೋಟೋ ವೈರಲ್…!

ಚಂದ್ರಯಾನ-3 ಸಕ್ಸೆಸ್ ರ್ದ್ ಬೊಕ್ಕ ಬೆಂಗ್ಲೂರುದ ಇಸ್ರೋಗ್ ಬತ್ತಿನ ಪ್ರಧಾನಿ ನರೇಂದ್ರ ಮೋದಿಯೆರೆನ್ ಭೇಟಿ ಆಪುನ ಅವಕಾಶ ಬಿಜೆಪಿ ನಾಯಕೆರೆಗ್ ತಿಕ್ ದಿಜಿ.

ಮೋದಿ ಬನ್ನಗ ಸಾರ್ವಜನಿಕೆರ್‌ನಂಚ ಬಿಜೆಪಿ ನಾಯಕೆರ್ ಬ್ಯಾರಿಕೇಡ್‌ದ ಅಂಚಿ ಉಂತುದು ಮೋದಿಗ್ ಕೈ ತೊಜಪಾದೆರ್. ಈ ಪೊಟೋ ಸಾಮಾಜಿಕ ಜಾಲ ತಾಣಡ್ ವೈರಲ್ ಆತ್‌ಂಡ್. “ರಾಜ್ಯ ಬಿಜೆಪಿ ನಾಯಕೆರೆಗ್ ಇಂಚಿನ ದುಸ್ಥಿತಿ, ಬಿಜೆಪಿದ ದಂಡ ನಾಯಕೆರ್, ಚಕ್ರವರ್ತಿಲು, ಸಾಮ್ರಾಟೆರ್ ಪೂರ ಬೀದಿ ಪಾಲಾತೆರ್. ಮೊಕ್ಲೆಗ್ ಮಿನಿಮಮ್ ಮರ್ಯಾದಿಲ ಇಜ್ಜಾ?” ಪಂದ್ ಕಾಂಗ್ರೆಸ್ ಟೀಕೆ ಮಲ್ತ್ ದ್ಂಡ್. ಸದ್ಯಗ್ ಈ ಪೋಟೋ ವೈರಲ್ ಆತ್‌ಂಡ್.

ಆ.27 ಬೊಲ್ತೆರ್ ಡ್ ಎಸ್.ಡಿ.ಸಿ.ಸಿ ಬ್ಯಾಂಕ್ ದ ಪೊಸ ಎ.ಟಿ.ಎಂ ಉದಿಪನ

ಬೊಲ್ತೆರ್: ಎಸ್‌ಡಿಸಿಸಿ ಬ್ಯಾಂಕ್ ಬೊಲ್ತೆರ್ ಶಾಖಾ ಕಟ್ವಾನಡ್ ಪೊಸ ಎಟಿಎಂ ಉದಿಪನ ಬೊಕ್ಕ ಪೊಸ ಲಿಪ್ಟ್ ದ ಉದಿಪನ ಲೇಸ್ ಆ.27 ದಾನಿ ಬ್ಯಾಂಕ್‌ದ ಸಭಾಭವನಡ್ ನಡಪೆರೆ ಉಂಡು.

ಪೊಸ ಎಟಿಎಂ ದ ಉದಿಪಿನನ್ ಬೊಲ್ತೆರ್ ಶಾಸಕೆರ್ ಹರೀಶ್ ಪೂಂಜ ನಡಪಾದು ಕೊರಿಯೆರೆ ಉಲ್ಲೆರ್. ಪೊಸ ಲಿಪ್ಟ್ ದ ಉದಿಪನನ್ ವಿಧಾನ ಪರಿಷತ್ ಶಾಸಕೆರ್ ಕೆ ಹರೀಶ್ ಕುಮಾರ್ ನಡಪಾದ್ ಕೊರಿಯೆರೆ ಉಲ್ಲೆರ್. ಸಭಾ ಕಾರ್ಯಕ್ರಮದ ಗುರ್ಕಾಮೆನ್ ದ.ಕ. ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್‌ದ ಗುರ್ಕಾರೆ ಡಾ. ಎಂ.ಎನ್ ರಾಜೇಂದ್ರ ಕುಮಾರ್ ವಹಿಸೊನಿಯೆರೆ ಉಲ್ಲೆರ್.

