Tue. Nov 17th, 2026

ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ಸೆ.19-21: ಪುರುಷರಕಟ್ಟೆಡ್ ಚೌತಿದ ಗೌಜಿ

ಪುತ್ತೂರ್: ಪುರುಷರಕಟ್ಟೆ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ 23 ನೇ ವರ್ಷೊದ ಸಾರ್ವಜನಿಕ ಚೌತಿ ಸೆ.19-21 ಮುಟ್ಟ ಪುರುಷರಕಟ್ಟೆದ ಶ್ರೀ ಮಹಾಲಿಂಗೇಶ್ವರ ದೇವೆರೆನ ಕಟ್ಟೆದ ಎದುರುಡು ನಡಪರೆ ಉಂಡು.

ಸೆ.19 ಅಂಗಾರೆ ಬೊಲ್ಪುಗು ಗಣಪತಿ ವಿಗ್ರಹ ಪ್ರತಿಷ್ಠೆ, ಪ್ರಾರ್ತನೆ, ಗಣಹೋಮ, ಮಧ್ಯಾಹ್ನ ಮಹಾಪೂಜೆ ಆದ್ ನುಪ್ಪು ಪ್ರಸಾದ ಸೇವೆ ಅವೆರ್ದ್ ಬೊಕ್ಕ ಬೇತೆ ಬೇತೆ ಗೊಬ್ಬುಲು ನಡಪರೆ ಉಂಡು. ಬಯ್ಯಗ್ ಭಜನೆ, ರಾತ್ರೆ ಸಾಂಸ್ಕೃತಿಕ ಲೇಸ್, ರಂಗಪೂಜೆ, ಮಹಾಪೂಜೆ, ನುಪ್ಪು ಪ್ರಸಾದ ಸೇವೆ ನಡಪರೆ ಉಂಡು. ಬೊಕ್ಕ ತುಳು ಅಪ್ಪೆ ಕಲಾವಿದೆರ್ ಕುಡ್ಲ ಮೊಕ್ಲೆರ್ದ್ ಅಮೋಘ ಕುಸಲ್ದ ಎಸಲ್ ಭರತನಾಟ್ಯ ಡ್ಯಾನ್ಸ್, ಯಕ್ಷನೃತ್ಯ, ಮಿಮಿಕ್ರಿ ಕಾರ್ಯಕ್ರಮ ನಡಪರೆ ಉಂಡು.

ಸೆ.20 ಬುಧಾರ ಬೊಲ್ಪುಗು ಗಣಹೋಮ, ಮಧ್ಯಾಹ್ನ ಮಹಾಪೂಜೆ, ನುಪ್ಪುಪ್ರಸಾದ ಸೇವೆ, ಬಯ್ಯಗ್ ಭಜನೆ, ರಾತ್ರೆ ರಂಗಪೂಜೆ, ಮಹಾಪೂಜೆ, ಬೊಕ್ಕ ಧಾರ್ಮಿಕ ಸಭಾ ಲೇಸ್ ಆದ್ ಮುರಳಿ ಈ ಪಿರ ಬರೊಲಿ ತುಳು ನಾಟಕ ನಡಪರೆ ಉಂಡು.

ಸೆ.21 ಗುರುವಾರ ಬೊಲ್ಪುಗು ಗಣಹೋಮ, ಮಧ್ಯಾಹ್ನ ಮಹಾಪೂಜೆ, ನುಪ್ಪುಪ್ರಸಾದ ಆದ್ ಭಜನೆ ಸೇವೆ ನಡಪರೆ ಉಂಡು. ಬಯ್ಯಗ್ ಶೋಭಾಯಾತ್ರೆ ನಡಪರೆ ಉಂಡು.

ಅಂಚೆನೆ ಈ ಮೂಜಿ ದಿನತ್ತ ಲೇಸ್ ಗ್ ಮಾತೆರ್ಲಾ ಬತ್ತ್ ದ್, ಶ್ರೀ ಮಹಾಗಣಪತಿ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಪುರುಷರಕಟ್ಟೆ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ ಗುರ್ಕಾರ್ಲು ವಿಶ್ವನಾಥ ಪುರುಷ ಎಂ. ಪುರುಷರಕಟ್ಟೆ, ಖಜಾಂಚಿ ಕೃಷ್ಣಪ್ಪ ಶೆಟ್ಟಿಮಜಲ್, ಕಾರ್ಯದರ್ಶಿ ಹರೀಶ್ ದೇವಾಡಿಗ ಮುಕ್ವೆ ಬೊಕ್ಕ ಸರ್ವಸದಸ್ಯೆರ್ ತೆರಿಪಾದೆರ್.

