ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ಗ್ರಾಮೀಣ ಭಾಗದ ಜೋಕ್ಲೆಗ್ ವಿದ್ಯೆ ಕೊರ್ದು ಸಾಧಕೆರಾದ್ ಮಲ್ಪುನ ಶಾಲೆನ್ ಮುಚ್ಚರೆ ಬಲ್ಲಿ : ಪೇಜಾವರ ಶ್ರೀ

ಮುಲ್ಕಿ: ಗ್ರಾಮೀಣ ಭಾಗದ ಜೋಕ್ಲೆಗ್ ಶಿಕ್ಷಣ ಕೊರ್ದು ಸಾಧಕೆರಾದ್ ಮಲ್ಪುನ ಶಾಲೆನ್ ಒವ್ವೇ ಕಾರಣಗ್ಲಾ ಮುಚ್ಚುನೇ ಸರಿ ಅತ್ತ್ ಪಂದ್ ಪೇಜಾವರ ಮಠಾಧೀಶೆರಾಯಿನ ಶ್ರೀ ವಿಶ್ವ ಪ್ರಸನ್ನ ತೀರ್ಥ ಸ್ವಾಮೀಜಿ ಪಂಡೆರ್.

ಮೇರ್ ಕಿನ್ನಿಗೋಳಿ ಕೈತಲ್ದ ಪುನರೂರು ಭಾರತ್ ಮಾತಾ ಹಿರಿಯ ಪ್ರಾಥಮಿಕ ಶಾಲೆ ಮುಚ್ಚುನ ಹಂತಡ್ ಉಂಡು, ಜೋಕ್ಲೆನ ಪೋಷಕೆರೆನ ಆತಂಕದ ಬಗೆಟ್ಟ್ ಶಾಲೆಗ್ ಭೇಟಿ ಕೊರ್ದು ಪಾತೆರಿಯೆರ್.

ಯಾನ್ ಪ್ರಾಥಮಿಕ ಕನ್ನಡ ಶಿಕ್ಷಣ ಪಡೆಯಿನ ಶಾಲೆದ ಬಗೆಟ್ಟ್ ಗೌರವ ಉಂಡು. ಒವ್ವೇ ಕಾರಣಗ್ಲಾ ಮುಚ್ಚೆರೆ ಬುಡ್ಪುಜಿ ಪಂದ್ ಪಂಡೆರ್.

ಶಾಲೆದ ಪೋಷಕ ಸಮಿತಿದ ಅಧ್ಯಕ್ಷೆರ್ ಕೃಷ್ಣಯ್ಯ ಆಚಾರ್ಯ ಮೆರೆನ ಮುತಾಲಿಕೆಡ್ ಗ್ರಾಮದ ಪೋಷಕೆರ್ ಶ್ರೀಪಾದೆರೆಗ್ ಶಾಲೆ ಒರಿಪಾವುನ ಬಗೆಟ್ಟ್ ಬಿನ್ನಾಪು ಸಂದಾಯೆರ್.

ಈ ಪೊರ್ತುಡು ಮುಖ್ಯ ಶಿಕ್ಷಕಿ ಉಷಾ.ಕೆ, ಕುಲಾಲ ಸಂಘದ ಶ್ರೀಧರ ಬಂಗೇರ, ಭುವನಾಭಿರಾಮ ಉಡುಪ, ಶಿವಪ್ರಸಾದ್ ಭಟ್, ಸದಾಶಿವ ಶೆಟ್ಟಿಗಾರ್, ಕಸ್ತೂರಿ ಪಂಜ, ಅಶೋಕ್ ಶೆಟ್ಟಿಗಾರ್, ಗೌರವ ಶಿಕ್ಷಕಿ ಹೇಮಾವತಿ, ಜಯಲಕ್ಷ್ಮಿ, ರಾಜ ಲಕ್ಷ್ಮೀ ಸಿ, ರೇಣುಕಾ ದಯಾನಂದ ಶೆಟ್ಟಿಗಾರ್ ಪಾಲ್ ಪಡೆದಿತ್ತೆರ್.

