ಕುಡ್ಲ

ಶ್ರೀ ಆಮ್ರ ಕೂಷ್ಮಾಂಡಿನಿ ವೃಕ್ಷ – ತ್ಯಾಗಿಲೆನ ತಪೋವನ ಕಟ್ಟೆ ಉದಿಪನದ ಲೇಸ್

ಕಾರ್ಲ : ಕಾರ್ಕಳ ದಾನಶಾಲಾ ಮಠದ ಪರಮಪೂಜ್ಯ ಸ್ವಸ್ತಿಶ್ರೀ ಲಲಿತಕೀರ್ತಿ ಭಟ್ಟಾರಕ ಪಟ್ಟಾಚಾರ್ಯವರ್ಯ ಮಹಾ ಸ್ವಾಮೀಜಿಲೆನ ಪಾವನ ಸಾನಿಧ್ಯಡ್ ಅಂಚನೇ ಶ್ರೀ ಕ್ಷೇತ್ರ ಧರ್ಮಸ್ಥಳದ ಮಾತೃಶ್ರೀ ಹೇಮಾವತಿ ವಿ ಹೆಗ್ಗಡೆರ್ನ ಮಾರ್ಗದರ್ಶನದಲಕ ಮಠತ ಬಸದಿಡ್ ಆಮ್ರ ಕೂಷ್ಮಾಂಡಿನಿ ದೇವಿಗ್ ಆರಾಧನಾ ಪೂರ್ವಕ ಕಲಾರೋಪಣೆ ಬೊಕ್ಕ ತ್ಯಾಗಿ ಭವನದ ಕೈತಲ್ ಶ್ರೀ ಆಮ್ರ ಕೂಷ್ಮಾಂಡಿನಿ ವೃಕ್ಷ – ತ್ಯಾಗಿಲೆನ ತಪೋವನ ಕಟ್ಟೆನ್ ಉದಿಪನ ಮಲ್ಪುನ ಲೇಸ್ ತಾರೀಖ್ 24.08.2021ನೇ ಅಂಗಾರೆ ದಾನಿ ಅತಿಶಯ ಕ್ಷೇತ್ರ ಕಾರ್ಕಳದ ಜೈನ ಮಠಟ್ ನಡತುಂಡು.

ಮಧ್ಯಾಹ್ನ ಮಠದ ಬಸದಿಡ್ ಆಮ್ರ ಕೂಷ್ಮಾಂಡಿನಿ ದೇವಿಗ್ ಆರಾಧನಾ ಪೂರ್ವಕ ಕಲಾರೋಪಣ ಪೂಜಾ ಲೇಸ್ ಧಾರ್ಮಿಕ ವಿಧಿ ವಿಧಾನದೊಟ್ಟುಗು ಸಂಪನ್ನ ಆಂಡ್ .ಐರ್ದ್ ಬೊಕ್ಕ ನಡತಿನ
ತ್ಯಾಗಿಲೆನ ತಪೋವನ ಕಟ್ಟೆನ್ ಪರಮ ಪೂಜ್ಯ ಸ್ವಾಮೀಜಿಲು ಬೊಕ್ಕ ಸೇರ್ದಿ ಬಿನ್ನೆರ್ ತುಡರ್ ಅರ್ಲಾದ್ ಕಟ್ಟೆನ್ ಲೋಕಾರ್ಪಣೆ ಮಲ್ತೆರ್ . ಈ ಪೊರ್ತುಡು ನಡತಿನ ಸಭಾ ಕಾರ್ಯಕ್ರಮಡ್ ಸ್ವಾಮೀಜಿಲು ತಮ್ಮ ಆಶೀರ್ವಚನಡ್ ಲೋಕಾರ್ಪಣೆ ಆಯಿನ ತಪೋವನ ಕಟ್ಟೆ ದುಂಬುದ ದಿನಟ್ ಕ್ಷೇತ್ರಗ್ ಬರ್ಪಿನ ತ್ಯಾಗಿಲು ಧ್ಯಾನಮಗ್ನರಾಯೆರೆ ಸೂಕ್ತ ಜಾಗೆ ಆತುಂಡು ಪಂದ್ ಪನೊಂದು ಆಮ್ರ ಕೂಷ್ಮಾಂಡಿನಿ ದೇವಿನ ಮಹಿಮೆನ್ ಪಂಡೆರ್ .

