Times of kudla

ಎಂಆರ್‌ಪಿಎಲ್‌ಡ್ 95 ಕೆಲಸ ಖಾಲಿ ಉಂಡು

ಕುಡ್ಲ : ಬೈಕಂಪಾಡಿಡ್ ಇಪ್ಪುನ ಮಂಗಳೂರು ರಿಫೈನರಿ ಬೊಕ್ಕ ಪೆಟ್ರೋಕೆಮಿಕಲ್ಸ್ ಲಿಮಿಟೆಡ್‌ಡ್ (ಎಂಆರ್‌ಪಿಎಲ್‌) ಖಾಲಿ ಇಪ್ಪುನ 95 ಪೋಸ್ಟ್ ಖಾಲಿ ಇತ್ತ್ ದ್ ಅರ್ಜಿ ಲೆತ್ತ್ ದೆರ್. ಬೇಲೆ ನಾಡೊಂದು ಇಪ್ಪುನ ತುಳುನಾಡ್ ದ ಉದ್ಯೋಗಾಕಾಂಕ್ಷಿಲೆಗ್ ಈ ಅವಕಾಶನ್ ಗಲಸೊಲಿ.

ಸಹಾಯಕ ಇಂಜಿನಿಯರ್ ಬೊಕ್ಕ ಸಹಾಯಕ ಕಾರ್ಯನಿರ್ವಾಹಕ ಹುದ್ದೆಗ್ ಅರ್ಜಿ ಲೈದೆರ್. ಆಸಕ್ತಿ ಇಪ್ಪುನ ಅಭ್ಯರ್ಥಿಲು 2023ತ ಜನವರಿ 15 ತ ಸುರುಕು ಆನ್‌ಲೈನ್ ಮುಖೇನ ಅರ್ಜಿ ಸಂದಾವೊಲಿ. ಕುಡ್ಲ ಉದ್ಯೋಗದ ಕಾರ್ಯ ಸ್ಥಾನ ಆತ್ಂಡ್. ತಿಂಗೊಲ್ ಗ್ ₹ 50,000 ರ್ದ್ ₹ 1,60,000 ಮುಟ್ಟ ಸಂಬಳ ಉಂಡು.

95 ಕೆಲಸದ ವಿವರ:
ಸಹಾಯಕ ಕಾರ್ಯನಿರ್ವಾಹಕ (ಹಣಕಾಸು/ ಆಂತರಿಕ ಲೆಕ್ಕಪರಿಶೋಧನೆ)– 4
ಸಹಾಯಕ ಕಾರ್ಯನಿರ್ವಾಹಕ (ಕಾರ್ಯದರ್ಶಿ)– 1
ಸಹಾಯಕ ಕಾರ್ಯನಿರ್ವಾಹಕ ಯುಜಿಸಿ (ಮಾರ್ಕೆಟಿಂಗ್)– 12
ಸಹಾಯಕ ಕಾರ್ಯನಿರ್ವಾಹಕ (ಗ್ರಂಥಾಲಯ ಬೊಕ್ಕ ಮಾಹಿತಿ ವಿಜ್ಞಾನ)–1
ಸಹಾಯಕ ಇಂಜಿನಿಯರ್ ಬೊಕ್ಕ ಸಹಾಯಕ ಕಾರ್ಯನಿರ್ವಾಹಕ (ರಾಸಾಯನಿಕ)–28
ಸಹಾಯಕ ಇಂಜಿನಿಯರ್ ಬೊಕ್ಕ ಸಹಾಯಕ ಕಾರ್ಯನಿರ್ವಾಹಕ (ಮೆಕ್ಯಾನಿಕಲ್)–24
ಸಹಾಯಕ ಇಂಜಿನಿಯರ್ ಬೊಕ್ಕ ಸಹಾಯಕ ಕಾರ್ಯನಿರ್ವಾಹಕ (ಸಿವಿಲ್)–2
ಸಹಾಯಕ ಇಂಜಿನಿಯರ್ ಬೊಕ್ಕ ಸಹಾಯಕ ಕಾರ್ಯನಿರ್ವಾಹಕ (ಎಲೆಕ್ಟ್ರಿಕಲ್)–7
ಸಹಾಯಕ ಇಂಜಿನಿಯರ್ ಬೊಕ್ಕ ಸಹಾಯಕ ಕಾರ್ಯನಿರ್ವಾಹಕ (ಇನ್ಸ್ಟ್ರುಮೆಂಟೇಶನ್)–11
ಸಹಾಯಕ ಇಂಜಿನಿಯರ್ ಬೊಕ್ಕ ಸಹಾಯಕ ಕಾರ್ಯನಿರ್ವಾಹಕ (ಕಂಪ್ಯೂಟರ್ ಸೈನ್ಸ್)–5
ಸಹಾಯಕ ಇಂಜಿನಿಯರ್ ಬೊಕ್ಕ ಸಹಾಯಕ ಕಾರ್ಯನಿರ್ವಾಹಕ (ರಸಾಯನಶಾಸ್ತ್ರ)–1
ವಿದ್ಯಾರ್ಹತೆ:
ಎಂಆರ್‌ಪಿಎಲ್‌ಡ್ ಖಾಲಿ ಇಪ್ಪುನ ಬೇಲೆಗಾದ್ ಅರ್ಹ ಅಭ್ಯರ್ಥಿಲು ಸಿಎ, ಐಸಿಎಐ, ಸಿಎಂಅ, ಬಿಎಸ್ಸಿ, ಬಿಇ, ಬಿಟೆಕ್‌, ಎಂಬಿಎ, ಸ್ನಾತಕೋತ್ತರ ಡಿಪ್ಲೊಮಾ, ಸ್ನಾತಕೋತ್ತರ ಪದವಿ, ಎಂಎಸ್ಸಿ ಮುಗಿತ್ ದ್ ಇಪ್ಪೊಡು.
ವಯೋಮಿತಿ ವಿವರ:
ಖಾಲಿ ಇಪ್ಪುನ ಬೇಲೆಗ್ ಅರ್ಹ ಅಭ್ಯರ್ಥಿಲೆನ ಪ್ರಾಯ ಜನವರಿ 15, 2023ಕ್ 27 ವರ್ಷ ರ್ದ್ ಜಾಸ್ತಿ ಆಯೆರೆ ಬಲ್ಲಿ.
ಹಿಂದುಳಿದ ವರ್ಗದಕ್ಲೆಗ್ 3 ವರ್ಷ ಸಡಿಲಿಕೆ, ಎಸ್‌ಸಿ, ಎಸ್‌ಟಿ ಅಭ್ಯರ್ಥಿಲೆಗ್ 5 ವರ್ಷ ಸಡಿಲಿಕೆ, ಪಿಡಬ್ಲ್ಯೂಡಿ ಅಭ್ಯರ್ಥಿಲೆಗ್ 10 ವರ್ಷ ಸಡಿಲಿಕೆ ಕೊರಿಯೆರ್.
ಅರ್ಜಿ ಶುಲ್ಕ:
ಸಾಮಾನ್ಯ, ಹಿಂದುಳಿದ ಬೊಕ್ಕ ಇಡಬ್ಲ್ಯೂಎಸ್‌ ಅಭ್ಯರ್ಥಿಲೆಗ್ ₹ 118 ಅರ್ಜಿ ಶುಲ್ಕ ನಿಗದಿ ಆತ್ಂಡ್. ಎಸ್‌ಸಿ, ಎಸ್‌ಟಿ, ಪಿಡಬ್ಲ್ಯೂಡಿ ಬೊಕ್ಕ ಮಾಜಿ ಸೈನಿಕೆರೆಗ್ ಅರ್ಜಿ ಶುಲ್ಕ ಇಪ್ಪುಜಿ.
ಆಯ್ಕೆ ಪ್ರಕ್ರಿಯೆ:
ಅಭ್ಯರ್ಥಿಲೆನ್ ಸಂದರ್ಶನ ಮುಖೇನ ಆಯ್ಕೆ ಮಲ್ಪುವೆರ್.

