Tulu News

ಆಂಧ್ರಪ್ರದೇಶ ಹೊಟೇಲ್ ಮಾಲಕೆರೆನ ಸಂಘದ ಪ್ರಧಾನ ಕಾರ್ಯದರ್ಶಿಯಾದ್ ಐ.ರಘುವೀರ ಶೆಣೈ ಆಯ್ಕೆ

ಅಜೆಕಾರು: ರಾಜ್ಯ ಸಂಘಟನೆ ಆಯಿನ ಆಂದ್ರಪ್ರದೇಶ ಹೊಟೇಲ್ ಮಾಲಕೆರೆನ ಸಂಘದ (APHA) ಪ್ರಧಾನ ಕಾರ್ಯದರ್ಶಿಯಾದ್ ದೋಂಡೆರಂಗಡಿದ ಐ.ರಘುವೀರ ಶೆಣೈ ಮೇರ್ ಆಯ್ಕೆ ಆತೆರ್.

ಮೇರ್ ಆಂದ್ರಪ್ರದೇಶ ರಾಜ್ಯದ ನಂದ್ಯಾಲಡ್ ಹೊಟೇಲ್ ಉದ್ಯಮಿ ಆತೆರ್. ನಂದ್ಯಾಲಡ್ ಸಾಮಾಜಿಕ ಚಟುವಟಿಕೆಲೆನ ಮುಖೇನ ಗಮನ ಸೆಳೆತೆರ್. ಊರುದ ಚಟುವಟಿಕೆಲೆನ ಬಗೆಟ್ಟ್ ಆಸಕ್ತರಾತೆರ್. ಅಲ್ಪ ಕನ್ನಡಿಗೆರೆನ ಸಂಘಟನೆ ಮಲ್ತ್ ದ್ ದುಂಬು ಕೊನೊಂದು ಉಲ್ಲೆರ್. ಬೈರಂಪಳ್ಳಿ ನಡಿಬೆಟ್ಟು ಕೃಷ್ಣ ಶೆಣೈ ಬೊಕ್ಕ ರಾಧಾ ಶೆಣೈ ದಂಪತಿಲೆನ ಮಗೆ ಆತೆರ್.

ಅ.6: ಮುಲ್ಕಿ ವಿಜಯ ಕಾಲೇಜ್ ಡ್ ಬಲೆ ತುಲು ಲಿಪಿ ಕಲ್ಪುಗ ಕಜ್ಜಕೊಟ್ಯದ ಉದಿಪನ ಲೇಸ್

ವಿಜಯಾ ಕಾಲೇಜ್ ಮುಲ್ಕಿ ಮೊಕ್ಲೆನ ಮುತಾಲಿಕೆಡ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಜೈ ತುಲುನಾಡ್ (ರಿ.) ದ ಒಟ್ಟುಸೇರಿಗೆಡ್ ಬಲೆ ತುಲು ಲಿಪಿ ಕಲ್ಪುಗ ಕಜ್ಜಕೊಟ್ಯದ ಉದಿಪನ ಲೇಸ್ ಅ.6 ಸುಕ್ರಾರ ಮಧ್ಯಾಹ್ನ ಮುಲ್ಕಿ ವಿಜಯ ಕಾಲೇಜ್ ದ ಮಿನಿ ಸಭಾಂಗಣಡ್ ನಡಪರೆ ಉಂಡು.

ಆಳುಪ ವಂಶಸ್ಥೆರ್, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಪದುಕೆರ್ ಡಾ. ಆಕಾಶ್ ರಾಜ್ ಜೈನ್ ಲೇಸ್ ದ ಉದಿಪನ ಮಲ್ಪುವೆರ್. ಮುಲ್ಕಿ ವಿಜಯ ಕಾಲೇಜ್ ದ ಪ್ರಾಂಶುಪಾಲೆರ್ ಡಾ. ಶ್ರೀಮಣಿ ಗುರ್ಕಾರ್ಮೆನ್ ಒಯಿಸೊನ್ವೆರ್.

ಮಲ್ಲ ಬಿನ್ನೆರಾದ್ ಜೈ ತುಲುನಾಡ್ (ರಿ.) ದ ಒತ್ತು ಗುರ್ಕಾರ್ಲು ಉದಯ್ ಪೂಂಜ, ಪ್ರಧಾನ ಕಾರ್ಯಂತೆರ್ ಕಿರಣ್ ತುಲುವೆ ಪಾಲ್ ಪಡೆಯೆರೆ ಉಲ್ಲೆರ್. ದೈಹಿಕ ಶಿಕ್ಷಣ ನಿರ್ದೇಶಕೆರ್, ಮುಲ್ಕಿ ವಿಜಯ ಕಾಲೇಜ್ ತುಳು ಲಿಪಿ ಮೇಲ್ವಿಚಾರಕೆರ್ ವಿಘ್ನೇಶ್ ಭಟ್ ಪಾಲ್ ಪಡೆಯೆರೆ ಉಲ್ಲೆರ್.

