ಕರ್ನಾಟಕ : ರಾಜ್ಯೋದ ಪ್ರಾಥಮಿಕ ಬೊಕ್ಕ ಪ್ರೌಢ ಶಾಲೆದ 2021-22ನೇ ಸಾಲ್ದ ಶೈಕ್ಷಣಿಕ ಚಟುವಟಿಕೆಲೆನ್ ಮುಗಿಪುನ ಅಂಚನೆ 2022-23ನೇ ಸಾಲ್ದ ಶೈಕ್ಷಣಿಕ ಚಟುವಟಿಕೆಲೆನ್ ಸುರು ಮಲ್ಪುನ ಪಟ್ಟಿನ ಸಾರ್ವಜನಿಕ ಶಿಕ್ಷಣ ಇಲಾಖೆ ಬುಡುಗಡೆ ಮಲ್ದೆರ್ .
2021-22ನೇ ಸಾಲ್ದ 1 ರ್ದ್ 9ನೇ ತರಗತಿದ ವರ್ಷದ ಪರೀಕ್ಷೆ ಮಾರ್ಚ್ 24ರ್ದ್ ಸುರು ಆಯರೇ ಉಂಡು . ಆತೆ ಅತ್ತoದೆ ಪ್ರಾಥಮಿಕ ಬೊಕ್ಕ ಪ್ರೌಢ ಶಾಲೆಗ್ ಬೇಸಿಗೆ ರಜೆ ಏಪ್ರಿಲ್ 10ರ್ದ್ ಸುರು ಆಯೆರೆ ಉಂಡು . ಈ ಬಗ್ಗೆ ಸಾರ್ವಜನಿಕ ಶಿಕ್ಷಣ ಇಲಾಖೆದ ಆಯುಕ್ತೆರ್ ಶೈಕ್ಷಣಿಕ ಚಟುವಟಿಕೆದ ಪಟ್ಟಿನ್ ಪ್ರಕಟ ಮಲ್ದೆರ್ .
ಕರ್ನಾಟಕ : ರಷ್ಯಾ ಬೊಕ್ಕ ಉಕ್ರೇನ್ ನಡುಟು ದಾಳಿ ನಡತೊಂದು ಉಂಡು , ಈ ನಡುಟು ಕರ್ನಾಟಕದ 10 ಜನ ಜೋಕುಲು ಉಕ್ರೇನ್ ಡ್ ಉಲ್ಲೆರ್ ಪಂದ್ ಮಾಹಿತಿ ಉಂಡು .
ಉಕ್ರೇನ್ ಡ್ ಬೆಂಗ್ಳೂರುದ ಜೋಕುಲು ಲಾಕ್ ಆತೆರ್ , ಇಲ್ಲದಕುಲು ಪೋಡಿಗೆಡ್ ಉಲ್ಲೆರ್ . ಪ್ರಸ್ತುತ ದಾಳಿಡ್ ತಿಕೋಲ್ದು ಬೂರ್ಡಿನ ಜೋಕ್ಲೆನ ಇಲ್ಲದಕುಲು ವಾಟ್ಸ್ ಆ್ಯಪ್ ವೀಡಿಯೋ ಕಾಲ್ ಮುಖೇನ ಸಂಪರ್ಕಡ್ ಉಲ್ಲೆರ್ . ಕಾಂಡೆರ್ದ್ ಬಾಂಬ್ ಬ್ಲಾಸ್ಟ್ ದ ಸೊರ ಕೇಂದ್ ಬರೊಂದು ಉಂಡು , ಜೋಕುಲು ಸುರಕ್ಷಿತವಾದ್ ಉಲ್ಲೆರ್ ಪಂದ್ ಜೋಕುಲು ಪಂತೆರ್ .