ಮುಲ್ಕಿ ನಗರ ಪಂಚಾಯತ್ ವ್ಯಾಪ್ತಿಡ್ ಗೃಹಲಕ್ಷ್ಮಿ ಯೋಜನೆ ಉದಿಪನ

ಮುಲ್ಕಿ : ಕಾಂಗ್ರೆಸ್ ಸರ್ಕಾರದ ಗ್ಯಾರಂಟಿ ಯೋಜನೆಡ್ ಒಂಜಾಯಿನ ಗೃಹ ಲಕ್ಷ್ಮಿ ಯೋಜನೆಗ್ ಮುಲ್ಕಿ ನಗರ ಪಂಚಾಯತ್ ಸಭಾಂಗಣಡ್ ಗುರುವಾರ ಚಾಲನೆ ಕೊರಿಯೆರ್.

ತಹಶೀಲ್ದಾರ್ ಪ್ರದೀಪ್ ಕುರ್ಡೇಕರ್ ತಾರೆದ ಸಿರಿ ಕೊಂಬು ಅರಳಾವುನ ಮುಕೇನ ಸಭಾ ಕಾರ್ಯಕ್ರಮ ಉದಿಪನ ಮಲ್ತೆರ್.

ಮಲ್ಲ ಬಿನ್ನೆರಾದ್ ಮುಲ್ಕಿ ನಗರ ಪಂಚಾಯತ್ ಅಧ್ಯಕ್ಷೆರ್ ಸುಭಾಷ್ ಶೆಟ್ಟಿ, ಉಪಾಧ್ಯಕ್ಷೆರ್ ಸತೀಶ್ ಅಂಚನ್, ಸದಸ್ಯೆರಾಯಿನ ಹರ್ಷರಾಜ್ ಎಂ.ಶೆಟ್ಟಿ, ವಿಮಲಾ ಪೂಜಾರ್ತಿ, ಬಾಲಚಂದ್ರ ಕಾಮತ್, ಪುತ್ತುಬಾವ, ಶೈಲೇಶ್ ಶೆಟ್ಟಿ, ರಾಧಿಕಾ ಕೋಟ್ಯಾನ್, ದಯಾವತಿ ಅಂಚನ್, ಯೋಗೀಶ್ ಕೋಟ್ಯಾನ್, ಶಾಂತಾ ಕಿರೋಡಿಯನ್ ಇತ್ತೆರ್.

ತಹಶೀಲ್ದಾರ್ ಪ್ರದೀಪ್ ಕುರ್ಡೇಕರ್ ಲೇಸ್ ದ ಗುರ್ಕಾರ್ಮೆ ಒಯಿಸ್ ದಿತ್ತೆರ್.

ಸರಕಾರಿ ಕಾಲೇಜಿದ ಕಲ್ಪಾರ್ಥಿಲು ದೇವೆರೆನ್ ಸುಗಿತೆರ್. ನಗರಪಂಚಾಯತ್ ಮುಖ್ಯಾಧಿಕಾರಿ ಎಂ.ಎನ್.ಮೇಸ್ತ ಪ್ರಸ್ತಾವಿಕವಾದ್ ತೆರಿಯೆರ್.
ರೇಷ್ಮಾ ಪೂಜಾರಿ ಲೇಸ್ ನಡಪಾದ್ ಕೊರಿಯೆರ್.

ಗುರುವಾಯನಕೆರೆ: ಎಕ್ಸೆಲ್ ಕಾಲೇಜ್ ಡ್ ಪ್ರತಿಭಾವಂತ ಕಲ್ಪಾರ್ಥಿಲೆಗ್ ಫ್ರೀ ನೀಟ್ ಕೋಚಿಂಗ್

ಗುರುವಾಯನಕೆರೆ: ಎಕ್ಸೆಲ್ ಕಾಲೇಜ್ ಡ್ ಪ್ರತಿಭಾವಂತ ಕಲ್ಪಾರ್ಥಿಲೆಗ್ ಫ್ರೀ ನೀಟ್ ಕೋಚಿಂಗ್ ಕೊರ್ಪುನ ಮುಖೇನ ಶೈಕ್ಷಣಿಕ ಸಾಧನೆನ್ ಗುರುವಾಯನಕೆರೆ ಎಕ್ಸೆಲ್ ಕಾಲೇಜ್ ಮಲ್ಪೆರೆ ಪಿದರ್‌ದುಂಡು. ಈ ಕಾಲೇಜ್ ನ್ ಸ್ಥಾಪನೆ ಮಲ್ತಿನಾರ್ ನೀಟ್ ಟ್ರೈನರ್ ಬೊಕ್ಕ ರಾಸಾಯನ ವಿಜ್ಞಾನದ ಪ್ರಾದ್ಯಾಪಕೆರ್, ಸುಮಂತ್ ಕುಮಾರ್ ಜೈನ್.

