ಕತಾರ್: ಫಿಫಾ ಫುಟ್ಬಾಲ್ ವಿಶ್ವಕಪ್ಡ್ ಅರ್ಜೆಂಟೀನಾ ವಿರುದ್ಧ ಗೆಂದಿನ ಸೌದಿ ಅರೇಬಿಯಾದ ಗೊಬ್ಬುಗಾರೆರೆಗ್ ಇನಾಮು ಕೊರ್ಪ ಪಂದ್ ಸೌದಿ ಅರೇಬಿಯಾ ಸರ್ಕಾರ ಘೋಷಣೆ ಮಲ್ದ್ಂಡ್.
ಲಿಯೋನೆಲ್ ಮೆಸ್ಸಿ ಸಾರಥ್ಯದ ಅರ್ಜೆಂಟೀನಾ ವಿರುದ್ಧ 2-1 ಗೋಲುಲೆನ ಅಂತರಡ್ ಗೆಂದಿನ ಸೌದಿ ಅರೇಬಿಯಾ ತಂಡಡ್ ಇಪ್ಪುನ ಗೊಬ್ಬುಗಾರೆರೆಗ್ ರೋಲ್ಸ್ ರಾಯ್ಸ್ ಫ್ಯಾಂಟಮ್ ಕಾರ್ ನ್ ಇನಾಮ್ ಆದ್ ಕೊರ್ಪ ಪಂದ್ ಸರ್ಕಾರ ತೆರಿಪಾದ್ಂಡ್.
ಬೆಂಗ್ಲೂರ್: ಶಾಲೆ- ಕಾಲೇಜ್ ಡ್ ಧ್ಯಾನ ಮಲ್ಪಾವುನ ಮಹತ್ವದ ನಿರ್ಧಾರನ್ ಕೇಂದ್ರ ಸರ್ಕಾರ ದೆತೊಂದುಂಡು.
75 ನೇ ಸ್ವಾತಂತ್ರ್ಯ ದಿನಾಚರಣೆದ ಅಮೃತ ಉಚ್ಚಯದ ನೆಂಪುಗು ಕೇಂದ್ರ ಸರ್ಕಾರ ಈ ಮಹತ್ವದ ನಿರ್ಧಾರ ಮಲ್ದ್ಂಡ್. ನನ ದುಂಬುಗ್ ದೇಶದ ಮಾತ ವಿಶ್ವವಿದ್ಯಾಲಯಲು ಪದವಿ ಕಾಲೇಜ್ ಲೆಡ್ ಧ್ಯಾನ ಮಲ್ಪುಲೆಕ್ಕ ಯುಜಿಸಿ ಕಾರ್ಯದರ್ಶಿ ಪ್ರೊ. ರಜನೀಶ್ ಜೈನೆರ್ ಪತ್ರ ಬರೆತೆರ್. ಕೇಂದ್ರ ಸಂಸ್ಕೃತಿ ಇಲಾಖೆ ಧ್ಯಾನ ಮಲ್ಪುನ ನಿಟ್ಟ್ ಡ್ ಆರ್ಟ್ ಆಫ್ ಲಿವಿಂಗ್ ಸಂಸ್ಥೆದೊಟ್ಟಿಗೆ ಒಪ್ಪಂದ ಮಲ್ದ್ಂಡ್. ವಿಶ್ವವಿದ್ಯಾಲಯಲು, ಪದವಿ ಕಾಲೇಜ್ ಲೆಡ್ ಹರ್ ಘರ್ ಧ್ಯಾನ ಅಭಿಯಾನ ನಡಪಾಯೆರೆ ನಿರ್ಧಾರ ದೆತೊಂದುಂಡು. ಈ ಅಭಿಯಾನಗ್ ಕಾಲೇಜ್ ವಿದ್ಯಾರ್ಥಿಲು ಒವ್ವೇ ಶುಲ್ಕ ಕಟ್ಟೊಡು ಪಂದ್ ಇಜ್ಜಿ. ಆರ್ಟ್ ಆಫ್ ಲಿವಿಂಗ್ ಫೌಂಡೇಶನ್ ಅಭಿವೃದ್ಧಿ ಪಡಿಸಾಯಿನ ಧ್ಯಾನದ ಮಾದರಿ ಸುರು ಮಲ್ಪರೆ ಯುಜಿಸಿ ಸಂಸ್ಥೆಲೆಗ್ ಸೂಚನೆ ಕೊರ್ತುಂಡು.
