ರಾಜ್ಯದ 28 ಲೋಕಸಭೆ ಕ್ಷೇತ್ರಡ್ ಏಪ್ರಿಲ್ 26 ಕ್ಕ್ ಓಟು ನಡಪುನ 14 ಕ್ಷೇತ್ರಡ್ ಇನಿರ್ದ್ ನಾಮಿನೇಶನ್ ಸಲ್ಲಿಕೆ ಸುರು ಆತ್ಂಡ್.
ಸುರುತ್ತ ಹಂತದ ಓಟುಗು ಅಧಿಸೂಚನೆ ಪ್ರಕಟ ಆತ್ಂಡ್. ಎ.4 ನಾಮಪತ್ರ ಸಂದಾಯೆರೆ ಅಕೇರಿದ ದಿನ.
ರಾಜ್ಯದ 14 ಕ್ಷೇತ್ರಲೆಗ್ ಸುರುತ್ತ ಹಂತದ ಓಟು ನಡಪರೆ ಉಂಡು. ಎ.5 ಕ್ಕ್ ನಾಮಪತ್ರ ಪರಿಶೀಲನೆ ನಡಪರೆ ಉಂಡು. ಎ.8 ನಾಮಪತ್ರ ವಾಪಸ್ ಪಡೆಯೆರೆ ಅಕೇರಿದ ದಿನ ಆತ್ಂಡ್.
ಬೈಂದೂರು: ಕುಂದಾಪುರ ತಾಲೂಕ್ ದ ಹರ್ಕೂರು ಗ್ರಾಮದ ಶ್ರೀಮಹಾಗಣಪತಿ ದೇವೆರೆನ ಅಷ್ಟಬಂಧ ಪ್ರತಿಷ್ಠಾ ಉಚ್ಚಯ ಬೇತೆ ಬೇತೆ ಧಾರ್ಮಿಕ ವಿಧಿವಿಧಾನದೊಟ್ಟಿಗೆ ಬುದಾರ ಗೌಜಿಡ್ ನಡತ್ಂಡ್.
ಶ್ರೀ ಮಹಾಗಣಪತಿ ದೇವೆರೆನ ಪ್ರತಿಷ್ಠಾ ಉಚ್ಚಯ ಲೇಸ್ ದ ಲೆಕ್ಕೊಡು ಜೀವ ಕುಂಭಾಬಿಷೇಕ, ಪ್ರತಿಷ್ಠಾ ಕಲಶಾಭಿಷೇಕ, ಮಹಾಪೂಜೆ, ಪ್ರಾಯಶ್ಚಿತ ಹೋಮ, ಶಿಖರ ಪ್ರತಿಷ್ಠೆ, ಅನ್ನ ಪ್ರಸಾದ ಸೇವೆ ನಡತ್ಂಡ್.
ಶ್ರೀದೇವೆರೆಗ್ ಬೊಳ್ಳಿ ಪ್ರಭಾವಳಿ ಬೊಕ್ಕ ಬೊಳ್ಳಿ ಮುಖವಾಡನ್ ಸಮರ್ಪಣೆ ಮಲ್ತೆರ್. ಸಾರರ್ದ್ ಎಚ್ಚ ಭಕ್ತೆರ್ ಶ್ರೀಕ್ಷೇತ್ರಗ್ ಬತ್ತ್ ದ್ ಶ್ರೀದೇವೆರೆನ ಪ್ರಸಾದನ್ ದೆತೊಂಡೆರ್. ಭಜನಾ ಕೂಟಲೆರ್ದ್ ಭಜನೆ ಲೇಸ್ ನಡತ್ಂಡ್.
ವೇದ ಬ್ರಹ್ಮ ಹೃಷಿಕೇಶ ಬಾಯರಿ ಬಾರ್ಕೂರು ಬೊಕ್ಕ ವೇದಮೂರ್ತಿ ಚನ್ನಕೇಶವ ಉಪಾಧ್ಯ ಬಾರಂದಾಡಿ ಮೆರೆನ ಮುತಾಲಿಕೆಡ್ ಶ್ರೀದೇವೆರೆನ ಪ್ರತಿಷ್ಠಾಂಗ ವಿಧಿವಿಧಾನಲು ನಡತ್ಂಡ್.
ದೇವಸ್ಥಾನದ ಜೀರ್ಣೋದ್ಧಾರ ಸಮಿತಿ ಗುರ್ಕಾರೆ ಎಚ್.ಜಯಶೀಲ ಎನ್ ಶೆಟ್ಟಿ ಪಾತೆರ್ದ್, ಶ್ರೀಮಹಾಗಣಪತಿ ದೇವೆರೆನ ಪುನರ್ ಪ್ರತಿಷ್ಠೆ ಬೊಕ್ಕ ಪ್ರತಿಷ್ಠಾ ಕಲಶಾಭಿಷೇಕ ಸೇರಿನಂಚೆನೆ ಬೇತೆ ಬೇತೆ ಧಾರ್ಮಿಕ ಲೇಸ್ ಲು ಶ್ರೀದೇವೆರೆನ ಆರ್ಶೀವಾದರ್ದ್ ನಿರ್ವಿಘ್ನವಾದ್ ನಡತ್ ದ್ಂಡ್ ಪಂದ್ ಪಂಡೆರ್. ಅಂಚೆನೆ ಮಾರ್ಚ್ 28 ಗುರುವಾರದಾನಿ ಶ್ರೀಕ್ಷೇತ್ರಡ್ ನಡಪುನ ಶ್ರೀಮಹಾಗಣಪತಿ ದೇವೆರೆನ ಅಷ್ಟಬಂಧ ಬ್ರಹ್ಮಕಲಶಾಭಿಷೇಕ ಬೊಕ್ಕ ಅನ್ನ ಪ್ರಸಾದ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ಬಿನ್ನಾಪು ಮಲ್ತೆರ್.
ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತೆರ್ ಮಾರಣಕಟ್ಟೆ ಕೃಷ್ಣಮೂರ್ತಿ ಮಂಜರು ಪಾತೆರ್ದ್, ಗಣಪತಿ ದೇವೆರೆನ ಆರಾಧನೆರ್ದ್ ನಮ್ಮ ಇಷ್ಟಾರ್ಥಲೆನ್ ಪಡೆವೊಲಿ. ಸುರುತ್ತ ಪೂಜೆ ಮಲ್ಪುನ ಗಣಪಗ್ ಮಲ್ಲ ಸ್ಥಾನ ಉಂಡು. ಕಲಿಯುಗಡ್ ಕೇನ್ನೆನ್ ಕೊರ್ಪುನ ಶ್ರೀ ಗಣಪತಿ ದೇವೆರ್ ಮಾತ ಊರುಡುಲ ಉಲ್ಲೆರ್, ಮಾತೆರೆನ ಇಲ್ಲ್ ಲ ಉಲ್ಲೆರ್. ಮಾಸ್ತ್ ಇಸೇಸವಾಯಿನ ರೀತಿಡ್ ಸಂಕಲ್ಪದಂಚೆನೆ ಹರ್ಕೂರುಡು ಶಿಲಾಮಯ ದೇವಸ್ಥಾನ ಉದಿಪನ ಮಲ್ತಿರ್ನೆದಾವೆರ ಗ್ರಾಮದ ಜನಕ್ಲೆಗ್ ಎಡ್ಡೆ ಅಪುಂಡು ಪಂದ್ ಪಂಡೆರ್.