ವೀರ ಯೋಧ ಗ್ರೂಪ್ ಕ್ಯಾಪ್ಟನ್ ಕುಬೆವೂರು ದೊಡ್ಡಮನೆ ದಿನೇಶ್ಚಂದ್ರ ಭಂಡಾರಿ ಮಾರ್ಗದ ಪುದರ್ ದೀಪುನ ಲೇಸ್

ಮುಲ್ಕಿ : ವೀರ ಯೋಧ ಗ್ರೂಪ್ ಕ್ಯಾಪ್ಟನ್ ಕುಬೆವೂರು ದೊಡ್ಡಮನೆ ದಿನೇಶ್ಚಂದ್ರ ಭಂಡಾರಿ ಮಾರ್ಗದ ಪುದರ್ ದೀಪುನ ಲೇಸ್ ಡಿ.23 ಶುಕ್ರಾರದಾನಿ ಬಯ್ಯಗ್ 3:30 ಕ್ ಮುಲ್ಕಿ ಗೇರುಕಟ್ಟೆ ರಾಜ್ಯ ಮಾರ್ಗ ಕಿನ್ನಿಗೋಳಿ ಶಿವ ಭಜನಾ ಮಂಡಳಿದ ಕೈತಲ್ ನಡಪರೆ ಉಂಡು.

ಈ ಲೇಸ್ ಡ್ ಕುಡ್ಲ ಸಂಸದೆರ್ ನಳಿನ್ ಕುಮಾರ್ ಕಟೀಲ್ ನಾಮಫಲಕ ಉದಿಪನ ಮಲ್ಪರೆ ಉಲ್ಲೆರ್. ಮುಲ್ಕಿ-ಬೆದ್ರ ಶಾಸಕೆರ್ ಉಮಾನಾಥ ಕೋಟ್ಯಾನ್ ಲೇಸ್ ನ್ ಉದಿಪನ ಮಲ್ಪುವೆರ್. ಅಧ್ಯಕ್ಷತೆನ್ ಮುಲ್ಕಿ ನಗರ ಪಂಚಾಯತ್ ಅಧ್ಯಕ್ಷೆರ್ ಸುಭಾಷ್ ಶೆಟ್ಟಿ ಒಯಿಸೊನ್ವೆರ್. ಮಲ್ಲ ಬಿನ್ನೆರಾದ್ KEONICS ಅಧ್ಯಕ್ಷೆರ್ ಹರಿಕೃಷ್ಣ ಬಂಟ್ವಾಳ, ಕುಡ್ಲ ಬಂಟರ ಯಾನೆ ನಾಡವರ ಮಾತೃ ಸಂಘ (ರಿ.) ದ ಅಧ್ಯಕ್ಷೆರ್ ಅಜಿತ್ ರೈ ಮಾಲಾಡಿ, ಕುಡ್ಲ ಸ್ಮಾರ್ಟ್ ಸಿಟಿ ಲಿ.‌ ಜನರಲ್ ಮ್ಯಾನೇಜರ್ (Tech), ಅರುಣ್ ಪ್ರಭಾ ಕೆ.ಎಸ್, ಮುಲ್ಕಿ ನಗರ ಪಂಚಾಯತ್ ಉಪಾಧ್ಯೆಕ್ಷೆರ್ ಸತೀಶ್ ಅಂಚನ್, ಮುಲ್ಕಿ ನಗರ ಪಂಚಾಯತ್ ಮುಖ್ಯಾಧಿಕಾರಿ ಪಿ.ಚಂದ್ರ ಪೂಜಾರಿ ಬರಿಯೆರೆ ಉಲ್ಲೆರ್ ಪಂದ್ ಗ್ರೂಪ್ ಕ್ಯಾಪ್ಟನ್ ಕುಬೆವೂರು ದೊಡ್ಡಮನೆ ದಿನೇಶ್ಚಂದ್ರ‌ ಭಂಡಾರಿ ಕುಟುಂಬದಕುಲು ಲೆಪ್ಪೋಲೆಡ್ ತೆರಿಪಾದೆರ್.

ಥಾಯ್ಲೆಂಡ್ ವಿಶ್ವ ಜಾದೂ ಸಮ್ಮೇಳನಡ್ ಕುದ್ರೋಳಿ ಗಣೇಶ್‌ ಮೆರೆಗ್ ಅಂತಾರಾಷ್ಟ್ರೀಯ ಮಟ್ಟದ 2 ಪುರಸ್ಕಾರ

ಥಾಯ್ಲೆಂಡ್ ಡ್ ಇಂಚಿಪ್ಪ ನಡತಿನ ವಿಶ್ವ ಜಾದೂ ಸಮ್ಮೇಳನಡ್ ಜಾದೂಗಾರೆ ಕುದ್ರೋಳಿ ಗಣೇಶ್‌ ಮೇರ್ ಪ್ರದರ್ಶನ ಮಲ್ತಿನ ” ತುಳುನಾಡ ತುಡರ್ ಚೆಂಡ್” ಜಾದೂಗ್ ಅಂತರ್ರಾಷ್ಟ್ರೀಯ ಮಟ್ಟದ 2 ಪ್ರಶಸ್ತಿ ತಿಕ್ ದ್ಂಡ್.

ಜಗತ್ ದ ಮಸ್ತ್ ಪುರಾತನ ಜಾದೂ ಆದಿಪ್ಪುನ ಕಪ್ಸ್‌ ಆಂಡ್ ಬಾಲ್ಸ್ ಮ್ಯಾಜಿಕ್‌ ನ್ ಕುದ್ರೋಳಿ ಗಣೇಶ್ ಮೇರ್ ಪೊಸ ತಂತ್ರಗಾರಿಕೆದ ಮುಖೇನ ತುಳುಭಾಷೆ ಬೊಕ್ಕ ಪಾಡ್ದನದ ಮುಖೇನ ತೂಪಾಯಿನ ಸೃಜನಶೀಲತೆನ್ ಪರಿಗಣಿಸಾದ್, ಹೆಚ್ಚ ಸದಸ್ಯೆರ್ ಇಪ್ಪುನ ಜಗತ್ ದ ಮಲ್ಲ ಜಾದೂ ಸಂಸ್ಥೆ ಪನ್ಪುನ ಪುದರ್ ಇಪ್ಪುನ ಅಮೆರಿಕಾದ ಇಂಟರ್ನ್ಯಾಶನಲ್ ಸೊಸೈಟಿ ಆಫ್ ಮ್ಯಾಜಿಕ್ ಸಂಸ್ಥೆ “ಮರ್ಲಿನ್ ಮೆಡಲ್ ” ಕೊರ್ದು ಮಾನಾದಿಗೆ ಮಲ್ತ್ಂಡ್. ತುಳುನಾಡ್ ತುಡರ್ ಚೆಂಡ್ ಜಾದೂದ ಪೊಸತನನ್ ಗಮನಿಸಾದ್, ವಿಶ್ವ ಜಾದೂ ಸಮ್ಮೇಳನ ರಚನೆ ಮಲ್ತಿನ ಥಾಯ್ಲ್ಯಾಂಡ್‌ ಇಂಟರ್ ನ್ಯಾಶನಲ್ ಅಕಾಡೆಮಿ ಆಫ್ ಮ್ಯಾಜಿಕ್ ಸಂಸ್ಥೆ ” ಮೋಸ್ಟ್‌ ಒರಿಜಿನಲ್ ಆಕ್ಟ್ ” ಪ್ರಶಸ್ತಿ ಕೊರ್ದು ಪುರಸ್ಕಾರ ಮಲ್ತೆರ್.

