ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ದಶರಥ ನಂದನ ಶ್ರೀ ರಾಮ ಕನ್ನಡ ಭಕ್ತಿ ಸುಗಿಪು ಬುಡುಗಡೆ

ವಿಟ್ಲ: ದಶರಥ ನಂದನ ಶ್ರೀ ರಾಮ ಕನ್ನಡ ಭಕ್ತಿ ಸುಗಿಪುನ್ ಕುಕ್ಕಾಜೆ ಶ್ರೀ ಕಾಳಿಕಾಂಬ ಆಂಜನೇಯ ದೇವಸ್ಥಾನದ ಧರ್ಮದರ್ಶಿಲು ಶ್ರೀ ಶ್ರೀಕೃಷ್ಣ ಗುರೂಜಿ ಮೇರ್ ಬುಡುಗಡೆ ಮಲ್ತ್ ದ್ ಆಶೀರ್ವಾದ ಕೊರಿಯೆರ್.

ಈ ಲೇಸ್ ಡ್ ಸಾಹಿತ್ಯ ಬೊಕ್ಕ ಗಾಯನ ಮಲ್ತಿನ ಶ್ವೇತಾ ಪ್ರವೀಣ್ ಆಚಾರ್ಯ ಮೆರೆಗ್ ಮಾನಾದಿಗೆ ನಡತ್ಂಡ್.

ಈ ಪೊರ್ತುಡು ದಯಾನಂದ ಅಮೀನ್ ಬಾಯಾರು, ದೇವಿಪ್ರಸಾದ್ ಕುಕ್ಕಾಜೆ, ಸತ್ಯಪ್ರಸಾದ್ ಕುಕ್ಕಾಜೆ, ಅಶ್ವಿನ್ ಕುಕ್ಕಾಜೆ ಪಾಲ್ ಪಡೆದಿತ್ತೆರ್.

ಈ ಪದ್ಯಗ್ ಶ್ವೇತಾ ಪ್ರವೀಣ್ ಆಚಾರ್ಯ ಬೆದ್ರ ಗಾಯನ ಬೊಕ್ಕ ಸಾಹಿತ್ಯ ಮಲ್ದೆರ್. ಪ್ರಚಾರ ಕಲೆ ಬೊಕ್ಕ ಸಂಕಲನ ಜಿತೇಶ್ ಸರಪಾಡಿದ ದಯಾನಂದ ಅಮೀನ್ ಬಾಯಾರು ಸಮಗ್ರ ನಿರ್ವಹಣೆಡ್ ದಶರಥ ನಂದನ ಶ್ರೀ ರಾಮ ಕನ್ನಡ ಭಕ್ತಿ ಸುಗಿಪು ಬುಡುಗಡೆ ಆತ್ಂಡ್. ಈ ಪದ್ಯನ್ ದಯಾ ಕ್ರಿಯೇಷನ್ you tube channel ಡ್ ತೂವೊಲಿ.

ತಿಬಾರ್ ಬ್ರಹ್ಮಕಲಶ, ನಾಗಮಂಡಲ ಅಟ್ಟಣೆದ ಸಭೆ

ಬಾಲಿವುಡ್ ನಟಿ ಶಿಲ್ಪಾ ಶೆಟ್ಟಿರ್ದ್ ಬೊಳ್ಳಿದ ಕಲಶ ಸಮರ್ಪಣೆ

ಸುರತ್ಕಲ್: ತಿಬಾರ್ ಡ್ ನಡಪುನ ಮೂಜಿನೇ ಬ್ರಹ್ಮ‌ಕಲಶ ಉಚ್ಚಯ ತೋಪುನ ಭಾಗ್ಯ ಎಂಕ್ ತಿಕ್ ದ್ಂಡ್, ಊರುದ ಪರವೂರುದ ಗ್ರಾಮಸ್ಥೆರೆನ ಸಹಕಾರರ್ದ್ ನನ ಎಪ್ರಿಲ್ ಡ್ ನಡಪುನ ಬ್ರಹ್ಮಕಲಶ ಉಚ್ಚಯ ಬೊಕ್ಕ ನಾಗಮಂಡಲ ಗೌಜಿಡ್ ನಡಪುಂಡು ಪನ್ಪುನೆಟ್ಟ್ ಒವ್ವೇ ಸಂಶಯ ಇಜ್ಜಿ ಪಂದ್ ಶಿಬರೂರುಗುತ್ತು ಗುತ್ತಿನಾರ್ ಉಮೇಶ್ ಎನ್ ಶೆಟ್ಟಿ ಪಂಡೆರ್.

