ನಿಟ್ಟೆ

ನಿಟ್ಟೆ ಸ್ಮಾರ್ಟ್ ಹೆಲ್ತ್ ವಿಲೇಜ್ ಯೋಜನೆದಡಿ ” ಆಪತ್ಬಂಧು ” ಆಪ್ ಬುಡುಗಡೆ

ನಿಟ್ಟೆ : ಪ್ರಸ್ತುತ ಜಾಗತಿಕ ಪರಿಸ್ಥಿತಿಡ್ ಆರೋಗ್ಯ ಕ್ಷೇತ್ರದ ಬಲವರ್ಧನೆಗ್ ಎಚ್ಚದ ಪ್ರಾತಿನಿಧ್ಯ ಅಗತ್ಯ ಉಂಡು . ಈ ನೆಲೆಟ್ಟ್ ಬೇಲೆ ಮಲ್ಪರೆ ನಮಡ ಆರೋಗ್ಯಕರ ಮನಸ್ ಉಪ್ಪೊಡು . ಒವ್ವೆ ಬಗೆತ ಫಲಾನುಪೇಕ್ಷೆ ಇಜ್ಜಂದೆ ಸೇವಾ ಮನೋಭಾವರ್ದ್ ರೋಗಿಲೆನ್ ತೂಪಿನ ಮಲ್ಪುನ ನಮನ್ ನಮ ದೇವೆರ್ನ ಸೇವೆಡ್ ದೀಲಕ ಪಂದ್ ನಿಟ್ಟೆ ಶಿಕ್ಷಣ ಸಂಸ್ಥೆದ ಗುರ್ಕಾರ್ಲಾಯಿನ ಅಂಚನೇ ನಿಟ್ಟೆ ಡೀಮ್ಸ್ ಟು ಬಿ ವಿಶ್ವವಿದ್ಯಾಲಯದ ಕುಲಾಧಿಪತಿ ಎನ್. ವಿನಯ ಹೆಗ್ಡೆ ಪಂಡೆರ್ . ಮೇರ್ ನಿಟ್ಟೆ ಡೀಮ್ಸ್ ಟು ಬಿ ವಿಶ್ವವಿದ್ಯಾಲಯ, ನಿಟ್ಟೆ ಉಷಾ ನರ್ಸಿಂಗ್ ಕಾಲೇಜು, ನಿಟ್ಟೆ ಯುನಿವರ್ಸಿಟಿ- ಮೆಡಿಸಿಮ್ ಬೊಕ್ಕ ಕ್ಷೇಮ ಪಬ್ಲಿಕ್ ಹೆಲ್ತ್ ವಿಭಾಗದ ಒಟ್ಟು ಸೇರಿಗೆಡ್ ನಿಟ್ಟೆಡ್ ಅಟ್ಟನೆ ಮಲ್ತಿನ ನಿಟ್ಟೆ ಸ್ಮಾರ್ಟ್ ಹೆಲ್ತ್ ವಿಲೇಜ್ ಯೋಜನೆದ ‘ಆಪದ್ಬಂಧು’ ಬೊಕ್ಕ ನಿಟ್ಟೆ ಕೋವಿಡ್-19 ಹೋಮ್ ಐಸೋಲೇಶನ್ ಆ್ಯಪ್ ‘ಕೋವಿಸ್ವಾಸ್‌ನ್ ಬುಡುಗಡೆ ಮಲ್ತ್ ಪಾತೆರಿಯೆರ್.

ನಿಟ್ಟೆ ಉಷಾ ನರ್ಸಿಂಗ್ ಕಾಲೇಜು ಬೊಕ್ಕ ನಿಟ್ಟೆ ಡೀಮ್ಸ್ ಟು ಬಿ ವಿಶ್ವವಿದ್ಯಾಲಯದ ಮೆಡಿಸಿಮ್ ಬೊಕ್ಕ ಪಬ್ಲಿಕ್ ಹೆಲ್ತ್ ವಿಭಾಗ ಅಟ್ಟನೆ ಮಲ್ತಿನ ತರಬೇತಿ ಶಿಬಿರಡ್ ಪಾಲ್ ಪಡೆಯಿನ ಕೈತಲ್ ದ ಸ್ವಯಂಸೇವಕೆರೆಗ್ ಮಾರ್ಗದರ್ಶನ ಕೊರಿಯೆರ್ . ಕುಲಾಧಿಪತಿ ವಿನಯ ಹೆಗ್ಡೆ ತರಬೇತಿ ಕಿಟ್‌ಲೆನ್ ಪಟ್ಟಿಯೆರ್. ‘ಕೋವಿಸ್ವಾಸ್’ ಆ್ಯಪ್ ಬಗ್ಗೆ ಬೊಕ್ಕ ಐತ ಕಾರ್ಯಾನಿರ್ವಹಣೆದ ಬಗ್ಗೆ ಪಬ್ಲಿಕ್ ಹೆಲ್ತ್ ವಿಭಾಗದ ಗುರ್ಕಾರ್ಲು ಪಾತೆರಿಯೆರ್.