ಲೇಸ್ ಡ್ ಮಲ್ಲ ಬಿನ್ನೆರ್ ಆದ್
ಶ್ರೀಮತಿ ಅರುಣಾ ರಾಜೇಂದ್ರ ಕುಮಾರ್, ಶ್ರೀಮತಿ ಶಶಿಕಲಾ ಕೆ ಹೆಗ್ಡೆ, ಶ್ರೀಮತಿ ಸುಜಾತ ನೇಮಿರಾಜ ಆರಿಗ ಪಾಲ್ ಪಡೆದಿತ್ತೆರ್ . ಲೇಸ್ ನ್ ಉದ್ದೇಶಿಸಾದ್ ಪಾತೆರಿನ ಶ್ರೀಮತಿ ಶಶಿಕಲಾ ಕೆ ಹೆಗ್ಡೆ ಮೇರ್ ತ್ಯಾಗಿಲೆನ ನಿರಂತರ ಸೇವೆ ಮಲ್ಪುನವು ಶ್ರಾವಕರಾಯಿನ ನಮ್ಮ ಆದ್ಯ ಕರ್ತವ್ಯ ಆತುಂಡು . ದುಂಬುದ ದಿನಟ್ ಇಂಚಿನ ಕಾರ್ಯ ನಡತೊಂದು ಉಪ್ಪಡ್ ಪಂದ್ ಎಡ್ಡೆಪ್ಪುದ ಪಾತೆರ ಪಂಡೆರ್.
ಸಭಾ ಕಾರ್ಯಕ್ರಮಡ್ ಕು. ಅಭಿಷ್ಟಾ ಪ್ರಾರ್ಥನೆ ಮಲ್ತೆರ್ , ವಿನಯ ಉದಯ್ ಕುಮಾರ್ ಬತ್ತಿ ಬಿನ್ನೆರೆನ್ ಎದುಕೊಂಡೆರ್ . ಶ್ರೀಮತಿ ಶ್ರದ್ಧಾ ಲೇಸ್ ನಡಪಾದ್ ಕೊರಿಯೆರ್. ಶ್ರೀಮತಿ ವಾಣಿಶ್ರೀ ಮೃತ್ಯುಂಜಯ ಸೊಲ್ಮೆ ಸಂದೈತ ಮಲ್ತೆರ್ . ಶ್ರೀ ಸುರೇಶ್ ಇಂದ್ರ ಶಾಂತಿ ಮಂತ್ರ ಪಂಡೆರ್ .

ಶ್ರೀ ಸಿಎ. ಪ್ರಭಾತ್ ಕುಮಾರ್ ಬೊಕ್ಕ ಶ್ರೀಮತಿ ರಕ್ಷಾ ಪ್ರಭಾತ್ ಕುಮಾರ್ ಪೂಜಾ ಕರ್ತೃಲಾದ್ ಅಂಚನೇ ಶ್ರೀ ಪದ್ಮರಾಜ ಅತಿಕಾರಿ, ಶ್ರೀಮತಿ ತಿಲಕ ಪದ್ಮರಾಜ್ ಅತಿಕಾರಿ ಬೊಕ್ಕ ಕುಟುಂಬದಕುಲು ಸಂಘ ಸಂತರ್ಪಣೆದ ದಾನಿಲಾದ್ ಸೇವೆ ಮಲ್ತೆರ್ .
ಈ ಪೊರ್ತುಡು ಶ್ರೀ ಮಹಾವೀರ್ ಹೆಗ್ಡೆ ಅಂಡಾರು, ಶ್ರೀ ಸಂಪತ್ ಸಾಮ್ರಾಜ್ಯ, ಶ್ರೀ ಜಗದೀಶ್ ಹೆಗ್ಡೆ, ಶ್ರೀ ಶಿಶುಪಾಲ ಜೈನ್ ಶ್ರೀ ಕ್ಷೇತ್ರ ಧರ್ಮಸ್ಥಳ, ಶ್ರೀ ಆದಿರಾಜ್ ಅಜ್ರಿ, ಶ್ರೀ ಕುಮಾರಯ್ಯ ಹೆಗ್ಡೆ, ಶ್ರೀ ವಿಖ್ಯಾತ್ ಜೈನ್, ಶ್ರೀ ವೀರೇಂದ್ರ ಜೈನ್, ಕಾರ್ಕಳ ಜೈನ ಸಂಘ ಸಂಸ್ಥೆದ ಪದುಕೆರ್ , ಪುರೋಹಿತ ವರ್ಗದಕುಲು ಕಾರ್ಕಳ ಪುರಸಭೆತ ಅಧಿಕಾರಿಲು , ಕಾರ್ಕಳ ನಗರ ಠಾಣೆದ ಪೊಲೀಸ್ ಅಧಿಕಾರಿಲು , ಊರ ಶ್ರಾವಕ ಶ್ರಾವಿಕೆನಕುಲು ಮಠದ ವ್ಯವಸ್ಥಾಪಕೆರಾಯಿನ ಶ್ರೀ ಧನಕೀರ್ತಿ ಕಡಂಬ ಪಾಲ್ ಪಡೆದಿತ್ತೆರ್ ಪಂದ್ ಶ್ರೀ ಜೈನ ಮಠ, ಕಾರ್ಕಳ ದ ವ್ಯವಸ್ಥಾಪಕೆರಾಯಿನ
ಶ್ರೀ ಧನಕೀರ್ತಿ ಕಡಂಬ ಪಂಡೆರ್
.

