ಕಾಸ್ರೋಡುದ ಪೈವಳಿಕೆಡ್ ಜ.8 ಕ್ ಬಿರುವೆರ್ ಕುಡ್ಲ ಪೈವಳಿಕೆ ಘಟಕದ ಉದಿಪನ ಲೇಸ್ ಬಾಯಿಕಟ್ಟೆದ ಶ್ರೀ ಅಯ್ಯಪ್ಪ ಭಜನಾ ಮಂದಿರಡ್ ನಡಪರೆ ಉಂಡು.
ನೆತ್ತ ಅಂಗವಾದ್ ಅವ್ವೇ ದಿನ 10 ಗಂಟೆಗ್ ಇಸೇಸ ಆಕರ್ಷಣೆದೊಟ್ಟಿಗೆ ಜೋಡುಕಲ್ಲ್ ರ್ದ್ ಬಾಯಿಕಟ್ಟೆ ಮುಟ್ಟ ಬೇತೆ ಬೇತೆ ವಾದ್ಯಘೋಷ ಬೊಕ್ಕ ಪಿಲಿನಲಿಕೆದೊಟ್ಟಿಗೆ ಮೆರವಣಿಗೆ ನಡಪರೆ ಉಂಡು. ಬೊಕ್ಕ ಮಧ್ಯಾಹ್ನ 1 ಗಂಟೆಗ್ ಸರಿಯಾದ್ ಕಾಸ್ರೋಡುಡ್ ಸುರುತ ಸರ್ತಿ ಕುಡ್ಲದ ಪಿಲಿಲೆನ ಪಿಲಿ ಗೊಬ್ಬು ಲೇಸ್ ನಡಪುಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಪೆಜಮಾಡಿದ ಬಿಲ್ಲವರ ಸಂಘಡ್ ಜ.15ಕ್ ನಡಪರೆ ಇತ್ತಿನ ರಾಷ್ಟ್ರೀಯ ಬಿಲ್ಲವರ ಮಹಾಮಂಡಲದ ಬೊಳ್ಳಿ ಪರ್ಬ ಲೇಸ್ ನ್ ದುಂಬು ಪೋತುಂಡು ಪಂದ್ ರಾಷ್ಟ್ರೀಯ ಬಿಲ್ಲವರ ಮಹಾಮಂಡಲದ ಅಧ್ಯಕ್ಷೆರ್ ಡಾ.ರಾಜ್ ಶೇಖರ್ ಕೋಟ್ಯಾನ್ ತೆರಿಪಾಯೆರ್.
ಗುಲ್ಬರ್ಗದ ಚಿತ್ತಾಪುರ ಕರದಾಳ ಗ್ರಾಮದ ಬ್ರಹ್ಮಶ್ರೀ ನಾರಾಯಣಗುರು ಶಕ್ತಿ ಪೀಠದ ಪರಮ ಪೂಜ್ಯ ಡಾ.ಶ್ರೀ ಪ್ರಣಾವಾನಂದ ಸ್ವಾಮೀಜಿ ಬೊಕ್ಕ ಸಮಸ್ತ ಬಿಲ್ಲವ, ಈಡಿಗ, ನಾಮಧಾರಿ ಕುಲಬಾಂಧವರೆನ ಮುತಾಲಿಕೆಡ್ ಜ.6 ರ್ದ್ ಕುಡ್ಲದ ಕುದ್ರೋಳಿ ಕ್ಷೇತ್ರರ್ದ್ ಬೆಂಗ್ಲೂರ್ ದ ವಿಧಾನ ಸೌಧ ಮುಟ್ಟ ಐತಿಹಾಸಿಕ ಪಾದಯಾತ್ರೆ ನಡಪರೆ ಉಂಡು. ನೆಟ್ಟ್ ಸಮಾಜದ ಕುಲ ಬಾಂಧವೆರ್ ಎಚ್ಚದ ಸಂಖ್ಯೆಡ್ ಪಡೆವೊಂದುಲ್ಲೆರ್.