ಪ್ರಿಯದರ್ಶಿನಿ ಕೋ- ಆಪರೇಟಿವ್ ಸೊಸೈಟಿಗ್ ದಾಖಲೆದ 204 ಕೋಟಿ ರೂ. ವ್ಯವಹಾರ: ಎಚ್ ವಸಂತ್ ಬೆರ್ನಾರ್ಡ್

ಶೇ.15 ವೃದ್ಧಿ/22 ಕೋಟಿ ರೂ. ಡಿಪಾಸಿಟ್/ ಎಡ್ಡೆ ಲಾಭಾಂಶ

ಹಳೆಯಂಗಡಿದ ಪ್ರಿಯದರ್ಶಿನಿ ಕೋ- ಆಪರೇಟಿವ್ ಸೊಸೈಟಿ ಲಿ. ತನ್ನ ಮೆಂಬರ್ ನಕ್ಲೆನ ಬೆರಿಬಲ, ಗ್ರಾಹಕೆರೆನ ಸಹಕಾರ, ಆಡಳಿತ ವರ್ಗದಕ್ಲೆನ ಮಾರ್ಗದರ್ಶನ ಬೊಕ್ಕ ಸಿಬ್ಬಂದಿಲೆನ ಕಾರ್ಯಶ್ರಮರ್ದ್ 2023-24ನೇ ಸಾಲ್ ಡ್ ದಾಖಲೆದ 204 ಕೋಟಿ ರೂ. ವ್ಯವಹಾರ ಮಲ್ದ್ಂಡ್ ಪಂದ್ ಸೊಸೈಟಿ ಅಧ್ಯಕ್ಷೆರ್ ಎಚ್.ವಸಂತ ಬೆರ್ನಾಡ್ ಪಂಡೆರ್.

2021ನೇ ಇಸ್ವಿಡ್ ಟ್ಟ್ ಸುರು ಆಯಿನ ಪ್ರಿಯದರ್ಶಿನಿ ಕೋ- ಆಪರೇಟಿವ್ ಸೊಸೈಟಿಗ್ ಇತ್ತೆ 3 ಶಾಖೆ ಉಂಡು. ಈ ಸಾಲ್ ಡ್ 204 ಕೋಟಿ ರೂ. ವ್ಯವಹಾರನ್ ದಾಖಲ್ ಮಲ್ದ್ಂಡ್. ಕರಿನ ಸಾಲ್ ದ ವ್ಯವಹಾರನ್ ತುಲನೆ ಮಲ್ತ್ಂಡ ಶೇ.15 ಎಚ್ಚಾತ್ಂಡ್.

ಇತ್ತೆ 22 ಕೋಟಿ ರೂ. ಠೇವಣಿ, 17 ಕೋಟಿ ರೂ. ಸಾಲ ಬೊಕ್ಕ ಮುಂಗಡದೊಟ್ಟಿಗೆ, ರೂ. 86 ಲಕ್ಷ ಪಾಲ್ ಬಂಡವಾಳ, 31 ಲಕ್ಷ ನಿಧಿ, 23 ಕೋಟಿ ಬೆನ್ಪುನ ಬಂಡವಾಳ ಉಂಡು ಪಂದ್ ತೆರಿಪಾದ್, ನನದ ಸಾಲ್ ಡ್ ಎಡ್ಡೆ ಲಾಭಾಂಶ ಬರ್ಪಿನ ನಿರೀಕ್ಷೆ ಉಂಡು, ಸದಸ್ಯೆರೆಗ್ ಎಡ್ಡೆ ರೀತಿದ ಪಾಲ್ ಮುನಾಫೆನ್ ಪಟ್ಟುನ ಗುರಿ ಉಂಡು ಪಂದ್ ತೆರಿಪಾಯೆರ್.

ಈ ಅವಲೋಕನ ಸಭೆಟ್ಟ್ ಉಪಾಧ್ಯಕ್ಷೆರ್ ಪ್ರತಿಭಾ ಕುಳಾಯಿ, ಮುಖ್ಯಕಾರ್ಯನಿರ್ವಹಣಾಧಿಕಾರಿ ಸುದರ್ಶನ್ ಪಾಲ್ ಪಡೆದಿತ್ತೆರ್.

