ಜೈ ತುಲುನಾಡ್ (ರಿ ) ಕುಡ್ಲ ಎಗ್ಗೆ : ತುಲುವೆರೆ ಆಟಿದ ಲೇಸ್
ಕುಡ್ಲ : ತೇದಿ 7/8/2022 ನೇ ಐತಾರ ಕುಡ್ಲದ ಉರ್ವಾಸ್ಟೋರ್ ಡ್ ಉಪ್ಪುನ ಡಾ. ಬಿ. ಆರ್ ಅಂಬೇಡ್ಕರ್ ಭವನೊದ ಆರ್ನಾಲ್ಡ್ ತುಲುವೆ ಚಾವಡಿಡ್ ಜೈ ತುಲುನಾಡ್ (ರಿ ) ಕುಡ್ಲ ಎಗ್ಗೆ ಮೊಕ್ಲೆನ ಮುತಾಲಿಕೆಡ್ ತುಲುವೆರೆ ಆಟಿ, ಆಟಿಡೊಂತೆ ತೆಲಿತ್ ನಲಿಪುಗ, ಗೇನ ಪಟ್ಟೊನುಗ ಪನ್ಪಿನ ಲೇಸ್ ನಡತ್ಂಡ್. ಲೇಸ್ದ ಉದಿಪನನ್ ಹೋಟೆಲ್ ಡಿಂಕಿಡೈನ್ ನೆತ್ತ ಗುರ್ಕಾರ್ಲಾಯಿನ ಶ್ರೀ ಸ್ವರ್ಣ ಸುಂದರ್ ಮೇರ್ ನಡಪಾದ್ ಕೊರಿಯೆರ್.
ಲೇಸ್ದ ಗುರ್ಕಾರ್ಮೆನ್ ಜೈ ತುಲುನಾಡ್ ಸಂಘಟನೆದ ಗುರ್ಕಾರ್ಲಾಯಿನ ಶ್ರೀ ಅಶ್ವಥ್ ತುಲುವೆ ಮೇರ್ ವಹಿಸೊನ್ಡೆರ್ ಅಂಚನೆ ತುಲುವಪ್ಪೆಗ್ ಪುರ್ಪದೈತನ್ ಹೊಸಬೆಟ್ಟು 8 ನೆ ವಾರ್ಡ್ದ ಕಾಪೋರೇಟರ್ ಆಯಿನ ಶ್ರೀ ವರುಣ್ ಚೌಟೆರ್ ನಡಪಾದ್ ಕೊರಿಯೆರ್. ಮಾನದಿಗೆದ ಬಿನ್ನೆರ್ ಆದ್ ತುಳು ಸಾಹಿತ್ಯ ಅಕಾಡೆಮಿದ ಪದುಕೆರಾಯಿನ ಶ್ರೀಮತಿ ಕಾಂತಿ ಶೆಟ್ರ್, ಶಂಕರ್ ಅಡ್ಯಂತಾಯಾ ಕಾಲೇಜ್ದ ಪ್ರಾಂಶುಪಾಲೆರಾಯಿನ ಲಯನ್ ಡಾ.ನವೀನ್ ಶೆಟ್ಟಿ ಕೆ. ಈ ಲೇಸ್ಡ್ ಪಾಲ್ ಪಡೆದಿತ್ತೆರ್.ಅಂಚನೆ ಲೇಸ್ಗ್ ಮಲ್ಲ ಬಿನ್ನೆರ್ ಆದ್ ಮಾಜಿ ಶಾಸಕೆರಾಯಿನ ಶ್ರೀಮತಿ ಶಕುಂತಲಾ ಶೆಟ್ರ್ ಪಾಲ್ ಪಡೆದಿತ್ತೆರ್.
ಅಂಚನೆ ಮಾನದಿಗೆದ ಲೆಪ್ಪು ಬಿನ್ನೆರ್ ಆದ್ ಪುಗಾರ್ತೆದ ತುಳು ನಾಯಕ ನಟೆ ಶ್ರೀ ವಿನೀತ್ ಕುಮಾರ್ ಲೇಸ್ಡ್ ಪಾಲ್ ಪಡೆದ್ ತುಲು ಬಾಸೆ ಸಂಸ್ಕೃತಿದ ಮಿತ್ತ್ ಅರೆಗ್ ಉಪ್ಪುನ ಮೋಕೆದ ಬಗೆಟ್ ರಡ್ಡ್ ಪಾತೆರ ಪಂಡೆರ್.