ಇಂಟರ್ನ್ಯಾಶನಲ್ ಸೊಸೈಟಿ ಆಫ್ ಮ್ಯಾಜಿಕ್ ಸಂಸ್ಥೆದ ಅಧ್ಯಕ್ಷೆರಾಯಿನ ಅಮೆರಿಕಾದ ಜಾದೂಗಾರೆ ಟೋನಿ ಹಸೀನಾ ಬೊಕ್ಕ ಉಕ್ರೇನಿದ ಜಾದೂಗಾರೆ ವೊರೋನಿ ಮೊಕುಲು ಕುದ್ರೋಳಿ ಗಣೇಶ್ ಮೆರೆಗ್ ಪುರಸ್ಕಾರ ಕೊರ್ದು ಮಾನಾದಿಗೆ ಮಲ್ತೆರ್. ಥಾಯ್ಲ್ಯಾಂಡ್‌ ಇಂಟರ್ನ್ಯಾಶನಲ್‌ ಅಕಾಡೆಮಿ ಆಫ್ ಮ್ಯಾಜಿಕ್ ಸಂಸ್ಥೆ ಅಧ್ಯಕ್ಷೆರಾಯಿನ ಜಾದೂಗಾರೆ ಮಮದಾ ಬೊಕ್ಕ ಭಾರತದ ದಿಲ್ಲಿ ಸ್ಕೂಲ್‌ ಆಫ್‌ ಆಫ್ ಮ್ಯಾಜಿಕ್ ಸಂಸ್ಥೆದ ಅಧ್ಯಕ್ಷೆರಾಯಿನ ಜಾದೂಗಾರೆ ರಾಜ್ ಕುಮಾರ್‌ ಇತ್ತೆರ್. ಹಾಂಕಾಂಗ್ ಜಾದೂಗಾರೆರಾಯಿನ ಅಲ್ಬರ್ಟ್ ಟಾಮ್ ಬೊಕ್ಕ, ಇಂಡೋನೇಷಿಯಾದ ಜಾದೂಗಾರೆ ಹ್ಯಾಂಡಿ, ಸಿಂಗಾಪುರದ ಜಾದೂಗಾರೆ ಕಸ್ಸಿಡಿಲೀ ಮೊಕುಲು ಆಯ್ಕೆ ಸಮಿತಿಡ್ ಇತ್ತೆರ್. ಬ್ಯಾಂಕ್ ದ ಫ್ಯಾಶನ್‌ ಐಲ್ಯಾಂಡ್ ಮಾಲ್ ಪ್ರಾಂಗಣಡ್ ನಡತಿನ ಐನ್ ದಿನತ ವಿಶ್ವಜಾದೂ ಸಮ್ಮೇಳನಡ್ ಜಗತ್ ದ ಪತ್ತೆಕ್ ಹೆಚ್ಚ ದೇಶಲೆನ ನೂದೆರ್ದ್ ಹೆಚ್ಚ ಜಾದೂಗಾರೆರ್ ಪಾಲ್ ಪಡೆದಿತ್ತೆರ್.

ಡಿ.23:ಪದ್ಮಶ್ರೀ ಸಾಲು ಮರದ ತಿಮ್ಮಕ್ಕ ಅಭಿಮಾನಿ ಬಳಗ ಪಕ್ಷಿಕೆರೆ ನೆತ್ತ ವತಿರ್ದ್ ನಡ್ತಿನ ಪೆಲ ಬೊಕ್ಕ ದೇವುದಾರೆ ಮರತ್ತ ಬೊಳ್ಳಿ ಪರ್ಬದ ಆಚರಣೆ

ಹಳೆಯಂಗಡಿ: ಪದ್ಮಶ್ರೀ ಸಾಲು ಮರದ ತಿಮ್ಮಕ್ಕ ಮೆರೆರ್ದ್ ಪ್ರೇರಣೆ ಆಯಿನ ಪರಿಸರಪ್ರೇಮಿ, ಉದ್ಯಮಿ ವಾಲ್ಟರ್ ಡಿ’ ಸೋಜ ಪಕ್ಷಿಕೆರೆ ಮೇರ್ 1997ನೇ ಇಸವಿಡ್ ಸ್ಥಾಪನೆ ಮಲ್ದಿನ ಪದ್ಮಶ್ರೀ ಸಾಲುಮರದ ತಿಮ್ಮಕ್ಕ ಅಭಿಮಾನಿ ಬಳಗದ ಮುತಾಲಿಕೆಡ್ ಪಕ್ಷಿಕೆರೆ ಚರ್ಚ್ ದ ಧರ್ಮ ಗುರುಕುಲಾದಿತ್ತಿನ ಎಲ್ಯಾಸ್ ಡಿಸೋಜ ಬೊಕ್ಕ ಅಪಗದ ಸಚಿವೆರಾದಿತ್ತಿನ ಕೆ. ಅಮರನಾಥ ಶೆಟ್ಟಿ ಮೊಕುಲು ನಡ್ತಿನ ಪೆಲತ್ತ ಬೊಕ್ಕ ದೇವುದಾರೆ ಮರತ 25 ನೇ ಬೊಳ್ಳಿ ಪರ್ಬದ ಆಚರಣೆ ಡಿ.23 ಶುಕ್ರಾರದಾನಿ ಬಯ್ಯಗ್ 5 ಗಂಟೆಗ್ ಪಕ್ಷಿಕೆರೆತ್ತ ಬ್ಯಾಂಕ್ ಆಫ್ ಬರೋಡಾ ಕಚೇರಿದ ಎದುರು ನಡಪರೆ ಉಂಡು.

ಈ ಪೊರ್ತುಡು ದಿ‌.ಕೆ. ಅಮರನಾಥ ಶೆಟ್ಟಿ ಬೊಕ್ಕ ದಿ. ಎಲ್ಯಾಸ್ ಡಿಸೋಜ ಮೊಕ್ಲೆನ ನೆಂಪುದ ಲೇಸ್ ಲ ನಡಪುಂಡು ಪಂದ್ ಸಾಲು ಮರದ ತಿಮ್ಮಕ್ಕ ಅಭಿಮಾನಿ ಬಳಗದ ಕಾರ್ಯಕರ್ತೆರಾಯಿನ ವಾಲ್ಟರ್ ಡಿ’ ಸೋಜ ಪಕ್ಷಿಕೆರೆ, ಲಗೋರಿ ಎಮ್ ಸಿಕ್ವೇರಾ, ಪ್ರವೀಣ್ ನಜ್ರೆತ್, ರಂಗನಾಥ ರಾವ್, ಭಾಸ್ಕರ್ ಅಮಿನ್, ಲೋಯ್ಡ್ ಡಿ’ ಸೋಜ, ಜಾಕ್ಸನ್ ಸಲ್ಡಾನ್ನ, ಚೇತನ್ ರೋಡ್ರಿಗಸ್, ಜೋಯೆಲ್ ಡಿ’ ಸೋಜ, ಸುನಿಲ್ ಭಂಡಾರಿ, ಜೋಯೆಲ್ ಪಿಂಟೊ, ಶರಣ್ ಡಿ.ಸೋಜ ಮೊಕುಲು ಲೆಪ್ಪೋಲೆಡ್ ತೆರಿಪಾದೆರ್.

ಜೈ ತುಲುನಾಡ್ (ರಿ.) ಬೆಂಗ್ಲೂರ್ ಎಗ್ಗೆದ 2023-24 ನೇ ಸಾಲ್ ದ ಪೊಸ ಪದುಕೆರೆನ ಆಯ್ಕೆ

ಜೈ ತುಲುನಾಡ್ (ರಿ.) ಬೆಂಗ್ಲೂರ್ ಎಗ್ಗೆದ 2023-24 ನೇ ಸಾಲ್ ದ ಪೊಸ ಪದುಕೆರೆನ ಆಯ್ಕೆ ಲೇಸ್ ಡಿ.18 ದಾನಿ ಜಯಪ್ರಸಾದ್ ತುಲುನಾಡ್ ಮೇರ್ನ ಗುರ್ಕಾರ್ಮೆಡ್ ಜೈ ತುಲುನಾಡ್(ರಿ.) ಸಂಘಟನೆ ಬೆಂಗ್ಲೂರ್ ಎಗ್ಗೆದ ಕೂಡು ಪಟ್ಟಾಂಗ, ಮೆಜೆಸ್ಟಿಕ್ ದ ಸ್ವಾಗತ್ ಹೋಟೆಲ್ ಡ್ ನಡತ್ಂಡ್.

ಈ ಸಭೆಟ್ ಇತ್ತೆ ಕಮಿಟಿ ಕರಿನ ಮೂಜಿ ವರ್ಷೊದಿಂಚ ಮಲ್ತಿನ ಕೆಲಸೊದ ಬಗೆಟ್ ಪಾತೆರಕತೆ ನಡತ್ಂಡ್. ಅಂಚನೆ ಸಂಸ್ಥಾಪಕ ಸಮಿತಿದ ನಿರ್ಣಯದಂಚನೆ, ಪೊಸ ಕಮಿಟಿ ರಚನೆ ಮಲ್ಪುನ ಬಗೆಟ್ ಸರ್ವ ಸದಸ್ಯೆರೆನ್ ದುಂಬು ದೀದ್ ತೀರ್ಮಾನ ಮಲ್ತೆರ್. ಈ ಪೊರ್ತುಡು ಜೈ ತುಲುನಾಡ್(ರಿ‌.) ಸಂಘಟನೆದ ಸಂಸ್ಥಾಪಕ ಕಮಿಟಿದ ಸದಸ್ಯೆರಾಯಿನ ಶರತ್ ಕೊಡವೂರು, ಸುಮಂತ್ ಬೈದ್ಯೆ, ಯತೀಶ್ ಕುಮಾರ್ ಒತ್ತು ಪಾಲ್ ಇತ್ತ್ ದ್ ಪದಾಧಿಕಾರಿಲೆನ್ ಆಯ್ಕೆ ಮಲ್ತೆರ್. ರಂಜನ್ ಎಸ್.ವೈ ಲೇಸ್ ದ ಸುಧಾರಿಕೆ ಮಲ್ತೆರ್. ಪೊಸ ಕಮಿಟಿಡ್ ಕರ್ಮವೀರ ಚಕ್ರ ಪುರಸ್ಕೃತೆರ್, ಇಂಡಿಯನ್ ರೂಟ್ಸ್ ಫೌಂಡೇಷನ್ ದ ಸಂಸ್ಥಾಪಕೆರಾಯಿನ ವಿಶಾಲ್ ಕೊಡಿಯಲ್ ಗುರ್ಕಾರ್ಲು ಆದ್ ಆಯ್ಕೆ ಆಯೆರ್. ಒತ್ತು ಗುರ್ಕಾರ್ಲಾದ್ ಚೇತು ಅಂಚನ್, ಕಾರ್ಯಂತೆರಾದ್ ನಿಧೀಶ್ ಶೆಟ್ಟಿ, ಒತ್ತು ಕಾರ್ಯಂತೆರಾದ್ ಅನುದೀಪ್ ಶೆಟ್ಟಿ, ಪಣವುದ ಪಾಲವೆರಾದ್ ಧನಂಜಯ ಆಚಾರ್ಯ, ಸಂಘಟನಾ ಕಾರ್ಯಂತೆರಾದ್ ರಂಜನ್ ಎಸ್.ವೈ, ಜಯಪ್ರಸಾದ್ ತುಲುನಾಡ್, ಯತೀಶ್ ಕುಮಾರ್ ಆಯ್ಕೆ ಆಯೆರ್. ಪೊಸ ಗುರ್ಕಾರ್ಲಾದ್ ಆಯ್ಕೆ ಆಯಿನ ವಿಶಾಲ್ ಕೊಡಿಯಲ್ ಪಾತೆರ್ದ್, ತುಳು ಭಾಷೆನ್ ಬುಲೆಪಾವುನ ನೆಲೆಟ್ ಜೈ ತುಲುನಾಡ್(ರಿ.) ಸಂಘಟನೆ ಬೆಂಗ್ಲೂರ್ ಎಗ್ಗೆ ನನ ದುಂಬುಗ್ಲಾ ಎಡ್ಡೆ ಕೆಲಸ ಮಲ್ಪುಂಡು, ತುಳು ಪರವಾದ್ ಕೆಲಸ ಮಲ್ಪುನಕ್ಲೆಗ್ ಖಂಡಿತವಾದ್ಲಾ ಬೆರಿತಾಂಗ್ ಆದ್ ಉಂತುವ, ಈ ಬಗೆಟ್ ಮಾತ ತುಲುವೆರ್ ಸಕಾಯ ಕೊರೊಡು ಪಂದ್ ಕೇನೊಂಡೆರ್.

New office bearers of the Banglore unit of Jai Tulunadu (R) for the year 2023-24

The selection of the new office bearers of Jai Tulunadu ( R) was held on December 18 th at Bangalore.The program was presided by the president of Jai Tulunadu Jaiprasad Tulunadu.

The present committee brief about the activities of the association for the past three years.The selection the new committee was put forward for approval from the founding committee members including Sharath Kodavoor, Sumanth Baidya, Yateesh Kumar.Ranjan S.Y hosted the program.

Vishal Kodial a Karmaveera Chakra awardee and founder of Indian Roots foundation was selected as president.
Vice President Chetu Anchan, Secretary Nidish Shetty, joint Secretary Anudeep Shetty, Treasurer Dhananjay Acharya, Organising Secretary Ranjan S.Y, Jayaprakash Tulunadu, Yatish Kumar have been selected.

Speaking on the occasion the newly elected President Vishal Kodial the association will strive for the development and propagation of Tulu language.He requested for the cooperation of all members for the unified efforts for the betterment of Tulu language.

ಹೊಕ್ಕಾಡಿಗೋಳಿ “ವೀರ-ವಿಕ್ರಮ” ಜೋಡು ಕರೆ ಕಂಬುಲ ಕೂಟದ ರಿಸಲ್ಟ್

ಹೊಕ್ಕಾಡಿಗೋಳಿ “ವೀರ-ವಿಕ್ರಮ” ಜೋಡುಕರೆ ಕಂಬುಲ ಕೂಟಡ್ ಪಾಲ್ ಪಡೆಯಿನ ಎರ್ಲೆನ ಸಂಖ್ಯೆ 150 ಜತೆ.

ಕನೆ ಪಲಯಿ: 2 ಜತೆ
ಅಡ್ಡ ಪಲಯಿ: 6 ಜತೆ
ಬಲ್ಲ್ ದ ಮಲ್ಲ : 25 ಜತೆ
ನಾಯೆರ್ ದ ಮಲ್ಲ: 25 ಜತೆ
ಬಲ್ಲ್ ದ ಎಲ್ಯ: 19 ಜತೆ
ನಾಯೆರ್ ಎಲ್ಯ: 73 ಜತೆ