ಎ.5: ತಾಳಿಪಾಡಿ-ಶಾಂತಿಪಲ್ಕೆ ಶ್ರೀ ಬ್ರಹ್ಮಮುಗೇರ ಮಹಾಕಾಳಿ ದೈವಸ್ಥಾನಡ್ ಶ್ರೀ ಕೊರಗಜ್ಜ ದೈವೊದ ವಾರ್ಷಿಕ ನೇಮ

ತಾಳಿಪಾಡಿ-ಶಾಂತಿಪಲ್ಕೆ ಶ್ರೀ ಬ್ರಹ್ಮಮುಗೇರ ಮಹಾಕಾಳಿ ದೈವಸ್ಥಾನಡ್ ಪೊಸತಾದ್ ನಿರ್ಮಾಣ ಆಯಿನ ಗುಡಿಟ್ಟ್ ಶ್ರೀ ಕೊರಗಜ್ಜ ದೈವೊದ ವಾರ್ಷಿಕ ನೇಮ ಎ.5 ಸುಕ್ರಾರ ನಡಪರೆ ಉಂಡು.

ಆನಿ ರಾತ್ರೆ ಶ್ರೀ ಕೊರಗಜ್ಜ ದೈವೊದ ಭಂಡಾರ ಬತ್ತ್ ದ್ ನೇಮ ನಡಪುಂಡು.

ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್ ಗಂಧ ಪ್ರಸಾದ ದೆತೊಂದು ಶ್ರೀ ದೈವೊದ ಕೃಪೆಗ್ ಪಾತ್ರರಾವೊಡು ಪಂದ್ ತಾಳಿಪಾಡಿ-ಶಾಂತಿಪಲ್ಕೆ ಶ್ರೀ ಬ್ರಹ್ಮಮುಗೇರ ಮಹಾಕಾಳಿ ದೈವಸ್ಥಾನದ ಗೌರವಾಧ್ಯಕ್ಷೆರ್, ಅಧ್ಯಕ್ಷೆರ್, ಗುರಿಕಾರೆರ್, ಸರ್ವಸದಸ್ಯೆರ್, ಜೀರ್ಣೋದ್ಧಾರ ಸಮಿತಿ, ಶ್ರೀ ಬ್ರಹ್ಮಮುಗೇರ ಮಹಾಂಕಾಳಿ ಮಹಿಳಾ ಸೇವಾ ಸಮಿತಿದಕುಲು ಲೆಪ್ಪೋಲೆಡ್ ತೆರಿಪಾದೆರ್.

ಕುಂಪಲ ಶ್ರೀ ಕೃಷ್ಣ ಮುಖ್ಯಪ್ರಾಣ ದೇವಸ್ಥಾನಡ್ ಪ್ರತಿಷ್ಠಾ ವಾರ್ಷಿಕ ಉಚ್ಚಯ

ಕುಂಪಲ ಶ್ರೀ ಕೃಷ್ಣ ಮುಖ್ಯಪ್ರಾಣ ದೇವಸ್ಥಾನಡ್ ಎ.3 ಕ್ಕ್ ಪ್ರತಿಷ್ಠಾ ವಾರ್ಷಿಕ ಉಚ್ಚಯ ಬೊಕ್ಕ ಸಾನಿಧ್ಯ ಕಲಶಾಭಿಷೇಕ, ಅಶ್ವಥ ವೃಕ್ಷಗ್ ಉಪನಯನ, ಮದಿಮೆ ನಡತ್ಂಡ್.

ಈ ಲೇಸ್ ದ ವಿಧಿವಿಧಾನಲು ವೇದಮೂರ್ತಿ ಉಚಿಲತ್ತಾಲಯ ನೀಲೇಶ್ವರ ಪದ್ಮನಾಭ ತಂತ್ರಿಲೆನ ಮುತಾಲಿಕೆಡ್ ಶ್ರೀ ಬಾಲಯೋಗಿ ಅಮೃತಾನಂದ ಸ್ವಾಮೀಜಿಲೆನ ಸಮ್ಮುಖಡ್ ನಡತ್ಂಡ್.