ಕಾಂಡೆದ ಲೇಸ್ಡ್ ಕರ್ನಾಟಕ ತುಳು ಸಾಹಿತ್ಯ ಅಕಾಡಮಿದ ಗುರ್ಕಾರ್ಲಾಯಿನ ತುಳುವ ಬೊಳ್ಳಿ ಶ್ರೀ ದಯಾನಂದ ಕತ್ತಲ್ ಸಾರ್ ಆಟಿದ ಪೊಲಬು ಪಟ್ಟೊಂಡೆರ್.
ತುಲು ಬಾಸೆ, ಸಂಸ್ಕೃತಿದ ಬುಲೆಚ್ಚಿಲ್ ಗಾದ್ ಜೋಕುಲು ಬೊಕ್ಕ ಪೆರಿಯಾಕ್ಲೆಗ್, ಕೂಟ ಬೊಕ್ಕ ಸೋಲೋ ನಲಿಕೆದ ಪಂಥ, ಮಡಲ್ ಮೊಡೆಪುನ, ಕರ ದರ್ಪುನ, ಮೂಡೆ ಎಟ್ಟುನ ಪಂಥ ಅಟ್ಟನೆ ಮಲ್ತಿತ್ತೆರ್.
ಬಯ್ಯಗ್ ಮುಗಿತಲದ ಲೇಸ್ ನಡತ್ಂಡ್. ಶ್ರೀ ಕ್ಷೇತ್ರ ಕೇಮಾರುದ ಸಾಂಧಿಪನಿ ಸಾಧನಾಶ್ರಮದ ಸ್ವಾಮಿಲಾಯಿನ ಶ್ರೀ ಶ್ರೀ ಈಶ ವಿಠಲ ದಾಸ ಸ್ವಾಮಿಲು ಆಶೀರ್ವಾದದ ಮದಿಪು ಪಟ್ಟಿಯೆರ್. ಅಂಚನೆ ಪ್ರಾಧ್ಯಾಪಕೆರ್ ಬೊಕ ದೈವ ನರ್ತಕೆರ್, ಜೈ ತುಳುನಾಡ್ (ರಿ.) ಸಂಘಟನೆದ ಸಾಂಸ್ಕೃತಿಕ ನಿದಯಂತೆರ್ ಆಯಿನ ಶ್ರೀ ರವೀಶ್ ಪರವ ಪಡುಮಲೆ ಲೇಸ್ದ ಗುರ್ಕಾರ್ಮೆ ವಹಿಸ್ದಿತ್ತೆರ್. ಮಾನದಿಗೆದ ಬಿನ್ನೆರಾಯಿನ ಕುಡ್ಲ ತೆಂಕಾಯಿ ವಿಧಾನಸಭೆ ಕ್ಷೇತ್ರದ ಶಾಸಕೆರಾಯಿನ ಶ್ರೀ ಡಿ.