ಜೋಕುಲು ಭಾರತಗ್ ಬರಿಯೆರೆ ವಿಮಾನ ಇಜ್ಜಂದೆ ಉಪ್ಪುನೆರ್ದಾವರ ಪಿರ ಬರಿಯೆರೆ ಬಂಗ ಬರೊಂದು ಉಲ್ಲೆರ್. ಸುದ್ದಿ ತೆರಿನ ಅಧಿಕಾರಿಳು ಜೋಕ್ಲೆನ ಇಲ್ಲದಕ್ಲೆಗ್ ಧೈರ್ಯ ಕೊರ್ತೆರ್ .ಸಿಎಂ ಬೊಮ್ಮಾಯಿ ಈ ಬಗ್ಗೆ ಮಾಧ್ಯಮದ ಒಟ್ಟಿಗೆ ಪಾತೆರ್ದೆರ್ , ಜೋಕ್ಲೆನ ಒಟ್ಟಿಗೆ ವಿದೇಶಾಂಗ ಕಾರ್ಯದರ್ಶಿ ನಿರಂತರ ಸಂಪರ್ಕಡ್ ಉಲ್ಲೆರ್ ಪಂದ್ ಪಂತೆರ್ .
ಕುಡ್ಲ : ರಷ್ಯಾ-ಉಕ್ರೇನ್ ಲಡಾಯಿ ಸಮರದಂಚಿ ಪೋವೊಂದು ಉಂಡು , ಈ ನಡುಟು ಉಕ್ರೇನ್ ಡ್ ಕುಡ್ಲದ ಜನಕುಲು ಉಲ್ಲೆರ್ ಅತ್ತ್oಡ ಅಲ್ಪ ತಿಕ್ಕ್ ದ್ ಬೂರ್ದು ಇತ್ತ್oಡ ಅಕ್ಲೆನ ಬಗ್ಗೆ ಮಾಹಿತಿ ಕೊರೊಡು ಪಂದ್ ದಕ್ಷಿಣ ಕನ್ನಡ ಜಿಲ್ಲಾಡಳಿತ ಬಿನ್ನಾಪು ಮಲ್ದುಂಡು .
ಈ ಬಗ್ಗೆ ಏರ್ಲ ನಮ್ಮಕುಲು ಅಲ್ಪ ಬಂಗಡ್ ಇತ್ತ್oಡ ಮಾಹಿತಿ ಕೊರ್ಲೆ ,ಅಲ್ಪ ಉಪ್ಪುನಕುಲು ಅಂಚನೆ ಅಕ್ಲೆನ ಕುಟುಂಬದಕುಲು ಸೀದಾ ಜಿಲ್ಲಾಡಳಿತಗ್ ಲೆಪ್ಪು ಕೊರೋಲಿ ಪಂದ್ ಜಿಲ್ಲಾಧಿಕಾರಿ ಡಾ.ರಾಜೇಂದ್ರ ಕೆ.ವಿ ಪಂಡೆರ್.
ಕುಡ್ಲ : ಐಕಳಬಾವ ಕಾಂತಾಬಾರೆ ಬೂದಾಬಾರೆ ಕುಂಬಳ ಸಮಿತಿ, ಐಕಳ ಬೊಕ್ಕ ಮುಂಬಯಿ ವತಿರ್ದ್ ಫೆ. 26ಕ್ಕ್ ನಡಪುನ ಐಕಳ ಕಂಬುಲ ಉಚ್ಚಯೋಡು ದ.ಕ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ಬೊಕ್ಕ ಕರ್ನಾಟಕ ರಾಜ್ಯ ಸಹಕಾರ ಮಾರಾಟ ಮಹಾಮಂಡಳದ ಗುರ್ಕಾರ್ಲಾಯಿನ ಡಾ| ಎಂ.ಎನ್. ರಾಜೇಂದ್ರ ಕುಮಾರ್ ಮೆರೆಗ್ “ಸಾಧನ ಚಕ್ರವರ್ತಿ’ ಪ್ರಶಸ್ತಿ ಕೊರಿಯೆರೆ ಉಲ್ಲಾ ಪಂದ್ ಕಂಬುಲ ಉಚ್ಚಯ ಸಮಿತಿದ ಗುರ್ಕಾರ್ಲಾಯಿನ ಐಕಳಬಾವ ದೇವಿಪ್ರಸಾದ್‌ ಶೆಟ್ಟಿ ಬೆಳಪು ಪಂತೆರ್ .
