ಬೆಳ್ತಂಗಡಿ

ತೋಕೂರು ಶಾಲೆದ ತೋಟೊಡು ಶ್ರಮದಾನ

ಹಳೆಯಂಗಡಿ: ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ಸ್ಪೋರ್ಟ್ಸ್ ಕ್ಲಬ್( ರಿ) ತೋಕೂರು ಆಶ್ರಯೊಡು ತೋಕೂರುದ ಹಿಂದೂಸ್ಥಾನಿ ಶಾಲೆದ ತೋಟೊಡು ಐತಾರದಾನಿ ಶ್ರಮದಾನದ ಒರುಟ್ಟು ಸ್ವಚ್ಛತೆದ ಕೆಲಸ ನಡತ್ಂಡ್.

ಕ್ಲಬ್ ದ ಗೌರವ ಮಾರ್ಗದರ್ಶಕೆರ್ ಅಂಚೆನೆ ಬೊಂಬೈ ತಿಲಕ್ ನಗರದ ಪೆಸ್ತಮ್ ಸಾಗರ್ ಕರ್ನಾಟಕ ಸಂಘ ಉಂದೆತ್ತ ಅಧ್ಯಕ್ಷೆರ್ ಆದುಪ್ಪುನ ರಾಮಣ್ಣ ದೇವಾಡಿಗ ಮೇರ್ ಶಾಲೆದ ಎದುರು ನಡ್ತಿನ ಪೂತ್ತ ದೈಕುಲೆನ ಕಟ್ಟೆ ಬುಡ್ಪಾದ್ ಗೊಬ್ಬರ ಪಾಡ್ದ್ ಶ್ರಮದಾನೊಗು ಚಾಲನೆ ಕೊರಿಯೆರ್.

ಪಡುಪಣಂಬೂರು ಗ್ರಾಮ ಪಂಚಾಯ್ತಿ ಸದಸ್ಯೆರ್ ಸಂತೋಷ್ ಕುಮಾರ್, ಕ್ಲಬ್ ದ ಗೌರವ ಮಾರ್ಗದರ್ಶಕೆರ್ ರಮೇಶ್ ಅಮೀನ್ , ಮುಂಬೈ, ಗೌರವ ಗುರ್ಕಾರ್ಲು ನಾರಾಯಣ್ ಜಿ.ಕೆ., ಗುರ್ಕಾರ್ಲು ಸಂತೋಷ್ ದೇವಾಡಿಗ, ಒತ್ತು ಗುರ್ಕಾರ್ಲು ದೀಪಕ್ ಸುವರ್ಣ, ಕಾರ್ಯಾಧ್ಯಕ್ಷೆರ್ ಸುರೇಶ್ ಶೆಟ್ಟಿ, ಮಲ್ಲ ಕಾರ್ಯಂತೆರ್ ಜಗದೀಶ್ ಕುಲಾಲ್, ಪಣವುದ ಪಾಲವೆರ್ ಸಂಪತ್ ದೇವಾಡಿಗ, ಪರಿಸರ ರಕ್ಷಣೆ ಕಾರ್ಯಂತೆರ್ ಸುನಿಲ್ ದೇವಾಡಿಗ,ಕ್ರಿಕೆಟ್ ಕೂಟ ದ ನಾಯಕೆ ಗೌತಮ್ ಬೆಲ್ಚಡ, ಸದಸ್ಯೆರ್ ಪದ್ಮನಾಭ ಶೆಟ್ಟಿ, ವಿಜಯ ಕುಮಾರ್, ಧರ್ಮಾನಂದ ಶೆಟ್ಟಿಗಾರ್, ರಮೇಶ್ ಕರ್ಕೇರ, ಸೋಮನಾಥ ಪೂಜಾರಿ, ಕಾರ್ತಿಕ್ ಭಟ್ ಮೊಕುಲು ಮಾತ ಶ್ರಮದಾನೊಡು ಪಾಲ್ ಪಡೆಯೆರ್.
ಗಣೇಶ್ ಅಮೀನ್ ಮೇರ್ ಕೊರ್ತಿನ ಕಿದೆ ಗೊಬ್ಬರೊನು ತಾರೆದ ಬೊಕ್ಕ ಪೂತ್ತ ದೈಕ್ ಲೆನ ಮುದೆಲೆಗ್ ಪಾಡ್ದ್, ಕಜವು, ಪ್ಲಾಸ್ಟಿಕ್ ದೆತ್ತ್ ದ್ ಪರಿಸರ ಸ್ವಚ್ಚತೆಡ್ ಮಾತೆರ್ಲ ಪಾಲ್ ಪಡೆಯೆರ್.