ವೇದವ್ಯಾಸ ಕಾಮತ್ ಮಾನದಿಗೆದ ನುಡಿ ಕೊರ್ದು ತುಲು ಬಾಸೆದ ಬುಲೆಚ್ಚಿಲ್ ಗಾದ್ ತುಲು ಲಿಪಿತ ಪುದರ್ ಪಲವೆನ್ ಸ್ಮಾರ್ಟ್ ಸಿಟಿ ಯೋಜನೆದಡಿ ಪಾಡುವೆ ಪನ್ಪಿನ ಭರವಸೆ ಕೊರಿಯೆರ್. ಮಾನಾದಿಗೆದ ಬಿನ್ನೆರ್ ಆದ್ ಕುಡ್ಲ ಮಹಾನಗರ ಪಾಲಿಕೆದ ಮಹಾಪೌರೆರಾಯಿನ ಪ್ರೇಮಾನಂದ ಶೆಟ್ರ್ ಪಾಲ್ ಪಡೆದಿತ್ತೆರ್. ಬಂಗ್ರ ಕೂಳೂರು 16 ನೇ ವಾರ್ಡ್ದ ಕಾರ್ಪೋರೇಟರ್ ಆಯಿನ ಶ್ರೀ ಕಿರಣ್ ಕುಮಾರ್ ಕೋಡಿಕಲ್ ಮೇರ್ ಲೇಸ್ಡ್ ಮಾನಾದಿಗೆದ ಬಿನ್ನೆರ್ ಆದ್ ಪಾಲ್ ಪಡೆದ್ ” ತನ್ನ ಕ್ಷೇತ್ರಡ್ ಆಪಿನ ಒವ್ವೆ ಕಜ್ಜಗ್ ತುಲು ಲಿಪಿತ ಪುದರ್ ಪಲವೆ ಪಾಡಾವೆ ಪಂದ್ ಭರವಸೆ ಕೊರಿಯೆರ್. ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಪದುಕೆರ್, ಅಳುಪ ವಂಶಸ್ತೆರಾಯಿನ ಡಾ. ಆಕಾಶ್ ರಾಜ್ ಜೈನ್ ಮೇರ್ ಲೇಸ್ಡ್ ತುಲು ಸಂಸ್ಕೃತಿದ ಪೊಲಬು ಪಟ್ಟುನ ಮುಖೇನ ಲೇಸ್ಡ್ ಮಾನಾದಿಗೆದ ನುಡಿ ಪಂಡೆರ್. ಮಲ್ಲ ಬಿನ್ನೆರ್ ಆದ್ ಪಾಲ್ ಪಡೆಯಿನ ಕುಡ್ಲದ ಪುಗಾರ್ತೆದ ತುಳು ಪತ್ರಿಕೆ ಟೈಮ್ಸ್ ಆಫ್ ಕುಡ್ಲದ ಪ್ರಧಾನ ಸಂಪಾದಕೆರ್ ಆಯಿನ ಎಸ್. ಆರ್ ಬಂಡಿಮಾರ್ ಈ ಲೇಸ್ಡ್ ತುಲು ಬಾಸೆ ಸಂಸ್ಕೃತಿ ಬುಲೆದ್ ಬತ್ತಿನ ರೀತಿ ಅಂಚನೆ ಐತ ಪೊಲಬುನು ಪಟ್ಟಿಯೆರ್.
ಮಲ್ಲ ಬಿನ್ನೆರ್ ಆದ್ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪಡೆಯಿನ, ಸಂಸ್ಕೃತಿ ಚಿಂತಕೆರಾಯಿನ ಡಾ. ಅರುಣ್ ಉಳ್ಳಾಲ್ ಆಟಿ ತಿಂಗೊಲ್ದ ಬಗೆಟ್ ಪಾತೆರ ಪಂಡೆರ್.