ಪುತ್ತೂರುಡು ಶಾಲೆ ಸುರು ಮಲ್ಪುನ ಬಗ್ಗೆ ಚರ್ಚೆ : ಶಾಸಕ ಮಠಂದೂರು

ಪುತ್ತೂರು: ದಕ್ಷಿಣ ಕನ್ನಡ ಜಿಲ್ಲೆದ ಕೋವಿಡ್ ಪಾಸಿಟಿವಿಟಿ ದರಟ್ ಪುತ್ತೂರು ಪೇಂಟೆಡ್ ಅತಿ ಕಮ್ಮಿ ಉಪ್ಪುನೆರ್ದಾವರ ಶೇ.1.94 ಪಾಸಿಟಿವಿಟಿ ದರ ಉಂಡು . ಈ ನೆಲೆಟ್ಟ್ ದುಂಬುದ ದಿನಟ್ಟ್ ಶಾಲೆ ಸುರು ಮಲ್ಪುನ ಬಗ್ಗೆ ಚಿಂತನೆ ನಡಪಾವ ಪಂದ್ ಶಾಸಕ ಸಂಜೀವ ಮಠಂದೂರು ಪಂಡೆರ್ .

ಕೆಎಂಸಿ ಮಣಿಪಾಲಗ್ ಎಎಚ್‌ಪಿಐರ್ದ್ ಮಾನದಿಗೆ

ಒಡಿಪು : ಮಣಿಪಾಲ ಕಸ್ತೂರ್‌ಬಾ ಆಸ್ಪತ್ರೆ ಅಸೋಸಿಯೇಷನ್ ಆಫ್ ಹೆಲ್ತ್‌ಕೇರ್ ಪ್ರೊವೈಡರ್ಸ್ ಆಫ್ ಇಂಡಿಯಾ (ಎಎಚ್‌ಪಿಐ)ರ್ದ್ ಆರೋಗ್ಯದ ಶ್ರೇಷ್ಠತೆಗಾದ್ ಕೊರ್ಪಿನ 2021ನೇ ಸಾಲ್ ದ ನರ್ಸಿಂಗ್ ಎಕ್ಸಲೆನ್ಸ್ ಮಾನದಿಗೆ ಪಡೆತುಂಡು.

ಕಸ್ತೂರ್‌ಬಾ ಮೆಡಿಕಲ್ ಕಾಲೇಜ್ ದ ಡೀನ್ ಡಾ.ಶರತ್ ಕೆ ರಾವ್ ಮೇರ್ , ಕೆಎಂಸಿ ಮಣಿಪಾಲದ ನರ್ಸಿಂಗ್ ಸೇವೆದ ಗುರ್ಕಾರ್ಲಾಯಿನ ಶುಭ ಸೂರಿಯ ಮೆರೆಗ್ ಮಾನದಿಗೆ ಮಲ್ತೆರ್ .

ಫೈರಿಂಗ್ ಆಪಿನೆನ್ ಕಣ್ಣಾರೆ ತೂಯಿನ ದಿನೇಶ್ ರೈ

ಕುಡ್ಲ : ತಾಲಿಬಾನ್ ಲೆನ ಕಪಿಮುಷ್ಠಿಗ್ ತಿಕ್ಕ್ ದ್ ಅಪ್ಘಾನಿಸ್ತಾನರ್ದ್ ಕುಡ ತಾಯ್ನಾಡ್ ಗ್ ಬತ್ತಿನ ಭಾರತೀಯೆರ್ ಅಲ್ಪದ ಪರಿಸ್ಥಿತಿದ ಭಯಾನಕ ಸ್ಥಿತಿತ ಬಗ್ಗೆ ಪಾತೆರಿಯೆರ್ .