ಕಾರ್ಲ: ಸಾಹಿತಿ,ಬರವುಗಾರೆ ಕೇವಿನ್ ಡಿಮೆಲ್ಲೋ ತನ್ನ ಇಲ್ಲಲ್ ಆತ್ಮಹತ್ಯೆ ಮಲ್ತೊಂದೆರ್.
ಮೇರ್ ಸುಮಾರ್ ಮದ್ಯವರ್ಜನ ಶಿಬಿರಲೆಡ್ ಸಂಪನ್ಮೂಲ ವ್ಯಕ್ತಿಯಾದ್ ಪಾಲ್ ಪಡೆತೆರ್. ಬೊಕ್ಕ ಸುಮಾರ್ ಕೊಂಕಣಿ ಬರವುಲೆನ ಮುಖೇನ ಪುದರ್ ಪಡೆತೆರ್. ಕಾರ್ಲ ಕ್ರೈಸ್ಟ್ ಕಿಂಗ್ ಶಾಲೆದ ಆಡಳಿತಾಧಿಕಾರಿಲ ಆದಿತ್ತೆರ್. ಸಾಹಿತ್ಯಕ್ಕಾದ್ ಸುಮಾರ್ ಪ್ರಶಸ್ತಿಲೆನ್ ಪಡೆತೆರ್. ಆಂಡ ಮೆರೆನ ಸಾವುಗ್ ಸರಿತ ಕಾರಣ ನನಲ ತೆರಿದ್ ಬೈದಿಜಿ. ಈ ಬಗೆಟ್ ಕಾರ್ಲ ಪೇಂಟೆದ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್. ಪೊಲೀಸೆರ್ ತನಿಖೆ ಮಲ್ತೊಂದು ಉಲ್ಲೆರ್.
ಭಕ್ತೆರೆನ ಆರೋಗ್ಯ ಸಿದ್ಧಿದೊಟ್ಟಿಗೆ ಇಷ್ಟಾರ್ಥ ಈಡೇರಿಸಾವುನ ಬೊಕ್ಕ ಕೈಕಂಜಿಲೆಗ್ ಬರ್ಪಿನ ಸೀಕ್ ಲೆನ್ ಗುಣ ಮಲ್ಪುನ ತುಳುನಾಡ್ ದ ವಿಶಿಷ್ಟ ಆಚರಣೆಲೆಡ್ ಒಂಜಾಯಿನ ಕೊಕ್ಕಡ ಕೋರಿ ಜಾತ್ರೆ.
ತುಳುನಾಡ್ ದ ಕೆಲವು ಕಡೆ ನಡಪುನ ಕೋರಿ ಜಾತ್ರೆ ಕೈತಲ್ ದ ದೈವಲೆನ ಚಾವಡಿಡ್ ನಿರ್ದಿಷ್ಟ ಇಲ್ಲದಕುಲೆನ ಒಟ್ಟುಸೇರಿಗೆಡ್ ನಡಪುನ ಆಂಡಲ ಕೊಕ್ಕಡದ ಕೋರಿ ಜಾತ್ರೆ ಸ್ವರೂಪನೇ ಬೇತೆ. ಮುಲ್ಪದ ಅಧಿದೇವತೆ ಶ್ರೀವೈದ್ಯನಾಥ ಬೊಕ್ಕ ವಿಷ್ಣುಮೂರ್ತಿ ದೇವೆರ್. ಕೊಕ್ಕಡ ಕೋರಿಡ್ ಕಂಡಡ್ ಸುರುಕು ಉಳುಮೆ ಮಲ್ತ್ ದ್ ಹದ ಮಲ್ಪುವೆರ್. ದುಂಬುದ ಕಾಲೊಡ್ ಜಾತ್ರೆಗ್ ಒಂಜಿ ತಿಂಗೊಲ್ ದುಂಬೇ ಕೊಕ್ಕಡ ಸೀಮೆಗ್ ಉಲಯಿ ಇಪ್ಪುನ ಪ್ರತಿ ಗ್ರಾಮಲೆನ ಇಲ್ಲ ಇಲ್ಲಗ್ ಕೋರಿ ಜಾತ್ರೆಗ್ ದೈವದ ವೇಷ ಪಾಡ್ದ್ ಲೆಪ್ಪುನ ಸಂಪ್ರದಾಯ ಇತ್ಂಡ್. ವೇಷದೊಟ್ಟಿಗೆ ದೋಲು ಬೊಟ್ಟೊಂದು ಬೇತೆನೇ ಒಂಜಿ ತಂಡ ಊರಿಡೀ ತಿರುಗುಂಡು. ಕೊರಗ ದೈವಗ್ ಕೃಷಿ ಬೊಕ್ಕ ಕೈಕಂಜಿಗ್ ಸಂಬಂಧ ಪಟ್ಟಿನ ಪರಕೆ ಪನ್ದ್ ಅವೆನ್ ಸಂದಾವುನ ಪದ್ಧತಿ ಉಂಡು.