ಜೀರ್ಣೋದ್ಧಾರ ಸಮಿತಿ ಜತೆ ಕಾರ್ಯದರ್ಶಿ ಪ್ರಸನ್ನಕುಮಾರ ಶೆಟ್ಟಿ ಹೊಸಮನೆ ಪಾತೆರ್ದ್, ಊರುದ ಹಿರಿಯೆರ್, ದಾನಿಲು, ಗ್ರಾಮಸ್ಥೆರೆನ ಸಹಕಾರರ್ದ್ ಸುಂದರವಾಯಿನ ದೇವಸ್ಥಾನನ್ ನಿರ್ಮಾಣ ಮಲ್ಪೆರೆ ಸಾಧ್ಯ ಆತ್ಂಡ್ ಪಂದ್ ಪಂಡೆರ್. ಉಂದೊಂಜಿ ದೇವಸ್ಥಾನದ ನಿರ್ಮಾಣದ ಕೆಲಸಡ್ ಪಾಲ್ ಪಡೆಯಿನ ಮಾತೆರೆಗ್ಲಾ ಶ್ರೀಮಹಾಗಣಪತಿ ದೇವೆರ್ ಎಡ್ಡೆ ಮಲ್ಪಾಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.
ಅರ್ಚಕೆರ್ ಶಿವರಾಮ ಅಡಿಗ ಪಾತೆರ್ದ್, ಸುಮಾರ್ 300 ವರ್ಷದಾತ್ ಇತಿಹಾಸ ಇಪ್ಪುನ ಶ್ರೀಮಹಾಗಣಪತಿ ದೇವೆರೆನ ಪುನರ್ ಪ್ರತಿಷ್ಠಾ ಉಚ್ಚಯ ಲೇಸ್ ನ್ ಬೇತೆ ಬೇತೆ ಧಾರ್ಮಿಕ ವಿಧಿವಿಧಾನದೊಟ್ಟಿಗೆ ನಡತ್ಂಡ್ ಪಂದ್ ಪಂಡೆರ್. ಶ್ರೀಮಹಾಗಣಪತಿ ದೇವೆರ್ ಭಕ್ತೆರೆನ ಮಾತ ಬೇಡಿಕೆಲೆನ್ ಈಡೇರಿಸಾಯೆರೆ ಹಾರೈಸಡ್ ಪಂದ್ ಶ್ರೀ ದೇವೆರೆಡ ಪ್ರಾರ್ತನೆ ಮಲ್ತೆರ್.
ಈ ಪೊರ್ತುಡು ಜೀರ್ಣೋದ್ಧಾರ ಸಮಿತಿ ಗೌರವ ಸಲಹೆಗಾರೆ ಕೃಷ್ಣಪ್ರಸಾದ ಅಡ್ಯಂತಾಯ ಬೊಕ್ಕ ಸದಾನಂದ ಹೆಗ್ಡೆ ಕಟ್ಟಿನಮಕ್ಕಿ ಹರ್ಕೂರು ಪಟೇಲರ ಮನೆ, ಚುಚ್ಚಿ ನಾರಾಯಣ ಶೆಟ್ಟಿ, ಅಶೋಕ ರಾಜ ಶೆಟ್ಟಿ, ಕಾರ್ಯಾಧ್ಯಕ್ಷೆರ್ ಮಂಜಯ್ಯ ಶೆಟ್ಟಿ ಹರ್ಕೂರು ಹೊಸಮನೆ, ಗೌರವಾಧ್ಯಕ್ಷೆರ್ ಚಿತ್ತರಂಜನ್ ಹೆಗ್ಡೆ ಹರ್ಕೂರು ಪಟೇಲರಮನೆ, ಬೈಂದೂರು ಬಂಟರ ಸಂಘದ ಅಧ್ಯಕ್ಷೆರ್ ವಸಂತ ಕುಮಾರ್ ಶೆಟ್ಟಿ, ಆನಂದ ಶೆಟ್ಟಿ ಹಳಗೇರಿ ಮನೆ ಬೊಕ್ಕ ಹರ್ಕೂರು ಮೂಜಿ ಇಲ್ಲದಕುಲು, ಗ್ರಾಮಸ್ಥೆರ್ ಪಾಲ್ ಪಡೆದಿತ್ತೆರ್.
ಕುಡ್ಲದ ಶ್ರೀ ಶಿರಿಡಿ ಸಾಯಿಬಾಬ ಮಂದಿರ ಆಶ್ರಿತ ಸಾಯಿಶಕ್ತಿ ಕಲಾ ಬಳಗದ ‘ಬೊಳ್ಳಿಮಲೆತ ಶಿವಶಕ್ತಿಲು’ ತುಳು ಪೌರಾಣಿಕ ನಾಟಕದ 55ನೇ ಪ್ರದರ್ಶನ ‘ಸ್ವರ್ಣ ಸಂಭ್ರಮ’ ಮಾ.29 ಕ್ಕ್ ಬಯ್ಯಗ್ 6 ಗಂಟೆರ್ದ್ ಕೊಡಿಯಾಲಬೈಲ್ದ ಕುದ್ರೋಳಿ ಶ್ರೀ ಭಗವತಿ ಕ್ಷೇತ್ರಡ್ ನಡಪರೆ ಉಂಡು ಪಂದ್ ಕದ್ರಿ ನವನೀತ ಶೆಟ್ರ್ ಪಂಡೆರ್.
ಸೋಮಾರ ಪತ್ರಿಕಾಗೋಷ್ಠಿಡ್ ಪಾತೆರಿನ ಮೇರ್, ಲೇಸ್ ನ್ ವಿಧಾನಸಭೆತ್ತ ಸಭಾಧ್ಯಕ್ಷೆರ್ ಯು.ಟಿ. ಖಾದರ್ ಉದಿಪನ ಮಲ್ಪರೆ ಉಲ್ಲೆರ್, ಸಸಿಹಿತ್ಲು ಶ್ರೀ ಭಗವತಿ ಕ್ಷೇತ್ರದ ಮುಖ್ಯಸ್ಥೆರ್ ವಾಮನ ಇಡ್ಯಾ, ಗಣೇಶ್ ಕುಂಟಲ್ಪಾಡಿ, ಚಂದ್ರಹಾಸ್ ಉಳ್ಳಾಲ, ಕೃಷ್ಣ ಉಚ್ಚಿಲ, ವಿಶ್ವನಾಥ ಕುದ್ರು, ರಂಗಭೂಮಿ ಕಲಾವಿದೆರ್ ಡಾ। ದೇವದಾಸ್ ಕಾಪಿಕಾಡ್, ವಿಜಯ ಕುಮಾರ್ ಕೊಡಿಯಾಲಬೈಲ್ ಬೊಕ್ಕ ಕಿಶೋರ್ ಡಿ. ಶೆಟ್ರ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆಯೆರೆ ಉಲ್ಲೆರ್. ಅಂಚೆನೆ ಕುದ್ರೋಳಿ ಶ್ರೀ ಭಗವತೀ ಯುವಜನ ಮಹಿಳಾ ಸೇವಾ ಸಮಿತಿದ ಒಟ್ಟು ಸೇರಿಗೆಡ್ ‘ಬೊಳ್ಳಿಮಲೆತ ಶಿವಶಕ್ತಿಲು’ ನಾಟಕ ಪ್ರದರ್ಶನ ಆಯೆರೆ ಉಂಡು ಪಂದ್ ಪಂಡೆರ್.