ಮೇರ್ ಶಿಬರೂರು ಶ್ರೀ ಉಳ್ಳಾಯ ಬೊಕ್ಕ ಕೊಡಮಣಿತ್ತಾಯ ದೈವಸ್ಥಾನಡ್ ಏಪ್ರಿಲ್ 26 ಕ್ಕ್ ನಡಪರೆ ಇಪ್ಪುನ ಬ್ರಹ್ಮಕಲಶ ಉಚ್ಚಯ ಬೊಕ್ಕ ನಾಗಮಂಡಲದ ತಯಾರಿಗಾದ್ ಶಿಬರೂರು ದೈವಸ್ಥಾನಡ್ ನಡತಿನ ಅಟ್ಟಣೆ ಸಭೆಟ್ಟ್ ಪಾತೆರಿಯೆರ್.

ಜೀರ್ಣೋದ್ದಾರ ಬೊಕ್ಕ ಬ್ರಹ್ಮಕಲಶ ಉಚ್ಚಯ ಸಮಿತಿದ ಅಧ್ಯಕ್ಷೆರ್ ಪ್ರಭಾಕರ ಎಸ್ ಶೆಟ್ಟಿ ಕೋಂಜಾಲಗುತ್ತು ಪಾತೆರ್ದ್, ಶಿಬರೂರು ಬ್ರಹ್ಮಕಲಶ ಉಚ್ಚಯಗ್ ಬೊಂಬೈ ಭಕ್ತೆರ್ ಕೈ ಜೋಡಿಸಾದೆರ್. ಉದ್ಯಮಿಲೆನ ಸಹಕಾರಲ ಬರೊಂದು ಉಂಡು, ಕೊಡಮಣಿತ್ತಾಯನ ಶಕ್ತಿ ದಾದ ಪಂದ್ ಭಕ್ತೆರೆಗ್ ತೆರಿದ್ಂಡ್. ಕೊಡಮಣಿತ್ತಾಯಗ್ ಇತ್ತೆದ ಬಂಗಾರ್ ದ ಪಲ್ಲಕ್ಕಿ ಅರ್ಪಣೆ ಮಲ್ಪುನ ನಿರ್ಧಾರ ಮಲ್ದ್ಂಡ್, ದಾನಿಲೆನ ಸಹಕಾರರ್ದ್ ಅವು ನಡಪರೆ ಉಂಡು ಪಂದ್ ಪಂಡೆರ್.

ಸಮಿತಿದ ಕಾರ್ಯಾಧ್ಯಕ್ಷೆರ್ ಪ್ರದ್ಯುಮ್ನ ರಾವ್ ಕೈಯೂರುಗುತ್ತು ಪಾತೆರ್ದ್, ಶಿಬರೂರುಡು ನಡಪರೆ ಇಪ್ಪುನ ಉಚ್ಚಯ ಗೌಜಿಡ್ ನಡಪರೆ ಉಂಡು, ಹಿಂದಿ ಚಿತ್ರರಂಗದ ಪುಗರ್ತೆದ ನಟಿ ಶಿಲ್ಪಾ ಶೆಟ್ಟಿ ಉಚ್ಚಯದ ಪ್ರಧಾನ ಬೊಳ್ಳಿದ ಕಲಶನ್ ಕೊರ್ತೆರ್. ಪ್ರಮುಖ ಮೂಜಿ ದಿನಟ್ಟ್ ಮುಲ್ಪದ ಲೇಸ್ ಡ್ ಮೇರ್ ಪಾಲ್ ಪಡೆಯೆರೆ ಉಲ್ಲೆರ್. ಕೊಡಮಣಿತ್ತಾಯನ ಮಿತ್ತ್ ದ ಭಕ್ತಿರ್ದ್ ಬಂಗಾರ್ ದ ಪಲ್ಲಕ್ಕಿಗಾದ್ ಭಕ್ತೆರ್ ಅಕಲ್ನ ಬಂಗಾರ್ ನೇ ದಾನ ರೂಪವಾದ್ ಕೊರೊಂದು ಉಲ್ಲೆರ್ ಪಂದ್ ಪಂಡೆರ್.