ಕನೆ ಪಲಯಿದ ಪಾಲ್ ಇನಾಮು:
1.ವಾಮಂಜೂರು ತಿರುವೈಲುಗುತ್ತು ನವೀನ್ಚಂದ್ರ ಆಳ್ವ
ಪಲಯಿ ಮುಟ್ಟಿನಾರ್: 2.ಬೈಂದೂರು ಭಾಸ್ಕರ ದೇವಾಡಿಗ, ಬೇಲಾಡಿ ಬಾವ ಅಶೋಕ್ ಶೆಟ್ಟಿ
ಪಲಯಿ ಮುಟ್ಟಿನಾರ್ : ತೆಕ್ಕಟ್ಟೆ ಸುಧೀರ್ ದೇವಾಡಿಗ
ಅಡ್ಡ ಪಲಯಿ:
ಸುರುತ: ಇರುವೈಲು ಪಾನಿಲ ದೇವಕಿ ಬಾಡ ಪೂಜಾರಿ
ಪಲಯಿ ಮುಟ್ಟಿನಾರ್: ಭಟ್ಕಳ ಹರೀಶ್
ರಡ್ಡನೇ: ವಾಲ್ಪಾಡಿ ಹಾಲಾಜೆ ಲೂಯಿಸ್ ಲಾರೆನ್ಸ್ ಸಲ್ದಾನ
ಪಲಯಿ ಮುಟ್ಟಿನಾರ್: ಬೈಂದೂರು ಮಹೇಶ್ ಪೂಜಾರಿ
ಬಲ್ಲ್ ದ ಮಲ್ಲ ಎರ್ಲು:
ಸುರುತ: ಮಿಜಾರ್ ಪ್ರಸಾದ್ ನಿಲಯ ಪ್ರಖ್ಯಾತ್ ಶಕ್ತಿ ಪ್ರಸಾದ್ ಶೆಟ್ಟಿ “ಬಿ”
ಗಿಡತಿನಾರ್: ಮಿಜಾರು ಅಶ್ವಥಪುರ ಶ್ರೀನಿವಾಸ ಗೌಡ
ರಡ್ಡನೇ: ಬೆದ್ರ ಕರಿಂಜೆ ವಿನು ವಿಶ್ವನಾಥ ಶೆಟ್ಟಿ “ಬಿ”
ಗಿಡತಿನಾರ್: ಬೈಂದೂರು ವಿವೇಕ್
ಹಗ್ಗ ಕಿರಿಯ:
ಸುರುತ: ಬೆಳುವಾಯಿ ಪುತ್ತಿಗೆ ಪೆರೋಡಿ ಗುತ್ತು ತಾನಾಜಿ ಬಿ ಶೆಟ್ಟಿ
ಗಿಡತಿನಾರ್: ಮಿಜಾರು ಅಶ್ವಥಪುರ ಶ್ರೀನಿವಾಸ ಗೌಡ
ರಡ್ಡನೇ: ಹೊಸಬೆಟ್ಟು ಏರಿಮಾರು ಬರ್ಕೆ ಚಂದ್ರಹಾಸ ಸಾಧು ಸನಿಲ್
ಗಿಡತಿನಾರ್: ಬೈಂದೂರು ವಿವೇಕ್
ನಾಯೆರ್ ಮಲ್ಲ:
ಸುರುತ: ಮಾಣಿ ಸಾಗು ಹೊಸಮನೆ ಉಮೇಶ್ ಮಹಾಬಲ ಶೆಟ್ಟಿ
ಗಿಡತಿನಾರ್: ಪಟ್ಟೆ ಗುರು ಚರಣ್
ರಡ್ಡನೇ: ಕೌಡೂರು ಬೀಡು ತುಷಾರ್ ಮಾರಪ್ಪ ಭಂಡಾರಿ
ಗಿಡತಿನಾರ್: ಬಾರಾಡಿ ನತೇಶ್
ನೇಗಿಲು ಕಿರಿಯ:
ಸುರುತ: ವಾಮದಪದವು ಬುಡೋಳಿ ಕಲ್ಲಾಪು ಉಮಾನಾಥ್ ಶೆಟ್ಟಿ
ಗಿಡತಿನಾರ್: ಕಕ್ಕೆಪದವು ಪೆಂರ್ಗಾಲು ಕೃತಿಕ್
ರಡ್ಡನೇ: ರೆಂಜಾಳ ಸಾನದ ಬಾಕ್ಯಾರು ನಿಮಿಷ್ ಮಹೇಶ್ ಪೂಜಾರಿ “ಎ”
ಗಿಡತಿನಾರ್: ಭಟ್ಕಳ ಶಂಕರ್

ಜ.19-30 : “ತುಳುನಾಡ ಕೈಲಾಸ” ಪಾವಂಜೆ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದೇವಸ್ಥಾನಡ್ ಬ್ರಹ್ಮಕಲಶ ಉಚ್ಚಯ

ಪ್ರತಿ ದಿನಲ 5000 ಭಕ್ತೆರ್ , ಬ್ರಹ್ಮಕಲಶದಾನಿ 20,000 ಭಕ್ತೆರ್ ಬರ್ಪಿನ ಅಂದಾಜಿ

ಹಳೆಯಂಗಡಿ: “ತುಳುನಾಡ್ ದ ಕೈಲಾಸ” ಪನ್ಪಿನ ಪುಗರ್ತೆ ಪಡೆದಿನ ಪಾವಂಜೆ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದೇವಸ್ಥಾನ ದ ಬ್ರಹ್ಮಕಲಶ ಉಚ್ಚಯ 2023 ನೇ ವರ್ಷದ ಜನವರಿ 19 ಗುರುವಾರೊರ್ದು 30 ಸೋಮಾರ ಮುಟ್ಟ ಲಕ್ಷಾಂತರ ಭಕ್ತೆರೆನ ಸಮ್ಮುಖೊಡು ಭಾರಿ ಶ್ರದ್ಧಾ ಭಕ್ತಿಡ್ ಅಂಚೆನೆ ಗೌಜಿಡ್ ನಡಪರೆ ಉಂಡು ಪಂದ್ ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶ ಉಚ್ಚಯ ಸಮಿತಿದ ಪ್ರಧಾನ ಕಾರ್ಯದರ್ಶಿ ಚಂದ್ರಶೇಖರ್ ನಾನಿಲ್ ತೆರಿಪಾಯೆರ್.

ಆರ್ ಪಾವಂಜೆದ ಮಿತ್ತ ದೇವಸ್ಥಾನದ ಅಂಗಣೊಡು ಐತಾರ (ಡಿ.18) ನಡತಿನ ಸುದ್ದಿಗೋಷ್ಠಿಡ್ ಪಾತೆರ್ದ್ ನೆತ್ತ ಮಾಹಿತಿ ಕೊರಿಯೆರ್. ಪಿರಾಕ್ ದ ಕಾಲೊಡು ನಂದಿನಿ ತುದೆಬರಿತ್ತ ಪಾವಂಜೆದ ಪೊರ್ಲುದ ಪರಿಸರೊಡು ಎತ್ತರದ ಜಾಗೆಡ್ ಲಿಂಗರೂಪೊಡು ಉದಿಪನ ಆದ್ “ಪಾಳೆ ಉಂಜ ಮಹಾದೇವ” ಪನ್ಪಿ ಪುದರ್ ಡ್ ಪೂಜೆ ಪಡೆದ್ ಏಳ್ ಚೌಕ ಗ್ರಾಮಸ್ಥೆರ್ನ ಬೊಕ್ಕ ಭಕ್ತೆರ್ನ ಆರಾಧ್ಯ ದೇವೆರೆರಾದ್ ಇಷ್ಟಾರ್ಥ ಈಡೇರಿಕೆ ಮಲ್ತೊಂದು ಬೈದಿನ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದೇವಲ್ಯದ ಜೀರ್ಣೋದ್ಧಾರ ದ ಬೇಲೆ ಮುಕ್ಕಾಲ್ ವಾಸಿ ಮುಗಿದ್ಂಡ್. ತಾಂಬೂಲ ಪ್ರಶ್ನೆದ ಪ್ರಕಾರ ಕ್ಷೇತ್ರದ ಜೀರ್ಣೋದ್ಧಾರ ದ ಕಜ್ಜೊಗು ಜತ್ತ್ ದ್ 16 ಉಪಸಮಿತಿ ಮಲ್ತ್ ದ್ ಆಯಾ ಜಬದಾರಿಲೆನ್ ಪಟ್ ದ್ ಕೊರ್ತುಂಡು ಪಂದ್ ಆರ್ ತೆರಿಪಾಯೆರ್. ಬ್ರಹ್ಮಕಲಶದ ನಿಲೆಟ್ಟ್ ಪಾವಂಜೆ ಕ್ಷೇತ್ರ ಒಂಜಿ ಮಾಮಲ್ಲ ಪ್ರೇಕ್ಷಣೀಯ ಅಂಚೆನೆ ಮಲ್ಲ ಧಾರ್ಮಿಕ ಕೇಂದ್ರ ಆದ್ ಪರಿವರ್ತನೆ ಆವರೆ ಉಂಡು, ಚೇಳಾಯಿರು ಕಡೆರ್ದ್ ಪಾವಂಜೆ ಗ್ ಸಂಪರ್ಕ ಮಲ್ಪುನ ತೂಂಕನದ ಸಂಕ ನಿರ್ಮಾಣ ಅಂಚೆನೆ ಕ್ಷೇತ್ರದ ಸುತ್ತಮುತ್ತ 3000 ದೈಕ್ಲೆನ್ ನಡ್ಪಿನ ಯೋಜನೆ ಮಾತ ಉಂಡು. ದಾನಿಲೆನ ಬೊಕ್ಕ ಭಕ್ತೆರೆನ ಸಕಾಯೊಡು ಅವು ಪೂರ್ಣ ಆವರೆ ಉಂಡು ಪಂಡೆರ್.