ಅವ್ವತ್ತಂದೆ ಜ.14ಕ್ ಮಕರ ಸಂಕ್ರಾಂದಿ ಇಪ್ಪುನೆರ್ದಾವರ ಅಯ್ಯಪ್ಪ ಮಾಲೆ ಪಾಡಿನ ಸಮಾಜದ ಎಚ್ಚ ಭಾಂದವೆರ್ ಶಬರಿಮಲೆಕ್ ಪೋಪಿನೆರ್ದಾವರ ಈ ಲೇಸ್ ನ್ ಫೆಬ್ರವರಿ ತಿಂಗೊಲ್ದ ಅಕೇರಿಡ್ ಇಜ್ಜಿಂಡ ಮಾರ್ಚ್‌ಡ್ ಮಲ್ಪುನೇ ಪಂದ್ ನಿರ್ಧಾರ ಮಲ್ತ್ ದ ಪಂದ್ ಪಂಡೆರ್. ಈ ಪೊರ್ತುಡು ಮಹಾಮಂಡಲದ ಉಪಾಧ್ಯಕ್ಷೆರಾಯಿನ ಪೀತಾಂಬರ ಹೆರಾಜೆ, ಸೂರ್ಯಕಾಂತ್ ಜೆ. ಸುವರ್ಣ, ಪ್ರಧಾನ ಕಾರ್ಯದರ್ಶಿ ವಿಜಯ ಕುಮಾರ್ ಕುಬೆವೂರು, ಬೊಕ್ಕ ಬೇತೆ ಬೇತೆ ಸಂಘದ ಅಧ್ಯಕ್ಷೆರ್, ಪದಾಧಿಕಾರಿಲು ಇತ್ತೆರ್. ಫೆ.15 ಕ್ಕ್ ಪೆಜಮಾಡಿ ಬಿಲ್ಲವ ಸಂಘದ ಚಾವಡಿಡ್ ಬೊಳ್ಳಿ ಪರ್ಬದ ಲೇಸ್ ಮಲ್ಪರೆ ಅಟ್ಟಣೆ ಆದಿತ್ತ್ಂಡ್.
ಕಾರ್ಲ ನವೋದಯ ಗ್ರಾಮ ವಿಕಾಸ ಚಾರಿಟೇಬಲ್ ಟ್ರಸ್ಟ್ ನೆತ್ತ ಮುತಾಲಿಕೆಡ್ ಜ.8ಕ್ 19ನೇ ವರ್ಷದ ಮಿಯ್ಯಾರು ಲವಕುಶ ಜೋಡುಕರೆ ಕಂಬುಲ ನಡಪರೆ ಉಂಡು ಪಂದ್ ಇಂಧನ, ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಸಚಿವೆರ್ ಸುನಿಲ್ ಕುಮಾರ್ ತೆರಿಪಾದೆರ್.
ಇತ್ತೆ ಜಿಲ್ಲಾ ಕಂಬುಲ ಸಮಿತಿದ ಮುತಾಲಿಕೆಡ್ ಆಜೆರ್ದ್ ಏಳ್ ಜೋಡುಕರೆ ಕಂಬುಲ ಕೂಟಲು ನಡತ್ ದ್ಂಡ್. ಮಿಯ್ಯಾರ್ ಡ್ಲಾ ಸುಮಾರ್ 250 ಜತೆರ್ದ್ ಎಚ್ಚ ಎರ್ಲುಲು ಬೇತೆ ಬೇತೆ ವಿಭಾಗರ್ದ್ ಪಾಲ್ ಪಡೆಪುನ ನಿರೀಕ್ಷೆ ಉಂಡು ಪಂದ್ ಪಂಡೆರ್. ಬೊಕ್ಕ ಜಿಲ್ಲಾ ಕಂಬುಲ ಸಮಿತಿದ ಮಾರ್ಗದರ್ಶನದೊಟ್ಟಿಗೆ ಕಂಬುಲದ ಪೆರಿಯ ಅನುಭವಿ ಭಾಸ್ಕರ್ ಎಸ್ ಕೋಟ್ಯಾನ್, ಗುಣಪಾಲ ಕಡಂಬ, ಕಾರ್ಯಾಧ್ಯಕ್ಷೆರ್ ಜೀವನದಾಸ್ ಅಡ್ಯಂತಾಯ ಮೊಕ್ಲೆನ ಸಲಹೆ ಸೂಚನೆದೊಟ್ಟಿಗೆ ಈ ಕಂಬುಲನ್ ಆಯೋಜನೆ ಮಲ್ದ್ಂಡ್. ಅಂಚನೆ ಕರಾವಳಿ ಅಭಿವೃದ್ಧಿ ಪ್ರಾಧಿಕಾರರ್ದ್ ಸುಮಾರ್ 25 ಲಕ್ಷ ರೂ ಅನುದಾನದ ಪೊಸ ಸಭಾ ವೇದಿಕೆ ನಿರ್ಮಾಣ ಆವೊಂದು ಉಂಡು. ನೆತ್ತ ಉದಿಪನ ಲೇಸ್ ಆನಿ ಬಯ್ಯಗ್ ನಡಪುಂಡು. ಬಯ್ಯಗ್ ನಡಪುನ ಸಭಾ ಲೇಸ್ ಡ್ ಪೊಸ ಸಭಾ ವೇದಿಕೆದ ಉದಿಪನನ್ ಪ್ರವಾಸೋದ್ಯಮ, ಜೀವವೈವಿಧ್ಯ ಬೊಕ್ಕ ಪರಿಸರ ಇಲಾಖೆದ ಸಚಿವೆರ್ ಆನಂದ್ ಸಿಂಗ್ ಮಲ್ಪುವೆರ್.
ಈ ಲೇಸ್ ಡ್ ಮಲ್ಲ ಬಿನ್ನೆರಾದ್ ಕೇಂದ್ರ ಸಚಿವೆ ಶೋಭಾ ಕರಂದ್ಲಾಜೆ ಮೀನುಗಾರಿಕೆ ಇಲಾಖೆ, ಬಂದರು ಬೊಕ್ಕ ಒಳನಾಡಿನ ಸಾರಿಗೆ ಇಲಾಖೆ ಸಚಿವೆರ್ ಎಸ್ ಅಂಗಾರ, ಸಮಾಜ ಕಲ್ಯಾಣ ಇಲಾಖೆ ಸಚಿವೆರ್ ಕೋಟ ಶ್ರೀನಿವಾಸ್ ಪೂಜಾರಿ, ಮಾಜಿ ಸಿಎಂ ವೀರಪ್ಪ ಮೊಯ್ಲಿ, ಡಿಸಿಸಿ ಬ್ಯಾಂಕ್ ಅಧ್ಯಕ್ಷೆರ್ ಎಂ. ಎನ್ ರಾಜೇಂದ್ರ ಕುಮಾರ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಪ್ರಕಟಣೆಡ್ ತೆರಿಪಾದೆರ್.
ವಿರಾರ್ : ಬೊಂಬೈದ ವಿರಾರ್ ಈಸ್ಟ್ ದ ಮೋರಿಯಾ ನಗರದ ಶ್ರೀ ಕಡಲ್ದ ಅಪ್ಪೆ ಲಕ್ಷ್ಮೀ ಮಂತ್ರದೇವತೆ ಕೊರಗಜ್ಜ ಸಾನಿಧ್ಯಡ್ ಮಂತ್ರದೇವತೆ ದರ್ಶನ ಸೇವೆ ಜ.8 ಐತಾರ ಮಧ್ಯಾಹ್ನ 3 ಗಂಟೆಗ್ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್ ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಮಂತ್ರದೇವತೆನ ಕೃಪೆಗ್ ಪಾತ್ರರಾವೊಡು ಪಂದ್ ಪ್ರಶಾಂತ್ ಶೆಟ್ಟಿ ಲೆಪ್ಪೋಲೆಡ್ ತೆರಿಪಾದೆರ್.