ಈ ಪೊರ್ತುಡು ತುಕಾರಾಮ ಶೆಟ್ಟಿ ಪರ್ಲಬೈಲ್ ಗುತ್ತು, ಶಿವಾನಂದ ಶೆಟ್ಟಿ ಪಡುಮನೆ, ಸೂರಿಂಜೆ ಪಂಚಾಯತ್ ಅಧ್ಯಕ್ಷೆ ಗೀತಾ ಶೆಟ್ಟಿ, ಮಧುಕರ ಅಮೀನ್ ಶಿಬರೂರು, ಪುರಂದರ ಎಂ ಶೆಟ್ಟಿ, ಸುಬ್ರಮಣ್ಯ ರಾವ್ ಕೋರ್ಯಾರು, ಕಾಂತಪ್ಪ ಸಾಲಿಯಾನ್, ದಿವಾಕರ ಸಾಮಾನಿ ಪಾಲ್ ಪಡೆದಿತ್ತೆರ್.

ಸ್ವಾಗತ ಸಮಿತಿದ ಜಿತೇಂದ್ರ ಶೆಟ್ಟಿ ಕೋರ್ಯಾರುಗುತ್ತು, ಸ್ವಯಂಸೇವಕ ಸಮಿತಿದ ಗಿರೀಶ್ ಶೆಟ್ಟಿ ಪಡುಮನೆ, ಪ್ರಚಾರ ಬೊಕ್ಕ ಆಮಂತ್ರಣ ಸಮಿತಿದ ವಿನೀತ್ ಶೆಟ್ಟಿ, ಮಾಧ್ಯಮ ಸಮಿತಿದ ಬಾಳ ಜಗನ್ನಾಥ ಶೆಟ್ಟಿ, ಮಾತೃ ಸಮಿತಿದ ಆಶಾ ಶೆಟ್ಟಿ, ಸಾಂಸ್ಕ್ರತಿಕ ಸಮಿತಿದ ವಿಜೇಶ್ ಶೆಟ್ಟಿ, ಅನ್ನಸಂತರ್ಪಣೆ ಸಮಿತಿದ ಜಗದೀಶ್ ಶೆಟ್ಟಿ, ಉಗ್ರಾಣ ಸಮಿತಿದ ದಯಾನಂದ ದೇವಾಡಿಗ, ಹೊರೆಕಾಣಿಕೆ ಸಮಿತಿದ ಬಾಲಕೃಷ್ಣ ಕುಲಾಲ್, ಆರೋಗ್ಯ ಬೊಕ್ಕ ನೈರ್ಮಲ್ಯ ಸಮಿತಿದ ಸುಜಾತ ಶೆಟ್ಟಿ, ಪ್ರಸಾದ ವಿತರಣಾ ಸಮಿತಿದ ಸುಧಾಕರ ಶೆಟ್ಟಿ ಶಿಬರೂರುಗುತ್ತು, ವಾಹನ‌ ಪಾರ್ಕಿಗ್ ಸಮಿತಿದ ದಿನಕರ ಕೈಯೂರು, ಅಲಂಕಾರ ಸಮಿತಿದ ಭುವನೇಶ್ ಆಚಾರ್ಯ, ವಸತಿ ಸಮಿತಿದ ಸಂದೀಪ್ ಶೆಟ್ಟಿ, ಮಾತೃ ಸಮಿತಿದ ಶಾಮಲ ಪಿ ಶೆಟ್ಟಿ ಕೊಂಜಾಲಗುತ್ತು, ಅರ್ಥಿಕ ಸಮಿತಿದ ಪ್ರವೀಣ್ ಶೆಟ್ಟಿ, ಸಮಿತಿ ಇಡೇ ಮುಟ್ಟ ನಡಪಾಯಿನ ಕೆಲಸದ ಬಗೆಟ್ಟ್ ಪೊಲಬು, ಸಲಹೆ ಕೊರಿಯೆರ್.