ಅಂಚೆನೆ ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ ರಾತ್ರೆ ರಂಗಪೂಜೆ, ಅನ್ನ ಪ್ರಸಾದ ಸೇವೆ ನಡತ್ಂಡ್. ಈ ಲೇಸ್ ಡ್ ಎಚ್ಚ ಸಂಖ್ಯೆಡ್ ಭಕ್ತೆರ್ ಪಾಲ್ ಪಡೆದ್ ದೇವೆರೆನ ಪ್ರಸಾದ ಸ್ವೀಕಾರ ಮಲ್ತೆರ್.

ಕ್ಯಾ‌ಪ್ಟನ್ ಬೃಜೇಶ್ ಚೌಟೆರ್ನ ನಾಮಪತ್ರ ಸಲ್ಲಿಕೆದ ಪಾದಯಾತ್ರೆ

ಎಂಪಿ ವೋಟುಗು ನಾಮಪತ್ರ ಸಂದಾಯೆರೆ ಇನಿ ಅಕೇರಿ ದಿನ . ದಕ್ಷಿಣ ಕನ್ನಡಡ್ ಜಿಜೆಪಿ ಅಭ್ಯರ್ಥಿ ಕ್ಯಾಪ್ಟನ್ ಬ್ರಿಜೇಶ್ ಚೌಟೆರ್ ಇನಿ ತನ್ನ ಉಮೇದುವಾರಿಕೆ ಸಂದಾಯೆರೆ ಜಿಲ್ಲಾಧಿಕಾರಿ ಕಚೇರಿಗ್ ಪೋವೊಂದು ಉಲ್ಲೆರ್.

ಇನಿ ಬೊಲ್ಪುಗು ಬಂಟ್ಸ್ ಹಾಸ್ಟೆಲ್ ದ ಬಿಜೆಪಿ ಚುನಾವಣಾ ಕಚೇರಿರ್ದ್ ಬೃಹತ್ ಪಾದಯಾತ್ರೆ ಆಯೋಜನೆ ಮಲ್ತ್ ದಿತ್ತೆರ್.

ಈ ಲೇಸ್ ಡ್ ಮಸ್ತ್ ಸಂಖ್ಯೆಡ್ ಬಿಜೆಪಿ ನಾಯಕೆರ್, ಮುಖಂಡೆರ್, ಪಕ್ಷದ ಕಾರ್ಯಕರ್ತೆರ್ ಪಾಲ್ ಪಡೆದಿತ್ತೆರ್.

ಟೌನ್ ಹಾಲ್ ಡ್ ಸಭಾ ಲೇಸ್ ದ ಬೊಕ್ಕ ಜಿಲ್ಲಾಧಿಕಾರಿ ಕಚೇರಿಗ್ ಪೋದು ನಾಮಪತ್ರ ಸಂದಾಯೆರೆ ಉಲ್ಲೆರ್.

ಕಾಂಗ್ರೆಸ್ ಅಭ್ಯರ್ಥಿ ಪದ್ಮರಾಜ್ ನಾಮಪತ್ರ ಸಂದಾವುನ ಮೆರವಣಿಗೆಡ್ ರೈಸಿನ ತುಳುನಾಡ ಕೊಡಿ

ಕುಡ್ಲ: ಲೋಕಸಭೆ ವೋಟುದ ಕಾಂಗ್ರೆಸ್ ಅಭ್ಯರ್ಥಿ ಪದ್ಮರಾಜ್ ಆರ್. ಮೆರೆನ ನಾಮಪತ್ರ ಸಂದಾವುನ ಅಟ್ಟಣೆಗಾದ್ ಆಯೋಜನೆ ಆಯಿನ ಮೆರವಣಿಗೆಗ್ ಕೇಂದ್ರದ ಮಾಜಿ ಸಚಿವೆರ್ ಜನಾರ್ದನ ಪೂಜಾರಿ ಚಾಲನೆ ಕೊರಿಯೆರ್.