January 8th: Virar East- Dharshan Seva at Sri Lakshmi Mantradevathe Koragajja Sanidya
Virar: Moriya Nagar- Sri Lakshmi Mantradevathe Koragajja Sanidya dharshan seva will be held on Sunday the 8 th of January at 3 noon
All devotees are requested to participate in the divine event
Invite from Prashant Shetty
ದೇಶಡ್ ಕೊರೊನಾದ ಪೊಸ ಸೀಕ್ ಪೋಡಿಗೆ ಕಟ್ಟಾಂಡ, ಉತ್ತರ ಪ್ರದೇಶದ ಉನ್ನಾವೊದ ಹಳ್ಳಿಡ್ ದಡಾರ ಸೀಕ್ ಬೈದ್ಂಡ್.
ಮೂಜಿ ವಾರಡ್ ಒಂಜೇ ಕುಟುಂಬದ ಮೂಜಿ ಜೋಕುಲು ದಡಾರರ್ದ್ ತೀರ್ ಪೋತೆರ್ ಪಂದ್ ವೈದ್ಯಾಧಿಕಾರಿ ಸತ್ಯ ಪ್ರಕಾಶ್ ತೆರಿಪಾದೆರ್. ಅತ್ತಂದೆ ಉಂದುವೇ ಗ್ರಾಮಡ್ ನನ 35 ಜೋಕುಲು ಈ ಸೀಕ್ ಡ್ ನರೆಲೊಂದು ಉಲ್ಲೆರ್ ಪಂದ್ ತೆರಿದ್ ಬೈದ್ಂಡ್.
ವಿರಾರ್ : ಬೊಂಬೈದ ವಿರಾರ್ ಈಸ್ಟ್ ಮೋರಿಯಾ ನಗರ ಶ್ರೀ ಕಡಲ್ದ ಅಪ್ಪೆ ಲಕ್ಷ್ಮೀ ಮಂತ್ರದೇವತೆ ಕೊರಗಜ್ಜ ಸಾನಿಧ್ಯಡ್ ಸಾರ್ವಜನಿಕ 4ನೇ ಶ್ರೀ ಸತ್ಯನಾರಾಯಣ ಪೂಜೆ ಜ.15 ಐತಾರ ಮಧ್ಯಾಹ್ನ 4 ಗಂಟೆಗ್ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್ ಗಂಧ ಪ್ರಸಾದ ದೆತೊಂದು ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಪ್ರಶಾಂತ್ ಶೆಟ್ಟಿ ಲೆಪ್ಪೋಲೆಡ್ ತೆರಿಪಾದೆರ್.
ಬೆಂಗ್ಲೂರ್: ಈಡಿಗ, ಬಿಲ್ಲವ, ನಾಮಧಾರಿ ಸೇರಿನಂಚನೆ 26 ಉಪ ಪಂಗಡಲೆನ ಶೈಕ್ಷಣಿಕ, ಆರ್ಥಿಕ ಬೊಕ್ಕ ಸಾಮಾಜಿಕ ಉನ್ನತಿಗಾದ್ “ಶ್ರೀ ನಾರಾಯಣಗುರು ಅಭಿವೃದ್ಧಿ ನಿಗಮ ಮಂಡಳಿ” ಸ್ಥಾಪನೆ ಮಲ್ಪುವ ಪಂದ್ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಘೋಷಣೆ ಮಲ್ತೆರ್.
ಇಂಧನ, ಕನ್ನಡ ಬೊಕ್ಕ ಸಂಸ್ಕೃತಿ ಸಚಿವೆರ್ ವಿ.ಸುನೀಲ್ ಕುಮಾರ್ ನ ಮುತಾಲಿಕೆಡ್ ಬಿಜೆಪಿ ರಾಜ್ಯಾಧ್ಯಕ್ಷೆರ್ ನಳಿನ್ ಕುಮಾರ್ ಕಟೀಲ್, ಶಾಸಕೆರ್ ಕೆ.ರಘುಪತಿ ಭಟ್, ಬಿಲ್ಲವ ಸಮಾಜದ ಸ್ವಾಮೀಜಿಲು ಬೊಕ್ಕ ಮುಖಂಡೆರ್ ಗುರುವಾರ ಮುಖ್ಯಮಂತ್ರಿನ್ ಭೇಟಿಯಾದ್ ಈ ಬಗೆಟ್ ಮನವರಿಕೆ ಮಲ್ಪುನಗ “ಶ್ರೀ ನಾರಾಯಣಗುರು ಅಭಿವೃದ್ಧಿ ನಿಗಮ ಮಂಡಳಿ”ನ್ ಸ್ಥಾಪನೆ ಮಲ್ಪುವ ಪಂದ್ ಭರವಸೆ ಕೊರಿಯೆರ್.
