ಬೊಂಬೈ: ವಿಜಯ್ ಕುಮಾರ್ ಕೊಡಿಯಾಲ್ ಬೈಲ್ ರಚನೆ ಮಲ್ತ್ ದ್ ನಿರ್ದಶನನ ಮಲ್ತಿನ ಮೈತಿದಿ ತುಳು ನಾಟಕ ಮೀರಾ ಬಾಯಂದರ್ ದ ಸೆವೆಲ್ ಸ್ಕ್ವೇರ್ ಅಕಾಡೆಮಿ ಸ್ಕೂಲ್ ಮೈದಾನಡ್ ಅ.15 ಐತಾರ ಬಯ್ಯಗ್ ನಡಪರೆ ಉಂಡು.
ಅಂಚೆನೆ ಈ ಲೇಸ್ ಮೀರಾ ಬಾಯಂದರ್ ಭಾರತೀಯ ಜನತಾ ಪಕ್ಷ ದಕ್ಷಿಣ ಭಾರತೀಯ ಘಟಕ, ನವತರುಣ ಮಿತ್ರ ಮಂಡಳಿ ಬೊಕ್ಕ ಬೊಂಬೈ ರಂಗ ಚಾವಡಿದ ಒಟ್ಟುಸೇರಿಗೆಡ್ ನಡಪರೆ ಉಂಡು.
ನಟೆ ಸ್ವರಾಜ್ ಶೆಟ್ಟಿ ಅಭಿನಯ ಮಲ್ತಿನ ಈ ನಾಟಕಗ್ ಎ.ಕೆ ವಿಜಯ್ (ಕೋಕಿಲಾ) ಸಂಗೀತ ಕೊರ್ತೆರ್.
ಬೊಂಬೈ: ಕುಲಾಲ್ ಸಂಘ ಬೊಂಬೈ ಮುಖವಾಣಿ ಅಮೂಲ್ಯದ 25ನೇ ಬೊಳ್ಳಿಪರ್ಬ ಗೌಜಿ ನ.5 ಕ್ಕ್ ಬೊಂಬೈದ ಗೊರೆಗಾಂವ್ ನಂದದೀಪ ಹೈಸ್ಕೂಲ್ ಸಭಾಗೃಹಡ್ ನಡಪರೆ ಉಂಡು.
ಈ ಲೇಸ್ ದೊಟ್ಟಿಗೆ ಸಾಹಿತ್ಯ ಸಾಂಸ್ಕೃತಿಕ, ಸನ್ಮಾನ ಲೇಸ್ ನಡಪರೆ ಉಂಡು. ಈ ಲೇಸ್ ಡ್ ಕುಲಾಲ ಸಮಾಜದ ಹಿರಿಯ ಸಾಹಿತಿ, ಸಂಘಟಕೆರ್, ಲೇಖಕೆರ್ ಪ್ರಭುತ್ವ ರಂಗ ನಟೆ ಸುಂದರ್ ಬೆದ್ರ ಮೆರೆಗ್ ಸನ್ಮಾನ ನಡಪರೆ ಉಂಡು ಪಂದ್ ಕುಲಾಲ್ ಸಂಘದ ಗುರ್ಕಾರೆ ರಘು ಎ ಮೂಲ್ಯ, ಅಮೂಲ್ಯದ ಸಂಪಾದಕೆರ್ ಶಂಕರ್ ವೈ ಮೂಲ್ಯ ತೆರಿಪಾದೆರ್.
