ಕುಡ್ಲ

ತೋಕೂರುಡು ಆಟಿದ ನೆಂಪು ಲೇಸ್

ಹಳೆಯಂಗಡಿ : ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ, ಕುಡ್ಲ ಬೊಕ್ಕ ಜಿಲ್ಲೆ, ರಾಜ್ಯ ಬೊಕ್ಕ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಪುಗರ್ತೆ ಪಡೆಯಿನ ತೋಕೂರುದ ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ಸ್ಪೋರ್ಟ್ಸ್ ಕ್ಲಬ್(ರಿ), ತೋಕೂರು ಉಂದೆತ್ತ ನಿಲೆಟ್ ಐತಾರದಾನಿ ಕ್ಲಬ್ ದ ಚಾವಡಿಡ್ ಆಟಿದ ನೆಂಪು ಲೇಸ್ ನಡತ್ಂಡ್.
ಸಿರಿ-ಸಿಂಗಾರೊಡು ಐತ ಮಲ್ದಿನ ಮಿತ್ತರ್ಮೆಡ್ ತುಳು ಸಾಹಿತ್ಯ ಅಕಾಡೆಮಿದ ಪದುಕೆರ್ ನಾಗೇಶ್ ಕುಲಾಲ್, ಗೋವಿಂದ ದಾಸ ಕಾಲೇಜ್ ದ ಕನ್ನಡ ಉಪಾನ್ಯಾಸಕೆರಾಯಿನ ಅಕ್ಷತಾ ನವೀನ್ ಕುಮಾರ್ ಎಡ್ಮೆಮಾರ್, ಸ್ಪೋರ್ಟ್ಸ್ ಕ್ಲಬ್ ದ ಗೌರವ ಗುರ್ಕಾರ್ಲು ನಾರಾಯಣ ಜಿ. ಕೆ., ಗುರ್ಕಾರ್ಲು ಸಂತೋಷ್ ದೇವಾಡಿಗ, ಮಹಿಳಾ ಕಾರ್ಯಾಧ್ಯಕ್ಷೆ ವಾಣಿ ಮಹೇಶ್ ಇತ್ತೆರ್.
ಅಕ್ಷತಾ ನವೀನ್ ಕುಮಾರ್ ಎಡ್ಮೆಮಾರ್ ತುಡರ್ ಅರ್ಲಾದ್ ಲೇಸ್ ಉದಿಪನ ಮಲ್ತ್ ದ್ , ತುಳುನಾಡ್ ದ ಆಟಿ ತಿಂಗೊಲ್ದ ಆಚರಣೆ, ಜೀವೊಗು ತ್ರಾಣ ಕೊರ್ಪಿನ ತೆನಸುಲು ಉಂದೆತ ವಿಚಾರೊಡು ಪಾತೆರಿಯೆರ್.

ಲೇಸ್ ದ ಗುರ್ಕಾರ್ಲು ನಾಗೇಶ್ ಕುಲಾಲ್ ಪಾತೆರ್ದ್, ಪಿರಾಕ್ಡ್ ನಮ್ಮ ಪೂರ್ವಿಕೆರ್ ಆಚರಣೆ ಮಲ್ತೊಂದು ಬೈದಿನ ಆಟಿ ತಿಂಗೊಲ್ದ ನಂಬೊಲಿಗೆನು ನನ ದುಂಬಗು ನಮ ಒರಿಪಾವೊಂದು ಪೋವೊಡು ಪಂಡೆರ್.
ಆಟಿ ತಿಂಗೊಲ್ದ ವಿಶೇಷವಾಯಿನ 34 ಬಗೆತ ತೆನಸ್ ಲೆನ್ ಸ್ಪೋರ್ಟ್ಸ್ ಕ್ಲಬ್ ದ ಪದುಕೆರ್ ಮಾತ ಸೇರ್ದ್ ತಯಾರ್ ಮಲ್ತ್ ದ್ ಬತ್ತಿ ಬಿನ್ನೆರೆಗ್ ಮೋಕೆಡ್ ಬಲಸಿಯೆರ್.
ಈ ಪೊರ್ತುಡು ಯುವ ಸಬಲೀಕರಣ ಬೊಕ್ಕ ಕ್ರೀಡಾ ಇಲಾಖೆದ ಅಧಿಕಾರಿ ಪ್ರದೀಪ್ ಡಿ. ಸೋಜ, ಪಡುಪಣಂಬೂರು ಗ್ರಾಮ ಪಂಚಾಯತ್ ದ ಗುರ್ಕಾರ್ದಿ ಮಂಜುಳಾ, ಒತ್ತು ಗುರ್ಕಾರ್ದಿ ಕುಸುಮಾ, ಸದಸ್ಯೆರ್, ಬೊಕ್ಕ ಸಿಬ್ಬಂದಿ ವರ್ಗದಕುಲ್, ತೋಕೂರು ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರಾಯಿನ ಹರಿದಾಸ್ ಭಟ್, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ, ಕುಡ್ಲದ ಪದುಕೆರಾಯಿನ ನರೇಂದ್ರ ಕೆರೆಕಾಡು, ಸ್ಪೋರ್ಟ್ಸ್ ಕ್ಲಬ್ ದ ನನ ದುಂಬುದ ಗೌರವ ಗುರ್ಕಾರ್ಲು
ಆಯಿನ ಮೋಹನದಾಸ್, ಮಹಿಳಾ ಸಮಿತಿದ ನನ ದುಂಬುದ ಗುರ್ಕಾರ್ದಿ, ಶೋಭಾ ಅಂಚನ್ ಬೊಕ್ಕ ಬೇತೆ ಸಂಘ ಸಂಸ್ಥೆದ ಪದುಕೆರ್, ಸ್ಪೋರ್ಟ್ಸ್ ಕ್ಲಬ್ ದ ಪದುಕೆರ್, ಊರುದ ಹಿರಿಯೆರ್, ಕಿರಿಯೆರ್ ಮಾತೆರ್ಲ ಈ ಲೇಸ್ ಡ್ ಪಾಲ್ ಪಡೆದ್ ಇತ್ತೆರ್.
ಸ್ಪೋರ್ಟ್ಸ್ ಕ್ಲಬ್ ದ ಗುರ್ಕಾರ್ಲು ಸಂತೋಷ್ ದೇವಾಡಿಗ ಬತ್ತಿ ಬಿನ್ನೆರೆನ್ ಎದ್ಕೊಂಡೆರ್. ಸುಧೀಕ್ಷಾ, ಸಮೀಕ್ಷಾ , ನಿಖಿತಾ ದೇವೆರೆನ್ ಸುಗಿತೆರ್. ಆಟಿದ ತೆನಸುಲು ಬೊಕ್ಕ ಅವೆನ್ ಮಲ್ದಿನಕ್ಲೆನ ಪುದರ್ ನ್ ನೀಮಾ ಓದಿಯೆರ್. ಕಾರ್ಯಾಧ್ಯಕ್ಷೆರಾಯಿನ ಸುರೇಶ್ ಶೆಟ್ಟಿ ಮೇರ್ ಲೇಸ್ ನಡಪಾದ್ ಕೊರಿಯೆರ್.