ಲ್ಯಾಂಗ್ ಟರ್ಮ್ ನೀಟ್ : ಡಾಕ್ಟರ್ ಅವೊಡು ಪಂದ್ ಎನೊಂದು ಇಪ್ಪುನ ಕಲ್ಪಾರ್ಥಿಲೆಗ್ ಪಿಯುಸಿ ಡ್ ವೈದ್ಯಕೀಯ ಕೋರ್ಸ್ ದ ಪ್ರವೇಶಗಾದ್ ನೀಟ್ ಪರೀಕ್ಷೆನ್ ಬರೆದ್, ಎನ್ನಿನಾತ್ ಮಾರ್ಕ್ ಬರಂದೆ ಇಪ್ಪುನಗ ವೈದ್ಯಕೀಯ ಕೋರ್ಸ್ ದ ಪ್ರವೇಶಗ್ ಸಂಪೂರ್ಣ ತಯಾರ್ ಆವರೆ, ಒಂಜಿ ವರ್ಷ ಬುಡಂದೆ ತರಬೇತಿನ್ ಪಡೆಯುನೆಕ್ ನೀಟ್ ಲಾಂಗ್ ಟರ್ಮ್ ಪಂದ್ ಪನ್ಪೆರ್.

ನೀಟ್ ಪರೀಕ್ಷೆಡ್ ರ‍್ಯಾಂಕ್ ದೆಪ್ಪೆರೆ ಏತೋ ಸಲ ಪ್ರತಿಭಾವಂತೆರೆಗ್ ಆಪುಜಿ. ಸರಿಯಾದ್ ಕೋಚಿಂಗ್ ತಿಕ್ಕಂದೆ, ಯೋಗ್ಯ ಸ್ಟಡಿ ಮೆಟಿರಿಯಲ್ ತಿಕ್ಕಂದೆ ಇಪ್ಪುನಗ, ಸರಿಯಾಯಿನ ಮಾರ್ಗದರ್ಶನ ಅಂಚನೆ ಕೆಲವಾತ್ ಕಾರಣದಾತ್ರ ಮಾರ್ಕ್ ಕಮ್ಮಿ ದೆಪ್ಪುವೆರ್. ಉಂದೆನ್ ಮಾತಾ ತೆರಿಯೊಂದು ಐಕ್ ಸಲಾದ್ ಎಕ್ಸೆಲ್ ಲಾಂಗ್ ಟರ್ಮ್ ಕೋಚಿಂಗ್ ಸೆಂಟರ್ ನ್ ಸ್ಥಾಪನೆ ಮಲ್ತೆರ್. ಮನೋ ವಿಜ್ಞಾನ ಅರ್ಥ ಮಲ್ತೊಂದು, ಅಕ್ಲೆಗ್ ಜಾಸ್ತಿ ಮಾರ್ಕ್ ದೆಪ್ಪೆರೆ ಬೋಡಾಪಿನ ಮಾತಾ ವಿಧಾನನ್ ಎಕ್ಸೆಲ್ ಡ್ ಪಂದ್ ಕೊರ್ಪೆರ್.

ಪ್ರತಿಭಾವಂತ ಕಲ್ಪಾರ್ಥಿ ಲೆಗ್ ಎಕ್ಸೆಲ್ ಡ್ ರಿಯಾಯಿತಿ:

ಈ ಸರ್ತಿ ನೀಟ್ ಪರೀಕ್ಷೆಡ್ 450 ರ್ದ್ ಎಚ್ಚ ಮಾರ್ಕ್ ದೆತ್ತಿನ ಕಲ್ಪಾರ್ಥಿಲೆಗ್ ಧಮಾರ್ಥ ಕೋಚಿಂಗ್ ಕೊರ್ಪೆರ್. 400 ರ್ದ್ ಎಚ್ಚ ಮಾರ್ಕ್ ದೆತ್ತಿನಕ್ಲೆಗ್ ಕಾಲೇಜ್ ದ ಪೀಸ್ ಡ್ ಶೇಕಡಾ 50% ರಿಯಾಯಿತಿ ಕೊರ್ಪ ಪಂದ್ ಕಾಲೇಜ್ ಪ್ರಕಟಣೆ ತೆರಿಪಾದೆರ್.

ಮುಲ್ಕಿ: ಶ್ರೀ ನಾರಾಯಣ ಗುರು ಜಯಂತಿದ ಭಜನಾ ಜ್ಯೋತಿ ಉದಿಪನ

ಮುಲ್ಕಿ : ಬ್ರಹ್ಮಶ್ರೀ ನಾರಾಯಣ ಗುರು ಜಯಂತಿದ ನಿಲೆಟ್ಟ್ ಮುಲ್ಕಿದ ಬಿಲ್ಲವ ಸಮಾಜ ಸೇವಾ ಸಂಘದ ಗುರು ಮಂದಿರಡ್ ಭಜನಾ ಜ್ಯೋತಿದ ಉದಿಪನದ ಲೇಸ್ ಬುಧಾರ ಬೊಲ್ಪುಗು ನಡತ್ಂಡ್.

