Times of kudla

ಎಲ್ಯ ಪ್ರಾಯದ ಮಗನ ಕೈಕ್ ಬೈಕ್ ಕೊರ್ನ ಅಮ್ಮೆರೆಗ್ 20 ಸಾರ ರೂ. ದಂಡ!

ಕಡಬ: ಎಲ್ಯ ಪ್ರಾಯದ ಮಗನ ಕೈಕ್ ಬೈಕ್ ಕೊನೊಯೆರೆ ಕೊರ್ನ ಅಮ್ಮೆರೆಗ್ ಪುತ್ತೂರ್ ಎ.ಸಿ.ಜೆ. ಜೆ.ಎಮ್.ಎಫ್.ಸಿ ಕೋರ್ಟು 20 ಸಾರ ರೂಪಾಯಿ ದಂಡ ಪಾಡ್ದ್ಂಡ್.

ಕೊಯಿಲ ಗ್ರಾಮದ ಕೆ.ಸಿ.ಫಾರ್ಮ್ ನಿವಾಸಿ ಅಬ್ದುಲ್ ರಹಿಮಾನ್ ದಂಡ ಕಟ್ಟಿನಾರ್. ಮೇರ್ 2020 ನೇ ಇಸ್ವಿಡ್ ಮಗನ ಕೈಕ್ ಬೈಕ್ ಕೊರ್ದಿತ್ತೆರ್. ಆ ಪೊರ್ತುಡು ಬೈಕ್ ಆಕ್ಸಿಡೆಂಟ್ ಆದ್, ಮಗನ ಮಿತ್ತ್ ಕಡಬ ಠಾಣೆಡ್ ಕೇಸ್ ದಾಖಲ್ ಆದಿತ್ತ್ಂಡ್. ಇತ್ತೆ ಕೇಸ್ ದ ವಿಚಾರಣೆ ಮಲ್ತಿನ ಪುತ್ತೂರ್ ಎ.ಸಿ.ಜೆ. ಜೆ.ಎಮ್.ಎಫ್.ಸಿ ಕೋರ್ಟುದ ನ್ಯಾಯಾಧೀಶೆರ್ ಯೋಗೀಂದ್ರ ಶೆಟ್ಟಿ ಮೇರ್ ದಂಡ ಪಾಡಿನವು ತೆರಿದ್ ಬೈದ್ಂಡ್. ಈ ಬಗೆಟ್ ಸರಕಾರದ ಪರವಾದ್ ಎ.ಪಿ.ಪಿ. ಕವಿತಾ ಮೇರ್ ವಾದ ಮಲ್ದಿತ್ತೆರ್.