ಬಿಲ್ಲವ ಬೊಕ್ಕ ಈಡಿಗ ಸಮಾಜದ ಮಹಾಮಲ್ಲ ಬೇಡಿಕೆನ್ ಈಡೇರಿಸಾಯಿನ ಮುಖ್ಯಮಂತ್ರಿ ಬಸವರಾಜ್ ಬೊಮ್ಮಾಯಿ ಮೆರೆಗ್ ಶಾಸಕೆರ್ ರಘುಪತಿ ಭಟ್ ಸೊಲ್ಮೆ ಸಂದಾದೆರ್.
ಈ ಪೊರ್ತುಡು ಆರ್ಯ ಈಡಿಗ ಸಂಸ್ಥಾನ ಸೋಲೂರು ರೇಣುಕಾಪೀಠದ ಶ್ರೀ ವಿಖ್ಯಾತಾನಂದ ಸ್ವಾಮೀಜಿ, ಸೋಲೂರು ಮಠತ ಆರ್ಯ ಶ್ರೀ ರೇಣುಕಾನಂದ ಸ್ವಾಮೀಜಿ, ಸಾಗರ ಶಾಸಕೆರ್ ಹರತಾಲು ಹಾಲಪ್ಪ, ಕಾಪು ಶಾಸಕೆರ್ ಲಾಲಾಜಿ ಆರ್. ಮೆಂಡನ್, ಬೆದ್ರ ಶಾಸಕೆರ್ ಉಮಾನಾಥ್ ಕೋಟ್ಯಾನ್, ಭಟ್ಕಳ ಶಾಸಕೆರ್ ಸುನೀಲ್ ನಾಯ್ಕ್, ಬಿಲ್ಲವ ಸಮಾಜದ ಮುಖಂಡೆರ್ ಪ್ರವೀಣ್ ಪೂಜಾರಿ, ಬಿ ಎನ್ ಶಂಕರ ಪೂಜಾರಿ ಇತ್ತೆರ್.
ಕುಡ್ಲ: ಕುಕ್ಕರ್ ಬಾಂಬ್ ಪುಡಾದಿನ ಕೇಸ್ ಡ್ ಶಿವಮೊಗ್ಗರ್ದ್ ಅರೆಸ್ಟ್ ಆಯಿನ ಆರೋಪಿ ಮಾಝ್ ಮುನೀರ್ ಡ ಸಂಪರ್ಕ ದೀತಿನ ಕೊಣಾಜೆ ನಡುಪದವು ಪಿಎ ಇಂಜಿನಿಯರಿಂಗ್ ಕಾಲೇಜ್ ದ ಕಲ್ಪಾರ್ಥಿ, ಒಡಿಪು ಮೂಲದ ರಿಹಾನ್ ಶೇಖ್ ನ್ ಏಳ್ ಜನತ ಎನ್ ಐಎ ಕೂಟದಕುಲು ಕಾಲೇಜ್ ಗ್ ರೈಡ್ ಮಲ್ತ್ ದ್ ವಶಕ್ಕ್ ಪಡೆದ್ ಬೆಂಗ್ಲೂರ್ ಗ್ ಲೆತೊಂದು ಪೋತೆರ್.