ಕುದ್ರೋಳಿ ಶ್ರೀ ಭಗವತೀ ಕ್ಷೇತ್ರ ಬೊಕ್ಕ ಬೇತೆ ಭಗವತೀ ಕ್ಷೇತ್ರದ ಆರಾಧಕೆರೆರ್ದ್ ಪೊಲಬು ಒಟ್ಟು ಮಲ್ತ್ ದ್ ನಾಟಕ ಪರಿಷ್ಕರಣೆ ಮಲ್ದೆರ್. 2 ಗಂಟೆ 20 ನಿಮಿಷದ ಈ ನಾಟಕ ಚೀರುಂಭ ಭಗವತೀ, ಭದ್ರಕಾಳಿ, ಗುಳಿಗ, ದಂಡರಾಜ, ಮಲೆಯ ಚಾಮುಂಡಿ, ಗಂಟಾಕರ್ಣ ಇಂಚಿನ ಶಿವಶಕ್ತಿಲೆನ ಮಹಿಮೆದ ಕಥೆ ಆದುಂಡು. ಇತ್ತೆ ಒಡಿಪು, ಕುಡ್ಲ, ಕಾಸ್ರೋಡು ಜಿಲ್ಲೆಡ್ ಯಶಸ್ವಿ ಪ್ರದರ್ಶನಲಾ ತೂತಿನ ನಾಟಕ ಆದುಂಡು. ವಿಶಿಷ್ಟ ಶೈಲಿದ ರಂಗವಿನ್ಯಾಸ, ಧ್ವನಿ ಬೊಲ್ಪು, ವೇಷಭೂಷಣ, ಪ್ರತಿಭಾನ್ವಿತ ಕಲಾವಿದೆರೆನ ಕೂಟ ಈ ನಾಟಕದ ಯಶಸ್ ಗ್ ಕಾರಣ ಆತುಂಡು ಪಂದ್ ಪಂಡೆರ್.
ಈ ಪೊರ್ತುಡು ಶ್ರೀ ಶಿರಡಿ ಸಾಯಿ ಬಾಬಾ ಮಂದಿರದ ಆಡಳಿತ ಮೊಕ್ತೇಸರೆರ್ ವಿಶ್ವಾಸ್ ಕುಮಾರ್ ದಾಸ್, ಸಾಯಿಶಕ್ತಿ ಕಲಾ ಬಳಗದ ಸಂಚಾಲಕಿ ಲಾವಣ್ಯ ವಿಶ್ವಾಸ್ ಕುಮಾರ್ ದಾಸ್, ಗೌರವ್ ಶೆಟ್ಟಿಗಾರ್ ಮಠದಕಣಿ, ತೇಜಸ್ ಶೆಟ್ಟಿ ಮಡಕಣ ಗುತ್ತು ಪಾಲ್ ಪಡೆದಿತ್ತೆರ್.
ಪುಗರ್ತೆದ ಉದ್ಯಮಿ ಕನ್ಯಾನ ಸದಾಶಿವ ಶೆಟ್ರೆನ ಅಮ್ಮ, ದಿವಂಗತ ಪಕೀರ ಶೆಟ್ರೆನ ಬೊಡೆದಿ ಲೀಲಾವತಿ ಶೆಟ್ಟಿ ಮೇರ್ (90) ಇನಿ ಬೊಲ್ಪುಗು ದೇವೆರೆ ಪಾದೊ ಸೇರಿಯೆರ್.
ಮೆರೆಗ್ ಜೋಕುಲು ಕನ್ಯಾನ ಸದಾಶಿವ ಶೆಟ್ಟಿ, ಚಂದ್ರಹಾಸ ಶೆಟ್ಟಿ, ರಘುರಾಮ ಶೆಟ್ಟಿ, ರವೀಂದ್ರ ಶೆಟ್ಟಿ, ವಿಜಯಲಕ್ಷ್ಮಿ ಶೆಟ್ಟಿ, ದಿವಾಕರ ಶೆಟ್ಟಿ, ನಿತ್ಯಾನಂದ ಶೆಟ್ಟಿ ಬೊಕ್ಕ ಕುಟುಂಬಸ್ಥೆರ್ ಉಲ್ಲೆರ್.
ಮೆರೆನ ಅಕೇರಿದ ಕ್ರಿಯೆ ಬಯ್ಯಗ್ ಮೆರೆನ ಇಲ್ಲಲ್ ನಡಪರೆ ಉಂಡು ಪಂದ್ ಕುಟುಂಬಸ್ಥೆರ್ ತೆರಿಪಾದೆರ್.
ಬೊಂಬೈ: ಮಹಾನಗರಡ್ ತುಳು ಸಂಘಟನೆಲು ನನಲ ಇಪ್ಪು, ಪೊಸ ಸಂಘಟನೆ ಪುಟ್ಟುನೆರ್ದ್ ಒವ್ವೇ ತೊಂದರೆ ಇಜ್ಜಿ. ಮಾತೆರೆಡಲ ಬೇತೆ ಬೇತೆ ರೀತಿದ ಪ್ರತಿಭೆಲು ಉಂಡು. ಪೊಸ ಪ್ರತಿಭೆನ್ ಗುರುತಿಸಾದ್ ಅಕ್ಲೆಗ್ ಅವಕಾಶ ಕೊರಿಯೆರೆ ಇಂಚಿನ ಸಂಘಟನೆಲು ಸಹಕಾರಿ ಆಪುಂಡು. ಈ ದಿಟ್ಟಿಡ್ ಸುಮಾರ್ ಪದಿಮೂಜಿ ವರ್ಷದ ಪಿರವು ಜಾತಿ ಬೇದ ಇಜ್ಜಂದೆ ಬೊರಿವಿಲಿ ಪರಿಸರಡ್ ಇತ್ತಿನ ತುಳುನಾಡ್ ದ ತುಳು ಕನ್ನಡಿಗೆರೆನ್ ಒಟ್ಟು ಸೇರ್ಸಾದ್ ಸಾಂಸ್ಕೃತಿಕ ವೈಭವ ದಂಚಿನ ಲೇಸ್ ನ್ ನಡಪಾದ್ ನಾಡ್ ದ ಬಾಷೆ ಸಂಸ್ಕೃತಿನ್ ಒರಿಪಾಯೆರೆ ಬೋರಿವಲಿ ತುಳು ಸಂಘ ಸ್ಥಾಪನೆ ಆಂಡ್ ಪಂದ್ ಬೋರಿವಲಿ ತುಳು ಸಂಘದ ಗೌರವಾಧ್ಯಕ್ಷೆರ್ ಡಾ. ವಿರಾರ್ ಶಂಕರ್ ಬಿ. ಶೆಟ್ಟಿ ಪಂಡೆರ್.
ಬೋರಿವಲಿ ತುಳು ಸಂಘದ 13ನೇ ವಾರ್ಷಿಕ ಉಚ್ಚಯ ಲೇಸ್ ಮಾ.23 ಕ್ಕ್ ಬೊಂಬೈದ ಗ್ಯಾನ್ ಸಾಗರ್ ಅಂಪಿ ಥೀಯೇಟರ್ ಕೈತಲ್ದ ಬೋರಿವಲಿ ಸಂಸ್ಕೃತಿ ಕೇಂದ್ರಡ್ ನಡತ್ಂಡ್.
ಈ ಲೇಸ್ ದ ಗುರ್ಕಾರ್ಮೆನ್ ಒಯಿಸೊಂದು ಮೇರ್ ಪಾತೆರ್ದ್, ನಮ್ಮ ಸಂಸ್ಕೃತಿ ಒರಿಯೆರೆ ಇಂಚಿನ ಸಂಘ ಸಂಸ್ಥೆಲು ಕಾರಣ. ಸಂಘದ ಮಹಿಳಾ ಸದಸ್ಯೆರ್ ಶಕ್ತಿ ಮೀರ್ದ್ ಕೆಲಸ ಮಲ್ತೊಂದು ಉಲ್ಲೆರ್, ಪೊಂಜೋವುನಕುಲು ಕ್ರೀಯಾಶೀಲ ಆಯಿನ ಸಂಘಟನೆಗ್ ಎಡ್ಡೆ ಭವಿಷ್ಯ ಉಂಡು. ಸಂಘ ಸಂಸ್ಥೆಲು ಎಡ್ಡೆ ಕೆಲಸ ಮಲ್ತ್ಂಡ ಆಯಿಕ್ಕ್ ದಾನ ರೂಪಡ್ ಸಹಕಾರ ಮಲ್ಪುನಕುಲು ಸುಮಾರು ಜನ ಉಲ್ಲೆರ್. ಈ ಸಂಘನ್ ನಮ ಮಾತ ಸೇರ್ದ್ ನನ ಬುಲೆಪಾವೊಡು ಪಂದ್ ಪಂಡೆರ್.