ನ.21:ಅಂಬ್ಲಮೊಗೆರ್ ಕೋಟ್ರಗುತ್ತು ಶ್ರೀ ಕೋರ್ದಬ್ಬು ದೈವೊಲ್ಯಡ್ ಸುದರ್ಶನ ಹೋಮ

ಅಂಬ್ಲಮೊಗೆರ್: ಅಂಬ್ಲಮೊಗೆರ್ ಗ್ರಾಮದ ಕೋಟ್ರಗುತ್ತುದ ವ್ಯಾಪ್ತಿಡ್ ಬರ್ಪುನ ಆಡು, ಪೆರಂಗಾವು, ತಿಲಕನಗರ, ಕಂಡಿಲ, ಕರಿದೋಟ ಪ್ರದೇಶಗ್ ಸಂಬಂಧ ಪಟ್ಟಿನ ಅನಾದಿ ಕಾಲೊರ್ದಿಂಚಲ ಪೂರ್ವಿಕೆರ್ ಆರಾಧನೆ ಮಲ್ತೊಂದು ಬರ್ಪುನ, ಶ್ರೀ ದೈವಲೆಗ್ ಸಂಬಂಧ ಪಟ್ಟಿನ ಜಾಗೆಡ್ ಶ್ರೀ ಲಕ್ಷ್ಮೀನರಸಿಂಹ ದೇವಲ್ಯ, ಕೋಟ್ರಗುತ್ತು ಮುಲ್ಪದ ಪ್ರಧಾನ ಅರ್ಚಕೆರ್ ಶ್ರೀ ಅಕ್ಷಯ ಭಟ್, ಕೋಳ್ಯೂರು ಮೆರೆನ ಪೌರೋಹಿತ್ಯಡ್ ಸುದರ್ಶನ ಹೋಮ ಬೊಕ್ಕ ನ.23 ಬುಧಾರದಾನಿ ಬೊಲ್ಪುಗು 9 ಗಂಟೆಗ್ ಸರಿಯಾದ್ ಶ್ರೀ ಕೋರ್ದಬ್ಬು ಬೊಕ್ಕ ಸಂಕೋಲೆ ಗುಳಿಗ ದೈವಲೆನ ದರ್ಶನ ಸೇವೆ ನಡಪರೆ ಉಂಡು.

ಅಂಚನೆ ಕರಿನ ಸುಮಾರ್ ವರ್ಷೊರ್ದಿಂಚಿ ಅಜೀರ್ಣಾವಸ್ಥೆಡ್ ಇಪ್ಪುನ ಕೋಟ್ರಗುತ್ತುದ ಶ್ರೀ ಕೋರ್ದಬ್ಬು ದೇವಲ್ಯನ್, ಇತ್ತೆದ ಕೋಟ್ರಗುತ್ತುದ ಇಲ್ಲದಕ್ಲು, ಚಾಕರಿ ವರ್ಗದಕ್ಲು ಬೊಕ್ಕ ಊರುದಕ್ಲು ಮಾತ ಒಟ್ಟು ಸೇರ್ದ್ ಶ್ರೀ ದೈವದ ಜೀರ್ಣೋದ್ಧಾರ ಕಾರ್ಯನ್ ಮಲ್ಪುನ ಸಲುವಾದ್, ಶ್ರೀ ಕೋರ್ದಬ್ಬು ಜೀರ್ಣೋದ್ಧಾರ ಸಮಿತಿ ರಚನೆ ಮಲ್ತ್ ದ್, ಆಯಿನಲೆಕ್ಕನೇ ಈ ಕಾರ್ಯದ ಸುರುತ ಹಂತವಾದ್ ಶ್ರೀ ದೈವಲೆಗ್ ಸಂಬಂಧ ಪಟ್ಟಿನ ಜಾಗೆಡ್ ತಾಂಬೂಲ ಪ್ರಶ್ನಾ ಚಿಂತನೆನ್ ನಡಪಾಯೆರ್.

ಅಂಚನೆ ಈ ಮಾತ ಲೇಸ್ ಗ್ ಶ್ರೀ ಕೋರ್ದಬ್ಬು ದೈವೊಲ್ಯಗ್ ಸಂಬಂಧ ಪಟ್ಟಿನ ಊರುದ ಮತ ಭಕ್ತೆರ್ ಹೆಚ್ಚದ ಸಂಖ್ಯೆಡ್ ಸೇರ್ದ್ ಪಾಲ್ ಪಡೆವೊಡು. ಅಂಚನೆ ತನು ಮನ ಧನಲೆರ್ದ್ ಸಹಕಾರ ಮಲ್ಪುನ ಮುಖೇನ ಜೀರ್ಣೋದ್ಧಾರ ಕಾರ್ಯ ಆಯಿನಾತ್ ಬೇಗ ಅಪುಲೆಕ್ಕ ನಿಕ್ಲೆನ ಕೊಡುಗೆನ್ ಕೊರ್ದು, ಶ್ರೀ ಕೊರ್ದಬ್ಬು ಬೊಕ್ಕ ಪರಿವಾರ ದೈವಲೆನ ಕೃಪೆಗ್ ಪಾತ್ರರಾವೋಡು ಪಂದ್ ಕೆ. ಪದ್ಮನಾಭ ರೈ, ಕೋಟ್ರಗುತ್ತು ಬೊಕ್ಕ ಇಲ್ಲದಕುಲು, ಅಂಬ್ಲಮೊಗರು ಕೋಟ್ರಗುತ್ತು ಶ್ರೀ ಕೋರ್ದಬ್ಬು ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್, ಸಂಜೀವ ಗುರ್ಕಾರ್ಲು ಬೊಕ್ಕ ಚಾಕರಿದಕುಲು ಲೆಪ್ಪೋಲೆಡ್ ತೆರಿಪಾದೆರ್.

