ಒಡಿಪು : ಸುಗುಣೇಂದ್ರತೀರ್ಥ ಶ್ರೀಪಾದೆರ್ ತನ್ನ ಚತುರ್ಥ ಪರ್ಯಾಯದ ಪರವಾದ್ ಮಲ್ತಿನ ಕೋಟಿ ಗೀತಾ ಲೇಖನಯಜ್ಞದ ಕೋಟಿ ಲೇಖನ ಬೂಕುದ ಮೆರವಣಿಗೆ ರಥಬೀದಿಡ್ ನಡತುಂಡು .
ಕೋಟಿ ಲೇಖನ ಬೂಕುದ ಇಂಗ್ಲಿಷ್ ಆವೃತ್ತಿನ್ ಶ್ರೀ ಅದಮಾರು ಮಠದ ಪೆರಿಯ ಶ್ರೀಪಾದೆರಾಯಿನ ಶ್ರೀ ಶ್ರೀ ವಿಶ್ವಪ್ರಿಯತೀರ್ಥ ಶ್ರೀಪಾದೆರ್ ಅಂಚನೆ ಕನ್ನಡ ಆವೃತ್ತಿನ್ ಶ್ರೀ ಪೇಜಾವರ ಮಠದ ಶ್ರೀ ಶ್ರೀ ವಿಶ್ವಪ್ರಸನ್ನತೀರ್ಥ ಶ್ರೀಪಾದೆರ್ ಮಹತೋಭಾರ ಶ್ರೀ ಅನಂತೇಶ್ವರ ದೇವಲ್ಯೋಡು ಬುಡುಗಡೆ ಮಲ್ತೆರ್.
ಈ ಲೇಸ್ ದ ಗುರ್ಕಾರ್ಲಾಯಿನ ಪರಮಪೂಜ್ಯ ಶ್ರೀ ಶ್ರೀ ಸುಗುಣೇಂದ್ರ ತೀರ್ಥ ಶ್ರೀಪಾದೆರ್ ಎಡ್ಡೆಪುದ ನುಡಿ ಪಂಡೆರ್.
ಕುಡ್ಲ : ಕುಡ್ಲ ಉತ್ತರ ವಿಧಾನ ಸಭಾ ಕ್ಷೇತ್ರದ ಶಾಸಕಕೆರಾಯಿನ ಡಾ. ಭರತ್ ಶೆಟ್ಟಿ ವೈ ಮೇರ್ ಶನಿವಾರ ಕುಡ್ಲದ ಮಿನಿ ವಿಧಾನಸೌಧಡ್ ಉಪ್ಪುನ ತಾಲೂಕು ಕಚೇರಿಗ್ ಪನಂದೆ ಭೇಟಿ ಕೊರಿಯೆರ್ .
ಕಂದಾಯ ವಿಭಾಗ ಭೂಮಿ ವಿಭಾಗ, ಸ್ವೀಕೃತಿ ಕೇಂದ್ರ ಬೊಕ್ಕ ದಾಖಲೆ ವಿಭಾಗಗ್ ಭೇಟಿ ಕೊರ್ದು ಪರಿಶೀಲನೆ ಮಲ್ತೆರ್ .
ದಾಖಲೆ ಕೇಂದ್ರೊಡು ಕೊರ್ಪಿನ ದಾಖಲೆಲು ತಿಕ್ಕoದೆ ಅವೆತೋ ಸಲ ತಿರ್ಗುನ ಪರಿಸ್ಥಿತಿ ಉಂಡು ಪಂದ್ ಸಾರ್ವಜನಿಕೆರ್ ದೂರು ಕೊರಿಯೆರ್.
ಕುಡ್ಲ : ಕುಡ್ಲದ ಟೌನ್ ಹಾಲ್ ಕೈತಲ್ ಉಪ್ಪುನ ಫುಟ್ಬಾಲ್ ಮೈದಾನದ ಪ್ರವೇಶ ದ್ವಾರದ ಕೈತಲ್ ಮರಕ್ ತೂ ಪಾರ್ದಿನ ಘಟನೆ ನಡತ್oಡ್ . ಕೆಲ ದಿನತ ಪಿರವು ಅಲಂಗಾರುದ ಕೈತಲ್ ಇಂಚಿನ ಪ್ರಕರಣ ಆದ್ ಇತ್ತುಂಡು ಐರ್ದ್ ಬೊಕ್ಕ ಪರಿಸರವಾದಿ ಬೊಕ್ಕ ಉಪ ಮೀಸಲು ಅರಣ್ಯಾಧಿಕಾರಿಲು ಜಾಗೆಗ್ ಬತ್ತ್ ದ್ ತೂ ತೆಕ್ಕಯೆರೆ ಪ್ರಯತ್ನ ಮಲ್ತ್ ಇತ್ತೆರ್. . ಇತ್ತೇ ಟೌನ್ ಹಾಲ್ ಬಳಿಕೈತಲ್ಲಾ ಇಂಚಿನನೇ ಘಟನೆ ನಡತ್oಡ್ ,. ಈ ಬಗ್ಗೆ ಬರ್ಕೆ ಪೊಲೀಸ್ ಠಾಣೆಡ್ ಪ್ರಕರಣ ದಾಖಲ್ ಆತುಂಡು.