ಎಸ್‌ಸಿಡಿಸಿಸಿ ಬ್ಯಾಂಕ್ ಗುರ್ಕಾರ್ಲಾದ್ 28 ವರ್ಷರ್ದ್ ಸಹಕಾರ ಕ್ಷೇತ್ರೊಡು ಸಾರ್ಥಕ ಸೇವೆ ಮಲ್ತೊಂದು ಉಪ್ಪುನ ಡಾ| ರಾಜೇಂದ್ರ ಕುಮಾರ್ ಬ್ಯಾಂಕ್ನ್ “ಜನಸ್ನೇಹಿ’ ಬ್ಯಾಂಕಕ್ ಆದ್ ರೂಪಿಸಾಯಿನ ಪುಗಾರ್ತೆ ಪಡೆತೆರ್ . ಗ್ರಾಮೀಣ ಪ್ರದೇಶೊಡು ಬ್ಯಾಂಕಿಂಗ್‌ ಸೇವೆದ ಪರಿಕಲ್ಪನೆನ್ ಅನುಷ್ಠಾನ ಮಲ್ತ್ ಸಹಕಾರಿ ರಂಗಗ್ ಪೊಸ ಆಯಾಮ ಕಂತ್ ಕೊರಿನಾರ್.
ಬಂಟ್ವಾಳ : ಶ್ರೀ ಮಂತ್ರದೇವತಾ ಕ್ಷೇತ್ರ ಸಾನಿದ್ಯ ಕಟ್ಟೆಮಾರು ಡ್ ತಾರೀಖ್ 27/2/2022 ನೇ ಐತಾರ ದಾನಿ ರಾತ್ರಿ 11 ಗಂಟೆರ್ದ್ ದೊಂದಿ ಬೊಲ್ಪುಡು ಶ್ರೀ ಮಂತ್ರ ದೇವತೆ ದೈವದ ವರ್ಷದ ಕೋಲಉಚ್ಚಯ ಬೊಕ್ಕ ತಾರೀಖ್ 28/2/2022 ನೇ ಸೋಮಾರ ದಾನಿ ರಾತ್ರಿ 8 ಗಂಟೆರ್ದ್ ಸ್ವಾಮಿ ಕೊರಗಜ್ಜ ಬೊಕ್ಕ ಶ್ರೀ ಗುಳಿಗ ದೈವದ ಕೋಲಾ ನಡಪರೇ ಉಂಡು ಪಂದ್ ಪ್ರಕಟಣೆಡ್ ಪಂತೆರ್.
ಕಾರ್ಲ : ಸ್ವಚ್ಛ ಕಾರ್ಲ ಬ್ರಿಗೇಡ್ ನ 100ನೇ ಸ್ವಚ್ಛತಾ ಅಭಿಯಾನ ಸಭಾ ಲೇಸ್ ಕಾರ್ಕಳ ರಾಮಸಮುದ್ರ ಡ್ ಫೆ. 27 ನೇ ಐತಾರ ಬೈಯ್ಯಗ್ 3:30ರ್ದ್ ನಡಪೆರೆ ಉಂಡು . ಕುಡ್ಲ ರಾಮಕೃಷ್ಣ ಮಿಷನ್‌ನ ಸ್ವಾಮಿ ಏಕಗಮ್ಯಾನಂದ ಜೀ ಪಾಲ್ ಪಡೆಯೆರೆ ಉಲ್ಲೆರ್ . ಅವ್ವೆ ದಿನ ಕಾಂಡೆ 7 ಗಂಟೆರ್ದ್ 8 ಗಂಟೆ ಮುಟ ಏಕಕಾಲಗ್ 100ರ್ದ್ ಜಾಸ್ತಿ ಕೂಟದ ಸಾಕಾರೊಡು ಸ್ವಚ್ಛತಾ ಕಾರ್ಯ ನಡಪೆರೆ ಉಂಡು..