ಬುದಾರ ಬೊಲ್ಪುಗು ಶರವು ಶ್ರೀ ಮಹಾಗಣಪತಿ ದೇವಸ್ಥಾನ, ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನ, ಕಂಕನಾಡಿ ಶ್ರೀ ಬ್ತಹ್ಮಬೈದರ್ಕಳ ಗರೋಡಿಗ್ ಪೋದು ಇಸೇಸ ಪ್ರಾರ್ತನೆ ಸಂದಾಯೆರ್. ಬೊಕ್ಕ ಕುದ್ರೋಳಿ ಶ್ರೀ ಗೋಕರ್ಣನಾಥೇಶ್ವರ ದೇವಸ್ಥಾನಗ್ ಬತ್ತ್ ದ್ ಇಸೇಸ ಅರ್ಚನೆ ಸಂದಾಯಿನ ಬೊಕ್ಕ ಮೆರವಣಿಗೆಗ್ ಚಾಲನೆ ಕೊರಿಯೆರ್.

ಗೊಂಬೆ ಬಳಗ, ಚೆಂಡೆ, ಕೊಂಬುದೊಟ್ಟಿಗೆ ಮೆರವಣಿಗೆಡ್ ಕಾರ್ಯಕರ್ತೆರ್ ಪಜ್ಜೆ ಪಾಡಿಯೆರ್. ಓಪನ್ ಗಾಡಿಡ್ ಅಭ್ಯರ್ಥಿ ಪದ್ಮರಾಜ್ ಆರ್. ಮೆರವಣಿಗೆಡ್ ತುಳುನಾಡ ಕೊಡಿ ರಾರಾಜಿಸಾವೊಂದು ಇತ್ತ್ಂಡ್. ಕಾಂಗ್ರೆಸ್ ಕೊಡಿತ್ತೊಟ್ಟಿಗೆ ಕಾರ್ಯಕರ್ತೆರೆನ ಘೋಷಣೆ, ನಡಿಗೆಗ್ ವೇಗ ಕೊರೊಂದು ಇತ್ತ್ಂಡ್.

ತಿಬಾರ್ ದ ಪವಿತ್ರ ಮಣ್ಣ್ ಡ್ ಬ್ರಹ್ಮಕಲಶೋತ್ಸವದ ದೊಂಪ ಮೂರ್ತ

ಸುರತ್ಕಲ್: ಶಿಬರೂರು ಶ್ರೀ ಕೊಡಮಣಿತ್ತಾಯ ದೈವಸ್ಥಾನಡ್ ಎ.22 ತಾರೀಕ್ ರ್ದ್ ಸುರುವಾಪಿನ ಬ್ರಹ್ಮ‌ಕಲಶೋತ್ಸವ ಬೊಕ್ಕ ನಾಗಮಂಡಲ ಉಚ್ಚಯದ ಲೇಸ್ ಗ್ ದೊಂಪ ಪಾಡುನ ಚಪ್ಪರ ಮುರ್ತದ ಲೇಸ್ ನ್ ಧಾರ್ಮಿಕ ಮುಂದಾಳು ಶೆಡ್ಡೆ ಮಂಜುನಾಥ ಭಂಡಾರಿ ಮೇರ್ ಮಲ್ತೆರ್.

ಕ್ಷೇತ್ರದ ತಂತ್ರಿಲಾಯಿನ ವೇದಮೂರ್ತಿ ವೇದವ್ಯಾಸ ತಂತ್ರಿಲು ದೈವದ ನಡೆಟ್ಟ್ ಪ್ರಾರ್ತನೆ ಮಲ್ತಿ ಬೊಕ್ಕ ದೊಂಪ ಮೂರ್ತದ ಪೂಜಾ ವಿಧಿಕ್ಲೆನ್ ಮಲ್ತೆರ್.