ಕಾರ್ಲ : ಜೆಸಿಐ ಕಾರ್ಲದ ಪದಗ್ರಹಣ ಲೇಸ್ ತಾರಿಕ್ 7.3.2022 ನೇ ಸೋಮಾರ ಬೈಯ್ಯಗ್ 7 ಗಂಟೆಗ್ ಜೆಸಿಸ್ ಇಂಗ್ಲಿಷ್ ಮೀಡಿಯಂ ಸ್ಕೂಲ್ ಕಾರ್ಲಡ್ ನಡಪರೆ ಉಂಡು .
ಜೆಸಿ.ಡಾ.ಮುರಳಿಧರ್ ಭಟ್ ಪೊಸ ಗುರ್ಕಾರ್ಲಾದ್ , ಜೆಸಿ ಶ್ವೇತಾ ಜೈನ್ ಮೇರ್ ಕಾರ್ಯದರ್ಶಿಯಾದ್ ಆಯ್ಕೆ ಆತೆರ್ .
ಕಾರ್ಲ : ಶ್ರೀ ಲಕ್ಷ್ಮಿ ಅಂಬಾಭವಾನಿ ದೇವಸ್ಥಾನ ದುರ್ಗ ದೇವಸ್ಥಾನದ ಪ್ರತಿಷ್ಠಾ ವರ್ಧಂತಿ ಬೊಕ್ಕ ಚಂಡಿಕಾಯಾಗ ತಾರಿಕ್ 12/03/2022 ನೇ ಸನಿಯಾರ ನಡಪರೆ ಉಂಡು ಅವ್ವೆ ದಿನ ರಾತ್ರಿ 9 ಗಂಟೆಗ್ ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರಿ ಕೃಪಾಪೋಷಿತ ದಶಾವತಾರ ಯಕ್ಷಗಾನ ಮಂಡಳಿ ಮುಲ್ಕಿ ಮೆಕ್ಲೆನೆರ್ದ್ ಶ್ರೀದೇವಿ ಮಾರಿಯಮ್ಮ ಯಕ್ಷಗಾನ ನಡಪರೆ ಉಂಡು.
ಒಡಿಪು : ಯುದ್ಧ ಪೀಡಿತ ಉಕ್ರೇನ್ದ ಖಾರ್ಕೀವ್ ನೇಶನಲ್ ಮೆಡಿಕಲ್ ಯುನಿವರ್ಸಿಟಿದ ಕಡೆತ ವರ್ಷದ ಮೆಡಿಕಲ್ ವಿದ್ಯಾರ್ಥಿ ರೋಹನ್ ಧನಂಜಯ್ ಮೇರ್ ಇನಿ ಕಾಂಡೆ ಭಾರತ ಸರಕಾರ ಅಟ್ಟನೆ ಮಲ್ತಿನ ವಿಮಾನೊಡು ಡೆಲ್ಲಿ ದ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಗ್ ಬತ್ತೆರ್.
ಉಕ್ರೇನ್ರ್ದ್ ಬುಧಾರ ಪೊಲೆಂಡ್ಗ್ ಬತ್ತಿನ ಮೇರ್ ಕೋಡೆ ನಡುರಾತ್ರಿ 1:00 ಗಂಟೆಗ್ ಅಲ್ಪರ್ದ್,ಭಾರತಗ್ ಬೈದೆರ್ ಇನಿ ಕಾಂಡೆ ರಾಜ್ಯ ಸರಕಾರ ವ್ಯವಸ್ಥೆ ಮಲ್ತಿನ ವಿಮಾನೋಡು ರಾತ್ರಿ 9:30ಕ್ ಮೇರ್ ಬೆಂಗ್ಳೂರು ಮುಟ್ಟೆರೆ ಉಲ್ಲೆರ್ ಪಂದ್ ರೋಹನ್ ತಂದೆ ಬ್ರಹ್ಮಾವರ ಕೃಷಿ ವಿಜ್ಞಾನ ಕೇಂದ್ರದ ಮುಖ್ಯಸ್ಥ ಡಾ.ಬಿ. ಧನಂಜಯ್ ಪಂಡೆರ್ .