ಕುಡ್ಲದ ಬಜಪೆ ನಿವಾಸಿ ದಿನೇಶ್ ರೈ ಮೇರ್ ನ್ಯಾಟೋ ಮಿಲಿಟರಿ ಪಡೆತ ಒಟ್ಟುಗು ಬೇಲೆ ಮಲ್ತೊಂದು ಇತ್ತೆರ್ , ಅಪ್ಘಾನಿಸ್ತಾನರ್ದ್ ಸುರಕ್ಷಿತವಾದ್ ದೇಶಗ್ ಪಿರ ಬೈದೆರ್ . ಐರ್ದ್ ಬೊಕ್ಕ ಮಾಧ್ಯಮದಕ್ಲೆನೊಟ್ಟುಗಿ ಪಾತೆರಿನ ಆರ್ ಅಪ್ಘಾನಿಸ್ತಾನದ ಪರಿಸ್ಥಿತಿನ್ ಪಂಡೆರ್ .

ಕಾಬೂಲ್ ವಿಮಾನ ನಿಲ್ದಾಣಡ್ ವಿಮಾನ ಅಪಹರಣ

ಕಾಬೂಲ್: : ಅಫ್ಘಾನಿಸ್ತಾನಡ್ ಉಪ್ಪುನ ಉಕ್ರೇನ್ ಪೌರೆರೆನ್ ಲೆತೊಂದು ಬರಿಯರೆ ಕಾಬೂಲ್ ವಿಮಾನ ನಿಲ್ದಾಣಗ್ ಬತ್ತಿನ ಉಕ್ರೇನ್ ವಿಮಾನನ್ ಇತ್ತೆ ಅಪಹರಣ ಮಲ್ದೆರ್ .

ಉಕ್ರೇನ್ ವಿಮಾನನ್ ಅಪಹರಣ ಮಲ್ತಿನ ಕಲ್ವೇರ್ ಇತ್ತೆ ಇರಾನ್ಗ್ ಪತೊಂದು ಪೋತೆರ್ ಪಂದ್ ವರದಿಯಾತುಂಡು .

ಉಕ್ರೇನ್ ಉಪ ವಿದೇಶಾಂಗ ಸಚಿವ ಯೆನಿನ್ ಮೆರೆನ್ ಉಲ್ಲೇಖಿಸಾದ್ ರಷ್ಯಾದ ತಾಸ್ ಸುದ್ದಿ ಸಂಸ್ಥೆ ಈ ವರದಿ ಕೊರ್ತುಂಡು .

ಬಂದೂಕು ಕ್ಲೀನ್ ಮಲ್ಪುನಗ ಮಿಸ್ ಫೈರಿಂಗ್ ಆದ್ ಸೈತಿನ ಪೊಲೀಸ್

ದಾವಣಗೆರೆ : ಬಂದೂಕು ನಿರ್ಮಲ ಮಲ್ಪುನಗ ಮಿಸ್ ಫೈರಿಂಗ್ ಆದ್ ಪೊಲೀಸ್ ಸೈತಿನ ಘಟನೆ ದಾವಣಗೆರೆ ಜಿಲ್ಲೆದ ಡಿಎಆರ್ ಶಸ್ತ್ರಾಸ್ತ್ರಗಾರಡ್ ನಡತುಂಡು .ಆರ್. ಚೇತನ್ (28) ತೀರ್ ಪೋಯಿನ ಡಿಎಆರ್ ಪೊಲೀಸ್. ಚನ್ನಗಿರಿ ತಾಲೂಕುದ ಮಲಹಾಳ್ ಗ್ರಾಮದ ನಿವಾಸಿಯಾಯಿನ ಮೇರ್ , 2012 ಬ್ಯಾಚ್‌ಡ್ ಪೊಲೀಸ್ ಇಲಾಖೆಗ್ ಆಯ್ಕೆಯಾದಿತ್ತೆರ್ .