ಪಾಕಿಸ್ತಾನದ ಪರ ಘೋಷಣೆ ಪಾಡಿನ ಮೂಜಿ ವಿದ್ಯಾರ್ಥಿಲೆನ ಮಿತ್ತ್ ಕೇಸ್ ದಾಖಲ್

ಬೆಂಗ್ಲೂರ್: ಪೇಂಟೆದ ಖಾಸಗಿ ಕಾಲೇಜ್ ದ ಮೂಜಿ ಜನ ವಿದ್ಯಾರ್ಥಿಲು ಕಾಲೇಜ್ ದ ಕೈತಲ್ ಪಾಕಿಸ್ತಾನದ ಪರ ಘೋಷಣೆ ಪಾಡ್ದೆರ್.

ಈ ಬಗೆಟ್ ಮಾರತ್ ಹಳ್ಳಿ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್. ರಿಯಾ, ದಿನಕರ್ ಬೊಕ್ಕ ಆರ್ಯನ್ ಈ ಕೇಸ್ ದ ಆರೋಪಿಲು. ಪೊಲೀಸೆರ್ ಮೂಜಿ ಜನ ವಿದ್ಯಾರ್ಥಿಲೆನ ಸುರುತ ವಿಚಾರಣೆ ನಡಪದೆರ್. ಇನಿ ಕೂಡ ವಿಚಾರಣೆಗ್ ಹಾಜರ್ ಆಯೆರೆ ಪಂತೆರ್. ರಿಯಾ ಹುಬ್ಬಳ್ಳಿ ಮೂಲದಾರ್. ಬೊಕ್ಕ ರಡ್ಡ್ ಜನ ಪಿದಯಿ ರಾಜ್ಯದ ವಿದ್ಯಾರ್ಥಿಲು ಪಂದ್ ತೆರಿದ್ ಬೈದ್ಂಡ್.

ಡಿ.8-11: ಕೇಂಜ ಶ್ರೀ ಬ್ರಹ್ಮಬೈದೆರ್ಲೆ ಗರಡಿದ ಕಾಲಾಧಿದ ಜಾತ್ರೆ

ಕುತ್ತಾರ್: ಎಲ್ಲೂರು ಸೀಮೆದ ಕುತ್ತಾರ್ ಕೇಂಜ ಶ್ರೀ ಬ್ರಹ್ಮ ಬೈದೆರ್ಲೆ ಗರಡಿಡ್ ವರ್ಷಂಪ್ರತಿ ನಡಪುನ ಕಾಲಾಧಿದ ಜಾತ್ರೆ ಡಿಸೆಂಬರ್ 8 ರ್ದ್ 11 ಮುಟ್ಟ ನಡಪರೆ ಉಂಡು.