ಉಳ್ಳಾಲ: ಉಳ್ಳಾಲ ದರ್ಗಾ ಉರೂಸ್ ಪ್ರಯುಕ್ತ ಶುಕ್ರವಾರ ಕುದ್ರೋಳಿ ಗೋಕರ್ಣನಾಥ ಕ್ಷೇತ್ರದ ಕೋಶಾಧಿಕಾರಿ ಬೊಕ್ಕ ಗುರು ಬೆಳದಿಂಗಳು ಸೇವಾ ಸಂಸ್ಥೆದ ಗುರ್ಕಾರ್ಲಾಯಿನ ಪದ್ಮರಾಜ ಆರ್. ಭೇಟಿ ಕೊರ್ದು ಎಡ್ಡೆಪ್ಪುನು ಬಯಕಿಯೆರ್ .
ಮೆರೆಗ್ ದರ್ಗಾದ ಗುರ್ಕಾರ್ಲಾಯಿನ ಹಾಜಿ ಅಬ್ದುಲ್ ರಶೀದ್ ಶಾಲ್ ಪಾರ್ದ್ ಮಾನದಿಗೆ ಮಲ್ತೆರ್.ಈ ಪೊರ್ತುಡು ಕಾರ್ಯದರ್ಶಿ ರಾಜೇಶ್ ಸುವರ್ಣ, ಭವಿತ್ ಬಂಗೇರ, ಫಾರೂಕ್ ಉಳ್ಳಾಲ್, ಅಹ್ಮದ್ ಬಾವ ಕೊಟ್ಟಾರ, ಅಹ್ಮದ್ ಬಾವ ಕೋಡಿ, ಅಯ್ಯೂಬ್ ಮಂಚಿಲ ಪಾಲ್ ಪಡೆದಿತ್ತೆರ್ .
ಬಂಟ್ವಾಳ :ಶ್ರೀ ನಾಗಬ್ರಹ್ಮ ಅದಿಮೋಗೆರ್ಕಳ ಸೇವಾ ಸಮಿತಿ ನಿನ್ನಿಪಡ್ಪು(ರಿ )ದ ಲೆಪ್ಪೋಲೆ ಬುಡುಗಡೆ ಲೇಸ್ 13/02/2022 ಐತಾರ ಕಾಂಡೆ 9 ಗಂಟೆಗ್ ದೈವಸ್ಥಾನದ ಎದುರು ಬುಡುಗಡೆ ಆಂಡ್.
ಈ ಲೇಸ್ ಡ್ ಕೋಡಿ ಕೇಶವ ಪೂಜಾರಿ ಸೊಲ್ಮೆ ಸಂದೈತ ಮಲ್ತೆರ್ . ಕೃಷ್ಣ್ಣಪ್ಪ ಪೂಜಾರಿ ನಾಟಿಬೀದಿ ಲೆಪ್ಪೋಲೆ ಬುಡುಗಡೆ ಮಲ್ತೆರ್.
ಈ ಪೊರ್ತುಡು ರವಿ ಅಂಚನ್ ಅಬೇರೊಟ್ಟು ಗ್ರಾ. ಪ ಸದಸ್ಯೆರ್ ಕೃಷ್ಣ್ಣಪ್ಪ ನಾಯ್ಕ್ ಬರ್ಸಗುರಿ ಮಾಜಿ ಉಪಾಧ್ಯಕ್ಷೇರ್,(APMC),ಸಮಿತಿಯ ಗೌರವಧ್ಯಕ್ಷೆರಾಯಿನ ಬಾಬು ಮಾಸ್ತರ್, ಗುರ್ಕಾರ್ಲಾಯಿನ ನೋಣಯ, ಕಾರ್ಯದರ್ಶಿಯಾಯಿನ ನಾಗೇಶ್, ಹಿರಿಯ ಸಲಹೆಗಾರೆರಾಯಿನ ಅಣ್ಣು ಮೇಸ್ತ್ರಿ ಕೊಪ್ಪಳಕೋಡಿ, ಸಂಕಪ್ಪ. ಕೆ, ಮತ್ತು ಸಮಿತಿದ ಸರ್ವ ಸದಸ್ಯೆರ್ ಪಾಲ್ ಪಡೆದಿತ್ತೆರ್.