ಕಾರ್ಲ : ಕರಿನ ರಡ್ಡ್ ವರ್ಷರ್ದ್ ಸೋಂಕುರ್ದು ಅಸ್ವಸ್ಥರಾದ್ ಮಾನವ ಕುಲ ಕುಗ್ಗುದು ಪೋತುಂಡು . ಈ ಮಹಾಮಾರಿಗ್ ಪ್ರೀತಿ ಪಾತ್ರೆರ್ ಬಲಿಯಾತೆರ್ . ನನಾತ್ ಜನ ಈ ಸೋಂಕುರ್ದು ನರಕ ಬರೊಂದು ಉಲ್ಲೆರ್ . ಅಸ್ವಸ್ಥೆರ್ನ ಆರೈಕೆಡ್ ಕುಗ್ಗುದು ಪೋಯಿನ ನಮ್ಮ ಜೀವನ ಪಾವನ ಪಂದ್ ಬಳ್ಳಾರಿ ಧರ್ಮಪ್ರಾಂತದ ಧರ್ಮಾಧ್ಯಕ್ಷ ಡಾ. ಹೆನ್ರಿ ಡಿ’ಸೋಜಾ ಪಂಡೆರ್ .
ಮೇರ್ ಫೆ. 22ಕ್ಕ್ ಅತ್ತೂರು ಸಂತ ಲಾರೆನ್ಸ್ ಬಸಿಲಿಕದ ವಾರ್ಷಿಕ ಉಚ್ಚಯದ ಮೂಜನೇ ದಿನ ಪ್ರಮುಖ ಬಲಿಪೂಜೆ ಮಲ್ತ್ ಪಾತೆರಿಯೆರ್ . ವಂ. ಫ್ರಾನ್ಸಿಸ್ ಕರ್ನೆಲಿಯೊ, ಕೆನ್ಯೂಟ್‌ ಬಾರ್ಬೊಜಾ, ರೆಜಿನಾಲ್ಡ್ ಪಿಂಟೊ, ಸಿಲ್ವೆಸ್ಟರ್ ಡಿ’ಕೋಸ್ಟಾ, ಮುಲ್ಕಿ ಬಲಿಪೂಜೆ ನಡಪಾದ್ ಕೊರಿಯೆರ್ .
ಬುಧವಾರ ಕಾಂಡೆ 8, 10, 12 ಗಂಟೆಗ್ ಬೊಕ್ಕ ಮಧ್ಯಾಹ್ನ 2, 4 ಬೊಕ್ಕ 7 ಗಂಟೆಗ್ ಬಲಿಪೂಜೆ ನಡಪೆರೆ ಉಂಡು.
ಬಂಟ್ವಾಳ : ಶ್ರೀ ನಾಗಬ್ರಹ್ಮ ಅದಿಮೋಗೆರ್ಕಳ ಸೇವಾ ಸಮಿತಿ ನಿನ್ನಿಪಡ್ಪು(ರಿ )ನರಿಕೊಂಬು ಬಂಟ್ವಾಳದ ಲೆಪ್ಪೋಲೆ ದ ಉದಿಪನದ ಲೇಸ್ ತಾರೀಖ್ 13/02/2022 ನೇ ಐತಾರ ಕಾಂಡೆ 9ಗಂಟೆಗ್ ದೈವಸ್ಥಾನ ಎದುರು ಬುಡುಗಡೆ ಆಂಡ್ . ಈ ಲೇಸ್ ಡ್ ಕೋಡಿ ಕೇಶವ ಪೂಜಾರಿ ಸೊಲ್ಮೆ ಸಂದೈತ ಮಲ್ತೆರ್ .