ಅಂಚೆನೆ ಪ್ರತಿ ಸನಿಯಾರ ಮಧ್ಯಾಹ್ನ 1:30 ಕ್ಕ್ ತುಲು ಲಿಪಿ ಕ್ಲಾಸ್ ನಡಪುಂಡು. ಕಿರಣ್ ತುಲುವೆ ಬೊಕ್ಕ ಪ್ರಶಾಂತ್ ಪೂಜಾರಿ ಕಲ್ಪಾದಿಲು ಆತೆರ್.

ಅ.8: ರೆಂಜಾಳ ವಾಣಿ ಕಲಾಮಂದಿರ ಸರಕಾರಿ ಸಂಯುಕ್ತ ಪ್ರೌಢಶಾಲೆಡ್ ಬಲೆ ತುಲು ಲಿಪಿ ಕಲ್ಪುಗ ಕಜ್ಜಕೊಟ್ಯದ ತುಲು ಲಿಪಿ ಪರೀಕ್ಷೆ

ರೆಂಜಾಳ ಸಂಸ್ಕೃತಿ ಸಿಂಚನ, ಶ್ರೀ ಮಹಮ್ಮಾಯಿ ಕುಣಿತಾ ಭಜನಾ ಮಂಡಳಿ, ಸಾರ್ವಜನಿಕ ಗಣೇಶೋತ್ಸವ ಸಮಿತಿದ ಮುತಾಲಿಕೆಡ್, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಜೈ ತುಲುನಾಡ್ (ರಿ.) ದ ಒಟ್ಟುಸೇರಿಗೆಡ್ ಬಲೆ ತುಲು ಲಿಪಿ ಕಲ್ಪುಗ ಕಜ್ಜಕೊಟ್ಯದ ತುಲು ಲಿಪಿ ಪರೀಕ್ಷೆ ಅ.8 ಐತಾರ ರೆಂಜಾಳ ವಾಣಿ ಕಲಾಮಂದಿರ ಸರಕಾರಿ ಸಂಯುಕ್ತ ಪ್ರೌಢಶಾಲೆಡ್ ನಡತ್ಂಡ್.

ಪ್ರಶಾಂತ್ ಪೂಜಾರಿ ನಂದೊಲ್ಗೆ ಬೊಕ್ಕ ಪವಿತ್ರ ಕೋಟ್ಯಾನ್ ಬೊಲ್ವಾಯಿ ಈ ಲೇಸ್ ದ ಕಲ್ಪಾದಿಲು ಇತ್ತೆರ್.

ಅ.7: ಮಣಿಪಾಲ ಅಕಾಡೆಮಿ ಹಿರಿಯ ಪ್ರಾಥಮಿಕ ಶಾಲೆಡ್ ಪುದರ್‌ ಪಲವೆ ಲೇಸ್

ಮಣಿಪಾಲ: ಜೈ ತುಲುನಾಡ್ (ರಿ.) ಒಡಿಪು ವಲಯ ಬೊಕ್ಕ ಅಕಾಡೆಮಿ ಹಿರಿಯ ಪ್ರಾಥಮಿಕ ಶಾಲೆ ಮಣಿಪಾಲದ ಒಟ್ಟುಸೇರಿಗೆಡ್ ಪುದರ್‌ ಪಲವೆ ಉದಿಪನ ಲೇಸ್ ಅ.7 ಕ್ಕ್ ಸನಿಯಾರ ಬೊಲ್ಪುಗು ಮಣಿಪಾಲ ಅಕಾಡೆಮಿ ಹಿರಿಯ ಪ್ರಾಥಮಿಕ ಶಾಲೆಡ್ ನಡಪರೆ ಉಂಡು.

ಈ ಲೇಸ್ ದ ಉದಿಪನನ್ ಒಡಿಪು ತುಳುಕೂಟದ ಗುರ್ಕಾರ್ಲು ಜಯಕರ್ ಶೆಟ್ಟಿ ಇಂದ್ರಾಳಿ ಮಲ್ಪುವೆರ್. ಗುರ್ಕಾರ್ಮೆನ್ ಜೈ ತುಲುನಾಡ್ (ರಿ.) ದ ಒತ್ತು ಗುರ್ಕಾರ್ಲು ಉದಯ್ ಪೂಂಜಾ ಒಯಿಸೊನ್ವೆರ್. ಮಲ್ಲ ಬಿನ್ನೆರಾದ್ ಆಳುಪ ವಂಶಸ್ತೆರ್, ಕರ್ನಾಟಕ ತುಳು ಸಾಹಿತ್ಯ ಅಕಾಡಮಿದ ಮಾಜಿ ಪದುಕೆರ್ ಡಾ/ ಆಕಾಶ್‌ರಾಜ್ ಜೈನ್, ತಾರಾ ಉಮೇಶ್ ಆಚಾರ್ಯ ಪಾಲ್ ಪಡೆಯೆರೆ ಉಲ್ಲೆರ್.