ಶಿಬರೂರು ಶ್ರೀ ಉಳ್ಳಾಯ ಬೊಕ್ಕ ಕೊಡಮಣಿತ್ತಾಯ ದೈವಸ್ಥಾನಡ್ ಎ.26ಕ್ಕ್ ಬ್ರಹ್ಮಕುಂಭಾಭಿಷೇಕ ಬೊಕ್ಕ ನಾಗಮಂಡಲ ನಡಪರೆ ಉಂಡು. ಬೊಕ್ಕ ಎ.30 ಮುಟ್ಟ ವಿಶೇಷ ಜಾತ್ರಾ ಮಹೋತ್ಸವ ನಡಪರೆ ಉಂಡು.

ಈ ಪೊರ್ತುಡು ತಿಬಾರಗುತ್ತು ಗುತ್ತಿನಾರ್ ಉಮೇಶ್ ಎನ್ ಶೆಟ್ಟಿ, ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್ ಪ್ರಭಾಕರ ಎಸ್ ಶೆಟ್ಟಿ ಕೋಂಜಾಲಗುತ್ತು , ಕುಡುಂಬೂರುಗುತ್ತು ಜಯರಾಮ ಶೆಟ್ಟಿ, ಜೀರ್ಣೋದ್ಧಾರ ಮತ್ತು ಬ್ರಹ್ಮಕಲಶೋತ್ಸವ ಸಮಿತಿದ ಕಾರ್ಯಾಧ್ಯಕ್ಷೆರ್ ಪ್ರದ್ಯುಮ್ನ ರಾವ್ ಕೈಯೂರುಗುತ್ತು, ಬ್ರಹ್ಮಕಲಶೋತ್ಸವ ಸಮಿತಿದ ಪ್ರಧಾನ ಕಾರ್ಯದರ್ಶಿ, ಮೊಕ್ತೇಸರೆರ್ ಎಂ ಮಧುಕರ ಅಮೀನ್, ಪ್ರಧಾನ ಸಂಚಾಲಕೆರ್ ಸುಬ್ರಹ್ಮಣ್ಯ ಪ್ರಸಾದ್ ಕೋರ್ಯಾರು, ತುಕಾರಾಮ ಶೆಟ್ಟಿ ಪರ್ಲಬೈಲ್ ಗುತ್ತು, ಶಿವಾನಂದ ಶೆಟ್ಟಿ ಪಡುಮನೆ, ಸೂರಿಂಜೆ ಪಂಚಾಯತ್ ಅಧ್ಯಕ್ಷೆರ್ ಗೀತಾ ಶೆಟ್ಟಿ, ಪುರಂದರ ಎಂ ಶೆಟ್ಟಿ , ಕಾಂತಪ್ಪ ಸಾಲಿಯಾನ್, ದಿವಾಕರ ಸಾಮಾನಿ ಚೇಳಾರ್ ಗುತ್ತು, ಸ್ವಾಗತ ಸಮಿತಿದ ಜಿತೇಂದ್ರ ಶೆಟ್ಟಿ ಕೋರ್ಯಾರುಗುತ್ತು, ಸ್ವಯಂಸೇವಕ ಸಮಿತಿದ ಗಿರೀಶ್ ಶೆಟ್ಟಿ ಪಡುಮನೆ, ಪ್ರಚಾರ ಬೊಕ್ಕ ಅಮಂತ್ರಣ ಸಮಿತಿದ ವಿನೀತ್ ಶೆಟ್ಟಿ ಕೊರ್ಯಾರು ಹೊಸಮನೆ, ಅನ್ನ ಸಂತರ್ಪಣೆ ಸಮಿತಿದ ಕಾರ್ಯಾಧ್ಯಕ್ಷೆರ್ ಸುರೇಂದ್ರ ಶೆಟ್ಟಿ ದೇಂದೊಟ್ಟು, ಮಾಧ್ಯಮ ಸಮಿತಿದ ಅಧ್ಯಕ್ಷೆರ್ ಬಾಳ ಜಗನ್ನಾಥ ಶೆಟ್ಟಿ, ಮಾತೃ ಸಮಿತಿದ ಪ್ರಧಾನ ಕಾರ್ಯದರ್ಶಿ ಆಶಾ ಶೆಟ್ಟಿ ಪಡುಮನೆ, ಸಾಂಸ್ಕ್ರತಿಕ ಸಮಿತಿದ ವಿಜೇಶ್ ಶೆಟ್ಟಿ, ಅನ್ನಸಂತರ್ಪಣೆ ಸಮಿತಿದ ಜಗದೀಶ್ ಶೆಟ್ಟಿ, ಉಗ್ರಾಣ ಸಮಿತಿದ ದಯಾನಂದ ದೇವಾಡಿಗ, ಹೊರೆಕಾಣಿಕೆ ಸಮಿತಿದ ಬಾಲಕೃಷ್ಣ ಕುಲಾಲ್, ಆರೋಗ್ಯ, ನೈರ್ಮಲ್ಯ ಸಮಿತಿದ ಸುಜಾತ ಶೆಟ್ಟಿ, ಪ್ರಸಾದ ವಿತರಣಾ ಸಮಿತಿದ ಸುಧಾಕರ ಶೆಟ್ಟಿ ಶಿಬರೂರುಗುತ್ತು, ಗಾಡಿ ಪಾರ್ಕಿಂಗ್ ಸಮಿತಿದ ದಿನಕರ ಕೈಯೂರು, ಅಲಂಕಾರ ಸಮಿತಿದ ಭುವನೇಶ್ ಆಚಾರ್ಯ, ವಸತಿ ಸಮಿತಿದ ಸಂದೀಪ್ ಶೆಟ್ಟಿ, ಮಾತೃ ಸಮಿತಿದ ಅಧ್ಯಕ್ಷೆರ್ ಶ್ಯಾಮಲ ಪ್ರಭಾಕರ ಶೆಟ್ಟಿ ಶಿಬರೂರುಗುತ್ತು, ಸಂಚಾಲಕಿ ಸುಷ್ಮಾ ಯು ಶೆಟ್ಟಿ ಶಿಬರೂರುಗುತ್ತು, ಅರ್ಥಿಕ ಸಮಿತಿದ ಪ್ರವೀಣ್ ಶೆಟ್ಟಿ ಮೊಕುಲು ಮಾತ ಇತ್ತೆರ್.