ಪೆಜಮಾಡಿ ಬಿಲ್ಲವ ಸಂಘದ ಅಧ್ಯಕ್ಷೆರ್ ಲೋಕೇಶ್ ಅಮೀನ್ ಮೆರೆನ ಪರವಾದ್ ಶ್ರೀಮತಿ ನಿರ್ಮಲಾ ಲೋಕೇಶ್ ಅಮೀನ್ ಭಜನಾ ದೀಪೊನು ಅರ್ಲಾದ್ ಕಾಂಡೆರ್ದ್ ರಾತ್ರಿ ಮುಟ್ಟದ ಭಜನೆಗ್ ಚಾಲನೆ ಕೊರಿಯೆರ್.

ಅರ್ಚಕೆರ್ ಕೃಷ್ಣ ಶಾಂತಿ ಪ್ರಾರ್ಥನೆ ಮಲ್ತೆರ್. ಮುಲ್ಕಿ ಬಿಲ್ಲವ ಸಂಘದ ಅಧ್ಯಕ್ಷೆರ್ ಪ್ರಕಾಶ್ ಸುವರ್ಣ, ಮಾಜಿ ಅಧ್ಯಕ್ಷೆರ್ ರಮೇಶ್ ಅಮೀನ್ ಕೊಕ್ಕರಕಲ್, ಹರಿಶ್ಚಂದ್ರ ವಿ.ಕೋಟ್ಯಾನ್, ರಾಘು ಅಮೀನ್, ಯದೀಶ್ ಅಮೀನ್ ಕೊಕ್ಕರಕಲ್, ಕಿಶೋರ್ ಜೆ.ಸಾಲ್ಯಾನ್, ಭಜನಾ ಸಮಿತಿದ ಗಿರಿಧರ ಅಮೀನ್, ಮೋಹನ್ ಸುವರ್ಣ, ಜಯ ಪೂಜಾರಿ, ನರಸಿಂಹ ಪೂಜಾರಿ,ಸತೀಶ್ ಕಿಲ್ಪಾಡಿ, ಅಶ್ವಿನ್, ನಿಖಿಲ್, ಯುವ ವಾಹಿನಿ ಮುಲ್ಕಿದ ಅಧ್ಯಕ್ಷೆರ್ ಮಾಧವ ಪೂಜಾರಿ ಕಿಲ್ಪಾಡಿ, ಮಹಿಳಾ ವಿಭಾಗದ ಹೇಮಲತಾ, ಲತಾ ಸುವರ್ಣ, ಶ್ವೇತಾ ಗಿರಿಧರ ಅಮೀನ್ ಮೊಕುಲು ಮಾತ ಇತ್ತೆರ್. ಭಜನಾ ಸಂಕೀರ್ತನೆಡ್ 14 ಮಂಡಳಿದಕುಲು ಪಾಲ್ ಪಡೆಯೆರ್.

ಸುಬ್ರಹ್ಮಣ್ಯ ಕಾಲೇಜ್ ಡ್ ಓಣಂ ಪರ್ಬದ ಆಚರಣೆ

ಸುಬ್ರಹ್ಮಣ್ಯ: ಸ್ವಂತ ದೇವೆರೆನ ಊರು ಆಯಿನ ಕೇರಳಡ್ ಓಣಂ ಪರ್ಬನ್ ಗೌಜಿಡ್ ಆಚರಣೆ ಮಲ್ಪುವೆರ್. ಅಂಚೆನೆ ಇತ್ತೆ ಬೇತೆ ಕೆಲವು ಕಡೆಟ್ಲಾ ಈ ಪರ್ಬನ್ ಆಚರಣೆ ಮಲ್ತೊಂದು ಉಲ್ಲೆರ್. ಜನಕ್ಲೆನ ಯೋಗಕ್ಷೇಮಗಾದ್ ಆಡಳಿತ ಮಲ್ತಿನ ಬಲಿಚಕ್ರವರ್ತಿಗ್ ಈ ಪರ್ಬನ್ ಸಮರ್ಪಣೆ ಮಲ್ಪುವೆರ್ ಕೇರಳದಕುಲು. ವಿಷ್ಣುನ ವರದಂಚೆನೆ ಪ್ರತಿವರ್ಷ ಬಲಿಚಕ್ರವರ್ತಿ ಭೂಮಿಗ್ ಬತ್ತ್ ದ್ ತನ್ನ ಪ್ರಜೆಕ್ಲೆನ್ ಭೇಟಿ ಆಪುನ ದಿನನ್ ಓಣಂ ಪರ್ಬ ಪಂದ್ ಆಚರಣೆ ಮಲ್ಪುವೆರ್. ಈ ಪರ್ಬ ಸಂಪತ್ತ್ ದ ಸಂಕೇತ ಆತ್ಂಡ್. ಎಡ್ಡೆ ಬುಲೆಯಾದ್ ಸಮೃದ್ಧಿದ ಔನತ್ಯಗಾದ್ ಪ್ರಾರ್ತನೆ ಮಲ್ಪುನ ಪರ್ಬನೇ ಓಣಂ ಆತ್ಂಡ್ ಪಂದ್ ಎಸ್‌ಎಸ್‌ಪಿಯು ಕಾಲೇಜ್ ದ ಪ್ರಾಂಶುಪಾಲೆರ್ ಸೋಮಶೇಖರ ನಾಯಕ್ ಪಂಡೆರ್.