ಸುಬ್ರಹ್ಮಣ್ಯ: ಯುವ ಜನಾಂಗಡ್ ಸೇವೆ ಮಲ್ಪುನ ಮಲ್ಲ ಮನಸ್ ಪುಟ್ಟರೆ ಎನ್‌ಎಸ್‌ಎಸ್ ತಾದಿಯಾದುಂಡು. ಕಲ್ಪಾರ್ಥಿಲು ಭವಿಷ್ಯದ ಕನನ್ ಈಡೇರಿಸಾವುನ ಶಕ್ತಿನೇ ರಾಷ್ಟ್ರೀಯ ಸೇವಾ ಯೋಜನೆ ಆತ್ಂಡ್. ಸೇವೆ ಬದ್ ಕ್ ದ ಅವಿಭಾಜ್ಯ ಅಂಗ ಪನ್ಪಿನ ಪಾಠನ್ ಕಲ್ಪಾರ್ಥಿ ಯುವ ಜನಾಂಗಗ್ ಕಲ್ಪಿಸಾವುನ ಎಡ್ಡೆ ಕೆಲಸನ್ ಎನ್‌ಎಸ್‌ಎಸ್ ಮಲ್ತೊಂದು ಬೈದ್ಂಡ್ ಪಂದ್ ಉಬಾರ್ ಸರಕಾರಿ ಪ್ರಥಮ ದೆರ್ಜೆ ಕಾಲೇಜ್ ದ ಪ್ರಾಂಶುಪಾಲೆರ್ ಪ್ರೊ.ಸುಬ್ಬಪ್ಪ ಕೈಕಂಬ ಪಂಡೆರ್.
ಮೇರ್ ಕೈಕಂಬ ಉನ್ನತೀಕರಣ ಮಲ್ತಿನ ಸರಕಾರಿ ಮಾದರಿ ಹಿರಿಯ ಪ್ರಾಥಮಿಕ ಶಾಲೆಡ್ ಒಂಜಿ ವಾರ ನಡೆಪುನ ಸುಬ್ರಹ್ಮಣ್ಯದ ಎಸ್‌ಎಸ್‌ಪಿಯು ಕಾಲೇಜ್ ದ ರಾಷ್ಟ್ರೀಯ ಸೇವಾ ಯೋಜನೆ ಘಟಕದ ವಾರ್ಷಿಕ ಇಸೇಸ ಶಿಬಿರದ ಉದಿಪನ ಲೇಸ್ ಡ್ ದಿಕ್ಸೂಚಿ ಭಾಷಣ ಮಲ್ತೆರ್.
ಬಿಳಿನೆಲೆ ಗ್ರಾ.ಪಂ. ಗುರ್ಕಾರ್ದಿ ಶಾರದಾ ದಿನೇಶ್ ಎನ್ನೆಸ್ಸೆಸ್ ಕೊಡಿ ರಾಪಾಯೆರ್. ಶಿಬಿರನ್ ಕೈಕಂಬ ಶಾಲೆದ ಎಸ್‌ಡಿಎಂಸಿ ಗುರ್ಕಾರೆ ಮೋಹನ್ ಕಳಿಗೆ ಉದಿಪನ ಮಲ್ತೆರ್. ಲೇಸ್ ದ ಗುರ್ಕಾರ್ಮೆನ್ ಹಿರಿಯ ಉಪನ್ಯಾಸಕಿ ರೇಖಾರಾಣಿ ಸೋಮಶೇಖರ್ ಒಯಿಸೊಂದಿತ್ತೆರ್. ಕೈಕಂಬ ಶಾಲೆದ ಮುಖ್ಯಗುರು ಪವಿತ್ರ ಎ, ಗ್ರಾ.ಪಂ.ಸದಸ್ಯೆ ಭವ್ಯಾ ಕುಕ್ಕಾಜೆ, ಬಿಳಿನೆಲೆ ಗ್ರಾಮದ ಗ್ರಾಮ ಲೆಕ್ಕಿಗೆರ್ ಶ್ರುತಿ, ಎಸ್‌ಎಸ್‌ಪಿಯು ಕಾಲೇಜ್ ದ ಹಿರಿಯ ಕಲ್ಪಾರ್ಥಿ ಸಂಘದ ಗುರ್ಕಾರೆ ರಾಜೇಶ್ ಎನ್.ಎಸ್, ಶಿಕ್ಷಕ-ರಕ್ಷಕ ಸಂಘದ ಗುರ್ಕಾರೆ ರಾಜೇಶ್ ಮಾವನಕಟ್ಟೆ ಮಲ್ಲ ಬಿನ್ನೆರಾದ್ ಪಾಲ್ ಪಡೆದಿತ್ತೆರ್. ಈ ಪೊರ್ತುಡು ಎನ್ನೆಸ್ಸೆಸ್ ಯೋಜನಾಧಿಕಾರಿ ಸೌಮ್ಯಾ ದಿನೇಶ್, ಭವ್ಯಶ್ರೀ ಹರೀಶ್ ಕುಲ್ಕುಂದ, ಘಟಕದ ನಾಯಕೆರ್ ಪವನ್ ಬೊಕ್ಕ ಕಾವ್ಯ ಚಾವಡಿಡ್ ಇತ್ತೆರ್. ಸೌಮ್ಯಾ ದಿನೇಶ್ ಎದ್ಕೊನಿಯೆರ್. ಉಪನ್ಯಾಸಕಿ ಸವಿತಾ ಕೈಲಾಸ್ ಸೊಲ್ಮೆ ಸಂದಾಯೆರ್.