ಈ ಪೊರ್ತುಡು ಸಂಘದ ಉಪಾಧ್ಯಕ್ಷೆರ್ ವಿನಯ ಕುಮಾರ್ ಸೂರಿಂಜೆ, ಪ್ರಭಾರ ಮುಖ್ಯ ಕಾರ್ಯನಿರ್ವಾಹಣಾಧಿಕಾರಿ ಕೆ ಗೋಪಾಲಕೃಷ್ಣ ಭಟ್, ಬೊಕ್ಕ ಸಂಘದ ಮಾತ ನಿರ್ದೇಶೆಕೆರ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಪ್ರಕಟನೆಡ್ ತೆರಿಪಾದೆರ್.

ನ್ಯೂ ಫ್ರೆಂಡ್ಸ್ ಸ್ಪೋರ್ಟ್ ಕ್ಲಬ್; ಸಾರ್ವಜನಿಕ ಮೊಸರು ಕುಡಿಕೆ ಉತ್ಸವ

ಬಳ್ಳಮಂಜ: ನ್ಯೂ ಫ್ರೆಂಡ್ಸ್ ಕ್ಲಬ್ ಬಳ್ಳಮಂಜ ನೆತ್ತ ಮುತಾಲಿಕೆಡ್ ಅಷ್ಟೆಮಿದ ಲೆಕ್ಕಡ್ ಸಾರ್ವಜನಿಕ ಮೊಸರು ಕುಡಿಕೆ ಉತ್ಸವ ಸೆ.6 ದಾನಿ ಬುಧವಾರ ಬಳ್ಳಮಂಜ ಸಾರ್ವಜನಿಕ ಕ್ರೀಡಾಂಗಣಡ್ ನಡಪರೆ ಉಂಡು.

ಲೇಸ್‌ದ ಉದಿಪನನ್ ಶ್ರೀ ಕ್ಷೇತ್ರ ಬಳ್ಳಮಂಜದ ಅರ್ಚಕೆರ್ ಸುನಿಲ್ ಮುಚ್ಚಿನಾಯ ವಹಿಸಾಯೆರೆ ಉಲ್ಲೆರ್. ಬಳ್ಳಮಂಜ ನ್ಯೂ ಫ್ರೆಂಡ್ಸ್ ಸ್ಪೋರ್ಟ್ಸ್ ಕ್ಲಬ್ ದ ಗುರ್ಕಾರೆ ಪ್ರೇಮನಾಥ ಲೇಸ್‌ದ ಗುರ್ಕಾಮೆನ್ ವಹಿಸಾಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಮಚ್ಚಿನ ಗ್ರಾ,ಪಂ ದ ಗುರ್ಕಾರ್ದಿ ರುಕ್ಮಿಣಿ, ಮಚ್ಚಿನ ಸ.ಪ್ರೌ. ಶಾಲೆದ ಮುಖ್ಯೋಪಾಧ್ಯಾಯೆರ್ ಎಸ್.ಪ್ರಕಾಶ್ ನಾಯ್ಕ್, ಸ.ಪ್ರಾ.ಶಾಲೆದ ಪ್ರಭಾರ ಮುಖ್ಯ ಶಿಕ್ಷಕೆರ್ ಆಗ್ನೇಸ್ ಪ್ರವೀಳಾ ಲೋಬೊ ಈ ಲೇಸ್‌ಡ್ ಪಾಲ್ ಪಡೆಯೆರೆ ಉಲ್ಲೆರ್.