ಮೇರ್ ಮಹತೋಭಾರ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಆಡಳಿತಗ್ ಸೇರಿನ ಎಸ್‌ಎಸ್‌ಪಿಯು ಕಾಲೇಜ್ ಬೊಕ್ಕ ಕಾಲೇಜ್ ದ ರಾಷ್ಟ್ರೀಯ ಸೇವಾ ಯೋಜನಾ ಘಟಕದ ಒಟ್ಟುಸೇರಿಗೇಡ್ ಅಂಗಾರೆ ಕಾಲೇಜ್ ಡ್ ನಡತಿನ ಓಣಂ ಆಚರಣೆಡ್ ತುಡರ್ ಅರ್ಲಾದ್ ಉದಿಪನ ಮಲ್ತ್ ದ್ ಪಾತೆರಿಯೆರ್.

ಅತ್ತಂದೆ ಭೂಮಿ ಅಪ್ಪೆ ಒದಗವುನ ಸಮೃದ್ಧ ಫಸಲ್ ರ್ದ್ ಜನಕುಲು ಸುಖ ಜೀವನ ನಡಪಾವುನ ಕಾರಣ ಈ ದಿನ ಭೂಮಿ ಅಪ್ಪೆಗ್ ಪೂಜೆ ಪುರಸ್ಕಾರ ಮಲ್ತ್ ದ್ ಅಪ್ಪೆನ ಆಶೀರ್ವಾದ ಪಡೆಪೆರ್. ಈ ದಿನ ಬಲಿ ಚಕ್ರವರ್ತಿನ್ ಎದ್ಕೊನಿಯೆರೆ ಇಸೇಸವಾದ್ ಪೂತ್ತ ರಂಗೋಲಿ ಪಾಡ್ದ್ಂಡ್ ಪಂದ್ ಪಂಡೆರ್.

 

ಓಣಂ ಆಚರಣೆದ ಲೆಕ್ಕೊಡು ಕಾಲೇಜ್ ಡ್ ಎನ್‌ಎಸ್‌ಎಸ್ ಘಟಕದ ಕಲ್ಪಾರ್ಥಿಲು ಮಲ್ಲ ಪೂಕಳಂ ರಚನೆ ಮಲ್ತೆರ್. ಸೇವಂತಿಗೆ, ಮಲ್ಲಿಗೆ, ಕನಕಾಂಬರ, ತುಳಸಿ, ಗುಲಾಬಿ, ದಾಸವಾಳ, ಗೋರಂಟಿ ಪೂವುನ್ ಗಲಸ್ ದ್ ಕಲ್ಪಾರ್ಥಿಲು ಪೂತ್ತ ರಂಗೋಲಿ ಬುಡ್ಪಯೆರ್. ಈ ರಂಗೋಲಿದ ನಡುಟ್ಟ್ ತುಡರ್ ನ್ ದೀಯೆರ್. ತುಡರ್ ಅರ್ಲಾವುನ ಮುಖೇನ ಆಚರಣೆಗ್ ಕಾಲೇಜ್ ದ ಕಲ್ಪಾರ್ಥಿ ಸಂಘದ ಸಂಚಾಲಕೆರ್ ಜಯಪ್ರಕಾಶ್ ಆರ್ ಉದಿಪನ ಮಲ್ತೆರ್. ಸಂಸ್ಕೃತ ಉಪನ್ಯಾಸಕೆರ್ ಡಾ.ಪ್ರಜ್ವಲ್.ಜೆ ಮುತಾಲಿಕೆಡ್ ಕಲ್ಪಾರ್ಥಿಲು ಮಂತ್ರಪಠಣ ಮಲ್ತೆರ್.