ಮಧುಕರ ಅಮೀನ್ ಸೊಲ್ಮೆ ಸಂದಾದೆರ್. ಸುಬ್ರಮಣ್ಯ ರಾವ್ ಕೋರ್ಯಾರು ಲೇಸ್ ದ ಸುಧಾರಿಕೆ ಮಲ್ತೆರ್.

ಕುರುವರಬೆಟ್ಟು ಕುಸುಮ ಮೆರೆನ ಉತ್ತರಕ್ರಿಯೆ

ಹೊಸಬೆಟ್ಟು ಶ್ರೀ ಕೋರ್ದಬ್ಬು ದೈವಸ್ಥಾನದ ಅಧ್ಯಕ್ಷೆರ್, ಕುರುವರಬೆಟ್ಟು ಕೇಶವ ಮೆರೆನ ಮೆರೆನ ಬೊಡೆದಿ ಕುಸುಮ ಮೇರ್ ಮಾ.12 ಕ್ಕ್ ಅಂಗಾರೆ ದೇವೆರೆ ಪಾದ ಸೇರ್ದೆರ್. ಮೆರೆನ ಉತ್ತರಕ್ರಿಯೆ ಮಾ.25 ಸೋಮಾರ ಕುರುವರ ಬೆಟ್ಟುದ ಇಲ್ಲಡ್ ನಡತ್ಂಡ್.

ಉತ್ತರಕ್ರಿಯೆಗ್ ಮಾತೆರ್ಲಾ ಬತ್ತ್ ದ್ ಕುಸುಮ ಮೆರೆನ ಆತ್ಮೊಗು ಚಿರಶಾಂತಿಗ್ ಪ್ರಾರ್ತನೆ ಮಲ್ಪೊಡು ಪಂದ್ ಅರೆನ ಕಂಡನಿ, ಜೋಕುಲು ಬೊಕ್ಕ ಕುರುವರಬೆಟ್ಟು ಕುಟುಂಬಸ್ಥೆರ್ ಪ್ರಕಟಣೆಡ್ ತೆರಿಪಾದಿತ್ತೆರ್.

ಮಾ.28-31: ಅತ್ತೂರು ಶ್ರೀ ಅರಸು ಕುಂಜಿರಾಯ ದೈವಸ್ಥಾನಡ್ ಜಾತ್ರೆ

ಕಿನ್ನಿಗೋಳಿ: ಅತ್ತೂರು ಶ್ರೀ ಅರಸು ಕುಂಜಿರಾಯ ದೈವಸ್ಥಾನದ ವರ್ಷದ ಜಾತ್ರೆ ಮಾ.28-31 ಮುಟ್ಟ ನಡಪರೆ ಉಂಡು.