ವರದಿ: ಗೋಪಿಚಂದನ್ ಕೆಎಸ್
ಭಟ್ಟಿಪಾಡ ಶ್ರೀ ಶನೀಶ್ವರ ಮಂದಿರದ ಮುತಾಲಿಕೆಡ್ 39ನೇ ವರ್ಷೊದ ಆಚರಣೆ ಅ.15 ಐತಾರ ಮುಲುಂಡ್ ಕಾಳಿದಾಸ್ ಹಾಲ್ ಡ್ ನಡಪರೆ ಉಂಡು.
ಈ ಲೇಸ್ ದೊಟ್ಟಿಗೆ ಜನಾರ್ಧನ್ ಸಾಲ್ಯಾನ್ ಮೆರೆನ ಶಿಷ್ಯವೃಂದದಕ್ಲೆರ್ದ್ ತಬಲೆ ವಾದನ, ಯಕ್ಷಗುರು ಅಜೆಕಾರ್ ಬಾಲಕೃಷ್ಣ ಶೆಟ್ಟಿ ಮೆರೆನ ನಿರ್ದೇಶನಡ್, ಮಂದಿರಡ್ ತರಬೇತಿ ಪಡೆಯಿನ ಕಲಾವಿದೆರೆರ್ದ್ 4 ನೇ ವರ್ಷೊದ ಆಟ ಶ್ರೀ ಬಪ್ಪನಾಡು ಕ್ಷೇತ್ರ ಮಹಾತ್ಮೆ ನಡಪರೆ ಉಂಡು.
ಅಂಚೆನೆ ಭಾಗವತಿಕೆನ್ ಭಾಗವತೆರ್ ಶ್ರೀದೇವಿ ಪ್ರಸಾದ್ ಆಳ್ವ ತಲಪಾಡಿ ಮಲ್ಪುವೆರ್. ಶ್ರೀ ರಾಧಾಕೃಷ್ಣ ನಾವಡ, ಸೀತಾರಾಮ್ ಕುಮಾರ್ ಅತಿಥಿ ಕಲಾವಿದೆರಾದ್ ಬರಿಯೆರೆ ಉಲ್ಲೆರ್. ಚೆಂಡೆ ವಾದನಗ್ ಪ್ರಶಾಂತ್ ಶೆಟ್ಟಿ ವಗೆನಾಡು ಬರಿಯರೆ ಉಲ್ಲೆರ್.
ಕಾಜ್ರಳ್ಳಿ ಶ್ರೀ ವನದುರ್ಗಾ ದೇವಲ್ಯದ 9ನೇ ವರ್ಷೊದ ಮಾರ್ನೆಮಿ ಉಚ್ಚಯದ ಲೆಕ್ಕೊಡು ಶ್ರೀ ಕ್ಷೇತ್ರಡ್ ಅ.19 ಗುರುವಾರ ರಾತ್ರೆ ಶಿವದೂತ ಪಂಜುರ್ಲಿ ಆಟ ನಡಪರೆ ಉಂಡು.