ಮುಗಿತಲದ ಸಮಾರಂಭದ ಗುರ್ಕಾರ್ಮೆನ್ ನ್ಯೂ ಫ್ರೆಂಡ್ಸ್ ಸ್ಪೋರ್ಟ್ಸ್ ಕ್ಲಬ್ ದ ಗುರ್ಕಾರೆ ಪ್ರೇಮನಾಥ ವಹಿಸಾಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಶಾಸಕೆರ್ ಹರೀಶ್ ಪೂಂಜ, ಬೆಸ್ಟ್ ಫೌಂಡೇಶನ್ ದ ಗುರ್ಕಾರೆ ರಕ್ಷಿತ್ ಶಿವರಾಮ್, ಮಡಂತ್ಯಾರು-ಪುಂಜಾಲಕಟ್ಟೆ ವರ್ತಕರ ಸಂಘದ ಗುರ್ಕಾರೆ ಜಯಂತ್ ಶೆಟ್ಟಿ, ಬ್ಲಾಕ್ ಕಾಂಗ್ರೆಸ್ ಸಮಿತಿದ ಗುರ್ಕಾರೆ ನಾಗೇಶ್ ಗೌಡ, ಮಚ್ಚಿನ ಗ್ರಾ.ಪಂ ದ ಮಾಜಿ ಗುರ್ಕಾರೆ, ಸಾರ್ವಜನಿಕ ಗಣೇಶೋತ್ಸವದ ಗುರ್ಕಾರೆ ಪ್ರಮೋದ್ ಕುಮಾರ್, ಹಿಂದುಳಿದ ವರ್ಗದ ಕಲ್ಯಾಣ ಇಲಾಖೆದ ನಿವೃತ ವಿಸ್ತಾರಣಾಧಿಕಾರಿ ಲ| ಸುರೇಂದ್ರ ಎಸ್, ಮಚ್ಚಿನ ಗ್ರಾ.ಪಂ ಮಾಜಿ ಗುರ್ಕಾರೆ ಚಂದ್ರಕಾಂತ ನಿಡ್ಡಾಜೆ, ಸೃಷ್ಟಿ ಕನ್ಸ್ ಸ್ಟಕ್ಷನ್& ಕನ್ಸಲ್ಟಿಂಗ್ ಇಂಜಿನಿಯರ್ ಯತೀಶ್ ರೈ ಕೈಲ, ಎಂ.ಆರ್ ಸುಪಾರಿ ಬಿ. ಹೈದರ್, ದೈವ ನರ್ತಕೆರ್ ಪ್ರಶಾಂತ್, ಬ್ಯಾಂಕ್ ಆಫ್ ಬರೋಡದ ಜಯರಾಮ್ ಕುಲಾಲ್, ಅಶ್ರಫ್ ಸಾಲುಮರ, ಜೆಸಿಐ ದ ವಲಯ ನಿರ್ದೇಶಕೆರ್ ಜೆ.ಸಿ ವಿನಿತ್ ಜೋಗಿತ್ತಾಯ ಬಳ್ಳಮಂಜ, ಮಚ್ಚಿನ ಎಸ್.ಡಿ.ಎಮ್.ಸಿ ದ ಕಾರ್ಯಾಧ್ಯಕ್ಷೆರ್ ರುಕ್ಮಯ ಕುಲಾಲ್ ಲೇಸ್‌ಡ್ ಪಾಲ್ ಪಡೆಯೆರೆ ಉಲ್ಲೆರ್.

ಲೇಸ್ ಡ್ ಎಸ್.ಎಸ್.ಎಲ್.ಸಿ ಡ್ ಎಚ್ಚ ಮಾರ್ಕ್ ದೆತ್ತಿನ ಅಪ್ನಾನ್ ಬೊಕ್ಕ ರಚನಾ ಅಂಚನೆ ರಾಜ್ಯ ಮಟ್ಟದ ಕ್ರೀಡಾಕೂಟಡ್ ಪ್ರಶಸ್ತಿ ಪಡೆನ ಪುನೀತ್ ಕುಮಾರ್ ಬೊಕ್ಕ ಧನ್ಯ ಮೊಕ್ಲೆಗ್ ಮಾನಾದಿಗೆ ಮಲ್ಪೆರೆ ಉಂಡು.