ರಿಹಾನ್ ಶೇಖ್ ನ್ ಶಿವಮೊಗ್ಗದ ಪುರಲೆದ ತುಂಗಾ ತುದೆತ ಬರಿಟ್ಟ್ ಬಾಂಬ್ ಪುಡಪುನೆನ್ ಪ್ರಯೋಗ ಮಲ್ತೊಂದು ಇತ್ತಿನ ಕೇಸ್ ಡ್ ಬೊಕ್ಕ ಐಸಿಸ್ ಸಂಘಟನೆದೊಟ್ಟಿಗೆ ಸಂಪರ್ಕಡ್ ಅರೆಸ್ಟ್ ಆತಿನ ಉಗ್ರೆರಾಯಿನ ಮಾಝ್ ಮುನೀರ್ ಡ ನಿರಂತರ ಸಂಪರ್ಕ ಬೊಕ್ಕ ಬೇತೆ ಬೇತೆ ಚಟುವಟಿಕೆಲೆಡ್ ಒಟ್ಟಿಗೆ ಪಾಲ್ ಪಡೆಯಿನ ಇಚಾರದ ಮಿತ್ತ್ ವಶಕ್ ಪಡೆತೆರ್.
ಕುಡ್ಲ: ತುಮಕೂರುಡ್ ಇಪ್ಪುನ ಬಂಟ್ವಾಳದ ಜವನೆ ಒರಿ ಮಂಗಳಮುಖಿಯೆರೆನ ಜಾಲಗ್ ಬೂರ್ದು ಲಿಂಗ ಬದಲ್ ಮಲ್ತೊನ್ನ ಘಟನೆ ನಡತ್ಂಡ್.
ಇಂಚಿನ ಸುಮಾರ್ ಘಟನೆಲು ಕುಡ್ಲಡ್ ನಡತೊಂದು ಉಂಡು ಪಂದ್ ತೆರಿದ್ ಬೈದ್ಂಡ್. ಅವ್ವತ್ತಂದೆ ಈ ಜವನಡ ಆಯನ ಸಂಬಂಧದಕುಲು ಸುಮಾರ್ 15 ನಿಮಿಷ ಪಾತೆರ್ದಿನ ಆಡಿಯೋ ವೈರಲ್ ಆತ್ಂಡ್. ಉಂದುವೇ ರೀತಿ ಸುಮಾರ್ ಜವನೆರ್ ಈ ಜಾಲಗ್ ಬಲಿ ಆತೆರ್. ಈ ಜಾಲದ ಬೆರಿಪತ್ತ್ ದ್ ಜವನೆರೆನ ಕೂಟ ಒಂಜಿ ನೆತ್ತ ಪಿರವು ಇಪ್ಪುನ ಶಕ್ತಿ ಬೊಕ್ಕ ಅಕ್ಲೆಗ್ ಇಪ್ಪುನ ಲಾಭ ದಾದ ಪಂದ್ ನಡಿಯೆರೆ ದುಂಬಾತ್ಂಡ್. ಅವ್ವತ್ತಂದೆ ದೇರಳಕಟ್ಟೆದ ಜವನೆ ಒರಿ ಬೆಂಗ್ಲೂರ್ ಗ್ ಬತ್ತಿನ ಮುಸ್ಲಿಂ ಜವನೆರೆನ್ ಮಂಗಳಮುಖಿಯೆರೆನ ಕೈತಡೆ ಲೆತೊಂದು ಪೋದು ಲಿಂಗ ಬದಲ್ ಮಲ್ಪರೆ ಒತ್ತಾಯ ಮಲ್ತೊಂದುಲ್ಲೆರ್ ಪಂದ್ ತೆರಿದ್ ಬೈದ್ಂಡ್. ಮದಿಮೆ ಆದ್ ಜೋಕುಲು ಇತ್ತಿನಕುಲುಲ ಡೈವೋರ್ಸ್ ಕೊರ್ದು ಲಿಂಗ ಬದಲ್ ಮಲ್ತೊಂದು ಉಲ್ಲೆರ್. ಬಂಟ್ವಾಳ, ದೇರಳಕಟ್ಟೆ, ಕುಡ್ಲ ಭಾಗದ ಸುಮಾರ್ ಜವನೆರ್ ನಾಪತ್ತೆ ಆದ್, ಲಿಂಗ ಬದಲ್ ಮಲ್ತೊಂದು ಪೊಣ್ಣಾದ್ ಬದಲ್ ಆತೆರ್ ಪಂದ್ ತೆರಿದ್ ಬೈದ್ಂಡ್. ಈ ಜಾಲದ ವಿರುದ್ಧ ಮುಸ್ಲಿಂ ಧಾರ್ಮಿಕ ಗುರುಕುಲು ಜಾಗೃತಿ ಮೂಡಿಸಾವೊಡು ಪಂದ್ ಜಾಲತಾಣಡ್ ತೆರಿಪಾವೊಂದು ಉಲ್ಲೆರ್.