ಮಾ.28 ಕ್ಕ್ ಬೊಲ್ಪುಗು ಅರಸು ಕುಂಜಿರಾಯೆರ್ನ ಭಂಡಾರ ಬರಿಯೆರೆ, ಶ್ರೀ ಅರಸು ಕುಂಜಿರಾಯೆರೆಗ್ ನವಕ ಪ್ರಧಾನ ಕಲಶಾಭಿಷೇಕ, ಕೊಡಿ ಏರಿಯೆರೆ, ಬಯ್ಯಗ್ ದೇಲಂತಬೆಟ್ಟು ಗ್ರಾಮದ ಶಿಬರೂರು ಶ್ರೀ ಉಳ್ಳಾಯ ಬೊಕ್ಕ ಕೊಡಮಣಿತ್ತಾಯ ದೈವೊದ ಭಂಡಾರ ಬರಿಯೆರೆ, ಕಿಲೆಂಜೂರು ಶ್ರೀ ಸರಳ ಧೂಮಾವತಿ ದೈವೊದ ಭಂಡಾರ ಬರಿಯೆರೆ, ಮೂಡ್ರಗುತ್ತು ಶ್ರೀ ಕಾಂತೇರಿ ಧೂಮಾವತಿ- ಬಂಟ ದೈವೊಲೆನ ಭಂಡಾರ ಬರಿಯೆರೆ, ಕೊಯಿಕುಡೆ ಶ್ರೀ ಜಾರಂದಾಯ ದೈವೊದ ಬಂಟ ದೈವೊದ ಭಂಡಾರ ಬರಿಯೆರೆ, ರಾತ್ರೆ ಶ್ರೀ ಅರಸು ಕುಂಜಿರಾಯನ ನೇಮ ನಡಪರೆ ಉಂಡು.

ಮಾ.29 ಕ್ಕ್ ಬೊಲ್ಪುಗು ಶ್ರೀ ಉಳ್ಳಾಯ ದೈವೊದ ನೇಮ, ರಾತ್ರೆ ಕೊಡಮಣಿತ್ತಾಯ ದೈವೊದ ನೇಮ, ಶ್ರೀ ಕಾಂತೇರಿ ಧೂಮಾವತಿ- ಬಂಟ ದೈವೊದ ನೇಮ ನಡಪರೆ ಉಂಡು.

ಮಾ.30 ಕ್ಕ್ ಬಯ್ಯಗ್ ಕುಸಾಲ್ದ ಕಲಾವಿದೆರ್ ಸುರಗಿರಿ ಮೊಕ್ಲೆರ್ದ್ ತುಳು ನಾಟಕ “ಕಥೆ ಏರ್ ಬರೆಪೆರ್,” ರಾತ್ರೆ ಶ್ರೀ ಜಾರಂದಾಯ ಬಂಟ ದೈವೊದ ನೇಮ, ಅತ್ತೂರು‌ ಮಾಗಣೆ ಶ್ರೀ ಕೊರ್ದಬ್ಬು ಶ್ರೀ ಬಂಟ ದೈವೊಲೆನ ಭಂಡಾರ ಬರಿಯೆರೆ, ಶ್ರೀ ಜಾರಂದಾಯ ಬಂಟ ದೈವೊಲೆನ ಬಂಡಿ ಉಚ್ಚಯ ಬೊಕ್ಕ ಸೂಟೆದಾರ ಸೇವೆ, ಜಾರಂದಾಯ- ಬಂಟ ಬೊಕ್ಕ ಕೋರ್ದಬ್ಬು ಶ್ರೀ ಧೂಮಾವತಿ ದೈವೊಲೆನ ಭೇಟಿ, ರಾತ್ರೆ ಶ್ರೀ ಸರಳ ಧೂಮಾವತಿ ಬಂಟ ದೈವೊದ ನೇಮ ನಡಪರೆ ಉಂಡು.

ಮಾ.31 ಕ್ಕ್ ಬೊಲ್ಪುಗು ಕೊಡಿ ಜಾವೆರೆ ಬೊಕ್ಕ ಶ್ರೀ ದೈವೊಲೆನ ಭಂಡಾರ ಪೋಯೆರೆ ಉಂಡು. ಅಂಚೆನೆ ಈ ಉಚ್ಚಯದ ಪೊರ್ತುಡು ಪ್ರತೀ ದಿನೊಲ ಮಧ್ಯಾಹ್ನ ಬೊಕ್ಕ ರಾತ್ರೆ ಅನ್ನ ಪ್ರಸಾದ ಸೇವೆ ನಡಪರೆ ಉಂಡು ಪಂದ್ ದೈವಸ್ಥಾನದ ಪ್ರಕಟನೆ ತೆರಿಪಾದ್ಂಡ್.