ಈ ಪೊರ್ತುಡು ಸಾಂಸ್ಕೃತಿಕ ಕೂಟದ ಸಂಚಾಲಕಿ ರೇಖಾರಾಣಿ ಸೋಮಶೇಖರ್, ಎನ್‌ಎಸ್‌ಎಸ್ ಯೋಜನಾಧಿಕಾರಿ ಭವ್ಯಶ್ರೀ ಹರೀಶ್ ಕುಲ್ಕುಂದ, ರೆಡ್‌ಕ್ರಾಸ್ ಸಂಯೋಜಕಿ ಶ್ರುತಿ ಯಾಲದಾಳು, ರೋರ‍್ಸ್ ಬೊಕ್ಕ ರೇಂರ‍್ಸ್ ನಾಯಕೆ ಪ್ರವೀಣ್ ಎರ್ಮಾಯಿಲ್, ಸ್ಟಾಪ್ ಸೆಕ್ರೇಟರಿ ಗಿರೀಶ್, ಉಪನ್ಯಾಸಕೆರ್ ಜಯಶ್ರೀ.ವಿ.ದಂಬೆಕೋಡಿ, ಮನೋಜ್ ಕುಮಾರ್ ಬಿ.ಎಸ್, ರತ್ನಾಕರ ಎಸ್, ಶ್ರೀಧರ್ ಪುತ್ರನ್, ಸುಧಾ, ಸೌಮ್ಯಾ, ಶ್ಯಾಮಿಲಿ, ಪೂರ್ಣಿಮಾ ಸೇರಿನಂಚೆನೆ ಎನ್‌ಎಸ್‌ಎಸ್ ಸ್ವಯಂಸೇವಕೆರ್, ಕಲ್ಪಾರ್ಥಿಲು, ಸಿಬಂದಿಲು ಇತ್ತೆರ್.

ವರದಿ: ಗೋಪಿಚಂದನ್ ಕೆಎಸ್

ಸೆ.7: ಉಬಾರ್ ಶ್ರೀ ಸಹಸ್ರಲಿಂಗೇಶ್ವರ ದೇವಲ್ಯದ ಚಾವಡಿಡ್ ಕೊಜಪ್ಪು ಕರ ಉಚ್ಚಯ

ಉಬಾರ್ ಸಾರ್ವಜನಿಕ ಮೊಸರ್ ಕುಡಿಕೆ ಉಚ್ಚಯ ಸಮಿತಿದ ಮುತಾಲಿಕೆಡ್ ಶ್ರೀ ಕೃಷ್ಣ ಜನ್ಮಾಷ್ಠಮಿದ 44ನೇ ವರ್ಷೊದ ಕೊಜಪ್ಪು ಕರ ಉಚ್ಚಯ ಸೆ.7 ಗುರುವಾರ ಉಬಾರ್ ಶ್ರೀ ಸಹಸ್ರಲಿಂಗೇಶ್ವರ ದೇವಲ್ಯದ ಚಾವಡಿಡ್ ನಡಪರೆ ಉಂಡು.

ಬೊಲ್ಪುಗು ಭಜನೆ ಸೇವೆ, ಕಜ್ಜೊದ ಉದಿಪನ ಲೇಸ್, ಗೊಬ್ಬುದ ಪಂತೊಲು, ಮಧ್ಯಾಹ್ನ ಎಲ್ಯ ಜೋಕುಲೆನ ಕೃಷ್ಣನ ವೇಷ ಪಾಡುನ ಪಂತೊ, ನುಪ್ಪುಪ್ರಸಾದ ಸೇವೆ ಈ ಪೊರ್ತುಡು ನಡಪರೆ ಉಂಡು. ಅವೆರ್ದ್ ಬೊಕ್ಕ ಶ್ರೀ ಕೃಷ್ಣ ಚರಿತಾ ಯಕ್ಷಗಾನ ತಾಳಮದ್ದಳೆ ನಡಪರೆ ಉಂಡು. ಅಂಚೆನೆ ನಲಿಕ ಶೋಭಾಯಾತ್ರೆ ನಡಪರೆ ಉಂಡು. ಬಯ್ಯಗ್ ಸಮಾರೋಪ ಸಮಾರಂಭ ಲೇಸ್ ಡ್ ಈ ಕಾರ್ಯಕ್ರಮ ಮುಗಿವುಂಡು.

ಸೆ.19: ಕೆದಿಲ ಶ್ರೀರಾಮ ಭಜನಾ ಮಂದಿರಡ್ ಸಾರ್ವಜನಿಕ ಶ್ರೀ ಗಣೇಶೋತ್ಸವ

ಕೆದಿಲ ಶ್ರೀರಾಮ ಭಜನಾ ಮಂದಿರಡ್ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸೆ.19 ಅಂಗಾರೆ ನಡಪರೆ ಉಂಡು.