ಪೊಲೀಸ್ ಬಂದೂಕು ನಿರ್ಮಲ ಮಲ್ಪುನಗ ಮಿಸ್ ಫೈರಿಂಗ್ ಆದ್ ಚೇತನ್ ನ ನಾಲಿಗ್ ಬುಲೆಟ್ ಬೂರ್ದುಂಡು . ಅಪಗನೆ ಚಿಕಿತ್ಸೆಗಾದ್ ಖಾಸಗಿ ಆಸ್ಪತ್ರೆಗ್ ಕೊನೊಪಿನ ದುಂಬೇ ತೀರ್ ಪೋತೆರ್.

ಗೋವಡ್ ಪುನ ಆದ್ ತಿಕ್ಕಿನ ‘ಕಾಂಚನ -3’ ನಟಿ ಅಲೆಕ್ಸಾಂಡ್ರಾ ಜಾವಿ

ಗೋವಾ : 2019ಟ್ಟ್ ತಮಿಳ್ ಡ್ ಬತ್ತಿನ ‘ಕಾಂಚನ 3’ ಸಿನಿಮಾಡ್ ನಟನೆ ಮಲ್ದಿನ ನಟಿ ಅಲೆಕ್ಸಾಂಡ್ರಾ ಜಾವಿ ಅನುಮಾನಾಸ್ಪದವಾದ್ ಗೋವಾಡ್ ತೀರ್ ಪೋತೆರ್ .ಮೆರ್ನ ಸಾವು ಆತ್ಮಹತ್ಯೆ ನ ಪನ್ಪಿನವು ಮಿತ್ತ್ ಗ್ ತೊಜಿಂಡಲ ಈ ಬಗ್ಗೆ ತನಿಖೆ ಸುರು ಮಲ್ದೆರ್ .

ಅಲೆಕ್ಸಾಂಡ್ರಾ ರಷ್ಯಾದಾರ್ ಆತೆರ್ , ಅಲ್ಪದ ಉತ್ತರ ಊರಾದ ಗೋವನ್‌ಡ್ ವಾಸ ಆದಿತ್ತೆರ್ . ಇಂಚೋಗು ಮೇರ್ ಖಿನ್ನತೆ ಡ್ ಇತ್ತೆರ್ ಪಂದ್ ತೆರಿದ್ ಬೈದುಂಡು.

ತೆಲಂಗಾಣದ ರಾಜ್ಯಪಾಲೆರಾದ್ ಯಡಿಯೂರಪ್ಪ ನೇಮಕ ಆಪಿನ ಸಾಧ್ಯತೆ

ಕರ್ನಾಟಕ : ಕರ್ನಾಟಕದ ಮಾಜಿ ಮುಖ್ಯಮಂತ್ರಿ ಬಿಎಸ್ ಯಡಿಯೂರಪ್ಪ ತೆಲಂಗಾಣಡ್ ದುಂಬುದ ರಾಜ್ಯಪಾಲೆರಾಪಿನ ಸಾಧ್ಯತೆ ಉಂಡು ಪನ್ಪಿನ ಮಾಹಿತಿ ಬೈದುಂಡು . ಇತ್ತೆ ರಾಜ್ಯಪಾಲೆಯಾಯಿನ ತಮಿಳ್ಳೆ ಸೌಂದರ್ಯರಾಜನ್ ಮೆರೆನ್ ಪುದುಚೇರಿದ ಲೆಫ್ಟಿನೆಂಟ್ ಗವರ್ನರ್ ಆದ್ ನೇಮಕ ಮಲ್ದೆರ್ . ಈ ನೆಲೆಟ್ಟ್ ಕುಡೊಂಜಿ ಸ್ಥಾನಗ್ ಬಿಎಸ್‌ವೈ ನೇಮಕ ಆಪಿನ ಸಾಧ್ಯತೆ ಜಾಸ್ತಿ ಉಂಡು .

ಹೈಕಮಾಂಡ್ ಮೂಲದ ಪ್ರಕಾರ, ಯಡಿಯೂರಪ್ಪ ಮಾಲೀವ್ ರಜೆರ್ದ್ ಪಿರ ಬತ್ತಿ ಕೂಡ್ಲೆ ಕೇಂದ್ರ ಸರ್ಕಾರ ಅರೆನ್ ರಾಜ್ಯಪಾಲೆರಾದ್ ನೇಮಕ ಮಲ್ಪುನ ಬಗ್ಗೆ ಅಂತಿಮ ನಿರ್ಧಾರ ದೆತೊನುನ ಸಾಧ್ಯತೆ ಉಂಡು ಪಂದ್ ಪಂಡೆರ್.