ಬೋರಿವಲಿ ತುಳು ಸಂಘದ ಅಧ್ಯಕ್ಷೆರ್ ಕರುಣಾಕರ ಎಂ. ಶೆಟ್ಟಿ ಮೇರ್ ಬಿನ್ನೆರೆನ್ ಬೊಕ್ಕ ಸೇರಿನ ಮಾತ ತುಳು ಅಭಿಮಾನಿಲೆನ್ ಎದ್ಕೊಂದು ಸಂಘದ ಮಾಜಿ ಅಧ್ಯಕ್ಷೆರ್ ವಾಸು ಪುತ್ರನ್ ಬೊಕ್ಕ ಪ್ರಕಾಶ್ ಶೆಟ್ಟಿ ಪೇಟೆಮನೆ ಮೊಕ್ಲೆನ ಮುತಾಲಿಕೆಡ್ ದುಂಬುಲ ತುಳು ಸಂಘ ಪರಿಸರದ ಬೇತೆ ಬೇತೆ ಸಮುದಾಯದ ತುಳು ಕನ್ನಡ ಬಾಂಧವೆರೆನ್ ಸೇರ್ಸಾದ್ ತುಳು ಬಾಷೆ ಸಂಸ್ಕೃತಿನ್ ಒರಿಪಾದ್ ಬುಲೆಪಾವುನ ಕೆಲಸನ್ ಮಲ್ದ್ಂಡ್. ಉಂದೆನ್ ಮಾತ ದುಂಬಾರಿಸಾವೊಂದು ಉಲ್ಲ. ವಿರಾರ್ ಶಂಕರ್ ಶೆಟ್ಟಿ, ಸಂಸದೆರ್ ಗೋಪಾಲ್ ಶೆಟ್ಟಿ, ಪ್ರದೀಪ್ ಶೆಟ್ಟಿಲೆನ ಮಾರ್ಗದರ್ಶನ ತುಳು ಸಂಘ ಬೋರಿವಲಿಗ್ ಎಪಲ ಉಂಡು ಪಂದ್ ಪಂಡೆರ್.
ಬಿನ್ನೆರ್ ನಕುಲು ತುಡರ್ ಅರ್ಲಾದ್ ಸಭಾ ಲೇಸ್ ಗ್ ಚಾಲನೆ ಕೊರಿಯೆರ್. ಸರಸ್ವತಿ ರಾವ್ ಪ್ರಾರ್ತನೆ ಮಲ್ತೆರ್.
ಮಲ್ಲ ಬಿನ್ನೆರ್ ಬಂಟರ ಸಂಘ ಬೊಂಬೈ ಮಹಿಳಾ ವಿಭಾಗದ ಮಾಜಿ ಕಾರ್ಯಾಧ್ಯಕ್ಷೆರ್ ಉಮಾ ಕೃಷ್ಣ ಶೆಟ್ಟಿ ಮೇರ್ ಪಾತೆರ್ದ್, ತುಳು ಸಂಘ ಬೋರಿವಲಿದ 13ನೇ ವಾರ್ಷಿಕ ಉಚ್ಚಯ ಲೇಸ್ ಡ್ ಎಂಕ್ ಮಲ್ಲ ಬಿನ್ನೆರೆನ ಸ್ಥಾನ ಕೊರ್ದು ಮಾನಾದಿಗೆ ಮಲ್ದೆರ್. ತುಳುವೆರೆಗ್ ಮಲ್ಲ ಮನಸ್ಸ್ ಉಂಡು. ಪೊಂಜೋವುಲೆಗ್ ಒಲ್ಪ ಸ್ಥಾನ ಮಾನ ತಿಕೊಂಡೊ ಅಲ್ಪ ದೇವೆರ್ ಉಂತುವೆರ್. ಪೊಂಜೋವುಲೆಗ್ ಎಪಲ ಸ್ಥಾನ ಮಾನ ಇಪ್ಪಡ್, ಸಂಘಡ್ ಎಡ್ಡೆ ಕೆಲಸಲು ನಡತೊಂದು ಉಂಡು. ದಾನ ಮಲ್ಪುನ ಕೈ ಶ್ರೇಷ್ಠ. ಜಾತಿ ಬೇದ ಇಜ್ಜಂದೆ ನಿಸ್ವಾರ್ಥ ಸೇವೆ ಮಲ್ಪುನೆನೇ ದೇವೆರೆನ ಕೆಲಸ. ಅವು ತುಳುವೆರೆನ ಮನಸ್ಸ್ ಪಂದ್ ಪಂಡೆರ್.
ಮಾನಾದಿಗೆದ ಬಿನ್ನೆರ್, ಉದ್ಯಮಿ, ಕನ್ನಡ ಸಂಘ ಸೂರತ್ ದ ಮಾಜಿ ಅಧ್ಯಕ್ಷೆರ್ ರಾಧಾಕೃಷ್ಣ ಶೆಟ್ಟಿ ಪಾತೆರ್ದ್, ತುಳು ಬಾಷೆ ಬೊಕ್ಕ ತುಳುವೆರ್ ಪಂಡ ಎಂಕ್ ಮಸ್ತ್ ಪ್ರೀತಿ. ತುಳು ಜನಕ್ಲೆನ್ ಎತ್ ಪುಗರ್ಂಡಲ ಕಮ್ಮಿ. ತುಳುವೆರ್ ಶ್ರಮ ಜೀವಿಲು, ಮಾತ ಕ್ಷೇತ್ರಡ್ ಎಕುಲು ಉಲ್ಲ. ನಮ್ಮಕುಲು ಸಾಧಕೆರ್. ಪ್ರಯತ್ನ ಮಲ್ತ್ಂಡ ಒವ್ವೇ ಅಸಾಧ್ಯ ಅತ್ತ್, ನಮ್ಮ ನಾಡ್ ಇತ್ತೆ ಮಸ್ತ್ ಅಭಿವೃದ್ದಿ ಆಯಿನೆಕ್ಕ್ ಶೈಕ್ಷಣಿಕವಾದ್ ನಮ್ಮಕುಲು ಶ್ರೀಮಂತರಾಯೆರೆ ಕಾರಣ. ತುಳು ನಾಡ್ ದ ಮಣ್ಣ್ ಡ್ ವಿಶೇಷತೆ ಉಂಡು. ಪಾಲಕೆರ್ ಜೋಕ್ಲೆನೊಟ್ಟಿಗೆ ಎಚ್ಚದ ಕಾಲ ಕಳೆವೊಂದು ನಮ್ಮ ಸಂಸ್ಕೃತಿನ್ ಆಕ್ಲೆಗ್ ತೆರಿಪಾವುಲೆಕ್ಕ ಅವಡ್ ಪಂದ್ ಪಂಡೆರ್.
ಕುಡೊರಿ ಮಾನಾದಿಗೆದ ಬಿನ್ನೆರ್, ಭಾರತ್ ಬ್ಯಾಂಕ್ ದ ಕಾರ್ಯಾಧ್ಯಕ್ಷೆರ್ ಸೂರ್ಯಕಾಂತ್ ಜಯ ಸುವರ್ಣ ಪಾತೆರ್ದ್, ಸಂಘಟನೆ ಸ್ಥಾಪನೆ ಆನಗ ಕೆಲವು ಉದ್ದೇಶ ಇತ್ತ್ಂಡ್. ತುಳು ನಾಡ್ ದ ಜನ ಒಂಜಾದ್ ತುಳು ನಾಡ್ ದ ಸಂಸ್ಕಾರನ್ ಒರಿಪಾದ್ ಬುಲೆಪಾಯೆರೆ ತುಳು ಸಂಘ ಸಂಸ್ಥೆಲೆನ ಅಗತ್ಯ ಉಂಡು. ಹಿರಿಯೆರ್ ಸಂಸ್ಕಾರನ್ ಒರಿಪಾದ್ ಬುಲೆಪಾವುನ ಕೆಲಸಡ್ ಪಾಲ್ ಪಡೆವೊಡು ಪಂದ್ ಕಿರಿಯೆರೆನ್ ಇಂಚಿನ ಲೇಸ್ ಡ್ ಪಾಲ್ ಪಡೆಪುಲೆಕ್ಕ ಮಲ್ತ್ಂಡ ದುಂಬಗ್ ತುಳು ನಾಡ್ ದ ಸಂಸ್ಕೃತಿ ಸಂಸ್ಕಾರ ಖಂಡಿತವಾದ್ಲ ಒರಿಪುಂಡು ಪಂದ್ ಪಂಡೆರ್.