ಜಾತ್ರೆದ ದುಂಬುನಾನಿ ಬಯ್ಯಗ್ ಕಂಬುಲದ ಕಂಡಗ್ ಪೇರ್ ಪಾಡ್ದ್ ಕಂಡದ ಸುತ್ತ ಕೋಲ್ತಿರಿ ಪೊತ್ತಾದ್ ಅಲಂಕಾರ ಮಲ್ಪುವೆರ್. (ವಸಯ) ಮನದಾನಿ ಬೊಲ್ಪುಗು ದೂರದ ಊರುರ್ದ್ ಬತ್ತಿನ ಭಕ್ತೆರ್ ಪರಕೆದ ತೊಪ್ಪುನು ದೇವೆರೆನ ಕಂಡಗ್ ಪಾಡುವೆರ್. ಗುತ್ತುದ ಇಲ್ಲರ್ದ್ ಅಲಂಕಾರ ಮಲ್ತಿನ ಬಸವೆ ಬೊಕ್ಕ ಎರ್ಲೆನೊಟ್ಟಿಗೆ ಪ್ರತಿ ಊರುರ್ದು ಪರಕೆ ಪನ್ದ್ ಬತ್ತಿನ ಕೈಕಂಜಿಲೆನ್ ದೇವಲ್ಯಗ್ ಕನತ್ ದ್ ಬೊಕ್ಕ ದೇವೆರೆನ ಕಂಡಗ್ ವಾದ್ಯ ಘೋಷದೊಟ್ಟಿಗೆ ಕನಪೆರ್. ಗುತ್ತುದ ಬೋರಿಲೆನ್ ಸುರುಕು ಜಪ್ಪಾದ್ ಬೊಕ್ಕ ಬೇತೆ ಕೈಕಂಜಿಲೆನ್ ಒಂಜಿ ಬರಿರ್ದ್ ಕುಡೊಂಜಿ ಬರಿಕ್ ಬಲಿಪಾವೆರ್. ಹುಷಾರ್ ಇಜ್ಜಂದಿನ ಕಾರಣ ಪರಕೆ ಪಂಡಿನ ಜನ ಸೊಪ್ಪುದ ಕಟ್ಟನ್ ತರೆಟ್ ದೀದ್ ಒಂಜಿ ಸುತ್ತು ಬತ್ ದ್ ಕಂಡಗ್ ಪಾಡ್ದ್ ಕಂಡದ ನೀರ್ ನ್ ತೀರ್ಥ ಪಂದ್ ಪರ್ದ್, ಪ್ರೋಕ್ಷಣೆ ಮಲ್ಪರೆ ಕೆಲವು ದೂರದ ಊರುರ್ದ್ ಬರ್ಪೆರ್. ನಾಗಬ್ರಹ್ಮ ದೈವಲೆನ ಮುಡಿಯಾದ್ ಕಂಡಗ್ ಒಂಜಿ ಸುತ್ತು ಪಾಡ್ದ್ ವ್ಯವಸ್ಥೆ ಸರಿ ಆತ್ಂಡ್ ಪಂದ್ ತೆರಿವೊನ್ನ ದೈವಲು ದೇವಲ್ಯರ್ದ್ ರಡ್ಡ್ ದೇವೆರೆಲೆನ್ ಮೆರವಣಿಗೆಡ್ ಎದುರು ಉಂತುದು ಲೆತೊಂದು ಬನ್ನಗ ತಾದಿ ಉದ್ದಲ ಜನ ಕಾತೊಂದು ಇಪ್ಪುವೆರ್. ಕಂಡದ ಎದುರು ಇಪ್ಪುನ ಜಾಗೆ ಭಂಡಾರಿ ಮಜ ಪಂದೇ ಪ್ರಸಿದ್ಧಿ ಆತ್ಂಡ್. ಮುಲ್ಪದ ಕಟ್ಟೆಡ್ ದೇವೆರ್ ಕುಲ್ಲಿನೊಟ್ಟಿಗೆ ಕಂಡದ ನಡು ಭಾಗಡ್ ನಾಗಬ್ರಹ್ಮನ ಕುರುಹಾದ್ ಎತ್ತರದ ಪೂವುರ್ದ್ ಅಲಂಕರ ಮಲ್ತಿನ ತೇರ್ ನ್ (ಪೂಕರೆ) ಉಂತಾದ್ ದೇವರೆಗ್ ಪೂಜೆ ನಡಪುಂಡು. ಅಂಚನೆ ಈ ಸರ್ತಿ ನಡೆಪುನ ಕೋರಿ ಜಾತ್ರೆ ಡಿ. 17 ಶನಿಯಾರದಾನಿ ನಡಪುಂಡು.
ಬೆಂಗ್ಲೂರ್: ಈತ್ ದಿನ 9 ಬೊಕ್ಕ 10ನೇ ಕ್ಲಾಸ್ ನ್ ಪ್ರೌಢ ಶಿಕ್ಷಣ ಆದಿತ್ತ್ಂಡ್. ಆಂಡ ನನ ದುಂಬು 9 ಬೊಕ್ಕ 10ನೇ ಕ್ಲಾಸ್ ಲೆನ್ ಪ್ರಾಥಮಿಕ ಶಿಕ್ಷಣದ ಆಪುಂಡು.
ಈ ಬಗೆಟ್ ಸಾರ್ವಜನಿಕ ಶಿಕ್ಷಣ ಇಲಾಖೆ ಜ್ಞಾಪಕ ಪತ್ರ ಬುಡುಗಡೆ ಮಲ್ತೆರ್. ಈ ಜ್ಞಾಪಕ ಪತ್ರದ ಪ್ರಕಾರ ಕರ್ನಾಟಕ ಶಿಕ್ಷಣ ಸಂಸ್ಥೆಲೆನ, (ವರ್ಗೀಕರಣ, ನಿಯಂತ್ರಣ, ಪಠ್ಯಕ್ರಮ) ನಿಯಮ 1995 ತಿದ್ದುಪಡಿ ನಿಯಮ-2022 ಟ್ ಈ ನಿಯಮದ ಪ್ರಕಾರ ನೋಂದಣಿ ಬೊಕ್ಕ ಮಾನ್ಯತೆಗ್ ಮಾತ್ರ 9 ಬೊಕ್ಕ 10ನೇ ಕ್ಲಾಸ್ ಲು ಪ್ರಾಥಮಿಕ ಶಿಕ್ಷಣದ ದುಂಬುದ ಶಿಕ್ಷಣ ಪಂದ್ ನಿಯಮಲೆಡ್ ತಿದ್ದುಪಡಿ ಮಲ್ಪರೆ ಆತ್ಂಡ್ ಪಂದ್ ತೆರಿಪಾದೆರ್.
ಬೆಂಗ್ಲೂರ್: ಹಿರಿಯ ನಟೆ ದ್ವಾರಕೀಶ್ ಮೆರೆಗ್ ಬೆಂಗ್ಲೂರ್ ವಿಶ್ವವಿದ್ಯಾನಿಲಯ ಗೌರವ ಡಾಕ್ಟರೇಟ್ ಘೋಷಣೆ ಮಲ್ದ್ಂಡ್.