ಈ ಲೇಸ್ಗ್ ಮಾತೆರ್ನಾಲ ಸಹಕಾರ ಬೋಡು ಪಂದ್ ಕೆದಿಲ ಶ್ರೀರಾಮ ಭಜನಾ ಮಂದಿರದ ಅಧ್ಯಕ್ಷೆರ್ ಅಶ್ವತ್ ಕಾಂತುಕೋಡಿ, ಕಾರ್ಯದರ್ಶಿ ರಾಮಕೃಷ್ಣ ಗೌಡ ವಳಂಕುಮೇರಿ ಬೊಕ್ಕ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಸೆ.3: ನಾಲಾಸೋಪಾರ ವಿರಾರ್ ದ ಕಚೇರಿಡ್ 169 ನೇ ವರ್ಷೊದ ಬ್ರಹ್ಮಶ್ರೀ ನಾರಾಯಣ ಗುರುಜಯಂತಿ ಆಚರಣೆ

ಬಿಲ್ಲವರ ಅಸೋಸಿಯೇಶನ್ ಬೊಂಬೈದ ನಾಲಾಸೋಪಾರ ವಿರಾರ್ದ ಕಚೇರಿದ ರಿಜೆನ್ಸಿ ಬ್ಯಾಂಕ್ವೆಟ್ ಹಾಲ್ ಡ್ 169 ನೇ ವರ್ಷೊದ ಬ್ರಹ್ಮಶ್ರೀ ನಾರಾಯಣ ಗುರುಜಯಂತಿ ಆಚರಣೆ ಸೆ.3 ಐತಾರ ನಡಪರೆ ಉಂಡು.

ಈ ಲೇಸ್ದ ಉದಿಪನನ್ ಬಿಲ್ಲವರ ಅಸೋಸಿಯೇಶನ್ ಬೊಂಬೈದ ಗುರ್ಕಾರ್ಲು ಹರೀಶ್ ಜಿ ಅಮೀನ್ ಮಲ್ಪೆರೆ ಉಲ್ಲೆರ್. ಆನಿದ ಲೇಸ್ದ  ಪೂಜೆದ ವಿಧಿವಿಧಾನನ್ ಪುರೋಹಿತೆರ್ ರಾಕೇಶ್ ಶಾಂತಿ ಮೇರ್ ಮಲ್ಪೆರೆ ಉಲ್ಲೆರ್ ಪಂದ್ ಬೊಂಬೈ ಬಿಲ್ಲವರ ಅಸೋಸಿಯೇಷನ್ದ ಗುರ್ಕಾರ್ಲು, ಕಾರ್ಯದರ್ಶಿ ಬೊಕ್ಕ ಸರ್ವಸದಸ್ಯೆರ್ ತೆರಿಪಾದೆರ್.

ಸೆ.2-3: ಕುಂಜತ್ತಬೈಲ್ ಶ್ರೀ ಕೃಷ್ಣ ಭಜನಾ ಮಂದಿರ, ನಾಗ ಸನ್ನಿಧಿಡ್ ಪ್ರತಿಷ್ಠಾ ಕಲಶಾಭಿಷೇಕ ಪೂಜೆ

ಕುಡ್ಲ: ಕುಂಜತ್ತಬೈಲ್ ಶ್ರೀ ಕೃಷ್ಣ ಭಜನಾ ಮಂದಿರ ಬೊಕ್ಕ ನಾಗ ಸನ್ನಿಧಿಡ್ ಪ್ರತಿಷ್ಠಾ ಕಲಶಾಭಿಷೇಕ ಪೂಜೆ ಸೆ.2-3 ಕ್ಕ್ ನಡಪರೆ ಉಂಡು.

ಸೆ.2 ಸನಿಯಾರ ಪುದೆಕಾಣಿಕೆ ಬೊಕ್ಕ ಬೊಳ್ಳಿದ ಶ್ರೀ ಕೃಷ್ಣ ದೇವೆರೆನ ಪೋಟೋ ಬೊಕ್ಕ ನಾಗದೇವೆರೆನ ಕಲ್ಲ್ ದ ಮೂರ್ತಿದೊಟ್ಟಿಗೆ ಶೋಭಾಯಾತ್ರೆ ನಡಪರೆ ಉಂಡು.

ಸೆ.3 ಐತಾರ ಕೊಂರ್ಗಿಬೈಲ್ ಕೆ.ನಾರಾಯಣ ಮಯ್ಯ ಮೆರೆನ ಮುತಾಲಿಕೆಡ್ ಶ್ರೀ ನಾಗದೇವೆರ್ ಬೊಕ್ಕ ಶ್ರೀಕೃಷ್ಣ ದೇವೆರೆನ ಪ್ರತಿಷ್ಠೆ ಆಯೆರೆ ಉಂಡು.

ಈ ಲೇಸ್ ಗ್ ಭಕ್ತಾಭಿಮಾನಿಲು ಮಾತೆರ್ಲಾ ಬತ್ತ್ ದ್ ಪ್ರಸಾದ ದೆತೊಂದು, ಶ್ರೀ ಕೃಷ್ಣ ದೇವೆರೆನ ಬೊಕ್ಕ ನಾಗದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಆಡಳಿತ ಸಮಿತಿ, ಪ್ರತಿಷ್ಠಾ ಕಲಶಾಭಿಷೇಕ ಸಮಿತಿ, ಮಹಿಳಾ ಸಮಿತಿದ ಮಾತ ಸರ್ವಸದಸ್ಯೆರ್ ತೆರಿಪಾದೆರ್.