ಮಾ.24-31: ಮಾರುತಿಮಠ ಶ್ರೀ ಕೃಷ್ಣ ಮುಖ್ಯಪ್ರಾಣ ದೇವಸ್ಥಾನಡ್ ಶನಿಪೂಜೆ ಸಪ್ತಾಹ

ಕುಂಪಲ: ಮಾರುತಿಮಠ ಶ್ರೀ ಕೃಷ್ಣ ಮುಖ್ಯಪ್ರಾಣ ದೇವಸ್ಥಾನಡ್ ಶನಿಪೂಜೆ ಸಪ್ತಾಹ ಮಾ.24-31 ಮುಟ್ಟ ನಡಪರೆ ಉಂಡು.

ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್ ಶನಿ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಕೇನೊಂದೆರ್.

ಮುಂಡಾಜೆ ಸದಾಶಿವ ಶೆಟ್ರೆಗ್ ಕದ್ರಿ ಗುತ್ತು ಪ್ರಶಸ್ತಿ

ಕರಿನ ಐವ ವರ್ಷರ್ದಿಂಚ ತೆಂಕು ತಿಟ್ಟುದ ಡೇರೆ ಬೊಕ್ಕ ಬಯಲಾಟ ಮೇಳಲೆಡ್ ಕಲಾ ಸೇವೆ ಮಲ್ತಿನ, ಕಟೀಲ್ ಮೇಳಡ್ 20 ವರ್ಷರ್ದಿಂಚ ವೇಷಧಾರಿಯಾದ್ ಬೊಕ್ಕ ಮ್ಯಾನೇಜರ್ ಆದ್ ಕೆಲಸ ಮಲ್ತೊಂದು ಇಪ್ಪುನ ಪುಗರ್ತೆದ ಯಕ್ಷಗಾನ ಕಲಾವಿದೆರ್ ಮುಂಡಾಜೆ ಸದಾಶಿವ ಶೆಟ್ಟಿ ಮೆರೆಗ್ ಕದ್ರಿ ಕಂಬುಲ ಗುತ್ತು ಬಾಲಕೃಷ್ಣ ಶೆಟ್ಟಿ ಪ್ರಶಸ್ತಿ ಕೊರಿಯೆರ್.

ಕದ್ರಿ ಕಂಬುಲ ಗುತ್ತು ವಾಸವಿ ಬಾಲಕೃಷ್ಣ ಶೆಟ್ಟಿ ಬೊಕ್ಕ ಜೋಕುಲು ಸಂಯೋಜನೆ ಮಲ್ತಿನ ಶ್ರೀ ಕಟೀಲ್ ಮೇಳದ ಸೇವೆ ಆಟದ ಪೊರ್ತುಡು ಕದ್ರಿ ಕಂಬುಲ ಸಂಯೋಜಕೆರಾದ್, ಹವ್ಯಾಸಿ ತಾಳಮದ್ದಳೆ ಕಲಾವಿದೆರಾದ್, ಸಂಘ ಪರಿವಾರದ ಹಿರಿಯ ನಾಯಕೆ ಆಯಿನ ಬಾಲಕೃಷ್ಣ ಶೆಟ್ಟಿ ಮೆರೆನ ನೆನಪುಡು ಪ್ರಶಸ್ತಿ ಕೊರಿಯೆರ್.

ಕಟೀಲ್ ಲಕ್ಷ್ಮೀ ನಾರಾಯಣ ಆಸ್ರಣ್ಣೆರ್ ಕದ್ರಿ ಕಂಬುಲ ಗುತ್ತು ಪರಿವಾರದ ಕಲಾಪ್ರೀತಿನ್ ನೆಂಪು ಮಲ್ತೆರ್. ಹಿರಿಯ ವಿದ್ವಾಂಸೆರ್ ಡಾ. ಎಮ್ ಪ್ರಭಾಕರ ಜೋಶಿ, ಕಲ್ಕೂರ ಪ್ರತಿಷ್ಠಾನದ ಪ್ರದೀಪ ಕುಮಾರ ಕಲ್ಕೂರ, ಡಾ. ಬಿ.ನಿಶಾಕಾಂತ್ ಶೆಟ್ಟಿ ಬೆಂಗ್ಲೂರು, ಸುರೇಶ ಹೆಗ್ಡೆ ಬಿನ್ನೆರಾದ್ ಪಾಲ್ ಪಡೆದಿತ್ತೆರ್. ಶಿವರಾಮ್ ಶೆಟ್ಟಿ ಇಂದ್ರಾಳಿ, ಸಿದ್ಧಾರ್ಥ್ ಶೆಟ್ಟಿ, ಅರ್ಜುನ್ ಹೆಗ್ಡೆ, ಸಾಕೇತ್ ಶೆಟ್ಟಿ ಈ ಪೊರ್ತುಡು ಇತ್ತೆರ್.