ಸಾಂಸ್ಕೃತಿಕ ಲೇಸ್ ದ ಪೊರ್ತುಡು ಪಾಲ್ ಪಡೆದಿತ್ತಿನ ಶಾಸಕಿ ಮನೀಶಾ ಚೌದರಿ ಲೇಸ್ ಗ್ ಎಡ್ಡೆಪ್ಪು ಬಯಕಿಯೆರ್.
ಬೋರಿವಲಿ ಪಶ್ಚಿಮ ಜಯರಾಜ್ ನಗರದ ಮಹಿಷ ಮರ್ಧಿನಿ ದೇವಸ್ಥಾನದ ಆಡಳಿತ ಟ್ರಸ್ಟಿ ಪ್ರದೀಪ್ ಸಿ. ಶೆಟ್ಟಿ ಬೊಕ್ಕ ತುಳು-ಕನ್ನಡ ಸಾಹಿತಿ, ಕವಿ ಸೀಮಂತೂರು ಚಂದ್ರಹಾಸ ಸುವರ್ಣ ದಂಪತಿಲೆಗ್ ಚಾವಡಿಡ್ ಇತ್ತಿನ ಮಾತ ಬಿನ್ನೆರ್ ಸನ್ಮಾನ ಮಲ್ತೆರ್. ಅತ್ತಂದೆ ಕರಿನ ಮೂಜಿ ವರ್ಷೊದಿಂಚ ಸಂಘದ ಅಧ್ಯಕ್ಷೆರಾದ್ ಸೇವೆ ಮಲ್ತೊಂದು ಇತ್ತಿನ ಕರುಣಾಕರ ಎಂ. ಶೆಟ್ಟಿ ದಂಪತಿಲೆಗ್ ಬಿನ್ನೆರ್ ಮಾನಾದಿಗೆ ಮಲ್ತೆರ್. ಸನ್ಮಾನಿತೆರೆನ್ ಪ್ರವೀಣ್ ಅರ್. ಶೆಟ್ಟಿ ಬೊಕ್ಕ ಪೇಟೆಮನೆ ಪ್ರಕಾಶ್ ಶೆಟ್ಟಿ ಪರಿಚಯ ಮಲ್ತೆರ್. ಬಿನ್ನೆರೆನ್ ಲಕ್ಷ್ಮೀ ದೇವಾಡಿಗ, ನ್ಯಾ. ರಾಘವ ಎಂ., ಬೊಕ್ಕ ಕೃಷ್ಣರಾಜ್ ಸುವರ್ಣ ಪರಿಚಯ ಮಲ್ತೆರ್.
ಬಂಟರ ಸಂಘ ಬೊಂಬೈದ ಜೋಗೇಶ್ವರಿ ದಹಿಸರ್ ಪ್ರಾದೇಶಿಕ ಸಮಿತಿದ ಕಾರ್ಯಾಧ್ಯಕ್ಷೆರ್ ಪ್ರೇಮನಾಥ ಶೆಟ್ಟಿ ಕೊಂಡಾಡಿ, ಮಾಜಿ ಕಾರ್ಯಾಧ್ಯಕ್ಷೆರ್ ನಿಟ್ಟೆ ಎಂ. ಜಿ. ಶೆಟ್ಟಿ, ಮಹಿಳಾ ವಿಭಾಗದ ನಿಕಟ ಪೂರ್ವ ಕಾರ್ಯಾಧ್ಯಕ್ಷೆರ್ ಶೈಲಜಾ ಅಮರನಾಥ್ ಶೆಟ್ಟಿ, ಡಾ. ಪಿ. ವಿ. ಶೆಟ್ಟಿ, ಮುಂಡಪ್ಪ ಪಯ್ಯಡೆ, ಉಷಾ ಗೋಪಾಲ್ ಶೆಟ್ಟಿ, ರತಿ ಶಂಕರ್ ಶೆಟ್ಟಿ, ಡಾ. ಹರೀಶ್ ಶೆಟ್ಟಿ, ಡಾ. ಸತೀಶ್ ಶೆಟ್ಟಿ, ಭಾರತ್ ಬ್ಯಾಂಕ್ ದ ನಿರ್ದೇಶಕೆರ್ ಭಾಸ್ಕರ ಸಾಲ್ಯಾನ್, ಮಾಜಿ ನಿರ್ದೇಶಕೆರ್ ಪ್ರೇಮನಾಥ ಕೋಟ್ಯಾನ್, ಹರೀಶ್ ಪೂಜಾರಿ, ಪ್ರಭಾಕರ ಶೆಟ್ಟಿ ಬೊಕ್ಕ ಬೇತೆ ಬೇತೆ ಸಂಘ ಸಂಸ್ಥೆಲೆನ ಬಿನ್ನೆರ್ ಲೇಸ್ ಡ್ ಪಾಲ್ ಪಡೆದಿತ್ತೆರ್.
ಅಭಿನಯ ಮಂಟಪದ ಕಲಾವಿದೆರ್ದ್, ಕರುಣಾಕರ ಕೆ. ಕಾಪು ನಿರ್ದೇಶನದ “ಕಲ್ಕುಡ – ಕಲ್ಲುರ್ಟಿ”, ತುಳು ನಾಟಕ, ನಲಿಕೆ ಭಜನೆ, ಸಂಘದ ಸದಸ್ಯೆರ್ದ್, ಜೋಕ್ಲೆರ್ದ್ ನೃತ್ಯ ಬೊಕ್ಕ ರಜಿತ್ ಸುವರ್ಣ ಬಳಗದಕ್ಲೆರ್ದ್ ಕವಾಲಿ ಲೇಸ್ ತುಳು ಕನ್ನಡಿಗೆರೆರ್ದ್ ದಿಂಜಿನ ಸಭಾಂಗಣಡ್ ನಡತ್ಂಡ್.