ಡಿ.8 ಗು ನುಪ್ಪುದ ನೈವೇದ್ಯ, ಪುದೆ ಮೆರವಣಿಗೆದೊಟ್ಟಿಗೆ ಗರಡಿ ಪ್ರವೇಶ ನಡಪರೆ ಉಂಡು. ಡಿ. 9 ಗು ನವಕ ಪ್ರಧಾನ ಹೋಮ, ಅಗೆಲ್ ಸೇವೆ, ಶ್ರೀ ಬೈದೆರ್ಲೆ ದರ್ಶನ, ಪ್ರಸಾದ ಪಟ್ಟುನ ಬೊಕ್ಕ ಡಿ.10 ಕ್ ಶ್ರೀ ಬ್ರಹ್ಮ ಬೈದೆರ್ಲೆನ ಕಾಲಾಧಿದ ಜಾತ್ರೆ, ಮಹಾ ಅನ್ನಸಂತರ್ಪಣೆ, ಸುರಿಯ ಕೊರ್ಪುನೆ, ಬ್ರಹ್ಮ ಬೈದೆರ್ಲೆ ದರ್ಶನ ನಡಪರೆ ಉಂಡು. ಡಿ.11 ಕ್ ಮೈಂದ ಪೂಜಾರಿ ನೇಮ, ಜೋಗಿ ಪುರುಷ ನೇಮ, ಮಾಯಂದಾಲೆ ನೇಮ, ಶುದ್ಧೀಕಲಶ, ಶುದ್ಥದ ಅಗೇಲ್ ಸೇವೆ, ಶ್ರೀ ಬ್ರಹ್ಮ ಬೈದರ್ಕಳ ದರ್ಶನ, ಪುರ್ಸಾದ ಪಟ್ಟುನ ಕಜ್ಜ ನಡಪುಂಡು.

ಈ ಲೇಸ್ ಗ್ ಊರ ಪರವೂರುದ ಭಕ್ತೆರ್ ಸೇರ್ದ್, ಸಿರಿಮುಡಿ ಗಂಧ ಪುರ್ಸಾದೊನು ದೆತೊಂದು, ಶ್ರೀ ಬ್ರಹ್ಮ ಬೈದೆರ್ಲೆನ ಅನುಗ್ರಹಗ್ ಪಾತ್ರರಾವೊಡು ಪಂದ್ ಸಮಸ್ತ ಕುತ್ತಾರ್ ಗ್ರಾಮಸ್ಥೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಕುಕ್ಕೆ ಚಂಪಾ ಷಷ್ಠಿ ಉಚ್ಚಯಗ್ ಮುಖ್ಯಮಂತ್ರಿಲೆಗ್ ಲೆಪ್ಪೋಲೆ

ಸುಬ್ರಹ್ಮಣ್ಯ: ಮಹತೋಭಾರ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಚಂಪಾ ಷಷ್ಠಿ ಉಚ್ಚಯಗ್ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಮೆರೆಗ್ ಲೆಪ್ಪೋಲೆಡ್ ಕೊರ್ದು ಲೆತ್ತೆರ್.

ಮುಖ್ಯಮಂತ್ರಿ ಮೆರೆನ್ ಗುರುವಾರ ಬೆಂಗ್ಲೂರ್ ಡ್ ಮೀನುಗಾರಿಕೆ, ಬಂದರ್ ಬೊಕ್ಕ ಒಳನಾಡು ಜಲಸಾರಿಗೆ ಸಚಿವೆರ್ ಎಸ್. ಅಂಗಾರೆ ಮೆರೆನ ಮುತಾಲಿಕೆಡ್ ದೇವಲ್ಯದ ಆಡಳಿತ ಭೇಟಿ ಮಲ್ತ್ ದ್ ಲೆಪ್ಪೋಲೆನ್ ಕೊರಿಯೆರ್. ಈ ಪೊರ್ತುಡು ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷೆರ್ ಮೋಹನ್ ರಾಂ ಸುಳ್ಳಿ, ಸದಸ್ಯೆರ್ ಪ್ರಸನ್ನ ದರ್ಬೆ, ಮನೋಹರ ರೈ, ಮಾಸ್ಟರ್‌ ಪ್ಲಾನ್ ಸದಸ್ಯೆರ್ ಕಿಶೋರ್ ಕುಮಾರ್ ಕೂಜುಗೋಡು, ಚಂದ್ರಶೇಖರ ನಲ್ಲೂರಾಯ, ಮನೋಜ್ ಸುಬ್ರಹ್ಮಣ್ಯ, ದೇವಲ್ಯದ ಕಾರ್ಯನಿರ್ವಹಣಾಧಿಕಾರಿ ಡಾ.ನಿಂಗಯ್ಯ ಇತ್ತೆರ್.