ಆಂಜೊವ್ ನಕ್ಲೆಗ್ ಬೈಕ್ ರೇಸ್, ಮೈಲ್ ರೇಸ್, ಗೋವಿಂದ ಸ್ಪರ್ಧೆ, ಹಗ್ಗಜಗ್ಗಾಟ ಸ್ಪರ್ಧೆ, ಪೊಂಜೊವ್ ನಕ್ಲೆಗ್ ಹಗ್ಗಜಗ್ಗಾಟ, ತ್ರೋಬಾಲ್, ಸಂಗೀತ ಕುರ್ಚಿ, ಗುಂಡು ಎಸೆತ, ಮಡಕೆ ಹಾಕುನ, ಜೊಕ್ಲೆಗ್ 3 ವರ್ಷರ್ದ್ 5 ವರ್ಷದ ಉಲಾಯಿದ ಜೋಕುಲೆಗ್ ಕೃಷ್ಣ ವೇಷ ಸ್ಪರ್ಧೆ ನಡಪರೆ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಲಾಯಿಲ: 352ನೇ ಆರಾಧನಾ ಮಹೋತ್ಸವ

ಲಾಯಿಲ: ಶ್ರೀ ರಾಘವೇಂದ್ರ ಸೇವಾ ಪ್ರತಿಷ್ಠಾನ ಮುತಾಲಿಕೆಡ್ ಗುರುರಾಘವೇಂದ್ರ ಸ್ವಾಮಿಲೆನ 352ನೇ ಆರಾಧನಾ ಮಹೋತ್ಸವ ಸೆ.1 ರ್ದ್ ಸೆ.3 ಮುಟ ನಡಪೆರೆ ಉಂಡು.

ಆರಾಧನಾ ಮಹೋತ್ಸವದ ಗುರ್ಕಾಮೆನ್ ರಾಘವೇಂದ್ರ ಸೇವಾ ಪ್ರತಿಷ್ಠಾನದ ಗುರ್ಕಾರೆ ಪೀತಾಂಬರ ಹೇರಾಜೆ ವಹಿಸೊನಿಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಮುಗುಳಿ ನಾರಾಯಣ ರಾವ್, ನಾರಾಯಣ ಬೇಗೂರು, ನಾರಾಯಣ ಸುವರ್ಣ ಲೇಸ್ ಡ್ ಪಾಲ್ ಪಡೆಯೆರೆ ಉಲ್ಲೆರ್.

ಉಜಿರೆ ಶ್ರೀ.ಧ.ಮಂ.ಕಾಲೇಜ್‌ದ ಪ್ರಾಂಶುಪಾಲೆರ್ ಡಾ| ಕುಮಾರ್ ಹೆಗ್ಡೆ, ಬೊಲ್ತೆರ್ ಪತ್ರಕರ್ತರ ಸಂಘದ ಗುರ್ಕಾರೆ ಹೃಷಿಕೇಶ್ ಧರ್ಮಸ್ಥಳ ಮೊಕ್ಲೆಗ್ ಈ ಪೊರ್ತುಡು ಮಾನಾದಿಗೆ ಮಲ್ಪೆರೆ ಉಲ್ಲೆರ್.

ನಂದಿಕೇಶ್ವರ ದೇವಸ್ಥಾನಡ್ ವರಮಹಾಲಕ್ಷ್ಮೀ ಪೂಜೆ

ಬೊಳ್ತೆರ್: ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ ಎ ಬೊಕ್ಕ ಬಿ ಒಕ್ಕೂಟದ ನಿರೆಲ್ಡ್ 19 ನೇ ವರ್ಸದ ಶ್ರೀ ವರಮಹಾಲಕ್ಷ್ಮೀ ವೃತ ಪೂಜೆ ಆ.25 ಸುಕ್ರವಾರ ದಾನಿ ನಂದಿಕೇಶ್ವರ ದೇವಸ್ಥಾನದ ವಠಾರಡ್ ನಡತ್ಂಡ್.

ಬ್ರಹ್ಮಶ್ರೀ ಕೊಯ್ಯೂರು ನಂದಕುಮಾರ ತಂತ್ರಿ ಶ್ರೀ ವರಮಹಾಲಕ್ಷ್ಮೀ ಪೂಜೆನ್ ನಡಪಾದ್ ಕೊರಿಯೆರ್. ಎಚ್ಚಿನ ಸಂಖ್ಯೆಡ್ ಪೊಂಜೊವ್ ನಕುಲ್ ಈ ಪೂಜೆಡ್ ಪಾಲ್ ಪಡೆದ್ ಇತ್ತೆರ್.