ಕುಡ್ಲ : ಹಿಂದುತ್ವದ ಸಿದ್ದಾಂತದ ನೆಲೆಟ್ಟ್ ಸದಾ ಧಾರ್ಮಿಕ ,ಸಾಂಸ್ಕೃತಿಕ ಬೊಕ್ಕ ಸಾಮಾಜಿಕ ಸಮಾಜಮುಖಿ ಕಾರ್ಯನ್ ಉಭಯ ರಾಜ್ಯೊಲೆಡ್ ಮಲ್ತೊಂದು ಬೈದಿನ ಚಕ್ರವರ್ತಿ ಸೂಲಿಬೆಲೆನ ಮುತಾಲಿಕೆದ ಸಂಸ್ಥೆಯಾಯಿನ ಯುವ ಬ್ರಿಗೇಡ್ ಮೀರಾ ಭಯಂದರ್ ಇಂಚೋಗು ಶಿವಮೊಗ್ಗಡ್ ಮುಸ್ಲಿಂ ಮತಾಂಧರ ಕ್ರೂರತೆಗ್ ಬಲಿಯಾಯಿನ ಬಜರಂಗದಳ ದ ಕಾರ್ಯಕರ್ತೆ ಹರ್ಷ ಮೆರೆನ ಕುಟುಂಬಗ್ ಸರಿ ಸುಮಾರ್ 40 ಸಾರ ರೂಪಾಯಿದ ಪಣವುದ ಸಾಕರನ್ ಯುವ ಬ್ರಿಗೇಡ್ ಕೂಟದ ಸರ್ವ ಸದಸ್ಯೆರ್ನ ಸಕಾರೊಡು ಕೊರಿಯೆರ್ .
ಬೆಂಗ್ಳೂರು: ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ತನ್ನ ಸುರುತ ಬಜೆಟ್ ನ್ ದುಂಬು ದೀತೆರ್ , ಒಡಿಪು , ಕುಡ್ಲ, ಉತ್ತರ ಕನ್ನಡ, ಶಿವಮೊಗ್ಗಡ್ ಶ್ರೀ ನಾರಾಯಣ ಗುರು ವಸತಿ ಶಾಲೆ ಸುರು ಮಲ್ಪರೆ ಗ್ರೀನ್ ಸಿಗ್ನಲ್ ಕೊರ್ತೆರ್ .
ಒಡಿಪು, ಕುಡ್ಲ , ಉತ್ತರ ಕನ್ನಡ, ಶಿವಮೊಗ್ಗಡ್ ಶ್ರೀ ನಾರಾಯಣ ಗುರು ವಸತಿ ಶಾಲೆ ಸುರು ಆಯರೆ ಉಂಡು ಪಂದ್ ಮುಖ್ಯಮಂತ್ರಿ ಘೋಷಣೆ ಮಲ್ತೆರ್ , ಶಿಕ್ಷಣ ಇಲಾಖೆಗ್ ಬಜೆಟ್ಡ್ 31,980 ಕೋಟಿ ರೂಪಾಯಿ ಅನುದಾನ ಪಟ್ಟ್ ದ್ ಕೊರ್ತೆರ್ .
ಸಮಾಜ ಸುಧಾರಕ ಬ್ರಹ್ಮಶ್ರೀ ನಾರಾಯಣ ಗುರುಕ್ಲೆನ ಸ್ತಬ್ಧ ಚಿತ್ರನ್ ಗಣರಾಜ್ಯ ಉಚ್ಚಯದ ಸಮಿತಿ ತಿರಸ್ಕಾರ ಮಲ್ದಿನೆಕ್ಕ್ ದೇಶ, ರಾಜ್ಯೋಡು ಅವ್ವೆತೋ ಪ್ರತಿಭಟನೆ ನಡತ್oಡ್ , ಈ ವಿಚಾರ ಇತ್ತೇ ರಾಜಕೀಯವಾದ್ ಭಾರೀ ಸೊರ ಲಕ್ಕಾದುಂಡು , ಇತ್ತೇ ನಾರಾಯಣ ಗುರು ಟ್ಯಾಬ್ಲೋ ವಿವಾದಗ್ ರಾಜ್ಯ ಸರ್ಕಾರ ಮರ್ದ್ ಅರೆತಿನೇರ್ದಾವರ , ಒಡಿಪು, ಕುಡ್ಲ ಉತ್ತರ ಕನ್ನಡ, ಶಿವಮೊಗ್ಗಡ್ ಶ್ರೀ ನಾರಾಯಣ ಗುರು ವಸತಿ ಶಾಲೆ ಸುರು ಮಲ್ಪರೆ ಗ್ರೀನ್ ಸಿಗ್ನಲ್ ಕೊರ್ತೆರ್ .
ನನ ರಾಜ್ಯೋಡು ವಿನೂತನ ಮಾದರಿದ 7 ವಿಶ್ವವಿದ್ಯಾಲನ್ ಸುರು ಮಲ್ಪರೆ ಉಲ್ಲೆರ್ , ಚಾಮರಾಜನಗರ, ಬೀದರ್, ಹಾವೇರಿ, ಹಾಸನ, ಕೊಡಗು, ಕೊಪ್ಪಳ, ಬೊಕ್ಕ ಬಾಗಲಕೋಟೆಡ್ ಪೊಸ ವಿಶ್ವವಿದ್ಯಾಲಯ ಸುರು ಆಯೆರೆ ಉಂಡು ಪಂದ್ ಸಿಎಂ ಬೊಮ್ಮಾಯಿ ಪಂಡೆರ್ .