ನೂದೆರ್ದ್ ಲ ಹೆಚ್ಚ ಸಿನಿಮಾಲೆಡ್ ನಟನೆ, 40ಕ್ ಹೆಚ್ಚ ಸಿನಿಮಾ ನಿರ್ಮಾಣ ಮಲ್ತ್ ದ್, ಸೈ ಪನ್ಪಯಿನ ಪ್ರತಿಭಾನ್ವಿತ ನಟೆ ದ್ವಾರಕೀಶ್. ಮೆರೆಗ್ ಬೆಂಗ್ಲೂರ್ ವಿವಿ 57ನೇ ಘಟಿಕೋತ್ಸವದಾನಿ ಗೌರವ ಡಾಕ್ಟರೇಟ್ ಪ್ರದಾನ ಮಲ್ಪರೆ ಉಂಡು. ಚಲನಚಿತ್ರ ವಿಭಾಗಡ್ ದ್ವಾರಕೀಶ್, ಕಾನೂನು ಅಟಾರ್ನಿ ಬೊಕ್ಕ ನ್ಯಾಯ ಸಲಹೆಗಾರೆರೆನ ವಿಭಾಗ ಅಮರನಾಥ ಗೌಡ, ವರ್ಣ ಚಿತ್ರಕಾರೆರೆನ ವಿಭಾಗ ಡಾ.ಟಿ. ಅನಿಲ್ ಕುಮಾರ್ ಗೌರವ ಡಾಕ್ಟರೇಟ್ ದೆತೊನಿಯೆರೆ ಉಲ್ಲೆರ್.
ಬೊಂಬೈ: ಬೊಂಬೈದ ಮಾಹೀಂ ಪನ್ಪಿನ ಜಾಗೆಡ್ ಕರ್ನಾಟಕ ರಾಜ್ಯ ಪ್ರವಾಸೋದ್ಯಮ ಇಲಾಖೆದ ಜಾಹೀರಾತುಡು ಇತ್ತಿನ ಸಿಎಂ ಬೊಮ್ಮಾಯಿ ಚಿತ್ರೊಗು ಅಲ್ತ ಕೆಲವು ಪುಂಡೆರ್ ಕರಿ ಪೂಜಿದೆರ್.
ಅಂಚನೆ ಔರಂಗಾಬಾದ್ ಜಿಲ್ಲೆಡ್ ರಾಜ್ಯ ಸಾರಿಗೆ ಸಂಸ್ಥೆದ ಬಸ್ ಕ್ ಕರಿ ಪೂಜಿದಿನ ಘಟನೆಲ ನಡದ್ಂಡ್. ಉಂದು ಲಡಾಯಿ ಮಲ್ಪರೆ ಗ್ ಪ್ರಚೋದನೆದ ಕ್ರಮ ಆತ್ಂಡ್. ಶಾಂತಿಪ್ರಿಯ ಕನ್ನಡಿಗೆರ್ ಬೆಚ್ಚ ಆಪಿಲೆಕ ಕೆಲವು ಬಚ್ಚಾಲಿಲು ಈ ರೀತಿ ಮಲ್ದೆರ್ ಪಂದ್ ಕನ್ನಡಿಗೆರ್ ಆರೋಪ ಮಲ್ದೆರ್.
ಅಹ್ಮದಾಬಾದ್: ಪ್ರಧಾನಿ ನರೇಂದ್ರ ಮೋದಿ ಮೇರ್ ಗುಜರಾತ್ ಗ್ ಬತ್ತಿನ ಪೊರ್ತುಡು ಅನುಮತಿ ದೆತೊನಂದೆ ಡ್ರೋನ್ ರಾಪಾಯಿನ ಮೂಜಿ ಜನನ್ ಅರೆಸ್ಟ್ ಮಲ್ತಿನ ಘಟನೆ ಗುಜರಾತ್ ದ ಬಾವ್ಲಾಡ್ ನಡತ್ಂಡ್.