ಕೇರಳ ಜೀಪ್ ಅಪಘಾತ: ದೇವೆರೆ ಪಾದ ಸೇರಿಯೆರ್ 9 ಪೊಂಜೊವ್ ಲು

ಕೇರಳದ ವಯನಾಡು ಜಿಲ್ಲೆಡ್ ಚಾ ತೋಟಡ್ ಕೆಲಸ ಮಲ್ಪುನ ಪೊಂಜೊವ್ ನಕ್ಲೆನ್ ಲೆತೊಂದು ಪೋವೊಂದಿತ್ತಿನ ಜೀಪ್ ಆ.25 ದಾನಿ ಸುಕ್ರವಾರ ಮದ್ಯಾಹ್ನ ವಲದ್ ಮಾನಂದವಾಡಿ ರೋಡ್ ಡ್ ಅಪಘಾತ ಆತ್‌ಂಡ್.

ಜೀಪ್‌ಡ್ 14 ಜನ ಪ್ರಯಾಣ ಮಲ್ತೊಂದು ಇತ್ತೆರ್. ಜೀಪ್‌ದ ಡ್ರೈವರ್ ನ್ ಬುಡ್ದು 13 ಜನ ಪೊಂಜೊವ್ ನಕ್ಲೆನೆಟ್ಟ್ 9 ಜನ ತೀರ್ ಪೋತೆರ್. ಜೀಪ್ ದ ಡ್ರೈವರ್ ಗ್ ಪೆಟ್ಟ್ ಆತ್‌ಂಡ್. ಮೊಕ್ಲೆನ್ ಮಾನಂದವಾಡಿ ಆಸ್ಪತ್ರೆಡ್ ದಾಖಲ್ ಮಲ್ತ್ ದೆರ್.

ಜೀಪು ದುರಂತದ ವಿಚಾರವಾದ್ ಕೇರಳ ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ಪ್ರತಿಕ್ರಿಯೆ ಮಲ್ತ್ ದೆರ್. ಅರಣ್ಯ ಸಚಿವೆರ್ ಎಕೆ ಸಸೀಂದ್ರನ್ ಅರೆನ್ ಕೂಡ್ಲೆ ಆ ಜಾಗೆಗ್ ಪೋದು ವರದಿ ಕೊರಿಯೆರೆ ಪಂತೆರ್.

ಲ್ಯಾಂಡರ್ ಜತ್ತಿನ ಜಾಗೆಗ್ “ಶಿವ ಶಕ್ತಿ” ಪಾಯಿಂಟ್ ಪುದರ್ ದೀಯಿನ ಪ್ರಧಾನಿ ಮೋದಿ

ಚಂದ್ರಯಾನ-3 ಯಶಸ್ವಿ ಆಯಿನೆಕ್ಕ್ ಬಾರಿ ಖುಷಿ ಆತ್ಂಡ್ ಪಂದ್ ಮೋದಿ ಪಂಡೆರ್. ಇಸ್ರೋದ ಆಫೀಸ್ ಡ್ ಉದ್ದೇಶಿಸಾದ್ ಪಾತೆರ್ನ ಮೋದಿ ವಿಜ್ಞಾನಿಲೆನ ಸಾಧನೆಗ್ ಸೆಲ್ಯೂಟ್, ನಿಕ್ಲೆನ ಕೆಲಸಗ್ ಸೆಲ್ಯೂಟ್, ನಮ್ಮ ವ್ಯಜ್ಞಾನಿಕ ಸಾಧನೆ, ದೇಶದ ಘನತೆನ್ ಎತ್ತರೊಗು ರಾಪಾಯಿನೆಕ್ಕ್ ಸೊಲ್ಮೆಲು. ಇತ್ತೆ ಭಾರತ ಚಂದ್ರನ ಮಿತ್ತ್ ಉಂಡು ಪಂಡೆರ್.