ಈ ಆಟ ಶ್ರೀ ಮಹಾಗಣಪತಿ ಪ್ರವಾಸಿ ಯಕ್ಷಗಾನ ಮಂಡಳಿ ನಡೂರು ಮಂದಾರ್ತಿ ಮೊಕ್ಲೆರ್ದ್ ನಡಪರೆ ಉಂಡು. ಈ ಲೇಸ್ ಗ್ ಅಲ್ತಾರು ದೇವಲ್ಯದ ಮೊಕ್ತೇಸರೆರ್ ನಿರಂಜನ ಹೆಗ್ಡೆ ಸಂಪೂರ್ಣ ಸಹಕಾರ ಕೊರ್ತೆರ್.
ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್, ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಲೇಸ್ ದ ಸಂಯೋಜಕೆರ್ ಮಂದಾರ್ತಿ ಮೇಳದ ಯಕ್ಷಗಾನ ಕಲಾವಿದೆ ಮಾನ್ಯ ನರಸಿಂಹ ಲೆಪ್ಪೋಲೆಡ್ ತೆರಿಪಾದೆರ್.
ಬೊಂಬೈ: ಬೊಂಬೈ ವಿದ್ಯಾದಾಯಿನಿ ಸಭಾದ ಶತಮಾನೋತ್ಸವದ ಲೆಕ್ಕೊಡು ಅ.29 ಐತಾರ ಸಾಂತಕ್ರೂಸ್ ಬಿಲ್ಲವ ಭವನದ ಸಭಾಂಗಣಡ್ ಜಾನಪದ ನೃತ್ಯ ಪಂತೊ ನಡಪರೆ ಉಂಡು.
ಈ ಪಂತೊ ಆನಿ ಬೊಲ್ಪುರ್ದ್ ಮಧ್ಯಾಹ್ನ ಮುಟ್ಟ ತುಳು ಕನ್ನಡ ಶಾಲೆ ಬೊಕ್ಕ ಸಂಘ ಸಂಸ್ಥೆಲೆಗ್ ನಡಪರೆ ಉಂಡು. ಈ ಪಂತೊಡು ಸುರುಕು ಪುದರ್ ಕೊರಿನ ಪತ್ತ್ ಕೂಟದಕ್ಲೆಗ್ ಮಾತ್ರ ಪಾಲ್ ಪಡೆಯೆರೆ ಅವಕಾಶ ಉಂಡು. ನೆತ್ತ ಮೇಲ್ವಿಚಾರಣೆನ್ ಸುರುತ್ತ 15 ಸಾರ ರೂ., ರಡ್ಡನೇದ 10 ಸಾರ ರೂ., ಬೊಕ್ಕ ಮೂಜಿನೇದ 5 ಸಾರ ರೂ. ನಗದು ಇನಾಮುನ್ ಕನ್ನಡ ಜಾನಪದ ಪರಿಷತ್ತು ಬೆಂಗ್ಲೂರ್ ದ ಮಹಾರಾಷ್ಟ್ರ ಘಟಕದ ಮುತಾಲಿಕೆಡ್ ಕೊರ್ಪುಂಡು.
ಅಂಚೆನೆ ಪಾಲ್ ಪಡೆಯಿನ ಮಾತ ಕೂಟಲೆಗ್ ಸಮಾಧಾನಕರ ಇನಾಮು ಬೊಕ್ಕ ಪಾರಿತೋಷಕನ್ ಸಂಸ್ಥೆದ ಮುತಾಲಿಕೆಡ್ ಕೊರ್ಪೆರ್. ಮಧ್ಯಾಹ್ನರ್ದ್ ಬೊಕ್ಕ ನಡಪರೆ ಇಪ್ಪುನ ಸಭಾ ಲೇಸ್ ಡ್ ಇನಾಮುನ್ ಕೊರ್ಪೆರ್. ಈ ಲೇಸ್ ಮುಟ್ಟ ಸ್ಪರ್ಧಾಳುಲು ಇಪ್ಪೊಡಾಪುಂಡು. ಬೊಲ್ಪುಗ್ ತೆನಸ್, ಮಧ್ಯಾಹ್ನ ಬೊಕ್ಕ ಬಯ್ಯಗ್ ವನಸ್ ದ ವ್ಯವಸ್ಥೆ ಉಂಡು. ಈ ಪಂತೊ ತುಳು ಕನ್ನಡಿಗೆರಾದ್ ಆಯೋಜನೆ ಮಲ್ದೆರ್. ಅಂಚಾದ್ ಮೊಕುಲು ಬನ್ನಗ ಆಧಾರ್ ಕಾರ್ಡ್ ಕೊನವೊಡಾಪುಂಡು.