ಈ ಘಟನೆಡ್ ರಮೇಶ್ ಪರ್ಮಾರ್, ರಾಕೇಶ್ ಬೊಕ್ಕ ರಾಜೇಶ್ ಕುಮಾರ್ ಮಂಗೀಲಾಲ್ ನ್ ಅರೆಸ್ಟ್ ಮಲ್ದೆರ್. ಮೊಕುಲು ರಾಪಾಯಿನ ಡ್ರೋನ್ ನ್ ಪೊಲೀಸೆರ್ ಪುಡಾತ್ ಪಾಡ್ದೆರ್. ಭಯೋತ್ಪಾದಕ ಸಂಘಟನೆಲು ಡ್ರೋನ್ ಗಲಸ್ ದ್ ದಾಳಿ ಮಲ್ಪುನ ಸಾಧ್ಯತೆ ಉಂಡು ಪಂದ್ ಗುಪ್ತಚರ ಸಂಸ್ಥೆಲು ಎಚ್ಚರಿಕೆ ಕೊರ್ತುಂಡು. ಅಂಚಾದ್ ಡ್ರೋನ್ ರಾಪಾವುನೆನ್ ನಿಷೇಧ ಮಲ್ದಿತ್ತೆರ್.
ಬೊಲ್ತೇರ್: ಕುಡ್ಲರ್ದ್ ಮೂಡಿಗೆರೆಗ್ ಪೋವೊಂದು ಇತ್ತಿನ ಆಂಬುಲೆನ್ಸ್ ಒಂಜಿ ಡ್ರೈವರ್ ನ ಕೈ ತತ್ತ್ ದ್ ರಿಕ್ಷಾ ಗ್ ಗುದ್ದಿನ ಘಟನೆ ಬೊಲ್ತೇರ್ ಕೈತಲ್ ದ ಚಾರ್ಮಾಡಿ ಘಾಟ್ ನಡತ್ಂಡ್.
ಈ ಘಟನೆಡ್ ರಿಕ್ಷಾಡ್ ಇತ್ತಿನ ನಾಲ್ ಜನಕ್ ಪೆಟ್ಟಾತ್ಂಡ್. ಮೊಕ್ಲೆನ್ ಕೈತಲ್ ದ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ರಿಕ್ಷಾ ಚಿಕ್ಕಮಗಳೂರು ಕೈತಲ್ ದ ಬಣಕಲ್ ಮೂಲದ ಡ್ರೈವರ್ ಗ್ ಸೇರಿನವು.
ಮೊಕುಲು ಧರ್ಮಸ್ಥಳಗ್ ಪೋದು ದರ್ಶನ ಮುಗಿತ್ ದ್ ಬನ್ನಗ ಈ ಘಟನೆ ನಡತ್ಂಡ್ ಪಂದ್ ತೆರಿದ್ ಬೈದ್ಂಡ್. ಈ ಆಕ್ಸಿಡೆಂಟ್ ದ ರಭಸಗ್ ರಡ್ಡ್ ಗಾಡಿಲ ನಕ್ಕೆ ಆತ್ಂಡ್. ಈ ಬಗೆಟ್ ಬೊಲ್ತೇರ್ ಸಂಚಾರಿ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ಕುಡ್ಲ : ಶ್ರೀ ಕುರು ಅಂಬಾ ಅಯ್ಯಪ್ಪ ಭಕ್ತವೃಂದ ಕೋಡಿಕಲ್ ನೆತ್ತ 18 ನೇ ವರ್ಷದ ಶಬರಿಮಲೆ ಯಾತ್ರೆದ ಲೆಕ್ಕೊಡು ಜನವರಿ1 ಐತಾರದಾನಿ ಅಯ್ಯಪ್ಪ ಸ್ವಾಮಿ ದೀಪ ಉಚ್ಚಯ ನಡಪರೆ ಉಂಡು.
ಈ ಲೇಸ್ ಗ್ ನಿಕುಲು ಮಾತ ಪಾಲ್ ಪಡೆದ್, ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಅಯ್ಯಪ್ಪ ಸೇವಾ ವೃಂದದಕುಲು ಬಿನ್ನಯ ಮಲ್ದೆರ್.