ಚಂದ್ರನ ಮಿತ್ತ್ ವಿಕ್ರಮ್ ಲ್ಯಾಂಡರ್ ಜತ್ತಿನ ಜಾಗೆನ್ ‘ ಶಿವಶಕ್ತಿ’ ಪಾಯಿಂಟ್ ಪಂದ್ ಆರ್ ಘೋಷಣೆ ಮಲ್ತೆರ್. ಶಿವಶಕ್ತಿ ಪಂಡ ಅಭಿವೃದ್ಧಿದ ಸಂಕೇತ. ಚಂದ್ರಯಾನ -2 ಜತ್ತಿನ ಜಾಗೆನ್ ‘ತಿರಂಗಾ’ ಪಾಯಿಂಟ್ ಪಂದ್ ಪ್ರಕಟ ಮಲ್ತೆರ್. ತಿರಂಗಾ ಪಾಯಿಂಟ್ ಭಾರತದ ಸಾಧನೆದ ಪ್ರತೀಕ ಆಂತ್ ಡ್ ಪಂದ್ ಪ್ರಧಾನಿ ಮೋದಿ ಪಂಡೆರ್.

ರೈಲ್ ಡ್ ತೂ: 8 ಜನ ತೀರ್ ಪೋಯೆರ್

ಆ.26: ಮದುರೈ ರೈಲ್ವೆ ನಿಲ್ದಾಣಡಿತ್ತಿನ ರೈಲ್ ಡ್ ತೂ ಪೊತ್ತಿನ ಪರಿಣಾಮ 8 ಜನ ತೀರ್ ಪೋಯೆರ್. 20 ಜನಕ್ ಗಾಯ ಆತ್ಂಡ್.

ರೈಲ್ ಡ್ ಪ್ರವಾಸಿಗೆರ್ ಗ್ಯಾಸ್ ಡ್ ಅಟಿಲ್ ಮಲ್ಪುನಗ ಗ್ಯಾಸ್ ಸೋರಿಕೆ ಆದ್ ಸ್ಫೋಟ ಆತ್ಂಡ್. ಅಗ್ನಿಶಾಮಕ ದಳ ತಕುಲ್ ತೂ ತೆಕ್ಕಾದ್, ರೈಲ್ ದ ಲಾಸ್ಟ್ ದ ರಡ್ಡ್ ಡಬ್ಬಿ ಪೂರ ಪೊತುದು ಪೋತುಂಡು.

ಹಳೆಯಂಗಡಿ ಬಿಲ್ಲವ ಸಮಾಜ ಸೇವಾ ಸಂಘಡ್ ವರಮಹಾಲಕ್ಷ್ಮೀ ಪೂಜೆ

ಹಳೆಯಂಗಡಿ: ಶ್ರೀ ವರ ಮಹಾಲಕ್ಷ್ಮಿ ವೃತ ಪೂಜಾ ಕಾರ್ಯಕ್ರಮ ಹಳೆಯಂಗಡಿ ಬಿಲ್ಲವ ಸಮಾಜ ಸೇವಾ ಸಂಘ(ರಿ) ಡ್ ಆ.25 ಸುಕ್ರಾರ ಶ್ರದ್ಧಾಭಕ್ತಿಡ್ ನಡತ್ಂಡ್.

ಎಚ್ಚಿನ ಸಂಖ್ಯೆಡ್ ಪೊಂಜೊವುಲು ಪೂಜೆಡ್ ಪಾಲ್ ಪಡೆದ್ ಲಕ್ಷ್ಮೀ ದೇವಿನ ಅನುಗ್ರಹಕ್ಕ್ ಪಾತ್ರರಾಯೆರ್.