ಚಾವಡಿಡ್ ಮಲ್ಲ ಬಿನ್ನೆರ್ ಬಂಟರ ಸಂಘ ಬೊಂಬೈ ಮಹಿಳಾ ವಿಭಾಗದ ಮಾಜಿ ಕಾರ್ಯಾಧ್ಯಕ್ಷೆರ್ ಉಮಾ ಕೃಷ್ಣ ಶೆಟ್ಟಿ, ಮಾನಾದಿಗೆದ ಬಿನ್ನೆರ್ ಕನ್ನಡ ಸಂಘ ಸೂರತ್ ದ ಮಾಜಿ ಅಧ್ಯಕ್ಷೆರ್, ಉದ್ಯಮಿ ರಾಧಾಕೃಷ್ಣ ಶೆಟ್ಟಿ, ಭಾರತ್ ಬ್ಯಾಂಕ್ ದ ಕಾರ್ಯಾಧ್ಯಕ್ಷೆರ್ ಸೂರ್ಯಕಾಂತ್ ಜಯ ಸುವರ್ಣ, ತುಳು ಸಂಘ, ಬೋರಿವಲಿದ ಉಪಾಧ್ಯಕ್ಷೆರ್ ಹರೀಶ್ ಮೈಂದನ್, ಪ್ರಧಾನ ಕಾರ್ಯದರ್ಶಿ ರಜಿತ್ ಸುವರ್ಣ, ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆರ್ ತಿಲೋತ್ತಮ ವೈದ್ಯ, ಉಪ ಕಾರ್ಯಾಧ್ಯಕ್ಷೆರ್ ಶೋಭಾ ಎಸ್. ಶೆಟ್ಟಿ, ಕಾರ್ಯದರ್ಶಿ ಲಕ್ಷ್ಮಿ ದೇವಾಡಿಗ, ಸಾಂಸ್ಕೃತಿಕ ಸಮಿತಿದ ಕಾರ್ಯಾಧ್ಯಕ್ಷೆರ್ ಕುಸುಮ ಬಿ. ಶೆಟ್ಟಿ, ಉಪಕಾರ್ಯಾಧ್ಯಕ್ಷೆರ್ ಕಸ್ತೂರಿ ಎಸ್. ಶೆಟ್ಟಿ, ಕಾರ್ಯದರ್ಶಿ ಸುನಂದ ಶೆಟ್ಟಿ, ಯುವ ವಿಭಾಗದ ಕಾರ್ಯಾಧ್ಯಕ್ಷೆರ್ ಪ್ರವೀಣ್ ಅರ್. ಶೆಟ್ಟಿ, ಸದಸ್ಯತನ ನೋಂದಣಿ ಸಮಿತಿದ ಕಾರ್ಯಾಧ್ಯಕ್ಷೆರ್ ಜಯಂತಿ ಶೆಟ್ಟಿ ಪಾಲ್ ಪಡೆದಿತ್ತೆರ್.
ಸಾಂಸ್ಕೃತಿಕ ಲೇಸ್ ನ್ ನ್ಯಾ. ರಾಘವ ಎಂ., ಸುಧಾರಿಕೆ ಮಲ್ತೆರ್. ಸಭಾ ಲೇಸ್ ನ್ ಸಚಿನ್ ಪೂಜಾರಿ ಬೊಕ್ಕ ಯುವ ವಿಭಾಗದ ಕಾರ್ಯಾಧ್ಯಕ್ಷೆರ್ ಪ್ರವೀಣ್ ಅರ್. ಶೆಟ್ಟಿ ಸುಧಾರಿಕೆ ಮಲ್ತೆರ್.
ವರದಿ: ಈಶ್ವರ ಎಂ. ಐಲ್
ಮುಲ್ಕಿ : ಸಮಾಜಸೇವಕಿ, ಬಹುಮುಖ ಪ್ರತಿಭೆ ಪದ್ಮಿನಿ ವಸಂತ್ ಐಕಳ ಮೆರೆಗ್ ಹೊಸ ಅಂಗಣ ಪತ್ರಿಕೆದ ತಿಂಗಳ ಬೆಳಕು ಬುಡುಗಡೆ ಲೇಸ್ ಡ್ ಮಾನಾದಿಗೆ ನಡತ್ಂಡ್.
ಲೇಸ್ ದ ಅಧ್ಯಕ್ಷತೆನ್ ಧರ್ಮದರ್ಶಿ ಹರಿಕೃಷ್ಣ ಪುನರೂರು ಒಯಿಸ್ ದಿತ್ತೆರ್.
ಮಲ್ಲ ಬಿನ್ನೆರಾದ್ ಸಮಾಜ ಸೇವಕಿ ನಂದಾ ಪಾಯಸ್ , ಉದ್ಯಮಿ ಕಮಲಾಕ್ಷ ಬಡಗುಹಿತ್ಲು, ಮಯೂರಿ ಫೌಂಡೇಶನ್ ದ ಜಯ ಕೆ. ಶೆಟ್ಟಿ ಇತ್ತೆರ್.
ಲೇಸ್ ಡ್ ರಮೇಶ್ ಅಮೀನ್ ಕೊಕ್ಕರಕಲ್, ಸರೋಜಿನಿ ಶೆಟ್ಟಿ, ಜಯಪ್ರಕಾಶ್ ಶೆಟ್ಟಿ ಐಕಳ, ಪುರಂದರ ಸಾಲ್ಯಾನ್, ರವೀಶ್ ಕಾಮತ್ ಮೊಕುಲು ಮಾತ ಇತ್ತೆರ್.
ಉದ್ಯಮಿ ವಾಸು ಪೂಜಾರಿ ಪ್ರಾರ್ಥನೆ ಮಲ್ತೆರ್. ಹೊಸ ಅಂಗಣ ಸಂಪಾದಕೆರ್ ಡಾ| ಹರಿಶ್ಚಂದ್ರ ಸಾಲ್ಯಾನ್ ಸ್ವಾಗತ ಮಲ್ತೆರ್. ವೈ.ಎನ್. ಸಾಲ್ಯಾನ್ ಸನ್ಮಾನದ ಓಲೆ ಓದಿಯೆರ್.
ರವಿಚಂದ್ರ ನಿರೂಪಣೆ ಮಲ್ತೆರ್.
ಮರವಂತೆ: ಕುಂದಾಪುರ ತಾಲೂಕ್ ದ ಹರ್ಕೂರು ಗ್ರಾಮದ ಶ್ರೀ ಮಹಾಗಣಪತಿ ದೇವಸ್ಥಾನದ ಪೊಸ ಶಿಲಾದೇವಸ್ಥಾನ ಸಮರ್ಪಣೆ, ಬ್ರಹ್ಮಕಲಶ ಉಚ್ಚಯ ಬೊಕ್ಕ ಅನ್ನ ಪ್ರಸಾದ ಸೇವೆ, ಧಾರ್ಮಿಕ ವಿಧಿವಿಧಾನದೊಟ್ಟಿಗೆ ಮಾ.26-28 ಮುಟ್ಟ ನಡಪರೆ ಉಂಡು.
ಮಾ.25 ಕ್ಕ್ ಹರ್ಕೂರು ಶ್ರೀ ಮಹಾಗಣಪತಿ ದೇವೆರೆನ ಪುನರ್ ಪ್ರತಿಷ್ಠೆ ಬೊಕ್ಕ ಬ್ರಹ್ಮಕಲಶ ಉಚ್ಚಯ ಲೇಸ್ ದ ಲೆಕ್ಕೊಡು ಶ್ರೀದೇವೆರೆನ ಬೊಳ್ಳಿ ಪ್ರಭಾವಳಿ ವೈಭವದ ಮೆರವಣಿಗೆ ನಡತ್ಂಡ್.
ಮಾ.26 ಕ್ಕ್ ಶ್ರೀ ಗಣಪತಿ ದೇವೆರೆನ ಪುನರ್ ಪ್ರತಿಷ್ಠೆ ಬೊಕ್ಕ ಶಿಲಾಮಯ ದೇವಸ್ಥಾನ ಉದಿಪನ ಲೇಸ್ ದ ಲೆಕ್ಕೊಡು ಬೇತೆ ಬೇತೆ ಧಾರ್ಮಿಕ ಲೇಸ್ ಲು ನಡಪರೆ ಉಂಡು.
ಮಾ.27 ಕ್ಕ್ ಬೊಲ್ಪುಗು ಪೀಠ ಪ್ರತಿಷ್ಠೆದೊಟ್ಟಿಗೆ ಧಾರ್ಮಿಕ ಲೇಸ್ ಸುರು ಆದ್, ಶ್ರೀಮಹಾಗಣಪತಿ ದೇವೆರೆನ ಅಷ್ಟಬಂಧ ಪ್ರತಿಷ್ಠಾ ಮಹೋಚ್ಚಯ ಲೇಸ್, ಮಹಾಪೂಜೆ ಪ್ರಸಾದ ವಿತರಣೆ ನಡಪರೆ ಉಂಡು.