ಈ ಪಂತೊಡು ಗರಿಷ್ಠ 8 ಜನ ಪಾಲ್ ಪಡೆವೊಲಿ. ಪದ್ಯ ಬೊಕ್ಕ ಡ್ಯಾನ್ಸ್ ಕೇವಲ ಜಾನಪದಗ್ ಅನುಗುಣವಾದಿಪ್ಪೊಡು. ಪದ್ಯನ್ ಬೇತೆನೇ ಪೆನ್ ಡ್ರೈವ್ ಮುಖೇನ ಸಂಸ್ಥೆಗ್ ಕಡಪಾವೊಡು. ಅಂಚೆನೆ ನಿಕ್ಲೆನ ಪುದರ್ ಬೊಕ್ಕ ಎಚ್ಚದ ಪೊಲಬುಗಾದ್ 9324759589 ಅತ್ತಂಡ 8850067062 ನಂಬರ್ ಗ್ ಸಂಪರ್ಕ ಮಲ್ಪೊಲಿ ಪಂದ್ ಸಂಸ್ಥೆದ ಗುರ್ಕಾರೆ ಪುರುಷೋತ್ತಮ ಎಸ್ ಕೋಟ್ಯಾನ್, ಕಾರ್ಯದರ್ಶಿ ಚಿತ್ರಾಪು ಕೆ.ಎಮ್ ಕೋಟ್ಯಾನ್ ಬೊಕ್ಕ ಪದುಕೆರ್ ಪ್ರಕಟಣೆಡ್ ತೆರಿಪಾದೆರ್.
ಕುಡ್ಲ: ಲೇಖಕಿ, ಸಹ್ಯಾದ್ರಿ ಕಾಲೇಜ್ ದ ಉಪನ್ಯಾಸಕಿ ಅಕ್ಷಯ ಆರ್. ಶೆಟ್ಟಿ ಮೆರೆನ ರಡ್ಡ್ ಬೂಕುಲೆನ ಬುಡುಗಡೆ ಲೇಸ್ ಗುರುವಾರ ಪೇಂಟೆದ ಪತ್ರಿಕಾಭವನಡ್ ನಡತ್ಂಡ್.
ಹಂಪಿ ವಿಶ್ವವಿದ್ಯಾನಿಲಯದ ವಿಶ್ರಾಂತ ಉಪಕುಲಪತಿ ಡಾ. ಚಿನ್ನಪ್ಪ ಗೌಡ ಮೇರ್ ಬೂಕು ಬುಡುಗಡೆ ಮಲ್ತ್ ದ್ ಪಾತೆರ್ದ್, ತುಳು ಭಾಷೆಡ್ ತುಳು ಸಂಸ್ಕೃತಿನ್ ಶೋಧನೆ ಮಲ್ಪುನಂಚಿನ ಬೇಲೆ ಇಂಚಿಪ್ಪದ ದಿನಟ್ಟ್ ನಡತೊಂದು ಇಪ್ಪುನವು ಮೆಚ್ಚೊಡಾಯಿನ ಇಚಾರ. ತುಳು ನಾಟಕಗ್ ಎಚ್ಚದ ಪುಗರ್ತೆ ತಿಕೊಂದು ಉಂಡು. ಅಕ್ಷಯ ಶೆಟ್ಟಿ ಮೇರ್ ನೆರ್ದ್ ದುಂಬು ದೆಂಗ ಪನ್ಪುನ ಕಾದಂಬರಿ ಬರೆತೆರ್. ಇತ್ತೆ ಪೆರ್ಗ ಪನ್ಪುನ ತುಳು ನಾಟಕನ್ ತುಳು ಸಾಹಿತ್ಯ ಲೋಕಗ್ ಕನದೆರ್. ಹಿಡಿ ಅಕ್ಕಿಯ ಧ್ಯಾನ ಕವನ ಸಂಕಲನ ಈ ಪೊರ್ತುಡು ಬುಡುಗಡೆ ಆಂಡ್. ಪೆರ್ಗ ಪಂಡ ತುಳು ಭಾಷೆಡ್ ಗೆಲ್ಮೆ, ಆಕಸ್ಮಿಕವಾದ್ ತಿಕುನ ಸಂಪತ್ತು ಪಂದ್ ಅರ್ಥ ಉಂಡು. ಒಂಜಿ ನಿಧಿತ್ತ ಹುಡುಕಾಟದ ಪಿರವುದ ಶೋಧ ಬೊಕ್ಕ ಅಯಿತ್ತ ಸುತ್ತದ ಸನ್ನಿವೇಶನ್ ಮಸ್ತ್ ಪೊರ್ಲುಡು ಲೇಖಕಿ ನಿರೂಪಣೆ ಮಲ್ದೆರ್. ಲೇಖಕಿ ನನಾತ್ ಬೂಕುನ್ ಸಾಹಿತ್ಯ ಲೋಕಕ್ಕೆ ಕೊರಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.