ಹ್ಯುಮಾನಿಟಿ ಟ್ರಸ್ಟ್ ದ 20 ಧರ್ಮಾರ್ಥ ಇಲ್ಲ್ ಲೆನ ಉದಿಪನ ಮಲ್ತಿನ ಡಾ.ಸಂತೋಷ್ ಹೆಗ್ಡೆ

ಬೆದ್ರ: ಶ್ರೀಮಂತಿಕೆ ಬೊಕ್ಕ ಅಧಿಕಾರನ್ ಪೂಜೆ ಮಲ್ಪುನ ಸಮಾಜಡ್ ನಮ ಉಲ್ಲ. ಅಂಚಾದ್ ನಮ ಶ್ರೀಮಂತೆರಾವೊಡು ಪಂದ್ ಪೈಪೋಟಿ ಶುರು ಮಲ್ತ್ಂಡ ಮಾನವೀಯತೆನ್ ಮರಪುವ. ನಮಡ ತೃಪ್ತಿ ಪನ್ಪುನ ಗುಣ ಇಜ್ಜಂದೆ ದುರಾಸೆ ಪನ್ಪುನ ರೋಗ ಬತ್ತ್ಂಡ ಅವು ದೇಶಗ್ ನಷ್ಟ ಮಾತ್ರ ಅತ್ತಂದೆ ವ್ಯಕ್ತಿನ ಮಿತ್ತ್ ಪರಿಣಾಮ ಬುರ್ಪಾವುಂಡು. ಹ್ಯುಮಾನಿಟಿ ಸಂಸ್ಥೆ ಪೊರ್ಲುದ ಬೇಲೆ ಮಲ್ಪುನೆನ್ ಮೆಚ್ಚುಡಾಯಿನವು ಪಂದ್ ರಾಜ್ಯದ ಮಾಜಿ ಲೋಕಯುಕ್ತೆರ್ ಜಸ್ಟೀಸ್ ಎನ್.ಸಂತೋಷ್ ಹೆಗ್ಡೆ ಪಂಡೆರ್.

ಮೇರ್ ಹ್ಯುಮಾನಿಟಿ ಟ್ರಸ್ಟ್ (ರಿ.) ಬೆಳ್ಮಣ್ ದ 1 ಸಾರ ಪ್ರಾಜೆಕ್ಟ್ ದ ಧರ್ಮೊಗು ವಸತಿ ಯೋಜನೆದ 20 ಧರ್ಮಾರ್ಥ ಇಲ್ಲ್ ಲೆನ ಪಡುಮಾರ್ನಾಡ್ ಡ್ ಉದಿಪನ ಮಲ್ತ್ ದ್, ಬನ್ನಡ್ಕ ಪಾಂಚಜನ್ಯ ಚಾವಡಿಡ್ ನಡತಿನ ಸಭಾ ಲೇಸ್ ಡ್ ಪಾತೆರಿಯೆರ್.

ದುಂಬು ಸಮಾಜಡ್ ತಪ್ಪು ಮಲ್ತ್ ದ್ ಜೈಲ್ ಗ್ ಪೋಯಿನಾಯಗ್ ಬೊಕ್ಕ ಆಯನ ಇಲ್ಲದಕ್ಲೆಗ್ ಸಾಮಾಜಿಕ ಶಿಕ್ಷೆ ಆವೊಂದು ಇತ್ತ್ಂಡ್. ಆಂಡ ಇತ್ತೆ ಮಾನ ಮಾರ್ಯದೆ ಇಜ್ಜಂದಿಲೆಕ್ಕ ಆತ್ಂಡ್ ಪಂದ್ ಡಾ. ಸಂತೋಷ್ ಹೆಗ್ಡೆ ಪಂಡೆರ್.

ವಿಜಯ ಟೈಮ್ಸ್ ದ ವ್ಯವಸ್ಥಾಪಕ ನಿರ್ದೇಶಕಿ ವಿಜಯಲಕ್ಷ್ಮಿ ಶಿಬರೂರು ಮಲ್ಲ ಬಿನ್ನೆರಾದ್ ಲೇಸ್ ಡ್ ಪಾಲ್ ಪಡೆಯೆರ್. ಬೊಕ್ಕ ಮೇರ್ ಪಾತೆರ್ದ್, ನಮಡ ಹೃದಯ ವೈಶಾಲ್ಯತೆ ಇಪ್ಪೊಡು. ಮೋಕೆ ಮಲ್ಪುನ, ದಾನ ಮಲ್ಪುನ, ಆದರಿಸಾವುನ, ಗೌರವಿಸಾವೊನ, ಪ್ರೋತ್ಸಾಹಿಸಾವೊನ ಬೊಕ್ಕ ಮಾನವೀಯತೆದ ಗುಣ ನಮಡ ಇಪ್ಪೊಡು ಪಂದ್ ಪಂಡೆರ್.

You Missed