ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ಶ್ರೀ ಕ್ಷೇತ್ರ ಕಂಗಣಬೆಟ್ಟು ಅಣ್ಣಪ್ಪ ಪಂಜುರ್ಲಿ ದೈವಸ್ಥಾನ – ಆಮಂತ್ರಣ ಪತ್ರಿಕೆ ಬೊಕ್ಕ ಕ್ಷೇತ್ರದ ಧ್ವನಿ ಸುರುಳಿ ಸುರುತ್ತ ಭಾಗದ ಬುಡುಗಡೆ

ಶ್ರೀ ಬ್ರಹ್ಮ ಬೊಕ್ಕ ಶ್ರೀ ವೀರಭದ್ರ ಸಿರಿ ಅಬ್ಬಗ-ದಾರಗ ಕ್ಷೇತ್ರದ ಬ್ರಹ್ಮಕಲಶೋತ್ಸವದ ಆಮಂತ್ರಣ ಪತ್ರಿಕೆ ಬೊಕ್ಕ ಕ್ಷೇತ್ರದ ಧ್ವನಿ ಸುರುಳಿದ ಸುರುತ್ತ ಭಾಗದ ಬುಡುಗಡೆ ಶ್ರೀ ಶ್ರೀ ಶ್ರೀ ವಿಶ್ವ ಪ್ರಸನ್ನ ತೀರ್ಥ ಶ್ರೀಪಾದೆರ್ , ಪೇಜಾವರ ಮಠ, ಮೇರ್ನ ದಿವ್ಯ ಹಸ್ತಡ್ ತಾರೀಖ್ 20-12-2020 ನೇ ಐತಾರ , ಬೈಯ್ಯ 04:00 ಗಂಟೆಗ್ , ನೂತನ ಆಲಯದ ಅಂಗಣಡ್ ಬುಡುಗಡೆ ಮಲ್ತೆರ್. ಅಂಚನೇ ಅಣ್ಣಪ್ಪ ಪಂಜುರ್ಲಿದ ದರ್ಶನ ಪಾತ್ರಿಲೆಗ್ ವೀಳ್ಯನ್ ಲ ಕೊರಿಯೆರ್

ಗುರುಕುಲೆನ ಸಾದಿಡ್ ಶಿಷ್ಯೆರ್ನ ಪಜ್ಜೆ ದಲಿತ ಕೇರಿಗ್ ಪೇಜಾವರ ಶ್ರೀ ಭೇಟಿ

ಹಿಂದೂ ಸಮಾಜಡ್ ಉಪ್ಪುನ ಅಸೃಶ್ಯತೆನ್ ನಿವಾರಣೆ ಮಲ್ತ್ದ್ ಸಶಕ್ತ ಸುದೃಢ ಮಲ್ಪುನ ದಿಟ್ಟಿ ಡ್ ದೇಶದ ಅವ್ವೆತೋ ಕಡೆ ದಲಿತೆರ್ನ ಕಾಲೊನಿಗ್ ಭೇಟಿ ಕೊರ್ದು ಕ್ರಾಂತಿಕಾರ್ಯ ನಡಪಾದ್ ಪೇಜಾವರ ಶ್ರೀ ವಿಶ್ವೇಶತೀರ್ಥ ಶ್ರೀಪಾದೆರ್ ಪುದರ್ ಪಡೆದಿತ್ತೆರ್.

ಇತ್ತೆ ಆರ್ನ ಶಿಷ್ಯ ಶ್ರೀ ವಿಶ್ವಪ್ರಸನ್ನ ತೀರ್ಥೆರ್ ಲಾ ಗುರುಕುಲ್ನ ಸಾದಿಡ್ ಪಜ್ಜೆ ದೀಪಿನ ಮಾಮಲ್ಲ ನಿರ್ಧಾರ ದೆತೊಂದೆರ್. ಐತಾರ ಉಡುಪಿದ ಕೊಡವೂರು ಗ್ರಾಮದ ಪಾಳೆಕಟ್ಟೆ ಪನ್ಪಿನ ಜಾಗೆ ಡ್ ಪರಿಶಿಷ್ಟರ ಬಡಾವಣೆಗ್ ತನ್ನ ಸುರುತ್ತಾ ಭೇಟಿ ಕೊರ್ದು ಹಿಂದೂ ಸಮಾಜ ಸಂಘಟನೆಗ್ ಯಾನ್ ತಯಾರುಲ್ಲೆ ಪಂದ್ ಪಂಡೆರ್.