ಮಾ.28 ಕ್ಕ್ ಶ್ರೀದೇವೆರೆನ ಬ್ರಹ್ಮಕಲಶಾಭಿಷೇಕ, ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.
ಒಡಿಪು: ಲೋಕಸಭೆ ವೋಟುದ ನಿಲೆಟ್ಟ್ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆಡ್ ಎ.24 ರ್ದ್ ಮದ್ಯ ನಿಷೇಧ ಜಾರಿಗ್ ಬರ್ಪುಂಡು.
ವೋಟಿಂಗ್ ಬೊಕ್ಕ ಕೌಂಟಿಂಗ್ ನಡಪುನ ಪೊರ್ತುಡು ಕಾನೂನು ಬೊಕ್ಕ ಸುವ್ಯವಸ್ಥೆದ ಸಲುವಾದ್ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆಡ್ ಎ.24 ಕ್ಕ್ ಬಯ್ಯಗ್ 6 ಗಂಟೆರ್ದ್ ಎ.26 ನಡುರಾತ್ರೆ 12 ಗಂಟೆ ಮುಟ್ಟ, ಬೊಕ್ಕ ವೋಟುದ ಲೆಕ್ಕದ ದಿನ ಜೂನ್ 3 ಕ್ಕ್ ನಡುರಾತ್ರೆ 12 ಗಂಟೆರ್ದ್ ಜೂನ್ 4 ಕ್ಕ್ ನಡುರಾತ್ರೆ 12 ಗಂಟೆ ಮುಟ್ಟ ಮದ್ಯ ಮುಕ್ತ ದಿನಲು ಪಂದ್ ಘೋಷಣೆ ಮಲ್ದ್ಂಡ್.
ಆ ದಿನಟ್ಟ್ ಮಾತ ರೀತಿದ ಮದ್ಯದ ಅಂಗಡಿಲು, ಮದ್ಯ ಮಾರಾಟ ಡಿಪೋಲು, ಮದ್ಯ ತಯಾರಿಕಾ ಡಿಸ್ಟಿಲರಿಲು, ಸ್ಟಾರ್ ಹೋಟೆಲ್ಲು ಬೊಕ್ಕ (ಕಲಿ) ಶೇಂದಿ ಅಂಗಡಿಲೆನ್ ಮುಚ್ಚೊಡು ಪಂದ್ ಜಿಲ್ಲಾಧಿಕಾರಿಲು ಆದೇಶ ಕೊರ್ತೆರ್.
ಕುಂದಾಪುರ: ಸರಕಾರಿ ಆಸ್ಪತ್ರೆ ಆವರಣಡ್ ಇಪ್ಪುನ ನಂದಿಕೇಶ್ವರ ದೇವಸ್ಥಾನ ಪ್ರಾಚೀನವಾಯಿನವು. ದೇವೆರೆನ ಮಹಿಮೆ ಮಾತೆರೆಗ್ಲಾ ತೆರಿನವೇ. ಶಿಥಿಲಾವಸ್ಥೆಗ್ ಬತ್ತಿನ ದೇವಸ್ಥಾನನ್ ಶಿಲಾಮಯವಾದ್ ನಿರ್ಮಾಣ ಮಲ್ಪುನ ಯೋಜನೆ ಭಕ್ತೆರೆನ ಸಹಕಾರರ್ದ್ ನಡತ್ ದ್ಂಡ್. ದೇವೆರೆನ ಅನುಗ್ರಹರ್ದ್ ನಿರ್ಮಾಣ ಕೆಲಸ ಮುಗಿಪುನಡೆಗ್ ಬೈದ್ಂಡ್. ಎ.14-16 ಮುಟ್ಟ ಪೊಸ ಶಿಲಾಮಯ ದೇವಸ್ಥಾನದ ಉದಿಪನ, ಪುನರ್ಪ್ರತಿಷ್ಠೆ ಬೊಕ್ಕ ಬ್ರಹ್ಮಕಲಶ ಉಚ್ಚಯ ನಡಪರೆ ಉಂಡು ಪಂದ್ ಕುಂದಾಪುರ ಸಾರ್ವಜನಿಕ ಆಸ್ಪತ್ರೆದ ನಂದಿಕೇಶ್ವರ ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಡಾ.ಡಿ ನಾಗೇಶ್ ಪಂಡೆರ್.
ಮೇರ್ ಪುನರ್ ಪ್ರತಿಷ್ಠೆ ಬೊಕ್ಕ ಬ್ರಹ್ಮಕಲಶ ಉಚ್ಚಯದ ಲೆಪ್ಪೋಲೆ ಬುಡುಗಡೆ ಲೇಸ್ ಡ್ ಐತಾರ ಪಾತೆರಿಯೆರ್.
ವಿದ್ಯುತ್ ಗುತ್ತಿಗೆದಾರೆರ್ ಕೆ.ಆರ್. ನಾಯ್ಕ, ರೆಡ್ ಕ್ರಾಸ್ ಸೊಸೈಟಿ ಘಟಕದ ಸಭಾಪತಿ ಜಯಕರ ಶೆಟ್ಟಿ ಲೆಪ್ಪೋಲೆನ್ ಬುಡುಗಡೆ ಮಲ್ತ್ ದ್ ಎಡ್ಡೆಪ್ಪು ಬಯಕಿಯೆರ್.
ಕೈತಲ್ದ ನಂದಿಕೇಶ್ವರ ಫ್ರೆಂಡ್ಸ್ ಸಂಸ್ಥೆದ ಅಧ್ಯಕ್ಷೆರ್ ಶಿವಪ್ರಕಾಶ್, ಪೂತ್ತ ವ್ಯಾಪಾರಿಲೆನ ಸಂಘದ ಅಧ್ಯಕ್ಷೆರ್ ಸತೀಶ್ ಕುಮಾರ್, ಫ್ರೆಂಡ್ಸ್ ಸರ್ಕಲ್ ಸಂಸ್ಥೆದ ಅಧ್ಯಕ್ಷೆರ್ ನಾಗರಾಜ ಖಾರ್ವಿ, ಮೈಲಾರೇಶ್ವರ ದೇವಸ್ಥಾನದ ಮಾಜಿ ಆಡಳಿತ ಮೊಕ್ತೇಸರೆರ್ ಡಿ.ಕೆ.ಅಣ್ಣಪ್ಪಯ್ಯ, ಜೀರ್ಣೋದ್ಧಾರ ಸಮಿತಿದ ಖಜಾಂಚಿ ಬಿ.ಎಂ. ಚಂದ್ರಶೇಖರ ಪಾಲ್ ಪಡೆದಿತ್ತೆರ್.
ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ರಾಧಾಕೃಷ್ಣ ಎದ್ಕೊನಿಯೆರ್. ಗೋಪಾಲ ಪೂಜಾರಿ ಲೇಸ್ ನ್ ಸುಧಾರಿಕೆ ಮಲ್ತೆರ್.