ಧನಂಜಯ ಕುಂಬ್ಳೆ ಪಾತೆರ್ದ್, ಕಬಿತೆಲು ಧ್ಯಾನಡ್ ಅರಳುಂಡು. ಕವಯಿತ್ರಿ ಅಕ್ಷಯ ಶೆಟ್ಟಿ ಮೇರ್ ಹಿಡಿ ಅಕ್ಕಿಯ ಧ್ಯಾನ ಪನ್ಪುನವು ಧ್ಯಾನದ ಮುಖೇನ ಪೊರ್ಲು ಉಂಡು. ಶೀರ್ಷಿಕೆಡೇ ಒಂಜಿ ಕಬಿತೆ ಉಂಡು. ಒಂಜಿ ಪುಂಡಿ ಅರಿನ್ ಪತ್ತುನಲ ಒಂಜಿ ಧ್ಯಾನ. ಪೊಣ್ಣು ಒರ್ತಿನ ಬದ್ ಕ್ ದ ತುಮುಲ ನೆಟ್ಟ್ ಉಂಡು. ತನ್ನ ಅನುಭವ ಬೊಕ್ಕ ಭಾವಗ್ ಸರಿಯಾಯಿನ ಕಬಿತೆ ನೆಟ್ಟ್ ಉಂಡು. ಕವಯತ್ರಿ ನನಲ ಇಂಚಿನ ಸಾಂದರ್ಭಿಕ ಕಬಿತೆನ್ ಬರೆವಡ್ ಪಂದ್ ಪಂಡೆರ್.
ಈ ಪೊರ್ತುಡು ಚಾವಡಿಡ್ ಲೇಖಕಿ ಅಕ್ಷಯ ಆರ್. ಶೆಟ್ಟಿ, ಹಂಪಿ ವಿಶ್ವವಿದ್ಯಾನಿಲಯ ವಿಶ್ರಾಂತ ಉಪಕುಲಪತಿ ಚಿನ್ನಪ್ಪ ಗೌಡ, ಕಲ್ಲೂರು ನಾಗೇಶ್, ಧನಂಜಯ ಕುಂಬ್ಳೆ ಪಾಲ್ ಪಡೆದಿತ್ತೆರ್.
ನರೇಶ್ ಸಸಿಹಿತ್ಲು ಲೇಸ್ ನ್ ಸುಧಾರಿಕೆ ಮಲ್ತೆರ್.
ಮುಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘದ (ರಿ.) ಮುತಾಲಿಕೆಡ್ ಶರನ್ನವರಾತ್ರಿ ಉಚ್ಚಯ ಅ.15-23 ಮುಟ್ಟ ನಡಪರೆ ಉಂಡು.
ಅ.15 ಐತಾರ ಬಯ್ಯಗ್ ಭಜನಾ ಜ್ಯೋತಿ ಉದಿಪನ, ಬೊಕ್ಕ ಮುಲ್ಕಿದ ಶಿವಪ್ರಣಾಮ ಕೂಟದಕ್ಲೆರ್ದ್ ಅನ್ನಪೂರ್ಣ ರಿತೇಶ್ ಮೆರೆನ ನಿರ್ದೇಶನದ ನೃತ್ಯ ಸಿಂಚನ ಲೇಸ್ ನಡಪರೆ ಉಂಡು.