ಅಯೋಧ್ಯೆ ರಾಮ ಮಂದಿರ ನಿರ್ಮಾಣನ್ ದುಂಬು ದೀಯೊಂದು ನನೂರ ಭಾರತಡ್ ಹಿಂದೂ ಸಮಾಜನ್ ಸಂಘಟನಾತ್ಮಕವಾದ್ ಗಟ್ಟಿ ಮಲ್ಪೊಡಾತುಂಡು. ಈ ಆಶಯದೊಟ್ಟುಗು ಸುಮಾರ್ 120 ಇಲ್ಲ್ ಉಪ್ಪುನ ಈ ಬಡಾವಣೆಗ್ ಭೇಟಿ ಕೊರ್ದು 400 ದಲಿತ ಬಂಧುಲೆಡ ಹಿಂದವಃ ಸೋದರಾ ಸರ್ವೇ ಪನ್ಪಿನ ಗುರು ವಿಶ್ವೇಶತೀರ್ಥ ಸಂದೇಶದ ಮುಖೇನ ವಿಶ್ವಾಸ ದಿಂಜಾಯೆರ್ .

ಶ್ರೀಕುಲು ಬರ್ಪಿನ ಬಗ್ಗೆ ಕೈತಲ್ ದ ನಗರಸಭಾ ಸದಸ್ಯ ಬೊಕ್ಕ ಸಂಘ ಪರಿವಾರದ ಸ್ವಯಂ ಸೇವಕ ವಿಜಯ ಕೊಡವೂರು ಬೊಕ್ಕ ಶ್ರೀಕುಲ್ನ ಆಪ್ತರಾದಿಪ್ಪುನ ಸಾಮಾಜಿಕ ಕಾರ್ಯಕರ್ತ ವಾಸುದೇವ ಭಟ್ ಪೆರಂಪಳ್ಳಿ ರಡ್ಡ್ ದಿನತ ದುಂಬೇ ಕಾಲೊನಿಗ್ ಭೇಟಿ ಕೊರ್ದು ಮಾಹಿತಿ ತೆರಿಪಾದ್ ಇತ್ತೆರ್. ಅಂಚಾದ್ ಬಾರಿ ಸಂತೋಷಡೆ ಜನಕುಲು ಕಾಲೊನಿದ ಮಾರ್ಗಡ್ ಐತ ಮಲ್ತ್ ದ್ ರಂಗೋಲಿ ಪಾರ್ದ್ ಅಲಂಕಾರ ಮಲ್ತಿತ್ತೆರ್ .ಸಾಮೂಹಿಕ ಭಜನೆದೊಟ್ಟುಗು ಶ್ರೀಕುಲೆನ್ ಎದುಕೊಂಡೆರ್. ಐರ್ದ್ ಬೊಕ್ಕ ಅಲ್ಪದ ಮೂಜಿ ಇಲ್ಲಗ್ ಭೇಟಿ ಕೊರ್ದು ರಾಮ ತುಡರ್ ಪೊತ್ತಾದ್ ಇಲ್ಲದ ಜನಕುಲ್ಡ ಪಾತೆರ್ ದ್ ಶ್ರೀಕುಲು ಶ್ರೀರಾಮ ಜಯರಾಮ ಜಯಜಯರಾಮ ಮಂತ್ರದೀಕ್ಷೆ ಕೊರ್ದು ನಿತ್ಯ ಶುದ್ಧ ಮನಸ್ ರ್ದ್ ಈ ಮಂತ್ರ ಪನೊಡು ಪಂದ್ ತೇರಿಪಾಯೆರ್. ಮೂಜಿ ಇಲ್ಲದಕುಲು ಶ್ರೀಕುಲೆಗ್ ಫಲ ಪುಷ್ಟ ಸಹಿತ ಭಕ್ತಿ ಗೌರವ ಕೊರಿಯೆರ್ .‌ ಶ್ರೀ ಮಠದ ವತಿರ್ದ್ ಮಾತಾ ಇಲ್ಲಗ್ ದೀಪ ಕೊರ್ದು ರಾಮದೀಪ ಪೊತ್ತಾಯೆರ್ .ಅಲ್ಪರ್ಡ್ ಬಡಾವಣೆದ ಶ್ರೀ ಮೂಕಾಂಬಿಕಾ ಭಜನಾ ಮಂದಿರಗ್ ಬತ್ತ್ ದ್ ಶ್ರೀ ದೇವಿನ ದುಂಬು ಉಪ್ಪುನ ತುಡರ್ ಪೊತ್ತಾದ್ ಮಂಗಳಾರತಿ ಬೆಳಗಿಯೆರ್ .