ಕೃಷ್ಣ್ಣಪ್ಪ ಪೂಜಾರಿ ನಾಟಿಬೀದಿ ಬುಡುಗಡೆ ಮಲ್ತೆರ್. ಈ ಪೊರ್ತುಡು ರವಿ ಅಂಚನ್ ಅಬೇರೊಟ್ಟು ಗ್ರಾ. ಪ ಸದಸ್ಯರು ಕೃಷ್ಣ್ಣಪ್ಪ ನಾಯ್ಕ್ ಬರ್ಸಗುರಿ ಮಾಜಿ ಉಪಾಧ್ಯಕ್ಷೆರ್ (APMC),ಸಮಿತಿದ ಗೌರವ ಗುರ್ಕಾರ್ಲಾಯಿನ ಬಾಬು ಮಾಸ್ತರ್ ,ಗುರ್ಕಾರ್ಲಾಯಿನ ನೋಣಯ, ಕಾರ್ಯದರ್ಶಿಯಾಯಿನ ನಾಗೇಶ್, ಹಿರಿಯ ಸಲಹೆಗಾರೇರಾಯಿನ ಅಣ್ಣು ಮೇಸ್ತ್ರಿ ಕೊಪ್ಪಳಕೋಡಿ, ಸಂಕಪ್ಪ. ಕೆ, ಪಾಲ್ ಪಡೆದಿತ್ತೆರ್.
ಕಾರ್ಲ : ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆ ಕೊಡಂಗೈ ಮಾಳ ಶಾಲೆಡ್ ಫೆ. 20 ಕ್ಕ್ ಬಾಲವನ ಉದಿಪನ ಬೊಕ್ಕ ಅಭಿನಂದನಾ ಲೇಸ್ ನಡತ್oಡ್ . ಉದ್ಯಮಿ ವಿಶ್ವನಾಥ ಪ್ರಭು ಲೇಸ್ ಉದಿಪನ ಮಲ್ತೆರ್ . ಮಾಳ ಗ್ರಾ.ಪಂ. ಅಧ್ಯಕ್ಷೆ ಮಲ್ಲಿಕಾ ಶೆಟ್ಟಿ ಗುರ್ಕಾರ್ಮೆ ವಹಿಸ್ದಿತ್ತೆರ್ . ಉಂದುವೇ ಪೊರ್ತುಡು ಶಾಲೆಗ್ ಕೊಡುಗೆ ಕೊರಿನಕ್ಲೆಗ್ ಮಾನಾದಿಗೆ ಮಲ್ತೆರ್.
ಉದ್ಯಮಿ ರವೀಂದ್ರ ಶೆಟ್ಟಿ, ಕಾರ್ಲಾ ಪಿ.ಎಲ್.ಡಿ. ಬ್ಯಾಂಕ್ ಅಧ್ಯಕ್ಷ ಅಶೋಕ್ ಕುಮಾರ್ ಬಲ್ಲಾಳ್, ಶ್ರೀ ಕ್ಷೇ. ಗ್ರಾ. ಯೋ. ಮಾಳ ಒಕ್ಕೂಟದ ದಿನೇಶ ಪೂಜಾರಿ, ಬಿ ಒಕ್ಕೂಟದ ಪ್ರವೀಣ ಹೆಗ್ಡೆ, ಮಾಳ ಪಂಚಾಯತ್ ಸದಸ್ಯ ಶಶಿಕಲಾ ಪೂಜಾರಿ, ಉಮೇಶ್ ಪೂಜಾರಿ, ಸುಧೀರ್ ಶೆಟ್ಟಿ, ಮಾಳ ವ್ಯ. ಸೇ. ಸ. ಬ್ಯಾಂಕಿನ ಅಧ್ಯಕ್ಷ ಅನಿಲ್ ಎಸ್. ಪೂಜಾರಿ, ಉಡುಪಿ ಜಿಲ್ಲಾ ಶಿಕ್ಷಕ ಸಂಘದ ಕಾರ್ಯದರ್ಶಿ ಸಂಜೀವ ದೇವಾಡಿಗ, ತಾ.ಪಂ. ನಿಕಟ ಪೂರ್ವ ಅಧ್ಯಕ್ಷೆ ಸೌಭಾಗ್ಯ ಮಡಿವಾಳ್, ಎಸ್.ಡಿ.ಎಂ.ಸಿ. ಅಧ್ಯಕ್ಷ ಪ್ರಶಾಂತ್ ಮೂಲ್ಯ, ಒಡಿಪು ಜಿಲ್ಲಾ ಪ್ರಾ.ಶಾ.ಶಿ. ಸಂಘದ ಕಾರ್ಯದರ್ಶಿ ಸಂಜೀವ ದೇವಾಡಿಗ ಪಾಲ್ ಪಡೆದಿತ್ತೆರ್.