ಎ.13: ಬೊಂಬೈ ಶ್ರೀ ಸಸಿಹಿತ್ಲು ಭಗವತೀ ತೀಯಾ ಸಂಘದ 69ನೇ ವರ್ಷದ ಮಹಾಪೂಜೆ

ಬೊಂಬೈ ಶ್ರೀ ಸಸಿಹಿತ್ಲು ಭಗವತೀ ತೀಯಾ ಸಂಘದ 69ನೇ ವರ್ಷದ ಮಹಾಪೂಜೆ ಎ.13 ಸನಿಯಾರ ಭಾಂಡುಪ್ ತ್ರಿಮೂರ್ತಿ ನಾಟ್ಯ ಮಂದಿರಡ್ ನಡಪರೆ ಉಂಡು.

ಆನಿ ಬೊಲ್ಪುಗು ಗಣಹೋಮ, ಬಯ್ಯಗ್ ಕಲಶ ಪ್ರತಿಷ್ಠೆ, ಅಲಂಕಾರ ಪೂಜೆ, ಅರಶಿನ ಕುಂಕುಮ, ಭಜನೆ ರಾತ್ರೆ ಧಾರ್ಮಿಕ ಸಭಾ ಲೇಸ್, ಸನ್ಮಾನ, ಬಲಿ ಉಚ್ಚಯ, ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ತೀರ್ಥ ಪ್ರಸಾದ ದೆತೊಂದು, ಶ್ರೀ ಭಗವತೀ ಅಮ್ಮನ ಕೃಪೆಗ್ ಪಾತ್ರರಾವೊಡು ಪಂದ್ ಬೊಂಬೈ ಶ್ರೀ ಸಸಿಹಿತ್ಲು ಭಗವತೀ ತೀಯಾ ಸಂಘದ ಪದುಕೆರ್, ಸರ್ವಸದಸ್ಯೆರ್ ಬೊಕ್ಕ ಮಹಿಳಾ ವಿಭಾಗದಕುಲು ಲೆಪ್ಪೋಲೆಡ್ ತೆರಿಪಾದೆರ್.