ಸುಮಾರ್ 5 ಕೋಟಿ ಅಂದಾಜಿ ಕರ್ಚಿಡ್ ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶ ನಡಪರೆ ಉಂಡು.ರಾಜಮಾರ್ಗೊರ್ದು ಮಿತ್ತ ದೇವಸ್ಥಾನೊಗು ಸಂಪರ್ಕ ಮಲ್ಪುನ ರಸ್ತೆ ನಿರ್ಮಾಣ ಬೊಕ್ಕ ತುದೆ ಬರಿಟ್ ತಡೆಗೋಡೆ ನಿರ್ಮಾಣ ಯೋಜನೆ ಗ್ ಮಾನ್ಯ ಶಾಸಕೆರ್ ಉಮಾನಾಥ ಕೋಟ್ಯಾನ್ ಮೆರೆನ ಮುಕೇನ ರಾಜ್ಯ ಸರ್ಕಾರೊರ್ದು 4.5 ಕೋಟಿ ರೂ. ಅನುದಾನ ಮಂಜೂರು ಆತ್ಂಡ್ ಪಂದ್ ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶ ಉಚ್ಚಯ ಸಮಿತಿದ ಜೊತೆ ಕಾರ್ಯದರ್ಶಿ ರಾಮದಾಸ್ ಪಾವಂಜೆ ತೆರಿಪಾಯೆರ್. ದೇವಸ್ಥಾನೊಗು ಬರಿಯರೆ ರಸ್ತೆ ನಿರ್ಮಾಣ ಅತ್ತಾಂದೆ ಬಡಕಾಯಿ, ಮುಡಾಯಿ ಬೊಕ್ಕ ಪಡ್ಡಾಯಿದ ರಾಜಗೋಪುರದ ನವೀಕರಣ, ಪರತ್ತ್ ಮುಟ್ಟುಲೆನ ರಿಪೇರಿ, ಕುಡ ಮೂಜಿ ದಿಕ್ಕ್ ಡ್ ಲ ಮುಟ್ಟು ನಿರ್ಮಾಣ, ಪ್ರಾಯದಕ್ಲೆಗ್ ಬೊಕ್ಕ ಅಶಕ್ತೆರೆಗ್ ಮಿತ್ತ್ ಬರಿಯರೆ ಲಿಫ್ಟ್ , ದೇವಲ್ಯದ ಉಲಯಿ ಬೊಕ್ಕ ಪಿದಯಿ ಹಾಸ್ ಕಲ್ಲ್ , ಪೊಸತ್ತ್ ಚಂದ್ರಮಂಡಲ ತೇರ್, ರಕ್ತೇಶ್ವರಿ, ನಾಗನ ಕಟ್ಟೆ, ಗಣಪತಿ ಗುಡಿ ಮುಖಮಂಟಪ, ವಸಂತ ಮಂಟಪ ದ ನವೀಕರಣ ಬೇಲೆ ಮುಕ್ಕಾಲ್ ಅಂಶ ಮುಗಿದ್ಂಡ್. ಕರಿನ ಸೆಪ್ಟೆಂಬರ್ ತಿಂಗೊಲುರ್ದು ಚೌಕ ಗ್ರಾಮದ ಗ್ರಾಮಸ್ಥೆರ್, ಸಂಘ ಸಂಸ್ಥೆ ದಕುಲು ಶ್ರಮದಾನ ಮಲ್ತೊಂದುಲ್ಲೆರ್ ಪಂದ್ ಆರ್ ಪಂಡೆರ್. 2023ನೇ ಇಸ್ವಿದ ಜನವರಿ 19 ತಾರೀಕ್ ರ್ದ್ 30 ತಾರೀಕ್ ಮುಟ್ಟ ಅಷ್ಟಬಂಧ ಬ್ರಹ್ಮಕಲಶ ಉಚ್ಚಯ ಪ್ರತಿದಿನ ಧಾರ್ಮಿಕ ವಿಧಿವಿಧಾನ, ಅನ್ನಸಂತರ್ಪಣೆ, ಬೊಕ್ಕ ಸಾಂಸ್ಕೃತಿಕ ಕಾರ್ಯಕ್ರಮದೊಟ್ಟುಗು ಭಾರಿ ಗೌಜಿಡ್ ನಡಪರೆ ಉಂಡು. 19 ತಾರೀಕ್ ಗ್ ಕಾಂಡೆ ಉಗ್ರಾಣ ಮೂರ್ತ, ಮಧ್ಯಾಹ್ನ 3 ಗಂಟೆಗ್ ಪಡುಪಣಂಬೂರು ಅರಮನೆರ್ದ್ ಹಸಿರು ಹೊರೆ ಕಾಣಿಕೆ ಮೆರವಣಿಗೆ ಬರ್ರೆ ಉಂಡು. ಜ.22 ತಾರೀಕ್ ಗ್ ಸಾನಿಧ್ಯಡ್ ಶ್ರೀ ಮಹಾಲಿಂಗೇಶ್ವರ ಬೊಕ್ಕ ಪರಿವಾರ ದೇವೆರೆನ ಪುನರ್ ಪ್ರತಿಷ್ಠೆ ಆದ್ ಕೊಡಿ ಏರುಂಡು. ಜ.28 ಶನಿವಾರ ಬ್ರಹ್ಮಕುಂಭಾ ಭಿಷೇಕ ನಡಪರೆ ಉಂಡು.ಪ್ರತಿದಿನತ್ತ ಧಾರ್ಮಿಕ ಸಭಾ ಕಾರ್ಯಕ್ರಮೊಡು ಬೇತೆ ಬೇತೆ ಮಠತ್ತ ಸ್ವಾಮಿಲೆನ ಆಶೀರ್ವಚನ ಅಂಚೆನೆ ಕೇಂದ್ರ ಸಚಿವೆರ್, ರಾಜ್ಯ ಸಚಿವೆರ್, ಗಣ್ಯೆರ್ ಬಿನ್ನೆರ್ ಪಾಲ್ ಪಡೆವರೆ ಉಲ್ಲೆರ್ ಪಂದ್ ಆರ್ ತೆರಿಪಾಯೆರ್. ಉಚ್ಚಯದ ಪ್ರತಿದಿನಲ ಮಧ್ಯಾಹ್ನ 2.30 ಗಂಟೆರ್ದ್ ರಾತ್ರಿ 8 ಗಂಟೆ ಮುಟ್ಟ ನಡಪುನ ಸಾಂಸ್ಕೃತಿಕ ಕಾರ್ಯಕ್ರಮಕ್ಕದ ಲೆಡ್ ಪೌರಾಣಿಕ ಬೊಕ್ಕ ಭಾರತೀಯ ಸಂಸ್ಕೃತಿ ತೊಜಪಾವುನ ವಿಚಾರೊಗು ಆದ್ಯತೆ ಕೊರ್ತುಂಡು. ಬಯ್ಯಡ್ 6 -7 ಗಂಟೆ ಮುಟ್ಟ ಬೇತೆ ಬೇತೆ ಭಜನಾ ಮಂಡಳಿರ್ದ್ ಭಜನಾ ಸೇವೆ ನಡಪರೆ ಉಂಡು. ಭಕ್ತೆರೆಗ್ ರಡ್ಡ್ ಪೊರ್ತು ಉಪಾಹಾರ ಅಂಚೆನೆ ರಡ್ಡ್ ಪೊರ್ತು ಅನ್ನಸಂತರ್ಪಣೆ ನಡಪರೆ ಉಂಡು. ದಿನೊಕ್ಕು 5000 ಭಕ್ತೆರ್ ಬರ್ಪಿನ ನಿರೀಕ್ಷೆ ಉಂಡು. ಬ್ರಹ್ಮಕಲಶದ ದಿನ (ಜ.28)ಅಂದಾಜಿ 20 ಸಾರ ಜನ ಸೇರುನ ನಿರೀಕ್ಷೆ ಉಂಡು. ಅಯಿಕ್ಕ್ ಬೋಡಾಪಿನ ಪಾರ್ಕಿಂಗ್ ವ್ಯವಸ್ಥೆ ಅಂಚೆನೆ ಹೈವೇ ಡ್ ಖಂಡೆವುದಲ್ಪರ್ದ್ ಪಡುಪಣಂಬೂರು ಮುಟ್ಟ ಲೈಟಿಂಗ್ ವ್ಯವಸ್ಥೆ ಸೇರ್ದ್ ಮಾತ ವ್ಯವಸ್ಥೆ ಲ ಮಲ್ದ್ಂಡ್ ಪಂದ್ ರಾಮದಾಸ್ ಪಾವಂಜೆ ಪಂಡೆರ್. ಕ್ಷೇತ್ರದ ಪ್ರಧಾನ ಅರ್ಚಕೆರ್ ಪಿ.ವಾಸುದೇವ ಭಟ್ ಪಾತೆರ್ದ್, ಗರ್ಭಗುಡಿತ್ತ ಪ್ರಥಮಾವರಣ,ದ್ವಿತೀಯಾವರಣ ಬೊಕ್ಕ ತೃತೀಯಾವರಣ ಗಟ್ಟಿ ಇತ್ತಿನೆರ್ದಾವರ ಗರ್ಭಗುಡಿತ್ತ ನವೀಕರಣ ಮಲ್ಪುನ ಅವಶ್ಯಕತೆ ಬೈದಿಜಿ. ಉಲಯಿಡ್ ಇತ್ತಿನ ಪರ ಮಣ್ಣ್ ನ್ ದೆತ್ತ್ ದ್ ಪೊಸ ಮಣ್ಣ್ ಪಾಡ್ದ್ ಸಮತಟ್ಟ್ ಮಲ್ದ್ಂಡ್ ಪಂದ್ ತೆರಿಪಾಯೆರ್. ಸುದ್ದಿಗೋಷ್ಠಿಡ್ ಪವಿತ್ರಪಾಣಿ ಪಿ.ಗಣೇಶ್ ಭಟ್,ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶ ಉಚ್ಚಯ ಸಮಿತಿದ ಅಧ್ಯಕ್ಷೆರ್ ಪ್ರಕಾಶ್ ಎನ್ ಶೆಟ್ಟಿ, ಕೋಶಾಧಿಕಾರಿ ಅಂಚೆನೆ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಬಿ.ಸೂರ್ಯ ಕುಮಾರ್, ಜೊತೆ ಕೋಶಾಧಿಕಾರಿಲು ಸುಧಾಕರ ಆರ್.ಅಮೀನ್ ಬೊಕ್ಕ ಜ್ಯೋತಿ ರಾಮಚಂದ್ರ ಸದಸ್ಯೆರಾಯಿನ ಪ್ರಮೀಳಾ ಚಂದ್ರಶೇಖರ್, ಜನಾರ್ಧನ ಪಡುಪಣಂಬೂರು, ವ್ಯವಸ್ಥಾಪನಾ ಸಮಿತಿದ ರಘು ಕೆ.ದೇವಾಡಿಗ, ಸುಕುಮಾರ್ ಸಿ., ಸುಲೋಚನ ಮೊಕುಲು ಮಾತ ಇತ್ತೆರ್.