ಉಳ್ಳಾಲ : ಕುಡ್ಲದ ಉಳ್ಳಾಲಡ್ ನಡತೊಂದು ಉಪ್ಪುನ ಪಂಚವಾರ್ಷಿಕ ಉರೂಸ್ ಲೇಸ್ ಡ್ ಜಾಯಿಂಟ್ ವ್ಹೀಲ್ ತುಂಡಾದ್ ನಾಲ್ ಜೋಕ್ಲೆಗ್ ಗಾಯ ಆಯಿನ ಘಟನೆ ಫೆ.22 ನೇ ರಾತ್ರಿ ನಡತ್oಡ್ .
ಉರೂಸ್ ಪ್ರಯುಕ್ತ ದರ್ಗಾ ತೂಯೆರೆ ಬತ್ತಿನ ಕೇರಳ ಮೂಲದ ಕುಟುಂಬದ ನಾಲ್ ಜನ ಸಂತೆಡ್ ಇತ್ತಿನ ಜಾಯಿಂಟ್ ವ್ಹೀಲ್ ಡ್ ಗೊಬ್ಬೊoದು ಉಪ್ಪುನಗ ಏಕಾಏಕಿ ವ್ಹೀಲ್ ಜಾಯಿಂಟ್ ತತ್ತಿನ ಪರಿಣಾಮ ನಾಲ್ ಜೋಕುಲು ಸೇರ್ದ್ ತಿರ್ತ್ ಬೂರ್ದು ಗಾಯ ಆತ್oಡ್.
ಗಾಯ ಆಯಿನಕ್ಲೆನ್ ಉಮ್ಮರ್ ಫಾರೂಕ್ (42), ಮೊಹಮ್ಮದ್ ಆಯೂಬ್ (7) ಮಶಿಥಾ (18) ನೂರ್ ಜಹಾನ್ (36) ಸಲೇಕಾ (28) ಬೊಕ್ಕ ಸಮೀರ್( 41) ಪಂದ್ ಗುರ್ತಿಸಾದೆರ್ .
ಘಟನೆರ್ದ್ ಒಂತೆ ಪೊರ್ತುಡು ಜಾಗೆಡ್ ಜನ ಸೇರ್ದ್ ಗೊಂದಲದ ವಾತಾವರಣ ಸೃಷ್ಟಿ ಆಂಡ್ .ಗಾಯಾ ಆಯಿನಕ್ಲೆನ್ ಕೈತಲ್ ದ ಆಸ್ಪತ್ರಗ್ ದಾಖಲಲ್ ಮಲ್ದೆರ್ . ಜಾಗೆಗ್ ಉಳ್ಳಾಲ ಠಾಣಾ ಪೊಲೀಸೇರ್ ಭೇಟಿ ಕೊರ್ತೆರ್ .