‌ ಜಾಲ್ ಡ್ ಸಮಸ್ತ ನಿವಾಸಿಲೆಗ್ ಸಂದೇಶ ಕೊರ್ದು ರಾಮಮಂದಿರ ನಿರ್ಮಾಣ ಕಾರ್ಯಗ್ ಸಮಸ್ತ ಹಿಂದೂ ಸಮಾಜದ ಸಹಕಾರ ಸಹಭಾಗಿತ್ವ ಪಡೆಯರೆ ಮಾತಾ ಸ್ತರತ ಹಿಂದೂ ಬಂಧುಲೆಗ್ ಭೇಟಿ ಆವೊಂದು ಉಲ್ಲಐತ ಪ್ರಕಾರ ಇಡೆಗ್ ಬೈದ. ಮಂದಿರ ನಿರ್ಮಾಣ ಕಾರ್ಯ ನಿರ್ವಿಘ್ನವಾದ್ ನಡತುದು ಇಡೀ ದೇಶಗ್ ರಾಮನ ಕೃಪೆಯಾದ್ ಶಾಂತಿ ಸುಭಿಕ್ಷೆ ಸಮೃದ್ಧಿ ನೆಲೆಸರೆ ನಮ ಪ್ರತೀನಿತ್ತ ಇಲ್ಲ ಇಲ್ಲಡ್ ರಾಮ ಗಾದ್ ದೀಪ ಬೆಳಗಾದ್ ರಾಮಂತ್ರಜಪ ರಾಮ ಭಜನೆ ನಡಪಾವೊಡು.ಪ್ರತಿಯೊರಿ ಲಾ ರಾಮನ ಜೀವನಾದರ್ಶ ನೆಲೆಯಾವೊಡು. ನಮ ಮಾತಾ ಹಿಂದೂ ಸಮಾಜದ ಅವಿಭಾಜ್ಯ ಅಂಗವಾದ್ ಸಮಾಜದ ಒಳಿತಿಗಾದ್ ಶ್ರಮಿಸಾವೊಡು ಪಂಡೆರ್. ಮಾತೆರೆಗ್ಲಾ ರಾಮ ಮಂತ್ರ ಕಲ್ಪಯೆರ್ .ಸುಬ್ರಹ್ಮಣ್ಯ ಷಷ್ಠೀಯಾಯೀನೇರ್ದಾವರ ಶ್ರೀ ಮಠದ ಅಧೀನಡ್ ಉಪ್ಪುನ ಮುಚ್ಲುಕೋಡು ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನಡ್ ಲಡ್ಡು ಪ್ರಸಾದ ಮಲ್ಪಾದ್ ಶ್ರೀ ಕುಲು ಮಾತೆರೆಗ್ಲಾ ಪಟ್ಟಿಯೆರ್.

ಶ್ರೀ ವಿಶ್ವೇಶತೀರ್ಥ ಸ್ವಾಮೀಜಿ ತೀರ್ ಪೋದು ಒಂಜಿ ವರ್ಷಡ್ ಶ್ರೀಮಠದ ಮಾತಾ ಜವಾಬ್ದಾರಿಗ್ ಪುಗೆಲ್ ಕೊರ್ದು ಶ್ರೀವಿಶ್ವಪ್ರಸನ್ನತೀರ್ಥರ್ ಗುರುಕುಲು ಮಲ್ದಿನ ಸಾಮಾಜಿಕ ಕಾರ್ಯಲೆನ್ ದುಂಬು ಕೊನೊಪಿನ ಸಂಕಲ್ಪ ಮಲ್ದಿನವು ಶ್ಲಾಘನೀಯ ಪಂದ್ ವಿಜಯ ಕೊಡವೂರು ತೇರಿಪಾಯೆರ್ .ವಿಹಿಂಪ‌ಜಿಲ್ಲಾ ಗುರ್ಕರ್ಲಾಯಿನ ವಿಷ್ಣುಮೂರ್ತಿ ಆಚಾರ್ಯ ಪಾಲ್ ಪಡೆದಿತ್ತೆರ್.