ಭಾರತ್ ಜೋಡೋ ಯಾತ್ರೆಡ್ ರಾಹುಲ್‌ ಗಾಂಧಿಗ್ ಬೆದರಿಕೆ ಪತ್ರ

ಇಂಧೋರ್: ಭಾರತ್ ಜೋಡೋ ಯಾತ್ರೆ ಮಧ್ಯಪ್ರದೇಶಗ್ ಎತ್ತುನ ದುಂಬೇ ಇಂದೋರ್‌ಡ್ ರಾಹುಲ್ ಗಾಂಧಿ ಮೆರೆಗ್ ಕೊಲೆ ಬೆದರಿಕೆ ಪತ್ರ ಬೈದ್ಂಡ್.

ಶುಕ್ರಾರ ಬೊಲ್ಪುಗು ಚೀಪೆ ತಿಂಡಿದ ಅಂಗಡಿಯೊಂಜೆತ ಪಿದಯಿ ಗುರ್ತ ಇಜ್ಜಂದಿನ ವ್ಯಕ್ತಿಯೊರಿ ಈ ಬೆದರಿಕೆ ಪತ್ರನ್ ಬುಡ್ದ್ ಪೋತೆರ್ ಪಂದ್ ತೆರಿದ್ ಬೈದ್ಂಡ್. ಈ ಬಗೆಟ್ ಕೈತಲ್ ಪಾಡಿನ ಸಿಸಿಟಿವಿ ಕ್ಯಾಮರಾದ ಆಧಾರದ ಮಿತ್ತ್ ಪೊಲೀಸೆರ್ ಆರೋಪಿನ್ ನಾಡಿಯೆರೆ ಸುರು ಮಲ್ದೆರ್.

ನ.20 : ಕುಕ್ಕೆ ಸುಬ್ರಹ್ಮಣ್ಯ ಡ್ ಮಧ್ಯಾನ ಮುಟ್ಟ ದೇವೆರ್ನ ದರ್ಶನ ಇಜ್ಜಿ

ಸುಬ್ರಹ್ಮಣ್ಯ: ಮಹತೋಭಾರ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯಡ್ ನ.20ದಾನಿ ಚಂಪಾಷಷ್ಠಿದ ವಾರ್ಷಿಕ ಜಾತ್ರೆ ಉಚ್ಚಯ ಇಪ್ಪುನ ಲೆಕ್ಕೊಡು ಮೂಲಮೃತ್ತಿಕಾ ಪ್ರಸಾದ ದೆಪ್ಪುನ ಲೇಸ್ ನಡಪರೆ ಉಂಡು.

ಅಂಚಾದ್ ಆನಿ ಬೊಲ್ಪುರ್ದ್ ಮಧ್ಯಾಹ್ನ 2 ಗಂಟೆ ಮುಟ್ಟ ಭಕ್ತೆರೆಗ್ ದೇವೆರೆನ ದರ್ಶನ ಪಡೆಯೆರೆ ಭಕ್ತೆರೆಗ್ ಅವಕಾಶ ಇಜ್ಜಿ. 2 ಗಂಟೆರ್ದ್ ಬೊಕ್ಕ ದೇವೆರೆನ ದರ್ಶನ ಮಲ್ಪೊಲಿ ಪಂದ್ ದೇವಲ್ಯದ ಪ್ರಕಟಣೆಡ್ ತೆರಿಪಾದೆರ್.