ಕದ್ರಿ ನವನೀತ ಶೆಟ್ಟಿ ಮೇರ್ ಲೇಸ್ ದ ಸುಧಾರಿಕೆ ಮಲ್ತ್ ದ್ ಅಭಿನಂದನೆ ಮಲ್ತೆರ್. ಕಟೀಲ್ ಮೇಳದಕ್ಲೆರ್ದ್ ” ವೀರ ನರೇಂದ್ರ ವಿಜಯ ” ಪೌರಾಣಿಕ ಯಕ್ಷಗಾನ ಪ್ರದರ್ಶನ ನಡತ್ಂಡ್.

ಮುಂಡ್ಕೂರು ದುರ್ಗಾಪರಮೇಶ್ವರಿ ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರಾದ್ ಮುಲ್ಲಡ್ಕ ಕೋರಿಬೆಟ್ಟುಗುತ್ತು ಸುರೇಂದ್ರ ಎಸ್ ಶೆಟ್ಟಿ ಆಯ್ಕೆ

ಮುಂಡ್ಕೂರು: ಇತಿಹಾಸ ಪುಗರ್ತೆದ ಮುಂಡ್ಕೂರು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರಾದ್ ಮುಂಡ್ಕೂರು ಮುಲ್ಲಡ್ಕ ಕೋರಿಬೆಟ್ಟುಗುತ್ತು ಸುರೇಂದ್ರ ಎಸ್ ಶೆಟ್ಟಿ (ಬಾಬಣ್ಣ) ಮೇರ್ ಆಯ್ಕೆ ಆತೆರ್.

ವ್ಯವಸ್ಥಾಪನಾ ಸಮಿತಿದ ಸದಸ್ಯೆರಾದ್ ರಾಮದಾಸ ಜೆ. ಆಚಾರ್ಯ (ಪ್ರಧಾನ ಅರ್ಚಕೆರ್), ಸುಜಾತಾ ಸುಭೋದ ಶೆಟ್ಟಿ ಸಚ್ಚರ ಪರಾರಿ, ಜಗದೀಶ್ ಎಸ್ ಶೆಟ್ಟಿ ಕುದುರೊಟ್ಟು ನಡಿಗುತ್ತು ಸಚ್ಚೇರಿಪೇಟೆ, ಶೇಖರ ಎಸ್ ಶೆಟ್ಟಿ ಮಾಣಿಬೆಟ್ಟು-ಪುನ್ಕೆದಡಿ, ಕೃಷ್ಣ ಪೂಜಾರಿ ಬಂಡ್ರೊಟ್ಟು ಮುಂಡ್ಕೂರು, ನಳಿನಾಕ್ಷಿ ರಾಜು ಸೇರಿಗಾರ ಕಡಪುಕರಿಯ, ಅಕ್ಷತಾ ವಿಶ್ವಿತ್ ಶೆಟ್ಟಿ ಸಂಕಲಕರಿಯ, ಸುರೇಶ್ ಸಾಲ್ಯಾನ್ ಅಲಂಗಾರ್ ಆಯ್ಕೆ ಆತೆರ್. ಆಯ್ಕೆ ಆಯಿನಕ್ಲೆಗ್ ಊರು ಪರವೂರುದ ಗ್ರಾಮಸ್ಥೆರ್ ಅಭಿನಂದನೆ ಮಲ್ದೆರ್.