ಕಾರ್ಕಳ: ನಿಟ್ಟೆ ಕಲಂಬಾಡಿ ಪದವು ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆಡ್ ನೆತ್ತೆರ್ ದಾನ ಶಿಬಿರ

ಕಾರ್ಕಳ, ಜುಲೈ 27: ಪೇಂಟೆಡ್ ಮಸ್ತ್ ನೆತ್ತೆರ್ ದಾನ ಶಿಬಿರದ ಮುಖೇನ ಮಸ್ತ್ ಜನ ನೆತ್ತೆರ್ ದಾನಿಲು ನೆತ್ತೆರ್ ದಾನ ಮಲ್ತೊಂದು ಇತ್ತುಂಡಲ, ನೆತ್ತೆರ್ ದ ಅಗತ್ಯ ಉಪ್ಪುನಗ ಜಿಲ್ಲಾ ಪ್ರಮುಖ ಕೇಂದ್ರಗ್ ಪೋಪಿನ ಪರಿಸ್ಥಿತಿ ಉಂಡು. ಈ ನೆಲೆಟ್ಟ್ ಕಾರ್ಕಳ ತಾಲೂಕು ಕೇಂದ್ರಡ್ ಸೂಕ್ತವಾಯಿನ ನೆತ್ತೆರ್ ಸಂಗ್ರಹಣಾ ಕೇಂದ್ರ ಅಗತ್ಯ ಉಂಡು . ಅಂಚಾದ್ ತಾಲೂಕು ರೆಡ್ ಕ್ರಾಸ್ ಸಂಶ್ಥೆ ಪೂರ್ತಿ ಸಾಕಾರ ಕೊರ್ಪುಂಡು ಐತ ವ್ಯವಸ್ಥೆಗ್ ಸೂಕ್ತ ದಾನಿಲು ಕಾರ್ಕಳಡ್ ಉಲ್ಲೆರ್ ಪಂದ್ ಕಾರ್ಕಳ ತಾಲೂಕು ರೆಡ್ ಕ್ರಾಸ್ ಸೊಸೈಟಿ ಸಭಾಪತಿ ಡಾ. ಕೆ.ಆರ್. ಜೋಶಿ ಪಂಡೆರ್ .

ನಿಟ್ಟೆ ಕಲಂಬಾಡಿ ಪದವು ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆಡ್ ಬೇತೆ ಬೇತೆ ಸಂಘ ಸಂಸ್ಥೆದ ಆಶ್ರಯಡ್ ನಡತಿನ ಬೃಹತ್ ನೆತ್ತೆರ್ ದಾನ ಶಿರಬಿರನ್ ಉದಿಪನ ಮಲ್ತ್ ಆರ್ ಪಾತೆರಿಯೆರ್.

ಜಿಲ್ಲಾ ರಕ್ತ ನಿಧಿ ಕೇಂದ್ರದ ಡಾ. ವೀಣಾ, ಬೇತೆ ಬೇತೆ ಸಂಘದ ಸಂಸ್ಥೆದ ಮುಖಂಡೆರಾಯಿನ ಸಂತೋಷ್ ಕುಮಾರ್ ಜೈನ್, ಸುರೇಶ್ ನಾಯಕ್, ಬಾಲಕೃಷ್ಣ ಮೂಲ್ಯ, ಶ್ರೀಧರ್ ಸುವರ್ಣ, ಸಂತೋಷ್ ಕುಲಾಲ್, ರಮಾನಂದ ಪೂಜಾರಿ,ರಮಣಿ ಕುಲಾಲ್ ಪಾಲ್ ಪಡೆದಿತ್ತೆರ್.