ಸಾಮಾಜಿಕ ಸೇವಾ ಮನೋಭಾವನೆದ ವಿಜಯ ಪಂಡಿತ್ ಮೆರೆಗ್ ಪ್ರಶಸ್ತಿದ ಮಿತ್ತ್ ಪ್ರಶಸ್ತಿ

ಸಾಮಾಜಿಕ ಸೇವಾ ಮನೋಭಾವನೆ ಇಪ್ಪುನ ನಾಯಕೆರಾದ್, ಧಾರ್ಮಿಕ ರಂಗದ ಮುಂದಾಳುವಾದ್, ಸಮಾಜಡ್ ಮಸ್ತ್ ಎತ್ತರಡ್ ಇಪ್ಪುನ ವಿಜಯ ಪಂಡಿತ್ ಉಪ್ಪಳ ಮೇರ್ ಮಲ್ಲ ಪಾಂಡಿತ್ಯ ಇತ್ತ್ಂಡಲ ಸರಳವಾದ್ ಸಾಮಾನ್ಯ ಸ್ತರದ ಅಸಾಮಾನ್ಯ ವ್ಯಕ್ತಿತ್ವದಾರ್.

ಮೇರ್ ಇಂಚಿಪ್ಪ ದೇಶದ ಪುಗರ್ತೆದ ಅಂಬೇಡ್ಕರ್ ಫೆಲೋಶಿಪ್ ಅವಾರ್ಡ್ ಪಡೆದ್, ಬೊಕ್ಕ ಶ್ರೀ ದೇವೆರೆನ, ಗುರು ಹಿರಿಯೆರೆನ ಆಶೀರ್ವಾದ ಪಡೆದ್, ಕಿರಿಯೆರೆನ ಪ್ರೀತಿಗ್ ಪಾತ್ರರಾತೆರ್.‌ ಇತ್ತೆ ಧನು ಮಾಸದ ಪುಣ್ಯ ಕಾಲದ ಸುರುತ ದಿನಟ್ ಆರ್ ಕುಡ ರಡ್ಡ್ ಸಂತೋಸುದ ಸುದ್ದಿ ಕೊರ್ತೆರ್.
2023 ಜನವರಿ 22 ದಾನಿ ಶೃಂಗೇರಿ ಜಗದ್ಗುರು ಶ್ರೀ ಶಂಕರ ಪೀಠದ ಧರ್ಮ ಪ್ರಜ್ಞ ಪ್ರಶಸ್ತಿಗ್ ಬೊಕ್ಕ ಜನವರಿ 23 ದಾನಿ ಕೇರಳ ರಾಜ್ಯದ ರಾಜಬೂಡು ತಿರುವನಂತಪುರಡ್ ನಡಪುನ ಪಂದಳದ ಅಯ್ಯಪ್ಪ ಸ್ವಾಮಿನ ದಿವ್ಯ ಜ್ಯೋತಿ ಪ್ರಶಸ್ತಿಗ್ ಆಯ್ಕೆ ಆತೆರ್. ಮೆರೆಗ್ ಶ್ರೀರಾಜ ಬೆಳ್ಚಪ್ಪಾಡ ಸೇವಾ ಟ್ರಸ್ಟ್ ಉದ್ಯಾವರ ಮಾಡ-ಮಂಜೇಶ್ವರ ಮೊಕುಲು ಎಡ್ಡೆಪ್ಪು ಬಯಕ್ ದೆರ್.

ಚೀನಾಡ್ ಕುಡ ಕೊರೋನಾ; ಆನ್ ಲೈನ್ ಕ್ಲಾಸ್ ಸುರು

ಬೀಜಿಂಗ್: ಚೀನಾಡ್ ಕೊರೊನಾ ಕುಡ ಜಾಸ್ತಿ ಆತ್ಂಡ್. ಶಾಂಘೈ ಸೇರ್ದ್ ಸುಮಾರ್ ಪೇಂಟೆಲೆಡ ಪರಿಸ್ಥಿತಿ ಮಸ್ತ್ ಗಂಭೀರ ಆತ್ಂಡ್. ಶಾಂಘೈ ಪೇಂಟೆಡ್ ಶಿಕ್ಷಣ ಸಂಸ್ಥೆಲೆಗ್ ರಜೆ ಘೋಷಣೆ ಆತ್ಂಡ್.