ಒಡಿಪು ಸಮೂಹ ಸಂಸ್ಥೆ ಮಣಿಪಾಲ ನೆತ್ತ ಉಪನ್ಯಾಸಕೆರ್ ಆಯಿನ ಶ್ರೀಮತಿ ಅರ್ಪಿತಾ ಪ್ರಶಾಂತ್ ಶೆಟ್ಟಿ ಕಟಪಾಡಿ ಮೇರ್ ಆನಿ ಕಾಲೊದ ಆಟಿ ತಿಂಗೊಲ್ದ ಅಂಚನೆ ಇತ್ತೆ ನಡಪುನ ಆಟಿದ ಲೇಸ್ದ ಬಗೆಟ್ ಮಾಹಿತಿ ಕೊರಿಯೆರ್. ಮಾನಾದಿಗೆದ ಲೆಪ್ಪು ಬಿನ್ನೆರ್ ಆದ್ ಪರ ಊರುದ ಪೊನ್ನು ಮಗಲ್, ತುಲು ಸಂಸ್ಕೃತಿದ ಮಿತ್ತ್ ಮೋಕೆ ದೀದ್ ಆಯಿತ ಬಗೆಟ್ ಕಲ್ತೊಂದುಪ್ಪುನ, ಯಕ್ಷಗಾನ ಕಲ್ಪಾರ್ತಿಯಾಯಿನ ಫುಲ್ ಬೈಟ್ ನೆಹರು ರಿಸರ್ಚ್ ಸ್ಮಾಲರ್ ಯುಎಸ್ ಎ ದ ಕೈಲಿ ರೋಜ್ ಸ್ಟೋಚ್ ಮೇರ್ ತುಲು ಬಾಸೆಡೆ ತನ್ನ ಪೊಲಬು ಪಟ್ಟೊನುನ ಮುಖೇನ ಲೇಸ್ಗ್ ನನಾತ್ ಪೊರ್ಲು ದಿಂಜಾಯೆರ್. ಮಾನದಿಗೆದ ಬಿನ್ನರ್ ಆದ್ ಜೈ ತುಳುನಾಡ್ ಸಂಘಟನೆದ ಗುರ್ಕಾರೆರಾಯಿನ ಶ್ರೀ ಅಶ್ವಥ್ ತುಲುವೆ ಪಾಲ್ ಪಡೆದಿತ್ತೆರ್ . 90 ವರ್ಸ ಪ್ರಾಯೊಡ್ಲಾ 40 ನಿಮಿಷ ಬುಡಂದೆ ಪಾಡ್ದನ ಪನ್ಪಿನ ಪೆರಿಯೆರಾಯಿನ ಅಪ್ಪಿ ಶೆಟ್ಟಿ ಕಿನ್ನಿಗೋಳಿ ಈ ಲೇಸ್ಡ್ ಮಾನಾದಿಗೆದ ಒತ್ತು ಪಾಲ್ ಪಡೆದಿತ್ತೆರ್.
ಈ ಪೊರ್ಲ ಲೇಸ್ಡ್ ಟೈಮ್ಸ್ ಆಫ್ ಕುಡ್ಲ ತುಲು ಪತ್ರಿಕೆದ ಸಂಪಾದಕೆರಾಯಿನ ಎಸ್. ಆರ್. ಬಂಡಿಮಾರ್ ಮೆರೆಗ್ ತುಲು ಮಾಧ್ಯಮ ಲೋಕದ *ತುಲುವ ನೇಸರೆ* ಪನ್ಪಿ ಬಿರ್ದ್ದೊಟ್ಟುಗು ಮಾನದಿಗೆ ನಡತುಂಡು. ಅಂಚನೆ ಗೇನ ಸಿರಿತ ಐಸಿರ ಆಯಿನ ತುಲುವೆ ಜ್ಞಾನೇಶ್ ದೇರಳಕಟ್ಟೆ ಮೆರೆಗ್ಲಾ ಮಾನದಿಗೆ ನಡತುಂಡು. ಪಾಡ್ದನ ಪಂಡ್ದ್ ಲೇಸ್ಗ್ ಪೊರ್ಲು ದಿಂಜಾಯಿನ ಪೆರಿಯಾರ್ ಅಪ್ಪಿ ಶೆಟ್ಟಿ ಕಿನ್ನಿಗೋಳಿ ಮೆರೆಗ್ ಮಾನಾದಿಗೆ ನಡತುಂಡು. ಅಂಚೆನೇ ಸಾಲೆಲೆಡ್ ತುಲು ಬಾಸೆದ ವಿಷಯ ಕಲ್ಪಾವೊಂದುಪ್ಪುನ ಕಲ್ಪಾದಿಲೆಗ್ ಆಟಿದ ತಮ್ಮನ ಬಲ್ಮನ ಈ ಸಂದರ್ಬುಡು ನಡತುಂಡು.
ಲೇಸ್ಡ್ ಅಟ್ಟನೆ ಆಯಿನ ನಲಿಕೆ ಬೊಕ್ಕ ತುಲುನಾಡ್ದ ಗೊಬ್ಬುದ ಪಂಥೊಡ್ ಶ್ರೀ ನರೇಶ್ ಸಸಿಹಿತ್ಲು, ಕುಮಾರಿ ಸ್ವಾತಿ ಬೊಕ್ಕ ಶ್ರೀಮತಿ ರೇಷ್ಮಾ ಶೆಟ್ಟಿ ಸಕಾಯ ಕೊರಿಯೆರ್.