ಧರ್ಮಸ್ಥಳಡ್ ನಾಟಿ ಕಾರ್ಯಗ್ ಚಾಲನೆ

ಉಜಿರೆ, ಜೂನ್ 7: ‘ಪರಿಸರ ಸಂರಕ್ಷಣೆ ಪ್ರತಿಯೋರಿಯನ ಜವಾಬ್ದಾರಿ ಅತುಂಡು ಪ್ರತಿಯೊರಿಲಾ ಪರಿಸರ ಕಾಳಜಿರ್ದ್ ಜಾಗ ಉಪ್ಪುನಲ್ಪ ದೈ ನರ್ದ್ ಪಚ್ಚೆ ಬುಳೆಪಾವುನ ಬೇಲೆ ಮಲ್ಪೋಡು , ಆ ಮುಖೇನ ಕೈತಲ್ ದ ಪರಿಸರಡ್ ಶುದ್ಧ ಆಮ್ಲಜನಕ ಉತ್ಪಾದನೆ ಆಯೆರೆ ಕಾರಣಕರ್ತೆರಾವೊಡು ಪಂದ್ ಅರಣ್ಯ ಸಚಿವ ಅರವಿಂದ ಲಿಂಬಾವಳಿ ಪಂಡೆರ್ .

ಧರ್ಮಸ್ಥಳದ ಧರ್ಮಾಧಿಕಾರಿ ವೀರೇಂದ್ರ ಹೆಗ್ಗಡೆ ಮೆರ್ನ ಉಪಸ್ಥಿತಿಡ್ ವಿಶ್ವ ಪರಿಸರ ದಿನಾಚರಣೆದ ಪರವಾದ್ ಅಟ್ಟನೆ ಮಲ್ತಿನ ಕಾಡ್ ದ ವನ್ಯಮೃಗಕ್ಲೇಗಾದ್ ಫಲವಸ್ತುದ ದೈ ನಡ್ಪಿನ ಲೇಸ್ ಡ್ ಪಾತೆರಿಯೆರ್.

ಧರ್ಮಸ್ಥಳದ ಗ್ರಾಮೀಣಾಭಿವೃದ್ಧಿ ಯೋಜನೆ ಬೊಕ್ಕ ಅರಣ್ಯ ಇಲಾಖೆ ಜಂಟಿ ಸಹಭಾಗಿತ್ವಡ್ ಧರ್ಮಸ್ಥಳದ 125 ಹೆಕ್ಟೇರ್ ಪ್ರದೇಶಡ್ ಈ ಯೋಜನೆ ಅನುಷ್ಠಾನ ಆವೊಂದು ಉಂಡು .

ವೇದವ್ಯಾಸ ಕಾಮತ್ ಗ್ ಕೋವಿಡ್ ಪಾಸಿಟಿವ್

ಕುಡ್ಲ, ಜೂನ್ 5 : ಕುಡ್ಲ ದಕ್ಷಿಣ ಮತ ಕ್ಷೇತ್ರದ ಶಾಸಕ ವೇದವ್ಯಾಸ ಕಾಮತ್ಗ್ ಕೋವಿಡ್ ಪಾಸಿಟಿವ್ ಸೋಂಕು ಆತುಂಡು .

ಈ ಬಗ್ಗೆ ಟ್ವಿಟ್ ಮಲ್ತ್ ಮಾಹಿತಿ ಕೊರಿನ ಆರ್ , ‘ಎಂಕ್ ಒಂತೆ ಸ್ವಲ್ಪ ಜ್ವರ ತೊಜಿನೆರ್ದಾವರ ನೆಲೆಟ್ಟ್ ಕೋವಿಡ್ ಪರೀಕ್ಷೆಗ್. ಎಂಕ್ ಕೋವಿಡ್ ಧೃಡ ಆತುಂಡು ಪಾಸಿಟಿವ್ ಆತುಂಡು . ತಾನ್ ಹೋಂ ಐಸೋಲೇಷನ್ ಆತೆ . ಹುಷಾರ್ ಉಲ್ಲೆ ಪಂದ್ ಪಂಡೆರ್.