ಕೊರೊನಾ

ಕೊರೊನಾ ಲಾಕ್ ಡೌನ್ ಪೊರ್ತುಡ್ ನಿರ್ಗತಿಕೆರ್ನ ಬಡಾವು ತೆಕ್ಕಾದ್ ಮಾನವೀಯತೆ ಮೆರೆಯಿನ‌ ಒಡಿಪುದ ಅನ್ಸಾರ್ ಅಹಮದ್ ಬೊಕ್ಕ ಕೂಟ

ಒಡಿಪು, ಎಪ್ರಿಲ್ 29: ಕೊರೊನಾ ಮಹಾಮಾರಿಡಾದ್ ಲಾಕ್ ಡೌನ್ ಪೊರ್ತುಡ್ ಹೋಟೆಲ್ ಪೂರಾ ಬಂದ್ ಉಪ್ಪುನೆಡ್ದಾವರ ಕಾಸ್ ಇತ್ತಿನಕುಲ್ ಪಾರ್ಸೆಲ್ ಕೊನೊದ್ ತಿನುವೆರ್.ಆಂಡ ರಸ್ತೆಡ್ ಬತ್ತಿನಕಲೆಡ್ ಹೋಟೇಲ್ ದಕಲೆಡ ಭಿಕ್ಷೆ ಬೇಡೊಂದ್ ತಿನೊಂದಿತ್ತಿನಕುಲು ಲಾಕ್ ಡೌನ್ ಪೊರ್ತುಡ್ ಗತಿದಾಂತೆ ಬಂಜಿದ ಬಡಾವುಗಾದ್ ಪರದಾಡುನ ಪರಿಸ್ಥಿತಿ ಬೈದುಂಡ್.ಅಕಲೆಗ್ ಬಂಜಿದ ಬಡಾವು ತೆಕ್ಕಾವುನ ಬೇಲೆ ಮಲ್ತೊಂದುಲ್ಲೆರ್ ಒಡಿಪುದ ಅನ್ಸಾರ್ ಅಹಮದ್..ಅನ್ಸಾರ್ ಮೇರ್ ಕರಿನ ಸರ್ತಿ ಲಾಕ್ ಡೌನ್ ಆಯಿನ ಪೊರ್ತುಡ್ ಒಂಜಿ ತಿಂಗೊಲ್ ಇಡೀ ಸಾದಿಡ್ ತಿರ್ಗೊಂದಿತ್ತಿನಕಲೆಗ್ ವನಸ್ ದ ವ್ಯವಸ್ಥೆ ಮಲ್ತುದಿತ್ತೆರ್..ಈ ಸರ್ತಿ ಭಿಕ್ಷುಕೆರೆಗ್ ,ಮಾನಸಿಕ ಅಸ್ವಸ್ಥೆರೆಗ್,ಗತಿದಾಂತೆನಕಲೆಗ್ ಬಂಜಿದ ಬಡಾವು ತೆಕ್ಕಾವೊಂದುಲ್ಲೆರ್..ಮೆರೆನ ಈ ಎಡ್ಡೆ ಬೇಲೆಗ್ ಒಡಿಪುದ ದಾನಿಲು ಸಹಕಾರ ಕೊರೊಂದುಲ್ಲೆರ್.

ನಿರಂತರ ಸಮಾಜಸೇವೆಡ್ ತ್ರಪ್ತಿ ಪಡೆಯುನ ಅನ್ಸಾರ್ ಮೆರೆನ ಈ ಬೇಲೆನ್ ನಿಜವಾದುಲಾ ಮೆಚ್ಚೊಡಾಯಿನವು.

ಮುಸ್ಲಿಂ ಬಾಂಧವೆರಾಯಿನ ಅನ್ಸಾರ್ ಅಹಮದ್ ಇತ್ತೆ ರಮ್ಜಾನ್ ದ ಪೊರ್ತುಡ್ ತಾನ್ ಉಪವಾಸ ಇತ್ತುಂಡಲಾ ನಿರ್ಗತಿಕೆರ್ ಬಂಜಿಗ್ ದಾಂತೆ ಉಪ್ಪರೆ ಬಲ್ಲಿ ಪಂಡುದ್ ತನ್ನ ದೋಸ್ತಿಲೆನ ಒಟ್ಟುಡ್ ಸೇರೊಂದ್ ಈ ಎಡ್ಡೆ ಕಜ್ಜೊನ್ ಮಲ್ತೊಂದುಲ್ಲೆರ್..ಮೊಕಲೆನ ಎಡ್ಡೆ ಕಜ್ಜೊಗ್ ದೇವೆರ್ನ ಬೆರಿಬಲ ಉಪ್ಪಡ್ ಪಂಡುದ್ ನಮ ನಟ್ಟೊನುಗಾ.ಕೋಡೆ ಸುಮಾರ್ 250 ಜನ ನಿರ್ಗತಿಕೆರೆಗ್ ವನಸ್ ದ ವ್ಯವಸ್ಥೆ ಮಲ್ತುದೆರ್.ಕೊರೊನಾ ಲಾಕ್ ಡೌನ್ ಮುಗಿಯಮುಟ್ಡ ಒಡಿಪುಡುಪ್ಪುನ ಗತಿದಾಂತಿನಕಲೆಗ್ ವನಸ್ ದ ವ್ಯವಸ್ಥೆನ್ ಈ ಜವನೆರೆನ ತಂಡ ಮಲ್ಪುವೆರೆಗೆ.