ಕಲ್ಪಾರ್ಥಿಲೆಗ್ ಆನ್ ಲೈನ್ ಕ್ಲಾಸ್ ಕುಡ ಸುರು ಆತ್ಂಡ್. ನರ್ಸರಿ ಬೊಕ್ಕ ಶಿಶು ಪಾಲನಾ ಕೇಂದ್ರಲೆನ್ ಮುಚ್ಚೆರೆ ಆದೇಶ ಕೊರ್ತುಂಡು. ಕೊರೋನಾರ್ದ್ ತೀರ್ ಪೋಯಿನ ವ್ಯಕ್ತಿಲೆನ ಪುನನ್ ಗುಂಡಿಗ್ ಪಾಡಿಯೆರೆ ಮೂಜಿ ದಿನ ಕಾಪೊಡಾಯಿನ ಪರಿಸ್ಥಿತಿ ನಿರ್ಮಾಣ ಆತ್ಂಡ್. ವಿಶ್ವದ ಬೇತೆ ರಾಷ್ಟ್ರಲೆಡ್ ಕೊರೋನಾ ನಿಯಂತ್ರಣಗ್ ಬರೊಂದು ಇಪ್ಪುನ ಪೊರ್ತುಡು ಚೀನಾಡ್ ಈ ಸಂಗತಿ ನಡತ್ಂಡ್.

ಮುಲ್ಕಿಡ್ ಬೊಂಬೈ ಬಿಲ್ಲವರ ಅಸೋಸಿಯೇಷನ್ ಮುತಾಲಿಕೆಡ್ ವಿದ್ಯಾರ್ಥಿ ವೇತನ ಪಟ್ಟುನ ಲೇಸ್

ಮುಲ್ಕಿ : ಬಿಲ್ಲವರ ಅಸೋಸಿಯೇಷನ್ ಮುಂಬೈ ಮುತಾಲಿಕೆಡ್ 2022 ನೇ ಇಸ್ವಿದ ಊರುದ ಪ್ರತಿಭಾವಂತ ಜೋಕುಲೆಗ್ ವಿದ್ಯಾರ್ಥಿ ವೇತನ ಪಟ್ಟುನ ಲೇಸ್ ಐತಾರ ಮುಲ್ಕಿದ ಜಿಎಸ್ ಬಿ ಹಾಲ್ ಡ್ ನಡತ್ಂಡ್.

ಬೊಂಬೈ ಬಿಲ್ಲವರ ಅಸೋಸಿಯೇಷನ್ ದ ಅಧ್ಯಕ್ಷೆರ್ ಹರೀಶ್ ಜಿ.ಅಮೀನ್ ಲೇಸ್ ಉದಿಪನ ಮಲ್ತೆರ್. ಈ ಪೊರ್ತುಡು ಸಮಾಜದ 450 ಪ್ರತಿಭಾವಂತ ವಿದ್ಯಾರ್ಥಿ ಲೆಗ್ ವಿದ್ಯಾರ್ಥಿ ವೇತನ ಪಟ್ಟಿಯೆರ್. ಅವ್ವತ್ತಾಂದೆ 2022 ನೇ ವರ್ಷದ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪಡೆದಿನ, ಬಿಲ್ಲವ ಸಮಾಜದ ಗಣ್ಯೆರಾಯಿನ ರಾಜ್ ಕುಮಾರ್ ಬೆಹರಿನ್,ಯುವವಾಹಿನಿ ಕೇಂದ್ರ ಸಮಿತಿದ ಅಧ್ಯಕ್ಷೆರ್ ಉದಯ ಅಮೀನ್ ಮಟ್ಟು ಮೆರೆಗ್ ಮಾನಾದಿಗೆ ನಡತ್ಂಡ್. ಈ ಪೊರ್ತುಡು ರಾಷ್ಟ್ರೀಯ ಬಿಲ್ಲವ ಮಹಾ ಮಂಡಲದ ಅಧ್ಯಕ್ಷೆರ್ ಡಾ.ರಾಜಶೇಖರ ಕೋಟ್ಯಾನ್, ಮುಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘದ ಅಧ್ಯಕ್ಷೆರ್ ಪ್ರಕಾಶ್ ಸುವರ್ಣ, ಪಡುಬೆಳ್ಳೆ ಶಾಲೆದ ಮುಖ್ಯೋಪಾಧ್ಯಾಯೆರ್ ಜಿನರಾಜ್ ಸಾಲ್ಯಾನ್,
ಸಂಘದ ಕಾರ್ಯದರ್ಶಿ ಹರೀಶ್ ಸಾಲ್ಯಾನ್,ಸುರೇಶ್ ಕುಮಾರ್ ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆರ್ ಶಕುಂತಲಾ ಡಿ. ಕೋಟ್ಯಾನ್, ಧನಂಜಯ ಕೋಟ್ಯಾನ್, ನಂದೀಶ್ ಪೂಜಾರಿ, ಕೇಶವ ಕೋಟ್ಯಾನ್, ಮೊಕುಲು ಮಾತ ಇತ್ತೆರ್. ಮಾನ್ಯ,ಪ್ರೇರಣಾ,ಸಿಂಚನಾ ದೇವೆರೆನ್ ಸುಗಿತೆರ್. ಬೊಂಬೈ ಬಿಲ್ಲವರ ಅಸೋಸೆಯೇಶನ್ ದ ಗೌರವ ಪ್ರಧಾನ ಕಾರ್ಯದರ್ಶಿ ಹರೀಶ್ ಜಿ ಸಾಲ್ಯಾನ್ ಪ್ರಸ್ತಾವಿಕವಾದ್ ಪಾತೆರಿಯೆರ್. ಶಿಕ್ಷಣ ಸಮಿತಿದ ಅಧ್ಯಕ್ಷೆರ್ ವಿಶ್ಚನಾಥ ತೋನ್ಸೆ ಸ್ವಾಗತ ಮಲ್ತೆರ್. ಕಾರ್ಯದರ್ಶಿ ಹರೀಶ್ ಜಿ ಪೂಜಾರಿ ಕೊಕ್ಕರ್ಣೆ, ವಿಜಯ ಕುಮಾರ್ ಕುಬೆವೂರು, ಸದಾಶಿವ ಪೂಜಾರಿ, ಬಿರುವೆರ್ ಕುಡ್ಲ ಮುಲ್ಕಿ ಕಾರ್ಯದರ್ಶಿ ಗಿರಿಧರ ಅಮೀನ್ ಮೊಕುಲು ಮಾತ ಲೇಸ್ ಡ್ ಪಾಲ್ ಪಡೆದಿತ್ತೆರ್.

Billava Association Mumbai- Students Scholarship distribution program at Mulki

Mulki: The Billava Association Mumbai organised a program at Mulki today to distribute scholarship to merited students.

The program was inaugurated by Harish G Amin president of Billava Association Mumbai.

About 450 scholarship was given to deserving students.Karnataka Rajyotsava awardee for the year 2022 from Billava community Raj Kumar Baharin and Yuvavahini Central Samithi President Uday Amin Mattu were honoured on the occasion.

National Billava Mahamandal president Dr Rajshekhar Kotian, Mulki Billava Samaj SevaSangha president Prakash Suvarna, Jinraj Salian headmaster of Padubelle School, Secretary of the association Harish Salian, Shakuntala D Kotian president of the women’s wing of the association , Dhananj Kotian Keshav Kotian, Nandish Poojary were present on the occasion.
The introductory speech was made by the honorary secretary of Billava Association Mumbai Harish G Salian.Sikshana Samithi President Vishwanath Tonse welcomed the gathering.