ಡೆಲ್ಲಿ: ಸಂಸತ್ತ್ ದ ಬಜೆಟ್ ಅಧಿವೇಶನ ಜ.31 ರ್ದ್ ಸುರು ಆದ್ ಏ. 6 ಕ್ ಮುಗಿಪುನ ಸಾಧ್ಯತೆ ಉಂಡು ಪಂದ್ ತೆರಿದ್ ಬೈದ್ಂಡ್.
ಸಂಸತ್ತ್ ದ ಸೆಂಟ್ರಲ್ ಹಾಲ್‌ಡ್ ಲೋಕಸಭೆ ಬೊಕ್ಕ ರಾಜ್ಯಸಭೆತ ಒಟ್ಟು ಸೇರಿಗೆಡ್ ನಡಪರೆ ಇಪ್ಪುನ ಅಧಿವೇಶನಡ್ ರಾಷ್ಟ್ರಪತಿ ದ್ರೌಪದಿ ಮುರ್ಮು ಮೇರ್ ಭಾಷಣ ಮಲ್ಪುನೆರ್ದ್ ಅಧಿವೇಶನ ಸುರು ಆಪುಂಡು. ಕರಿನ ವರ್ಷ ಆಗಸ್ಟ್‌ಡ್ ಅಧ್ಯಕ್ಷೆರ್ ಮುರ್ಮು ಮೇರ್ ರಾಷ್ಟ್ರಪತಿ ಆಯಿನ ಬೊಕ್ಕ ಸಂಸತ್ತ್ ದ ರಡ್ಡ್ ಸದನಡ್ಲಾ ಮಲ್ಪುನ ಸುರುತ ಭಾಷಣ ಉಂದು ಆಪುಂಡು. ಬಜೆಟ್ ಅಧಿವೇಶನದ ಸುರುತ ದಿನನೇ ರಡ್ಡ್ ಸದನಡ್ ಆರ್ಥಿಕ ಸಮೀಕ್ಷೆನ್ ಮಂಡನೆ ಮಲ್ಪುವೆರ್ ಪಂದ್ ತೆರಿದ್ ಬೈದ್ಂಡ್. ಪನವುದ ಸಚಿವೆರ್ ನಿರ್ಮಲಾ ಸೀತಾರಾಮನ್ ಮೇರ್ ಫೆ. 1 ಕ್ ಬಜೆಟ್ ಮಂಡನೆ ಮಲ್ಪುನ ಸಾಧ್ಯತೆ ಉಂಡು ಬೊಕ್ಕ ಅಧಿವೇಶನದ ಸುರುತ ಭಾಗ ಫೆ.10 ಮುಟ್ಟ ನಡಪುಂಡು. ರಡ್ಡನೇ ಭಾಗ ಮಾರ್ಚ್ 6 ಕ್ ಸುರು ಆದ್ ಏ.6 ಕ್ ಚರ್ಚೆಗ್ ಬರ್ಪುನ ಸಾಧ್ಯತೆ ಉಂಡು. ಕರಿನ ಅಧಿವೇಶನಡ್, 9 ಮಸೂದೆನ್ ಲೋಕಸಭೆಟ್ ಮಂಡನೆ ಮಲ್ದೆರ್. 7 ಮಸೂದೆನ್ ರಾಜ್ಯಸಭೆಟ್ ಮಂಡನೆ ಮಲ್ದೆರ್.