ಉದಿಪನ ಲೇಸ್ಡ್ ಶ್ರೀಮತಿ ರಮ್ಯ ಕೊಂಚಾಡಿ ಬಿನ್ನೆರೆನ್ ಎದುಕೊನಿಯೆರ್ ಬೊಕ್ಕ ಕುಮಾರಿ ಚಿರಶ್ರೀ ಸೊಲ್ಮೆ ಸಂದೈತ ಮಲ್ತೆರ್. ಮುಗಿತಲದ ಲೇಸ್ಡ್ ಶ್ರೀಮತಿ ಗೀತಾ ಲಕ್ಷ್ಮೀಶ್ ಬಿನ್ನೆರೆನ್ ಎದುಕೊನಿಯೆರ್ ಬೊಕ್ಕ ಕುಮಾರಿ ದೀಕ್ಷಿತಾ ಮಧ್ಯ ಸೊಲ್ಮೆ ಸಂದೈತ ಮಲ್ತೆರ್. ಶ್ರೀ ಸುದರ್ಶನ್ ಸುರತ್ಕಲ್ ಬೊಕ್ಕ ಕುಮಾರಿ ಪೂರ್ಣಿಮಾ ಬಂಟ್ವಾಳ್ ಲೇಸ್ನ್ ಸುದಾರ್ತ್ ಕೊರಿಯೆರ್.
###
*ಇಸೇಸ ಆಕರ್ಷಣೆಡ್ ಪರವೂರುದ ತುಳುವೆದಿ*
ಮಾನದಿಗೆದ ಲೆಪ್ಪು ಬಿನ್ನೆರ್ ಆದ್ ಪರ ಊರ್ದರಾಂಡಲಾ ತುಲುವಪ್ಪೆನ ಮಿತ್ತ್ ಮೋಕೆ ದೀದ್ ತುಲುಕಾದ್ ಬೆನ್ನಿ ಬೆನೊಂದು ಉಪ್ಪುನ ಫುಲ್ ಬೈಟ್ ನೆಹರು ರಿಸರ್ಚ್ ಸ್ಕಾಲರ್ ಯುಎಸ್ ಎ ದ ಕೈಲಿ ರೋಜ್ ಸ್ಟೋಜ್ ಮೇರ್ ತುಲು ಬಾಸೆಡೆ ತನ್ನ ಪೊಲಬು ಪಟ್ಟೊನುನ ಮುಖೇನ ಲೇಸ್ಗ್ ನನಾತ್ ಪೊರ್ಲು ದಿಂಜಾಯೆರ್. ತಾನ್ ಪರ ಊರ್ದಲಾಂಡಲ ತುಲು ಬಾಸೆ, ಸಂಸ್ಕೃತಿದ ಬುಲೆಚ್ಚಿಲ್ಗಾದ್ ದಾದ ಆಂಡಲಾ ಕೊಡುಗೆ ಕೊರೊಡು ಪನ್ಪಿನ ನೆಲೆಟ್ಟ್ ತುಲುಕಾದ್ ಬೆನ್ನಿ ಬೆನೊಂದು ಉಲ್ಲೆರ್ ಬೊಕ್ಕ ತುಲು ರಾಜ್ಯದ ಅಧಿಕೃತ ಬಾಸೆ ಆವೊಡು 8ನೇ ಪರಿಚ್ಛೇದೊಗು ಸೇರೊಡು ಪಂದ್ ಬಿನ್ನೈತೊಂಡೆರ್. ತುಲುನಾಡ್ಡೆ ಪುಟ್ಟು ಬಲತ್ತ್ ಅಪ್ಪೆ ಬಾಸೆ ತುಲುನು ಪಾತೆರೆರೆ ಪಿರ ನರ್ಗುನ ನಮ್ಮ ಜವನೆರೆಗ್ ಮೇರ್ ಮಾದರಿ ಆಯೆರ್.