ಮಣಿಪಾಲ ಅಕಾಡೆಮಿ ಹಿರಿಯ ಪ್ರಾಥಮಿಕ ಶಾಲೆದ ಟೀಚರ್ ಲಕ್ಷ್ಮೀ ಬೊಕ್ಕ ಜೈ ತುಳುನಾಡ್ (ರಿ.) ಪ್ರಚಾರ ಸಮಿತಿದ ನಿದಯಂತೆರ್ ಸದಾಶಿವ ಮುದ್ರಾಡಿ ಲೇಸ್ ದ ಒತ್ತುಪಾಲ್ ದೆತೊನಿಯೆರೆ ಉಲ್ಲೆರ್. ಸ್ವಾತಿ ಸುವರ್ಣ ಈ ಲೇಸ್ ನ್ ಸುಧಾರಿಕೆ ಮಲ್ಪುವೆರ್.

ಇನಿ ಸಚಿವ ಸಂಪುಟ ಸಭೆ

ಸಿದ್ದರಾಮಯ್ಯ ಸರ್ಕಾರದ ಸಚಿವ ಸಂಪುಟ ಸಭೆ ಇನಿ ನಡಪರೆ ಉಂಡು.

ಈ ಸಭೆಟ್ಟ್ ನ್ಯಾ.ಡಾ.ಕೆ ಭಕ್ತವತ್ಸಲ ಮೇರ್ ಹಿಂದುಳಿದ ವರ್ಗಲೆನ ಬಗೆಟ್ಟ್ ಕೊರ್ನ ವರದಿದ ಬಗೆಟ್ಟ್ ಚರ್ಚೆ ನಡಪರೆ ಉಂಡು ಪಂದ್ ಪಂಡೆರ್. ಅಂಚೆನೆ ಕೈತಲ್ ದ ಸಂಸ್ಥೆದ ವೋಟುಡು ಹಿಂದುಳಿದ ವರ್ಗಲೆಗ್ ಎಚ್ಚದ ಆದ್ಯತೆ ತಿಕಿಯೆರೆ ಉಂಡು.

ಸಚಿವ ಸಂಪುಟ ಸಭೆಟ್ಟ್ ಈ ವರದಿ ಬಗೆಟ್ಟ್ ವಿಶ್ಲೇಷಣೆ ಬೊಕ್ಕ ಚರ್ಚೆಲು ನಡಪರೆ ಉಂಡು. ಆವೆರ್ದ್ ಬೊಕ್ಕ ಅಗತ್ಯ ಬದಲಾವಣೆ ಇತ್ತ್ಂಡ, ಅವೆನ್ ಚರ್ಚೆ ನಡಪರೆ ತೀರ್ಮಾನ ಮಲ್ದೆರ್ ಪಂದ್ ತೆರಿದ್ ಬೈದ್ಂಡ್.

ಅ.9: ಕಾಂಗ್ರೆಸ್ ಕಾರ್ಯಕಾರಿ ಸಮಿತಿ ಸಭೆ

ಡೆಲ್ಲಿಡ್ ಅ.9 ಕ್ಕ್ ಕಾಂಗ್ರೆಸ್ ಕಾರ್ಯಕಾರಿ ಸಮಿತಿ ಸಭೆ ನಡಪುನ ಅಂದಾಜಿ ಉಂಡು ಪಂದ್ ಪಕ್ಷದ ಮೂಲಲು ತೆರಿಪಾದ್ಂಡ್.

ಈ ಸಭೆಟ್ಟ್ ಮಹಿಳಾ ಮೀಸಲಾತಿ ಕಾಯ್ದೆ, ಜಾತಿವಾರು ಜನಗಣತಿ, ರಾಜಕೀಯ ವಿರೋಧಿಲೆನ ಮಿತ್ತ್ ತನಿಖೆ ಸಂಸ್ಥೆಲೆನ ದುರ್ಬಳಕೆ ಸೇರಿನಂಚೆನೆ ಇತ್ತೆದ ರಾಜಕೀಯ ಸ್ಥಿತಿಗತಿದ ಬಗೆಟ್ಟ್ ಚರ್ಚೆ ನಡಪರೆ ಉಂಡು ಪಂದ್ ವರದಿ ಆತ್ಂಡ್.

ಎಐಸಿಸಿ ಗುರ್ಕಾರೆ ಮಲ್ಲಿಕಾರ್ಜುನ ಖರ್ಗೆ ಮೆರೆನ ಗುರ್ಕಾರ್ಮೆಡ್ ಈ ಸಭೆ ನಡಪರೆ ಉಂಡು. ರಾಹುಲ್ ಗಾಂಧಿ, ಸೋನಿಯಾ ಗಾಂಧಿ ಈ ಸಭೆಟ್ಟ್ ಪಾಲ್ ಪಡೆಯೆರೆ ಉಲ್ಲೆರ್.