“ತುಳುನಾಡ ಸಾರಥಿ” ಯೋಗಿಶ್ ಶೆಟ್ಟಿ ಜಪ್ಪು ಜೆಡಿಎಸ್‌‌ ದಕ್ಷಿಣ ಕನ್ನಡ ಜಿಲ್ಲಾ ಮಹಾ ಪ್ರಧಾನ ಕಾರ್ಯದರ್ಶಿಯಾದ್ ನೇಮಕ*

ಬೆಂಗಳೂರು : ದಕ್ಷಿಣ ಕನ್ನಡಡ್ ತನ್ನ ಸಂಘಟನಾ ಶಕ್ತಿನ್ ಕುಡೊರ ತೊಜಪಾವುನ ನಿಲೆಟ್ಟ್ ದುಂಬಾತಿನ ಜನತಾದಳ (ಜಾತ್ಯಾತೀತ) ರಾಜ್ಯ ನಾಯಕತ್ವ ಪೊಸ ಜವನೆರೆಗ್ ಜಬದಾರಿಲೆನ್ ಪಟ್‌ದ್ಂಡ್.
ದಕ್ಷಿಣ ಕನ್ನಡ ಜಿಲ್ಲಾ ಮಹಾ ಪ್ರಧಾನ ಕಾರ್ಯದರ್ಶಿಯಾದ್ ತುಳುನಾಡ್‌ದ ಪುಗರ್ತೆದ ನಾಯಕೆ ಯೋಗಿಶ್ ಶೆಟ್ಟಿ ಜಪ್ಪು ಮೆರೆನ್ ನೇಮಕ ಮಲ್ದೆರ್. ಈ ನೇಮಕಾತಿಗ್ ಪಕ್ಷದ ರಾಜ್ಯಾಧ್ಯಕ್ಷೆರ್, ಕೇಂದ್ರ ಸಚಿವೆರಾಯಿನ ಎಚ್ ಡಿ ಕುಮಾರಸ್ವಾಮಿ ಮೆರೆನ ಅನುಮೋದನೆ ತಿಕ್‌ದ್ಂಡ್.
ದಕ ಜಿಲ್ಲಾ ಕಾರ್ಯಧ್ಯಕ್ಷೆರಾದ್ ಶಶಿರಾಜ ಶೆಟ್ಟಿ ಕೊಳಂಬೆ ಆಯ್ಕೆಯಾತೆರ್. ಜಿಲ್ಲಾ ಅಧ್ಯಕ್ಷೆರ್ ಜಾಕೆ ಮಾಧವ ಗೌಡ ಮೇರ್ ಮಲ್ತಿನ ಶಿಫಾರಸ್‌ದಂಚ ಈ ನೇಮಕಾತಿ ಆತ್ಂಡ್.

ನೆಲಮಟ್ಟರ್ದ್ ನಾಯಕತ್ವ ಪಡೆದಿನ ಯೋಗಿಶ್ ಶೆಟ್ಟಿ ಜಪ್ಪು
ಯೋಗಿಶ್ ಶೆಟ್ಟಿ ಜಪ್ಪು ಮೆರೆನ ರಾಜಕೀಯ ಪಯಣ ಪೊರ್ಂಬಾಟದ ನಿಲೆಟ್ಟ್ ಸುರುವಾತ್ಂಡ್ . 1997 ಟ್ ಪಕ್ಷೇತರ ಅಭ್ಯರ್ಥಿಯಾದ್ ಸ್ಪರ್ಧೆ ಮಲ್ತ್‌ದ್ ಗಮನಸೆಳೆಯಿನ ಮೇರ್ ಬೊಕ್ಕ ಮಾಜಿ ಮುಖ್ಯಮಂತ್ರಿ ಜೆ.ಎಚ್ ಪಟೇಲ್ ಸಮ್ಮುಖಡ್ ಜನತಾದಳಕ್ಕ್ ಸೇರ್ದಿತ್ತೆರ್.ವಿದ್ಯಾರ್ಥಿ ಜನತಾದಳರ್ದ್ ಸುರುವಾತಿನ ಅರೆನ ಪಯಣ ಯುವ ಜನತಾದಳ ಬೊಕ್ಕ ಜಿಲ್ಲಾ-ರಾಜ್ಯ ಮಟ್ಟದ ಹುದ್ದೆ ಮುಟ್ಟ ಬೈದ್ಂಡ್. ಕಾರ್ಯಕರ್ತೆರ್ನ ಒಟ್ಟುಗೆ ನೇರ ಸಂಪರ್ಕ, ಕೂಟ ಕಟ್ಟುನ ಕೌಶಲ್ಯ ಬೊಕ್ಕ ಸಂಘಟನಾ ಚಾತುರ್ಯ ಮೆರೆನ್ ಮಲ್ಲ ಲೀಡರ್ ಆದ್ ರೂಪಿಸಾಂಡ್.
ಮಂಗಳೂರು ಮಹಾನಗರ ಪಾಲಿಕೆಡ್ ಕಾರ್ಪೊರೇಟರ್ ಆದ್ ಸೇವೆ ಸಂದಾದೆರ್.
ಕೊರೋನಾ ಸಂಕಷ್ಟದ ಪೊರ್ತುಡು 62 ದಿನ ನಿರಂತರ ಅನ್ನದಾನ ಮಲ್ತ್‌ದ್ “ತುಳುನಾಡ ಸಾರಥಿ” ಪನ್ಪಿನ ಬಿರ್ದವ ಪಡೆಯೆರ್. ತುಳು ಬಾಷೆ, ಆಚಾರ ವಿಚಾರೊಡು ಅನ್ಯಾಯ ಆನಗ ಪ್ರತಿಭಟನೆ ಮಲ್ದಿನ ಮೇರ್, ಕುಡ್ಲ‌ದ ಬಾವುಟಗುಡ್ಡೆಡ್ ಕೆದಂಬಾಡಿ ರಾಮಯ್ಯ ಗೌಡೆರ್ನ ಪ್ರತಿಮೆ ಸ್ಥಾಪನೆಗಾದ್ ನಡತಿನ ಹೋರಾಟಡ್ ಪ್ರಮುಖ ಪಾತ್ರ ವಹಿಸ್‌ದಿತ್ತೆರ್.