ರಾಮಮಂದಿರ ಟ್ರಸ್ಟ್ ದ ಸೊತ್ತು ಅತ್ತ್,ಇಡೀ ದೇಶದ ಸೊತ್ತು – ಪೇಜಾವರ ಶ್ರೀ

ಅಯೋಧ್ಯೆಡ್ ಶ್ರೀ ರಾಮಮಂದಿರದ ನಿರ್ಮಾಣೊಗ್ ಒಡಿಪುದ ಗ್ರಾಮ ಗ್ರಾಮೊಡ್ ನಿಧಿ ಸಮರ್ಪಣಾ ಅಭಿಯಾನ ನಡಪರೆಗುಂಡ್..ನೆತ್ತ ವತಿಡ್ದ್ ಕೊಡವೂರು ಶ್ರೀ ಶಂಕರನಾರಾಯಣ ದೇವಸ್ಥಾನೊಡ್ ನಡತಿನ ಪೂರ್ವ ಭಾವಿ ಸಭೆಟ್ ಪೇಜಾವರ ಮಠದ ಶ್ರೀ ಕುಲು ಪಾತೆರ್ದ್ ರಾಮಮಂದಿರ ಟ್ರಸ್ಟ್ ದ ಸೊತ್ತು ಅತ್ತ್,ಇಡೀ ದೇಶದ ಸೊತ್ತು.ಏರ್ ಮಾತಾ ರಾಮದೇವೆರೆನ್ ನಂಬುವೆರಾ ಅಕಲ್ನ ಸೊತ್ತು.ಅಭಿವೃದ್ಧಿ ಮಲ್ಪುನ ಜಬಾದಾರಿ ಮಾತ್ರ ಟ್ರಸ್ಟ್ ದವ್ವ್ ಪಂಡುದ್ ಪಂಡೆರ್.ನಮ್ಮ ಮಾತೆರ್ನ ರಾಮಮಂದಿರ ಆವೊಡಾಂಡ ರಾಮಭಕ್ತೆರ್ನ ಮಾತೆರ್ನ ಸಹಕಾರ ಬೋಡು.ಐಕ್ ಮಾತೆರ್ಲ ಕೈಜೋಡಿಸಾಂಡ ಮಾತ್ರ ಪೊರ್ಲುದ ರಾಮಮಂದಿರ ಅವರೆಗ್ ಸಾಧ್ಯ ಪಂಡೆರ್.ವಿಶ್ವ ಹಿಂದೂ ಪರಿಷತ್ ದ ಕಾರ್ಯಕರ್ತೆರ್ ಇಲ್ಲ ಇಲ್ಲಗ್ ರಶೀದಿ ಪಸೊಂದ್ ಬರ್ಪೆರ್ ನಿಕಲ್ಡ ಆಪಿನಾತ್ ಸಹಕಾರ ಮಲ್ಪುಲೆ ಪಂಡುದ್ ಈ ಪೊರ್ತುಡ್ ಬಿನ್ನಪ ಮಲ್ತೆರ್.

ವೇದಿಕೆಡ್ ರಾಷ್ಟ್ರೀಯ ಸ್ವಯಂ ಸೇವಾ ಸಂಘದ ನಗರ ಸಂಘ ಸಂಚಾಲಕೆರಾಯಿನ ರಾಮಚಂದ್ರ ಸನಿಲ್,ಕೊಡವೂರು ಕೇಂದ್ರ ಪ್ರಮುಖ್ ಚಂದ್ರಕಾಂತ್,ಕೊಡವೂರು ವಸತಿ ಪ್ರಮುಖ್ ರಾಜೇಶ್ ಖಾನಂಗಿ,ವಾಸುದೇವ ಭಟ್ ಉಪಸ್ಥಿತರಿತ್ತೆರ್.