ಸುಬ್ರಹ್ಮಣ್ಯ: ಸಮಾಜ ಸೇವೆನೇ ಜನಕ್ಲೆನ ಸೇವೆ ಪನ್ಪುನ ಉದಾರ ಮನೋಭಾವರ್ದ್ ನಿಟ್ಟೆ ಜಸ್ಟಿಸ್ ಕೆ ಎಸ್ ಸದಾನಂದ ಹೆಗಡೆರ್ ಸುಮಾರ್ ದುಂಬೇ ಮುಲ್ಪ ಗ್ರಾಮೀಣ ಬಡಪತ್ತ್ ದ ಜನಕ್ಲೆಗ್ ದೂರಗ್ ಪೋಪುನ ಬದಲ್ ಕೈತಲ್ ಡ್ ಮಾತ ವೈದ್ಯಕೀಯ ಸೇವೆಲು ತಿಕುಲೆಕ್ಕ ಆವೊಡು ಪನ್ಪುನ ಉದ್ದೇಶರ್ದ್ ಮುಲ್ಪ ಸದಾನಂದ ಆಸ್ಪತ್ರೆನ್ ಸುರು ಮಲ್ದೆರ್. ದುಂಬುದ ಕಾಲಡ್ ವೈದ್ಯಕೀಯ ಕರ್ಚಿಲು ರೋಗಿಲೆಗ್ ದಿಂಜ ಇತ್ತಿನೆನ್ ತೆರಿನ ಹೆಗಡೆರ್ ಬಡಪತ್ತ್ ದ ರೋಗಿಲೆಗ್ ಕಡಿಮೆ ಕಿರಯಡ್ ಬೊಕ್ಕ ಕೆಲವು ಪೊರ್ತುಡು ಧರ್ಮಾರ್ಥವಾದ್ ಸೇವೆನ್ ಕೊರ್ಪುನ ಮುಕೇನ ಸೇವಾ ತೃಪ್ತಿನ್ ಸುರು ಮಲ್ದೆರ್. ಮುಲ್ಪ ಪೂರ್ಣಕಾಲಿಕ ವೈದ್ಯೆರ್, ದಂತ ವೈದ್ಯೆರ್, ಬೊಕ್ಕ ತರಬೇತಿ ವೈದ್ಯೆರ್ ಲು ದಿನತ್ತ ಮಾತ ಪೊರ್ತುಡು ಸೇವೆನ್ ಒದಗಾವೊಂದು ಬೈದೆರ್. ಮುಲ್ಪದ ಸೇವೆನ್ ಫಲಾನುಭವಿಲು ಉಪಯೋಗಿಸಾವೊಡು ಪಂದ್ ಸುಬ್ರಹ್ಮಣ್ಯ ಮಠತ್ತ ಶ್ರೀ ವಿದ್ಯಾ ಪ್ರಸನ್ನ ತೀರ್ಥ ಸ್ವಾಮೀಜಿಲು ಪಂಡೆರ್.
ಮೇರ್ ಐತಾರ ಸುಬ್ರಹ್ಮಣ್ಯದ ಸದಾನಂದ ಆಸ್ಪತ್ರೆಡ್ ಜಸ್ಟಿಸ್ ಕೆ ಎಸ್ ಹೆಗಡೆ ಚಾರಿಟೇಬಲ್ ಆಸ್ಪತ್ರೆ ದೇರಳಕಟ್ಟೆ, ಸದಾನಂದ ವೈದ್ಯಕೀಯ ಬೊಕ್ಕ ದಂತ ಚಿಕಿತ್ಸಾ ಕೇಂದ್ರ ಸುಬ್ರಹ್ಮಣ್ಯ, ಬೊಕ್ಕ ರೋಟರಿ ಕ್ಲಬ್, ಲಯನ್ಸ್ ಕ್ಲಬ್, ಇನ್ನರ್ ವೇರ್ ಕ್ಲಬ್, ರವಿ ಕಕ್ಕೆಪದವು ಸಮಾಜ ಸೇವಾ ಟ್ರಸ್ಟ್ ದ ಒಟ್ಟುಸೇರಿಗೆಡ್ ನಡತಿನ ಧರ್ಮಾರ್ಥ ಆರೋಗ್ಯ ತಪಾಸಣಾ ಶಿಬಿರನ್ ಉದಿಪನ ಮಲ್ತ್ ದ್ ಪಾತೆರಿಯೆರ್.
ಮಲ್ಲ ಬಿನ್ನೆರಾದ್ ಬತ್ತಿನ ನೆಟ್ಟೆ ಕೆ ಎಸ್ ಹೆಗಡೆ ಚಾರಿಟೇಬಲ್ ಆಸ್ಪತ್ರೆದ ಮುಖ್ಯಸ್ಥೆರ್ ಸತೀಶ್ ಭಂಡಾರಿ ಪಾತೆರ್ದ್, ನಮಡ 23 ಗ್ರಾಮೀಣ ಆಸ್ಪತ್ರೆಲು ಉಂಡು. ಆಯಿಟ್ಟ್ ಸುಬ್ರಹ್ಮಣ್ಯ ಸದಾನಂದ ಆಸ್ಪತ್ರೆಗ್ ನಮ ಎಚ್ಚದ ಮಹತ್ವನ್ ಕೊರೊಂದು ಉಲ್ಲ, ಅತ್ತಂದೆ ಇಡೆಗ್ ಬೋಡಾಯಿನ ಸೌಲಭ್ಯನ್ ಲ ಹಂತ ಹಂತವಾದ್ ಕೊರೊಂದು ಉಲ್ಲ. ಶ್ರೀ ಸುಬ್ರಹ್ಮಣ್ಯ ಮಠ ಬೊಕ್ಕ ಸ್ಥಳೀಯ ಸಂಘ ಸಂಸ್ಥೆಲೆನ ಸಹಾಕಾರರ್ದ್ ನನಾತ್ ಈ ಆಸ್ಪತ್ರೆನ್ ಅಭಿವೃದ್ಧಿ ಮಲ್ಪೆರೆ ಉಂಡು ಪಂದ್ ಪಂಡೆರ್.
ಚಾವಡಿಡ್ ಸದಾನಂದ ಆಸ್ಪತ್ರೆ ಆಡಳಿತ ಅಧಿಕಾರಿ ಮೇಜರ್ ರಾಘವೇಂದ್ರ, ಲಯನ್ಸ್ ಕ್ಲಬ್ ಅಧ್ಯಕ್ಷೆರ್ ರಾಮಚಂದ್ರ ಪಳಂಗಾಯ, ರೋಟರಿ ಕ್ಲಬ್ ಅಧ್ಯಕ್ಷೆರ್ ಪ್ರಶಾಂತ್ ಕೋಡಿಬೈಲು, ಇನ್ನರ್ ವೇಲ್ ಕ್ಲಬ್ ಪ್ರಭಾರ ಅಧ್ಯಕ್ಷೆರ್ ಶ್ರುತಿ, ಡಾ|ರವಿ ಕಕ್ಕೆ ಪದವು, ನಿವೃತ್ತ ಪ್ರಾಂಶುಪಾಲೆರ್ ಎಸ್ಎನ್ ಭಟ್, ಸುಬ್ರಹ್ಮಣ್ಯದ ಉದ್ಯಮಿ ಹರೀಶ್ ಕಾಮತ್, ಸದಾನಂದ ಆಸ್ಪತ್ರೆದ ವೈದ್ಯಾಧಿಕಾರಿ ಡಾ. ಭಾನುಮತಿ ಪಾಲ್ ಪಡೆದಿತ್ತೆರ್.
ಲಯನ್ಸ್ ಕ್ಲಬ್ ದ ವಿಮಲಾ ರಂಗಯ್ಯ ಎದ್ಕೊಂದು ಲೇಸ್ ನ್ ಸುಧಾರಿಕೆ ಮಲ್ತೆರ್. ಲಯನ್ ರಾಮಚಂದ್ರಪ್ಪಳಂಗಾಯ ಸೊಲ್ಮೆ ಸಂದಾದೆರ್. ಶಿಬಿರಡ್ ಕಣ್ಣ್ ದ ಪರೀಕ್ಷೆ, ಚರ್ಮ ರೋಗದ ಪರೀಕ್ಷೆಲು, ಕಣ್ಣ್ ಕೆಬಿ ಮೂಂಕುದ ಪರೀಕ್ಷೆಲು, ಕೂಲಿದ ಪರೀಕ್ಷೆ, ಇಂಚ ಬೇತೆ ಬೇತೆ ಪರೀಕ್ಷೆಲೆನ್ ನಿಟ್ಟೆ ಆಸ್ಪತ್ರೆದ ವೈದ್ಯೆರೆನ ಕೂಟಲು ನಡಪಾದ್ ಕೊರಿಯೆರ್.