ಅಂಚೆನೆ ಆ.31 ಗುರುವಾರ ನಡಪುನ ಬ್ರಹ್ಮ ಶ್ರೀ ನಾರಾಯಣ ಗುರುಕ್ಲೆನ 169ನೇ ಜನ್ಮದಿನಾಚರಣೆ ಭಾರಿ ಗೌಜಿಡ್ ಗುರು ಮಂದಿರ ಡ್ ನಡಪರೆ ಉಂಡು. ಈತ್ ನೆಟ ಸಹಕಾರನ್ ಕೊರ್ನ ಮಾತಾ ಭಕ್ತಾದಿಲು ಗುರು ಜಯಂತಿದಾನಿಲ ತನುಮನಧನ ಸಹಕಾರ ಕೊರ್ಪಿನ ಮುಕೇನ ಸೇವಾ ರೂಪಡ್ ಪೂತ್ತ ಅಲಂಕಾರ , ಪ್ರಸಾದ ಪಂಚಕಜ್ಜಾಯ , ಫಲವಸ್ತು, ಪ್ರಸಾದ , ಅನ್ನ ಸಂತರ್ಪಣೆ,ಲೈಟಿಂಗ್ ಇಂಚ ಸೇವೆದ ಪ್ರಾಯೋಜಕತ್ವ ವಹಿಸಾವುನ ಒಟ್ಟಿಗೆ ಶತಭಿಷಾ ಅಭಿಷೇಕ ಪೂಜೆ , ಗುರು ಪೂಜೆ ಸೇವೆನ್ ಕೊರ್ದು ಶ್ರೀ ಗುರು ದೇವೆರ್ನ ಪ್ರಸಾದ ಸ್ವೀಕಾರ ಮಲ್ಪೊಡು ಪಂದ್ ಹಳೆಯಂಗಡಿ ಬಿಲ್ಲವ ಸಂಘದ ಗುರ್ಕಾರೆರ್ ಚಂದ್ರಶೇಖರ್ ನಾನಿಲ್ ಬಿನ್ನಾಪು ಮಲ್ದೆರ್.

ಉಚ್ಚಿಲ ಶ್ರೀ ಮಹಾಲಕ್ಷ್ಮಿ ದೇವಲ್ಯಡ್ ವರಮಹಾಲಕ್ಷ್ಮಿ ಪೂಜೆ

ಉಚ್ಚಿಲದ ಶ್ರೀ ಮಹಾಲಕ್ಷ್ಮಿ ದೇವಲ್ಯಡ್ ವರಮಹಾಲಕ್ಷ್ಮಿ ಪೂಜೆ ಇನಿ ನಡತ್ಂಡ್.

ಕೆ ವಿ ರಾಘವೇಂದ್ರ ಉಪಾಧ್ಯಾಯ, ಕೆ ವಿ ವಿಷ್ಣುಮೂರ್ತಿ ಉಪಾಧ್ಯಾಯ ಮೊಕ್ಲೆನ ಮುತಾಲಿಕೆಡ್, ಶ್ರೀಶ ಭಟ್‌ ಮೇರ್ ಪೂಜೆದ ವಿಧಿ ವಿಧಾನನ್ ಮಲ್ತೆರ್.

ಈ ಪೊರ್ತುಡು ಮೊಗವೀರ ಮುಂದಾಳು ಡಾ. ಜಿ ಶಂಕರ್, ಮೊಗವೀರ ಮಹಾಜನ ಸಂಘದ ಗುರ್ಕಾರ್ರೆ ಜಯ ಸಿ ಕೋಟ್ಯಾನ್ ಬೆಳ್ಳಂಪಳ್ಳಿ, ಜೀರ್ಣೋದ್ಧಾರ ಸಮಿತಿದ ಗುರ್ಕಾರ್ರೆ ಗುಂಡು ಬಿ ಅಮೀನ್, ಕ್ಷೇತ್ರಡಳಿತ ಮಂಡಳಿದ ಗುರ್ಕಾರ್ರೆ ವಾಸುದೇವ ಸಾಲ್ಯಾನ್, ಮಹಾಜನ ಸಂಘದ ಮಹಿಳಾ ಘಟಕದ ಗುರ್ಕಾರ್ದಿ ಉಷಾರಾಣಿ ಬೋಳೂರು, ದೇವಲ್ಯದ ಪ್ರಧಾನ ಪ್ರಬಂಧಕೆರ್ ಸತೀಶ್‌ ಅಮೀನ್ ಬೊಕ್ಕ ಸಾರರ್ದ್ ಎಚ್ಚ ಸಂಖ್ಯೆಡ್ ಪೊಂಜೋವ್ ನಕುಲು ಪಾಲ್ ಪಡೆದಿತ್ತೆರ್.