ಅ.17 ಅಂಗಾರೆ ಬಯ್ಯಗ್ ಓಂ ಗುರು ನಲಿಕೆ ಭಜನೆ ಮುಲ್ಕಿ ಕೂಟದಕ್ಲೆರ್ದ್ ನಲಿಕೆ ಭಜನೆ ಲೇಸ್ ನಡಪರೆ ಉಂಡು. ಅಂಚೆನೆ ಪ್ರತಿದಿನೊಲ ಬಯ್ಯಗ್ ಭಜನೆ ಬೊಕ್ಕ ಮಹಾಪೂಜೆ ನಡಪರೆ ಉಂಡು.
ಈ ಲೇಸ್ ಗ್ ಭಕ್ತಾದಿಲು ಎಚ್ಚಿನ ಸಂಖ್ಯೆಡ್ ಪಾಲ್ ಪಡೆದ್, ಶ್ರೀ ಶಾರದಾ ದೇವಿ ಬೊಕ್ಕ ಶ್ರೀ ನಾರಾಯಣ ಗುರುಕುಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಮುಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘ (ರಿ.), ಶ್ರೀ ನಾರಾಯಣಗುರು ಮಹಿಳಾ ಮಂಡಳಿ, ಶ್ರೀ ನಾರಾಯಣಗುರು ಸೇವಾದಳ ಬೊಕ್ಕ ಬೊಂಬೈ ಸಮಿತಿದ ಗುರ್ಕಾರ್ಲು ಬೊಕ್ಕ ಕಾರ್ಯಕಾರಿ ಸಮಿತಿದ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಮಣಿಪಾಲ: ಸಮುದಾಯ ಬಾನುಲಿ ರೇಡಿಯೊ ಮಣಿಪಾಲ್ ಡ್ ಸಂಗೀತ ಶಿಕ್ಷಕೆರ್ ಕಾವ್ಯಶ್ರೀ ಸೀತಾರಾಮ ಆಚಾರ್ಯ ಕೊಡವೂರು ನಡಪಾದ್ ಕೊರ್ಪುನ ಕಾವ್ಯಗಾನ -ಸಂಗೀತ ಪಾಠ ಲೇಸ್ ದ 29ನೇ ಸಂಚಿಕೆ ಅ.13 ಸುಕ್ರಾರ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಕಲ್ಪಾರ್ಥಿಯಾದ್ ಪುಟಾಣಿ ಅನಘ ಪಾಲ್ ಪಡೆಯೆರೆ ಉಲ್ಲೆರ್. ಅ.14 ಸನಿಯಾರ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಬೆಂಗ್ಲೂರ್ ಡ್ ನಡುರಾತ್ರೆ IT ಅಧಿಕಾರಿಲು ಕಾರ್ಯಾಚರಣೆ ಸುರು ಮಲ್ದೆರ್.
ಈ ಪೊರ್ತುಡು BBMP ಗುತ್ತಿಗೆದಾರೆರೆನ ಸಂಘದ ಉಪಾಧ್ಯಕ್ಷೆರ್ ಆರ್ ಅಂಬಿಕಾಪತಿ ಬೊಕ್ಕ ಮಾಜಿ ಕಾರ್ಪೊರೇಟರ್ ಅಶ್ವತ್ಥಮ್ಮ ಮೆರೆನ ಸುಲ್ತಾನ್ ಪಾಳ್ಯದ ಇಲ್ಲಲ್ 23 ಬಾಕ್ಸ್ ಡ್ 42 ಕೋಟಿ ರೂ. ಪತ್ತೆ ಆತ್ಂಡ್. ಒಂಜೊಂಜಿ ಬಾಕ್ಸ್ ಡ್ 1 ಕೋಟಿ 65 ಲಕ್ಷ ರೂ. ಇತ್ಂಡ್ ಪಂದ್ ತೆರಿದ್ ಬೈದ್ಂಡ್.
